Канон святому преподобному Михаилу Малеину

Припев: Преподо́бне о́тче Михаи́ле, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 25 июля (12 июля ст. ст.)

Глас 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Светолу́чными мо́лниями Ду́ха освяща́емь и Того́ дохнове́нием испо́лнен, я́коже орга́н, преблаже́нне, оглаша́емь, души́ моея́ мра́к отжени́ и пода́ждь ми́ сло́во по достоя́нию пе́ти тя́.

Роди́телей любве́ предпоче́л еси́ Соде́телеву, и теку́щаго жития́ — житие́ равноа́нгельно, и мирски́я красоты́ — нетле́нное вои́стинну украше́ние все́х Царя́, и́миже наслажда́ешися, ра́дуяся.

Восто́ка трисо́лнечнаго бы́л еси́ заря́ всесве́тлая, трисия́нным све́том жития́ твоего́ земли́ все́ лице́ осия́ бога́тно и греха́ тму́, о́тче, разоря́я словесы́ твои́ми.

Богоро́дичен: Клеща́, ю́же ви́де Иса́ия Ду́хом, у́гль нося́щая, Ты́ издале́ча яви́лася еси́, у́гль Божества́ — Христа́ во чре́ве носи́вши, Пресвята́я неопа́льно и на объя́тиях поноси́вши ма́нием вся́ Нося́щаго.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Возненави́дев от души́ сласте́й го́ресть и до́льния возгнуша́вся сла́вы, мирска́го са́на во́лею по́яс отве́рг, су́щих на земли́ царе́й предпоче́т все́х Царя́.

От пеле́н освяще́н, от ложе́сн избра́н яви́лся еси́: честне́й бо ма́тери твое́й Ро́ждшая Христа́ обеща́ да́ти тя́ и, я́ко освяще́н да́р, тя́ а́бие прия́т.

Ми́ром ты́ мы́сленным ду́шу и у́м очи́стив и те́ло а́лчбою истни́в, всели́л еси́ Христа́, глаго́люща Сего́ име́я в себе́, и ходя́ща, и ми́р благоуха́юща.

Богоро́дичен: Во утро́бе Твое́й, Чи́стая, Отцу́ сопресто́льное Сло́во все́лься, от чи́стых Твои́х крове́й вопло́щся и ро́ждься, тва́рь очи́стив идолонеи́стовства кропле́нием Своея́ кро́ве.

Седа́лен, гла́с 8.

Христо́в а́гнец слове́сный, упасы́й на зла́це доброде́телей преподо́бно о́вцы Госпо́дня, удивля́емь е́сть от а́нгел, му́жеством посрами́в де́моны, в челове́цех поживе́, я́ко безпло́тен. Те́мже и Тро́ице предста́ досто́йно, упра́вити ста́до моли́твами не престае́т. К нему́же возопие́м: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, И́же из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Струя́ жи́зни твою́ мы́сль напои́ Боже́ственнаго Ду́ха де́йством, отню́дуже го́ресть сласте́й отри́нувши, боже́ственныя сла́дости напо́лнися. Е́юже сы́тости непреста́нныя прие́млющи, пое́т: си́ле Твое́й сла́ва, Человеколю́бче.

О́гнь искуше́ний и страсте́й пе́щь слеза́ми твои́х, о́тче, тече́ний и духо́вною бога́тною угаси́л еси́ росо́ю, соблю́дся неопале́н, опаля́емь бо любо́вию все́х Царя́, ве́щная увяди́л еси́ жела́ния.

У́м возне́с к житию́ небе́сному, плотско́е, о́тче, облегчи́л еси́, отягча́вшее ве́щи страсте́й, те́мже Тро́ице неукло́нно послужи́л еси́. Моисе́я же нра́в и Илиино́ житие́ подража́я, ви́дел еси́ Го́спода.

Богоро́дичен: Вся́ добра́ Ты́ еси́, Чи́стая, бли́жняя моя́, — Сы́н Тво́й, Влады́чице, зове́т Тебе́, святе́йшу а́нгельскаго естества́ обре́т Тя́, и багряни́цу те́ла истка́ неизрече́нно от чи́стых Твои́х крове́й, и сла́вит Того́ сла́вящия.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Дрема́ние уны́ния о́чи се́рдца твоего́ не покры́, но ума́ твоего́ и жела́ния боже́ственнаго жа́лом уязвля́емь, всено́щным стоя́нием и в моли́тве терпе́л еси́, пло́ти не покрыва́я бро́ви.

Смиреному́дрие сожи́тельно име́я от ю́ности, виде́нии боже́ственными и поуче́нии у́м просвеща́я, льсти́ваго по́мыслом не укра́лся еси́, но смире́нно име́л еси́ мудрова́ние.

