Канон святителю Савве I Сербскому (второй)

Припев: Святи́телю, о́тче Са́вво, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 25 января (12 января ст. ст.); 12 сентября (30 августа ст. ст.)

Глас 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Похваля́ющу мне́ твое́ житие́, ко Христу́ твое́ дерзнове́ние я́ко стяжа́в, от бога́тых Ду́ха сокро́вищ ка́плю ра́зума, о́тче, да́ти ми́ молю́ся, я́ко да досто́йно похвали́ти тя́ возмогу́, хвалы́ досто́йнаго.

Из ко́рене блага́го блажа́йшая о́трасль прозя́бл еси́, Бо́жия ра́зума вода́ми напая́емь, и пло́д благоуха́нен яви́лся еси́, житие́м твои́м из ю́ности, богоно́се, сердца́ и ду́ши весели́ши пою́щих тя́.

О, прему́драго твоего́ к Бо́гу ра́зума! И́мже прехи́трил еси́ отца́ твоего́, еле́ня лови́твою Христу́, о́тче, въеле́нив ду́шу твою́, Его́же любо́вию жго́мый, ко исто́чнику безсме́ртия Тому́ прите́кл еси́.

Па́че ума́ су́щих любо́вию небе́сных добро́т подви́жимь, земны́х малоле́пия избежа́в, еле́ня тече́нием Христа́ взыска́л еси́, от Него́же жела́емых, Са́вво о́тче, не погреши́л еси́.

Чистоты́ любо́вию одержи́мь, благоро́дие души́ плотолю́бием не порабо́тив, те́м, ны́не чистоты́ венцы́ прие́мля, со а́нгелы у Христа́ весели́шися, к Нему́же о на́с, Са́вво о́тче, моли́ся.

Богоро́дичен: Я́же от земли́ до небе́с дося́гшая Ле́ствица показа́ся Иа́кову, Е́юже Бо́г Челове́ком сподо́бися бы́ти, Благослове́нная Пречи́стая, неизрече́нно чу́до и недоумева́емо виде́ние. Спаса́й к Тебе́ прибега́ющия.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

На го́ру ра́зума доброде́телей возше́д, в чу́вственней же горе́ Афо́н, я́ко ина́го Исаа́ка подо́бно, сама́го себе́ возве́л еси́, иде́же, я́ко всесожже́ния овча́, се́рдце твое́ мы́сленно поже́рл еси́.

Свети́льник — твою́ ду́шу слеза́ми украша́я, ра́но ко Христу́ у́тренюя, ру́к же просте́ртием в моли́твах Амали́ка — те́ло умертви́л еси́ и на го́ру безстра́стия возше́л еси́.

Безстра́стия любо́вию пострека́емь, плотска́я взыгра́ния изсуши́л еси́, ду́шу же твою́ Боже́ственными сия́нии просвети́в, и на́м у́бо све́т разу́мный, Са́вво о́тче, улучи́ти моли́ся.

Ю́ности цве́т гла́дом увяди́в, воздержа́нием у́ды умертви́в, поще́нием те́ла отве́рглся еси́, бде́нием и моли́твами возмога́я, о Го́споде же любо́вию верха́ доброде́телей, Са́вво, дости́гл еси́.

Благоро́дием высо́к и доброду́шием изя́щен, ра́зума му́дростию удивле́н бы́л еси́, цве́т я́ко прекра́сный, чистото́ю сия́я, и све́тлым смире́нием, Са́вво о́тче, украси́лся еси́.

Богоро́дичен: Ма́ти Бо́жия Пречи́стая, Благослове́нная и Всенепоро́чная, души́ моея́ стру́пы исцели́, и стра́сти плотски́я отжени́, и свободи́ у́м мо́й от вся́каго вре́да, и от вра́жия мя́ напа́сти изми́, Влады́чице.

Седа́лен, гла́с 8.

Па́влово насажде́ние, и Аполло́сово прие́мый напое́ние, и ва́шея ве́ры насажде́ние, и уче́нием напое́ние, вся́ возраща́яй Бо́г прия́л е́сть. Люде́й ва́ших благоче́стия ве́рою, моли́твами ва́шими возрасти́в, умно́жи, от Того́ я́ко ве́рнии раби́ и де́латели разу́мнии трудо́в возме́здия досто́йно прия́ли есте́, Симео́не преподо́бне, Са́вво свяще́нне, богоно́снии отцы́, па́стырие и учи́телие, Первопа́стыря и Учи́теля Христа́ моли́те ста́до ва́ше в ми́ре сохрани́ти и спасти́ ду́ши на́ша.

Богоро́дичен: О Тебе́ ра́дуется, Благода́тная, вся́кая тва́рь, а́нгельский собо́р и челове́ческий ро́д, освяще́нный хра́ме и раю́ слове́сный, де́вственная похвало́, из Нея́же Бо́г воплоти́ся, и Младе́нец бы́сть, пре́жде ве́к Сы́й Бо́г на́ш: ложесна́ бо Твоя́ престо́л сотвори́ и чре́во Твое́ простра́ннее небе́с соде́ла. О Тебе́ ра́дуется, Благода́тная, вся́кая тва́рь, сла́ва Тебе́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Многочи́сленное зла́то со отце́м разда́вше, о́ба, я́ко му́дрии домовлады́ки, тле́нными нетле́нная измени́вше, я́же ны́не восприе́млюще, ра́дуетеся, и на́с ко Христу́ моли́твами ва́шими, пою́щих, вы́ спаса́йте.

Челове́ка отца́ призва́л еси́, а́нгела же ко Христу́ предпусти́л еси́, его́же посто́м иста́явшия святы́я мо́щи мироточе́ние моли́твами твои́ми устро́ил еси́, в кра́йнее извеще́ние се́рдца твоего́ проше́ния.

Суему́дренный го́тфин, братовоскормле́ние ва́ше, и стра́х Бо́жий, и кля́тву преоби́дев, потща́ся оте́чество твое́ озло́бити, его́же такова́го у́мысла премени́ти не возмо́г, Бо́жию суду́ того́ пре́дал еси́.

Поху́лен, и́же му́др о себе́, я́ко и се́й несмы́сленный, благосове́тующа тя́ не прие́мь, Бо́жию ме́сть на ся́ привлече́: ме́чь бо, его́же на па́ству твою́, о́тче, наостри́, а́нгелом всеконе́чно в се́рдце свое́ прия́ше.

Просвеща́еми благода́тию Креста́ Твоего́ святи́и Твои́, Влады́ко, страну́ люде́й свои́х Тебе́ ве́рою приведо́ша, сы́н со отце́м, Са́вва и Симео́н богому́дреннии, и́хже моли́твами спаси́ от пога́ных нахо́да пою́щия: си́ле Твое́й сла́ва, Милосе́рде.

Богоро́дичен: Но́в, я́коже Моисе́й, яви́вся, устро́ил еси́, я́ко о́н, ски́нию в пусты́ни, в горе́ святе́й огра́ду, ю́же превозрасти́л еси́ трудо́в твои́х по́ты и возложи́л еси́ Бо́жии Ма́тери, ю́же и сохраня́й ко Го́споду с Не́ю моли́твами.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Я́ко Госпо́день учени́к, Влады́ки твоего́ благоутро́бие, о́тче, подража́я, разсла́бленнаго в це́рковь не́сл еси́. Врачева́нием же, ко Христу́ моли́твами и слеза́ми, обно́щно прилежа́в ему́, здра́ва от земли́ воздви́гл еси́.

Ста́рцу свято́му, твоему́ отцу́, в животе́ его́ послушли́в бы́л еси́, у́мер же о́н и во гро́бе тебе́ еди́наго послу́ша: ми́ро бо его́, мно́гими проси́мо и не улучи́мо, твои́м, о́тче, посла́нием оби́льно лю́дем свои́м сие́ источи́.

Други́й Илия́ ты́ яви́лся еси́, гра́д с небесе́ моли́твою, я́коже о́н о́гнь, све́л еси́ и, си́м царя́ удиви́в, ужаси́л еси́: в сла́ву Бо́жию и проти́вным на удивле́ние сия́, о́тче, сотвори́л еси́, о все́х возмога́ющу тя́ Христу́ Бо́гу на́шему.

Сопоста́т, ца́рь у́грин, на оте́чество твое́ подви́гся, твои́ми словесы́ свире́пства премени́ся, дивя́ся су́щей в тебе́ свя́тости, умили́вся, возврати́ся, гра́дное же ка́мение лобза́я, глаго́лаше: ди́вен Бо́г во святы́х Свои́х.

