Канон святой преподобномученице Евгении Римской

Припев: Свята́я преподобному́ченице Евге́ние, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 06 января (24 декабря ст. ст.)

Глас 2.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Евге́ние, му́ченице Христо́ва, ны́не ликовству́ющи ра́достно со а́нгельскими во́инствы, я́ко де́ва непоро́чна и я́ко му́ченица, венцено́сица всебога́тая, благода́ть дарова́ти моли́ся любо́вию воспева́ющим тя́.

Песнопе́ния, неве́сто Христо́ва, боже́ственнаго послу́шавши, к высо́кому впери́лася еси́ благоро́дию: я́ко бо све́т возсия́ в се́рдце твое́, пе́сней Ду́ха богосло́вие, вся́ко безбо́жие отгоня́.

Же́нское естество́ тво́й у́м забы́в, к му́жеским дея́нием востече́, вмужи́вся благода́тию, и Бо́гу промы́сленне управля́яся, му́ченице Евге́ние, боже́ственнаго благоро́дия тезоимени́тная.

Осия́вшися све́том у́мным, мно́жайшия осия́ния сопричасти́тися соде́лала еси́, богому́драя; его́же ны́не пою́щия тя́ избавля́ющи греха́, сподо́би твои́ми мольба́ми, му́ченице Евге́ние всеблаже́нная.

Богоро́дичен: Умерщвле́ни бы́вше зна́ния са́дом, дре́вом жи́зни, Чи́стая, к жи́зни, ве́рнии, воззва́хомся, из Тебе́ прозя́бшим па́че смы́сла, Богоро́дице, Христо́м Бо́гом; Ему́же со дерзнове́нием моли́ся спасти́ся душа́м на́шим.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Я́коже же́ртва непоро́чна Влады́це принесла́ся еси́ мы́слию соверше́ннейшею и бога́тство тле́емое отри́нула еси́, вопию́щи, всему́драя: Ты́ еси́ Бо́г на́ш, и не́сть свя́т, па́че Тебе́, Го́споди.

Всечи́стая, позна́ся твоя́ чистота́, просия́ страда́ний Твои́х кре́пость, дея́ние бо восхожде́ние виде́ния соде́лала еси́, вопию́щи: Ты́ еси́ Бо́г на́ш, и не́сть свя́т, па́че Тебе́, Го́споди.

Целому́дрия жела́нием одержа́ся, соблюла́ еси́ хвалу́ чистоты́, была́ еси́ прия́тна прему́дрости, Христу́ вопию́щи: Ты́ еси́ Бо́г на́ш, и не́сть свя́т, па́че Тебе́, Го́споди.

Богоро́дичен: Мари́ю, Пречи́стую Богоро́дицу, воспои́м, я́ко Хода́таицу спасе́ния я́вльшуюся, богому́дрии, и вопие́м: не́сть чи́сты, я́коже Ты́, Пречи́стая, и не́сть непоро́чны, па́че Тебе́, Влады́чице.

Седа́лен, гла́с 8.

Воздержа́вшися в труде́х страда́льческих, просла́вилася еси́ по́двиги му́ченическими, мно́ги приве́дши спаса́емыя Зижди́телю твоему́: боже́ственною бо любо́вию оста́вивши привре́менная, му́жеския по́двиги соверши́ла еси́, сла́вная. Те́мже по кончи́не безконе́чную обрела́ еси́ жи́знь, пребыва́ющи с Женихо́м твои́м всегда́, Евге́ние равноа́нгельная. Моли́ Христа́ Бо́га прегреше́ний оставле́ние дарова́ти чту́щим любо́вию всечестну́ю па́мять твою́.

Сла́ва, и ны́не: Не́бо мне́ показа́ся дне́сь земля́, на не́й бо ражда́ется Творе́ц и в я́слех восклоня́ется в Вифлее́ме Иуде́йстем. Со а́нгелы пою́т па́стырие непреста́нно: в вы́шних сла́ва, ми́р в ми́ре; ви́деша бо звезду́, путеше́ствующу с волхвы́, ско́ро же теку́ще принести́ да́ры, зла́то, сми́рну и лива́н, я́ко все́х су́щему Бо́гу, и Царю́ ве́чному, и Зижди́телю вся́ческих, в верте́пе за милосе́рдие ро́ждшемуся.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

Прише́л еси́, воплоти́вся от Де́вы, Вы́шний, Себе́ обручи́в де́в соста́вы, Тебе́ Еди́наго возлю́бльшия, де́вственнаго Жениха́ зна́емаго.

