Канон святому преподобному Кассиану Римлянину

Припев: Преподо́бне о́тче Кассиа́не, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 13 марта (28 февраля ст. ст.)

Глас 2.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Венча́в Боже́ственными доброде́тельми, преподо́бне, житие́ твое́, Кассиа́не, к Бо́гу отше́л еси́, от Него́же на́м проси́ избавле́ния прегреше́ний, мо́лимся, соверша́ющим ве́рою свято́е твое́ преставле́ние.

Всеобра́зным манове́нием к Бо́гу все́х, достосла́вне, от стра́стных помышле́ний уклони́лся еси́ и све́т бы́л еси́, прича́стии невеще́ственными обожа́емь, препросла́вленнаго Го́спода поя́, тя́ просла́вльшаго.

Вра́чь бы́л еси́ душа́м, боже́ственными твои́ми уче́нии, Кассиа́не, управля́я мудрова́ния мона́шествующих благода́тию, и к жи́зни ве́чней наста́вил еси́. Сего́ ра́ди тя́ вси́ любо́вию почита́ем.

Богоро́дичен: Во чре́ве носи́вшую, Чи́стая, вси́ ве́мы: Бо́га бо, в пло́ть ме́ртвенную обле́кшася, па́че ума́ родила́ еси́, просвети́вшаго преподо́бных сосло́вие, препросла́вленнаго Го́спода, сла́вно бо просла́вися.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Звезду́ тя́, на высоте́ церко́вней возсия́вшую, просвеще́ние показа́ су́щим во тме́ Христо́с, всехва́льне, по́стников украше́ние, преподо́бне.

Кресту́ приобщи́вшемуся и ми́р просве́щшему, Кассиа́не, подо́бяся, распя́лся еси́ мирски́м страсте́м, кова́рствия бесо́в победи́в.

Му́дрости испо́лнися твое́ се́рдце, прему́дре, уче́ния бе́здну Святы́м источи́ Ду́хом, мона́хов стада́ напая́ющу.

Богоро́дичен: Исцели́, Всенепоро́чная, ду́шу мою́, молю́ся, изнемо́гшую страстьми́ и вся́кими настоя́нии зле́йших де́монов, боже́ственным хода́тайством Твои́м.

Седа́лен, гла́с 4.

Преподо́бен бы́в, Бо́гу возложи́лся еси́ и, просве́щься до́брыми ви́ды, Кассиа́не, я́ко со́лнце, облиста́л еси́ сия́нием боже́ственных твои́х уче́ний сердца́ все́х, чту́щих тя́, всегда́ просвеща́я. Но приле́жно моли́ Христа́ о и́же любо́вию те́пле восхваля́ющих тя́.

Сла́ва, и ны́не, богоро́дичен: Грехолюби́в сы́й, молю́ Тя́, Безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити: гре́шных бо Ты́ еси́ очище́ние, и спасе́ние ве́рных, и заступле́ние.

Крестобогоро́дичен: И́же во́лею на́с ра́ди распе́ншагося на дре́ве А́гница зря́щи, рыда́ющи, глаго́лаше, слезя́щи: что́ Ти́ безблагода́тный евре́йский собо́р воздаде́, и́же мно́гих и вели́ких, Сы́не Мо́й, даро́в наслажде́йся? Но воспева́ю Твое́, Бо́же Мо́й, долготерпе́ние.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

По́двиги твои́ми плотска́я покори́л еси́ игра́ния ду́ху, преподо́бне, и свяще́нными уче́нии твои́ми вся́ обнажи́л еси́ кова́рствия льсти́ваго и ловле́ния.

Умерщвля́емь во́лею от мирски́я ме́ртвости, бу́дущия жи́зни насле́дие прия́л еси́, Кассиа́не пресла́вне, зако́ны же написа́л еси́ мона́хов в наставле́ние и соверше́ние.

