Канон святому апостолу и первомученику Стефану, архидиакону

Припев: Святы́й первому́чениче и Стефáне, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 09 января (27 декабря ст. ст.); 15 августа (02 августа ст. ст.); 28 сентября (15 сентября ст. ст.)

Глас 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Светолу́чными блиста́нии Ду́ха просвеща́емь, преесте́ственными страда́нии и тве́рдаго терпе́ния, тя́ пою́щия просвети́, предстоя́ Влады́це, венцено́сче пребога́те Стефа́не, му́чеников венча́ние.

Подвиготеку́щим нача́ток бы́в и верхо́вник му́ченическаго собо́ра, зре́ти сподо́бился еси́ Страстополо́жника, сла́вне, десни́цею живоно́сною богоплете́нный тебе́ простира́юща вене́ц, чу́дный Стефа́не.

Еди́н сы́й сокро́вище бла́гости, Спа́се, показа́л еси́ от земны́х не́др сокро́вище многоце́нное, бога́тство неиждива́емое, неотъе́млемо име́ние, коры́сть неги́блему, Стефа́на Твоего́ первому́ченика.

Ангелозра́чною я́ве све́тлостию озаря́емь, а́нгельскими пе́сньми, первому́чениче Стефа́не и диа́конов перволу́чший, сокрове́н я́ко яви́лся еси́, досто́йно вои́стинну почти́лся еси́, испо́лнен благово́ния духо́внаго.

Богоро́дичен: Воплоще́ннаго на́с ра́ди, Пренепоро́чная, пре́жде Безпло́тнаго, Богонача́льнаго Сло́ва О́тча родила́ еси́. О, де́вства селе́ние, и прия́телище чистоты́, и хра́м свяще́ния, Влады́чице ми́ра Богоневе́сто!

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Священносло́в свяще́нный и богосло́в показа́лся еси́, сплета́яся с евре́йскими собо́ры, облича́я кре́пко си́х безбо́жие и богобо́рный нра́в, Стефа́не, му́чениче всеизря́дне.

Первому́ченика Христо́ва и служи́телей пе́рваго, му́чеником тече́ния степе́нь показа́вша све́тло, а́нгелов собесе́дника, прииди́те согла́сно вси́, пе́сньми боже́ственными почти́м.

Сокрове́нное сокро́вище в земли́ явля́ется, и ми́р благово́ния боже́ственнаго и бога́тых даро́в Це́рковь испо́лни му́чеников пе́рвый и служи́телей первоизбра́нный.

Умерщвле́нный мо́й у́м жи́зни де́йством, тобо́ю пропове́давшимся, му́дре, возста́ви пе́ти твое́ честно́е торжество́ и твои́м стопа́м после́довати, Стефа́не блаже́нне, сподо́би.

Богоро́дичен: Две́рь яви́лася еси́ мы́сленна восто́ка Вы́шняго, на земли́ я́вльшагося, Де́во: Тобо́ю бо к на́м Сло́во привни́де спасти́ все́х от безслове́сия, Пречи́стая.

Седа́лен, гла́с 1.

Апо́столе Христо́в, диа́конов пе́рвый, первому́чениче му́дре, му́чеников ве́рх, мирски́я концы́ освяти́в страда́нии твои́ми и чудесы́ ду́ши челове́ков просвети́л еси́, чту́щия тя́ изба́ви вся́ческих бе́д, всехва́льне Стефа́не.

Богоро́дичен: Упова́ние христиа́н, Пресвята́я Де́во, Его́же родила́ еси́ Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́, ве́рою и любо́вию при́сно Тя́ сла́вящим.

Крестобогоро́дичен: Нескве́рная А́гница, А́гнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Струи́ на́м дне́сь ми́ра источи́ благово́ния, исто́чник исхо́дит и река́ Боже́ственных бла́г, и пи́щный пото́к отве́рзе сла́вный, пе́рвый му́чеников, и́же ве́ры испо́лнен, и си́лы Боже́ственныя, и благода́ти.

Я́ко свяще́н и све́тел и благонаро́чит де́нь первому́ченика, испо́лнен све́та и духо́внаго вои́стинну весе́лия, Ца́рскому гра́ду яви́ся, сохраня́я держа́ву честны́я Це́ркве и ва́рварскую де́рзость отгоня́я.

Благо́е насле́дие восприя́л еси́ досто́йно, Стефа́не блаже́нне, иде́же Христо́с Ца́рь все́х, ты́ всели́лся еси́, Того́ бо яви́лся еси́ служи́тель, зна́мений и чуде́с творя́ си́лы и подая́ боля́щим исцеле́ния.

Непрекло́нен Це́ркве и непоколеби́мь и водруже́н сто́лп простре́ся от земли́ да́же до небе́с, заре́ю благоче́стия просвеща́я вся́ концы́, Стефа́н, вели́кий и́стины пропове́дник, страда́ния и́стинный побо́рник.

Богоро́дичен: Но́в Ада́м за пе́рваго Ты́ бы́л еси́, от Де́вы за прама́терь, Изба́витель все́х и Спа́с, за сме́рть и́стинна жи́знь безсме́ртная. Те́мже, Тя́ ро́ждшую Богоро́дицу ве́дуще, по достоя́нию, вси́ ве́рнии, ублажа́ем.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Беззако́нных евре́ев су́етный вои́стинну собо́р терпели́вно обличи́л еси́, от те́х, богогла́се, покрыва́емь мета́нии ка́менными, на небеса́ я́ко победоно́сец возне́слся еси́ ду́хом, Стефа́не.

Я́ко красе́н, я́ко у́тро, ми́ру яви́лся еси́, сла́вне Стефа́не, мглу́ отгоня́, и де́монов прогоня́ мечта́ния и неду́гующих стра́сти, и душе́вных не́мощей целя́ гное́ния, богодохнове́нне.