Богоро́дичен: Я́ко красну́ добро́тою, доброде́телей обре́т Тя́ пала́ту, кра́сное Сло́во в Твоя́ нетле́нная ложесна́ всели́ся и из Тебе́ роди́тися неизме́нно благоизво́ли, ве́рных украша́я ли́ца.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Умертви́в сла́сти, оживи́лся еси́ ду́хом, и, связа́в кре́пкаго, сосу́ды расхи́тил еси́ его́, и благопотре́бным доброде́телем прия́телища разшири́л еси́ уче́нии твои́ми.

Малосло́вие ле́ностное ума́ отгна́в, хле́б живо́тный, и е́же ко изоби́лию, руко́ю и язы́ком твои́м раздава́я, о́тче, сугу́б хотя́щим бы́л еси́.

И́же тала́нт от Бо́жия уче́ния обре́т, я́ко сы́й боже́ственным спе́хом возрасти́в без ме́ры, гла́с Влады́ки твоего́ слы́шиши ра́достен, к лу́чшим зову́щь тя́.

Богоро́дичен: Зако́нных кроме́ в Тебе́ Вы́шний вочелове́чися, и, пло́ть непрело́жно я́влься, с челове́ки поживе́, и к небе́сней возвы́ситися стези́ хотя́щим показа́.

Конда́к, гла́с 2.

Плотску́ю тяготу́ утончи́л еси́ де́лы, душе́вную же бы́стрость впери́л еси́ просвеще́нием, Михаи́ле, и яви́лся еси́ Тро́ице жили́ще, Ю́же зря́, блаже́нне, я́сно, моли́ непреста́нно о все́х на́с.

И́кос:

Моли́тв неподви́жимый сто́лп, соверше́ние любве́ го́рняго благоу́мия, умиле́ния бе́здна, не в тре́тию ча́сть взя́т бы́л еси́ высоты́, но иде́же незаходи́мое Божество́ я́сно зря́т херуви́ми, и, си́ми виде́нии сия́я, покланя́ешися, и сла́ву пребоже́ственную прие́млеши, ото́нуду обожа́емь. Те́м пе́ти тя́ досто́йно не возмога́ем, про́сим проще́ния, взыва́юще ку́пно: моли́ непреста́нно о все́х на́с.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Се́мя прие́м в се́рдцы за́поведей Бо́жиих па́че стори́ц, и ты́сяща пло́д прине́сл еси́ кла́с боже́ственный — мона́хов, вопию́щих: благослове́н Бо́г оте́ц на́ших.

Ду́ха сосу́д Пресвята́го яви́шася устне́ твои́ и я́коже наводне́нии язы́к честна́я уче́ния, Тро́ице согла́сно зову́щим: благослове́н Бо́г оте́ц на́ших.

Богоро́дичен: Без се́мене всели́ся во чре́во Твое́ созда́вый мя́, и из Тебе́ плотоно́сец Бо́г и Челове́к про́йде, не во две́ раздели́ся ипоста́си, ни смеше́ния подъя́т, отце́в Бо́г благослове́нный.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И́же пренепостижи́мую Госпо́дню красоту́ ели́ко жела́ние бя́ше, во пло́ти зря́ ума́ све́тлостию, ны́не пе́рсть оста́вль и к небеси́ до конца́ пресели́вся, пред лице́м предстои́ши Тро́ицы, зовы́й: лю́дие, превозноси́те Го́спода во вся́ ве́ки.

Многоце́нный тебе́ вене́ц, по́двиг сконча́вшу, и́же на де́моны, Влады́ка подаде́, зла́та светле́йши и би́сера красне́йши, ца́рства и безсме́ртия, о о́тче, сия́я па́че со́лнца, зове́ши: лю́дие, превозноси́те Го́спода во вся́ ве́ки.

О, сла́дкаго язы́ка твоего́, и́мже прему́дро улови́л еси́ поглоще́нныя враго́м льсти́вым! И ко измене́нию боже́ственному премени́л еси́, водрузи́в единообра́зно се́ни, я́ко песо́к, и зовя́ непреста́нно: свяще́нницы, благослови́те, лю́дие, превозноси́те Го́спода во вся́ ве́ки.

Богоро́дичен: Умерщвле́нныя жа́лом всепа́губным змии́ным, еди́на, Живода́вца Бо́га ро́ждшая, Де́во, оживи́ла еси́. Его́же приле́жно моли́ воста́ния страсте́й утиши́ти, любо́вию пою́щих: свяще́нницы, благослови́те, лю́дие, превозноси́те Его́ во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Дне́сь вся́ земля́ прии́де, пропове́дающи Христо́во боже́ственное и́мя, пресла́вную и боже́ственную па́мять твою́ торжеству́я: ты́ бо онебеси́л еси́ ю́ монахообра́зными уче́ньми и уясни́л еси́ а́нгельским ревну́ющия чино́м.

