Канон святому преподобному Иоанну Солунскому

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Страсте́й мя́ треволне́нием всегда́ смуща́ема и молво́ю помышле́ний ны́не потопля́ема, твое́ю моли́твою, преподо́бне, к безстра́стия устремле́нию и к спаси́тельному приста́нищу, блаже́нне Иоа́нне, упра́ви.

Прело́жся произволе́нием, преподо́бне, к небеси́ вои́стинну, а́нгельски, о́тче, на земли́ пожи́л еси́, умертви́в твое́ мудрова́ние плотско́е воздержа́нием, те́мже Бо́жие жили́ще яви́лся еси́, Иоа́нне чу́дне.

Я́же па́че ума́ получи́ти, блаже́нне, возжеле́в кра́сных, наста́вника обре́л еси́, к подвиго́м тя́ боже́ственным воздвиза́юща, Иоа́нне богому́дре, Григо́рия сла́внаго, его́же стопа́м после́довал еси́.

Богоро́дичен: Сы́й со Отце́м и Ду́хом, Соприсносу́щное и Единоро́дное Сло́во из Тебе́ яви́ся на земли́ я́ко Челове́к, Богоро́дице Мари́е, и ми́р ве́сь спасе́, пе́снь Го́сподеви воспева́ющий.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Трезве́нием ума́ небе́сныя добро́ты зря́, и ника́коже печа́льми взя́лся еси́ ве́щными, крилы́ же облегчава́емь нестяжа́ния, о́тче, ве́сь преложе́н бы́л еси́.

Безмо́лвия рачи́тель бы́в, любомолча́ннаго па́стыря Григо́рия, Иоа́нне треблаже́нне, я́же в житии́ смуще́ния усе́рдно оста́вил еси́ и моли́твами непреста́нными боже́ственную тишину́ улучи́л еси́.

Зако́ну Ду́ха себе́, богому́дре, повину́л еси́, проти́ву Сему́ борю́щийся зако́н умертви́в тве́рдыми воздержа́нии, и поще́нием, и моли́твами приле́жными, и бде́нии, блаже́нне.

Богоро́дичен: Я́же к на́м све́тлая Царю́ющаго все́ми ве́ки непроходи́мая две́рь Ты́ показа́лася еси́ вои́стинну, е́юже Са́м про́йде, запеча́тану па́ки оста́вль Тя́, Пренепоро́чная.

Седа́лен, гла́с 1.

Погре́б лука́вая де́монов ловле́ния воздержа́нии мно́гими и мольба́ми, о́тче, ме́ртв во гро́бе лежа́, нетле́нен пребы́л еси́. Те́мже, ра́дующеся, всесвяту́ю твою́ па́мять пра́зднуем, с весе́лием се́рдца Христа́ велича́юще.

Сла́ва, и ны́не, богоро́дичен: Безневе́стная Чи́стая Богоро́дице Де́во, еди́на ве́рных Предста́тельнице и покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми.

Крестобогоро́дичен: Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Терпе́ния ка́мень показа́лся еси́, блаже́нне, сопроти́вными волна́ми всегда́ бие́мь, ника́коже благоче́стия коле́бля мы́сли. Те́мже тя́ Влады́ка, я́коже прече́стен ка́мень, в сокро́вищах ве́чных положи́.

Тя́ Оте́ц щедро́т прия́т, я́ко и́скренно Сего́ возлюби́вша и в за́поведех Его́, о́тче, пребыва́юща и, сы́на прича́стника благода́тию сотвори́в, присносу́щныя тя́ сла́вы, Иоа́нне богому́дре, сподо́би.

Я́ко ми́лостив и смиреному́др, я́ко кро́ток, я́ко любве́ испо́лнен и ве́ры, и наде́ждею твою́ ду́шу име́я, Иоа́нне, утвержде́нну, просия́л еси́ и сло́вом, и де́лы посреди́ мона́хов, ходя́ в жи́зни, приснопа́мятне.

Богоро́дичен: Ты́ ве́рным похвала́ еси́, Безневе́стная, Ты́ заступле́ние, Ты́ прибе́жище христиа́н, стена́ и приста́нище, к Сы́ну бо Твоему́ мольбы́ но́сиши, Всенепоро́чная, и спаса́еши от бе́д ве́рою и любо́вию Богоро́дицу чи́сту Тя́ зна́ющих.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Я́коже незло́бива а́гнца, на зла́це воздержа́ния воспита́ема, тя́ Па́стырь Вели́кий во дворы́ ве́чныя всели́, Иоа́нне блаже́нне, и десны́м свои́м овца́м соприча́стника, преподо́бне, показа́.

Дневну́ю тяготу́, о́тче, и ва́р кре́пко поне́сл еси́, доброде́телей боже́ственных виногра́д до́бре де́лав. Те́мже в ве́чер жите́йскаго отше́ствия мзду́ прия́л еси́ досто́йну.

С по́стническим со́нмом, о́тче, всели́тися вои́стинну сподо́бился еси́ и с пра́ведных ли́ком ра́доватися тебе́ прибы́сть, виде́нием и де́льным любому́дрием, отбе́гшу ве́щи, прехва́льне.

Богоро́дичен: Умерщвле́ннаго, Де́во, жа́лом сме́рти и преступле́ния, воскреси́ мя́, жи́знь заче́ншая несозда́нную и ро́ждшая ми́ру Изба́вителя и Царя́, и к све́ту наста́ви, Чи́стая.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Сле́з твои́х ка́плями страсте́й изсуши́л еси́ пучи́ну и всю́ мы́сленнаго врага́ попра́л еси́ некре́пкую си́лу, Иоа́нне блаже́нне, от Христа́ укрепля́емь.

