Акафистник

Помочь сайту
·
·
·
·

Канон святому благоверному равноапостольному Борису, царю Болгарскому, во святом крещении Михаилу

Память: 15 (2) мая

Глас 8.

Припе́в: Святы́й благове́рный царю́ Бори́се, моли́ Бо́га о на́с.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Ца́рским путе́м неукло́нно ше́ствуя из Еги́пта идолослуже́ния к Чермно́му мо́рю Креще́ния с наро́дом свои́м, благода́рственно с ве́рою воспе́л еси́ Изба́вителю и Бо́гу на́шему.

А́ще и фараони́тское противле́ние пога́ных вельмо́ж пу́ть тво́й хотя́ше препя́ти и в ра́бство бесо́в верну́ти вме́сто свобо́ды во Христе́, но ты́, ше́ствуя побе́дне, воспе́л еси́ Изба́вителю и Бо́гу на́шему.

Ра́зумом непоколе́блемым устреми́лся еси́, святы́й царю́, к но́вому зако́ну благоче́стия, Бо́гом да́нному, авраа́мски вся́ непреподо́бная же́ртвуя и с умиле́нием воспева́я Изба́вителю и Бо́гу на́шему.

Богоро́дичен: Свобожде́ние на́ше Рождество́м Твои́м прови́де в купине́ неопали́мой вели́кий Моисе́й, Чи́стая, и на́с, изба́вленных, наста́ви непреста́нно пе́ти с ра́достию Изба́вителю и Бо́гу на́шему.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Тве́рдый тя́ ка́мень ве́ры прия́т на основа́нии, те́мже врата́ а́дова воста́нием не поколеба́, утвержде́ннаго в Го́споде се́рдца твоего́, и вознесе́ся ро́г тво́й на враги́ твоя́.

Высо́кая глаго́лющии на Бо́га падо́шася, ты́ же, со смире́нием богоуго́дным и си́лою Креста́ победи́в, вознесе́н бы́л во отца́ всего́ наро́да твоего́ и в сы́на Отца́ Небе́снаго.

Обетова́нных бла́г лю́бящим Бо́га жела́я, вся́ я́ко уме́ты вмени́л еси́ и по́двиг вели́кий равноапо́стола подъя́л еси́, со все́ми боря́ся, до́ндеже вконе́ц победи́в, Бо́гу угоди́л еси́.

Богоро́дичен: Оби́лие благода́тей Бо́жиих излия́ся на ро́д челове́ческий стра́нным рождество́м Твои́м, Пречи́стая, низведе́ бо во а́д Рожде́нный Тобо́ю кня́зя ми́ра сего́ и на́с вла́сти его́ свободи́.

Седа́лен, гла́с 2.

Милосе́рдие щедро́т Бо́жиих излия́ся на зе́млю Бо́лгарскую Креще́нием, я́коже до́ждь на руно́, и́же не возврати́ся то́щ, до́ндеже напои́ вся́. Те́мже прозябо́ша се́мена ца́рствия и принесо́ша плодоноше́ние в Вы́шнюю жи́тницу, водя́щу, я́коже оте́ц, де́ти своя́ благове́рному царю́ Бори́су, крести́вшему себе́ и лю́ди своя́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Слу́ха Госпо́дня услы́шав, ко спасе́нию все́х зову́щаго, и́го подъя́л еси́ Христо́во, крести́вся нелицеме́рно, и совмести́л еси́ ца́рская с благоче́стием, дне́м в багряни́це, но́щию же во вре́тищи Бо́гу моля́ся.

Твоя́ доброде́тель во всю́ зе́млю изы́де Бо́лгарскую и во о́браз все́м лю́дем твои́м тя́ возвы́си, те́мже с любо́вию вла́сти твое́й повинова́хуся не то́кмо за гне́в, но и за со́весть.

А́може гре́х нече́стия умно́жися, преизбы́точествова благода́ть по апо́стольскому глаго́лу и возсия́ по Креще́нии богобоязли́вая душа́ твоя́ све́том от ю́га прише́дшаго Со́лнца пра́вды, Христа́ Бо́га на́шего.