Освети́ша мо́лнии твои́х чуде́с вся́ концы́, моля́щим бо ся ве́рою ра́ка твоя́ источа́ет исцеле́ния. И тебе́ у́бо и́мать не́бо, земля́ же земну́ю се́нь те́ла, ю́же пре́жде гро́ба истни́вшуюся воздержа́нием твои́м.

Зе́млен у́м не мо́жет све́т о́н разуме́ти, пресве́тлый и пренеизглаго́ланный Тро́ический, его́же ны́не прия́л еси́, и́мже и обожа́емь я́ве. Помина́ющих тя́, преблаже́нне, помяни́, Тро́ице Святе́й предстоя́.

Богоро́дичен: Яви́хомся жи́зни боже́ственныя отпаде́ни дре́ва ра́ди разу́мнаго; Ты́ же родила́ еси́ жи́зни дре́во — Христа́ Бо́га, и́же от а́довых те́мных жили́щ изведе́ и к неотъе́млемей введе́ жи́зни пою́щия Тя́.

Свети́лен.

А́нгельскаго жития́ жела́я, удали́л еси́ себе́ все́х кра́сных жития́, всели́лся еси́ во дво́рех за́поведей Госпо́дних и со а́нгелы ра́дуешися.

Богоро́дичен: Я́же от Бо́га ми́рови пода́нным благи́м Ты́ вина́ еси́, Богоро́дице, но и ны́не ми́лостивна сотвори́ о о́бщем спасе́нии благопреме́ннаго Бо́га.

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Свѣтолꙋ́чными мо́лнїѧми дх҃а ѡ҆свѧща́емь, и҆ тогѡ̀ дохнове́нїемъ и҆спо́лненъ, ꙗ҆́коже ѻ҆рга́нъ, преблаже́нне, ѡ҆глаша́емь, дꙋшѝ моеѧ̀ мра́къ ѿженѝ, и҆ пода́ждь мѝ сло́во по достоѧ́нїю пѣ́ти тѧ̀.

Роди́телей любвѐ, предпоче́лъ є҆сѝ содѣ́телевꙋ, и҆ текꙋ́щагѡ житїѧ̀, житїѐ равноа́гг҃льно, и҆ мїрскі́ѧ красоты̀ нетлѣ́нное вои́стиннꙋ ᲂу҆краше́нїе всѣ́хъ цр҃ѧ̀: и҆́миже наслажда́ешисѧ ра́дꙋѧсѧ.

Восто́ка трисо́лнечнагѡ бы́лъ є҆сѝ зарѧ̀ всесвѣ́тлаѧ, трисїѧ́ннымъ свѣ́томъ житїѧ̀ твоегѡ̀, землѝ всѐ лицѐ ѡ҆сїѧ̀ бога́тнѡ, и҆ грѣха̀ тмꙋ̀, ѻ҆́тче, разорѧ́ѧ словесы̀ твои́ми.

Бг҃оро́диченъ: Клеща̀, ю҆́же ви́дѣ и҆са́їа дꙋ́хомъ, ᲂу҆́гль носѧ́щаѧ, ты̀ и҆здале́ча ꙗ҆ви́ласѧ є҆сѝ, ᲂу҆́гль бжⷭ҇тва̀ хрⷭ҇та̀ во чре́вѣ носи́вши, прест҃а́ѧ, неѡпа́льнѡ, и҆ на ѡ҆б̾ѧ́тїѧхъ поноси́вши ма́нїемъ всѧ̑ носѧ́щаго.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Возненави́дѣвъ ѿ дꙋшѝ сласте́й го́ресть, и҆ до́льнїѧ возгнꙋша́всѧ сла́вы, мїрска́гѡ са́на во́лею по́ѧсъ ѿве́ргъ, сꙋ́щихъ на землѝ царе́й, предпоче́тъ всѣ́хъ цр҃ѧ̀.

Ѿ пеле́нъ ѡ҆свѧще́нъ, ѿ ложе́снъ и҆збра́нъ ꙗ҆ви́лсѧ є҆сѝ: честнѣ́й бо ма́тери твое́й ро́ждшаѧ хрⷭ҇та̀, ѡ҆бѣща̀ да́ти тѧ̀, и҆ ꙗ҆́кѡ ѡ҆свѧще́нъ да́ръ тѧ̀ а҆́бїе прїѧ́тъ.