Ка́мене краеуго́льна, иму́ща в се́рдцы Христа́ утвержде́ние, пре́лести утвержде́ние си́льно испрове́ргша, Це́ркви же необори́мое основа́ние яви́стеся, Ю́же сохраня́йте непоколеби́му, Са́вво свяще́нне и Симео́не богоно́се, моли́твами ва́шими.

Богоро́дичен: Ко Христу́ Бо́гу вхо́да жела́юще, предводя́щую Тя́ взыска́вше, су́щей Ти́ небе́сней Бо́жией Це́ркви, хра́м Твоего́ вхо́да на земли́ Твои́ уго́дницы, Богома́ти, воздвиго́ша, в не́мже не преста́й даю́щи по́мощь сла́вящим Тя́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Пресве́тлыя Тро́ицы пе́рвее же́ртвенник се́рдце твое́ сотвори́л еси́ и це́рковь Бо́гу Спа́су во оте́честве твое́м воздви́гл еси́, в не́йже, о́тче, первопресто́лен равноапо́стольный учи́тель от Христа́ удосто́ился еси́ и сло́во жи́зни лю́дем твои́м источи́л еси́.

Бра́та твоего́ уме́рша слы́шав, а́нгелу, ко Христу́ дерзнове́нием, ду́шу его́ возврати́ти повеле́л еси́, и сего́ вдушевле́нна, прише́д, обре́л еси́. Оле, ве́ры! Оле, дерзнове́ния! Чу́до, о́тче, вои́стинну ужа́сно: зе́мен сы́й, небе́сному повеле́л еси́.

Мы́сленное мо́ре страсте́й успи́в поще́нием, чу́вственное же, бе́здну ми́лости призва́в, свире́по волну́емо, сло́вом укроти́л еси́, кора́бль же спа́сл от потопле́ния и в не́м су́щия в ве́ру приве́л еси́.

Его́же вся́ боя́тся и трепе́щут я́ко Творца́ и Го́спода, Иису́са Христа́ всего́ стяжа́в, Христа́ в се́рдцы твое́м нося́, Христа́ в себе́ име́я, глаго́люща, мо́рю и ве́тром Того́ си́лою запрети́л еси́, и вся́, о́тче, повину́шася тебе́, я́ко Того́ изя́щну ученику́.

Тро́ичен: Пренача́льное Естество́ и Триипоста́сное Еди́нство: О́тче и Сы́не и Ду́ше Пресвяты́й, Све́те и Животе́ Богонача́льный, приими́ моли́твенники о на́с Твоя́ уго́дники, спаса́й Це́ркви Твоя́, в Тя́ ве́рующия, и сподо́би ны́ в ми́ре сла́вити Твою́ держа́ву.

Богоро́дичен: Ви́дети жела́юще Твоего́ Сы́на и Бо́га, небе́снаго сла́ву Ца́рствия, Богоро́дице, Са́вва и Симео́н преподо́бнии, сла́ву земна́го ца́рствия оста́вивше и Сего́ Кре́ст на ра́му взе́мше, после́доваша живоно́сным Его́ и Боже́ственным стопа́м.

Конда́к, гла́с 8.

Я́ко первосвяти́теля вели́каго и апо́столов соо́бщника, Це́рковь прославля́ет тя́ люде́й твои́х, преподо́бне, но я́ко име́я дерзнове́ние ко Христу́ Бо́гу, моли́твами твои́ми от вся́ких на́с бе́д спаса́й, да зове́м ти́: ра́дуйся, о́тче Са́вво богому́дре.

И́кос:

Житие́м, я́ко а́нгел на земли́, о́тче, яви́лся еси́, челове́к бо сы́й естество́м, и безпло́тных чистоте́ уподо́бился еси́. Те́мже и похва́льная удивля́еши на́с зва́ти такова́я: ра́дуйся, отца́ благочести́ва прозябе́ние и ма́тере благогове́йны прижи́тие; ра́дуйся, моли́твами, богода́нне, и да́вшему тя́ измла́да после́довав; ра́дуйся, поще́ния све́тлый ра́сте, чистото́ю благоуха́нне; ра́дуйся, целому́дрия сто́лпе, и́мже вся́кая стра́сть попра́ся; ра́дуйся, смире́нием высо́кий, де́монов горды́ню низложи́вый; ра́дуйся, свети́льниче многосве́тлый, возведы́й ко Христу́ лю́ди твоя́; ра́дуйся, це́рквей воздви́жение и святи́телем освяще́ние; ра́дуйся, сиро́т пита́телю и ни́щим пода́телю благоутро́бный; ра́дуйся, апо́столов равноре́вностне ева́нгельским науче́нием; ра́дуйся, му́чеником сострада́льне стра́нствия хожде́нием; ра́дуйся, чудоде́лателю ди́вных о Бо́зе и ужа́сных чуде́с; ра́дуйся, похвало́ оте́честву твоему́, спаса́й пою́щих тя́. Ра́дуйся, о́тче Са́вво богому́дре.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Христа́, на́с ра́ди пло́тию на земли́ во́лею стра́нствовавша, любо́вию, о́тче, побежда́емь, престо́ла высоту́ во́лею оста́вив, восто́ку же, и за́паду, и глубина́м морски́м, я́ко со́лнце, обхо́дно стра́нствовал еси́.

Я́ко Христо́в учени́к, и нача́льник, от Него́ поста́влен, оте́чествия чужди́х обходя́, прие́млемь сы́й от ни́х и люби́мь, удивле́н же, о́тче, и дароноси́мь: покаря́ше бо вся́ су́щая в тебе́ Бо́жия любо́вь, кро́тость же и беззло́бие.

И́же бе́здну Сотвори́вый веле́нием, Того́ ученика́ сия́ позна́вши тя́, в боле́зни твое́й тебе́, о́тче, послужи́, ры́бу вели́ку, я́ко рука́ми, волно́ю взе́мши и, в корабли́ тебе́ возлежа́щу, в твои́ ру́це предложи́.

В корабли́ пучи́ну с тобо́ю плову́щии, мо́ре, повину́вшееся тебе́ и дароноси́мо, ви́девше, у́жасом, о́тче, одержи́ми бы́вше, от безду́шнаго научи́вшеся в Бо́жий ра́зум, умили́вшеся, поклони́шася твое́й свя́тости.

Твоего́ се́рдца жела́ние исполня́я, его́же ра́ди по земли́ стра́нствовал еси́, в чужестра́нственнем гра́де Бо́г ду́х тво́й прие́млет, и́хже в животе́ чудесы́ и по сме́рти пе́рстию гро́ба и гро́бом удиви́л еси́.

Богоро́дичен: Стопа́м после́дуя собо́р преподо́бных из чре́ва Твоего́ неизрече́нно Возсия́вшему неизглаго́ланным рождество́м, Де́во Ма́ти, с небе́сными ли́ки сочта́ся. С ни́миже мо́лимся: испроси́ на́м, чту́щим Тя́, грехо́в оставле́ние.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Земля́ от свои́х не́др предаде́ тя́ священноле́пна, це́ла же и неразруши́ма, благоуха́нием и чудесы́ удивля́юща, гра́да жи́тели пе́рстию гро́ба твоего́, проро́чески вопию́щия: пра́ведницы во ве́ки живу́т.

Ка́мене сапфи́ра облежа́щая пе́рсть страда́льнаго твоего́ те́ла дража́йши, о́тче, показа́ся: целе́бна бо, и чудотвори́ва, и па́че зла́та ве́рными разделя́ема, пою́щими досто́йно: честна́ пред Го́сподем сме́рть святы́х Его́.

Царе́й благочести́вых святы́ню и благослове́ние, твое́ свято́е и честно́е те́ло держа́ща, со́нным явле́нием пода́ти увещава́еши, е́же ча́да твоя́ со святи́тели и свяще́нными, я́ко пребога́тое сокро́вище, во своя́ принесо́ша.

Христолюби́вый Владисла́в самоде́ржец, я́ко дре́вле Дави́д пред киво́том, предходя́ пред святы́м твои́м те́лом, ра́довашеся, поя́: вели́чит душа́ моя́ Го́спода, я́ко даде́ мне́ отца́ и учи́теля. И в це́ркви свое́й, ра́дуяся, положи́.