Мы́сленно со а́нгелы, блаже́нне, ра́дуяся, ми́ра концы́ освяща́еши вои́стинну твои́м прише́ствием и благода́тию, благово́ния ми́ры духо́вными благоуха́я и бе́д и бу́ри избавля́я.

Богоро́дичен: Ма́тернее дерзнове́ние е́же к Сы́ну Твоему́ иму́щи, Всечи́стая, сро́днаго промышле́ния, е́же о на́с, не пре́зри, мо́лимся: я́ко Тебе́ и еди́ну христиа́не ко Влады́це очище́ние ми́лостивно предлага́ем.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

А́нгелом я́ко подо́бник произволе́нием бы́в, ви́д а́нгельский стяжа́л еси́, блаже́нне, с ни́миже ра́дуяся и обходя́, пою́щия тя́ спаса́й.

Глаго́л, блаже́нне, твои́х богодохнове́нных си́ла, я́ко шу́м гро́мный, во у́ши, богоприя́тне, я́ве возгреме́ беззако́нных и ли́ца и́х помрачи́.

Сла́ву Оте́ческую узре́ти сподо́бился еси́ и сея́ соесте́ственное сия́ние, Стефа́не, страда́нии возвеща́я тебе́ све́тлыя венцы́, богогла́се всече́стне.

Богоро́дичен: Сы́н Единоро́дный и пре́жде ве́к неви́димый напосле́док дне́й Пе́рвенец бы́сть, ви́димь пло́тию из Тебе́, Богома́ти, Бо́г спасе́ния моего́.

Конда́к, гла́с 6:

Пе́рвый се́ялся еси́ на земли́ небе́сным де́лателем, всехва́льне Стефа́не, пе́рвый на земли́ за Христа́ кро́вь излия́л еси́, блаже́нне, пе́рвый от Него́ побе́ды венце́м увя́злся еси́ на небесе́х, страда́льцев нача́ло, вене́чниче, му́чеников первострада́льне.

И́кос:

Ра́йския цве́ты зря́, благово́нием свои́м кра́сным исполня́ющия всю́ вселе́нную, стра́нному и́х дивлю́ся зре́нию: в ле́де зи́мнем мно́жае цвету́т па́че, е́же стра́нно во цве́тех. И му́ченик Христо́в, процветы́й пе́рвее, и две́рь бы́в стра́ждущим зако́нно, и цвету́щим зимо́ю муче́ния, пу́ть показа́ все́м неле́стный, хотя́щим страда́ти, до́брый подвигонача́льник, и́же боле́зньми просия́в, вене́чниче, му́чеников первострада́льне.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Тече́ние крове́й твои́х небе́сныя две́ри отве́рзе и Подвигополо́жника, предстоя́ща и простира́юща тебе́ вене́ц, показа́, зову́щу: благослове́н Бо́г оте́ц на́ших.

Я́ко зве́рие, похи́тивше богоуби́йцы богоявле́ннаго, скверноуби́йственными дла́ньми сего́ убива́ху, моля́щася о убива́ющих приле́жно и пою́ща: благослове́н Бо́г оте́ц на́ших.

Зако́нно обличи́л еси́ беззако́нныя, зако́нный подо́бник Спа́сов, и богобо́рны си́х показа́л еси́, от ни́хже ка́мением побива́емь, пе́л еси́: благослове́н Бо́г оте́ц на́ших.

Богоро́дичен: В ле́то Безле́тнаго неискусобра́чно, Чи́стая, заче́нши, и́же пе́рвее Безпло́тное Сло́во, пло́ти прия́тием, Де́во, родила́ еси́. Ему́же пое́м, согла́сно зову́ще: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Преесте́ственным сия́я светозаре́нием, преизря́дне, и лица́ твоего́ зра́к равноа́нгелен пока́зовал еси́, благода́ти изда́вшися, Стефа́не, я́же в души́ твое́й, сокрове́нне бога́тно. Те́мже вопия́л еси́: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Венцено́сче Стефа́не, души́ моея́ я́звы и грехо́вныя стру́пы очи́сти кропле́нием крове́й твои́х, к твоему́ бо заступле́нию ми́лостивному и христоподо́бному нра́ву прибего́х, зовы́й: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Благода́ти, сла́вне, тебе́ тезоимени́тый вене́ц твоему́ честно́му верху́ положи́ Судия́ нелицеме́рный, Его́же благоче́стно пропове́дал еси́, Зижди́теля, и Бо́га, и Царя́ все́х, вопия́ непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

В ру́ку Соде́теля пре́дал еси́ ду́х тво́й, и небе́сная во́инства собесе́дника прия́ша тя́, ра́дующеся, пе́рвее на земли́ равноа́нгельна, ны́не же те́х причте́на лико́м, непреста́нно пою́ща: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Богоро́дичен: Све́та незаходи́маго была́ еси́ сосу́д, Всечи́стая, Све́т бо су́щим во тме́ и се́ни родила́ еси́, просвеща́ющ вся́ческая богоразу́мия благода́тию. Ему́же непреста́нно, ве́рнии, пое́м: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Страда́ния му́чеников нача́ло, све́тло показа́вый муче́ния неле́стную стезю́, наставля́ющу к небеси́, первому́ченик Стефа́н вся́ призыва́ет духо́вне к боже́ственному весе́лию и к прича́стию све́та, ко обще́нию святы́ни.

Вжиля́емь любо́вию Христо́вою и Сего́ поревнова́в кро́тости и гла́су, глаго́лаше: не поста́ви уби́йцам греха́, Го́споди, приими́ же ду́х мо́й, Бла́же, и Боже́ственнаго Ца́рствия, пи́щи же неизрече́нныя, су́щия у Тебе́, сподо́би мя́.

