Канон святому апостолу Иакову, брату Господню

Припев: Святы́й апо́столе Иáкове, моли́ Бо́га о нас.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 13 января (31 декабря ст. ст.); 05 ноября (23 октября ст. ст.)

Глас 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Дая́нию благо́му, Иа́кове, и да́ру соверше́нну от Отца́ све́тов челове́ком подая́тися, учи́ши я́ве, Ему́же причасти́тися, апо́столе, тя́ пою́щим помоли́ся.

Све́том просвеще́н, до́блий, Боже́ственнаго Ду́ха и с Ни́м зако́ны изложи́в, Це́ркви управля́еши язы́ков, я́ко Христо́в апо́стол, священнотаи́нниче всеблаже́нне.

Ли́к апо́стольский, всему́дре, я́ве украси́л еси́, я́ко пе́рвый иера́рх бы́в, самоде́йством Сло́ва пома́зан, я́ко учени́к и бра́т Бо́жий, священнопропове́дник свяще́ннейший.

Богоро́дичен: Исто́чник Тя́ исцеле́ний иму́ще, почерпа́ем, я́ко Исто́чник ро́ждшую жи́зни, Богоро́дице Де́во Чи́стая, и ду́ш врачевство́, и теле́с обновле́ние.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Весели́тся о тебе́ коле́но Иу́дово дне́сь, Христо́выми светлостьми́ ви́де тя́ све́тло облиста́юща.

Звезду́ богосия́нну Це́рковь язы́чная иму́щи тя́, благосла́внаго пропове́дателя, и Боже́ственным Све́том озаря́ется.

Зако́н ты́ жи́зни Це́ркви Христо́ве положи́л еси́, Жизнода́тельным Ду́хом ты́ законополага́я и веща́я.

Богоро́дичен: Его́же родила́ еси́ пло́тию, о Богома́ти, из Отца́ Возсия́вшаго, Того́, Чи́стая, Иа́ков я́ко Бо́га все́х пропове́да.

Седа́лен, гла́с 8.

Сро́дник по пло́ти Иису́сов бы́л еси́, и от Него́, апо́столе, благода́ть мно́гу прия́л еси́ и все́м препо́дал еси́ просвеще́ние и ра́зум, всему́дре Иа́кове, и и́дольскую ле́сть из ко́рене исто́ргнув. Те́м, и́же тмы́ предста́тели и лестцы́, непра́ведно тя́ убива́ют, Спа́са пропове́дающа. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: Со́лнца о́блаче разу́мнаго, Боже́ственнаго Све́та свети́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́нное мое́ се́рдце омы́й пото́ки умиле́ния, покая́ния же слеза́ми и от тиме́ния мя́ очи́сти де́л мои́х, да любо́вию зову́ Ти: Богоро́дице Присноде́во, моли́ Христа́ Бо́га прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Пе́снь 4.

Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Вве́л еси́ в мо́ре Твоя́ ко́ни, апо́столы, Спа́се, и просвети́ша язы́ки, к Твоему́ позна́нию привле́кше, Влады́ко.

Нескве́рно, я́ко зерца́ло, я́влься, и перводе́тельныя лучи́ Несозда́нныя Тро́ицы изве́стно прие́м, все́м возсия́л еси́.

Валя́емаго тя́ ка́меня проро́чество освяще́нное зри́т и сокруша́юща пре́лести гнило́е су́етство си́лою Ду́ха.

Богоро́дичен: Вше́д, о Богома́ти, во чре́во Твое́ Преве́чное Сло́во, роди́выйся из Отца́ неизрече́нно, Иа́кова апо́стола явля́ет.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ты́, Го́споди, Све́т, блиста́ние Иа́кова яви́л еси́ светя́ща, и земны́я неве́дения и тмы́ изменя́юща.

Тя́, Го́споди, гла́сом свобо́дным пропове́да пра́ведный бра́т Тво́й, подража́тель же Стра́сти бы́сть, убива́емь.

Ки́й земны́й у́м похва́л пе́ния тебе́ принести́ мо́жет, доброде́телей просвеще́нному благода́тьми, Иа́кове?

