Канон святителю Софронию, патриарху Иерусалимскому

Припев: Святи́телю, о́тче Софро́ние, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 24 марта (11 марта ст. ст.)

Глас 4.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Целому́дренно преплы́л еси́ целому́дрия пучи́ну, ве́тры духо́вными направля́емь, и собра́л еси́ мно́го бога́тства, му́дрости дарова́ния, о́тче Софро́ние.

Я́ко а́нгел бы́л еси́ Христо́ва Воскресе́ния, и председа́тель боже́ствен, Боже́ственнаго Гро́ба, обогати́вшаго исто́чником безсме́ртия, Христа́, воздви́гшаго паде́ние ро́да на́шего.

Све́тлостию слове́с твои́х и ума́ острото́ю ми́р уясни́л еси́, богосло́вив я́сно Триипоста́снаго Божества́ Существо́, Еди́ницу Тричи́сленную, о́тче Софро́ние.

Глаго́л веща́ние твое́ и уче́ний благознамени́тая гу́сль протече́ земны́я концы́, та́инству строе́ния сло́ва уча́щая, о́тче Софро́ние.

Богоро́дичен: Сы́й естество́м несозда́нен, и Отцу́ соприсносу́щен, и време́н превы́шший, и преве́чный, из Тебе́, Влады́чице, зи́ждем, и под ле́том я́ко Челове́к быва́ет, спаса́я челове́ка.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Утвержда́ема па́лицею слове́с твои́х, преподо́бне, стремле́ния злочести́вых и богобо́рных ересе́й отража́ет, отгоня́щи, Це́рковь Христо́ва.

Побо́рствовав по честне́м, богоно́се, пропове́дании, показа́лся еси́ победи́тель по́мощию Ду́ха, му́дре укрепля́емь, о́тче Софро́ние.

Умертви́в все́ тле́емое пло́ти сладостра́стие, нетле́нную ду́шу благоче́стием оживи́л еси́ и сию́ показа́л еси́ Боже́ственный орга́н.

Богосло́вный, и кра́сный, и медото́чный язы́к тво́й сло́ва ре́ки источа́ет, богоприя́тне, Боже́ственная уче́ния все́м излива́я.

Богоро́дичен: Тя́, ро́ждшую Бо́га, Богоро́дицу сла́вим, Рождеству́ Твоему́ именова́нием сли́чествующе и зва́ния по обоему́, Пречи́стая Влады́чице.

Седа́лен, гла́с 4.

Словесы́ украси́л еси́ Це́рковь Христо́ву, де́лы соблю́д е́же по о́бразу Бо́жию, Софро́ние преподо́бне, просия́ бо в ми́ре, е́же в тебе́ целому́дрие, благода́ть уче́ний облиста́ющая все́м, любо́вию пра́зднующим, о́тче, па́мять твою́.

Сла́ва, и ны́не, богоро́дичен: Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Крестобогоро́дичен: На Кресте́ Тя́ возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? ка́ко, Жи́знь все́х, вкуша́еши сме́рти, оживи́ти уме́ршия хотя́, я́ко Благоутро́бен.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Еди́но Безнача́льное Существо́ в Тре́х Ипоста́сех сво́йствы соверше́нными ты́, о́тче, му́дре пропове́дал еси́, разделя́емое непресеко́мо, совокупля́емо же неслия́нно во́лею еди́ною и Божество́м.

Име́я целому́дренну мы́сль и у́м целому́дрейший, не смеше́ние мудрова́л еси́, о́тче, ни преложе́ние, ниже́ слия́ние соедине́нных непрело́жно двои́х есте́ств во еди́ном Христе́ Единоро́днем, всеблаже́нне.

Просвеща́емь Боже́ственне просвеще́нием Ду́ха, лю́тое неи́стовство Несто́риево разори́л еси́ то́южде во́лею и ра́зумом и́же соедине́ние пропове́давшаго Христо́ву обою́ естеству́.

Пи́рра попали́л еси́, богому́дре, огне́м уче́ний твои́х, отмета́юща два́ бы́ти Христо́ва хоте́ния, разли́чными существы́, я́же по себе́, де́йства же вку́пе сугу́ба, о́тче преподо́бне.

