Канон святому преподобному Драгутину, в иночестве Феоктисту, Сербскому

Припе́в: Преподо́бне о́тче Феокти́сте, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 12 ноября (30 октября ст. ст.)

Глас 7.

Пе́снь 1.

Ирмо́с: От стру́й Чермна́го сте́ну сотво́ршему лю́дем и покры́вшему глубино́ю фарао́на со всево́инством, пои́м Го́сподеви, сла́вно бо просла́вися.

Преподо́бнаго Феокти́ста, уго́дника Твоего́, пе́ти отве́рзи ми́, Христе́, устне́ и разори́ о́блак неве́дения моего́.

Разу́мно в коне́ц уклони́вся бесо́вския тьмы́ и мглы́ страсте́й, сочета́лся еси́ ли́ку мона́шествующих, соверши́в тече́ние твоего́ му́жества.

Ему́же служи́л еси́, Христу́, моли́ся вы́ну, да изба́вит от зла́ и просвети́т вся́, пою́щия тя́.

Богоро́дичен: Превы́шшую Херуви́м, высоча́йшу Небе́с, лу́чшую тва́ри, му́дрых му́чеников огражде́ние, еди́ну Богоро́дицу пе́сньми почти́м.

Пе́снь 3.

Ирмо́с: На вода́х зе́млю основа́вый, Сло́ве, Христе́ Бо́же, и на́ша сердца́ сла́вити Тя́ утверди́.

Пронза́емь жела́нием чистоты́, ца́рское владе́ние премени́л еси́, возлюби́в па́че сладча́йшее А́нгельское подо́бие.

Оте́честву своему́ ве́рен блюсти́тель бы́л еси́, отгоня́я от него́ вся́ ересе́й па́губная уче́ния.

Достохва́льне Феокти́сте блаже́нне, моли́ Христа́ Бо́га исцеле́ние и спасе́ние да́ти все́м, с ве́рою к тебе́ притека́ющим и в по́мощь тя́ призыва́ющим.

Богоро́дичен: Родила́ еси́ без се́мене Бо́га Спа́са и пребыла́ еси́ па́ки Де́ва, стра́нно чу́до. Те́м Тя́, Ма́терь Емману́илеву, благоче́стно испове́дуем.

Седа́лен, гла́с 2:

О́браз бы́в и́стиннаго покая́ния и смире́ния, совокупи́лся еси́ ли́ку преподо́бных оте́ц, с ни́миже помина́й, мо́лим тя́, и на́с, и вся́ пою́щия и хва́лящия тя́.

Богоро́дичен: Ты́ же́нское поползнове́ние испра́вила еси́, ро́ждши Сло́ва Христа́, исправля́юща низве́рженныя, и ве́рных утвержде́ние Ты́ еси́, мы́ же наде́ждею Твое́ю крепи́мся и любо́вию Тя́ непреста́нно сла́вим.

Пе́снь 4.

Ирмо́с: Услы́шах слу́х Тво́й, Го́споди, я́ко яви́лся еси́ на земли́, за е́же спасти́ ны́, те́м вопие́м: Сла́ва си́ле Твое́й, Го́споди.

О́тче Феокти́сте приснопа́мятне, не преста́й приле́жно моли́ти о на́с, да изба́вимся от вся́кия ско́рби твои́ми моли́твами.

Боголе́пно сконча́в житие́ твое́ на земли́, восприи́м а́нгельское подо́бие, жене́ же и сы́ну своему́ Владисла́ву сове́товал еси́ разу́мно жи́ти и оте́чество блюсти́.

Неподви́жима и кре́пка тя́ столпа́ ве́дуще, се́ дне́сь, вси́ лю́дие, му́жи и жены́, ста́рцы со младе́нцы, вся́к во́зраст и вся́ко состоя́ние, све́тло тя́ пра́зднуем.

Богоро́дичен: Апо́столов ра́дость, преподо́бных же удобре́ние Тя́, Богоро́дице, мо́лим ве́рно: ра́дости ве́чныя сподо́би ны́, пою́щия Тя́ непреста́нно.

Пе́снь 5.

Ирмо́с: У́тренюет ду́х мо́й к Тебе́, Бо́же, зане́ Све́т еси́ и Твоя́ повеле́ния бы́ша исцеле́ния рабо́м Твои́м, Человеколю́бче.

А́ще и во бра́ке бы́л еси́, но благослове́нное целому́дрие соблю́л еси́, отбега́в сла́дости привре́менныя.

Глаго́л Бо́жий нося́ в се́рдцы свое́м, и́мже жи́л еси́, и́мже и благосла́вно тече́ние преподо́бно сконча́л еси́.

Огня́, и му́ки, и вся́каго искуше́ния изба́ви мольба́ми твои́ми вся́, светоно́сную па́мять твою́ соверша́ющия и благоче́стно тя́ блажа́щия.

Богоро́дичен: Мно́гими беда́ми содержи́маго и молво́ю греха́ бе́дствуемаго, наста́ви мя́ к безво́лненному стремле́нию тишины́ Ду́ха, Ты́ бо еси́ приста́нище христиа́н, те́м Тя́ пое́м во вся́ ве́ки.