Богоро́дичен: Тя́ и́стинно Боже́ственное обре́т жили́ще, всели́ся, о Де́во, на́ше спасе́ние, Сло́во, промышля́я.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Оде́ждею зако́нною облече́ тя лу́чшею, и иера́рха явля́ет, Ааро́на дре́вняго честне́йша, и́же ми́лости ра́ди в бра́тство прие́мый тя́.

Орга́н, де́йствы ударя́емь Ду́ха, все́ помышле́ние наслажда́я и Бо́гу приве́д спаса́емыя от рабо́ты люте́йшия, бы́л еси́ изря́днейший.

Возжажда́в, жи́зненныя испи́л еси́ воды́, и ре́ки источа́еши богоглаго́ливаго твоего́ чре́ва, теку́щия вселе́нней Боже́ственным Ду́хом.

Богоро́дичен: Е́ва у́бо преслуша́нием сме́рть роди́, Богоро́дица же, Жи́знь заче́нши, роди́ Нестаре́ющуюся и дре́вний за все́х отдаде́ до́лг.

Конда́к, гла́с 4.

О́тчее Единоро́дное Бо́г Сло́во, прише́дшее к на́м в после́дния дни́, Иа́кове боже́ственне, пе́рваго тя́ показа́ Иерусали́млян па́стыря и учи́теля, и ве́рнаго строи́теля та́инств духо́вных: те́мже тя́ вси́ чти́м, апо́столе.

И́кос:

Рожде́ние тя́ Ио́сифово, Иерусали́мов пе́рваго иера́рха, Иа́кове богови́дче, и Госпо́дня бра́та пе́сньми похва́льными воспое́м ве́рно, и к тебе́ возопие́м: да́руй на́м да́р соверше́н от Отца́ све́тов и отжени́ ско́рбь, настоя́щую от мно́жества прегреше́ний, поднесо́ша бо врази́ на ны́ пя́ту и обступи́ша на́с исма́ильтяне, и́хже сокруши́ вско́ре лу́ки, священноявле́нне, я́ко да тя́ вси́ почита́ем, апо́столе.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Я́ко в пещи́, на го́рнице просвеща́емь, Боже́ственным прише́ствием Ду́ха, та́инственно, богоглаго́ливе, возопи́л еси́: благослове́н еси́ в хра́ме сла́вы Твоея́, Го́споди.

Свы́ше дыха́ние зе́льное апо́стола язы́ком огнеобра́зным веща́ти Бо́жия вели́чествия устро́и: благослове́н еси́ в хра́ме сла́вы Твоея́, Го́споди.

Виде́ния де́ятельнаго излага́я дщи́цу, от скрижа́ли же, я́ко духо́вныя, челове́ки научи́л еси́: благослове́н еси́, Бо́же мо́й, зовы́й, Го́споди.

Богоро́дичен: Возсозда́вый ми́р, во утро́бе Твое́й, Богоневе́сто, Боже́ственнаго служе́ния показу́ет соверши́теля Иа́кова, взыва́юща: благослове́на Ты́ в жена́х Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Ру́ки распросте́р кре́пкия, апо́столы Твоя́, Спа́се, благослови́л еси́, восходя́, Влады́ко, к Безнача́льному Отцу́ Твоему́, и устро́ил еси́ ты́я с весе́лием вопи́ти: благослови́те вся́ дела́ Госпо́дня Го́спода.

Я́коже обеща́лся еси́, нело́жно апо́столом Твои́м, Ду́ха посла́л еси́. Сего́ Иа́ков, Влады́ко, све́тлостию просвеща́емь, вселе́нную мо́лниями просвеща́ет я́ве и вопие́т Тебе́: благослови́те вся́ дела́ Госпо́дня Го́спода.

Му́дрость, Иа́кове му́дре, ипоста́сную име́л еси́ Учи́теля, уча́щу тя́ неизрече́нным и неизглаго́ланным та́йнам, и к благоче́стию лю́ди зва́ти воздви́гл еси́: благослови́те вся́ дела́ Госпо́дня Го́спода.

Богоро́дичен: Го́ру явле́нну мы́сленную, Де́во Чи́стая, проро́к ви́де Тя́, из Тебе́ бо пречестны́й Ка́мень отсече́ся, спаса́я вселе́нную вои́стинну, Боже́ственно пою́щую: благослови́те вся́ дела́ Госпо́дня Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Прииди́те, первопресто́льника вси́, Це́ркве свети́льника, свяще́нными, Иа́кова, пе́сньми, я́ко иера́рха и христопропове́дника, тезоиме́нне пра́веднаго именова́нна, велича́ем.