Всели́ся в ду́шу твою́ благода́ть Ду́ха и все́х вы́шша плотски́х мудрова́ний тя́ показа́, пребога́те, и льсти́ваго сете́й явле́нно.

Богоро́дичен: Безле́тнаго, в ле́то бы́вша, родила́ еси́ неизрече́нно, Всенепоро́чная, преподо́бныя просвети́вшаго, ве́рою пожи́вшия, и злонача́льнаго зми́я смири́вшаго.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Восхи́тился еси́, твои́ми доброде́тельми, богоприя́тне, носи́мь, и, ра́дуяся, дости́гл еси́ к небе́сным селе́нием, трудо́в по́чести досто́йно прие́мля.

Умо́м чи́стым ты́ взира́я добро́ту Христо́ву, стоя́л еси́ непрекло́нен в нощи́ и во дни́, пресла́вне, Боже́ственная явле́ния отту́ду прие́мля.

Сле́з тече́нии, богоно́се о́тче, напая́емь, я́ко дре́во высокове́твенно, прине́сл еси́ плоды́ исправле́ния, веселя́щая все́х боже́ственно помышле́ния.

Богоро́дичен: Из Тебе́ Жи́знь па́че ума́ возсия́вши, Де́во, врага́ умертви́, вся́ ны́ умертви́вшаго, и оживи́ ми́р, непреста́нно воспева́ющий Тя́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Путе́м те́сным, о́тче, ше́ствовал еси́, все́м же словесы́ твои́ми се́й показа́л еси́, и́мже до́бре ходя́щии, в ра́йскую широту́ вводи́ми быва́ют.

Жи́знь твоя́ преподо́бна бы́сть, и кончи́на блаже́нна и честна́, Кассиа́не о́тче на́ш, святы́х а́нгелов собесе́дниче.

Дрема́ние уны́ния отве́ргл еси́ и, пребдева́я в виде́ниих и дея́ниих, а́нгельски пожи́л еси́ на земли́, богоно́се, всеблаже́нне.

Богоро́дичен: Я́ко добру́, я́ко красну́ возлюби́в Тя́, добротворя́й Иису́с, Всенепоро́чная, из Тебе́ пло́тию ражда́ется и обожа́ет мя́ за милосе́рдие безме́рное.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Всегда́ воззре́ньми светле́йшими, богому́дре, обожа́емь, свети́льник яви́лся еси́ незаходи́мь, отню́дуже облиста́л еси́ сло́во спаси́тельное, все́х на́с ра́зумы просвеща́ющее, восхваля́ющих тя́.

Язы́к тво́й Ду́хом обощре́н, я́ве начерта́вший зако́н спаси́телен, и о́бразы изложи́, и́миже управля́ются вся́, всеблаже́нне, при́сно мона́шествующих стада́, ра́дующеся.

Ра́зумы, преподо́бне, спаси́тельныя и глаго́лы, неве́дение серде́чное отгоня́ющия, бога́тно источи́л еси́, о́тче богому́дре. Те́мже тя́ почита́ем ве́рно, всесвяту́ю соверша́юще па́мять твою́.

Богоро́дичен: Черто́г была́ еси́ Боже́ственныя сла́вы и престо́л огнезра́чен, на не́мже почи́ Сло́во, воплоще́нное за кра́йнюю благосты́ню. Того́ у́бо моли́, Чи́стая, уще́дрити и поми́ловати ны́.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Сия́я, я́коже звезда́, сло́вом и житие́м, Кассиа́не, просвеща́еши вся́ земны́я концы́, неве́дения изыма́я мглы́ и пе́ти повелева́я всегда́: благослови́те, вся́ дела́ Госпо́дня, Го́спода.

Заше́л еси́, у́мер, я́ко со́лнце, преблаже́нне, я́ко зарю́ же, оста́вил еси́ незаходи́ма словеса́ твоя́, просвеща́ющая ду́ши на́ша, ве́рою святу́ю твою́, преподо́бне, соверша́ющих па́мять.