Рождества́ плотска́го совлекла́ еси́ покрыва́ло: пакирожде́ния же нетле́нную оде́жду, му́ченице всесла́вная, светови́дно облекла́ еси́ креще́нием.

Возсия́ светоно́сная заря́ се́рдцу твоему́, ле́сти отгоня́щи излия́нный мра́к блиста́нием благода́ти, му́ченице Христо́ва Евге́ние, до́брая де́во.

Удобре́нно твое́ и красно́ житие́ просвети́ла еси́, воздержа́нием пе́рвее плотски́я стра́сти увяди́вши, последи́ же страда́нием пресве́тло, Евге́ние, сия́ющи.

Богоро́дичен: Превы́шшая а́нгел была́ еси́, Всепе́тая, О́тча ро́ждши сове́та вели́каго А́нгела, Челове́ка бы́вша за мно́гое благоутро́бие, Человеколю́бца.

Пе́снь 5.

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо ра́зве Тебе́ Бо́га не зна́ю.

Тече́ние твое́ направля́емо ви́дя ко спасе́нию, зми́й душепа́губный, страстоно́сице, воздвиза́ет искуше́ния тебе́ разли́чная, твою́ кре́пость разсла́бити покуша́яся; сего́ же, богому́драя чи́стая, попра́ла еси́.

Вся́ добра́ до́брых Да́телю, и Благоде́телю, и Жениху́ ду́ш, Христу́, яви́лася еси́, укра́шена в по́стницех воздержа́нием и му́ченическим страда́нием сия́ющи, му́ченице Евге́ние, Христо́ва до́брая де́во.

Вене́ц твоему́ верху́ наложи́ся дарова́ний: Боже́ственную бо почти́ла еси́ му́дрость, бога́тство и сла́ву оте́ческую презре́вши, и с кре́постию после́довала еси́ возлю́бленному Жениху́ твоему́, всечестна́я.

Богоро́дичен: Из Тебе́ Жи́знь, возсия́вши ми́ру, Богороди́тельнице, пре́жде сме́ртию удержа́нныя воззыва́ет к жи́зни присносу́щней причаще́нием, ве́рою вопию́щия: ино́го, ра́зве Тебе́, Бо́га не зна́ем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Дрема́ния твои́м ве́ждом не дала́ еси́, до́ндеже сладостра́стие все́ угаси́ла еси́ и чи́стую Зижди́телю твоему́ тебе́ саму́ю соверши́ла еси́ оби́тель.

Еги́птяныни, нра́вом поревнова́вши, очерне́вшая де́лом и и́менем, клевета́ти остри́тся честно́е житие́ твое́, всечестна́я.

Тве́рдую показа́вши све́тлость и врачева́ний благода́тию обогати́вшися бога́тством ве́ры, чернори́зиц составле́нию бы́сть учи́тельница.

Богоро́дичен: Та́инственно уча́хуся несказа́нному вси́ проро́цы Твоему́, Всечи́стая, Рождеству́, духо́вно образу́юще и предглаго́люще все́м бу́дущая.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Изъясни́ла еси́ все́м богодухнове́нных писа́ний и́стину, же́нское естество́ ому́жествивши, и вся́ удиви́ла еси́ пресла́вно, честна́я, я́же привела́ еси́ све́тлы ве́ровавшия Христу́, всебога́тая.

Я́вственно обличи́ла еси́ и́дольское неи́стовство, всехва́льная, боже́ственными твои́ми уче́ньми, и де́в неизче́тное мно́жество обручи́вши все́ми ца́рствующему Христу́ све́тлое му́ченическою кро́вию.

Ви́девши житие́ твое́ светоно́сное, Васи́лла сла́вная, боже́ственне поревнова́вши и Христу́ обручи́ся, оста́вльши плотско́е все́ сладостра́стие, и ны́не му́ченическия ра́дости сподо́бися.

Богоро́дичен: Па́жить исцели́ла еси́ сме́ртную, безсе́менно ро́ждши Жи́знь Ипоста́сную, Де́во Всенепоро́чная, Богороди́тельнице Чи́стая. Те́м же Тя́, ра́дующеся, исто́чник безсме́ртия имену́ем.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

В реце́ ю́ношески, во огни́ же терпели́вно искуси́лася еси́: проти́вная бо естества́ кре́пко прешла́ еси́, — Христа́ по́йте, дела́, — зову́щи, — и превозноси́те во вся́ ве́ки.