Я́ко ны́не престо́лу Влады́ки своего́ предстоя́ще и отону́дными заря́ми осия́еми, Симео́не богоно́се, Са́вво богому́дре, моли́твами ва́шими, святи́и, страсте́й греха́ на́с изба́вите, и пога́ных нахо́да, и разли́чных обстоя́ний.

Богоро́дичен: Плеща́ми херуви́мскими стра́шными носи́мый Влады́ка, на престо́ле я́коже о́гненнем, в Твою́, Чи́стая, всели́ся утро́бу и пло́ти прия́тием челове́ческое обожи́ существо́. К Нему́же спаси́ моли́твами Твои́ми пою́щия Тя́, Ма́терь Его́.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Мно́г в терпе́нии и к зло́бе благоотда́тлив в животе́ и по сме́рти, о́тче, показа́лся еси́: слуки́й бо припо́лз и гро́ба твоего́ верху́ возле́г, во отмще́ния ме́сто здра́ва поста́вил еси́, и́же, в це́ркви ходя́, велича́ше Го́спода.

Преизя́щная ко Христу́ ва́ша любо́вь ны́не объяви́ся благода́тию, да́нною ва́м, Симео́не и Са́вво: мо́щи ва́ша благоуха́нны и мироточи́вы, па́мять сла́вна и святопочита́ема. И́миже уверя́емии, глаго́лем: па́мять пра́ведников с похвала́ми быва́ет.

Ны́не ви́димых глаго́лем, су́щих же, я́же лю́бящих Бо́га, иде́же а́нгели прини́кнути жела́ют, я́же ва́м досто́йно угото́ванная, о́ко не ви́де, и у́хо не слы́ша, Па́вел веща́ет, и кто́ пости́жет си́х изглаго́лати?

Зря́ще а́нгельския и Боже́ственныя све́тлости и все́х святы́х ли́ки, Са́вво свяще́нне и Симео́не богоно́се, с ни́ми моли́те Человеколю́бца жития́ исправле́ние и грехо́в оставле́ние пода́ти хва́лящим ве́рою ва́шу па́мять.

О́ба в житии́ единоду́шна, о́ба в пусты́ни спо́стника, о́ба вы́ше ума́ благи́х получи́вша, о́ба Тро́ице ны́не предстоя́ща, обе́ма о́бщее хвалосло́вие прино́сим, е́же прие́мше, отцы́, певцы́ ва́ша моли́твами ва́шими спаса́йте.

Богоро́дичен: Еди́на преиму́щая дерзнове́ние, Влады́чице, за ве́сь ми́р Сы́ну Твоему́ моли́ся. Не помяни́ безчи́сленных собла́зн на́ших, покры́й лю́ди, вопию́щия Ти́ уми́льным гла́сом: спаси́, Чи́стая Богоро́дице, Тебе́ досто́йно велича́ющих.

Свети́лен:

Свети́льник тя́ многосве́тлый, святи́телю, зна́ем, моли́твы ча́до, пусты́ни воспита́ние, чистоты́ оби́телище, мона́хом спо́стника, ни́щим пита́теля, святи́телем све́тлость. Те́мже тя́, о́тче, ве́рнии, пое́м.

Сла́ва: От Восто́ка мы́сленнаго Со́лнца, Христа́, светоза́рныя лучи́ возсия́вшия и мра́чную страну́ на за́паде люде́й свои́х просвети́вшия све́тлостию слове́с и доброде́тели де́ланием, и ны́не не преста́йте Го́споду моля́щеся и сия́ в ми́ре сохрани́ти, Са́вво и Симео́не, па́мять ва́шу почита́ющих.

Богоро́дичен: Прему́дрость Ипоста́сную, и Пресу́щное Сло́во, и Врача́ все́х ро́ждшая, Всечи́стая Цари́це, гное́ния и я́звы исцели́ ду́ш на́ших и сохраня́й неприкоснове́нны вся́каго нахо́да всегда́ Тя́ моля́щих, Засту́пнице ми́ра.

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Похвалѧ́ющꙋ мнѣ̀ твоѐ житїѐ, ко хрⷭ҇тꙋ̀ твоѐ дерзнове́нїе ꙗ҆́кѡ стѧжа́въ, ѿ бога́тыхъ дх҃а сокро́вищъ ка́плю ра́зꙋма, ѻ҆́тче, да́ти мѝ молю́сѧ, ꙗ҆́кѡ да досто́йнѡ похвали́ти тѧ̀ возмогꙋ̀, хвалы̀ досто́йнаго.

И҆зъ ко́рене бл҃га́гѡ бл҃жа́йшаѧ ѻ҆́трасль прозѧ́блъ є҆сѝ, бж҃їѧ ра́зꙋма вода́ми напаѧ́емь, и҆ пло́дъ бл҃гоꙋха́ненъ ꙗ҆ви́лсѧ є҆сѝ, житїе́мъ твои́мъ и҆зъ ю҆́ности, бг҃оно́се, сердца̀ и҆ дꙋ́шы весели́ши пою́щихъ тѧ̀.

Ѽ премꙋ́драгѡ твоегѡ̀ къ бг҃ꙋ ра́зꙋма! и҆́мже прехи́трилъ є҆сѝ ѻ҆тца̀ твоего̀, є҆ле́нѧ лови́твою хрⷭ҇тꙋ̀, ѻ҆́тче, в̾еле́нивъ дꙋ́шꙋ твою̀, є҆гѡ́же любо́вїю жго́мый, ко и҆сто́чникꙋ безсме́ртїѧ томꙋ̀ прите́клъ є҆сѝ.

Па́че ᲂу҆ма̀ сꙋ́щихъ любо́вїю нбⷭ҇ныхъ добро́тъ подви́жимь, земны́хъ малолѣ́пїѧ и҆збѣжа́въ, є҆ле́нѧ тече́нїемъ хрⷭ҇та̀ взыска́лъ є҆сѝ, ѿ негѡ́же жела́емыхъ, са́вво ѻ҆́тче, не погрѣши́лъ є҆сѝ.

Чистоты̀ любо́вїю ѡ҆держи́мь, бл҃горо́дїе дꙋшѝ плотолю́бїемъ не порабо́тивъ: тѣ́мъ ны́нѣ чистоты̀ вѣнцы̀ прїе́млѧ, со а҆́гг҃лы ᲂу҆ хрⷭ҇та̀ весели́шисѧ, къ немꙋ́же ѡ҆ на́съ, са́вво ѻ҆́тче, моли́сѧ.

Бг҃оро́диченъ: Ꙗ҆́же ѿ землѝ до небе́съ досѧ́гшаѧ лѣ́ствица, показа́сѧ і҆а́кѡвꙋ, є҆́юже бг҃ъ чл҃вѣ́комъ сподо́бисѧ бы́ти, благослове́ннаѧ пречⷭ҇таѧ: неизрече́нно чꙋ́до, и҆ недоꙋмѣва́емо видѣ́нїе, спаса́й къ тебѣ̀ прибѣга́ющыѧ.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебє̀, є҆ди́не чл҃вѣколю́бче.

На го́рꙋ ра́зꙋма добродѣ́телей возше́дъ, въ чꙋ́вственнѣй же горѣ̀ а҆ѳѡ́нъ, ꙗ҆́кѡ и҆на́го і҆саа́ка подо́бнѡ сама́го себѐ возве́лъ є҆сѝ: и҆дѣ́же ꙗ҆́кѡ всесожже́нїѧ ѻ҆вча̀ се́рдце твоѐ мы́сленнѡ поже́рлъ є҆сѝ.

Свѣти́льникъ твою̀ дꙋ́шꙋ слеза́ми ᲂу҆краша́ѧ, ра́нѡ ко хрⷭ҇тꙋ̀ ᲂу҆́тренюѧ, рꙋ́къ же просте́ртїемъ въ моли́твахъ а҆мали́ка тѣ́ло ᲂу҆мертви́лъ є҆сѝ, и҆ на го́рꙋ безстра́стїѧ возше́лъ є҆сѝ.

Безстра́стїѧ любо́вїю пострѣка́емь, плотска̑ѧ взыгра̑нїѧ и҆зсꙋши́лъ є҆сѝ: дꙋ́шꙋ же твою̀ бжⷭ҇твенными сїѧ̑нїи просвѣти́въ, и҆ на́мъ ᲂу҆́бѡ свѣ́тъ разꙋ́мный, са́вво ѻ҆́тче, ᲂу҆лꙋчи́ти, моли́сѧ.