Богоро́дичен: Украси́лася еси́ па́че всего́ а́нгельскаго благоле́пия, я́ко ро́ждши си́х, Отрокови́це, Творца́ же и Го́спода, от Твои́х пречи́стых крове́й воплоща́ема, избавля́ющаго вся́, Того́ сла́вящия.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Честно́е Воскресе́ние и Гро́б Жи́зни неукло́нною любо́вию зря́, боговиде́ния поче́рпл еси́ тайноуче́ния и ве́рным препо́дал еси́, святи́телю, сия́ния.

Вся́чески возлюби́л еси́ еди́наго Блага́го, разже́гся заре́ю мы́сленною, и исто́чник возлюби́л еси́ нетле́ния, виде́ньми, всему́дре, к Нему́ простира́яся.

Хра́м жи́в и одушевле́н бы́л еси́ Бо́жий, умертви́вся все́м, су́щим на земли́, сло́ва трапе́зу оби́льную стяжа́в, преподо́бне, и свети́льник ве́ры.

Богоро́дичен: Во двою́ разумева́ема существу́, Христа́, Сы́на Единоро́днаго Бо́жия, Безнача́льнаго пло́ть бы́вша, па́че сло́ва родила́ еси́, Богома́ти Присноде́во.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Бога́тно излия́ся благода́ть Ду́ха Всесвята́го, богому́дре, во устна́х твои́х, те́мже веща́ние твои́х слове́с ре́чным подо́бится тече́нием.

Я́ко фи́никс, в Дому́ Госпо́дни процве́л еси́, благопло́дием слове́с и чи́стым житие́м наслажда́я сердца́, святи́телю, ве́рно чту́щих тя́.

Умерщвля́ется живи́тельным ору́жием слове́с твои́х ерети́ческий собо́р и свире́пое ополче́ние богобо́рец, закала́емо, умерщвля́ется уче́ний твои́х мечи́.

Богоро́дичен: Пое́м, Богоро́дице, чи́стое рождество́ Твое́, и́мже спаса́емся вси́ сме́рти се́тей и лю́таго греха́ и у́з а́довых избавля́емся.

Конда́к, гла́с 8.

И́же Боже́ственною ре́вностию подви́гся и и́стинных повеле́ний устне́ распросте́р, церко́вная основа́ния благоузако́нив и та́мо су́щим мона́шеским соста́вом преда́в, прему́дрый в патриа́рсех Иерусали́мский Софро́ние, всему́драя словеса́ во све́т изве́л еси́, и́миже наставля́еми, зове́м ти́: ра́дуйся, све́тлая правосла́вных похвало́.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Свы́ше манове́нием, ерети́ческим языкобо́лием противля́яся, му́дре, победоно́сец бы́в, вопия́л еси́, веселя́ся: препе́тый Го́споди, Бо́же оте́ц, благослове́н еси́.

Ве́сь возложе́н Бо́гу, по́стных садоде́лательства прелета́я, му́дре, цветни́к твои́ми насади́л еси́ доброде́телей поуче́ньми, Бо́гу, Су́щему в вы́шних, освяти́в.

Зако́ну повину́яся Христо́ву, твоего́ худо́жества бога́тство тре́бующим благоче́стно, богому́дре, разда́л еси́, воспева́я: препе́тый Го́споди, Бо́же оте́ц, благослове́н еси́.

Богоро́дичен: Освяти́вши ду́шу и предочи́стивши те́ло, наи́тием на Тя́ Свята́го Ду́ха, Всенепоро́чная, Вы́шняго Си́лу во утро́бе Твое́й заче́нши, родила́ еси́ безсе́менно.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Иера́ршескаго священноде́йства ми́ром освяти́лся еси́ благода́ти, иде́же яви́ся ми́ра спасе́ние, архиере́йствовав, всему́дре о́тче Софро́ние, зовы́й: Го́спода по́йте, дела́, и превозноси́те Его́ во вся́ ве́ки.

Прему́дрость почита́я лу́чшую, венце́м благода́тей венча́лся еси́, сла́ву неувяда́ему и бога́тство неотъе́млемо, прему́дрости, сла́вне, да́р прие́м и, Го́спода по́йте, — зовы́й, — и превозноси́те Его́ во вся́ ве́ки.

Священноле́пно, священнотаи́нниче, в Боже́ственную пра́вду оде́явся, упра́вил еси́, всеблаже́нне о́тче, пра́веднейшими Влады́чне ста́до словесы́ и дея́нии, Го́спода по́йте, — науча́я, — и превозноси́те Его́ во вся́ ве́ки.