Добро́ты мы́сленныя неизрече́нно наслажда́ешися, оста́вль тле́нное те́ло, и ви́дети сподо́бился еси́, я́же ви́дят, сла́вне, а́нгельская во́инства, пою́ще: благослови́те, вся́ дела́ Госпо́дня, Го́спода.

Богоро́дичен: Яви́лася еси́ небе́с ши́рши, Де́во, Его́же бо та́я не вмести́ша, несказа́нно вмести́вши и ро́ждши па́че смы́сла, сугу́ба су́ща Естество́м, еди́ну же иму́ща боголе́пно Ипоста́сь.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Кре́пость тебе́ дарова́ся от Бо́га и си́ла нача́ла отгони́ти мироде́ржца, те́мже до́блествовав вельми́, я́ко вои́стинну, о́тче богому́дре, лико́м счи́слился еси́ преподо́бных, ра́дуяся.

Я́ко ши́пок сладково́нен, на́с благоуха́ют богодухнове́нная словеса́ боже́ственнаго язы́ка твоего́: ты́ бо благоуха́ние бы́л еси́ на́с ра́ди Излия́вшагося за милосе́рдие и в пло́ть Обле́кшася, богоно́се всече́стне.

Па́мять твоя́, дне́сь преподо́бно возсия́вши, озаря́ет сердца́ восхваля́ющих твое́ а́нгельское житие́, Кассиа́не, в не́йже мо́лимся согреше́ний проще́ние дарова́ти все́м, помоли́ся.

Богоро́дичен: Гла́с Ти́ прино́сим Гаврии́лов, взыва́юще: ра́дуйся, трапе́зо, боже́ственный хле́б носи́вшая; ра́дуйся, непроходи́мая две́ре; ра́дуйся, ра́досте все́х спаса́емых, преподо́бных похвало́, Богоро́дице Присноде́во.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Вѣнча́въ бжⷭ҇твенными добродѣ́тельми, прпⷣбне, житїѐ твоѐ, кассїа́не, къ бг҃ꙋ ѿше́лъ є҆сѝ: ѿ негѡ́же на́мъ просѝ и҆збавле́нїѧ прегрѣше́нїй, мо́лимсѧ, соверша́ющымъ вѣ́рою ст҃о́е твоѐ преставле́нїе.

Всеѻбра́знымъ манове́нїемъ къ бг҃ꙋ всѣ́хъ, достосла́вне, ѿ стра́стныхъ помышле́нїй ᲂу҆клони́лсѧ є҆сѝ, и҆ свѣ́тъ бы́лъ є҆сѝ, прича̑стїи невеще́ственными ѡ҆божа́емь, препросла́вленнаго гдⷭ҇а поѧ̀, тѧ̀ просла́вльшаго.

Вра́чь бы́лъ є҆сѝ дꙋша́мъ, бжⷭ҇твенными твои́ми ᲂу҆чє́нїи, кассїа́не, ᲂу҆правлѧ́ѧ мꙋдрова̑нїѧ мона́шествꙋющихъ бл҃года́тїю, и҆ къ жи́зни вѣ́чнѣй наста́вилъ є҆сѝ: сегѡ̀ ра́ди тѧ̀ всѝ любо́вїю почита́емъ.

Бг҃оро́диченъ: Во чре́вѣ носи́вшꙋю, чⷭ҇таѧ, всѝ вѣ́мы: бг҃а бо въ пло́ть ме́ртвеннꙋю ѡ҆бле́кшасѧ па́че ᲂу҆ма̀ родила̀ є҆сѝ, просвѣти́вшаго прпⷣбныхъ сосло́вїе, препросла́вленнаго гдⷭ҇а, сла́внѡ бо просла́висѧ.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Ѕвѣздꙋ́ тѧ на высотѣ̀ цр҃ко́внѣй возсїѧ́вшꙋю, просвѣще́нїе показа̀ сꙋ́щымъ во тмѣ̀ хрⷭ҇то́съ, всехва́льне, по́стникѡвъ ᲂу҆краше́нїе, прпⷣбне.