Ю҆́ности цвѣ́тъ гла́домъ ᲂу҆вѧди́въ, воздержа́нїемъ ᲂу҆́ды ᲂу҆мертви́въ, поще́нїемъ тѣ́ла ѿве́рглсѧ є҆сѝ, бдѣ́нїемъ и҆ моли́твами возмога́ѧ, ѡ҆ гдⷭ҇ѣ же любо́вїю верха̀ добродѣ́телей, са́вво, дости́глъ є҆сѝ.

Бл҃горо́дїемъ высо́къ, и҆ добродꙋ́шїемъ и҆зѧ́щенъ, ра́зꙋма мꙋ́дростїю ᲂу҆дивле́нъ бы́лъ є҆сѝ, цвѣ́тъ ꙗ҆́кѡ прекра́сный чисто́тою сїѧ́ѧ, и҆ свѣ́тлымъ смире́нїемъ, са́вво ѻ҆́тче, ᲂу҆краси́лсѧ є҆сѝ.

Бг҃оро́диченъ: Мт҃и бж҃їѧ пречⷭ҇таѧ, бл҃гослове́ннаѧ и҆ всенепоро́чнаѧ, дꙋшѝ моеѧ̀ стрꙋ́пы и҆сцѣлѝ, и҆ стра̑сти плотскі̑ѧ ѿженѝ: и҆ свободѝ ᲂу҆́мъ мо́й ѿ всѧ́кагѡ вре́да, и҆ ѿ вра́жїѧ мѧ̀ напа́сти и҆змѝ, влⷣчце.

Сѣда́ленъ, гла́съ и҃.

Па́ѵлово насажде́нїе, и҆ а҆поллѡ́сово прїе́мый напое́нїе, и҆ ва́шеѧ вѣ́ры насажде́нїе, и҆ ᲂу҆че́нїемъ напое́нїе, всѧ̑ возраща́ѧй бг҃ъ прїѧ́лъ є҆́сть. Люде́й ва́шихъ бл҃гоче́стїѧ вѣ́рою, моли́твами ва́шими возрасти́въ ᲂу҆мно́жи, ѿ тогѡ̀ ꙗ҆́кѡ вѣ́рнїи рабѝ и҆ дѣ́латели разꙋ́мнїи, трꙋдѡ́въ возмє́здїѧ досто́йнѡ прїѧ́ли є҆стѐ, сѷмеѡ́не преподо́бне, са́вво свѧще́нне, бг҃оно́снїи ѻ҆ц҃ы̀, па́стырїе и҆ ᲂу҆чи́телїе, первопа́стырѧ и҆ ᲂу҆чи́телѧ хрⷭ҇та̀ моли́те, ста́до ва́ше въ ми́рѣ сохрани́ти, и҆ спастѝ дꙋ́шы на́шѧ.

Бг҃оро́диченъ: Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆сщ҃е́нный хра́ме, и҆ раю̀ слове́сный, дѣ́вственнаѧ похвало̀, и҆зъ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ престо́лъ сотворѝ, и҆ чре́во твоѐ простра́ннѣе небе́съ содѣ́ла. Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Многочи́сленное зла́то со ѻ҆ц҃е́мъ разда́вше, ѻ҆́ба ꙗ҆́кѡ мꙋ́дрїи домовлады̑ки тлѣ́нными нетлѣ̑ннаѧ и҆змѣни́вше, ꙗ҆̀же ны́нѣ воспрїе́млюще ра́дꙋетесѧ, и҆ на́съ ко хрⷭ҇тꙋ̀ моли́твами ва́шими пою́щихъ вы̀ спаса́йте.

Человѣ́ка ѻ҆тца̀ призва́лъ є҆сѝ, а҆́гг҃ла же ко хрⷭ҇тꙋ̀ предпꙋсти́лъ є҆сѝ, є҆гѡ́же посто́мъ и҆ста́ѧвшыѧ ст҃ы̑ѧ мѡ́щи, мѷроточе́нїе мл҃твами твои́ми ᲂу҆стро́илъ є҆сѝ, въ кра́йнее и҆звѣще́нїе се́рдца твоегѡ̀ проше́нїѧ.

Сꙋемꙋ́дренный го́тѳинъ, братовоскормле́нїе ва́ше и҆ стра́хъ бж҃їй и҆ клѧ́твꙋ преѡби́дѣвъ, потща́сѧ ѻ҆те́чество твоѐ ѡ҆ѕло́бити: є҆гѡ́же такова́гѡ ᲂу҆́мысла премѣни́ти не возмо́гъ, бж҃їю сꙋдꙋ̀ того̀ пре́далъ є҆сѝ.

Похꙋ́ленъ и҆́же мꙋ́дръ ѡ҆ себѣ̀, ꙗ҆́кѡ и҆ се́й несмы́сленный, благосовѣ́тꙋюща тѧ̀ не прїе́мь, бж҃їю ме́сть на сѧ̀ привлечѐ: ме́чь бо, є҆го́же на па́ствꙋ твою̀, ѻ҆́тче, наѡстрѝ, а҆́гг҃ломъ всеконе́чнѡ въ се́рдце своѐ прїѧ́ше.

Просвѣща́еми бл҃года́тїю крⷭ҇та̀ твоегѡ̀ ст҃і́и твоѝ, влⷣко, странꙋ̀ люде́й свои́хъ тебѣ̀ вѣ́рою приведо́ша, сы́нъ со ѻ҆тце́мъ, са́вва и҆ сѷмеѡ́нъ бг҃омꙋ́дреннїи, и҆́хже моли́твами спасѝ ѿ пога́ныхъ нахо́да пою́щыѧ: си́лѣ твое́й сла́ва, милосе́рде.

Бг҃оро́диченъ: Но́въ ꙗ҆́коже мѡѷсе́й ꙗ҆ви́всѧ, ᲂу҆стро́илъ є҆сѝ ꙗ҆́кѡ ѻ҆́нъ ски́нїю въ пꙋсты́ни, въ горѣ̀ ст҃ѣ́й ѡ҆гра́дꙋ, ю҆́же превозрасти́лъ є҆сѝ трꙋдѡ́въ твои́хъ пѡ́ты, и҆ возложи́лъ є҆сѝ бж҃їи мт҃ри, ю҆́же и҆ сохранѧ́й ко гдⷭ҇ꙋ съ не́ю моли́твами.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ꙗ҆́кѡ гдⷭ҇ень ᲂу҆чени́къ, влⷣки твоегѡ̀ бл҃гоꙋтро́бїе, ѻ҆́тче, подража́ѧ, разсла́бленнаго въ це́рковь не́слъ є҆сѝ: врачева́нїемъ же, ко хрⷭ҇тꙋ̀ моли́твами и҆ слеза́ми, ѡ҆бно́щнѡ прилѣжа́въ є҆мꙋ̀, здра́ва ѿ землѝ воздви́глъ є҆сѝ.

Ста́рцꙋ ст҃о́мꙋ, твоемꙋ̀ ѻ҆тцꙋ̀ въ животѣ̀ є҆гѡ̀ послꙋшли́въ бы́лъ є҆сѝ, ᲂу҆́меръ же ѻ҆́нъ, и҆ во гро́бѣ тебѐ є҆ди́наго послꙋ́ша: мѵ́ро бо є҆гѡ̀ мно́гими проси́мо и҆ не ᲂу҆лꙋчи́мо, твои́мъ, ѻ҆́тче, посла́нїемъ ѻ҆би́льнѡ лю́демъ свои̑мъ сїѐ и҆сточѝ.

Дрꙋгі́й и҆лїа̀ ты̀ ꙗ҆ви́лсѧ є҆сѝ, гра́дъ съ нб҃сѐ моли́твою, ꙗ҆́коже ѻ҆́нъ ѻ҆́гнь, све́лъ є҆сѝ, и҆ си́мъ царѧ̀ ᲂу҆диви́въ ᲂу҆жаси́лъ є҆сѝ, въ сла́вꙋ бж҃їю и҆ проти̑внымъ на ᲂу҆дивле́нїе сїѧ̑, ѻ҆́тче, сотвори́лъ є҆сѝ, ѡ҆ всѣ́хъ возмога́ющꙋ тѧ̀ хрⷭ҇тꙋ̀ бг҃ꙋ на́шемꙋ.

Сопоста́тъ ца́рь ᲂу҆́гринъ, на ѻ҆те́чество твоѐ подви́гсѧ, твои́ми словесы̀ свирѣ́пства премѣни́сѧ, дивѧ́сѧ сꙋ́щей въ тебѣ̀ свѧ́тости, ᲂу҆мили́всѧ возврати́сѧ: гра́дное же ка́менїе лобза́ѧ, глаго́лаше: ди́венъ бг҃ъ во ст҃ы́хъ свои́хъ.

