Канон святому апостолу Симону Зилоту

Припев: Святы́й апо́столе Си́моне, моли́ Бо́га о нас.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 23 мая (10 мая ст. ст.)

Глас 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

В вы́шних Влады́це предстоя́, апо́столе чу́дне, тя́ просла́вльшему и ученика́ Себе́ све́тло показа́вшему, просвети́ ду́шу мою́, да воспою́ боже́ственную твою́ па́мять.

Вся́ко изоби́лие благи́х тебе́ Христо́с дарова́в, ве́рх боже́ственных дарова́ний, апо́столе, показа́ тя́, судо́м пра́ведным, богоявле́нне, пра́ведный еди́н.

Вседухо́вную зарю́ прии́м, апо́столе, соше́дшую на тя́ с небесе́, огнедохнове́н бы́л еси́, всю́ попаля́я пре́лесть многобо́жия.

Богоро́дичен: Ты́, мое́ ме́ртвенное и тле́нное, безсме́ртное и нетле́нное, Спа́се, показа́в, во утро́бу всели́лся еси́ Святы́я Де́вы Пречи́стыя неискусобра́чно, вообрази́вся же в челове́ческое естество́.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Боже́ственное та́инство воплоще́ния позна́л еси́ вои́стинну, апо́столе Си́моне богоприя́тне, от Самаго́ Спа́са зарю́ прии́м преми́рную.

Сло́во Безнача́льное и Присносу́щное Своего́ служи́теля тя́, Си́моне чу́дне, блиста́нии све́тлыми бога́тно просвети́ Боже́ственныя благода́ти.

Богоро́дичен: Све́щник всезлаты́й Тя́ проро́к прописа́, Богоро́дице, нося́щу Све́т невече́рний, просвеща́ющаго ми́р луча́ми Божества́, Христа́ Бо́га на́шего.

Седа́лен, гла́с 3.

Боже́ственнаго Ду́ха светозаре́нием тму́ разруши́л еси́ многобо́жия и ве́рных сердца́ просвети́л еси́, воспе́в спаси́тельная повеле́ния, и упраздни́л еси́ е́ллинския ба́сни, Си́моне сла́вне, Христа́ Бо́га моли́ дарова́ти на́м ве́лию ми́лость.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Ве́сь сокро́вище сы́й дарова́ний ева́нгельских, благода́ти испо́лнен, све́т ми́ра и со́ль вселе́нныя, Си́моне всеблаже́нне, бы́л еси́.

Веще́й сту́днаго явле́ния отврати́лся еси́, невеще́ствен же Све́т ви́дети сподо́бился еси́, Божества́ ви́д, прии́мшаго ве́щь челове́чества, досточу́дне.

Си́моне, учениче́ жи́зни нетле́нныя, умертви́ на́ш живу́щий гре́х живоно́сною си́лою Животода́вца, ея́же прия́л еси́ де́йствие.

Богоро́дичен: Ра́вен бы́в Отцу́ Твоему́ по существу́, ра́вен челове́ком бы́л еси́ по естеству́, от Пречи́стыя Де́вы на́шу, Влады́ко, пло́ть прие́мый.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя́ у́тром человеколю́бия Твоего́, Го́споди.

Со огне́м, богови́дче, ты́ зри́мый язы́к Ду́ха прия́л еси́ усе́рдно, на го́рнице седя́.

Я́ко высо́к сы́й, в превы́шних се́лех живы́й, высо́кая и вели́кая уче́ния на́м прине́сл еси́.

Богоро́дичен: Зако́н пе́рвый, Де́во, рождество́м Твои́м преста́, процвете́ же благода́ть, и пра́вда возсия́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Ре́вности тезоимени́т нарече́нный, Си́моне досточу́дне, ре́вностию поревнова́л еси́ по Го́споде Бо́зе Вседержи́тели.

Тя́ Боже́ственных чуде́с самоде́лателя Спа́с показа́, да́в вла́сть тебе́ де́йством Своея́ бла́гости.

Богоро́дичен: Да заградя́тся уста́ злочести́вых, Богоро́дицу Тя́ не му́дрствующих, Всенепоро́чная, и ли́ца в сту́д да облеку́тся.

Конда́к, гла́с 2.

Изве́стно прему́дрости уче́ния в душа́х благоче́ствующих поло́жшаго во хвале́нии ублажи́м, я́ко богоглаго́ливаго вси́ Си́мона: престо́лу бо сла́вы ны́не предстои́т и со безпло́тными весели́тся, моля́ся непреста́нно о все́х на́с.