Странноле́пно явле́йся Христо́с тебе́, в темни́це держи́мей, препитава́ет бога́тно и Рождество́м Свои́м совокупля́ет го́рним во́инством тя́, славосло́вящую Его́ во ве́ки.

Тво́й Жени́х благоле́пно венцы́ тя́ сугу́быми украша́ет, Евге́ние богому́драя, и тебе́ черто́г све́тел пра́ведно, я́ко пра́ведный, дае́т. Его́же превозно́сим во вся́ ве́ки.

Благода́ть Бо́жия, светови́дно облиста́вши тя́, ны́не озаря́ет во оби́телех небе́сных, Ея́же напо́лнитися твои́ми моли́твами непреста́нно моли́ соверша́ющим твою́ па́мять, богому́драя.

Богоро́дичен: Безсме́ртныя зари́ исто́чник ве́мы Тя́, Богоро́дице, я́ко ро́ждшую Сло́во Безсме́ртнаго Отца́, вся́ сме́рти избавля́ющаго превозноша́ющия Его́ во ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Во оби́тели все́льшися небе́сныя, сла́вная, ны́не сла́дости ра́йския сподо́билася еси́ я́вственно с де́вами, я́ко му́ченица всеи́стинна и с му́ченицами де́ва всенепоро́чная, Евге́ние всеблаже́нная.

Жела́ние получи́ла еси́ па́че ума́ и смы́сла, жела́ний кра́йнейшему предстоя́щи све́тло и светоза́рными луча́ми Нача́льныя Тро́ицы, богому́драя, я́вственно сия́ющи, Евге́ние, до́брая де́во.

Свещу́ держа́щи де́вства неуга́сну, му́ченическим венце́м украси́лася еси́, и ны́не моля́щи не преста́й благоче́стно тя́ любо́вию почита́ющим спасти́ся моли́твами твои́ми, Евге́ние всесла́вная.

К Боже́ственному ны́не изшла́ еси́ прохлажде́нию, вседо́бляя, ра́н проше́дши о́гнь нестерпи́мый и непостоя́нную во́ду искуше́ний, му́ченице Евге́ние. Христа́ у́бо моли́ спасти́ ду́ши на́ша.

Богоро́дичен: Я́ко руно́, Всенепоро́чная, до́ждь небе́сный во чре́ве заче́нши, на́м родила́ еси́ безсме́ртие даю́щаго, благоче́стно Того́ воспева́ющим и Тя́, Всенепоро́чную Богоро́дицу, велича́ющим.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Є҆ѵге́нїе, мꙋ́ченице хрⷭ҇то́ва, ны́нѣ ликовствꙋ́ющи ра́достнѡ со а҆́гг҃льскими во́инствы, ꙗ҆́кѡ дв҃а непоро́чна, и҆ ꙗ҆́кѡ мꙋ́ченица вѣнцено́сица всебога́таѧ, бл҃года́ть дарова́ти моли́сѧ любо́вїю воспѣва́ющымъ тѧ̀.

Пѣснопѣ́нїѧ, невѣ́сто хрⷭ҇то́ва, бжⷭ҇твеннагѡ послꙋ́шавши, къ высо́комꙋ впери́ласѧ є҆сѝ благоро́дїю: ꙗ҆́кѡ бо свѣ́тъ возсїѧ̀ въ се́рдце твоѐ, пѣ́сней дх҃а бг҃осло́вїе, всѧ́ко безбо́жїе ѿгонѧ̀.

Же́нское є҆стество̀ тво́й ᲂу҆́мъ забы́въ, къ мꙋ́жєскимъ дѣѧ́нїємъ востечѐ, вмꙋжи́всѧ бл҃года́тїю, и҆ бг҃ꙋ промы́сленнѣ ᲂу҆правлѧ́ѧсѧ, мꙋ́ченице є҆ѵге́нїе, бжⷭ҇твеннагѡ благоро́дїѧ тезоимени́тнаѧ.

Ѡ҆сїѧ́вшисѧ свѣ́томъ ᲂу҆́мнымъ, мно́жайшыѧ ѡ҆сїѧ́нїѧ сопричасти́тисѧ содѣ́лала є҆сѝ, бг҃омꙋ́драѧ: є҆го́же ны́нѣ пою́щыѧ тѧ̀ и҆збавлѧ́ющи грѣха̀, сподо́би твои́ми мольба́ми, мꙋ́ченице є҆ѵге́нїе всеблаже́ннаѧ.