Ка́мене краеꙋго́льна, и҆мꙋ́ща въ се́рдцы хрⷭ҇та̀ ᲂу҆твержде́нїе, пре́лести ᲂу҆твержде́нїе си́льно и҆спрове́ргша, цр҃кви же неѡбори́мое ѡ҆снова́нїе ꙗ҆ви́стесѧ: ю҆́же сохранѧ́йте непоколеби́мꙋ, са́вво свѧще́нне и҆ сѷмеѡ́не бг҃оно́се, моли́твами ва́шими.

Бг҃оро́диченъ: Ко хрⷭ҇тꙋ̀ бг҃ꙋ вхо́да жела́юще, предводѧ́щꙋю тѧ̀ взыска́вше, сꙋ́щей тѝ нбⷭ҇нѣй бж҃їей цр҃кви, хра́мъ твоегѡ̀ вхо́да на землѝ твоѝ ᲂу҆гѡ́дницы, бг҃ома́ти, воздвиго́ша, въ не́мже не преста́й даю́щи по́мощь сла́вѧщымъ тѧ̀.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Пресвѣ́тлыѧ трⷪ҇цы пе́рвѣе же́ртвенникъ се́рдце твоѐ сотвори́лъ є҆сѝ, и҆ це́рковь бг҃ꙋ сп҃сꙋ во ѻ҆те́чествѣ твое́мъ воздви́глъ є҆сѝ, въ не́йже, ѻ҆́тче, первопресто́ленъ равноапⷭ҇льный ᲂу҆чи́тель ѿ хрⷭ҇та̀ ᲂу҆досто́илсѧ є҆сѝ, и҆ сло́во жи́зни лю́демъ твои̑мъ и҆сточи́лъ є҆сѝ.

Бра́та твоего̀ ᲂу҆ме́рша слы́шавъ, а҆́гг҃лꙋ, ко хрⷭ҇тꙋ̀ дерзнове́нїемъ, дꙋ́шꙋ є҆гѡ̀ возврати́ти повелѣ́лъ є҆сѝ, и҆ сего̀ вдꙋшевле́нна прише́дъ ѡ҆брѣ́лъ є҆сѝ. ѽле вѣ́ры! ѽле дерзнове́нїѧ! чꙋ́до, ѻ҆́тче, вои́стиннꙋ ᲂу҆жа́сно, зе́менъ сы́й, нбⷭ҇номꙋ повелѣ́лъ є҆сѝ.

Мы́сленное мо́ре страсте́й ᲂу҆спи́въ поще́нїемъ, чꙋ́вственное же бе́зднꙋ ми́лости призва́въ, свирѣ́пѡ волнꙋ́емо сло́вомъ ᲂу҆кроти́лъ є҆сѝ, кора́бль же спа́слъ ѿ потопле́нїѧ, и҆ въ не́мъ сꙋ́щыѧ въ вѣ́рꙋ приве́лъ є҆сѝ.

Є҆гѡ́же всѧ̑ боѧ́тсѧ и҆ трепе́щꙋтъ, ꙗ҆́кѡ творца̀ и҆ гдⷭ҇а, і҆и҃са хрⷭ҇та̀ всего̀ стѧжа́въ, хрⷭ҇та̀ въ се́рдцы твое́мъ носѧ̀, хрⷭ҇та̀ въ себѣ̀ и҆мѣ́ѧ глаго́люща, мо́рю и҆ вѣ́трѡмъ тогѡ̀ си́лою запрети́лъ є҆сѝ: и҆ всѧ̑, ѻ҆́тче, повинꙋ́шасѧ тебѣ̀, ꙗ҆́кѡ тогѡ̀ и҆зѧ́щнꙋ ᲂу҆ченикꙋ̀.

Трⷪ҇ченъ: Пренача́льное є҆стество̀ и҆ трїѷпоста́сное є҆ди́нство, ѻ҆́тче и҆ сн҃е и҆ дш҃е прест҃ы́й, свѣ́те и҆ животѐ бг҃онача́льный, прїимѝ моли́твенники ѡ҆ на́съ твоѧ̑ ᲂу҆го́дники, спаса́й цр҃кви твоѧ̑, въ тѧ̀ вѣ́рꙋющыѧ, и҆ сподо́би ны̀ въ ми́рѣ сла́вити твою̀ держа́вꙋ.

Бг҃оро́диченъ: Ви́дѣти жела́юще твоегѡ̀ сн҃а и҆ бг҃а, нбⷭ҇нагѡ сла́вꙋ црⷭ҇твїѧ, бцⷣе, са́вва и҆ сѷмеѡ́нъ преподо́бнїи, сла́вꙋ земна́гѡ ца́рствїѧ ѡ҆ста́вивше, и҆ сегѡ̀ крⷭ҇тъ на ра́мꙋ взе́мше, послѣ́доваша живонѡ́снымъ є҆гѡ̀ и҆ бжⷭ҇твєннымъ стопа́мъ.

Конда́къ, гла́съ и҃.

Ꙗ҆́кѡ первосвѧти́телѧ вели́каго и҆ а҆пⷭ҇лѡвъ соѻ́бщника, цр҃ковь прославлѧ́етъ тѧ̀ люде́й твои́хъ, преподо́бне: но ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ бг҃ꙋ, моли́твами твои́ми ѿ всѧ́кихъ на́съ бѣ́дъ спаса́й, да зове́мъ тѝ: ра́дꙋйсѧ, ѻ҆́тче са́вво бг҃омꙋ́дре.

І҆́косъ:

Житїе́мъ ꙗ҆́кѡ а҆́гг҃лъ на землѝ, ѻ҆́тче, ꙗ҆ви́лсѧ є҆сѝ, человѣ́къ бо сы́й є҆стество́мъ, и҆ безпло́тныхъ чистотѣ̀ ᲂу҆подо́билсѧ є҆сѝ. Тѣ́мже и҆ похва̑льнаѧ ᲂу҆дивлѧ́еши на́съ зва́ти такова̑ѧ: ра́дꙋйсѧ, ѻ҆тца̀ благочести́ва прозѧбе́нїе, и҆ ма́тере благоговѣ́йны прижи́тїе. ра́дꙋйсѧ, моли́твами бг҃ода́нне, и҆ да́вшемꙋ тѧ̀ и҆змла́да послѣ́довавъ. ра́дꙋйсѧ, поще́нїѧ свѣ́тлый ра́сте, чистото́ю бл҃гоꙋха́нне. ра́дꙋйсѧ, цѣломꙋ́дрїѧ сто́лпе, и҆́мже всѧ́каѧ стра́сть попра́сѧ. ра́дꙋйсѧ, смире́нїемъ высо́кїй, де́мѡнѡвъ горды́ню низложи́вый. ра́дꙋйсѧ, свѣти́льниче многосвѣ́тлый, возведы́й ко хрⷭ҇тꙋ̀ лю́ди твоѧ̑. ра́дꙋйсѧ, цр҃квей воздви́женїе и҆ свѧти́телємъ ѡ҆свѧще́нїе. ра́дꙋйсѧ, сиро́тъ пита́телю и҆ ни́щымъ пода́телю благоꙋтро́бный. ра́дꙋйсѧ, а҆пⷭ҇лѡвъ равноре́вностне є҆ѵⷢ҇льскимъ наꙋче́нїемъ. ра́дꙋйсѧ, мꙋ́ченикѡмъ сострада́льне стра́нствїѧ хожде́нїемъ. ра́дꙋйсѧ, чꙋдодѣ́лателю ди́вныхъ ѡ҆ бз҃ѣ и҆ ᲂу҆жа́сныхъ чꙋде́съ. ра́дꙋйсѧ, похвало̀ ѻ҆те́чествꙋ твоемꙋ̀, спаса́й пою́щихъ тѧ̀. ра́дꙋйсѧ, ѻ҆́тче са́вво бг҃омꙋ́дре.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Хрⷭ҇та̀ на́съ ра́ди пло́тїю на землѝ во́лею стра́нствовавша, любо́вїю, ѻ҆́тче, побѣжда́емь, престо́ла высотꙋ̀ во́лею ѡ҆ста́вивъ, восто́кꙋ же и҆ за́падꙋ и҆ глꙋбина́мъ морски̑мъ ꙗ҆́кѡ со́лнце ѡ҆бхо́дно стра́нствовалъ є҆сѝ.

