Канон святому мученику Ермию Команскому

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Звезда́, сия́ющая Боже́ственным све́том, муче́ния сия́нием позна́н бы́л еси́, све́тло вся́ озаря́я, ве́рою чи́стою тя́, Ерме́е, чту́щия.

Вы́ну воззре́нием, е́же к Бо́гу, вся́ презре́в, я́же в житии́, му́чениче му́дре, в му́ченическия вше́л еси́ по́двиги и врага́ держа́вно победи́л еси́.

Красе́н виде́нием и душе́ю сы́й, Ерме́е, вво́инился еси́ Царю́ Небе́сному и Сего́, му́чениче, до конца́ враги́ смири́л еси́.

Не поже́ршу ти́ и́долом, блаже́нне, твоя́ исторго́ша зу́бы, че́люсти мы́сленных сокруши́л еси́ льво́в и побе́ды оде́ялся венце́м неувяда́ющим.

Богоро́дичен: Свята́я Де́во, Ма́ти Христо́ва, му́чеников сла́ва и А́нгелов ра́досте, с ни́ми моли́ Сы́на Твоего́ уще́дрити и спасти́ рабы́ Твоя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Украше́ние бы́л еси́ страда́льцев, му́дре, благода́тию Богосия́нною. Те́мже, и́же в ми́ре, благоче́стно тя́ почита́ем.

Хвалу́ Бо́гу на́шему, че́люстем твои́м сокруша́емым, му́чениче му́дре, тя́ укре́пльшему, благода́рно воспева́л еси́.

Си́лою Боже́ственнаго Ду́ха ты́ укрепля́емь, прему́дре, си́льнаго, ра́дуяся, в зло́бе смири́л еси́ зми́я.

Богоро́дичен: Усты́ и язы́ком испове́даю Тя́, Бо́га пресвяты́й хра́м, Пречи́стая, сего́ ра́ди вся́каго изба́ви мя́ озлобле́ния.

Седа́лен, гла́с 4.

Низло́жь враго́в возноше́ния, я́ко во́ин си́лен Влады́чень, побе́дный вене́ц прия́л еси́. Те́мже восхваля́ем тя́, я́ко до́бля страда́льца, ве́рою творя́ще твою́ всепра́зднственную па́мять, в не́йже моли́ спасти́ся на́м вся́кия ну́жды, Ерме́е многострада́льне.

Богоро́дичен: По Бо́зе во Тво́й, Богоро́дице, прибега́ю смире́нный покро́в Боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: От Безнача́льнаго Отца́ рожде́ннаго, напосле́док Тя́ пло́тию ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се, — вопия́ше, — ка́ко, сла́вимый я́ко Бо́г от А́нгел, от беззако́нных ны́не челове́к, Сы́не, хотя́ распина́ешися? Пою́ Тя́, Долготерпели́ве.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

То́ки крове́й твои́х многобо́жия о́гнь погаси́ша, ве́рным же роса́ яви́шася, страстоте́рпче му́чениче досточу́дне.

Тро́ическою благода́тию, му́чениче, ороша́емь, пребыва́еши неопали́мь, посреди́ пла́мене стоя́ три́ дни́, всесла́вне.

Ли́к Небе́сных си́л свы́ше смотря́ше до́блесть, и по́двиг твои́х кре́пости, страда́льче Ерме́е, дивя́ся.

Богоро́дичен: Препе́тая Влады́чице, во святы́х почива́ющаго па́че сло́ва родила́ еси́, сего́ ра́ди Тя́ пе́сньми почита́ем.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Сокруша́емь те́лом, му́чениче пресла́вне, мно́гими му́ками сокруше́ние соде́лал еси́ в поги́бель истука́нным благода́тию, сего́ ра́ди все́х благочести́вых благода́тию Боже́ственною исцеля́еши душе́вная сокруше́ния.

Го́рькими отра́вы, му́чениче, напое́н пребыва́еши невреди́мь, во изве́стну ве́ру призыва́я си́х Пода́теля, претворя́ема твои́м све́тлым чудоде́йством к муче́ния красоте́ пресве́тло.

Ника́коже уклони́лся еси́ стоя́ния лу́чшаго, блаже́нне, укрепля́ющаго тя́, и утвержда́юща, и исправля́юща по́двиги вся́, е́же к нему́ бы́вшее, прозря́ нра́ва простото́ю.

Богоро́дичен: Мы́сленный Тя́ све́щник дре́вле проро́к ви́де Ду́хом, иму́щь, Отрокови́це, свещу́, Христа́ Го́спода, све́том неизрече́нным вся́ ны́ просвеща́юща, ве́рно Тя́ чту́щия, Пренепоро́чная.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Всеце́ло к Бо́гу, всеблаже́нне, име́я жела́ние, боле́зни и терза́ния Боже́ственнаго твоего́ телесе́, я́коже ино́му стра́ждущу, терпе́л еси́, ра́дуяся, венца́ прозира́я.

Претерпе́л еси́ кре́пко жи́л твои́х отъя́тие, Ерме́е, му́чениче Христо́в, врага́ многоко́зненнаго жи́лы истерза́я благода́тию и му́жеству вся́кому о́браз явля́яся.

