Канон святому мученику Евпсихию Кесарийскому

Припев: Святы́й му́чениче Евпси́хие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 22 апреля (09 апреля ст. ст.)

Глас 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Страда́ния благоду́шно, блаже́нне, твоя́, Евпси́хие му́чениче, поя́, молю́ тя́: ко Го́споду име́я дерзнове́ние, ду́шу мою́ страсте́й мучи́тельства исхити́.

У́м тво́й, манове́нием е́же к Бо́гу, презре́ вся́ жития́ кра́сная, блаже́нне, и ве́сь красе́н яви́ся, над страстьми́ ца́рствовав Евпси́хие.

Бы́сть вои́стинну терпели́в, егда́ му́ками искуша́шеся и боле́зньми, вся́ удивля́я безбо́жныя, и страда́лец и́стинен познава́емь.

Богоро́дичен: Пло́ти подо́бием роди́вся из Тебе́, Влады́ка обнови́ на́ше обветша́вшее, Отрокови́це, естество́ и ме́ртвыя небе́сны соде́ла.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Разу́мна су́ща пове́дают безу́мнии тебе́, злочести́вому кня́зю, безу́мно де́моном служа́щему.

На высоту́ муче́ния твоего́ возне́сшу ти́ ся́, а́нгел я́влься, тебе́ дерзнове́нна устроя́ет, страстоте́рпче Евпси́хие.

Поя́, пребы́л еси́ в темни́це, Бо́га и Го́спода испове́дая, храни́тель же Сего́ повеле́нием показу́яся.

Богоро́дичен: Пе́ние благода́рственно страда́льческий ли́к пое́т Тебе́, Отрокови́це Чи́стая, Твои́ми хода́тайствы победоно́сец бы́в.

Седа́лен, гла́с 1.

Благоду́шно до́брый соверши́в по́двиг, победи́л еси́ врага́ супоста́та, му́чениче, по́чести и чудеса́ от Бо́га прие́м. Те́мже вся́ ве́рных Це́рковь ублажа́ет тя́, в настоя́щий де́нь благохва́льно почита́ющи.

Сла́ва, и ны́не: Наста́ви ны́ на пу́ть покая́ния, укло́ньшияся при́сно к безпу́тием зо́л и Преблага́го прогне́вавшия Го́спода, Неискусобра́чная Благослове́нная Мари́е, прибе́жище отча́янных челове́ков, Бо́жие жили́ще.

Крестобогоро́дичен: Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Ра́дуяся, му́чениче, разда́л еси́ вся́ име́ния ни́щим, муче́ния бога́тство некра́домо и ра́дость нестаре́емую противостяжа́в.

Свяще́нно просвеща́емь, тму́ несвяще́нных ты́ обличи́л еси́, ну́дити искуша́ющих тя́, отвести́ ле́стию злоде́монскою.

И́же пре́лести прилежа́щии тебе́, неле́стными нра́вы украше́нному, дивля́хуся, источа́ющу живото́чныя словеса́, досточу́дне.

Богоро́дичен: Превы́шши си́л небе́сных Ты́ су́щи, плотски́х страсте́й вы́шший у́м мо́й, Де́во, покажи́.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Терпе́л еси́ плотски́я я́звы терпели́вно, обе́шен бы́в, блаже́нне Евпси́хие, прии́скренно Влады́це всея́ тва́ри.

Пое́ши Христу́, по ре́бром, му́чениче, стру́жемь и ко́жи одира́емь, му́жественным по́мыслом терпели́внейший.

Пою́щу Бо́гу, явля́ется тебе́ а́нгел, к подвиго́м обуча́я тя́, я́же, о Го́споде возмога́емь, соверши́л еси́.

Богоро́дичен: О и́же на Тя́ наде́жды все́х, Влады́чице, возложи́вших при́сно моли́ся, я́ко да бу́дущаго осужде́ния изба́вимся.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Обурева́ет у́бо муче́ний тягота́, не мо́жет же погрузи́ти тя́, му́чениче: Христа́ бо и Бо́га Помо́щника име́л еси́ и Ко́рмчия, направля́юща тя́ ко приста́нищу ти́хому Своего́ Ца́рствия, Евпси́хие.

Красно́ твое́ воста́ние, му́чениче, душе́вное сопроти́вным показу́я, яви́лся еси́ те́м стра́шен, удивля́я терпе́нием о́нех зломы́слие, и прия́т от Христа́ подвиго́в побе́ды возме́здие.