Красе́н, и ви́да а́нгельскаго, и прему́дрости, и ве́ры испо́лнен, и Боже́ственныя зари́ сия́я луча́ми, и богогла́сными усты́ богоглаго́лал еси́, я́ко река́, боже́ственне вети́йствуя, вы́шнее насле́дие, богоблаже́нне, улучи́л еси́.

Венце́м благода́тей венча́лся еси́, и ли́ки му́ченическими окруже́н, и Христу́ Подвигополо́жнику предстоя́, о на́с моли́ся, творя́щих све́тло вои́стинну светоно́сное твое́ торжество́, блаже́нне, и от бе́д на́с изба́ви.

Богоро́дичен: Я́ко все́х Предста́тельнице христиа́н, Богома́ти Всенепоро́чная Влады́чице, я́ко Ми́лостива, изба́ви от бе́д и искуше́ний стра́ждущия рабы́ Твоя́ и неду́гующия лю́тых прегреше́ний ра́нами и боле́зньми тя́жкими одержи́мыя изврачу́й.

Свети́лен.

Ка́менная мета́ния преми́рный исплето́ша тебе́ нетле́ния вене́ц, и кро́вныя ка́пли — багряни́цу ца́рску, нача́льниче му́чеников, изря́дный Стефа́не.

Богоро́дичен: Свята́я Влады́чице Пречи́стая и еди́на Неискусобра́чная, спасе́ние и упова́ние, Ты́ умоли́ из Тебе́ рожде́ннаго Изба́вителя на́шего спасти́ ми́р от ле́сти, и бе́д, и скорбе́й.

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.

Свѣтолꙋ́чными блиста́нїи дх҃а просвѣща́емь, преесте́ственными страда́нїи и҆ тве́рдагѡ терпѣ́нїѧ тѧ̀ пою́щыѧ просвѣтѝ, предстоѧ̀ влⷣцѣ, вѣнцено́сче пребога́те стефа́не, мꙋ́ченикѡвъ вѣнча́нїе.

Подвиготекꙋ́щымъ нача́токъ бы́въ, и҆ верхо́вникъ мꙋ́ченическагѡ собо́ра, зрѣ́ти сподо́билсѧ є҆сѝ страстополо́жника, сла́вне, десни́цею живоно́сною бг҃оплете́нный тебѣ̀ простира́юща вѣне́цъ, чꙋ́дный стефа́не.

Є҆ди́нъ сы́й сокро́вище бл҃гости, сп҃се, показа́лъ є҆сѝ ѿ земны́хъ нѣ́дръ сокро́вище многоцѣ́нное, бога́тство неиждива́емое, неѿе́млемо и҆мѣ́нїе, коры́сть неги́блемꙋ, стефа́на твоего̀ первомꙋ́ченика.

А҆гг҃лозра́чною ꙗ҆́вѣ свѣ́тлостїю ѡ҆зарѧ́емь, а҆́гг҃льскими пѣ́сньми, первомч҃ниче стефа́не, и҆ дїа́конѡвъ перволꙋ́чшїй, сокрове́нъ ꙗ҆́кѡ ꙗ҆ви́лсѧ є҆сѝ, досто́йнѡ вои́стиннꙋ почти́лсѧ є҆сѝ, и҆спо́лненъ благово́нїѧ дꙋхо́внагѡ.

Бг҃оро́диченъ: Воплоще́ннаго на́съ ра́ди, пренепоро́чнаѧ, пре́жде безпло́тнаго, бг҃онача́льнаго сло́ва ѻ҆́ч҃а родила̀ є҆сѝ. ѽ дѣ́вства селе́нїе, и҆ прїѧ́телище чистоты̀, и҆ хра́мъ свѧще́нїѧ, влⷣчце мі́ра бг҃оневѣ́сто!

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.

Свѧщенносло́въ свѧще́нный, и҆ бг҃осло́въ показа́лсѧ є҆сѝ, сплета́ѧсѧ съ є҆вре́йскими собѡ́ры, ѡ҆блича́ѧ крѣ́пкѡ си́хъ безбо́жїе, и҆ бг҃обо́рный нра́въ, стефа́не мꙋ́чениче всеизрѧ́дне.

Первомꙋ́ченика хрⷭ҇то́ва, и҆ слꙋжи́телей пе́рваго, мꙋ́ченикѡмъ тече́нїѧ степе́нь показа́вша свѣ́тлѡ, а҆́гг҃лѡвъ собесѣ́дника, прїиди́те согла́снѡ всѝ, пѣ́сньми бж҃е́ственными почти́мъ.

Сокрове́нное сокро́вище въ землѝ ꙗ҆влѧ́етсѧ, и҆ мі́ръ благово́нїѧ бжⷭ҇твеннагѡ, и҆ бога́тыхъ дарѡ́въ цр҃ковь и҆спо́лни, мч҃никѡвъ пе́рвый, и҆ слꙋжи́телей первоизбра́нный.

Оу҆мерщвле́нный мо́й ᲂу҆́мъ жи́зни дѣ́йствомъ, тобо́ю проповѣ́давшимсѧ, мꙋ́дре, возста́ви пѣ́ти твоѐ честно́е торжество̀, и҆ твои̑мъ стопа́мъ послѣ́довати, стефа́не бл҃же́нне, сподо́би.

Бг҃оро́диченъ: Две́рь ꙗ҆ви́ласѧ є҆сѝ мы́сленна восто́ка вы́шнѧгѡ, на землѝ ꙗ҆́вльшагѡсѧ, дв҃о: тобо́ю бо къ на́мъ сло́во привни́де, спастѝ всѣ́хъ ѿ безслове́сїѧ, пречⷭ҇таѧ.