Крⷭ҇тꙋ̀ приѡбщи́вшемꙋсѧ, и҆ мі́ръ просвѣ́щшемꙋ, кассїа́не, подо́бѧсѧ, распѧ́лсѧ є҆сѝ мїрски̑мъ страстє́мъ, кова̑рствїѧ бѣсѡ́въ побѣди́въ.

Мꙋ́дрости и҆спо́лнисѧ твоѐ се́рдце, премꙋ́дре, ᲂу҆че́нїѧ бе́зднꙋ ст҃ы́мъ и҆сточѝ дх҃омъ, мона́хѡвъ стада̀ напаѧ́ющꙋ.

Бг҃оро́диченъ: И҆сцѣлѝ, всенепоро́чнаѧ, дꙋ́шꙋ мою̀, молю́сѧ, и҆знемо́гшꙋю страстьмѝ и҆ всѧ́кими настоѧ̑нїи ѕлѣ́йшихъ де́мѡнѡвъ. бжⷭ҇твеннымъ хода́тайствомъ твои́мъ.

Сѣда́ленъ, гла́съ д҃.

Преподо́бенъ бы́въ, бг҃ꙋ возложи́лсѧ є҆сѝ, и҆ просвѣ́щсѧ до́брыми ви́ды, кассїа́не, ꙗ҆́кѡ со́лнце ѡ҆блиста́лъ є҆сѝ сїѧ́нїемъ бжⷭ҇твенныхъ твои́хъ ᲂу҆че́нїй, сердца̀ всѣ́хъ чтꙋ́щихъ тѧ̀ всегда̀ просвѣща́ѧ: но прилѣ́жнѡ молѝ хрⷭ҇та̀, ѡ҆ и҆̀же любо́вїю те́плѣ восхвалѧ́ющихъ тѧ̀.

Сла́ва, и҆ ны́нѣ, бг҃оро́диченъ: Грѣхолюби́въ сы́й, молю́ тѧ безгрѣ́шнаго бг҃а ро́ждшꙋю, взе́млющаго грѣхѝ мі́ра, пречⷭ҇таѧ, многогрѣ́шнꙋю дꙋ́шꙋ мою̀ ᲂу҆ще́дрити, и҆ грѣхѝ моѧ̑ мнѡ́гїѧ ѡ҆чи́стити: грѣ́шныхъ бо ты̀ є҆сѝ ѡ҆чище́нїе и҆ спасе́нїе вѣ́рныхъ, и҆ застꙋпле́нїе.

Крⷭ҇тобг҃оро́диченъ: И҆́же во́лею на́съ ра́ди распе́ншагосѧ на дре́вѣ а҆́гница зрѧ́щи, рыда́ющи глаго́лаше слезѧ́щи: что́ ти безблагода́тный є҆вре́йскїй собо́ръ воздадѐ, и҆́же мно́гихъ, и҆ вели́кихъ, сн҃е мо́й, дарѡ́въ наслажде́йсѧ; но воспѣва́ю твоѐ, бж҃е мо́й, долготерпѣ́нїе.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

По́двиги твои́ми плотска̑ѧ покори́лъ є҆сѝ и҆гра̑нїѧ дꙋ́хꙋ, прпⷣбне: и҆ свѧще́нными ᲂу҆чє́нїи твои́ми всѧ̑ ѡ҆бнажи́лъ є҆сѝ кова̑рствїѧ льсти́вагѡ и҆ ловлє́нїѧ.

Оу҆мерщвлѧ́емь во́лею ѿ мїрскі́ѧ ме́ртвости, бꙋ́дꙋщїѧ жи́зни наслѣ́дїе прїѧ́лъ є҆сѝ, кассїа́не пресла́вне: зако́ны же написа́лъ є҆сѝ мона́хѡвъ въ наставле́нїе и҆ соверше́нїе.