Без пра́вды пролия́нною кро́вию погрузи́л еси́ ве́сь де́монский по́лк и злочести́вых мно́жество истопе́; ве́рных же напои́ся собо́р, Евпси́хие, бога́тно, святы́х му́ченик украше́ние.

Богоро́дичен: Испра́ви спа́дша мя́ всего́, я́ко страсте́м отве́рзшаго две́рь, и Твои́м благи́м хода́тайством к покая́ния вхо́дом введи́, и спаси́ мя́, все́х Спа́са ро́ждшая и Го́спода.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Собо́ром му́чеников причи́слился еси́ и лико́м боже́ственных безпло́тных, от безслове́сия страсте́й те́ло удержа́в, хра́бровал еси́ изря́дно, страда́льче Христо́в треблаже́нне.

О, до́брыя твоея́ ку́пли! Го́рстию бо кро́ве измени́л еси́ вы́шнее Ца́рство, му́дре, в не́мже и воспева́еши: благослове́н еси́, Го́споди Бо́же, во ве́ки.

Па́даеши, уязви́вся мече́м, му́чениче, и без ме́ры хва́лящагося велиа́ра спопира́еши и я́звами ссека́еши неисце́льно, твоему́ кре́пкому уму́ злообра́зно прирази́вшася.

Богоро́дичен: Го́ру Тя́ проро́к Дании́л Боже́ственным Ду́хом нарече́, Де́во, из нея́же ка́мень — Христо́с — без руку́ отсече́ся и сокруше́ние соде́ла истука́нных пре́лести.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Победи́тель мучи́телей и духо́в бы́л еси́ нечи́стых, ве́рных же челове́ков, страда́льче Евпси́хие, сла́ва и похвала́, тя́ восхваля́ющих свяще́нными пе́сньми и превознося́щих Христа́ во вся́ ве́ки.

Кесари́йстии свяще́ннии воспева́ют тя́ лю́дие, преблаже́нне: в то́м бо, му́чениче, лежа́, те́ло твое́ источа́ет исцеле́ний струи́, стра́сти потопля́ющия и ве́рных сердца́ ороша́ющия боже́ственно.

Вше́д му́жески в подвиго́в суди́ще, му́чениче, стро́ган бы́л еси́ да́же до члено́в и до самаго́ вну́тренняго строе́ния, но яви́лся еси́ ве́сь непрекло́нен, непоколеби́мь, те́м венцы́ прия́л еси́ побе́ды.

Богоро́дичен: Ми́лостивая Де́во, Я́же ми́лостиваго Сло́ва ро́ждши, немилосе́рдаго мя́ ту́не уще́дри, отча́яннаго прегреше́ньми безме́рными и не обраща́ющася, но в ле́ности житие́ ижди́вша.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

На дре́во воздви́жен бы́л еси́, стра́сть вообража́я Безстра́стнаго и стра́сти ума́лившаго благочести́вых за милосе́рдие, му́чениче Евпси́хие.

Ви́дено бы́сть чу́до ве́лие в твое́й кончи́не: вме́сто бо кро́ве млеко́ с водо́ю главе́ твое́й, отсе́чене бы́вшей, му́чениче, истече́.

Твои́ми удесы́, всеблаже́нне, Препросла́вленный еди́н Бо́г просла́вися в прославле́нии всесвяты́я твоея́ па́мяти, я́коже проре́кл еси́.

Дне́сь весе́лие в твое́й боже́ственней па́мяти Це́рковь познава́ет, Евпси́хие, в ню́же пою́щия тя́ вся́ спаса́й моли́твами твои́ми.

Богоро́дичен: Све́том мя́ покая́ния озари́, Де́во, греха́ но́щию омраче́ннаго и уны́ния мгло́ю спокрове́ннаго.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Страда̑нїѧ благодꙋ́шнѡ, бл҃же́нне, твоѧ̑, є҆ѵѱѵ́хїе мꙋ́чениче, поѧ̀, молю́ тѧ, ко гдⷭ҇ꙋ и҆мѣ́ѧ дерзнове́нїе, дꙋ́шꙋ мою̀ страсте́й мꙋчи́тельства и҆схитѝ.