Богоро́дичен: Внегда́ прибли́жися ле́то благоволе́ния Бо́жия, прия́ла еси́ от Арха́нгела, Пречи́стая, благове́щение ра́дости, я́ко хо́щет Тобо́ю Бо́г роди́тися во све́т язы́ком и сла́ву Изра́иля.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Исполня́я вся́ до́лжная, во е́же све́ту повеле́ний Бо́жиих возсия́ти новокреще́нным лю́дем, прия́л еси́ в зе́млю твою́ учи́телей слове́нских и уще́дрил еси́ я́, в де́ле апо́стольства и́м посо́бствуя.

Во О́хрид гра́д Кли́мента посла́в с Нау́мом, в Пресла́ве же Иоа́нна Екза́рха име́я с Константи́ном, и Фео́дора Ду́кса, и Хра́бра, процве́л еси́ в сло́ве, я́ко фи́никс, и, я́ко ке́др лива́нский, умно́жился еси́.

Бога́тно удобри́в ду́ши люде́й твои́х слове́нскою кни́гою и напои́в жа́ждущих благода́тию сло́ва, тогда́ пра́вде научи́шася живу́щии на земли́ Бо́лгарстей и вконе́ц преста́ нече́стие и́дольское.

Богоро́дичен: О́гнь Тобо́ю супоста́ты пояде́, Пречи́стая, родила́ бо еси́ еди́наго Христа́ Спа́са на́шего, на́с от ра́бства свободи́вшаго и Жи́знь на́м сме́ртию Свое́ю пода́вшаго.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Ри́м затме́нный оста́вив, к восто́ку светле́йшаго Правосла́вия обрати́лся еси́ и, Фо́тия Патриа́рха свята́го оглаше́ние прии́м, ка́ко подоба́ет в дому́ Бо́жии жи́ти, уве́дел еси́.

И́стину о Це́ркви Бо́лгарстей утверди́ти жела́я, к Собо́ру Константинопо́льскому обрати́лся еси́, отону́дуже архиепи́скопа получи́в, основа́ние кре́пкое автокефа́лии во времена́ ве́чная положи́л еси́.

Се́й де́нь вои́стинну сотвори́ Госпо́дь, в о́ньже ты́ вся́ твоя́ прекра́сне соде́лал еси́, благове́рный царю́ Бори́се, те́мже возра́доватися на́м подоба́ет Го́сподеви, па́мять твою́ пра́зднующе.

Богоро́дичен: Цари́це Небе́сная, Де́во Пресвята́я, я́ко иму́щи ве́лие дерзнове́ние к Сы́ну Твоему́, свободи́ ны́ предста́тельством Твои́м от звере́й преиспо́дних и, я́ко проро́ка Ио́ну, спаси́ ны́.

Конда́к, гла́с 8.

Взбра́нный воево́до Бо́га Вы́шняго, си́лою Креста́ победи́вый воста́ние тьмы́ и насади́вый благоче́стие на земли́ твое́й, име́яй же дерзнове́ние ко Го́споду, сохраня́й моли́твами твои́ми достоя́ние твое́, да зове́м ти́: ра́дуйся, равноапо́стольне царю́ Бори́се, крести́телю земли́ Бо́лгарския.

И́кос:

Возсия́вшу в Вифлее́ме Со́лнцу пра́вды и дне́ви светле́йшему наста́вшу на земли́, лю́дие бо́лгарстии, я́коже де́лателие о́нии, седя́ху во тьме́ се́ни сме́ртныя и пра́здни де́лания спаси́тельнаго. Но обре́т я́ Госпо́дь ми́лостию Про́мысла Своего́ в ча́с девя́тый, избра́ царя́ Бори́са в приста́вника Своего́, и́мже введе́ я́ в виногра́д Це́ркве Своея́ две́рию Креще́ния и возмезди́ ра́вным с пе́рвыми де́латели воздая́нием. Те́мже, Его́ благодаря́ще, тому́ вопие́м: ра́дуйся, равноапо́стольне царю́ Бори́се, крести́телю земли́ Бо́лгарския.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще; благослове́н еси́, Го́споди Бо́же, во ве́ки.

Апо́стольски ве́ру насажда́я, хра́мы и́стинному Бо́гу воздви́гл еси́ на земли́ твое́й, иде́же иере́ом честны́м сло́во пропове́дати и та́инства соверша́ти взыва́ющим: благослове́н еси́, Го́споди Бо́же, во ве́ки.