Сѣда́ленъ, гла́съ а҃:

А҆пⷭ҇ле хрⷭ҇то́въ, дїа́конѡвъ пе́рвый, первомꙋ́чениче мꙋ́дре, мч҃никѡвъ ве́рхъ, мїрскі́ѧ концы̀ ѡ҆свѧти́въ страда́нїи твои́ми, и҆ чꙋдесы̀ дꙋ́ши человѣ́кѡвъ просвѣти́лъ є҆сѝ: чтꙋ́щыѧ тѧ̀ и҆зба́ви всѧ́ческихъ бѣ́дъ, всехва́льне стефа́не.

Бг҃оро́диченъ: Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ.

Крⷭ҇тобг҃оро́диченъ: Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше ма́терски восклица́ющи: ка́кѡ претерплю̀ твоѐ є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Стрꙋи̑ на́мъ дне́сь мѵ́ра и҆сточѝ благово́нїѧ, и҆сто́чникъ и҆схо́дитъ, и҆ рѣка̀ бжⷭ҇твенныхъ бла̑гъ, и҆ пи́щный пото́къ ѿве́рзе сла́вный, пе́рвый мꙋ́ченикѡвъ, и҆́же вѣ́ры и҆спо́лненъ, и҆ си́лы бжⷭ҇твенныѧ и҆ благода́ти.

Ꙗ҆́кѡ свѧще́нъ и҆ свѣ́телъ, и҆ благонаро́читъ де́нь первомꙋ́ченика, и҆спо́лненъ свѣ́та и҆ дꙋхо́внагѡ вои́стиннꙋ весе́лїѧ, ца́рскомꙋ гра́дꙋ ꙗ҆ви́сѧ, сохранѧ́ѧ держа́вꙋ честны́ѧ цр҃кве, и҆ ва́рварскꙋю де́рзость ѿгонѧ́ѧ.

Бл҃го́е наслѣ́дїе воспрїѧ́лъ є҆сѝ досто́йнѡ, стефа́не бл҃же́нне, и҆дѣ́же хрⷭ҇то́съ цр҃ь всѣ́хъ, ты̀ всели́лсѧ є҆сѝ: тогѡ́ бо ꙗ҆ви́лсѧ є҆сѝ слꙋжи́тель, зна́менїй и҆ чꙋде́съ творѧ̀ си̑лы, и҆ подаѧ̀ болѧ́щымъ и҆сцѣлє́нїѧ.

Непрекло́ненъ цр҃кве и҆ непоколеби́мь и҆ водрꙋже́нъ сто́лпъ, простре́сѧ ѿ землѝ да́же до нб҃съ, заре́ю благоче́стїѧ просвѣща́ѧ всѧ̑ концы̀ стефа́нъ вели́кїй, и҆́стины проповѣ́дникъ, страда́нїѧ и҆́стинный побо́рникъ.

Бг҃оро́диченъ: Но́въ а҆да́мъ за пе́рваго ты̀ бы́лъ є҆сѝ, ѿ дв҃ы за прама́терь, и҆зба́витель всѣ́хъ и҆ сп҃съ, за сме́рть и҆́стинна жи́знь безсме́ртнаѧ. тѣ́мже тѧ̀ ро́ждшꙋю бцⷣꙋ вѣ́дꙋще, по достоѧ́нїю всѝ вѣ́рнїи ᲂу҆блажа́емъ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Беззако́нныхъ є҆вре́євъ сꙋ́етный вои́стиннꙋ собо́ръ терпѣли́внѡ ѡ҆бличи́лъ є҆сѝ: ѿ тѣ́хъ, бг҃огла́се, покрыва́емь мета́нїи ка́менными, на нб҃са̀ ꙗ҆́кѡ побѣдоно́сецъ возне́слсѧ є҆сѝ дꙋ́хомъ, стефа́не.

Ꙗ҆́кѡ красе́нъ, ꙗ҆́кѡ ᲂу҆́тро мі́рꙋ ꙗ҆ви́лсѧ є҆сѝ, сла́вне стефа́не, мглꙋ̀ ѿгонѧ̀, и҆ де́мѡнѡвъ прогонѧ̀ мечта̑нїѧ, и҆ недꙋ́гꙋющихъ стра̑сти, и҆ дꙋше́вныхъ не́мощей цѣлѧ̀ гноє́нїѧ, бг҃одохнове́нне.

Мы́сленнѡ со а҆́гг҃лы, бл҃же́нне, ра́дꙋѧсѧ, мі́ра концы̀ ѡ҆свѧща́еши вои́стиннꙋ твои́мъ прише́ствїемъ и҆ бл҃года́тїю, благово́нїѧ мѵ́ры дꙋхо́вными благоꙋха́ѧ, и҆ бѣ́дъ и҆ бꙋ́ри и҆збавлѧ́ѧ.

Бг҃оро́диченъ: Мт҃рнее дерзнове́нїе, є҆́же къ сн҃ꙋ твоемꙋ̀ и҆мꙋ́щи, всечⷭ҇таѧ, сро́днагѡ промышле́нїѧ є҆́же ѡ҆ на́съ, не пре́зри, мо́лимсѧ: ꙗ҆́кѡ тебѐ и҆ є҆ди́нꙋ хрⷭ҇тїа́не ко влⷣцѣ, ѡ҆чище́нїе ми́лостивно предлага́емъ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

А҆́гг҃лѡмъ ꙗ҆́кѡ подо́бникъ произволе́нїемъ бы́въ, ви́дъ а҆́гг҃льскїй стѧжа́лъ є҆сѝ, бл҃же́нне, съ ни́миже ра́дꙋѧсѧ и҆ ѡ҆бходѧ̀, пою́щыѧ тѧ̀ спаса́й.

Глагѡ́лъ, бл҃же́нне, твои́хъ бг҃одохнове́нныхъ си́ла, ꙗ҆́кѡ шꙋ́мъ гро́мный, во ᲂу҆́ши бг҃опрїѧ́тне, ꙗ҆́вѣ возгремѣ̀ беззако́нныхъ и҆ ли́ца и҆́хъ помрачѝ.