Оу҆́мъ тво́й манове́нїемъ є҆́же къ бг҃ꙋ, презрѣ̀ всѧ̑ житїѧ̀ кра̑снаѧ, блаже́нне: и҆ ве́сь красе́нъ ꙗ҆ви́сѧ, надъ страстьмѝ ца́рствовавъ, є҆ѵѱѵ́хїе.

Бы́сть вои́стиннꙋ терпѣли́въ, є҆гда̀ мꙋ́ками и҆скꙋша́шесѧ и҆ болѣ́зньми, всѧ̑ ᲂу҆дивлѧ́ѧ безбѡ́жныѧ, и҆ страда́лецъ и҆́стиненъ познава́емь.

Пло́ти подо́бїемъ роди́всѧ и҆зъ тебє̀ влⷣка, ѡ҆бновѝ на́ше ѡ҆бветша́вшее, ѻ҆трокови́це, є҆стество̀, и҆ мє́ртвыѧ небє́сны содѣ́ла.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Разꙋ́мна сꙋ́ща повѣ́даютъ безꙋ́мнїи тебѐ ѕлочести́вомꙋ кнѧ́зю, безꙋ́мнѡ де́мѡнѡмъ слꙋжа́щемꙋ.

На высотꙋ̀ мꙋче́нїѧ твоегѡ̀ возне́сшꙋтисѧ, а҆́гг҃лъ ꙗ҆́вльсѧ, тебѐ дерзнове́нна ᲂу҆строѧ́етъ, страстоте́рпче є҆ѵѱѵ́хїе.

Поѧ̀ пребы́лъ є҆сѝ въ темни́цѣ, бг҃а и҆ гдⷭ҇а и҆сповѣ́даѧ, храни́тель же сегѡ̀ повелѣ́нїємъ показꙋ́ѧсѧ.

Бг҃оро́диченъ: Пѣ́нїе благода́рственнѡ страда́льческїй ли́къ пое́тъ тебѣ̀, ѻ҆трокови́це чⷭ҇таѧ, твои́ми хода́тайствы побѣдоно́сецъ бы́въ.

Сѣда́ленъ, гла́съ а҃.

Благодꙋ́шнѡ до́брый соверши́въ по́двигъ, побѣди́лъ є҆сѝ врага̀ сꙋпоста́та, мч҃ниче, по́чєсти и҆ чꙋдеса̀ ѿ бг҃а прїе́мъ. тѣ́мже всѧ̑ вѣ́рныхъ цр҃ковь ᲂу҆блажа́етъ тѧ̀, въ настоѧ́щїй де́нь благохва́льнѡ почита́ющи.

Сла́ва, и҆ ны́нѣ: Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе жили́ще.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Ра́дꙋѧсѧ, мч҃ниче, разда́лъ є҆сѝ всѧ̑ и҆мѣ̑нїѧ ни́щымъ, мꙋче́нїѧ бога́тство некра́домо и҆ ра́дость нестарѣ́емꙋю противостѧжа́въ.

Свѧще́ннѡ просвѣща́емь, тмꙋ̀ несвѧще́нныхъ ты̀ ѡ҆бличи́лъ є҆сѝ, нꙋ́дити и҆скꙋша́ющихъ тѧ̀, ѿвестѝ ле́стїю ѕлоде́мѡнскою.

И҆̀же пре́лести прилѣжа́щїи тебѣ̀, неле́стными нра́вы ᲂу҆краше́нномꙋ дивлѧ́хꙋсѧ, и҆сточа́ющꙋ животѡ́чнаѧ словеса̀, досточꙋ́дне.

Бг҃оро́диченъ: Превы́шши си́лъ нбⷭ҇ныхъ ты̀ сꙋ́щи, плотски́хъ страсте́й вы́шшїй ᲂу҆́мъ мо́й, дв҃о, покажѝ.

Пѣ́снь є҃.

І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Терпѣ́лъ є҆сѝ плотскі̑ѧ ꙗ҆́звы терпѣли́внѡ, ѡ҆бѣ́шенъ бы́въ, бл҃же́нне є҆ѵѱѵ́хїе, прїи́скреннѡ влⷣцѣ всеѧ̀ тва́ри.

Пое́ши, хрⷭ҇тꙋ̀, по ре́брѡмъ, мч҃ниче, стрꙋ́жемь, и҆ ко́жи ѡ҆дира́емь, мꙋ́жественнымъ по́мысломъ терпѣли́внѣйшїй.