Боже́ственнаго о́бщника, я́ко я́вльшася безконе́чнаго Ца́рствия, и Бо́жия нарече́нна бра́та, и житие́м и́стинствующа, именова́ние прие́мша, священнотаи́нника, тя́ велича́ем, Иа́кове.

Престо́лу предстоя́, блаже́нне, венцено́сец Тро́ицы, ве́рою почита́ющих твою́ па́мять, нетле́ющих наслади́тися че́стей, я́ко иера́рх, Иа́кове, благоприя́тен, твоего́ Влады́ку умоли́.

Богоро́дичен: Ты́, от Де́вы Рожде́ннаго неискусобра́чно, богоявле́нне, уче́нии твои́ми я́ве чести́ Бо́га науча́еши, Воплоще́нное Сло́во, в Него́же мы́ ве́рующе ны́не, досто́йно велича́ем.

Свети́лен.

Я́ко Госпо́дня бра́та бы́вша, блаже́нне Иа́кове богодохнове́нне, ве́рнии по до́лгу хва́лим тя́, сла́вяще све́тлую и всечестну́ю, и светоно́сную твою́ па́мять, моли́ся приле́жно за чту́щих тя́.

Богоро́дичен: Моли́твенницу Тебе́ приво́дим и те́плую предста́тельницу, Чи́стую Ма́терь Твою́, ве́рнии, по до́лгу: сподо́би рабы́ Твоя́ причасти́тися сла́вы Твоея́, и пра́ведных ча́сти, и сла́дости ра́йския, и улучи́ти на́м небе́сное Ца́рствие.

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Даѧ́нїю благо́мꙋ, і҆а́кѡве, и҆ да́рꙋ соверше́ннꙋ ѿ ѻ҆ц҃а̀ свѣ́тѡвъ человѣ́кѡмъ подаѧ́тисѧ, ᲂу҆чи́ши ꙗ҆́вѣ, є҆мꙋ́же причасти́тисѧ, а҆пⷭ҇ле, тѧ̀ пою́щымъ, помоли́сѧ.

Свѣ́томъ просвѣще́нъ, до́блїй, бжⷭ҇твеннагѡ дх҃а, и҆ съ ни́мъ зако́ны и҆зложи́въ, цр҃кви ᲂу҆правлѧ́еши ꙗ҆зы́кѡвъ, ꙗ҆́кѡ хрⷭ҇то́въ а҆пⷭ҇лъ, свѧщеннотаи́нниче всеблаже́нне.

Ли́къ а҆пⷭ҇льскїй, всемꙋ́дре, ꙗ҆́вѣ ᲂу҆краси́лъ є҆сѝ, ꙗ҆́кѡ пе́рвый і҆ера́рхъ бы́въ, самодѣ́йствомъ сло́ва пома́занъ, ꙗ҆́кѡ ᲂу҆ч҃ни́къ и҆ бра́тъ бж҃їй, свѧщеннопроповѣ́дникъ свѧще́ннѣйшїй.

Бг҃оро́диченъ: И҆сто́чникъ тѧ̀ и҆сцѣле́нїй и҆мꙋ́ще, почерпа́емъ, ꙗ҆́кѡ и҆сто́чникъ ро́ждшꙋю жи́зни, бцⷣе дв҃о чⷭ҇таѧ, и҆ дꙋ́шъ врачевство̀, и҆ тѣле́съ ѡ҆бновле́нїе.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Весели́тсѧ ѡ҆ тебѣ̀ колѣ́но і҆ꙋ́дово дне́сь, хрⷭ҇то́выми свѣтлостьмѝ ви́дѣ тѧ̀ свѣ́тлѡ ѡ҆блиста́юща.

Ѕвѣздꙋ̀ бг҃осїѧ́ннꙋ цр҃ковь ꙗ҆зы́чнаѧ и҆мꙋ́щи тѧ̀, бл҃госла́внаго проповѣ́дателѧ, и҆ бжⷭ҇твеннымъ свѣ́томъ ѡ҆зарѧ́етсѧ.