Сла́вꙋ ѻ҆ч҃ескꙋю ᲂу҆зрѣ́ти сподо́билсѧ є҆сѝ, и҆ сеѧ̀ соесте́ственное сїѧ́нїе, стефа́не, страда́нїи возвѣща́ѧ тебѣ̀ свѣ́тлыѧ вѣнцы̀, бг҃огла́се всече́стне.

Бг҃оро́диченъ: Сн҃ъ є҆диноро́дный, и҆ пре́жде вѣ̑къ неви́димый, напослѣ́докъ дне́й пе́рвенецъ бы́сть ви́димь пло́тїю и҆зъ тебє̀, бг҃ома́ти, бг҃ъ спасе́нїѧ моегѡ̀.

Конда́къ, гла́съ ѕ҃:

Пе́рвый сѣ́ѧлсѧ є҆сѝ на землѝ нбⷭ҇нымъ дѣ́лателемъ, всехва́льне стефа́не, пе́рвый на землѝ за хрⷭ҇та̀ кро́вь и҆злїѧ́лъ є҆сѝ, бл҃же́нне: пе́рвый ѿ негѡ̀ побѣ́ды вѣнце́мъ ᲂу҆вѧ́злсѧ є҆сѝ на нб҃сѣ́хъ, страда́льцєвъ нача́ло, вѣне́чниче мч҃никѡвъ первострада́льне.

І҆́косъ:

Ра́йскїѧ цвѣ́ты зрѧ̀, благово́нїемъ свои́мъ кра́снымъ и҆сполнѧ́ющыѧ всю̀ вселе́ннꙋю, стра́нномꙋ и҆́хъ дивлю́сѧ зрѣ́нїю: въ ле́дѣ зи́мнѣмъ мно́жае цвѣтꙋ́тъ па́че, є҆́же стра́нно во цвѣ́тѣхъ. и҆ мꙋ́ченикъ хрⷭ҇то́въ процвѣты́й пе́рвѣе, и҆ две́рь бы́въ стра́ждꙋщымъ зако́ннѡ, и҆ цвѣтꙋ́щымъ зимо́ю мꙋче́нїѧ, пꙋ́ть показа̀ всѣ̑мъ неле́стный, хотѧ́щымъ страда́ти, до́брый подвигонача́льникъ, и҆́же болѣ́зньми просїѧ́въ, вѣне́чниче мꙋ́ченикѡвъ первострада́льне.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Тече́нїе крове́й твои́хъ, нбⷭ҇ныѧ двє́ри ѿве́рзе, и҆ подвигополо́жника предстоѧ́ща и҆ простира́юща тебѣ̀ вѣне́цъ, показа̀ зовꙋ́щꙋ: бл҃гослове́нъ бг҃ъ ѻ҆тє́цъ на́шихъ.

Ꙗ҆́кѡ ѕвѣ́рїе, похи́тивше бг҃оꙋбі̑йцы бг҃оѧвле́ннаго, скверноꙋбі́йственными дла́ньми сего̀ ᲂу҆бива́хꙋ, молѧ́щасѧ ѡ҆ ᲂу҆бива́ющихъ прилѣ́жнѡ и҆ пою́ща: бл҃гослове́нъ бг҃ъ ѻ҆тє́цъ на́шихъ.

Зако́ннѡ ѡ҆бличи́лъ є҆сѝ беззакѡ́нныѧ, зако́нный подо́бникъ сп҃совъ, и҆ бг҃обо́рны си́хъ показа́лъ є҆сѝ. ѿ ни́хже ка́менїемъ побива́емь пѣ́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Въ лѣ́то безлѣ́тнаго неискꙋсобра́чнѡ, чⷭ҇таѧ, заче́нши, и҆́же пе́рвѣе безпло́тное сло́во, пло́ти прїѧ́тїемъ, дв҃о, родила̀ є҆сѝ. є҆мꙋ́же пое́мъ согла́снѡ зовꙋ́ще: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Преесте́ственнымъ сїѧ́ѧ свѣтозаре́нїемъ, преизрѧ́дне, и҆ лица̀ твоегѡ̀ зра́къ равноа́гг҃ленъ пока́зовалъ є҆сѝ, бл҃года́ти и҆зда́вшисѧ, стефа́не, ꙗ҆́же въ дꙋшѝ твое́й сокрове́ннѣ бога́тнѡ. тѣ́мже вопїѧ́лъ є҆сѝ: ѻ҆́троцы благослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Вѣнцено́сче стефа́не, дꙋшѝ моеѧ̀ ꙗ҆́звы, и҆ грѣхѡ́вныѧ стрꙋ́пы ѡ҆чи́сти кропле́нїемъ крове́й твои́хъ. къ твоемꙋ́ бо застꙋпле́нїю, ми́лостивномꙋ и҆ хрⷭ҇топодо́бномꙋ нра́вꙋ прибѣго́хъ зовы́й: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Бл҃года́ти, сла́вне, тебѣ̀ тезоимени́тый вѣне́цъ, твоемꙋ̀ честно́мꙋ верхꙋ̀ положѝ сꙋдїѧ̀ нелицемѣ́рный, є҆го́же благоче́стнѡ проповѣ́далъ є҆сѝ зижди́телѧ и҆ бг҃а, и҆ цр҃ѧ̀ всѣ́хъ, вопїѧ̀ непреста́ннѡ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Въ рꙋ́кꙋ содѣ́телѧ пре́далъ є҆сѝ дꙋ́хъ тво́й, и҆ нбⷭ҇наѧ вѡ́инства собесѣ́дника прїѧ́ша тѧ̀ ра́дꙋющесѧ, пе́рвѣе на землѝ равноа́гг҃льна, ны́нѣ же тѣ́хъ причте́на ликѡ́мъ, непреста́ннѡ пою́ща: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Бг҃оро́диченъ: Свѣ́та незаходи́магѡ была̀ є҆сѝ сосꙋ́дъ, всечⷭ҇таѧ, свѣ́тъ бо сꙋ́щымъ во тмѣ̀ и҆ сѣ́ни родила̀ є҆сѝ, просвѣща́ющъ всѧ́чєскаѧ бг҃оразꙋ́мїѧ благода́тїю. є҆мꙋ́же непреста́ннѡ вѣ́рнїи пое́мъ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Страда́нїѧ мꙋ́ченикѡвъ нача́ло, свѣ́тлѡ показа́вый мꙋче́нїѧ неле́стнꙋю стезю̀, наставлѧ́ющꙋ къ нб҃сѝ, первомꙋ́ченикъ стефа́нъ, всѧ̑ призыва́етъ дꙋхо́внѣ къ бжⷭ҇твенномꙋ весе́лїю, и҆ къ прича́стїю свѣ́та, ко ѻ҆бще́нїю ст҃ы́ни.