Пою́щꙋ бг҃ꙋ, ꙗ҆влѧ́етсѧ тебѣ̀ а҆́гг҃лъ, къ подвигѡ́мъ ѡ҆бꙋча́ѧ тѧ̀, ꙗ҆̀же ѡ҆ гдⷭ҇ѣ возмога́емь соверши́лъ є҆сѝ.

Бг҃оро́диченъ: Ѡ҆ и҆̀же на тѧ̀ надє́жды, всѣ́хъ влⷣчце, возложи́вшихъ, при́снѡ моли́сѧ, ꙗ҆́кѡ да бꙋ́дꙋщагѡ ѡ҆сꙋжде́нїѧ и҆зба́вимсѧ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Ѡ҆бꙋрева́етъ ᲂу҆́бѡ мꙋче́нїй тѧгота̀, не мо́жетъ же погрꙋзи́ти тѧ̀, мч҃ниче: хрⷭ҇та́ бо и҆ бг҃а помо́щника и҆мѣ́лъ є҆сѝ и҆ ко́рмчїѧ, направлѧ́юща тѧ̀ ко приста́нищꙋ ти́хомꙋ своегѡ̀ црⷭ҇твїѧ, є҆ѵѱѵ́хїе.

Красно̀ твоѐ воста́нїе, мч҃ниче, дꙋше́вное сопроти̑внымъ показꙋ́ѧ, ꙗ҆ви́лсѧ є҆сѝ тѣ̑мъ стра́шенъ, ᲂу҆дивлѧ́ѧ терпѣ́нїемъ ѻ҆́нѣхъ ѕломы́слїе, и҆ прїѧ́тъ ѿ хрⷭ҇та̀ подвигѡ́въ побѣ́ды возме́здїе.

Безъ пра́вды пролїѧ́нною кро́вїю, погрꙋзи́лъ є҆сѝ ве́сь де́мѡнскїй по́лкъ, и҆ ѕлочести́выхъ мно́жество и҆стопѐ: вѣ́рныхъ же напои́сѧ собо́ръ, є҆ѵѱѵ́хїе, бога́тнѡ, ст҃ы́хъ мч҃никъ ᲂу҆краше́нїе.

Бг҃оро́диченъ: И҆спра́ви спа́дша мѧ̀ всего̀, ꙗ҆́кѡ страсте́мъ ѿве́рзшаго две́рь, и҆ твои́мъ благи́мъ хода́тайствомъ къ покаѧ́нїѧ вхо́дѡмъ введѝ, и҆ спаси́ мѧ, всѣ́хъ сп҃са ро́ждшаѧ и҆ гдⷭ҇а.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Собо́рѡмъ мч҃никѡвъ причи́слилсѧ є҆сѝ, и҆ ликѡ́мъ бжⷭ҇твенныхъ безпло́тныхъ, ѿ безслове́сїѧ страсте́й тѣ́ло ᲂу҆держа́въ, хра́бровалъ є҆сѝ и҆зрѧ́днѡ, страда́льче хрⷭ҇то́въ треблаже́нне.

Ѽ до́брыѧ твоеѧ̀ кꙋ́пли! го́рстїю бо кро́ве и҆змѣни́лъ є҆сѝ вы́шнее црⷭ҇тво, мꙋ́дре, въ не́мже и҆ воспѣва́еши: бл҃гослове́нъ є҆сѝ, гдⷭ҇и бж҃е, во вѣ́ки.

Па́даеши ᲂу҆ѧзви́всѧ мече́мъ, мч҃ниче, и҆ безъ мѣ́ры хва́лѧщагосѧ велїа́ра спопира́еши, и҆ ꙗ҆́звами ссѣка́еши неисцѣ́льнѡ, твоемꙋ̀ крѣ́пкомꙋ ᲂу҆мꙋ̀, ѕлоѻбра́знѡ прирази́вшасѧ.

Бг҃оро́диченъ: Го́рꙋ тѧ̀ прⷪ҇ро́къ данїи́лъ бжⷭ҇твеннымъ дх҃омъ наречѐ, дв҃о: и҆зъ неѧ́же ка́мень хрⷭ҇то́съ без̾ рꙋкꙋ̀ ѿсѣче́сѧ, и҆ сокрꙋше́нїе содѣ́ла и҆стꙋка́нныхъ пре́лести.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене, бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Побѣди́тель мꙋчи́телей и҆ дꙋхѡ́въ бы́лъ є҆сѝ нечи́стыхъ, вѣ́рныхъ же человѣ́кѡвъ, страда́льче є҆ѵѱѵ́хїе, сла́ва и҆ похвала̀, тѧ̀ восхвалѧ́ющихъ свѧще́нными пѣ́сньми, и҆ превозносѧ́щихъ хрⷭ҇та̀ во всѧ̑ вѣ́ки.