Зако́нъ ты̀ жи́зни цр҃кви хрⷭ҇то́вѣ положи́лъ є҆сѝ, жизнода́тельнымъ дх҃омъ ты̀ законополага́ѧ и҆ вѣща́ѧ.

Бг҃оро́диченъ: Є҆го́же родила̀ є҆сѝ пло́тїю, ѽ бг҃ома́ти! и҆зъ ѻ҆ц҃а̀ возсїѧ́вшаго: того̀, чⷭ҇таѧ, і҆а́кѡвъ, ꙗ҆́кѡ бг҃а всѣ́хъ, проповѣ́да.

Сѣда́ленъ, гла́съ и҃.

Сро́дникъ по пло́ти і҆и҃совъ бы́лъ є҆сѝ, и҆ ѿ негѡ̀ а҆пⷭ҇ле, бл҃года́ть мно́гꙋ прїѧ́лъ є҆сѝ, и҆ всѣ̑мъ препо́далъ є҆сѝ просвѣще́нїе и҆ ра́зꙋмъ, всемꙋ́дре і҆а́кѡве, и҆ і҆́дѡльскꙋю ле́сть и҆зъ ко́рене и҆сто́ргнꙋвъ: тѣ́мъ и҆̀же тмы̀ предста́тели и҆ лестцы̀ непра́веднѡ тѧ̀ ᲂу҆бива́ютъ, сп҃са проповѣ́дающа. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.

Пѣ́снь д҃.

І҆рмо́съ: Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Вве́лъ є҆сѝ въ мо́ре твоѧ̑ ко́ни, а҆пⷭ҇лы, сп҃се, и҆ просвѣти́ша ꙗ҆зы́ки, къ твоемꙋ̀ позна́нїю привле́кше, влⷣко.

Нескве́рно ꙗ҆́кѡ зерца́ло ꙗ҆́вльсѧ, и҆ перводѣ́тєльныѧ лꙋчы̀ несозда́нныѧ трⷪ҇цы и҆звѣ́стнѡ прїе́мъ, всѣ̑мъ возсїѧ́лъ є҆сѝ.

Валѧ́емаго тѧ̀ ка́менѧ прⷪ҇ро́чество ѡ҆свѧще́нное зри́тъ, и҆ сокрꙋша́юща пре́лести гнило́е сꙋ́етство си́лою дх҃а.

Бг҃оро́диченъ: Вше́дъ, ѽ бг҃ома́ти! во чре́во твоѐ превѣ́чное сло́во, роди́выйсѧ и҆зъ ѻ҆ц҃а̀ неизрече́ннѡ, і҆а́кѡва а҆пⷭ҇ла ꙗ҆влѧ́етъ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Ты̀ гдⷭ҇и свѣ́тъ, блиста́нїе і҆а́кѡва ꙗ҆ви́лъ є҆сѝ свѣтѧ́ща, зємны́ѧ невѣ̑дѣнїѧ и҆ тмы̑ и҆змѣнѧ́юща.

Тѧ̀, гдⷭ҇и, гла́сомъ свобо́днымъ проповѣ́да пра́ведный бра́тъ тво́й, подража́тель же стрⷭ҇ти бы́сть, ᲂу҆бива́емь.

Кі́й земны́й ᲂу҆́мъ похва́лъ пѣ́нїѧ тебѣ̀ принестѝ мо́жетъ, добродѣ́телей просвѣще́нномꙋ бл҃года́тьми, і҆а́кѡве.

Бг҃оро́диченъ: Тѧ̀ и҆́стиннѡ бжⷭ҇твенное ѡ҆брѣ́тъ жили́ще, всели́сѧ, ѽ дв҃о! на́ше спасе́нїе, сло́во, промышлѧ́ѧ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Ѻ҆де́ждею зако́нною ѡ҆блече́ тѧ лꙋ́чшею, и҆ і҆ера́рха ꙗ҆влѧ́етъ, а҆арѡ́на дре́внѧгѡ честнѣ́йша, и҆́же ми́лости ра́ди въ бра́тство прїе́мый тѧ̀.