Бг҃оро́диченъ: Оу҆мерщвле́ни бы́вше зна́нїѧ са́домъ, дре́вомъ жи́зни, чⷭ҇таѧ, къ жи́зни вѣ́рнїи воззва́хомсѧ, и҆зъ тебє̀ прозѧ́бшимъ па́че смы́сла, бцⷣе, хрⷭ҇то́мъ бг҃омъ: є҆мꙋ́же со дерзнове́нїемъ моли́сѧ, спасти́сѧ дꙋша́мъ на́шымъ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти, нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Ꙗ҆́коже же́ртва непоро́чна влⷣцѣ принесла́сѧ є҆сѝ мы́слїю соверше́ннѣйшею: и҆ бога́тство тлѣ́емое ѿри́нꙋла є҆сѝ вопїю́щи, всемꙋ́драѧ: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.

Всечⷭ҇таѧ, позна́сѧ твоѧ̀ чистота̀, просїѧ̀ страда́нїй твои́хъ крѣ́пость, дѣѧ́нїе бо восхожде́нїе видѣ́нїѧ содѣ́лала є҆сѝ, вопїю́щи: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.

Цѣломꙋ́дрїѧ жела́нїемъ ѡ҆держа́сѧ, соблюла̀ є҆сѝ хвалꙋ̀ чистоты̀, была̀ є҆сѝ прїѧ́тна премꙋ́дрости, хрⷭ҇тꙋ̀ вопїю́щи: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.

Бг҃оро́диченъ: Марі́ю пречⷭ҇тꙋю бцⷣꙋ воспои́мъ, ꙗ҆́кѡ хода́таицꙋ спасе́нїѧ ꙗ҆́вльшꙋюсѧ, бг҃омꙋ́дрїи, и҆ вопїе́мъ: нѣ́сть чи́сты, ꙗ҆́коже ты̀, пречⷭ҇таѧ, и҆ нѣ́сть непоро́чны, па́че тебє̀, влⷣчце.

Сѣда́ленъ, гла́съ и҃.

Воздержа́вшисѧ въ трꙋдѣ́хъ страда́льческихъ, просла́виласѧ є҆сѝ пѡ́двиги мч҃ническими, мно́ги приве́дши спаса́ємыѧ зижди́телю твоемꙋ̀: бжⷭ҇твенною бо любо́вїю ѡ҆ста́вивши привре́мєннаѧ, мꙋ́жєскїѧ по́двиги соверши́ла є҆сѝ, сла́внаѧ. тѣ́мже по кончи́нѣ безконе́чнꙋю ѡ҆брѣла̀ є҆сѝ жи́знь, пребыва́ющи съ женихо́мъ твои́мъ всегда̀, є҆ѵге́нїе равноа́гг҃льнаѧ. молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти чтꙋ́щымъ любо́вїю всечестнꙋ́ю па́мѧть твою̀.

Сла́ва, и҆ ны́нѣ: Не́бо мнѣ̀ показа́сѧ дне́сь землѧ̀, на не́й бо ражда́етсѧ творе́цъ, и҆ въ ꙗ҆́слехъ восклонѧ́етсѧ, въ виѳлее́мѣ і҆ꙋде́йстѣмъ. со а҆́гг҃лы пою́тъ па́стырїе непреста́ннѡ: въ вы́шнихъ сла́ва, ми́ръ въ мі́рѣ: ви́дѣша бо ѕвѣздꙋ̀ пꙋтеше́ствꙋющꙋ съ волхвы̑: ско́рѡ же текꙋ́ще принестѝ да́ры, зла́то, смѵ́рнꙋ и҆ лїва́нъ, ꙗ҆́кѡ всѣ́хъ сꙋ́щемꙋ бг҃ꙋ и҆ цр҃ю̀ вѣ́чномꙋ и҆ зижди́телю всѧ́ческихъ, въ верте́пѣ за милосе́рдїе ро́ждшемꙋсѧ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Прише́лъ є҆сѝ, воплоти́всѧ ѿ дв҃ы, вы́шнїй, себѣ̀ ѡ҆брꙋчи́въ дѣ́въ соста́вы, тебѐ є҆ди́наго возлю́бльшыѧ дѣ́вственнаго жениха̀ зна́емаго.