Пе́снь 6.

Ирмо́с: Возопи́х, Го́споди, внегда́ скорбе́ти ми́ к Тебе́, углебо́х бо в тиме́нии глубины́ прегреше́ний мно́гих, и, я́влься, возведи́ мя́ от тли́.

Па́мять твоя́ возсия́ на́м дне́сь, све́том невеще́ственным просвеща́ющая сердца́ на́ша, моле́бно тя́ ве́рою восхваля́ющих.

Отце́в преподо́бных ли́ку сопричасти́вся, сконча́л еси́ ми́рно житие́ свое́, те́м ны́не с ни́ми на Небесе́х сликовству́еши.

Ю́ностныя преступле́ния и́стинным покая́нием упраздни́л еси́, слеза́ми же ду́шу очи́стив, преподо́бно усну́л еси́.

Богоро́дичен: Изба́ви мя́ вся́каго сопроти́внаго прило́га змии́на, Ма́ти Де́во Чи́стая, и се́рдце мое́ просвети́ ве́рою Тя́ сла́вящаго, Всенепоро́чную.

Конда́к, гла́с 7:

Ве́рою и́стинною укра́шен бы́в, просия́л еси́ доброде́тельми, хра́мы и оби́тели ще́дро помога́л еси́, богоми́лов же душетли́тельную е́ресь искорени́л еси́, сего́ ра́ди вопие́м ти́: преподо́бне Феокти́сте, блаже́нне, со все́ми преподо́бными предстоя́ Христу́, моли́ся о все́х на́с.

И́кос:

Зако́н Бо́жий от души́ возлюби́в, зре́л еси́ к жи́зни гряду́щей, сосу́д бы́л еси́ доброде́тели, о че́сти земне́й и сла́сти небре́г, пло́ть же свою́, я́коже рабы́ню, ду́ху покори́л еси́, отста́вив тле́ную и мимотеку́щую сла́ву, восприя́л еси́ ца́рство нетле́нное, сего́ ра́ди вопие́м ти́: преподо́бне Феокти́сте, блаже́нне, со все́ми преподо́бными предстоя́ Христу́, моли́ся о все́х на́с.

Пе́снь 7.

Ирмо́с: А́нгелом о́троки в пещи́ спасы́й и пла́мень в ро́су и́м проложи́вый, благослове́н еси́, Го́споди, Бо́же оте́ц на́ших.

Фимиа́м благоуха́нен ты́ еси́, отгоня́яй злосмра́дие е́реси богоми́льския, тя́ велича́ем и приле́жно мо́лим: при́зри и ны́не на лю́ди вопию́щия: благослове́н еси́, Го́споди, Бо́же оте́ц на́ших.

Единонра́вен преподо́бным яви́лся еси́, не пощаде́в пло́ти свое́й любве́ ра́ди Боже́ственныя, ны́не же моли́ся за ны́ песнопою́щия: благослове́н еси́, Го́споди, Бо́же оте́ц на́ших.

О́др име́л еси́ гро́б, ка́мением и те́рнием постла́ный, изнуря́я пло́ть свою́ любве́ ра́ди Бо́жия, душе́ю же всегда́ взыва́л еси́: благослове́н еси́, Го́споди, Бо́же оте́ц на́ших.

Богоро́дичен: Ро́ждшая Жи́знь, умертви́вшую сме́рть, живу́щий мо́й гре́х умертви́, Де́во Ма́ти Пречи́стая, да вы́ну Тя́ вси́ велича́ем.

Пе́снь 8.

Ирмо́с: Пе́щь, дре́вле огне́м опаля́емую, Богочести́вии попра́ша о́троцы, не бо стра́ху мучи́телеву покори́шася, но, любо́вию же па́че Богоче́стия пали́ми, глаго́лаху: благослови́те, вся́ дела́ Госпо́дня, Го́спода.

Ко́ль велико́ отечестволю́бие твое́, ве́ми вси́, и́бо пре́жде сме́рти свое́й жене́ и сы́ну Владисла́ву глаго́лал еси́: разу́мно жи́ти и оте́чество блюсти́, сла́ву же Бо́гу возноси́ти, вопию́ще: благослови́те, вся́ дела́ Госпо́дня, Го́спода.

Ты́ еси́ вели́чие на́ше и похвала́, Богому́дре Феокти́сте, от скве́рны богоми́льския тобо́ю свободи́хомся и научи́хомся пе́ти: благослови́те, вся́ дела́ Госпо́дня, Го́спода.

Иа́спис ду́хом бы́л еси́, просиява́ющий мно́гими доброде́тельми, ны́не же на Небесе́х непреста́нно вопие́ши: благослови́те, вся́ дела́ Госпо́дня, Го́спода.

Богоро́дичен: Кра́сну и избра́нну всечи́стую разуме́в Тя́ Сы́н Бо́жий, Всенепоро́чная, Сы́н Тво́й бы́сть, сы́ны сотвори́ благода́тию, Богоро́дицу Тя́ чту́щия.

Пе́снь 9.