Ѻ҆рга́нъ, дѣ́йствы ᲂу҆дарѧ́емь дх҃а всѐ помышле́нїе наслажда́ѧ, и҆ бг҃ꙋ приве́дъ спаса́ємыѧ ѿ рабо́ты лютѣ́йшїѧ, бы́лъ є҆сѝ и҆зрѧ́днѣйшїй.

Возжажда́въ, жи́зненныѧ и҆спи́лъ є҆сѝ воды̀, и҆ рѣ́ки и҆сточа́еши бг҃оглаго́ливагѡ твоегѡ̀ чре́ва, текꙋ́щыѧ вселе́ннѣй бжⷭ҇твеннымъ дх҃омъ.

Бг҃оро́диченъ: Є҆́ѵа ᲂу҆́бѡ преслꙋша́нїемъ сме́рть родѝ, бцⷣа же жи́знь заче́нши родѝ нестарѣ́ющꙋюсѧ, и҆ дре́внїй за всѣ́хъ ѿдадѐ до́лгъ.

Конда́къ, гла́съ д҃.

Ѻ҆́ч҃ее є҆диноро́дное бг҃ъ сло́во, прише́дшее къ на́мъ въ послѣ̑днїѧ дни̑, і҆а́кѡве бжⷭ҇твенне, пе́рваго тѧ̀ показа̀ і҆ерꙋсалѵ́млѧнъ па́стырѧ и҆ ᲂу҆чи́телѧ, и҆ вѣ́рнаго строи́телѧ та́инствъ дх҃о́вныхъ: тѣ́мже тѧ̀ всѝ чти́мъ, а҆пⷭ҇толе.

І҆́косъ:

Рожде́нїе тѧ̀ і҆ѡ́сифово, і҆ерꙋсалѵ́мѡвъ пе́рваго і҆ера́рха, і҆а́кѡве бг҃ови́дче, и҆ гдⷭ҇нѧ бра́та, пѣ́сньми похва́льными воспое́мъ вѣ́рнѡ, и҆ къ тебѣ̀ возопїе́мъ: да́рꙋй на́мъ да́ръ соверше́нъ ѿ ѻ҆ц҃а̀ свѣ́тѡвъ, и҆ ѿженѝ ско́рбь, настоѧ́щꙋю ѿ мно́жества прегрѣше́нїй. поднесо́ша бо вразѝ на ны̀ пѧ́тꙋ, и҆ ѡ҆бстꙋпи́ша на́съ і҆сма́ильтѧне, и҆́хже сокрꙋшѝ вско́рѣ лꙋ́ки, свѧщенноѧвле́нне, ꙗ҆́кѡ да тѧ̀ всѝ почита́емъ, а҆пⷭ҇толе.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ꙗ҆́кѡ въ пещѝ на го́рницѣ просвѣща́емь бжⷭ҇твеннымъ прише́ствїемъ дх҃а, та́инственнѡ, бг҃оглаго́ливе, возопи́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Свы́ше дыха́нїе ѕѣ́льное, а҆пⷭ҇тола ѧ҆зы́комъ ѻ҆гнеѻбра́знымъ вѣща́ти бж҃їѧ вели́чєствїѧ ᲂу҆стро́и: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Видѣ́нїѧ дѣ́ѧтельнагѡ и҆злага́ѧ дщи́цꙋ, ѿ скрижа́ли же ꙗ҆́кѡ дꙋхо́вныѧ, человѣ́ки наꙋчи́лъ є҆сѝ: бл҃гослове́нъ є҆сѝ, бж҃е мо́й, зовы́й, гдⷭ҇и.