Ржⷭ҇тва̀ плотска́гѡ совлекла̀ є҆сѝ покрыва́ло: пакирожде́нїѧ же нетлѣ́ннꙋю ѻ҆де́ждꙋ, мч҃нице всесла́внаѧ, свѣтови́днѡ ѡ҆блекла̀ є҆сѝ креще́нїемъ.

Возсїѧ̀ свѣтоно́снаѧ зарѧ̀ се́рдцꙋ твоемꙋ̀, ле́сти ѿгонѧ́щи и҆злїѧ́нный мра́къ, блиста́нїемъ благода́ти, мч҃нице хрⷭ҇то́ва є҆ѵге́нїе, до́браѧ дѣ́во.

Оу҆добре́ннѡ твоѐ и҆ краснѡ̀ житїѐ просвѣти́ла є҆сѝ, воздержа́нїемъ пе́рвѣе плотскі̑ѧ стра̑сти ᲂу҆вѧди́вши, послѣди́ же страда́нїемъ пресвѣ́тлѡ, є҆ѵге́нїе, сїѧ́ющи.

Бг҃оро́диченъ: Превы́шшаѧ а҆́гг҃лъ была̀ є҆сѝ, всепѣ́таѧ, ѻ҆́ч҃а ро́ждши совѣ́та вели́кагѡ а҆́гг҃ла, чл҃вѣ́ка бы́вша за мно́гое бл҃гоꙋтро́бїе, чл҃вѣколю́бца.

Пѣ́снь є҃.

І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо ра́звѣ тебє̀, бо́га не зна́ю.

Тече́нїе твоѐ направлѧ́емо ви́дѧ ко спасе́нїю, ѕмі́й дꙋшепа́гꙋбный, страстоно́сице, воздвиза́етъ и҆скꙋшє́нїѧ тебѣ̀ разли̑чнаѧ, твою̀ крѣ́пость разсла́бити покꙋша́ѧсѧ: сего́ же, бг҃омꙋ́драѧ чи́стаѧ, попра́ла є҆сѝ.

Всѧ̀ добра̀ до́брыхъ да́телю, и҆ благодѣ́телю, и҆ женихꙋ̀ дꙋ́шъ хрⷭ҇тꙋ̀, ꙗ҆ви́ласѧ є҆сѝ, ᲂу҆кра́шена въ по́стницѣхъ воздержа́нїемъ, и҆ мꙋ́ченическимъ страда́нїемъ сїѧ́ющи, мꙋ́ченице є҆ѵге́нїе хрⷭ҇то́ва до́браѧ дѣ́во.

Вѣне́цъ твоемꙋ̀ верхꙋ̀ наложи́сѧ дарова́нїй: бжⷭ҇твеннꙋю бо почти́ла є҆сѝ мꙋ́дрость, бога́тство и҆ сла́вꙋ ѻ҆те́ческꙋю презрѣ́вши, и҆ съ крѣ́постїю послѣ́довала є҆сѝ возлю́бленномꙋ женихꙋ̀ твоемꙋ̀, всечестна́ѧ.

Бг҃оро́диченъ: И҆зъ тебє̀ жи́знь возсїѧ́вши мі́рꙋ, бг҃ороди́тельнице, пре́жде сме́ртїю ᲂу҆держа̑нныѧ воззыва́етъ къ жи́зни присносꙋ́щнѣй причаще́нїемъ, вѣ́рою вопїю́щыѧ: и҆но́гѡ ра́звѣ тебє̀ бг҃а не зна́емъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Дрема́нїѧ твои̑мъ вѣ́ждѡмъ не дала̀ є҆сѝ, до́ндеже сладостра́стїе всѐ ᲂу҆гаси́ла є҆сѝ, и҆ чи́стꙋю зижди́телю твоемꙋ̀ тебѐ самꙋ́ю соверши́ла є҆сѝ ѻ҆би́тель.

Є҆гѵ́птѧныни нра́вѡмъ поревнова́вши, ѡ҆чернѣ́вшаѧ дѣ́ломъ и҆ и҆́менемъ, клевета́ти ѡ҆стри́тсѧ честно́е житїѐ твоѐ, всечестна́ѧ.

Тве́рдꙋю показа́вши свѣ́тлость, и҆ врачева́нїй благода́тїю ѡ҆богати́вшисѧ бога́тствомъ вѣ́ры, чернори́зицъ составле́нїю бы́сть ᲂу҆чи́тельница.