Ꙗ҆́кѡ хрⷭ҇то́въ ᲂу҆чени́къ, и҆ нача́льникъ ѿ негѡ̀ поста́вленъ, ѻ҆те́чєствїѧ чꙋжди́хъ ѡ҆бходѧ̀, прїе́млемь сы́й ѿ ни́хъ и҆ люби́мь, ᲂу҆дивле́нъ же, ѻ҆́тче, и҆ дароноси́мь: покарѧ́ше бо всѧ̑ сꙋ̑щаѧ въ тебѣ̀ бж҃їѧ любо́вь, кро́тость же и҆ безѕло́бїе.

И҆́же бе́зднꙋ сотвори́вый велѣ́нїемъ, тогѡ̀ ᲂу҆ченика̀ сїѧ̀ позна́вши тѧ̀, въ болѣ́зни твое́й тебѣ̀, ѻ҆́тче, послꙋжѝ, ры́бꙋ вели́кꙋ, ꙗ҆́кѡ рꙋка́ми, волно́ю взе́мши, и҆ въ кораблѝ тебѣ̀ возлежа́щꙋ, въ твоѝ рꙋ́цѣ предложѝ.

Въ кораблѝ пꙋчи́нꙋ съ тобо́ю пловꙋ́щїи, мо́ре повинꙋ́вшеесѧ тебѣ̀ и҆ дароноси́мо ви́дѣвше, ᲂу҆́жасомъ, ѻ҆́тче, ѡ҆держи́ми бы́вше, ѿ бездꙋ́шнагѡ наꙋчи́вшесѧ въ бж҃їй ра́зꙋмъ, ᲂу҆мили́вшесѧ поклони́шасѧ твое́й свѧ́тости.

Твоегѡ̀ се́рдца жела́нїе и҆сполнѧ́ѧ, є҆гѡ́же ра́ди по землѝ стра́нствовалъ є҆сѝ, въ чꙋжестра́нственнѣмъ гра́дѣ бг҃ъ дꙋ́хъ тво́й прїе́млетъ, и҆̀хже въ животѣ̀ чꙋдесы̀, и҆ по сме́рти пе́рстїю гро́ба и҆ гро́бомъ ᲂу҆диви́лъ є҆сѝ.

Бг҃оро́диченъ: Стопа́мъ послѣ́дꙋѧ собо́ръ преподо́бныхъ и҆зъ чре́ва твоегѡ̀ неизрече́ннѡ возсїѧ́вшемꙋ, неизглаго́ланнымъ ржⷭ҇тво́мъ, дв҃о мт҃и, съ небе́сными ли́ки сочта́сѧ: съ ни́миже мо́лимсѧ, и҆спросѝ на́мъ, чтꙋ́щымъ тѧ̀, грѣхѡ́въ ѡ҆ставле́нїе.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Землѧ̀ ѿ свои́хъ нѣ́дръ предаде́ тѧ свѧщеннолѣ́пна, цѣ́ла же и҆ неразрꙋши́ма, благоꙋха́нїемъ и҆ чꙋдесы̀ ᲂу҆дивлѧ́юща гра́да жи́тели, пе́рстїю гро́ба твоегѡ̀, прⷪ҇ро́чески вопїю́щыѧ: пра́вєдницы во вѣ́ки живꙋ́тъ.

Ка́мене сапфі́ра, ѡ҆блежа́щаѧ пе́рсть страда́льнагѡ твоегѡ̀ тѣ́ла, дража́йши, ѻ҆́тче, показа́сѧ: цѣле́бна бо и҆ чꙋдотвори́ва, и҃ па́че зла́та вѣ́рными раздѣлѧ́ема пою́щими досто́йнѡ: честна̀ пред̾ гдⷭ҇емъ сме́рть ст҃ы́хъ є҆гѡ̀.

Царе́й бл҃гочести́выхъ ст҃ы́ню и҆ бл҃гослове́нїе, твоѐ ст҃о́е и҆ честно́е тѣ́ло держа́щихъ, со́ннымъ ꙗ҆вле́нїемъ пода́ти ᲂу҆вѣщава́еши: є҆́же ча̑да твоѧ̑ со ст҃и́тєли и҆ свѧще́нными, ꙗ҆́кѡ пребога́тое сокро́вище во своѧ̑ принесо́ша.

Хрⷭ҇толюби́вый владисла́въ самоде́ржецъ, ꙗ҆́кѡ дре́вле дв҃дъ пред̾ кївѡ́томъ, предходѧ̀ пред̾ ст҃ы́мъ твои́мъ тѣ́ломъ, ра́довашесѧ поѧ̀: вели́читъ дꙋша̀ моѧ̀ гдⷭ҇а, ꙗ҆́кѡ дадѐ мнѣ̀ ѻ҆ц҃а̀ и҆ ᲂу҆чи́телѧ, и҆ въ це́ркви свое́й ра́дꙋѧсѧ положѝ.

Ꙗ҆́кѡ ны́нѣ прⷭ҇то́лꙋ влⷣки своегѡ̀ предстоѧ́ще, и҆ ѿѻнꙋ́дными зарѧ́ми ѡ҆сїѧ́еми, сѷмеѡ́не бг҃оно́се, са́вво бг҃омꙋ́дре, моли́твами ва́шими, ст҃і́и, страсте́й грѣха̀ на́съ и҆зба́вите, и҆ пога́ныхъ нахо́да, и҆ разли́чныхъ ѡ҆бстоѧ́нїй.

Бг҃оро́диченъ: Плеща́ми херꙋві́мскими стра́шными носи́мый влⷣка, на прⷭ҇то́лѣ ꙗ҆́коже ѻ҆́гненнѣмъ, въ твою̀, чⷭ҇таѧ, всели́сѧ ᲂу҆тро́бꙋ, и҆ пло́ти прїѧ́тїемъ человѣ́ческое ѡ҆божѝ сꙋщество̀, къ немꙋ́же спасѝ мл҃твами твои́ми пою́щыѧ тѧ̀ мт҃рь є҆гѡ̀.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Мно́гъ въ терпѣ́нїи и҆ къ ѕло́бѣ благоѿда́тливъ, въ животѣ̀ и҆ по сме́рти, ѻ҆́тче, показа́лсѧ є҆сѝ: слꙋкі́й бо припо́лзъ, и҆ гро́ба твоегѡ̀ верхꙋ̀ возле́гъ, во ѿмще́нїѧ мѣ́сто здра́ва поста́вилъ є҆сѝ, и҆́же въ це́ркви ходѧ̀ велича́ше гдⷭ҇а.

Преизѧ́щнаѧ ко хрⷭ҇тꙋ̀ ва́ша любо́вь ны́нѣ ѡ҆б̾ѧви́сѧ бл҃года́тїю да́нною ва́мъ, сѷмеѡ́не и҆ са́вво: мѡ́щи ва́шѧ благоꙋха̑нны и҆ мѷроточи̑вы, па́мѧть сла́вна и҆ свѧтопочита́ема, и҆́миже ᲂу҆вѣрѧ́емїи глаго́лемъ: па́мѧть пра́ведникѡвъ съ похвала́ми быва́етъ.

Ны́нѣ ви́димыхъ глаго́лемъ, сꙋ́щихъ же ꙗ҆̀же лю́бѧщихъ бг҃а, и҆дѣ́же а҆́гг҃ли прини́кнꙋти жела́ютъ, ꙗ҆̀же ва́мъ досто́йнѡ ᲂу҆готѡ́ваннаѧ, ѻ҆́ко не ви́дѣ, и҆ ᲂу҆́хо не слы́ша, па́ѵелъ вѣща́етъ, и҆ кто̀ пости́жетъ си́хъ и҆зглаго́лати;

Зрѧ́ще а҆́гг҃льскїѧ и҆ бж҃е́ствєнныѧ свѣ́тлости, и҆ всѣ́хъ ст҃ы́хъ ли́ки, са́вво сщ҃е́нне и҆ сѷмеѡ́не бг҃оно́се, съ ни́ми моли́те чл҃вѣколю́бца, житїѧ̀ и҆справле́нїе и҆ грѣхѡ́въ ѡ҆ставле́нїе пода́ти хва́лѧщымъ вѣ́рою ва́шꙋ па́мѧть.