Ирмо́с: Воплоще́ннаго Сло́ва безсе́менно от Тебе́ боголе́пно родила́ еси́, Де́во Богоро́дице, и Тя́ велича́ем.

Сто́лп доброде́телей яви́лся еси́, та́йно подвиза́лся и ко все́м милосе́рдствуя, помина́й на́с, твоя́ певцы́, да тя́ непреста́нно велича́ем.

Тво́й све́тлый пра́здник соверша́юще, мо́лим тя́, преподо́бне: моли́ся Христу́ Бо́гу, оте́чество твое́ сохрани́ти и ми́р дарова́ти ро́ду се́рбскому, да тя́ всегда́ велича́ем.

А́нгели дне́сь сликовству́ют с на́ми, в песнопе́нии па́мяти твое́й, ты́ же не забу́ди на́с, но твои́ми моле́нии от напа́стей, бе́д и скорбе́й спаси́ на́с, да тя́ вси́ велича́ем.

Богоро́дичен: Ору́жие на́ше и стена́ Ты́ еси́, Богоро́дице, и заступле́ние к Тебе́ прибега́ющим, Тебе́ и ны́не на моли́тву подвиза́ем, изба́ви на́с от вра́г на́ших, да Тя́ вси́ велича́ем.

Свети́лен: Свы́ше озаря́ем Боже́ственным све́том, просия́л еси́ доброде́тельми, еще́ в ми́ре бы́в, мона́шески подвиза́лся еси́, напосле́док восприи́м а́нгельский о́браз, к Све́ту невече́рнему преше́л еси́.

Богоро́дичен: Све́т ро́ждшая, Чи́стая, просвети́ о́чи души́ моея́, да не пости́гнет мя́ глубоча́йшая тьма́ грехо́вная, ниже́ глубина́ отча́яния да покры́ет мя́, но спаси́ мя́ и окорми́ ко приста́нищу Боже́ственнаго хоте́ния.

Святые Стефан Милютин, брат его Драгутин (в иночестве Феоктист) и мать их Елена

Свя­той Сте­фан был млад­шим сы­ном ко­ро­ля Сте­фа­на – Уро­ша I и вну­ком пер­во­вен­чан­но­го ко­ро­ля свя­то­го Сте­фа­на (па­мять 24 сен­тяб­ря). Он пра­вил Сер­би­ей с 1275 по 1320 год. Пре­стол Сте­фан Ми­лю­тин по­лу­чил от стар­ше­го бра­та сво­е­го Дра­гу­ти­на, вер­но­го хри­сти­а­ни­на, ко­то­рый по­сле недол­го­го цар­ство­ва­ния пе­ре­дал власть бра­ту, а сам, воз­лю­бив от­шель­ни­че­ство, за­тво­рил­ся в Сре­ме, где со­вер­шал тай­ные по­дви­ги в яме-мо­ги­ле, вы­ко­пан­ной соб­ствен­но­руч­но. В сво­ей пра­вед­ной жиз­ни свя­той Дра­гу­тин мно­го тру­дил­ся над об­ра­ще­ни­ем к ис­тин­ной ве­ре ере­ти­ков-бо­го­милов. Кон­чи­на его по­сле­до­ва­ла 2 мар­та 1316 го­да.

Свя­той Сте­фан Ми­лю­тин, став ко­ро­лем, му­же­ствен­но, сло­вом и де­лом, ча­сто с ору­жи­ем в ру­ках, за­щи­щал пра­во­слав­ных сер­бов и дру­гие еди­но­вер­ные на­ро­ды от мно­го­чис­лен­ных вра­гов. Бла­го­че­сти­вый Сте­фан не за­бы­вал бла­го­да­рить Гос­по­да за все Его бла­го­де­я­ния. Им по­стро­е­но бо­лее 40 хра­мов, мно­же­ство мо­на­сты­рей и стран­но­при­им­ных до­мов. Осо­бен­но за­бо­тил­ся свя­той об афон­ских мо­на­сты­рях.

Ко­гда серб­ское ко­ролев­ство па­ло, мо­на­сты­ри оста­лись оча­га­ми на­цио­наль­ной куль­ту­ры и пра­во­сла­вия в серб­ском на­ро­де. Свя­той Сте­фан скон­чал­ся 29 ок­тяб­ря 1320 го­да и по­гре­бен в Бань­ской оби­те­ли. Через два го­да бы­ли от­кры­ты его нетлен­ные мо­щи.

Свя­тая Еле­на, бла­го­че­сти­вая мать сво­их свя­тых сы­но­вей, по смер­ти му­жа всю жизнь по­свя­ти­ла бо­го­угод­ным де­лам: стро­и­ла до­ма для об­ни­щав­ших по­се­лян, устра­и­ва­ла оби­те­ли для же­ла­ю­щих жить в чи­сто­те и дев­стве. Близ го­ро­да Спи­ча она воз­двиг­ла Ре­че­ский мо­на­стырь и на­де­ли­ла его уго­дья­ми. Пе­ред сво­ей кон­чи­ной свя­тая Еле­на при­ня­ла ино­че­ство и ото­шла ко Гос­по­ду 8 фев­ра­ля 1306 го­да.