Вжилѧ́емь любо́вїю хрⷭ҇то́вою, и҆ сегѡ̀ поревнова́въ кро́тости и҆ гла́сꙋ, глаго́лаше: не поста́ви ᲂу҆бі́йцамъ грѣха̀, гдⷭ҇и, прїими́ же дꙋ́хъ мо́й, бл҃же, и҆ бжⷭ҇твеннагѡ црⷭ҇твїѧ, пи́щи же неизрече́нныѧ сꙋ́щїѧ ᲂу҆ тебє̀ сподо́би мѧ̀.

Красе́нъ, и҆ ви́да а҆́гг҃льскагѡ, и҆ премꙋ́дрости и҆ вѣ́ры и҆спо́лненъ, и҆ бжⷭ҇твенныѧ зарѝ сїѧ́ѧ лꙋча́ми, и҆ бг҃огла́сными ᲂу҆сты̀ бг҃оглаго́лалъ є҆сѝ ꙗ҆́кѡ рѣка̀, бжⷭ҇твеннѣ вѣті́йствꙋѧ, вы́шнее наслѣ́дїе, бг҃облаже́нне, ᲂу҆лꙋчи́лъ є҆сѝ.

Вѣнце́мъ благода́тей вѣнча́лсѧ є҆сѝ и҆ ли́ки мꙋ́ченическими ѡ҆крꙋже́нъ, и҆ хрⷭ҇тꙋ̀ подвигополо́жникꙋ предстоѧ̀, ѡ҆ на́съ моли́сѧ творѧ́щихъ свѣ́тлѡ вои́стиннꙋ свѣтоно́сное твоѐ торжество̀, бл҃же́нне, и҆ ѿ бѣ́дъ на́съ и҆зба́ви.

Бг҃оро́диченъ: Ꙗ҆́кѡ всѣ́хъ предста́тельнице хрⷭ҇тїа́нъ, бг҃ома́ти всенепоро́чнаѧ влⷣчце, ꙗ҆́кѡ ми́лостива, и҆зба́ви ѿ бѣ́дъ и҆ и҆скꙋше́нїй стра́ждꙋщыѧ рабы̑ твоѧ̑, и҆ недꙋ́гꙋющыѧ лю́тыхъ прегрѣше́нїй ра́нами, и҆ болѣ́зньми тѧ́жкими ѡ҆держи̑мыѧ и҆зврачꙋ́й.

Свѣти́ленъ.

Ка́меннаѧ мета̑нїѧ премі́рный и҆сплето́ша тебѣ̀ нетлѣ́нїѧ вѣне́цъ, и҆ крѡ́вныѧ ка̑пли багрѧни́цꙋ ца́рскꙋ, нача́льниче мꙋ́ченикѡвъ и҆зрѧ́дный, стефа́не.

Бг҃оро́диченъ: Ст҃а́ѧ влⷣчце пречⷭ҇таѧ, и҆ є҆ди́на неискꙋсобра́чнаѧ, спасе́нїе и҆ ᲂу҆пова́нїе, ты̀ ᲂу҆молѝ и҆зъ тебє̀ рожде́ннаго и҆зба́вителѧ на́шего, спастѝ мі́ръ ѿ ле́сти и҆ бѣ́дъ и҆ скорбе́й.

Жизнь и тру­ды апо­сто­лов – Свя­той апо­стол Сте­фан, пер­во­му­че­ник и ар­хи­ди­а­кон

Краткое житие первомученика и архидиакона Стефана

Свя­той Сте­фан про­ис­хо­дил из ев­ре­ев, жив­ших за гра­ни­цей, т. е. вне Свя­той Зем­ли. Та­кие евреи на­зы­ва­лись эл­ли­ни­ста­ми, так как в них чув­ство­ва­лось вли­я­ние гре­че­ской куль­ту­ры, до­ми­ни­ро­вав­шей в Рим­ской им­пе­рии. По­сле со­ше­ствия Свя­то­го Ду­ха на апо­сто­лов Цер­ковь ста­ла быст­ро рас­ти, и воз­ник­ла необ­хо­ди­мость за­бо­тить­ся о си­ро­тах, вдо­вах и бед­ных во­об­ще, при­няв­ших Кре­ще­ние. Апо­сто­лы пред­ло­жи­ли хри­сти­а­нам вы­де­лить семь до­стой­ных му­жей для опе­ки нуж­да­ю­щих­ся. По­свя­тив этих семь че­ло­век в диа­ко­ны (что зна­чит по­мощ­ни­ки, слу­жи­те­ли), апо­сто­лы сде­ла­ли их сво­и­ми бли­жай­ши­ми по­мощ­ни­ка­ми. Сре­ди диа­ко­нов вы­де­лял­ся сво­ей креп­кой ве­рой и да­ром сло­ва мо­ло­дой Сте­фан, на­зы­ва­е­мый ар­хи­ди­а­ко­ном, т. е. пер­вым диа­ко­ном. В ско­ром вре­ме­ни диа­ко­ны, кро­ме по­мо­щи бед­ным, ста­ли при­ни­мать бли­жай­шее уча­стие в мо­лит­вах и бо­го­слу­же­ни­ях.