Бг҃оро́диченъ: Возсозда́вый мі́ръ, во ᲂу҆тро́бѣ твое́й, бг҃оневѣ́сто, бжⷭ҇твеннагѡ слꙋже́нїѧ показꙋ́етъ соверши́телѧ і҆а́кѡва, взыва́юща: бл҃гослове́на ты̀ въ жена́хъ, всенепоро́чнаѧ влⷣчце.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Рꙋ́ки распросте́ръ крѣ̑пкїѧ, а҆пⷭ҇толы твоѧ̑, сп҃се, бл҃гослови́лъ є҆сѝ, восходѧ̀, влⷣко, къ безнача́льномꙋ ѻ҆ц҃ꙋ̀ твоемꙋ̀, и҆ ᲂу҆стро́илъ є҆сѝ ты́ѧ съ весе́лїемъ вопи́ти: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́коже ѡ҆бѣща́лсѧ є҆сѝ нело́жнѡ а҆пⷭ҇толѡмъ твои̑мъ, дх҃а посла́лъ є҆сѝ, сегѡ̀ і҆а́кѡвъ, влⷣко, свѣ́тлостїю просвѣща́емь, вселе́ннꙋю мо́лнїѧми просвѣща́етъ ꙗ҆́вѣ, и҆ вопїе́тъ тебѣ̀: благослови́те, всѧ̑ дѣла̀ гдⷭ҇нѧ, гдⷭ҇а.

Мꙋ́дрость, і҆а́кѡве мꙋ́дре, ѵ҆поста́снꙋю и҆мѣ́лъ є҆сѝ ᲂу҆чи́телѧ, ᲂу҆ча́щꙋ тѧ̀ неизречє́ннымъ и҆ неизглагѡ́ланнымъ та́йнамъ, и҆ къ благоче́стїю лю́ди зва́ти воздви́глъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Го́рꙋ ꙗ҆вле́ннꙋ мы́сленнꙋю, дв҃о чⷭ҇таѧ, прⷪ҇ро́къ ви́дѣ тѧ̀: и҆зъ тебє́ бо пречестны́й ка́мень ѿсѣче́сѧ, спаса́ѧ вселе́ннꙋю вои́стиннꙋ, бжⷭ҇твеннѡ пою́щꙋю: благослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.

Прїиди́те, первопресто́льника всѝ, цр҃кве свѣти́льника, свѧще́нными і҆а́кѡва пѣ́сньми, ꙗ҆́кѡ і҆ера́рха и҆ хрⷭ҇топроповѣ́дника, тезоиме́ннѣ пра́веднаго и҆менова́нна, велича́емъ.

Бжⷭ҇твеннаго ѻ҆́бщника ꙗ҆́кѡ ꙗ҆́вльшасѧ безконе́чнагѡ црⷭ҇твїѧ, и҆ бж҃їѧ нарече́нна бра́та, и҆ житїе́мъ и҆́стинствꙋюща, и҆менова́нїе прїе́мша, свѧщеннотаи́нника, тѧ̀ велича́емъ, і҆а́кѡве.

Прⷭ҇то́лꙋ предстоѧ̀, бл҃же́нне, вѣнцено́сецъ трⷪ҇цы, вѣ́рою почита́ющихъ твою̀ па́мѧть, нетлѣ́ющихъ наслади́тисѧ че́стей, ꙗ҆́кѡ і҆ера́рхъ, і҆а́кѡве, благопрїѧ́тенъ, твоего̀ влⷣкꙋ ᲂу҆молѝ.

Бг҃оро́диченъ: Ты̀ ѿ дв҃ы рожде́ннаго неискꙋсобра́чнѡ, бг҃оѧвле́нне, ᲂу҆чє́нїи твои́ми ꙗ҆́вѣ честѝ бг҃а наꙋча́еши, воплоще́нное сло́во: въ него́же мы̀ вѣ́рꙋюще ны́нѣ, досто́йнѡ велича́емъ.

Свѣти́ленъ.

Ꙗ҆́кѡ гдⷭ҇нѧ бра́та бы́вша, блаже́нне і҆а́кѡве бг҃одохнове́нне, вѣ́рнїи по до́лгꙋ хва́лимъ тѧ̀, сла́вѧще свѣ́тлꙋю и҆ всечестнꙋ́ю и҆ свѣтоно́снꙋю твою̀ па́мѧть, моли́сѧ прилѣ́жнѡ за чтꙋ́щихъ тѧ̀.

Бг҃оро́диченъ: Моли́твенницꙋ тебѣ̀ приво́димъ, и҆ те́плꙋю предста́тельницꙋ, чⷭ҇тꙋю мт҃рь твою̀, вѣ́рнїи, по до́лгꙋ: сподо́би рабы̑ твоѧ̑ причасти́тисѧ сла́вы твоеѧ̀, и҆ пра́ведныхъ ча́сти, и҆ сла́дости ра́йскїѧ, и҆ ᲂу҆лꙋчи́ти на́мъ нбⷭ҇ное црⷭ҇твїе.