Мѵ́ромъ ты̀ мы́сленнымъ дꙋ́шꙋ и҆ ᲂу҆́мъ ѡ҆чи́стивъ, и҆ тѣ́ло а҆́лчбою и҆стни́въ, всели́лъ є҆сѝ хрⷭ҇та̀, глаго́люща сего̀ и҆мѣ́ѧ въ себѣ̀, и҆ ходѧ́ща, и҆ мі́ръ бл҃гоꙋха́юща.

Бг҃оро́диченъ: Во ᲂу҆тро́бѣ твое́й, чⷭ҇таѧ, ѻ҆ц҃ꙋ̀ сопресто́льное сло́во все́льсѧ, ѿ чⷭ҇тыхъ твои́хъ крове́й вопло́щсѧ, и҆ ро́ждьсѧ тва́рь ѿчи́стивъ і҆дѡлонеи́стовства, кропле́нїемъ своеѧ̀ кро́ве.

Сѣда́ленъ, гла́съ и҃.

Хрⷭ҇то́въ а҆́гнецъ слове́сный, ᲂу҆пасы́й на ѕла́цѣ добродѣ́телей прпⷣбнѡ ѻ҆́вцы гдⷭ҇нѧ, ᲂу҆дивлѧ́емь є҆́сть ѿ а҆́гг҃лъ, мꙋ́жествомъ посрами́въ де́мѡны, въ человѣ́цѣхъ поживѐ ꙗ҆́кѡ безпло́тенъ. тѣ́мже и҆ трⷪ҇цѣ предста̀ досто́йнѡ, ᲂу҆пра́вити ста́до моли́твами не престае́тъ, къ немꙋ́же возопїе́мъ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости: тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Стрꙋѧ̀ жи́зни твою̀ мы́сль напоѝ бжⷭ҇твеннагѡ дх҃а дѣ́йствомъ: ѿню́дꙋже го́ресть сласте́й ѿри́нꙋвши, бжⷭ҇твенныѧ сла́дости напо́лнисѧ. є҆́юже сы́тѡсти непреста̑нныѧ прїе́млющи, пое́тъ: си́лѣ твое́й сла́ва, чл҃вѣколю́бче.

Ѻ҆́гнь и҆скꙋше́нїй, и҆ страсте́й пе́щь, слеза́ми твои́хъ, ѻ҆́тче, тече́нїй, и҆ дꙋхо́вною бога́тною ᲂу҆гаси́лъ є҆сѝ росо́ю, соблю́дсѧ неѡпале́нъ: ѡ҆палѧ́емь бо любо́вїю всѣ́хъ цр҃ѧ̀, вє́щнаѧ ᲂу҆вѧди́лъ є҆сѝ жела̑нїѧ.

Оу҆́мъ возне́съ къ житїю̀ нбⷭ҇номꙋ, плотско́е, ѻ҆́тче, ѡ҆блегчи́лъ є҆сѝ ѡ҆тѧгча́вшее ве́щи страсте́й. тѣ́мже трⷪ҇цѣ неꙋкло́ннѡ послꙋжи́лъ є҆сѝ: мѡѷсе́а же нра́въ, и҆ и҆лїино̀ житїѐ подража́ѧ, ви́дѣлъ є҆сѝ гдⷭ҇а.

Бг҃оро́диченъ: Всѧ̀ добра̀ ты̀ є҆сѝ, чⷭ҇таѧ, бли́жнѧѧ моѧ̀, сн҃ъ тво́й, влⷣчце, зове́тъ тебѣ̀, ст҃ѣ́йшꙋ а҆́гг҃льскагѡ є҆стества̀ ѡ҆брѣ́тъ тѧ̀, и҆ багрѧни́цꙋ тѣ́ла и҆стка̀ неизрече́ннѡ, ѿ чи́стыхъ твои́хъ крове́й, и҆ сла́витъ того̀ сла́вѧщыѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.

Дрема́нїе ᲂу҆ны́нїѧ ѻ҆́чи се́рдца твоегѡ̀ не покры̀, но ᲂу҆ма̀ твоегѡ̀, и҆ жела́нїѧ бжⷭ҇твеннагѡ жа́ломъ ᲂу҆ѧзвлѧ́емь, всено́щнымъ стоѧ́нїемъ, и҆ въ моли́твѣ терпѣ́лъ є҆сѝ, пло́ти не покрыва́ѧ бро́ви.

Смиреномꙋ́дрїе сожи́тельно и҆мѣ́ѧ ѿ ю҆́ности, видѣ̑нїи бжⷭ҇твенными и҆ поꙋчє́нїи ᲂу҆́мъ просвѣща́ѧ, льсти́вагѡ по́мысломъ не ᲂу҆кра́лсѧ є҆сѝ: но смире́нно и҆мѣ́лъ є҆сѝ мꙋдрова́нїе.