Великоле́пно и па́че сло́ва Сло́во, Отцу́, о́тче, Собезнача́льно, сло́во тебе́ дарова́, словеса́ развраща́юще, и языкобо́лия сла́бяще ересе́й, Го́спода по́йте, — вопия́, — и превозноси́те Его́ во вся́ ве́ки.

Богоро́дичен: Святоле́пный показа́лася еси́ хра́м Сло́ва, всю́ тва́рь освяща́ющаго, гора́ ту́чная свята́я, гора́ пресве́тлая, Благослове́нная Влады́чице, еди́на всепе́тая. Те́м Тя́, Богома́ти, пое́м и превозно́сим во вся́ ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Рече́ния, из усте́н твои́х боже́ственных происходя́ща, богоглаго́ливе, благочести́вых мы́сли услажда́ют благода́тию, я́коже со́т, ка́плющий разуме́ний благоле́пие.

Вну́трь небе́сных незаходи́мых живе́ши, богоглаго́ливе, у все́х Влады́ки и Царя́, иде́же лику́ют а́нгельския све́тлости и святы́х во́инства.

Жи́знь проходя́, о́тче, на земли́ а́нгельскую, а́нгельскаго на небесе́х сподо́бился еси́ блаже́нства, иде́же Христа́ моли́ спасти́ся все́м, пою́щим тя́.

Я́коже арома́тнии фиа́лы, лани́те твои́, богому́дре, на́рда пистики́и многоце́нны, прему́дрости испо́лнь яви́ся алава́стр, Те́ло Христо́во честно́е арома́тствуя твои́ми уче́нии.

Богоро́дичен: О́блак Тя́ лего́к, Де́во, Иса́ия зря́ше: на Тя́ бо Госпо́дь наше́д, низложи́ вся́ рукотворе́нная и Свое́ разуме́ние Тя́ пою́щим яви́л е́сть.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Цѣломꙋ́дреннѡ преплы́лъ є҆сѝ цѣломꙋ́дрїѧ пꙋчи́нꙋ, вѣ́тры дꙋхо́вными направлѧ́емь, и҆ собра́лъ є҆сѝ мно́гѡ бога́тства, мꙋ́дрости дарова̑нїѧ, ѻ҆́ч҃е сѡфро́нїе.

Ꙗ҆́кѡ а҆́гг҃лъ бы́лъ є҆сѝ хрⷭ҇то́ва воскрⷭ҇нїѧ, и҆ предсѣда́тель бжⷭ҇твенъ бжⷭ҇твеннагѡ гро́ба, ѡ҆богати́вшагѡ и҆сто́чникомъ безсме́ртїѧ, хрⷭ҇та̀, воздви́гшагѡ паде́нїе ро́да на́шегѡ.

Свѣ́тлостїю слове́съ твои́хъ, и҆ ᲂу҆ма̀ ѡ҆строто́ю, мі́ръ ᲂу҆ѧсни́лъ є҆сѝ, бг҃осло́вивъ ꙗ҆́снѡ трїѷпоста́снагѡ бжⷭ҇тва̀ сꙋщество̀, є҆ди́ницꙋ тричи́сленнꙋю, ѻ҆́ч҃е сѡфро́нїе.

Глагѡ́лъ вѣща́нїе твоѐ и҆ ᲂу҆че́нїй благознамени́таѧ гꙋ́сль, протечѐ земны̑ѧ концы̀, та́инствꙋ строе́нїѧ сло́ва ᲂу҆ча́щаѧ, ѻ҆́ч҃е сѡфро́нїе.

Бг҃оро́диченъ: Сы́й є҆стество́мъ несозда́ненъ и҆ ѻ҆ц҃ꙋ̀ соприсносꙋ́щенъ, и҆ време́нъ превы́шшїй и҆ превѣ́чный, и҆зъ тебє̀, влⷣчце, зи́ждемь, и҆ подъ лѣ́томъ ꙗ҆́кѡ чл҃вѣ́къ быва́етъ, спаса́ѧ человѣ́ка.

Пѣ́снь г҃.

І҆рмо́съ: Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ па́че тебє̀, чл҃вѣколю́бче.

Оу҆твержда́ема па́лицею слове́съ твои́хъ, преподо́бне, стремлє́нїѧ ѕлочести́выхъ и҆ бг҃обо́рныхъ є҆ресе́й ѿража́етъ, ѿгонѧ́щи, цр҃ковь хрⷭ҇то́ва.