Ра́дость ве́лию даде́ ти́ Бо́г, внегда́ в Тивериопо́ли мо́щи святы́х пятна́десяти му́чеников из-под спу́да откры́шася, и зна́мения сотвори́шася, и в Брега́льницу пренесо́ша, все́м лю́дем, взыва́ющим: благослове́н еси́, Го́споди Бо́же, во ве́ки.

Сбытие́ ви́дя твои́х вожделе́ний, я́ко благоче́стие насади́ся труды́ твои́ми, Це́рковь украси́ся со́нмом свяще́нства самовла́стнаго, сло́во слове́нское освяти́ся Богослуже́нием, Бо́га преи́скренне благодари́л еси́, взыва́я: благослове́н еси́, Го́споди Бо́же, во ве́ки.

Богоро́дичен: Твоея́ ми́лости не отста́ви от на́с, Богоро́дице, возлю́бленнаго Ти́ ра́ди царя́ Бори́са, и́же Сы́на Твоего́ и Тя́ в болга́рех просла́ви, зову́щих: благослове́н еси́, Го́споди Бо́же, во ве́ки.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

В боле́знь лю́тую впа́д и се́рдцем горя́ Бо́гу лу́чше угоди́ти, ца́рства отре́клся еси́ и, во и́ноческий о́браз оде́явся, непреста́нною моли́твою превозноси́л еси́ Христа́ во ве́ки.

Оби́тель воздви́г великому́ченику Пантелеи́мону, в не́й всели́лся еси́ и, седмочи́сленным посо́бствуя, с про́чиими в кни́гах неуста́нно потруди́лся еси́, превознося́ Христа́ во ве́ки.

Преспе́яние ду́ха ти́ дарова́ препросла́вленный Госпо́дь, и бы́л еси́ о́браз по́двига Христо́ва, наставля́я люде́й твои́х дея́нием па́че, не́жели сло́вом, и превознося́ Христа́ во ве́ки.

Богоро́дичен: О́блаче пресве́тлый, ороша́яй о́гнь и прохлажда́яй пла́мень, ороси́ мя́ благода́тию и прохлади́ разже́ннаго грехо́м, во е́же благода́рственно превозноси́ти Сы́на Твоего́ во ве́ки.

Пе́снь 9.

Ирмо́с: Ужасе́ся о се́м Не́бо и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с Те́м Тя́, Богоро́дицу, А́нгелов и челове́к чинонача́лия велича́ют.

Люде́й твои́х наста́вив на пу́ть спасе́ния и де́ло твое́ соверши́в, кончи́ну блаже́нную прия́л еси́ земна́го жития́ и, в Ца́рство преше́д Небе́сное, мо́лишися непреста́нно о все́х на́с.

Ублажа́ем тя́, равноапо́стола земли́ Бо́лгарския, Креще́нием святы́м и пи́смены слове́нскими вве́дшаго люде́й твои́х во све́т ве́ры Христо́вы и моля́щагося непреста́нно о все́х на́с.

Челове́ческим сло́вом тя́ просла́вихом, а́нгельских похва́л досто́йнаго, но, снизходя́, приими́ любо́вь се́рдца на́шего и бу́ди на́м хода́тай ко Го́споду, моля́ся непреста́нно о все́х на́с.

Богоро́дичен: Избра́нная от все́х родо́в, Богоневе́сто, низложи́ си́льныя в го́рдости серде́ц и́х и вознеси́ смире́нныя, а́лчущия испо́лни вся́ческих бла́г и богатя́щияся отпусти́ тщи́, вся́ бо мо́жеши, ели́ка хо́щеши, Всепе́тая.

Свети́лен, гла́с 2.

Сро́днаго на́м апо́стола, благове́рнаго Бори́са, пе́сньми почти́м вси́, бра́тие, на́с Креще́нием Бо́гу соедини́вшаго, и в Правосла́вии наста́вльшаго, и пу́ть спасе́ния на́м соде́лавшаго, и́мже са́м пе́рвый проше́д, все́х ве́рных на́с возво́дит в Ца́рствие Небе́сное.

Yandex Metrika