Бг҃оро́диченъ: Ꙗ҆́кѡ краснꙋ̀ добро́тою, добродѣ́телей ѡ҆брѣ́тъ тѧ̀ пала́тꙋ кра́сное сло́во, въ твоѧ̑ нетлѣ̑ннаѧ ложесна̀ всели́сѧ. и҆ и҆зъ тебє̀ роди́тисѧ неизмѣ́ннѡ благоизво́ли, вѣ́рныхъ ᲂу҆краша́ѧ ли́ца.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Оу҆мертви́въ сла̑сти, ѡ҆живи́лсѧ є҆сѝ дꙋ́хомъ, и҆ свѧза́въ крѣ́пкаго, сосꙋ́ды расхи́тилъ є҆сѝ є҆гѡ̀, и҆ благопотрє́бнымъ добродѣ́телемъ прїѧ́тєлища разшири́лъ є҆сѝ ᲂу҆чє́нїи твои́ми.

Малосло́вїе лѣ́ностное ᲂу҆ма̀ ѿгна́въ, хлѣ́бъ живо́тный, и҆ є҆́же ко и҆з̾ѻби́лїю, рꙋко́ю и҆ ѧ҆зы́комъ твои́мъ раздава́ѧ, ѻ҆́тче, сꙋгꙋ́бъ хотѧ́щымъ бы́лъ є҆сѝ.

И҆́же тала́нтъ ѿ бж҃їѧ ᲂу҆че́нїѧ ѡ҆брѣ́тъ, ꙗ҆́кѡ сы́й бж҃е́ственнымъ спѣ́хомъ возрасти́въ безъ мѣ́ры, гла́съ влⷣки твоегѡ̀ слы́шиши ра́достенъ, къ лꙋ́чшымъ зовꙋ́щь тѧ̀.

Бг҃оро́диченъ: Зако́нныхъ кромѣ̀ въ тебѣ̀ вы́шнїй вочл҃вѣ́чисѧ, и҆ пло́ть непрело́жнѡ ꙗ҆́вльсѧ, съ человѣ́ки поживѐ, и҆ къ нбⷭ҇нѣй возвы́ситисѧ стезѝ хотѧ́щымъ показа̀.

Конда́къ, гла́съ в҃.

Плотскꙋ́ю тѧготꙋ̀ ᲂу҆тончи́лъ є҆сѝ дѣ́лы, дꙋше́внꙋю же бы́стрость впери́лъ є҆сѝ просвѣще́нїемъ, мїхаи́ле, и҆ ꙗ҆ви́лсѧ є҆сѝ трⷪ҇цѣ жили́ще: ю҆́же зрѧ̀, бл҃же́нне, ꙗ҆́снѡ, молѝ непреста́ннѡ ѡ҆ всѣ́хъ на́съ.

І҆́косъ:

Моли́твъ неподви́жимый сто́лпъ, соверше́нїе любвѐ го́рнѧгѡ благоꙋ́мїѧ, ᲂу҆миле́нїѧ бе́здна, не въ тре́тїю ча́сть взѧ́тъ бы́лъ є҆сѝ высоты̀, но и҆дѣ́же незаходи́мое бж҃ество̀ ꙗ҆́снѡ зрѧ́тъ херꙋві́ми, и҆ си́ми видѣ̑нїи сїѧ́ѧ покланѧ́ешисѧ, и҆ сла́вꙋ пребжⷭ҇твеннꙋю прїе́млеши, ѿѻнꙋ́дꙋ ѡ҆божа́емь. тѣ́мъ пѣ́ти тѧ̀ досто́йнѡ не возмога́емъ, про́симъ проще́нїѧ взыва́юще кꙋ́пнѡ: молѝ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Сѣ́мѧ прїе́мъ въ се́рдцы за́повѣдей бж҃їихъ па́че стори́цъ, и҆ ты́сѧща плѡ́дъ прине́слъ є҆сѝ кла́съ бжⷭ҇твенный, мона́хѡвъ вопїю́щихъ: бл҃гослове́нъ бг҃ъ ѻ҆тє́цъ на́шихъ.

Дх҃а сосꙋ́дъ прест҃а́гѡ ꙗ҆ви́шасѧ ᲂу҆стнѣ̀ твоѝ, и҆ ꙗ҆́коже наводне́нїе ѧ҆зы́къ честна̑ѧ ᲂу҆чє́нїѧ, трⷪ҇цѣ согла́снѡ зовꙋ́щымъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Безъ сѣ́мене всели́сѧ во чре́во твоѐ созда́вый мѧ̀, и҆ и҆зъ тебє̀ плотоно́сецъ бг҃ъ и҆ чл҃вѣ́къ про́йде. не во двѣ̀ раздѣли́сѧ ѵ҆поста̑си, ни смѣше́нїѧ под̾ѧ́тъ, ѻ҆тцє́въ бг҃ъ бл҃гослове́нный.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

И҆́же пренепостижи́мꙋю гдⷭ҇ню красотꙋ̀, є҆ли́кѡ жела́нїе бѧ́ше, во пло́ти зрѧ̀ ᲂу҆ма̀ свѣ́тлостїю, ны́нѣ пе́рсть ѡ҆ста́вль, и҆ къ нб҃сѝ до конца̀ пресели́всѧ, предъ лице́мъ предстои́ши трⷪ҇цы, зовы́й: лю́дїе, превозноси́те гдⷭ҇а во всѧ̑ вѣ́ки.