Сте­фан про­по­ве­до­вал в Иеру­са­ли­ме сло­во Бо­жие, под­креп­ляя ис­тин­ность сво­их слов зна­ме­ни­я­ми и чу­де­са­ми. Успех его был очень боль­шой, и это воз­бу­ди­ло про­тив него нена­висть рев­ни­те­лей за­ко­на Мо­и­сея – фа­ри­се­ев. Они схва­ти­ли его и по­влек­ли в си­нед­ри­он – выс­шее су­ди­ли­ще у ев­ре­ев. Здесь фа­ри­сеи пред­ста­ви­ли лож­ных сви­де­те­лей, ко­то­рые утвер­жда­ли, что он в сво­их про­по­ве­дях оскорб­ля­ет Бо­га и про­ро­ка Мо­и­сея. В свое оправ­да­ние свя­той Сте­фан из­ло­жил пе­ред си­нед­ри­о­ном ис­то­рию ев­рей­ско­го на­ро­да, по­ка­зы­вая на яр­ких при­ме­рах, как евреи все­гда про­ти­ви­лись Бо­гу и уби­ва­ли по­слан­ных Им про­ро­ков. Чле­ны си­нед­ри­о­на слу­шая его, все бо­лее раз­го­ра­лись гне­вом.

В это вре­мя Сте­фан уви­дел, как над ним рас­кры­лось Небо, и он вос­клик­нул: «Я ви­жу небе­са от­вер­стые и Сы­на Че­ло­ве­че­ско­го, сто­я­ще­го одес­ную Бо­га» (Деян.7:56). Услы­шав это, чле­ны си­нед­ри­о­на при­шли в ве­ли­кую ярость. За­ты­кая свои уши, они бро­си­лись на Сте­фа­на и по­влек­ли его за го­род. Здесь, как за­кон по­веле­вал, сви­де­те­ли, пер­вые об­ви­нив­шие Сте­фа­на, пер­вы­ми ста­ли по­би­вать его кам­ня­ми. При этом при­сут­ство­вал юно­ша, име­нем Савл, ко­то­ро­му бы­ло по­ру­че­но сте­речь одеж­ды по­би­ва­ю­щих кам­ня­ми. Он одоб­рял уби­е­ние Сте­фа­на. Па­дая под гра­дом кам­ней, Сте­фан вос­клик­нул: «Гос­по­ди Иису­се! Не вме­ни им гре­ха се­го и при­ми дух мой». Со­бы­тие это и речь Сте­фа­на в си­нед­ри­оне опи­сал еван­ге­лист Лу­ка в кни­ге Де­я­ний апо­сто­лов, гла­вы 6-8.

Так ар­хи­ди­а­кон Сте­фан стал пер­вым му­че­ни­ком за Хри­ста в 34 го­ду по­сле Р.X. По­сле это­го на­ча­лось в Иеру­са­ли­ме пре­сле­до­ва­ние хри­сти­ан, от ко­то­ро­го они вы­нуж­де­ны бы­ли бе­жать в раз­ные ча­сти Свя­той Зем­ли и в со­сед­ние стра­ны. Так хри­сти­ан­ская ве­ра ста­ла рас­про­стра­нять­ся в раз­ных ча­стях Рим­ской им­пе­рии. Кровь пер­во­му­че­ни­ка Сте­фа­на не про­ли­лась да­ром. В ско­ром вре­ме­ни Савл, одоб­ряв­ший это убий­ство, уве­ро­вал, кре­стил­ся и стал зна­ме­ни­тым Пав­лом – од­ним из са­мых успеш­ных про­по­вед­ни­ков Еван­ге­лия. Мно­го лет спу­стя Па­вел, по­се­тив Иеру­са­лим, был то­же схва­чен разъ­ярен­ной тол­пой иуде­ев, хо­тев­ших по­бить его кам­ня­ми. В сво­ей бе­се­де с ни­ми он вспом­нил о невин­ной смер­ти Сте­фа­на и о сво­ем уча­стии в ней (Деян.22).

2/15 августа – Перенесение из Иерусалима в Константинополь мощей первомученика архидиакона Стефана