Жизнь и труды апостолов – Святой апостол Иаков, брат Господень по плоти

Апо­стол Па­вел в По­сла­нии к Га­ла­там пи­шет, что вме­сте с апо­сто­лом Пет­ром по­чи­та­лись стол­па­ми Церк­ви и апо­сто­лы Иа­ков и Иоанн. Свя­той Иа­ков был сы­ном Иоси­фа Об­руч­ни­ка от его пер­вой же­ны и по­то­му в Еван­ге­лии на­зы­ва­ет­ся бра­том Гос­под­ним. Со­глас­но пре­да­нию, Гос­подь Иисус Хри­стос явил­ся ему по­сле Сво­е­го Вос­кре­се­ния и по­ста­вил его епи­ско­пом Иеру­са­лим­ской церк­ви. Та­ким об­ра­зом, на до­лю апо­сто­ла Иа­ко­ва вы­па­ла осо­бен­ная де­я­тель­ность: он не пу­те­ше­ство­вал с про­по­ве­дью по раз­ным стра­нам, как осталь­ные апо­сто­лы, а учил и свя­щен­но­дей­ство­вал в Иеру­са­ли­ме, име­ю­щем столь важ­ное зна­че­ние для хри­сти­ан­ско­го ми­ра. Как гла­ва Иеру­са­лим­ской церк­ви, он пред­се­да­тель­ство­вал на Апо­столь­ском со­бо­ре в Иеру­са­ли­ме в 51 го­ду. Го­лос его здесь фак­ти­че­ски был ре­ша­ю­щим, и пред­ло­же­ние, сде­лан­ное им, ста­ло ре­зо­лю­ци­ей Апо­столь­ско­го со­бо­ра (Деян.15). Это об­сто­я­тель­ство име­ет важ­ное зна­че­ние вви­ду при­тя­за­ний ка­то­ли­ков воз­вы­сить апо­сто­ла Пет­ра на сте­пень гла­вы Церк­ви для то­го, чтобы за­тем утвер­дить это гла­вен­ство за рим­ским па­пой.

Зна­че­ние апо­сто­ла Иа­ко­ва еще бо­лее укреп­ля­ла его по­движ­ни­че­ская жизнь. Он был стро­гий дев­ствен­ник, не пил ни ви­на, ни дру­гих спирт­ных на­пит­ков, воз­дер­жи­вал­ся от мя­са, но­сил одеж­ду толь­ко льня­ную. Имел он обык­но­ве­ние уеди­нять­ся для мо­лит­вы в хра­ме и там ко­ле­но­пре­клон­но мо­лил­ся о сво­ем на­ро­де. Он так ча­сто про­сти­рал­ся на зем­лю в мо­лит­ве, что ко­жа на ко­ле­нях его огру­бе­ла.

Слу­же­ние апо­сто­ла Иа­ко­ва бы­ло труд­ное: сре­ди мно­же­ства са­мых ярых вра­гов хри­сти­ан­ства. Но он по­сту­пал с та­ким бла­го­ра­зу­ми­ем и спра­вед­ли­во­стью, что его ува­жа­ли не толь­ко хри­сти­ане, но и иудеи, и на­зы­ва­ли опо­рой на­ро­да и пра­вед­ни­ком.

Пре­бы­вая в долж­но­сти Иеру­са­лим­ско­го епи­ско­па око­ло 30 лет, он рас­про­стра­нил и утвер­дил свя­тую ве­ру в Иеру­са­ли­ме и во всей Па­ле­стине. Ко­гда апо­стол Па­вел в по­след­нее свое пу­те­ше­ствие по­се­тил апо­сто­ла Иа­ко­ва, то в то вре­мя со­бра­лись к нему пре­сви­те­ры, и об успе­хах хри­сти­ан­ской про­по­ве­ди сре­ди ев­ре­ев пе­ре­да­ли ему сле­ду­ю­щи­ми сло­ва­ми: «Ви­дишь, брат, сколь­ко ты­сяч уве­ро­вав­ших иуде­ев, и все они рев­ни­те­ли за­ко­на» (Деян.21:20). Мно­гие из ев­ре­ев об­ра­ща­лись к Церк­ви по од­но­му до­ве­рию к сло­ву пра­вед­ни­ка.