Кесарі́йстїи свѧще́ннїи воспѣва́ютъ тѧ̀ лю́дїе, пребл҃же́нне: въ то́мъ бо, мч҃ниче, лежѧ̀ тѣ́ло твоѐ, и҆сточа́етъ и҆сцѣле́нїй стрꙋи̑, стра̑сти потоплѧ́ющыѧ, и҆ вѣ́рныхъ сердца̀ ѡ҆роша́ющыѧ бжⷭ҇твеннѡ.

Вше́дъ мꙋ́жески въ подвигѡ́въ сꙋди́ще, мч҃ниче, стро́ганъ бы́лъ є҆сѝ да́же до членѡ́въ, и҆ до самагѡ̀ внꙋ́треннѧгѡ строе́нїѧ, но ꙗ҆ви́лсѧ є҆сѝ ве́сь непрекло́ненъ, непоколеби́мь: тѣ́мъ вѣнцы̀ прїѧ́лъ є҆сѝ побѣ́ды.

Бг҃оро́диченъ: Ми́лостиваѧ дв҃о, ꙗ҆́же ми́лостиваго сло́ва ро́ждши, немилосе́рдаго мѧ̀ тꙋ́не ᲂу҆ще́дри, ѿча́ѧннаго прегрѣше́ньми безмѣ́рными и҆ не ѡ҆браща́ющасѧ, но въ лѣ́ности житїѐ и҆жди́вша.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

На дре́во воздви́женъ бы́лъ є҆сѝ, стрⷭ҇ть воѡбража́ѧ безстра́стнагѡ, и҆ стра̑сти ᲂу҆ма́лившагѡ благочести́выхъ за милосе́рдїе, мч҃ниче є҆ѵѱѵ́хїе.

Ви́дѣно бы́сть чꙋ́до ве́лїе въ твое́й кончи́нѣ: вмѣ́стѡ бо кро́ве млеко̀ съ водо́ю, главѣ̀ твое́й ѿсѣ́ченѣ бы́вшей, мч҃ниче, и҆стечѐ.

Твои́ми ᲂу҆десы̀, всеблаже́нне, препросла́вленный є҆ди́нъ бг҃ъ просла́висѧ, въ прославле́нїи всесвѧты́ѧ твоеѧ̀ па́мѧти, ꙗ҆́коже проре́клъ є҆сѝ.

Дне́сь весе́лїе въ твое́й бжⷭ҇твеннѣй па́мѧти це́рковь познава́етъ, є҆ѵѱѵ́хїе, въ ню́же пою́щыѧ тѧ̀ всѧ̑ спаса́й моли́твами твои́ми.

Бг҃оро́диченъ: Свѣ́томъ мѧ̀ покаѧ́нїѧ ѡ҆зарѝ, дв҃о, грѣха̀ но́щїю ѡ҆мраче́ннаго, и҆ ᲂу҆ны́нїѧ мгло́ю спокрове́ннаго.

Свя­той му­че­ник Ев­пси­хий ро­дил­ся в го­ро­де Ке­са­рии Кап­па­до­кий­ской и по­лу­чил хри­сти­ан­ское вос­пи­та­ние от сво­их знат­ных ро­ди­те­лей.

Во вре­мя цар­ство­ва­ния Юли­а­на От­ступ­ни­ка (361–363) свя­той Ев­пси­хий всту­пил в хри­сти­ан­ский брак.

В Ке­са­рии то­гда на­хо­дил­ся язы­че­ский храм бо­ги­ни Фор­ту­ны, очень по­чи­та­е­мой Юли­а­ном От­ступ­ни­ком. В то вре­мя, как шло брач­ное тор­же­ство Ев­пси­хия, языч­ни­ки устро­и­ли жерт­во­при­но­ше­ние бо­гине Фор­туне.

Свя­той Ев­пси­хий вос­пла­ме­нил­ся рев­но­стью о Гос­по­де, со­брал на­род и раз­ру­шил язы­че­ский храм. Он знал, что это неми­ну­е­мо по­вле­чет за со­бой ка­ру. Свя­той Ев­пси­хий раз­дал все свое име­ние ни­щим и при­го­то­вил­ся к му­че­ни­че­ско­му по­дви­гу.