Многоцѣ́нный тебѣ̀ вѣне́цъ, по́двигъ сконча́вшꙋ, и҆́же на де́мѡны, влⷣка подадѐ, зла́та свѣтлѣ́йши, и҆ би́сера краснѣ́йши, црⷭ҇тва и҆ безсме́ртїѧ, ѽ ѻ҆́тче! сїѧ́ѧ па́че со́лнца, зове́ши: лю́дїе, превозноси́те гдⷭ҇а во всѧ̑ вѣ́ки.

Ѽ сла́дкагѡ ѧ҆зы́ка твоегѡ̀, и҆́мже премꙋ́дрѡ ᲂу҆лови́лъ є҆сѝ поглощє́нныѧ враго́мъ льсти́вымъ! и҆ ко и҆змѣне́нїю бжⷭ҇твенномꙋ премѣни́лъ є҆сѝ, водрꙋзи́въ є҆диноѻбра́знѡ сѣ̑ни ꙗ҆́кѡ песо́къ, и҆ зовѧ̀ непреста́ннѡ, свѧще́нницы благослови́те, лю́дїе превозноси́те гдⷭ҇а во всѧ̑ вѣ́ки.

Бг҃оро́диченъ: Оу҆мерщвлє́нныѧ жа́ломъ всепа́гꙋбнымъ ѕмїи́нымъ, є҆ди́на живода́вца бг҃а ро́ждшаѧ, дв҃о, ѡ҆живи́ла є҆сѝ. є҆го́же прилѣ́жнѡ молѝ, воста̑нїѧ страсте́й ᲂу҆тиши́ти, любо́вїю пою́щихъ: свѧще́нницы благослови́те, лю́дїе превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти ѿ дв҃и́ческагѡ чре́ва бы́въ чл҃вѣ́къ. тѣ́мже пречи́стꙋю бцⷣꙋ вѣ́рнїи велича́емъ.

Дне́сь всѧ̀ землѧ̀ прїи́де, проповѣ́дающи хрⷭ҇то́во бжⷭ҇твенное и҆́мѧ, пресла́внꙋю и҆ бжⷭ҇твеннꙋю па́мѧть твою̀ торжествꙋ́ѧ: ты́ бо ѡ҆небеси́лъ є҆сѝ ю҆̀ монахоѻбра́зными ᲂу҆че́ньми, и҆ ᲂу҆ѧсни́лъ є҆сѝ а҆́гг҃льскимъ ревнꙋ́ющыѧ чинѡ́мъ.

Ѡ҆свѣти́ша мѡ́лнїи твои́хъ чꙋде́съ всѧ̑ концы̀: молѧ́щымбосѧ вѣ́рою, ра́ка твоѧ̀ и҆сточа́етъ и҆сцѣлє́нїѧ. и҆ тебѐ ᲂу҆́бѡ и҆́мать нб҃о, землѧ́ же земнꙋ́ю сѣ́нь тѣ́ла, ю҆́же пре́жде гро́ба и҆стни́вшꙋюсѧ воздержа́нїемъ твои́мъ.

Зе́мленъ ᲂу҆́мъ не мо́жетъ свѣ́тъ ѻ҆́нъ разꙋмѣ́ти, пресвѣ́тлый и҆ пренеизглаго́ланный трⷪ҇ческїй, є҆го́же ны́нѣ прїѧ́лъ є҆сѝ, и҆́мже и҆ ѡ҆божа́емь ꙗ҆́вѣ: помина́ющихъ тѧ̀, преблаже́нне, помѧнѝ, трⷪ҇цѣ ст҃ѣ́й предстоѧ̀.

Бг҃оро́диченъ: Ꙗ҆ви́хомсѧ жи́зни бжⷭ҇твенныѧ ѿпаде́ни, дре́ва ра́ди разꙋ́мнагѡ: ты́ же родила̀ є҆сѝ жи́зни дре́во хрⷭ҇та̀ бг҃а, и҆́же ѿ а҆́довыхъ те́мныхъ жили́щъ и҆зведѐ, и҆ къ неѿе́млемѣй введѐ жи́зни пою́щыѧ тѧ̀.