И́кос:

Апо́стола па́мять вси́, я́ко спаси́тельный де́нь, восхва́лим ны́не и благоче́стно ублажи́м: то́й бо все́й вселе́нней, я́коже со́лнце, сия́ет, све́та луча́ми всю́ мглу́ отгоня́я, и просвеща́ет любо́вию сего́ па́мять соверша́ющия и любе́зно почита́ющия. Те́мже усе́рдно стеце́мся, воспева́юще его́: то́й бо Христу́ предстои́т, моля́ся непреста́нно о все́х на́с.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Стра́нну ре́вность, Си́моне, име́я, тезоимени́т ре́вности, блаже́нне, наре́клся еси́ и нра́в, зва́нию согла́сен, стяжа́л еси́, — благослове́н еси́, Го́споди, — вопия́, — во ве́ки.

Вку́пе Сло́ву сликовству́я и собесе́дник Тому́ бы́в, Ца́рствия та́мо сопричасти́лся еси́, зовы́й: благослове́н еси́, Го́споди Бо́же, во ве́ки.

Богоро́дичен: Ле́стию дре́вле благожре́бия пра́отцы изгна́ зми́й, Ты́ же си́х, Ма́ти Бо́жия, воззвала́ еси́. Благослове́н, Пречи́стая, Пло́д Твоего́ чре́ва.

Пе́снь 8.

Ирмо́с: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три́ о́троцы не повину́вшеся, Го́спода воспева́ху и славосло́вяху во вся́ ве́ки.

Я́ко красны́, Си́моне, твои́ но́ги, благоле́пен е́сть и язы́к, глаго́лющь сла́ву Христо́ву, и научи́ зва́ти: Го́спода по́йте и превозноси́те во вся́ ве́ки.

Добро́тами укра́шен светолу́чными и чуде́с пуща́я сия́ния, позна́лся еси́, Си́моне, лю́дем се́мя благослове́нное: Го́спода по́йте, дела́, и превозноси́те во вся́ ве́ки.

Богоро́дичен: У́м не мо́жет рождества́ Твоего́, Богороди́тельнице, сказа́ти и изрещи́ сло́во изнемога́ет: Бо́га бо, заче́нши, родила́ еси́, Де́во, Его́же превозно́сим во вся́ ве́ки.

Пе́снь 9.

Ирмо́с: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Явле́н бы́л еси́ конце́м, све́том сия́я, и, о́гнь духо́вный прие́м, светови́ден показа́лся еси́, те́мже тя́ велича́ем.

Ве́сь Бо́гу возложе́н, Тому́ сраствори́лся еси́, Его́же ны́не моли́, богоявле́нне, о на́с, ве́рою и любо́вию восхваля́ющих тя́.

Богоро́дичен: Спасе́ния все́х Хода́таицу, я́вльшуюся челове́ком и ми́р просве́щшую сия́нии богови́дныя чистоты́, в пе́снех велича́ем.

Свети́лен.

Тече́ние кра́сных твои́х но́г, Си́моне апо́столе, возврати́в, к ше́ствию небе́сному возше́л еси́, ра́дуяся, и, Тро́ице предста́в, во Отце́ ви́диши Сы́на и Ду́ха Боже́ственнаго. Сего́ ра́ди ве́рою пресвяще́нную твою́ и боже́ственную пра́зднуем па́мять.

Пѣ́снь а҃.

І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.

Въ вы́шнихъ влⷣцѣ предстоѧ̀, а҆пⷭ҇ле чꙋ́дне, тѧ̀ просла́вльшемꙋ, и҆ ᲂу҆ч҃ника̀ себѣ̀ свѣ́тлѡ показа́вшемꙋ: просвѣтѝ дꙋ́шꙋ мою̀, да воспою̀ бжⷭ҇твеннꙋю твою̀ па́мѧть.

Всѧ́ко и҆з̾ѡби́лїе благи́хъ тебѣ̀ хрⷭ҇то́съ дарова́въ, ве́рхъ бжⷭ҇твенныхъ дарова́нїй, а҆пⷭ҇ле, показа̀ тѧ̀ сꙋдо́мъ пра́веднымъ, бг҃оѧвле́нне, пра́ведный є҆ди́нъ.

Вседꙋхо́внꙋю зарю̀ прїи́мъ, а҆пⷭ҇ле, соше́дшꙋю на тѧ̀ съ нб҃сѐ ѻ҆гнедохнове́нъ бы́лъ є҆сѝ, всю̀ попалѧ́ѧ пре́лесть многобо́жїѧ.