Всели́сѧ въ дꙋ́шꙋ твою̀ бл҃года́ть дх҃а, и҆ всѣ́хъ вы́шша плотски́хъ мꙋдрова́нїй тѧ̀ показа̀, пребога́те, и҆ льсти́вагѡ сѣте́й ꙗ҆вле́ннѡ.

Безлѣ́тнаго, въ лѣ́то бы́вша, родила̀ є҆сѝ неизрече́ннѡ, всенепоро́чнаѧ, прпⷣбныѧ просвѣти́вшаго, вѣ́рою пожи́вшыѧ, и҆ ѕлонача́льнаго ѕмі́ѧ смири́вшаго.

Пѣ́снь є҃.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Восхи́тилсѧ є҆сѝ, твои́ми добродѣ́тельми, бг҃опрїѧ́тне, носи́мь: и҆ ра́дꙋѧсѧ, дости́глъ є҆сѝ къ нбⷭ҇нымъ селе́нїємъ, трꙋдѡ́въ по́чєсти досто́йнѡ прїе́млѧ.

Оу҆мо́мъ чи́стымъ ты̀ взира́ѧ добро́тꙋ хрⷭ҇то́вꙋ, стоѧ́лъ є҆сѝ непрекло́ненъ въ нощѝ и҆ во днѝ, пресла́вне, бжⷭ҇твєннаѧ ꙗ҆влє́нїѧ ѿтꙋ́дꙋ прїе́млѧ.

Сле́зъ течє́нїи, бг҃оно́се ѻ҆́ч҃е, напаѧ́емь, ꙗ҆́кѡ дре́во высоковѣ́твенно прине́слъ є҆сѝ плоды̀ и҆справле́нїѧ, веселѧ́щаѧ всѣ́хъ бжⷭ҇твеннѡ помышлє́нїѧ.

Бг҃оро́диченъ: И҆зъ тебє̀ жи́знь па́че ᲂу҆ма̀ возсїѧ́вши, дв҃о, врага̀ ᲂу҆мертвѝ, всѧ̑ ны̀ ᲂу҆мертви́вшаго, и҆ ѡ҆живѝ мі́ръ непреста́ннѡ воспѣва́ющїй тѧ̀.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ, ѿ тлѝ, бж҃е, мѧ̀ возведѝ.

Пꙋте́мъ тѣ́снымъ, ѻ҆́ч҃е, ше́ствовалъ є҆сѝ, всѣ̑мъ же словесы̀ твои́ми се́й показа́лъ є҆сѝ, и҆́мже до́брѣ ходѧ́щїи, въ ра́йскꙋю широтꙋ̀ вводи́ми быва́ютъ.

Жи́знь твоѧ̀ преподо́бна бы́сть и҆ кончи́на блаже́нна, и҆ честна̀, кассїа́не ѻ҆́ч҃е на́шъ, ст҃ы́хъ а҆́гг҃лѡвъ собесѣ́дниче.

Дрема́нїе ᲂу҆ны́нїѧ ѿве́рглъ є҆сѝ, и҆ пребдѣва́ѧ въ видѣ́нїихъ и҆ дѣѧ́нїихъ, а҆́гг҃льски пожи́лъ є҆сѝ на землѝ, бг҃оно́се всебл҃же́нне.

Бг҃оро́диченъ: Ꙗ҆́кѡ добрꙋ̀, ꙗ҆́кѡ краснꙋ̀ возлюби́въ тѧ̀, добротворѧ́й і҆и҃съ, всенепоро́чнаѧ, и҆зъ тебє̀ пло́тїю ражда́етсѧ, и҆ ѡ҆божа́етъ мѧ̀ за милосе́рдїе безмѣ́рное.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.