Свѣти́ленъ.

А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ всѣ́хъ кра́сныхъ житїѧ̀, всели́лсѧ є҆сѝ во дво́рѣхъ за́повѣдей гдⷭ҇нихъ, и҆ со а҆́гг҃лы ра́дꙋешисѧ.

Бг҃оро́диченъ: Ꙗ҆́же ѿ бг҃а мі́рови пода̑ннымъ благи̑мъ ты̀ вина̀ є҆сѝ, бцⷣе, но и҆ ны́нѣ ми́лостивна сотворѝ ѡ҆ ѻ҆́бщемъ спасе́нїи благопремѣ́ннаго бг҃а.

Краткое житие преподобного Михаила Малеина

В ми­ру Ма­ну­ил, из ро­да Ма­ле­и­ных, сын бла­го­че­сти­вых и бо­га­тых вель­мож, мо­лит­ва­ми ис­про­шен­ный ими у Бо­га, ро­дил­ся око­ло 894 г. в Ха­ри­сан­ской об­ла­сти в Кап­па­до­кии. Пре­по­доб­ный с дет­ства от­ли­чал­ся бла­го­че­сти­ем и лю­бо­вью к на­у­кам. С осо­бен­ным вни­ма­ни­ем он изу­чал Св. Пи­са­ние. По­лу­чив пре­крас­ное об­ра­зо­ва­ние, он за­нял зна­чи­тель­ную долж­ность при дво­ре им­пе­ра­то­ра Льва Муд­ро­го (886–911 гг.). Но по­сле его кон­чи­ны св. Ми­ха­ил по­сле­до­вал дав­не­му вле­че­нию сво­е­го серд­ца к мо­на­ше­ской жиз­ни и оста­вил шум­ную и су­ет­ли­вую жизнь при дво­ре.

Пре­по­доб­ный Ми­ха­ил от­пра­вил­ся в Вифи­нию, в Ки­мин­ский мо­на­стырь близ Афо­на, и стал под­ви­зать­ся под ру­ко­вод­ством стар­ца Иоан­на Ела­ди­та, ко­то­рый и по­стриг его в мо­на­ше­ство. Непре­стан­но по­уча­ясь в Св. Пи­са­нии, свя­той до­стиг вы­со­кой сте­пе­ни бес­стра­стия и стя­жал дар про­зор­ли­во­сти. Он был очень со­стра­да­те­лен и че­ло­ве­ко­лю­бив. Не мог оста­вить без по­мо­щи и уте­ше­ния на­хо­див­ше­го­ся в нуж­де и пе­ча­ли, и по его го­ря­чим мо­лит­вам со­вер­ши­лось мно­го чу­дес.

По­сле мно­гих ино­че­ских по­дви­гов под ру­ко­вод­ством стар­ца пре­по­доб­ный Ми­ха­ил ис­про­сил у него бла­го­сло­ве­ние на уеди­нен­ную жизнь в пе­ще­ре. Пять дней неде­ли про­во­дил он в мо­лит­вен­ном де­ла­нии и толь­ко на суб­бо­ту и вос­кре­се­нье шел в мо­на­стырь для уча­стия в бо­го­слу­же­нии и При­ча­ще­ния Свя­тых Тайн. При­ме­ром вы­со­кой ду­хов­ной жиз­ни свя­той от­шель­ник стал при­вле­кать мно­гих ис­кав­ших спа­се­ния. То­гда пре­по­доб­ный Ми­ха­ил ос­но­вал в пу­стын­ном ме­сте, но­сив­шем на­зва­ние Су­хо­го озе­ра, мо­на­стырь со стро­гим уста­вом, а сам ушел для по­дви­гов в бо­лее от­да­лен­ные пре­де­лы и там сно­ва ос­но­вал мо­на­стырь. Вско­ре вся Ки­мин­ская го­ра по­кры­лась ино­че­ски­ми оби­те­ля­ми, где неустан­но воз­но­си­лись мо­лит­вы за весь мир к пре­сто­лу Все­выш­не­го.

Со­имен­ный Ан­ге­лу, пре­по­доб­ный Ми­ха­ил жил по-ан­гель­ски; не из­ме­няя пра­ви­лам воз­дер­жа­ния до по­след­не­го из­ды­ха­ния, он по­сто­ян­но по­стил­ся, ис­клю­чая то вре­мя, ко­гда был бо­лен, или был Гос­под­ский празд­ник, или ко­гда при­ни­мал ка­ко­го-ли­бо слав­но­го вель­мо­жу. Пер­во­на­чаль­но, ко­гда он сде­лал­ся мо­на­хом, он при­ни­мал пи­щу один раз в два дня, по­том в се­ре­дине по­движ­ни­че­ской жиз­ни ел толь­ко раз в пять дней, под ко­нец жиз­ни, осо­бен­но в Св. Че­ты­ре­де­сят­ни­цу, ел од­на­жды в 12 дней. Одеж­да свя­то­го бы­ла бед­ная и су­ро­вая.