Побо́рствовавъ по честнѣ́мъ, бг҃оно́се, проповѣ́данїи, показа́лсѧ є҆сѝ побѣди́тель по́мощїю дх҃а, мꙋ́дрѣ ᲂу҆крѣплѧ́емь, ѻ҆́ч҃е сѡфро́нїе.

Оу҆мертви́въ всѐ тлѣ́емое пло́ти сладостра́стїе, нетлѣ́ннꙋю дꙋ́шꙋ благоче́стїемъ ѡ҆живи́лъ є҆сѝ: и҆ сїю̀ показа́лъ є҆сѝ бжⷭ҇твенный ѻ҆рга́нъ.

Бг҃осло́вный и҆ кра́сный, и҆ медото́чный ѧ҆зы́къ тво́й, сло́ва рѣ́ки и҆сточа́етъ, бг҃опрїѧ́тне, бжⷭ҇твєннаѧ ᲂу҆чє́нїѧ всѣ̑мъ и҆злива́ѧ.

Бг҃оро́диченъ: Тѧ̀ ро́ждшꙋю бг҃а, бцⷣꙋ сла́вимъ, ржⷭ҇твꙋ̀ твоемꙋ̀ и҆менова́нїемъ сли́чествꙋюще, и҆ зва́нїѧ по ѻ҆боемꙋ̀, пречⷭ҇таѧ влⷣчце.

Сѣда́ленъ, гла́съ д҃

Словесы̀ ᲂу҆краси́лъ є҆сѝ цр҃ковь хрⷭ҇то́вꙋ, дѣ́лы соблю́дъ є҆́же по ѻ҆́бразꙋ бж҃їю, сѡфро́нїе преподо́бне: просїѧ́ бо въ мі́рѣ, є҆́же въ тебѣ̀ цѣломꙋ́дрїе, благода́ть ᲂу҆че́нїй ѡ҆блиста́ющаѧ всѣ̑мъ, любо́вїю пра́зднꙋющымъ, ѻ҆́ч҃е, па́мѧть твою̀.

Сла́ва, и҆ ны́нѣ, бг҃оро́диченъ: Ѡ҆бнови́ла є҆сѝ, чⷭ҇таѧ, бжⷭ҇твеннымъ рождество́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀ и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

Крⷭ҇тобг҃оро́диченъ: На крестѣ́ тѧ̀ возвы́шена, ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рти, ѡ҆живи́ти ᲂу҆ме́ршыѧ хотѧ̀, ꙗ҆́кѡ благоꙋтро́бенъ;

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Є҆ди́но безнача́льное сꙋщество̀ въ тре́хъ ѵ҆поста́сѣхъ, сво́йствы соверше́нными, ты̀, ѻ҆́ч҃е мꙋ́дре, проповѣ́далъ є҆сѝ раздѣлѧ́емое непресѣко́мо, совокꙋплѧ́емо же неслїѧ́нно, во́лею є҆ди́ною и҆ бж҃ество́мъ.

И҆мѣ́ѧ цѣломꙋ́дреннꙋ мы́сль и҆ ᲂу҆́мъ цѣломꙋ́дрѣйшїй, не смѣше́нїе мꙋдрова́лъ є҆сѝ, ѻ҆́ч҃е, ни преложе́нїе, нижѐ слїѧ́нїе соедине́нныхъ непрело́жнѡ, двои́хъ є҆сте́ствъ во є҆ди́номъ хрⷭ҇тѣ̀ є҆диноро́днѣмъ, всеблаже́нне.

Просвѣща́емь бжⷭ҇твеннѣ просвѣще́нїемъ дх҃а, лю́тое неи́стовство несто́рїево разори́лъ є҆сѝ, то́южде во́лею и҆ ра́зꙋмомъ, и҆́же соедине́нїе проповѣ́давшаго хрⷭ҇то́вꙋ ѻ҆бою̀ є҆стествꙋ̑.

Пѵ́рра попали́лъ є҆сѝ, бг҃омꙋ́дре, ѻ҆гне́мъ ᲂу҆че́нїй твои́хъ, ѿмета́юща два̀ бы́ти хрⷭ҇тѡ́ва хотѣ̑нїѧ, разли́чными сꙋществы̀ ꙗ҆̀же по себѣ̀, дѣ́йства же вкꙋ́пѣ сꙋгꙋ́ба, ѻ҆́ч҃е преподо́бне.