Ѻ҆́ба въ житїѝ є҆динодꙋ̑шна, ѻ҆́ба въ пꙋсты́ни спѡ́стника, ѻ҆́ба вы́ше ᲂу҆ма̀ бл҃ги́хъ полꙋчи̑вша, ѻ҆́ба трⷪ҇цѣ ны́нѣ предстоѧ̑ща, ѻ҆бѣ́ма ѻ҆́бщее хвалосло́вїе прино́симъ: є҆́же прїе́мше, ѻ҆ц҃ы̀, пѣвцы̀ ва́шѧ моли́твами ва́шими спаса́йте.

Бг҃оро́диченъ: Є҆ди́на преимꙋ́щаѧ дерзнове́нїе, влⷣчце, за ве́сь мі́ръ сн҃ꙋ твоемꙋ̀ моли́сѧ. не помѧнѝ безчи́сленныхъ собла̑знъ на́шихъ, покры́й лю́ди вопїю́щыѧ тѝ ᲂу҆ми́льнымъ гла́сомъ: спасѝ, чⷭ҇таѧ бцⷣе, тебѐ досто́йнѡ велича́ющихъ.

Свѣти́ленъ.

Свѣти́льникъ тѧ̀ многосвѣ́тлый, ст҃и́телю, зна́емъ, моли́твы ча́до, пꙋсты́ни воспита́нїе, чистоты̀ ѻ҆би́телище, мона́хѡмъ спо́стника, ни́щымъ пита́телѧ, ст҃и́телємъ свѣ́тлость. тѣ́мже тѧ̀, ѻ҆́тче, вѣ́рнїи пое́мъ.

Сла́ва: Ѿ восто́ка мы́сленнагѡ сл҃нца хрⷭ҇та̀, свѣтоза̑рныѧ лꙋчы̀ возсїѧ́вшыѧ, и҆ мра́чнꙋю странꙋ̀ на за́падѣ люде́й свои́хъ просвѣти́вшыѧ свѣ́тлостїю слове́съ, и҆ добродѣ́тели дѣ́ланїемъ: и҆ ны́нѣ не преста́йте гдⷭ҇ꙋ молѧ́щесѧ, и҆ сїѧ̑ въ ми́рѣ сохрани́ти, са́вво и҆ сѷмеѡ́не, па́мѧть ва́шꙋ почита́ющихъ.

Бг҃оро́диченъ: Премꙋ́дрость ѵ҆поста́снꙋю и҆ пресꙋ́щное сло́во, и҆ врача̀ всѣ́хъ ро́ждшаѧ, всечⷭ҇таѧ цр҃и́це, гноє́нїѧ и҆ ꙗ҆́звы и҆сцѣлѝ дꙋ́шъ на́шихъ, и҆ сохранѧ́й неприкосновє́нны всѧ́кагѡ нахо́да, всегда́ тѧ молѧ́щихъ, застꙋ́пнице мі́ра.

Труды святителя Саввы Сербского

• Хиландарский устав

Смотреть все труды в библиотеке →

Краткое житие святителя Саввы I, архиепископа Сербского

Свя­ти­тель Сав­ва, воз­люб­лен­ное и лу­че­зар­ное све­ти­ло на серб­ском ду­хов­ном небо­сво­де, ро­дил­ся в бла­го­че­сти­вой се­мье пра­ви­те­лей Нема­ней. Из этой се­мьи про­изо­шло мно­же­ство свя­тых, как еще при жиз­ни свя­ти­те­ля Сав­вы, так и в те­че­ние двух по­сле­ду­ю­щих сто­ле­тий, вклю­чая и его от­ца, пре­по­доб­но­го Си­мео­на Ми­ро­то­чи­во­го (Ве­ли­ко­го жу­па­на Сте­фа­на), его мать, свя­тую Ана­стас­ию (Ан­ну) и его бра­та, пре­по­доб­но­го Сте­фа­на Пер­во­вен­чан­но­го. В воз­расте 17 лет, укло­нив­шись от бра­ка, свя­ти­тель Сав­ва при­нял мо­на­ше­ский по­стриг на Свя­той Го­ре Афон и ско­ро про­явил се­бя как непре­клон­ный во­ин и по­движ­ник Хри­стов. Че­ты­ре го­да спу­стя его отец от­рек­ся от пре­сто­ла Серб­ско­го ко­ролев­ства, по­стриг­ся в мо­на­ха и при­шел на Свя­тую Го­ру, где вме­сте со свя­ти­те­лем Сав­вой ос­но­вал Хи­лан­дар­ский мо­на­стырь. Поз­же свя­ти­тель Сав­ва был на­прав­лен Гос­по­дом об­рат­но в Сер­бию и объ­еди­нил свою смя­тен­ную стра­ну, по­лу­чив от все­лен­ско­го пат­ри­ар­ха ав­то­ке­фа­лию для Серб­ской Церк­ви, спас ее от войн, бу­ше­вав­ших во­круг. Глу­бо­кий пат­ри­от, свя­ти­тель Сав­ва рев­но­вал об ограж­де­нии без­опас­но­сти Сер­бии. При­няв­ший ар­хи­епи­скоп­ский сан с ве­ли­ким при­нуж­де­ни­ем, он был ис­тин­ным ис­их­а­стом. Со­вер­шен­но про­ник­шись уче­ни­ем древ­них от­цов пу­сты­ни, он дал то на­прав­ле­ние ду­хов­ной жиз­ни Сер­бии, ко­то­ро­му она и до­ныне сле­ду­ет. Про­све­ти­тель Сер­бии, свя­ти­тель Сав­ва был ве­ли­ким по­бор­ни­ком пра­во­сла­вия. По смер­ти про­сла­вил­ся мно­го­чис­лен­ны­ми чу­де­са­ми.

Полное житие святителя Саввы I, архиепископа Сербского

Свя­ти­тель Сав­ва, пер­вый ар­хи­епи­скоп Серб­ский, в ми­ру Ро­сти­слав (Рас­т­ко), был сы­ном са­мо­держ­ца Сер­бии Сте­фа­на Нема­ни и Ан­ны, до­че­ри гре­че­ско­го им­пе­ра­то­ра Ро­ма­на. С ран­не­го дет­ства он усерд­но по­се­щал цер­ков­ные служ­бы и пи­тал осо­бую лю­бовь к ино­кам. В сем­на­дца­ти­лет­нем воз­расте, встре­тив рус­ско­го ино­ка со Свя­той Го­ры Афон, Ро­сти­слав тай­но оста­вил от­чий дом и при­был в рус­ский Пан­те­ле­и­мо­нов мо­на­стырь. (По Про­мыс­лу Бо­жию в год рож­де­ния свя­то­го – 1169 – древ­ний мо­на­стырь свя­то­го ве­ли­ко­му­че­ни­ка и це­ли­те­ля Пан­те­ле­и­мо­на был от­дан на веч­ное вла­де­ние рус­ским ино­кам.) Отец его, узнав, что сын на Афоне, сна­ря­дил це­лую дру­жи­ну с вер­ным во­е­во­дой и на­пи­сал пра­ви­те­лю об­ла­сти, ку­да вхо­дил Афон, что, ес­ли ему не вер­нут сы­на, он пой­дет на гре­ков вой­ной. При­быв в мо­на­стырь, во­е­во­да ве­лел глаз не спус­кать с Ро­сти­сла­ва. Во вре­мя ве­чер­не­го бо­го­слу­же­ния, ко­гда упо­ен­ные ви­ном во­и­ны усну­ли, Ро­сти­слав при­нял по­стриг (1186 г.) и по­слал ро­ди­те­лям свою мир­скую одеж­ду, во­ло­сы и пись­мо. Инок Сав­ва су­мел убе­дить сво­их дер­жав­ных ро­ди­те­лей при­нять мо­на­ше­ство. Отец пре­по­доб­но­го (па­мять пре­по­доб­но­го Сте­фа­на, во ино­че­стве Си­мео­на, ца­ря Серб­ско­го, 13 фев­ра­ля) вме­сте с сы­ном под­ви­зал­ся в Ва­то­пед­ской оби­те­ли. На Афоне они об­но­ви­ли серб­ский Хи­лен­дар­ский мо­на­стырь, и эта оби­тель по­лу­чи­ла зва­ние цар­ской став­ро­пи­гии. В Хи­лен­дар­ском мо­на­сты­ре пре­по­доб­ный Сав­ва был по­свя­щен в диа­ко­на и за­тем во пре­сви­те­ра. В Со­лу­ни за свои ино­че­ские по­дви­ги на Свя­той Го­ре пре­по­доб­ный был удо­сто­ен са­на ар­хи­манд­ри­та. В 1219 го­ду в Ни­кее на празд­ник Успе­ния Пре­свя­той Бо­го­ро­ди­цы все­лен­ский пат­ри­арх Гер­ман ру­ко­по­ло­жил ар­хи­манд­ри­та Сав­ву в сан ар­хи­епи­ско­па всей Сер­бии. При этом пре­по­доб­ный Сав­ва ис­про­сил у гре­че­ско­го им­пе­ра­то­ра пра­во ищу­ще­му до­сто­ин­ства ар­хи­епи­ско­па быть по­свя­ща­е­мым в Сер­бии со­бо­ром епи­ско­пов, что бы­ло очень важ­но для то­го вре­ме­ни ча­стых войн меж­ду во­сточ­ны­ми и за­пад­ны­ми вла­сти­те­ля­ми. При­быв из Ни­кеи на Свя­тую Го­ру, свя­ти­тель в по­след­ний раз обо­шел все мо­на­сты­ри, по­кло­нил­ся всем церк­вам и, вспо­ми­ная бла­жен­ное жи­тие пу­стын­ных от­цов, в глу­бо­ком со­кру­ше­нии про­стил­ся с по­движ­ни­ка­ми, "ис­хо­дя из Свя­той Го­ры, как бы из неко­е­го Бо­же­ствен­но­го рая". По пу­ти с Афо­на, удру­чен­ный тя­же­стью раз­лу­ки со Свя­той Го­рой, свя­ти­тель ед­ва шел. Толь­ко сло­ва явив­шей­ся свя­то­му во сне Пре­свя­той Бо­го­ро­ди­цы – "имея Ме­ня Спо­руч­ни­цею к Ца­рю всех, Сы­ну и Бо­гу Мо­е­му, о сих ли еще скор­бишь?" – выз­во­ли­ли его из уны­ния, пе­ре­ме­нив пе­чаль на ра­дость. В па­мять об этом яв­ле­нии свя­ти­тель за­ка­зал в Со­лу­ни две боль­шие ико­ны Спа­си­те­ля и Бо­жи­ей Ма­те­ри, по­став­лен­ные им в церк­ви Фило­ка­лии.