Ви­дя та­кое вли­я­ние апо­сто­ла, иудей­ские на­чаль­ни­ки ста­ли опа­сать­ся, как бы весь на­род не об­ра­тил­ся ко Хри­сту, и ре­ши­ли вос­поль­зо­вать­ся про­ме­жут­ком вре­ме­ни меж­ду отъ­ез­дом про­ку­ро­ра Фе­ста и при­бы­ти­ем на его ме­сто Аль­би­на (62 г. по­сле Р. X.) для то­го, чтобы или скло­нить Иа­ко­ва к от­ре­че­нию от Хри­ста, или умерт­вить его.

Пер­во­свя­щен­ни­ком в это вре­мя был без­бож­ный сад­ду­кей Анан. При боль­шом сте­че­нии на­ро­да апо­сто­ла вве­ли на пор­тик хра­ма, и по­сле несколь­ких льсти­вых слов пре­не­бре­жи­тель­но спро­си­ли: «Ска­жи нам о Рас­пя­том?» – «Вы спра­ши­ва­е­те ме­ня об Иису­се? – гром­ко ска­зал пра­вед­ник. – Он си­дит на небе­сах одес­ную Все­выш­ней си­лы и сно­ва при­дет на об­ла­ках небес­ных». В тол­пе ока­за­лось мно­го хри­сти­ан, ко­то­рые ра­дост­но вос­клик­ну­ли: «Осан­на Сы­ну Да­ви­до­ву!» Пер­во­свя­щен­ни­ки же и книж­ни­ки за­кри­ча­ли: «О, и сам пра­вед­ник в за­блуж­де­нии!» и сбро­си­ли его на зем­лю. Иа­ков мог еще под­нять­ся на ко­ле­ни и ска­зал: «Гос­по­ди, про­сти их! Они не ве­да­ют, что тво­рят». «По­бьем его кам­ня­ми», – за­кри­ча­ли его вра­ги. Один свя­щен­ник из пле­ме­ни Ри­ха­ва (они не пи­ли ви­на, жи­ли в па­лат­ках, не се­я­ли ни пше­ни­цы, ни ви­но­гра­да) на­чал уго­ва­ри­вать их: «Что вы де­ла­е­те? Ви­ди­те, пра­вед­ник за вас мо­лит­ся». Но в эту ми­ну­ту один изу­вер, по ре­ме­с­лу су­кон­щик, уда­рил сво­им валь­ком апо­сто­ла по го­ло­ве и умерт­вил его. Вме­сте с ним бы­ло умерщ­вле­но мно­го хри­сти­ан.

Иудей­ский ис­то­рик Иосиф Фла­вий, пе­ре­чис­ляя при­чи­ны па­де­ния Иеру­са­ли­ма, го­во­рит, что Гос­подь на­ка­зал ев­ре­ев, меж­ду про­чим, за уби­е­ние пра­вед­но­го Иа­ко­ва. Апо­стол Иа­ков неза­дол­го до сво­ей смер­ти на­пи­сал со­бор­ное по­сла­ние. Глав­ная цель по­сла­ния – уте­шить и укре­пить об­ра­щен­ных к ве­ре иуде­ев в стра­да­ни­ях, ко­то­рые пред­сто­я­ли им, и предо­сте­речь их от за­блуж­де­ния, буд­то бы од­на ве­ра мо­жет спа­сти че­ло­ве­ка. Свя­той апо­стол объ­яс­ня­ет, что ве­ра, не со­про­вож­да­е­мая доб­ры­ми де­ла­ми, – мерт­ва и не при­во­дит ко спа­се­нию. Цер­ков­ное пре­да­ние при­пи­сы­ва­ет апо­сто­лу Иа­ко­ву со­став­ле­ние древ­ней­ше­го чи­на Бо­же­ствен­ной ли­тур­гии.

См. так­же: "Жи­тие и стра­да­ние свя­то­го Апо­сто­ла Иа­ко­ва, бра­та Гос­под­ня по пло­ти" в из­ло­же­нии свт. Ди­мит­рия Ро­стов­ско­го.