Бг҃оро́диченъ: Оу҆краси́ласѧ є҆сѝ па́че всегѡ̀ а҆́гг҃льскагѡ благолѣ́пїѧ, ꙗ҆́кѡ ро́ждши си́хъ, ѻ҆трокови́це, творца́ же и҆ гдⷭ҇а, ѿ твои́хъ пречⷭ҇тыхъ крове́й воплоща́ема, и҆збавлѧ́ющаго всѧ̑ того̀ сла́вѧщыѧ.

Пѣ́снь є҃.

І҆рмо́съ: Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ. но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще воспѣва́емъ тѧ̀, чл҃вѣколю́бче.

Честно́е воскресе́нїе и҆ гро́бъ жи́зни неꙋкло́нною любо́вїю зрѧ̀, бг҃овидѣ́нїѧ поче́рплъ є҆сѝ тайноꙋчє́нїѧ: и҆ вѣ̑рнымъ препо́далъ є҆сѝ, ст҃и́телю, сїѧ̑нїѧ.

Всѧ́чески возлюби́лъ є҆сѝ є҆ди́наго блага́го, разже́гсѧ заре́ю мы́сленною: и҆ и҆сто́чникъ возлюби́лъ є҆сѝ нетлѣ́нїѧ, видѣ́ньми, всемꙋ́дре, къ немꙋ̀ простира́ѧсѧ.

Хра́мъ жи́въ и҆ ѡ҆дꙋшевле́нъ бы́лъ є҆сѝ бж҃їй, ᲂу҆мертви́всѧ всѣ̑мъ сꙋ́щымъ на землѝ, сло́ва трапе́зꙋ ѻ҆би́льнꙋю стѧжа́въ, преподо́бне, и҆ свѣти́льникъ вѣ́ры.

Бг҃оро́диченъ: Во двою̀ разꙋмѣва́ема сꙋществꙋ̑ хрⷭ҇та̀, сн҃а є҆диноро́днаго бж҃їѧ, безнача́льнаго пло́ть бы́вша, па́че сло́ва родила̀ є҆сѝ, бг҃ома́ти приснодѣ́во.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Бога́тнѡ и҆злїѧ́сѧ благода́ть дх҃а всест҃а́гѡ, бг҃омꙋ́дре, во ᲂу҆стна́хъ твои́хъ: тѣ́мже вѣща́нїе твои́хъ слове́съ рѣ̑чнымъ подо́битсѧ тече́нїємъ.

Ꙗ҆́кѡ фі́нїѯъ въ домꙋ̀ гдⷭ҇ни процвѣ́лъ є҆сѝ, благопло́дїемъ слове́съ, и҆ чи́стымъ житїе́мъ наслажда́ѧ сердца̀, свѧти́телю, вѣ́рнѡ чтꙋ́щихъ тѧ̀.

Оу҆мерщвлѧ́етсѧ живи́тельнымъ ѻ҆рꙋ́жїемъ слове́съ твои́хъ є҆реті́ческїй собо́ръ: и҆ свирѣ́пое ѡ҆полче́нїе бг҃обо́рєцъ закала́емо ᲂу҆мерщвлѧ́етсѧ ᲂу҆че́нїй твои́хъ мєчѝ.

Бг҃оро́диченъ: Пое́мъ, бцⷣе, чи́стое рождество̀ твоѐ, и҆́мже спаса́емсѧ всѝ сме́рти сѣ́тей, и҆ лю́тагѡ грѣха̀ и҆ ᲂу҆́зъ а҆́довыхъ и҆збавлѧ́емсѧ.

Конда́къ, гла́съ и҃.

И҆́же бжⷭ҇твенною ре́вностїю подви́гсѧ, и҆ и҆́стинныхъ повелѣ́нїй ᲂу҆стнѣ̀ распросте́ръ, церкѡ́внаѧ ѡ҆снова̑нїѧ бл҃гоꙋзако́нивъ, и҆ та́мѡ сꙋ́щымъ мона́шєскимъ соста́вѡмъ преда́въ, премꙋ́дрый въ патрїа́рсѣхъ і҆ерꙋсали́мскїй сѡфро́нїе, всемꙋ̑драѧ словеса̀ во свѣ́тъ и҆зве́лъ є҆сѝ, и҆́миже наставлѧ́еми зове́мъ тѝ: ра́дꙋйсѧ, свѣ́тлаѧ правосла́вныхъ похвало̀.