Бг҃оро́диченъ: Ты̀ моѐ ме́ртвенное и҆ тлѣ́нное, безсме́ртное и҆ нетлѣ́нное, сп҃се, показа́въ, во ᲂу҆тро́бꙋ всели́лсѧ є҆сѝ ст҃ы́ѧ дв҃ы пречⷭ҇тыѧ неискꙋсобра́чнѡ, воѡбрази́всѧ же въ человѣ́ческое є҆стество̀.

Пѣ́снь г҃.

І҆рмо́съ: Нѣ́сть свѧ́тъ ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Бжⷭ҇твенное та́инство воплоще́нїѧ позна́лъ є҆сѝ вои́стиннꙋ, а҆пⷭ҇ле сі́мѡне бг҃опрїѧ́тне, ѿ самагѡ̀ сп҃са зарю̀ прїи́мъ премі́рнꙋю.

Сло́во безнача́льное и҆ присносꙋ́щное, своего̀ слꙋжи́телѧ тѧ̀, сі́мѡне чꙋ́дне, блиста̑нїи свѣ́тлыми бога́тнѡ просвѣтѝ бжⷭ҇твенныѧ бл҃года́ти.

Бг҃оро́диченъ: Свѣ́щникъ всезлаты́й тѧ̀ прⷪ҇ро́къ прописа̀, бцⷣе, носѧ́щꙋ свѣ́тъ невече́рнїй, просвѣща́ющаго мі́ръ лꙋча́ми бж҃ества̀, хрⷭ҇та̀ бг҃а на́шегѡ.

Сѣда́ленъ, гла́съ г҃.

Бжⷭ҇твеннагѡ дх҃а свѣтозаре́нїемъ тмꙋ̀ разрꙋши́лъ є҆сѝ многобо́жїѧ, и҆ вѣ́рныхъ сердца̀ просвѣти́лъ є҆сѝ, воспѣ́въ спаси́тєльнаѧ повелѣ̑нїѧ, и҆ ᲂу҆праздни́лъ є҆сѝ є҆́ллинскїѧ ба̑сни, сі́мѡне сла́вне, хрⷭ҇та̀ бг҃а молѝ, дарова́ти на́мъ ве́лїю ми́лость.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Ве́сь сокро́вище сы́й дарова́нїй є҆ѵⷢ҇льскихъ, благода́ти и҆спо́лненъ, свѣ́тъ мі́ра, и҆ со́ль вселе́нныѧ, сі́мѡне всеблаже́нне, бы́лъ є҆сѝ.

Веще́й стꙋ́днагѡ ꙗ҆вле́нїѧ ѿврати́лсѧ є҆сѝ, невеще́ственъ же свѣ́тъ ви́дѣти сподо́билсѧ є҆сѝ, бжⷭ҇тва̀ ви́дъ прїи́мшагѡ, ве́щь человѣ́чества, досточꙋ́дне.

Сі́мѡне, ᲂу҆ч҃ничѐ жи́зни нетлѣ́нныѧ, ᲂу҆мертвѝ на́шъ живꙋ́щїй грѣ́хъ, живоно́сною си́лою животода́вца, є҆ѧ́же прїѧ́лъ є҆сѝ дѣ́йствїе.

Бг҃оро́диченъ: Ра́венъ бы́въ ѻ҆ц҃ꙋ̀ твоемꙋ̀ по сꙋществꙋ̀, ра́венъ человѣ́кѡмъ бы́лъ є҆сѝ по є҆стествꙋ̀, ѿ пречⷭ҇тыѧ дв҃ы на́шꙋ, влⷣко, пло́ть прїе́мый.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣтѝ мѧ̀ ᲂу҆́тромъ чл҃вѣколю́бїѧ твоегѡ̀, гдⷭ҇и.

Со ѻ҆гне́мъ, бг҃ови́дче, ты̀ зри́мый ѧ҆зы́къ дх҃а, прїѧ́лъ є҆сѝ ᲂу҆се́рднѡ, на го́рницѣ сѣдѧ̀.

Ꙗ҆́кѡ высо́къ сы́й, въ превы́шнихъ се́лѣхъ живы́й, высѡ́каѧ и҆ вели̑каѧ ᲂу҆чє́нїѧ на́мъ прине́слъ є҆сѝ.

Бг҃оро́диченъ: Зако́нъ пе́рвый, дв҃о, ржⷭ҇тво́мъ твои́мъ преста̀, процвѣтѐ же благода́ть, и҆ пра́вда возсїѧ̀.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ, бж҃е на́шъ.