Бг҃оро́диченъ: Та́инственнѡ ᲂу҆ча́хꙋсѧ несказа́нномꙋ всѝ прⷪ҇ро́цы твоемꙋ̀, всечⷭ҇таѧ, ржⷭ҇твꙋ̀, дꙋхо́внѡ ѡ҆бразꙋ́юще и҆ предглаго́люще всѣ̑мъ бꙋ̑дꙋщаѧ.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

И҆з̾ѧсни́ла є҆сѝ всѣ̑мъ бг҃одꙋхнове́нныхъ писа́нїй и҆́стинꙋ, же́нское є҆стество̀ ѡ҆мꙋ́жествивши, и҆ всѧ̑ ᲂу҆диви́ла є҆сѝ пресла́внѡ, честна́ѧ, ꙗ҆̀же привела̀ є҆сѝ свѣ́тлы вѣ́ровавшыѧ хрⷭ҇тꙋ̀, всебога́таѧ.

Ꙗ҆́вственнѡ ѡ҆бличи́ла є҆сѝ і҆́дѡльское неи́стовство, всехва́льнаѧ, бжⷭ҇твенными твои́ми ᲂу҆че́ньми, и҆ дѣ́въ неизче́тное мно́жество ѡ҆брꙋчи́вши всѣ́ми црⷭ҇твꙋющемꙋ хрⷭ҇тꙋ̀ свѣ́тлое мч҃ническою кро́вїю.

Ви́дѣвши житїѐ твоѐ свѣтоно́сное, васі́лла сла́внаѧ бжⷭ҇твеннѣ поревнова́вши и҆ хрⷭ҇тꙋ̀ ѡ҆брꙋчи́сѧ, ѡ҆ста́вльши плотско́е всѐ сладостра́стїе: и҆ ны́нѣ мꙋ́ченическїѧ ра́дости сподо́бисѧ.

Бг҃оро́диченъ: Па́жить и҆сцѣли́ла є҆сѝ сме́ртнꙋю, безсѣ́меннѡ ро́ждши жи́знь ѵ҆поста́снꙋю, дв҃о всенепоро́чнаѧ, бг҃ороди́тельнице чⷭ҇таѧ. тѣ́мже тѧ̀ ра́дꙋющесѧ и҆сто́чникъ безсме́ртїѧ и҆менꙋ́емь.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Въ рѣцѣ̀ ю҆́ношески, во ѻ҆гни́ же терпѣли́внѡ и҆скꙋси́ласѧ є҆сѝ: проти́внаѧ бо є҆стєства̀ крѣ́пкѡ прешла̀ є҆сѝ, хрⷭ҇та̀ по́йте дѣла̀ зовꙋ́щи, и҆ превозноси́те во всѧ̑ вѣ́ки.

Страннолѣ́пнѡ ꙗ҆вле́йсѧ хрⷭ҇то́съ тебѣ̀, въ темни́цѣ держи́мѣй, препитава́етъ бога́тнѡ, и҆ ржⷭ҇тво́мъ свои́мъ совокꙋплѧ́етъ гѡ́рнимъ во́инствѡмъ, тѧ̀ славосло́вѧщꙋю є҆го̀ во вѣ́ки.

Тво́й жени́хъ благолѣ́пнѡ вѣнцы̑ тѧ̀ сꙋгꙋ́быми ᲂу҆краша́етъ, є҆ѵге́нїе бг҃омꙋ́драѧ: и҆ тебѣ̀ черто́гъ свѣ́телъ пра́веднѡ, ꙗ҆́кѡ пра́ведный, дае́тъ. є҆го́же превозно́симъ во всѧ̑ вѣ́ки.

Бл҃года́ть бж҃їѧ, свѣтови́днѡ ѡ҆блиста́вши тѧ̀, ны́нѣ ѡ҆зарѧ́етъ во ѻ҆би́телехъ нбⷭ҇ныхъ: є҆ѧ́же напо́лнитисѧ твои́ми моли́твами непреста́ннѡ молѝ соверша́ющымъ твою̀ па́мѧть, бг҃омꙋ́драѧ.

Бг҃оро́диченъ: Безсме́ртныѧ зарѝ и҆сто́чникъ вѣ́мы тѧ̀, бцⷣе, ꙗ҆́кѡ ро́ждшꙋю сло́во безсме́ртнагѡ ѻ҆ц҃а̀, всѧ̑ сме́рти и҆збавлѧ́ющаго, превозноша́ющыѧ є҆го̀ во вѣ́ки.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Во ѻ҆би́тєли все́льшисѧ нбⷭ҇ныѧ, сла́внаѧ, ны́нѣ сла́дости ра́йскїѧ сподо́биласѧ є҆сѝ ꙗ҆́вственнѡ съ дѣ́вами, ꙗ҆́кѡ мч҃ница всеи́стинна, и҆ съ мч҃ницами дѣ́ва всенепоро́чнаѧ, є҆ѵге́нїе всеблаже́ннаѧ.