Пѣ́снь з҃.

І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Свы́ше манове́нїемъ, є҆реті́чєскимъ ѧ҆зыкобо́лїємъ противлѧ́ѧсѧ, мꙋ́дре, побѣдоно́сецъ бы́въ, вопїѧ́лъ є҆сѝ веселѧ́сѧ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Ве́сь возложе́нъ бг҃ꙋ, по́стныхъ садодѣ́латєльства прелета́ѧ, мꙋ́дре, цвѣтни́къ твои́ми насади́лъ є҆сѝ добродѣ́телей поꙋче́ньми, бг҃ꙋ сꙋ́щемꙋ въ вы́шнихъ ѡ҆ст҃и́въ.

Зако́нꙋ повинꙋ́ѧсѧ хрⷭ҇то́вꙋ, твоегѡ̀ хꙋдо́жества бога́тство тре́бꙋющымъ благоче́стнѡ, бг҃омꙋ́дре, разда́лъ є҆сѝ, воспѣва́ѧ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Бг҃оро́диченъ: Ѡ҆свѧти́вши дꙋ́шꙋ, и҆ пред̾ѡчи́стивши тѣ́ло, наи́тїемъ на тѧ̀ ст҃а́гѡ дх҃а, всенепоро́чнаѧ, вы́шнѧгѡ си́лꙋ во ᲂу҆тро́бѣ твое́й заче́нши, родила̀ є҆сѝ безсѣ́меннѡ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое: ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

І҆ера́ршескагѡ сщ҃еннодѣ́йства, мѵ́ромъ ѡ҆свѧти́лсѧ є҆сѝ благода́ти: и҆дѣ́же ꙗ҆ви́сѧ мі́ра спасе́нїе, а҆рхїере́йствовавъ, всемꙋ́дре ѻ҆́ч҃е сѡфро́нїе, зовы́й: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Премꙋ́дрость почита́ѧ лꙋ́чшꙋю, вѣнце́мъ благода́тей вѣнча́лсѧ є҆сѝ, сла́вꙋ неꙋвѧда́емꙋ, и҆ бога́тство неѿе́млемо, премꙋ́дрости, сла́вне, да́ръ прїе́мъ, и҆ гдⷭ҇а по́йте, зовы́й, и҆ превозноси́те є҆го̀ во всѧ̑ вѣ́ки.

Сщ҃еннолѣ́пнѡ, сщ҃еннотаи́нниче, въ бж҃е́ственнꙋю пра́вдꙋ ѡ҆дѣ́ѧвсѧ, ᲂу҆пра́вилъ є҆сѝ, всебл҃же́нне ѻ҆́ч҃е, пра́веднѣйшими влⷣчне ста́до словесы̀ и҆ дѣѧ̑нїи, гдⷭ҇а по́йте, наꙋча́ѧ, и҆ превозноси́те є҆го̀ во всѧ̑ вѣ́ки.

Великолѣ́пнѡ и҆ па́че сло́ва, сло́во ѻ҆ц҃ꙋ̀, ѻ҆́ч҃е, собезнача́льно, сло́во тебѣ̀ дарова̀, словеса̀ развраща́ющо, и҆ ѧ҆зыкобѡ́лїѧ сла́бѧщо є҆ресе́й, гдⷭ҇а по́йте, вопїѧ̀, и҆ превозноси́те є҆го̀ во всѧ̑ вѣ́ки.

Бг҃оро́диченъ: Ст҃олѣ́пный показа́ласѧ є҆сѝ хра́мъ сло́ва, всю̀ тва́рь ѡ҆свѧща́ющагѡ, гора̀ тꙋ́чнаѧ ст҃а́ѧ: гора̀ пресвѣ́тлаѧ, блгⷭ҇ве́ннаѧ влⷣчце є҆ди́на всепѣ́таѧ. Тѣ́мъ тѧ̀, бг҃ома́ти, пое́мъ и҆ превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ, веселѧ́щесѧ, тѧ̀, бцⷣе, велича́емъ.