Ре́вности тезоимени́тъ нарече́нный, сі́мѡне досточꙋ́дне, ре́вностїю поревнова́лъ є҆сѝ, по гдⷭ҇ѣ бз҃ѣ вседержи́тели.

Тѧ̀ бжⷭ҇твенныхъ чꙋде́съ самодѣ́лателѧ сп҃съ показа̀, да́въ вла́сть тебѣ̀, дѣ́йствомъ своеѧ̀ бл҃гости.

Бг҃оро́диченъ: Да заградѧ́тсѧ ᲂу҆ста̀ ѕлочести́выхъ, бцⷣꙋ тѧ̀ не мꙋ́дрствꙋющихъ, всенепоро́чнаѧ, и҆ ли́ца въ стꙋ́дъ да ѡ҆блекꙋ́тсѧ.

Конда́къ, гла́съ в҃.

И҆звѣ́стнѡ премꙋ́дрости ᲂу҆чє́нїѧ, въ дꙋша́хъ благоче́ствꙋющихъ поло́жшаго, во хвале́нїи ᲂу҆блажи́мъ, ꙗ҆́кѡ бг҃оглаго́ливаго всѝ сі́мѡна: прⷭ҇то́лꙋ бо сла́вы ны́нѣ предстои́тъ, и҆ со безпло́тными весели́тсѧ, молѧ́сѧ непреста́ннѡ ѡ҆ всѣ́хъ на́съ.

І҆́косъ:

А҆пⷭ҇ла па́мѧть, всѝ, ꙗ҆́кѡ спаси́тельный де́нь, восхва́лимъ ны́нѣ, и҆ благоче́стнѡ ᲂу҆блажи́мъ: то́й бо все́й вселе́ннѣй ꙗ҆́коже со́лнце сїѧ́етъ, свѣ́та лꙋча́ми всю̀ мглꙋ̀ ѿгонѧ́ѧ, и҆ просвѣща́етъ любо́вїю сегѡ̀ па́мѧть соверша́ющыѧ, и҆ любе́знѡ почита́ющыѧ. тѣ́мже ᲂу҆се́рднѡ стеце́мсѧ, воспѣва́юще є҆го̀: то́й бо хрⷭ҇тꙋ̀ предстои́тъ, молѧ́сѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Стра́ннꙋ ре́вность, сі́мѡне, и҆мѣ́ѧ, тезоимени́тъ ре́вности, блаже́нне, наре́клсѧ є҆сѝ, и҆ нра́въ зва́нїю согла́сенъ стѧжа́лъ є҆сѝ: бл҃гослове́нъ є҆сѝ, гдⷭ҇и, вопїѧ̀, во вѣ́ки.

Вкꙋ́пѣ сло́вꙋ сликовствꙋ́ѧ, и҆ собесѣ́дникъ томꙋ̀ бы́въ, црⷭ҇твїѧ та́мѡ сопричасти́лсѧ є҆сѝ, зовы́й: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Ле́стїю дре́вле бл҃гожре́бїѧ пра́ѻтцы и҆згна̀ ѕмі́й, ты̀ же си́хъ, мт҃и бж҃їѧ, воззвала̀ є҆сѝ: бл҃гослове́нъ, пречⷭ҇таѧ, пло́дъ твоегѡ̀ чре́ва.

Пѣ́снь и҃.

І҆рмо́съ: Мꙋсїкі́йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́вѧхꙋ во всѧ̑ вѣ́ки.

Ꙗ҆́кѡ красны̑, сі́мѡне, твоѝ но́ги, благолѣ́пенъ є҆́сть и҆ ѧ҆зы́къ, глаго́лющь сла́вꙋ хрⷭ҇то́вꙋ, и҆ наꙋчѝ зва́ти: гдⷭ҇а по́йте и҆ превозноси́те во всѧ̑ вѣ́ки.

Добро́тами ᲂу҆кра́шенъ свѣтолꙋ́чными, и҆ чꙋде́съ пꙋща́ѧ сїѧ̑нїѧ, позна́лсѧ є҆сѝ, сі́мѡне, лю́демъ сѣ́мѧ бл҃гослове́нное: гдⷭ҇а по́йте, дѣла̀, и҆ превозноси́те во всѧ̑ вѣ́ки.

Бг҃оро́диченъ: Оу҆́мъ не мо́жетъ ржⷭ҇тва̀ твоегѡ̀, бг҃ороди́тельнице, сказа́ти, и҆ и҆зрещѝ сло́во и҆знемога́етъ: бг҃а бо заче́нши родила̀ є҆сѝ, дв҃о, є҆го́же превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Чтⷭ҇ꙋю сла́внѡ почти́мъ, лю́дїе, бцⷣꙋ, ѻ҆́гнь бж҃ества̀ прїи́мшꙋю во чре́вѣ неѡпа́льнѡ, пѣ́сньми велича́емъ.