Всегда̀ воззрѣ́ньми свѣтлѣ́йшими, бг҃омꙋ́дре, ѡ҆божа́емь, свѣти́льникъ ꙗ҆ви́лсѧ є҆сѝ незаходи́мь: ѿню́дꙋже ѡ҆блиста́лъ є҆сѝ сло́во спаси́тельное, всѣ́хъ на́съ ра́зꙋмы просвѣща́ющее восхвалѧ́ющихъ тѧ̀.

Ѧ҆зы́къ тво́й дх҃омъ ѡ҆бощре́нъ, ꙗ҆́вѣ начерта́вшїй зако́нъ спаси́теленъ, и҆ ѻ҆́бразы и҆зложѝ, и҆́миже ᲂу҆правлѧ́ютсѧ всѧ̑, всебл҃же́нне, при́снѡ мона́шествꙋющихъ стада̀ ра́дꙋющесѧ.

Ра́зꙋмы, прпⷣбне, спаси́тєльныѧ и҆ глаго́лы, невѣ́дѣнїе серде́чное ѿгонѧ́ющыѧ, бога́тнѡ и҆сточи́лъ є҆сѝ, ѻ҆́ч҃е бг҃омꙋ́дре. тѣ́мже тѧ̀ почита́емъ вѣ́рнѡ, всест҃ꙋ́ю соверша́юще па́мѧть твою̀.

Бг҃оро́диченъ: Черто́гъ была̀ є҆сѝ бжⷭ҇твенныѧ сла́вы, и҆ прⷭ҇то́лъ ѻ҆гнезра́ченъ, на не́мже почѝ сло́во воплоще́нное за кра́йнюю бл҃госты́ню: того̀ ᲂу҆́бѡ молѝ, чⷭ҇таѧ, ᲂу҆ще́дрити и҆ поми́ловати ны̀.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Сїѧ́ѧ ꙗ҆́коже ѕвѣзда̀, сло́вомъ и҆ житїе́мъ, кассїа́не, просвѣща́еши всѧ̑ земны̑ѧ концы̀, невѣ́дѣнїѧ и҆з̾има́ѧ мглы̀, и҆ пѣ́ти повелѣва́ѧ всегда̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Заше́лъ є҆сѝ, ᲂу҆́меръ ꙗ҆́кѡ со́лнце, пребл҃же́нне, ꙗ҆́кѡ зарю́ же ѡ҆ста́вилъ є҆сѝ незаходи̑ма словеса̀ твоѧ̑, просвѣща̑ющаѧ дꙋ́шы на́шѧ, вѣ́рою ст҃ꙋ́ю твою̀, прпⷣбне, соверша́ющихъ па́мѧть.

Добро́ты мы́сленныѧ неизрече́ннѡ наслажда́ешисѧ, ѡ҆ста́вль тлѣ́нное тѣ́ло, и҆ ви́дѣти сподо́билсѧ є҆сѝ, ꙗ҆̀же ви́дѧтъ, сла́вне, а҆́гг҃льскаѧ вѡ́инства пою́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ꙗ҆ви́ласѧ є҆сѝ нб҃съ ши́рши, дв҃о, є҆гѡ́же бо та̑ѧ не вмѣсти́ша, несказа́ннѡ вмѣсти́вши и҆ ро́ждши па́че смы́сла, сꙋгꙋ́ба сꙋ́ща є҆стество́мъ, є҆ди́нꙋ же и҆мꙋ́ща бг҃олѣ́пнѡ ѵ҆поста́сь.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Крѣ́пость тебѣ̀ дарова́сѧ ѿ бг҃а и҆ си́ла, нача̑ла ѿгони́ти мїроде́ржца: тѣ́мже до́блествовавъ вельмѝ, ꙗ҆́кѡ вои́стиннꙋ, ѻ҆́ч҃е бг҃омꙋ́дре, ликѡ́мъ счи́слилсѧ є҆сѝ преподо́бныхъ, ра́дꙋѧсѧ.