Разъ­ярен­ный им­пе­ра­тор Юли­ан об­ру­шил свой гнев не толь­ко на свя­то­го Ев­пси­хия, но и на все на­се­ле­ние это­го го­ро­да. Од­них граж­дан он каз­нил, бо­лее по­чет­ных от­пра­вил в из­гна­ние; хри­сти­ан­ское ду­хо­вен­ство бы­ло взя­то на во­ен­ную служ­бу, а у церк­вей от­ня­то иму­ще­ство. Го­род был ли­шен на­зва­ния Ке­са­рия (то есть Цар­ствен­ный) и об­ра­щен в про­стое се­ле­ние с преж­ним на­зва­ни­ем Ма­за, а жи­те­ли об­ло­же­ны тя­же­лой да­нью. Им­пе­ра­тор угро­жал со­всем уни­что­жить го­род, ес­ли жи­те­ли вме­сто уни­что­жен­но­го не по­стро­ят но­вый язы­че­ский храм.

Свя­то­го Ев­пси­хия Юли­ан ве­лел лю­бы­ми му­че­ни­я­ми при­ну­дить при­не­сти жерт­ву идо­лам. В те­че­ние мно­гих дней свя­то­го стра­даль­ца ис­тя­за­ли на ви­се­ли­це, а так­же же­лез­ны­ми ког­тя­ми. Но ве­ра его бы­ла твер­да, и су­дья от­дал при­ка­за­ние усечь му­че­ни­ка ме­чом († 362). В то вре­мя Юли­ан, от­прав­ля­ясь в по­ход на пер­сов, про­хо­дил через Кап­па­до­кию и при­бли­зил­ся к Ке­са­рии. Го­ро­ду угро­жа­ла опас­ность, так как им­пе­ра­тор на­ме­ре­вал­ся ра­зо­рить его до ос­но­ва­ния. То­гда ар­хи­епи­скоп го­ро­да, свя­ти­тель Ва­си­лий Ве­ли­кий († 379; па­мять 1 ян­ва­ря), воз­да­вая Юли­а­ну честь как вла­сти­те­лю, вы­шел ему на­встре­чу и под­нес три яч­мен­ных хле­ба, ка­ки­ми пи­тал­ся сам. Им­пе­ра­тор ве­лел ору­же­нос­цам взять хле­бы, а свя­ти­те­лю Ва­си­лию дать горсть се­на со сло­ва­ми: "Ты дал нам яч­мень, скот­скую пи­щу, по­лу­чи же от нас се­но". Свя­ти­тель от­ве­тил: "Мы, царь, при­нес­ли те­бе то, чем са­ми пи­та­ем­ся, ты же дал нам пи­щу скот­скую; ты на­сме­ха­ешь­ся над на­ми, ибо не мо­жешь вла­стью сво­ей пре­тво­рить се­но в хлеб – есте­ствен­ную пи­щу че­ло­ве­че­скую". Юли­ан гнев­но от­ве­тил: "Знай, что этим се­ном я бу­ду кор­мить те­бя, ко­гда воз­вра­щусь сю­да из Пер­сии. Я разо­рю этот го­род до ос­но­ва­ния и ме­сто его вспа­шу плу­гом и об­ра­щу в по­ле. Ибо мне из­вест­но, что это по тво­е­му со­ве­ту на­род дерз­нул ра­зо­рить изо­бра­же­ние и храм Фор­ту­ны".

По­сле это­го им­пе­ра­тор про­дол­жил путь, но вско­ре по­гиб во вре­мя по­хо­да на пер­сов. В 363 го­ду он был убит свя­тым ве­ли­ко­му­че­ни­ком Мер­ку­ри­ем (па­мять 24 но­яб­ря).

По­сле его ги­бе­ли хри­сти­ане го­ро­да Ке­са­рии воз­двиг­ли пре­крас­ную цер­ковь над гро­бом свя­то­го Ев­пси­хия и от его мо­щей по­лу­ча­ли по­мощь и ис­це­ле­ния.

См. так­же: "Стра­да­ние свя­то­го му­че­ни­ка Ев­пси­хия" в из­ло­же­нии свт. Ди­мит­рия Ро­стов­ско­го.