Изощре́н огне́м Христо́вы любве́, я́ко обою́ду о́стр вои́стинну бы́л еси́ ме́чь во́инства безбо́жная, я́ко тве́рд ору́жник, посека́я явле́нно.

Богоро́дичен: Пита́еши боголе́пно ма́нием вся́ Пита́ющаго, рука́ми держи́ши, Всенепоро́чная Влады́чице, вся́ Содержа́щаго, сего́ ра́ди Тя́, ве́рнии, по до́лгу сла́вим.

Конда́к, гла́с 6.

И́же по Христе́ усе́рдно подвиза́вся, в седи́нах до́блих му́жество стяжа́, му́чениче Ерме́е, беззако́нных злоумышле́ния попра́в Христо́вою си́лою, от чаро́вных напое́ний невреди́мь пребы́сть, зовы́й: Бо́г е́сть со мно́ю, и никто́же на мя́.

Пе́снь 7.

Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отце́в Бо́же, благослове́н еси́.

К Бо́гу зря́, могу́щему спасти́, ума́ пра́востию, претерпе́л еси́ боле́зни, Ерме́е, до́бляго твоего́ те́ла, воспева́я: оте́ц на́ших Бо́же, благослове́н еси́.

Кропле́нием твои́х крове́й о́гнь угаси́л еси́ безбо́жия, в пла́мень же вше́д, не опали́лся еси́ отню́д, воспева́я, пребога́те: оте́ц на́ших Бо́же, благослове́н еси́.

Блажи́т тя́ вся́ка Це́рковь, зря́щи до́блести твоя́, благода́ть же чуде́с и побе́дныя по́чести, я́же подаде́ тебе́ Госпо́дь, му́чениче Ерме́е му́дре, све́тло подвиза́вшуся.

Богоро́дичен: Украси́лася еси́, Де́во добро́тою, кра́снаго Христа́ ро́ждши, на́м уподо́бльшася и вся́ сокруше́нныя к жи́зни возве́дша. Те́мже ве́рно Тя́ всегда́ сла́вим в пе́снех.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Беззако́нных веле́ние, зако́ном укрепля́емь и́стинным, страда́льче Ерме́е, ра́дуяся, преоби́дел еси́: и по́двиги вели́кими, блаже́нне, терпя́, прия́л еси́ я́же в Вы́шних жили́ща во ве́ки.

Не ужаса́юся вся́каго боле́зней веле́ния пребыва́ема, ни принесу́ че́сти не су́щим бого́м, — взыва́л еси́, всеблаже́нне, — еди́наго то́кмо чту́ Иису́са Го́спода, при Понти́йстем Пила́те распе́ншагося.

Пожре́тися ше́л еси́, я́ко овча́ незло́биво, му́чениче Ерме́е, за Поже́ршагося на́с ра́ди, я́ко овча́те, и же́ртвы ме́рзкия вся́ от земли́ отъе́мшаго, те́мже во хвале́нии досто́йно тя́ пое́м.

Богоро́дичен: Яви́лася еси́ ши́рши небе́с, вмести́вшая Бо́га во утро́бе, Его́же при́сно моли́ утесня́ющаго мя́ ны́не греха́ изба́вити, Де́во, я́ко да, просте́рся де́лы благоче́стия, ве́рно Тя́ ублажа́ю.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Ви́дети сподо́бился еси́, разреши́вся от пло́ти, страстоте́рпче прехва́льне, блага́я, я́же тебе́ угото́ва Бо́г и с тобо́ю пострада́вшим и низло́жшим лука́ваго. С ни́миже на́м спасти́ся Го́спода моли́, му́чениче Ерме́е достохва́льне.

Красе́н тво́й ви́д и пре́жде твоего́ страда́ния, красне́йши яви́ся, му́дре по по́двизех чу́дных, а́нгельскою све́тлостию укра́шен, сла́вне. Те́мже и к кра́сным восте́кл еси́ черто́гом, побе́дными венцы́ удобре́н.

Во́инство преоби́дел еси́ земно́е, Царю́ Небе́сному во́инствуеши, му́чениче му́дре, Его́же си́лою кре́пкою де́монския полки́ вся́ потреби́л еси́ держа́вно и побе́дными венцы́ зако́нно увя́злся еси́, о на́с моли́ всегда́.

Па́мять твоя́ наста́ светоза́рная, на́ша мы́сли просвеща́ющи луча́ми по́двиг твои́х тве́рдых, в не́йже мо́лим тя́: име́яй дерзнове́ние ко Христу́, моли́ непреста́нно улучи́ти на́м ми́лость в Де́нь Су́дный.

Богоро́дичен: Обо́лкся в мя́, про́йде из Тебе́ Бо́г, нетле́ния облече́ мя́ оде́ждою, злы́м нра́вом обна́жшася Боже́ственныя оде́жды, Богороди́тельнице Влады́чице, все́х челове́ков прибе́жище, му́чеников венцено́сных утвержде́ние и стена́ и А́нгелов ра́дование.