Ꙗ҆́кѡ ши́покъ сладково́ненъ, на́съ бл҃гоꙋха́ютъ бг҃одꙋхновє́ннаѧ словеса̀, бжⷭ҇твеннагѡ ѧ҆зы́ка твоегѡ̀: ты́ бо бл҃гоꙋха́нїе бы́лъ є҆сѝ, на́съ ра́ди и҆злїѧ́вшагѡсѧ за милосе́рдїе, и҆ въ пло́ть ѡ҆бле́кшасѧ, бг҃оно́се всече́стне.

Па́мѧть твоѧ̀ дне́сь преподо́бнѡ возсїѧ́вши, ѡ҆зарѧ́етъ сердца̀ восхвалѧ́ющихъ твоѐ а҆́гг҃льское житїѐ, кассїа́не, въ не́йже мо́лимсѧ, согрѣше́нїй проще́нїе дарова́ти всѣ̑мъ, помоли́сѧ.

Бг҃оро́диченъ: Гла́съ тѝ прино́симъ гаврїи́ловъ, взыва́юще: ра́дꙋйсѧ, трапе́зо, бжⷭ҇твенный хлѣ́бъ носи́вшаѧ: ра́дꙋйсѧ, непроходи́маѧ две́ре: ра́дꙋйсѧ, ра́досте всѣ́хъ спаса́емыхъ, прпⷣбныхъ похвало̀, бцⷣе приснодв҃о.

Труды преподобного Иоанна Кассиана Римлянина

• Писания к десяти посланным к епископу Леонтию и Елладию собеседованиям отцов, пребывавших в скитской пустыне

• Писания к семи другим, посланным к епископу Гонорату и Евхерию, собеседованиям отцов, живших в египетской пустыне Фиваиде

• Писания к семи последним, посланным к Иовиниану, Миневрию, Леонтию и Феодору, собеседованиям отцов, обитавших в пределах Нижнего Египта

• Послание к Кастору, епископу Аптскому, о правилах общежительных монастырей

• Цель и конец подвижничества

Смотреть все труды в библиотеке →

Пре­по­доб­ный Иоанн Кас­си­ан Рим­ля­нин по ме­сту рож­де­ния и язы­ку, на ко­то­ром пи­сал, при­над­ле­жал За­па­ду, но ду­хов­ной ро­ди­ной свя­то­го все­гда был пра­во­слав­ный Во­сток. В Виф­ле­ем­ской оби­те­ли, рас­по­ло­жен­ной неда­ле­ко от то­го ме­ста, где ро­дил­ся Спа­си­тель, Иоанн при­нял ино­че­ство. По­сле двух­лет­не­го пре­бы­ва­ния в оби­те­ли в 390 го­ду пре­по­доб­ный с ду­хов­ным бра­том Гер­ма­ном в те­че­ние се­ми лет пу­те­ше­ство­вал по Фива­и­де и Скит­ской пу­стыне, чер­пая из ду­хов­но­го опы­та мно­го­чис­лен­ных по­движ­ни­ков. Вер­нув­шись в 397 го­ду на ко­рот­кое вре­мя в Виф­ле­ем, ду­хов­ные бра­тья три го­да под­ви­за­лись в пол­ном уеди­не­нии, а за­тем от­пра­ви­лись в Кон­стан­ти­но­поль, где слу­ша­ли свя­то­го Иоан­на Зла­то­уста. В Кон­стан­ти­но­по­ле пре­по­доб­ный Кас­си­ан при­нял сан диа­ко­на. В 405 го­ду кон­стан­ти­но­поль­ский клир на­пра­вил пре­по­доб­но­го в Рим к па­пе Ин­но­кен­тию I во гла­ве по­соль­ства – ис­кать за­щи­ты без­вин­но стра­да­ю­ще­му свя­ти­те­лю.