Речє́нїѧ, и҆зъ ᲂу҆сте́нъ твои́хъ бж҃е́ственныхъ происходѧ̑ща, бг҃оглаго́ливе, благочести́выхъ мы̑сли ᲂу҆слажда́ютъ благода́тїю, ꙗ҆́коже со́тъ ка́плющїй разꙋмѣ́нїй благолѣ́пїе.

Внꙋ́трь нбⷭ҇ныхъ незаходи́мыхъ живе́ши, бл҃гоглаго́ливе, ᲂу҆ всѣ́хъ влⷣки и҆ цр҃ѧ̀: и҆дѣ́же ликꙋ́ютъ а҆́гг҃льскїѧ свѣ́тлѡсти, и҆ ст҃ы́хъ вѡ́инства.

Жи́знь проходѧ̀, ѻ҆́ч҃е, на землѝ а҆́гг҃льскꙋю, а҆́гг҃льскагѡ на нб҃сѣ́хъ сподо́билсѧ є҆сѝ бл҃же́нства, и҆дѣ́же хрⷭ҇та̀ молѝ, спасти́сѧ всѣ̑мъ пою́щымъ тѧ̀.

Ꙗ҆́коже а҆рѡма́тнїи фїа́лы, лани̑тѣ твоѝ, бг҃омꙋ́дре, на́рда пїстїкі́и многоцѣ́нны, премꙋ́дрости и҆спо́лнь ꙗ҆ви́сѧ а҆лава́стръ, тѣ́ло хрⷭ҇то́во чⷭ҇тно́е, а҆рѡма́тствꙋѧ твои́ми ᲂу҆чє́нїи.

Бг҃оро́диченъ: Ѻ҆́блакъ тѧ̀ лего́къ, дв҃о, и҆са́їа зрѧ́ше: на тѧ́ бо гдⷭ҇ь наше́дъ, низложѝ всѧ̑ рꙋкотворє́ннаѧ, и҆ своѐ разꙋмѣ́нїе тѧ̀ пою́щымъ ꙗ҆ви́лъ є҆́сть.

Труды святителя Софрония Иерусалимского

• Житие преподобной матери нашей Марии Египетской

• Омилия, произнесенная на поклонение честному и животворящему Кресту

• Слово на праздник Сретения Господня

• Слово на воздвижение честного Креста и на святое Воскресение

• Похвальное слово Святым Архангелам, и Ангелам и прочим Небесным силам

• Похвальное слово блаженным Апостолам Петру и Павлу, произнесенное на четвертый день праздника Рождества Христова

• Похвальное слово святому Иоанну Предтече

• Соборное послание

• Чудеса святых мучеников Кира и Иоанна

Смотреть все труды в библиотеке →

Житие святителя Софрония Иерусалимского

Свя­ти­тель Со­фро­ний, пат­ри­арх Иеру­са­лим­ский, ро­дил­ся в Да­мас­ке. С юных лет он от­ли­чал­ся бла­го­че­сти­ем и лю­бо­вью к на­у­кам. Осо­бен­но он пре­успел в фило­со­фии, за что его ста­ли на­зы­вать Пре­муд­рым. Но бу­ду­щий свя­ти­тель ис­кал выс­шей муд­ро­сти в мо­на­сты­рях, в бе­се­дах с пу­стын­но­жи­те­ля­ми. Он при­был в Иеру­са­лим, в оби­тель свя­то­го Фе­о­до­сия, и там сбли­зил­ся с иеро­мо­на­хом Иоан­ном Мос­хом. Он стал его ду­хов­ным сы­ном и от­дал­ся ему в по­слу­ша­ние. Пра­вед­ни­ки вме­сте пу­те­ше­ство­ва­ли по мо­на­сты­рям, за­пи­сы­ва­ли жи­тия и по­уче­ния под­ви­зав­ших­ся в них. Из этих за­пи­сей поз­же со­ста­ви­лась их зна­ме­ни­тая кни­га "Ли­мо­нарь", или "Луг ду­хов­ный", ко­то­рую вы­со­ко оце­нил Седь­мой Все­лен­ский Со­бор.