Жела́нїе полꙋчи́ла є҆сѝ па́че ᲂу҆ма̀ и҆ смы́сла, жела́нїй кра́йнѣйшемꙋ предстоѧ́щи свѣ́тлѡ, и҆ свѣтоза́рными лꙋча́ми нача́льныѧ трⷪ҇цы, бг҃омꙋ́драѧ, ꙗ҆́вственнѡ сїѧ́ющи, є҆ѵге́нїе, до́браѧ дѣ́во.

Свѣщꙋ̀ держа́щи дѣ́вства неꙋга́снꙋ, мч҃ническимъ вѣнце́мъ ᲂу҆краси́ласѧ є҆сѝ: и҆ ны́нѣ молѧ́щи не преста́й, бл҃гоче́стнѡ тѧ̀ любо́вїю почита́ющымъ спасти́сѧ моли́твами твои́ми, є҆ѵге́нїе всесла́внаѧ.

Къ бжⷭ҇твенномꙋ ны́нѣ и҆зшла̀ є҆сѝ прохлажде́нїю, вседо́блѧѧ, ра́нъ проше́дши ѻ҆́гнь нестерпи́мый, и҆ непостоѧ́ннꙋю во́дꙋ и҆скꙋше́нїй, мꙋ́ченице є҆ѵге́нїе: хрⷭ҇та̀ ᲂу҆̀бо молѝ спастѝ дꙋ́шы на́шѧ.

Ꙗ҆́кѡ рꙋно̀, всенепоро́чнаѧ, до́ждь нбⷭ҇ный во чре́вѣ заче́нши, на́мъ родила̀ є҆сѝ безсме́ртїе даю́щаго, благоче́стнѡ того̀ воспѣва́ющымъ и҆ тѧ̀ всенепоро́чнꙋю бцⷣꙋ велича́ющымъ.

Пре­по­доб­но­му­че­ни­ца Ев­ге­ния, ро­дом рим­лян­ка, жи­ла в Алек­сан­дрии, ку­да ее отец, Филипп, был по­слан им­пе­ра­то­ром Ком­мо­дом (180–192) в ка­че­стве на­мест­ни­ка Егип­та. Ев­ге­ния по­лу­чи­ла пре­крас­ное об­ра­зо­ва­ние и от­ли­ча­лась доб­рым нра­вом и кра­со­той. Мно­гие знат­ные юно­ши до­би­ва­лись ее ру­ки, но всту­пать в брак она не хо­те­ла. По­зна­ко­мив­шись с По­сла­ни­я­ми апо­сто­ла Пав­ла, она всей ду­шой устре­ми­лась к хри­сти­ан­ству и тай­но от ро­ди­те­лей, в со­про­вож­де­нии сво­их двух ра­бов, Про­та и Иа­к­ин­фа, пе­ре­одев­шись в муж­скую одеж­ду, уда­ли­лась в муж­ской мо­на­стырь. Там она со сво­и­ми ра­ба­ми и спут­ни­ка­ми при­ня­ла Свя­тое Кре­ще­ние от епи­ско­па Элия, ко­то­ро­му бы­ло от­кры­то о ней в ви­де­нии, и он бла­го­сло­вил ее под­ви­зать­ся в мо­на­сты­ре в об­ра­зе ино­ка Ев­ге­ния.