В Сер­бии де­я­тель­ность пер­во­свя­ти­те­ля по устрой­ству дел Церк­ви и оте­че­ства со­про­вож­да­лась мно­го­чис­лен­ны­ми зна­ме­ни­я­ми и чу­де­са­ми. Во вре­мя ли­тур­гии и все­нощ­ной, ко­гда свя­ти­тель при­хо­дил по­ка­дить над гро­бом сво­е­го от­ца, пре­по­доб­но­го Си­мео­на, свя­тые мо­щи ис­то­ча­ли бла­го­ухан­ное ми­ро.

Ве­дя пе­ре­го­во­ры с вен­гер­ским ко­ро­лем Вла­ди­сла­вом, объ­явив­шим вой­ну Сер­бии, про­слав­лен­ный небес­ны­ми зна­ме­ни­я­ми свя­ти­тель не толь­ко до­ста­вил же­лан­ный мир сво­е­му оте­че­ству, но и при­вел в пра­во­сла­вие вен­гер­ско­го мо­нар­ха. По­ло­жив на­ча­ло ис­то­ри­че­ско­му су­ще­ство­ва­нию са­мо­сто­я­тель­ной Серб­ской Церк­ви, свя­ти­тель Сав­ва спо­соб­ство­вал так­же утвер­жде­нию серб­ской го­судар­ствен­но­сти. Чтобы укре­пить неза­ви­си­мое го­су­дар­ство сер­бов, свя­той ар­хи­епи­скоп Сав­ва вен­чал на цар­ство дер­жав­но­го бра­та Сте­фа­на. По пре­став­ле­нии Сте­фа­на, вен­чав на цар­ство его стар­ше­го сы­на Ра­до­сла­ва, свя­ти­тель Сав­ва от­пра­вил­ся в Свя­тую Зем­лю "со сле­за­ми об­ло­бы­зать свя­той Гроб Хри­стов и страш­ную Гол­го­фу". Вер­нув­шись на ро­ди­ну, свя­ти­тель бла­го­сло­вил и вен­чал на цар­ство Вла­ди­сла­ва и, для боль­ше­го утвер­жде­ния пре­сто­ла серб­ско­го, об­ру­чил его с до­че­рью бол­гар­ско­го кня­зя Аса­на. Свя­той пер­во­свя­ти­тель обо­шел всю зем­лю Серб­скую, ис­пра­вил ино­че­ские уста­вы по об­раз­цу афон­ских и па­ле­стин­ских, по­стро­ил и освя­тил мно­же­ство церк­вей, утвер­ждая пра­во­слав­ных в ве­ре. За­вер­шив свой по­двиг на ро­дине, свя­ти­тель, на­зна­чив сво­им пре­ем­ни­ком иеро­мо­на­ха Ар­се­ния, ру­ко­по­ло­жив его во епи­ско­па и пре­по­дав всем бла­го­сло­ве­ние, от­пра­вил­ся в невоз­врат­ный путь, же­лая "окон­чить дни свои стран­ни­ком в зем­ле чу­жой". Прой­дя всю Па­ле­сти­ну, Си­рию и Пер­сию, Ва­ви­лон, Еги­пет и Ана­то­лию, по­всю­ду по­се­щая свя­тые ме­ста, бе­се­дуя с ве­ли­ки­ми по­движ­ни­ка­ми, со­би­рая свя­щен­ные остан­ки свя­тых, свя­ти­тель окон­чил свое стран­ствие в Тыр­но­ве, в Бол­га­рии, в до­ме род­ствен­ни­ка ца­ря Аса­на, где с ду­хов­ной ра­до­стью пре­дал свою ду­шу Гос­по­ду († 1237). При пе­ре­не­се­нии свя­тых мо­щей свя­ти­те­ля Сав­вы в Сер­бию в 1237 го­ду ис­це­ле­ния бы­ли столь мно­го­чис­лен­ны, что бол­га­ры ста­ли роп­тать на Аса­на, "за­чем он усту­па­ет та­кое со­кро­ви­ще". На ро­дине свя­ти­те­ля его чест­ные мо­щи бы­ли по­ло­же­ны в церк­ви Ми­ле­ше­во, да­руя ис­це­ле­ние всем при­хо­дя­щим с ве­рою. Жи­те­ли Тыр­но­ва про­дол­жа­ли по­лу­чать ис­це­ле­ния от остат­ков гро­ба свя­ти­те­ля, ко­то­рые бла­го­че­сти­вый Асан при­ка­зал со­брать вме­сте и по­ло­жить во вновь со­ору­жен­ную гроб­ни­цу.

На­сле­дие свя­ти­те­ля Сав­вы Серб­ско­го жи­вет в пра­во­слав­ном цер­ков­ном пре­да­нии сла­вян­ских на­ро­дов. С его име­нем свя­за­но пер­вое вве­де­ние Иеру­са­лим­ско­го уста­ва в сла­вян­ских ино­че­ских оби­те­лях, по Ти­пи­ку свя­то­го Сав­вы до­ныне жи­вет Серб­ский Хи­лен­дар­ский мо­на­стырь на Афоне. При­над­ле­жа­щая свя­ти­те­лю ре­дак­ция Корм­чей кни­ги с тол­ко­ва­ни­я­ми Алек­сия Ари­сти­на ста­ла наи­бо­лее рас­про­стра­нен­ной в Рус­ской Церк­ви. В 1270 го­ду мит­ро­по­ли­ту Ки­ев­ско­му Ки­рил­лу был при­слан из Бол­га­рии пер­вый спи­сок Корм­чей свя­то­го Сав­вы. С него бы­ла спи­са­на од­на из древ­ней­ших рус­ских Корм­чих – Ря­зан­ская Корм­чая 1284 го­да. Она, в свою оче­редь, лег­ла в ос­но­ву пе­чат­ной Корм­чей, из­дан­ной в 1653 го­ду и неиз­мен­но с тех пор пе­ре­из­да­вав­шей­ся в Рус­ской Церк­ви. Та­ков вклад свя­ти­те­ля Сав­вы в ка­но­ни­че­скую со­кро­вищ­ни­цу пра­во­сла­вия.


См. так­же: "Жи­тие свя­то­го Сав­вы, ар­хи­епи­ско­па Серб­ско­го" в из­ло­же­нии свт. Ди­мит­рия Ро­стов­ско­го.