Спа­са­ясь от опу­сто­ши­тель­ных на­бе­гов пер­сов, свя­тые Иоанн и Со­фро­ний оста­ви­ли Па­ле­сти­ну и уда­ли­лись в Ан­тио­хию, а от­ту­да в Еги­пет. В Егип­те свя­той Со­фро­ний тяж­ко за­не­мог. В то вре­мя он и ре­шил стать мо­на­хом и при­нял по­стриг от пре­по­доб­но­го Иоан­на Мос­ха. По­сле вы­здо­ров­ле­ния свя­то­го Со­фро­ния они оба ре­ши­ли остать­ся в Алек­сан­дрии. Там их с лю­бо­вью при­нял свя­той пат­ри­арх Иоанн Ми­ло­сти­вый (па­мять 12 но­яб­ря), ко­то­ро­му они ока­за­ли боль­шую по­мощь в борь­бе про­тив мо­но­фе­ли­тов. В Алек­сан­дрии у свя­то­го Со­фро­ния за­бо­ле­ли гла­за, и он при­бег­нул с мо­лит­вой и ве­рой к свя­тым бес­среб­ре­ни­кам Ки­ру и Иоан­ну (па­мять 31 ян­ва­ря) и в церк­ви, по­свя­щен­ной им, по­лу­чил ис­це­ле­ние. В бла­го­дар­ность свя­той Со­фро­ний на­пи­сал жи­тие свя­тых це­ли­те­лей-бес­среб­ре­ни­ков.

Ко­гда вар­ва­ры ста­ли угро­жать Алек­сан­дрии, свя­той пат­ри­арх Иоанн в со­про­вож­де­нии свя­тых Со­фро­ния и Иоан­на на­пра­вил­ся в Кон­стан­ти­но­поль, но по до­ро­ге умер. Свя­тые Иоанн и Со­фро­ний с один­на­дца­тью дру­ги­ми мо­на­ха­ми от­пра­ви­лись в Рим. В Ри­ме пре­по­доб­ный Иоанн скон­чал­ся († 622). Те­ло его бы­ло пе­ре­ве­зе­но свя­тым Со­фро­ни­ем в Иеру­са­лим и по­хо­ро­не­но в оби­те­ли свя­то­го Фе­о­до­сия.

В 628 го­ду из пер­сид­ско­го пле­на вер­нул­ся Иеру­са­лим­ский пат­ри­арх За­ха­рия (609–633). По­сле его смер­ти в те­че­ние двух лет пат­ри­ар­ший пре­стол за­ни­мал свя­той Мо­дест (633–634; па­мять 18 де­каб­ря), а по кон­чине свя­ти­те­ля Мо­де­ста пат­ри­ар­хом был из­бран свя­той Со­фро­ний. Свя­ти­тель Со­фро­ний мно­го по­тру­дил­ся на бла­го Иеру­са­лим­ской Церк­ви как ее пред­сто­я­тель (634–644).

В кон­це жиз­ни свя­ти­тель Со­фро­ний со сво­ей паст­вой пе­ре­жил двух­лет­нюю оса­ду Иеру­са­ли­ма ма­го­ме­та­на­ми. Из­ну­рен­ные го­ло­дом хри­сти­ане со­гла­си­лись, на­ко­нец, от­крыть го­род­ские во­ро­та с усло­ви­ем, что про­тив­ник по­ща­дит свя­ты­ни. Од­на­ко это усло­вие не бы­ло вы­пол­не­но, и свя­той пат­ри­арх Со­фро­ний умер в глу­бо­кой скор­би об осквер­не­нии хри­сти­ан­ских свя­тынь.

До нас до­шли со­чи­не­ния пат­ри­ар­ха Со­фро­ния по дог­ма­ти­ке, а так­же "Объ­яс­не­ние на Ли­тур­гию", Жи­тие пре­по­доб­ной Ма­рии Еги­пет­ской (па­мять 1 ап­ре­ля), око­ло 950 тро­па­рей, сти­хи­ры от Пас­хи до Воз­не­се­ния. Еще бу­дучи иеро­мо­на­хом, свя­той Со­фро­ний пе­ре­смот­рел и ис­пра­вил Устав мо­на­сты­ря пре­по­доб­но­го Сав­вы Освя­щен­но­го (па­мять 5 де­каб­ря). Три­песн­цы свя­ти­те­ля на Свя­тую Че­ты­ре­де­сят­ни­цу вхо­дят и в со­став совре­мен­ной Три­о­ди.

См. так­же: "Па­мять иже во свя­тых от­ца на­ше­го Со­фро­ния Пре­муд­ро­го, пат­ри­ар­ха Иеру­са­лим­ско­го" в из­ло­же­нии свт. Ди­мит­рия Ро­стов­ско­го.