Сво­и­ми по­дви­га­ми свя­тая Ев­ге­ния стя­жа­ла дар ис­це­ле­ния. Од­на­жды к ней за по­мо­щью об­ра­ти­лась бо­га­тая мо­ло­дая вдо­ва Ме­ла­ния. Уви­дев юно­го ино­ка, эта жен­щи­на вос­пы­ла­ла нечи­стой стра­стью, но бу­дучи от­верг­ну­та, она из­мыс­ли­ла кле­ве­ту о по­пыт­ке на­си­лия. Свя­тая Ев­ге­ния пред­ста­ла на суд к пра­ви­те­лю Егип­та, т. е. к сво­е­му от­цу, и бы­ла вы­нуж­де­на от­крыть свою тай­ну. Ее род­ные об­ра­до­ва­лись, най­дя ту, ко­то­рую дол­го опла­ки­ва­ли. Через неко­то­рое вре­мя все они при­ня­ли Свя­тое Кре­ще­ние. Но Филипп по до­но­су языч­ни­ков был сме­щен с по­ста пра­ви­те­ля. Алек­сан­дрий­ские хри­сти­ане из­бра­ли его сво­им епи­ско­пом. Но­вый пра­ви­тель, опа­са­ясь на­род­но­го гне­ва, не стал от­кры­то каз­нить Филип­па, а по­до­слал убийц. Во вре­мя уеди­нен­ной мо­лит­вы епи­ско­па ему бы­ли на­не­се­ны ра­ны, от ко­то­рых он через три дня му­че­ни­че­ски скон­чал­ся. Ов­до­вев, Клав­дия с до­че­рью и слу­га­ми уеха­ла в свое по­ме­стье, на­хо­див­ше­е­ся в окрест­но­стях Ри­ма. Там Ев­ге­ния про­дол­жа­ла ино­че­скую жизнь. Она при­ве­ла ко Хри­сту мно­гих дев, а Клав­дия устро­и­ла стран­но­при­им­ный дом и слу­жи­ла вдо­вам. По про­ше­ствии несколь­ких спо­кой­ных лет им­пе­ра­тор Гал­ли­ен (260–268) вновь на­чал го­не­ние на хри­сти­ан, и мно­гие из них на­шли убе­жи­ще у свя­тых Клав­дии и Ев­ге­нии. В то вре­мя оси­ро­тев­шая мо­ло­дая рим­лян­ка из цар­ско­го ро­да, Ва­сил­ла, услы­шав о хри­сти­а­нах и о свя­той Ев­ге­нии, за­хо­те­ла встре­тить­ся со свя­той и на­пи­са­ла ей пись­мо. В от­вет свя­тая Ев­ге­ния при­сла­ла сво­их дру­зей и спо­движ­ни­ков, Про­та и Иа­к­ин­фа, ко­то­рые про­све­ти­ли Ва­сил­лу, и она при­ня­ла Свя­тое Кре­ще­ние. Слу­жан­ка Ва­сил­лы рас­ска­за­ла ее же­ни­ху Пом­пею, что его неве­ста ста­ла хри­сти­ан­кой, и Пом­пей по­жа­ло­вал­ся им­пе­ра­то­ру на хри­сти­ан, про­по­ве­ду­ю­щих без­бра­чие. При­вле­чен­ная к от­ве­ту, Ва­сил­ла от­ка­за­лась всту­пать с Пом­пе­ем в брак, и за это ее за­ко­ло­ли ме­чом. Свя­тых Про­та и Иа­к­ин­фа по­та­щи­ли в идоль­ский храм для при­не­се­ния жерт­вы, но ед­ва они всту­пи­ли ту­да, идол упал и раз­бил­ся. Свя­тые му­че­ни­ки Прот и Иа­к­инф бы­ли обез­глав­ле­ны. Свя­тую Ев­ге­нию то­же на­силь­но при­ве­ли в храм Ди­а­ны, но не успе­ла она еще всту­пить в него, как всё ка­пи­ще вме­сте с идо­лом раз­ру­ши­лось. Свя­тую му­че­ни­цу бро­си­ли в Тибр с кам­нем на шее, но ка­мень сва­лил­ся, и она оста­лась невре­ди­ма. Невре­ди­мой оста­лась она и в огне. То­гда ее бро­си­ли в ров, где она на­хо­ди­лась 10 дней. В это вре­мя ей явил­ся Сам Спа­си­тель и воз­ве­стил, что она вой­дет в Цар­ство Небес­ное в день Рож­де­ства Хри­сто­ва. Ко­гда в 262 го­ду на­сту­пил этот свет­лый празд­ник, па­лач умерт­вил свя­тую му­че­ни­цу ме­чом. Вско­ре при­ня­ла му­че­ни­че­ский ве­нец и свя­тая Клав­дия. Пре­по­доб­но­му­че­ни­ца Ев­ге­ния пре­ду­пре­ди­ла ее о дне смер­ти.


См. так­же: "Жи­тие и стра­да­ние свя­той пре­по­доб­но­му­че­ни­цы Ев­ге­нии" в из­ло­же­нии свт. Ди­мит­рия Ро­стов­ско­го.