В сан пре­сви­те­ра пре­по­доб­ный Кас­си­ан был по­свя­щен у се­бя на ро­дине. В Мар­се­ле он впер­вые в Гал­лии устро­ил два об­ще­жи­тель­ных мо­на­сты­ря, муж­ской и жен­ский, по уста­ву во­сточ­ных оби­те­лей. По прось­бе епи­ско­па Апт­ско­го Ка­сто­ра пре­по­доб­ный Кас­си­ан в 417–419 го­дах на­пи­сал 12 книг "О по­ста­нов­ле­ни­ях ки­но­вий" па­ле­стин­ских и еги­пет­ских и 10 бе­сед с пу­стын­ны­ми от­ца­ми, чтобы дать со­оте­че­ствен­ни­кам об­раз­цы об­ще­жи­тель­ных мо­на­сты­рей и по­зна­ко­мить их с ду­хом по­движ­ни­че­ства пра­во­слав­но­го Во­сто­ка. В пер­вой кни­ге "О по­ста­нов­ле­ни­ях ки­но­вий" речь идет о внеш­нем ви­де мо­на­ха; во вто­рой – о чине ноч­ных псал­мов и мо­литв; в тре­тьей – о чине днев­ных мо­литв и псал­мов; в чет­вер­той – о чине от­вер­же­ния от ми­ра; в вось­ми осталь­ных – о вось­ми глав­ных гре­хах. В бе­се­дах оте­че­ских на­став­ник в по­движ­ни­че­стве свя­той Кас­си­ан го­во­рит о це­ли жиз­ни, о ду­хов­ном рас­суж­де­нии, о сте­пе­нях от­ре­че­ния от ми­ра, о же­ла­ни­ях пло­ти и ду­ха, о вось­ми гре­хах, о бед­стви­ях пра­вед­ни­ков, о мо­лит­ве. В по­сле­ду­ю­щие го­ды пре­по­доб­ным Кас­си­а­ном на­пи­са­но еще че­тыр­на­дцать бе­сед: о со­вер­шен­ной люб­ви, о чи­сто­те, о Бо­жи­ей по­мо­щи, о ра­зу­ме­нии Пи­са­ния, о да­ро­ва­ни­ях Бо­жи­их, о друж­бе, об упо­треб­ле­нии язы­ка, о че­ты­рех ро­дах ино­ков, о жиз­ни от­шель­ни­че­ской и об­ще­жи­тель­ной, о по­ка­я­нии, о по­сте, о ноч­ных ис­ку­ше­ни­ях, об умерщ­вле­нии ду­хов­ном, да­но тол­ко­ва­ние слов "не еже хо­щу, сие тво­рю". В 431 го­ду свя­той Иоанн Кас­си­ан на­пи­сал свое по­след­нее со­чи­не­ние про­тив Несто­рия, в ко­то­ром со­брал про­тив ере­си суж­де­ния мно­гих во­сточ­ных и за­пад­ных учи­те­лей. В сво­их со­чи­не­ни­ях пре­по­доб­ный Кас­си­ан ос­но­вы­вал­ся на ду­хов­ном опы­те по­движ­ни­ков, за­ме­чая по­клон­ни­кам бла­жен­но­го Ав­гу­сти­на (па­мять 15 июня), что "бла­го­дать да­ле­ко ме­нее все­го мож­но за­щи­щать пыш­ны­ми сло­ва­ми и го­вор­ли­вым со­стя­за­ни­ем, диа­лек­ти­че­ски­ми сил­ло­гиз­ма­ми и крас­но­ре­чи­ем Ци­це­ро­на". По сло­вам пре­по­доб­но­го Иоан­на Ле­ствич­ни­ка (па­мять 30 мар­та), "ве­ли­кий Кас­си­ан рас­суж­да­ет пре­вос­ход­но и воз­вы­шен­но". Свя­той Иоанн Кас­си­ан Рим­ля­нин мир­но по­чил в 435 го­ду.

См. так­же: "Па­мять пре­по­доб­но­го от­ца на­ше­го Кас­си­а­на Рим­ля­ни­на" в из­ло­же­нии свт. Ди­мит­рия Ро­стов­ско­го.