Пе­ре­не­се­ние из Иеру­са­ли­ма в Кон­стан­ти­но­поль мо­щей свя­то­го пер­во­му­че­ни­ка ар­хи­ди­а­ко­на Сте­фа­на бы­ло око­ло 428 го­да. По­сле то­го, как свя­той пер­во­му­че­ник ар­хи­ди­а­кон Сте­фан был по­бит иуде­я­ми кам­ня­ми, свя­тое те­ло его бро­си­ли без по­гре­бе­ния на съе­де­ние зве­рям и пти­цам. Од­на­ко на вто­рую ночь зна­ме­ни­тый иудей­ский за­ко­но­учи­тель Га­ма­ли­ил, на­чав­ший скло­нять­ся к ве­ре в Иису­са Хри­ста как в Мес­сию и за­щи­тив­ший апо­сто­лов в си­нед­ри­оне (Деян.5:34-40), по­слал пре­дан­ных ему лю­дей взять те­ло пер­во­му­че­ни­ка. Га­ма­ли­ил пре­дал его по­гре­бе­нию на сво­ей зем­ле, в пе­ще­ре, неда­ле­ко от Иеру­са­ли­ма. Ко­гда скон­чал­ся тай­ный уче­ник Гос­по­да, Ни­ко­дим, при­хо­див­ший к Нему но­чью (Ин.3:1-21, 7:50-52, 19:38-42), Га­ма­ли­ил так­же по­хо­ро­нил его близ гро­ба ар­хи­ди­а­ко­на Сте­фа­на. За­тем и сам Га­ма­ли­ил, при­няв­ший Свя­тое Кре­ще­ние вме­сте со сво­им сы­ном Ави­вом, был по­гре­бен при гро­бе пер­во­му­че­ни­ка Сте­фа­на и свя­то­го Ни­ко­ди­ма. В 415 го­ду мо­щи свя­тых бы­ли чу­дес­ным об­ра­зом об­ре­те­ны и тор­же­ствен­но пе­ре­не­се­ны в Иеру­са­лим ар­хи­епи­ско­пом Иоан­ном вме­сте с епи­ско­па­ми Елев­фе­ри­ем Се­ва­стий­ским и Елев­фе­ри­ем Иери­хон­ским. С то­го вре­ме­ни от мо­щей на­ча­ли со­вер­шать­ся ис­це­ле­ния.

Впо­след­ствии, при свя­том бла­го­вер­ном ца­ре Фе­о­до­сии Млад­шем (408–450), мо­щи свя­то­го пер­во­му­че­ни­ка Сте­фа­на бы­ли пе­ре­ве­зе­ны из Иеру­са­ли­ма в Кон­стан­ти­но­поль и по­ло­же­ны в церк­ви в честь свя­то­го диа­ко­на Лав­рен­тия, а по со­зда­нии хра­ма в честь пер­во­му­че­ни­ка Сте­фа­на пе­ре­не­се­ны ту­да 2 ав­гу­ста. Дес­ни­ца пер­во­му­че­ни­ка хра­нит­ся в Се­ра­пи­о­но­вой па­ла­те Тро­и­це-Сер­ги­е­вой Лав­ры.

Полное житие первомученика и архидиакона Стефана

Свя­той апо­стол пер­во­му­че­ник и ар­хи­ди­а­кон Сте­фан был стар­шим сре­ди се­ми диа­ко­нов, по­став­лен­ных са­ми­ми апо­сто­ла­ми, по­это­му его на­зы­ва­ют ар­хи­ди­а­ко­ном. Он был хри­сти­ан­ским пер­во­му­че­ни­ком и по­стра­дал за Хри­ста в воз­расте око­ло 30 лет. По вы­ра­же­нию Асте­рия, это был "на­ча­ток му­че­ни­ков, учи­тель стра­да­ний за Хри­ста, ос­но­ва­ние доб­ро­го ис­по­ве­да­ния", ибо преж­де Сте­фа­на ни­кто не из­ли­вал кро­ви сво­ей за Еван­ге­лие".

Бу­дучи ис­пол­нен Ду­ха Свя­то­го, свя­той Сте­фан с дерз­но­ве­ни­ем убе­ди­тель­но про­по­ве­до­вал хри­сти­ан­ское уче­ние и по­беж­дал иудей­ских за­ко­но­учи­те­лей в спо­рах. За это иудеи окле­ве­та­ли Сте­фа­на, буд­то бы он про­из­но­сит ху­лы на Бо­га и на Мо­и­сея. С та­ким об­ви­не­ни­ем свя­той Сте­фан пред­стал пе­ред си­нед­ри­о­ном и пер­во­свя­щен­ни­ком. Он про­из­нес пла­мен­ную речь, в ко­то­рой из­ло­жил ис­то­рию ев­рей­ско­го на­ро­да и сме­ло об­ли­чил иуде­ев в го­не­ни­ях на про­ро­ков и в каз­ни ожи­дав­ше­го­ся ими Мес­сии, Иису­са Хри­ста. Во вре­мя ре­чи свя­той Сте­фан вдруг уви­дел небо от­вер­стым и Иису­са Хри­ста во сла­ве, сто­я­ще­го одес­ную Бо­га. Он гром­ко про­воз­гла­сил об этом. То­гда иудеи, за­ты­кая уши, на­бро­си­лись на него, по­влек­ли его за го­род и по­би­ва­ли кам­ня­ми, а свя­той му­че­ник мо­лил­ся за сво­их убийц. Вда­ли, на воз­вы­ше­нии, сто­я­ла Ма­терь Бо­жия со свя­тым апо­сто­лом Иоан­ном Бо­го­сло­вом и усерд­но мо­ли­лась за му­че­ни­ка. Пе­ред смер­тью Сте­фан про­из­нес: "Гос­по­ди Иису­се, при­и­ми дух мой, Гос­по­ди, не вме­ни им это во грех", – и за­тем ра­дост­но пре­дал Хри­сту свою чи­стую ду­шу. Те­ло свя­то­го пер­во­му­че­ни­ка Сте­фа­на, остав­лен­ное на съе­де­ние зве­рям, тай­но взял из­вест­ный ев­рей­ский учи­тель Га­ма­ли­ил с сы­ном сво­им Ави­вом и пре­дал по­гре­бе­нию в сво­ем име­нии. Впо­след­ствии они оба уве­ро­ва­ли во Хри­ста и при­ня­ли Свя­тое Кре­ще­ние.

См. так­же: "Стра­да­ние свя­то­го пер­во­му­че­ни­ка и ар­хи­ди­а­ко­на Сте­фа­на" в из­ло­же­нии свт. Ди­мит­рия Ро­стов­ско­го.

См. так­же: "Пе­ре­не­се­ние мо­щей свя­то­го пер­во­му­че­ни­ка и ар­хи­ди­а­ко­на Сте­фа­на" в из­ло­же­нии свт. Ди­мит­рия Ро­стов­ско­го.