Я́ко светлосия́нно тя́ зла́то искуше́но, пресла́вне, воздержа́ния огне́м Христо́с положи́, Ца́рь нетле́нный, в нетле́нных, о́тче, сокро́вищах ве́чныя жи́зни.

Я́ко со́лнце, на земли́ доброде́тельми сия́юща, Григо́рия обре́т, души́ твоея́ о́чи того́ сия́ньми просве́щь слове́сными, светле́йша показа́лся еси́ звезда́.

Богоро́дичен: Селе́ние Бо́жие боже́ственно вои́стинну и прече́стно, воспое́м благоче́стно Мари́ю Пречи́стую: Бо́га бо вмести́, прие́мши Невмести́маго и Непостижи́маго.

Конда́к, гла́с 4.

Воздержа́нием, о́тче, житие́ украси́в, и пло́ть умертви́л еси́, те́мже и победи́л еси́ вра́жия прило́ги, преблаже́нне, и преше́л еси́ к Бо́гу в безско́рбный и ве́чный живо́т, я́ко досто́ин насле́дник, Иоа́нне, Ему́же моли́ся спасти́ся на́м.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Судии́ второ́е помышля́я прише́ствие, от о́чию души́ со́н отлага́л еси́, му́дре, уны́ния и, спаса́емь, пе́л еси́: оте́ц на́ших Бо́же, благослове́н еси́.

От млады́х ногте́й благу́ю ча́сть избра́л еси́, о́тче му́дре, рабо́тати Го́сподеви со стра́хом и Сего́ соверша́ти оправда́ния: оте́ц на́ших Бо́же, благослове́н еси́.

Духо́вных испо́лнена дне́й бы́вша, я́ко пшени́цу зре́лу, в вы́шних жи́тницах Бо́г Тя́, богоно́сне, положи́, пою́ща: оте́ц на́ших Бо́же, благослове́н еси́.

Богоро́дичен: Яже еси́ ми́ру Госпожа́, Я́же Бо́га воплоще́нна поро́ждши, безу́мно порабо́тившуюся безме́стными грехи́ ду́шу мою́ спаси́, благослове́нная Чи́стая, да славосло́влю Тя́.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Я́ко ми́лоть Илиину́ благода́ть благора́сленно насле́довав, о́тче Иоа́нне, сла́внаго па́стыря твоего́, се́ю расто́ргнул еси́ сла́достей пучи́ну и, спасе́н бы́в, непотопле́н, яви́лся еси́ а́нгелом сограждани́н, с ни́ми взыва́я: лю́дие, превозноси́те Го́спода во ве́ки.

На́с ра́ди обнища́вшему Преблаго́му Го́споду, о́тче Иоа́нне, благоче́стно уподо́бился еси́, пти́цам равно́ нестяжа́ние содержа́л еси́ и бла́г ве́чных бога́тство стяжа́л еси́, воспева́я: свяще́нницы, благослови́те, лю́дие, превозноси́те Его́ во ве́ки.

К животу́ непреста́нному, к ра́дости нетле́нней, к весе́лию па́че ума́, пребога́те, преста́вился еси́, ра́дуяся, и к кра́сному благоле́пию, ко а́нгельскому пребыва́нию, вопия́: о́троцы, благослови́те, свяще́нницы, воспо́йте, лю́дие, превозноси́те Го́спода во ве́ки.

Богоро́дичен: Освя́щшися Ду́хом, Богоро́дице Пренепоро́чная, вои́стинну прия́ла еси́ во чре́ве Безнача́льнаго Сы́на и Присносу́щнаго, в Тебе́, Чи́стая, воплоща́ема на благодея́ние ве́рно пою́щим: о́троцы, благослови́те, свяще́нницы, воспо́йте, лю́дие, превозноси́те Его́ во ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Обнови́в ра́лом моли́твы, Иоа́нне, души́ твоея́ бразду́, доброде́телей сию́ насе́ял еси́ благоче́стия и живоно́сная се́мена. Те́мже исцеле́ний богоподо́бных и боже́ственных дарова́ний пожа́л еси́ кла́с, и́мже пита́еши пою́щия тя́.

Тече́ние сконча́в по́стное и ве́ру соблю́д, блаже́нне, я́ко вои́стинну испо́лнен во́зраста духо́внаго, пра́ведный вене́ц прия́т, богому́дре, от Христа́, и ны́не почи́л еси́ в жили́щах све́тлых с пра́ведными, пресла́вне.

Пожа́л еси́ твои́х боле́зней воздая́ния, преста́влься к соверше́нию неболе́зненному и чи́стому, вся́каго измене́ния и претворе́ния, несме́сну го́ршаго и сопроти́внаго преложе́ния: в не́мже всели́лся еси́, ве́рно тя́ пою́щих ко Влады́це, о́тче, помяни́.

Богоро́дичен: Отве́рженныя небе́снаго жития́ и па́дшия окая́нно в сме́рть, па́ки на́с, Ма́ти бы́вши Изба́вителя, призвала́ еси́, Пречи́стая, и к пе́рвому тещи́ сподо́била еси́ оте́честву. Те́мже Тя́, Богома́ти, непреста́нно велича́ем.