Ꙗ҆вле́нъ бы́лъ є҆сѝ концє́мъ, свѣ́томъ сїѧ́ѧ, и҆ ѻ҆́гнь дꙋхо́вный прїе́мъ, свѣтови́дѣнъ показа́лсѧ є҆сѝ: тѣ́мже тѧ̀ велича́емъ.

Ве́сь бг҃ꙋ возложе́нъ, томꙋ̀ сраствори́лсѧ є҆сѝ: є҆го́же ны́нѣ молѝ, бг҃оѧвле́нне, ѡ҆ на́съ, вѣ́рою и҆ любо́вїю восхвалѧ́ющихъ тѧ̀.

Бг҃оро́диченъ: Спасе́нїѧ всѣ́хъ хода́таицꙋ ꙗ҆́вльшꙋюсѧ человѣ́кѡмъ, и҆ мі́ръ просвѣ́щшꙋю, сїѧ̑нїи бг҃ови́дныѧ чистоты̀, въ пѣ́снехъ велича́емъ.

Свѣти́ленъ.

Тече́нїе кра́сныхъ твои́хъ но́гъ, сі́мѡне а҆пⷭ҇ле, возврати́въ, къ ше́ствїю нбⷭ҇номꙋ возше́лъ є҆сѝ ра́дꙋѧсѧ, и҆ трⷪ҇цѣ предста́въ, во ѻ҆ц҃ѣ̀ ви́диши сн҃а и҆ дх҃а бжⷭ҇твеннаго. сегѡ̀ ра́ди вѣ́рою пресвѧще́ннꙋю твою̀ и҆ бжⷭ҇твеннꙋю пра́зднꙋемъ па́мѧть.

Жизнь и тру­ды апо­сто­лов – Свя­той апо­стол Си­мон Зи­лот

Свя­той апо­стол Си­мон Зи­лот про­ис­хо­дил из Ка­ны Га­ли­лей­ской, был сы­ном свя­то­го Об­руч­ни­ка Иоси­фа, по пло­ти бра­том Гос­по­да и од­ним из 12-ти апо­сто­лов. Пер­вое чу­до, ко­то­рое со­тво­рил Спа­си­тель – пре­тво­ре­ние во­ды в ви­но – про­изо­шло в до­ме Си­мо­на: во вре­мя пи­ра для го­стей недо­ста­ло ви­на. То­гда Гос­подь по пред­ста­тель­ству Пре­свя­той Бо­го­ма­те­ри пре­тво­рил во­ду в ви­но. По­ра­жен­ный чу­дом, Си­мон всем серд­цем и ду­шой уве­ро­вал в Гос­по­да Иису­са как обе­то­ван­но­го Мес­сию и, все оста­вив, по­сле­до­вал за Ним. Си­мон по­лу­чил на­име­но­ва­ние "зи­ло­та", т. е. рев­ни­те­ля. В день Пя­ти­де­сят­ни­цы он при­нял вме­сте с дру­ги­ми апо­сто­ла­ми дар Свя­то­го Ду­ха. Свя­той апо­стол Си­мон про­по­ве­до­вал уче­ние Хри­сто­во в Иудее, Егип­те, Ли­вии, Ки­ри­нее и Бри­та­нии. В Аб­ха­зии при­нял му­че­ни­че­скую кон­чи­ну, был рас­пят на кре­сте. По­гре­бен в го­ро­де Ни­коп­сии око­ло Су­ху­ми. Впо­след­ствии (в XIX в.) на ме­сте по­дви­гов свя­то­го апо­сто­ла, близ Ивер­ской го­ры, был со­ору­жен Но­во­а­фон­ский мо­на­стырь Си­мо­на Ка­на­ни­та. До­ныне со­хра­ни­лась пе­ще­ра, в ко­то­рой под­ви­зал­ся свя­той апо­стол.

См. так­же: "Па­мять свя­то­го апо­сто­ла Си­мо­на Зи­ло­та" в из­ло­же­нии свт. Ди­мит­рия Ро­стов­ско­го.

См. так­же: "Со­бор свя­тых слав­ных и все­х­валь­ных две­на­дца­ти Апо­сто­лов" в из­ло­же­нии свт. Ди­мит­рия Ро­стов­ско­го.