Под ру­ко­вод­ством пре­по­доб­но­го Ми­ха­и­ла учил­ся мо­на­ше­ско­му де­ла­нию и пре­по­доб­ный Афа­на­сий († 1000 г.; па­мять 5/18 июля), бу­ду­щий ос­но­ва­тель зна­ме­ни­той Афон­ской Лав­ры. Скон­чал­ся пре­по­доб­ный Ми­ха­ил в 962 го­ду.

Полное житие преподобного Михаила Малеина

Пре­по­доб­ный Ми­ха­ил Ма­ле­ин ро­дил­ся око­ло 894 го­да в Хар­си­ан­ской об­ла­сти (Кап­па­до­кия) и при Кре­ще­нии по­лу­чил имя Ма­ну­ил. Он со­сто­ял в род­стве с ви­зан­тий­ским им­пе­ра­то­ром Львом VI Муд­рым (886–911). 18-ти лет Ма­ну­ил ушел в Вифи­нию, в Ки­мин­скую оби­тель под ру­ко­вод­ство стар­ца Иоан­на Ела­ди­та, ко­то­рый по­стриг его в мо­на­ше­ство с име­нем Ми­ха­ил. Ис­пол­няя са­мые труд­ные по­слу­ша­ния, несмот­ря на знат­ность сво­е­го ро­да, он по­ка­зал при­мер ве­ли­ко­го сми­ре­ния.

По про­ше­ствии неко­то­ро­го вре­ме­ни он был удо­сто­ен бла­го­да­ти свя­щен­ства. Неустан­но по­уча­ясь в Свя­щен­ном Пи­са­нии, пре­по­доб­ный Ми­ха­ил по­ка­зал, как до­стой­но долж­но со­еди­нять свя­щен­ство с мо­на­ше­ством, до­стиг вы­со­кой сте­пе­ни бес­стра­стия и стя­жал дар про­зор­ли­во­сти. Он был очень со­стра­да­те­лен и че­ло­ве­ко­лю­бив, не мог оста­вить без по­мо­щи и уте­ше­ния на­хо­див­ше­го­ся в нуж­де и пе­ча­ли, и по его го­ря­чим мо­лит­вам со­вер­ши­лось мно­го чу­дес.

По­сле мно­гих ино­че­ских тру­дов под ру­ко­вод­ством стар­ца Иоан­на, пре­по­доб­ный Ми­ха­ил ис­про­сил у него бла­го­сло­ве­ния на уеди­нен­ную жизнь в пе­ще­ре. Пять дней неде­ли про­во­дил он в мо­лит­вен­ном со­сре­до­то­че­нии и лишь на суб­бо­ту и вос­кре­се­ние шел в мо­на­стырь для уча­стия в Бо­го­слу­же­нии и При­ча­ще­ния Свя­тых Та­ин.

При­ме­ром вы­со­кой ду­хов­ной жиз­ни свя­той от­шель­ник стал при­вле­кать мно­гих ис­кав­ших спа­се­ния. В пу­стын­ном ме­сте, но­сив­шем на­зва­ние Су­хо­го Озе­ра, пре­по­доб­ный Ми­ха­ил ос­но­вал для со­брав­шей­ся к нему бра­тии оби­тель и дал ей стро­гий устав. Ко­гда оби­тель окреп­ла, пре­по­доб­ный Ми­ха­ил ушел в еще бо­лее от­да­лен­ные пре­де­лы и устро­ил там но­вый мо­на­стырь. Вско­ре тру­да­ми свя­то­го ав­вы вся Ки­мин­ская го­ра по­кры­лась ино­че­ски­ми оби­те­ля­ми, где неустан­но воз­но­си­лись мо­лит­вы за весь мир к Пре­сто­лу Все­выш­не­го.

Око­ло 953 го­да в чис­ло бра­тии всту­пил юно­ша Ав­ра­амий, ко­то­рый воз­рас­тал под ру­ко­вод­ством свя­то­го Ми­ха­и­ла и при­нял от него по­стриг с име­нем Афа­на­сий. Впо­след­ствии пре­по­доб­ный Афа­на­сий (па­мять 5 июля) сам ос­но­вал зна­ме­ни­тую Афон­скую Лав­ру, пер­вый об­ще­жи­тель­ный мо­на­стырь на Свя­той Го­ре. В по­строй­ке Лав­ры пре­по­доб­но­му Афа­на­сию боль­шую по­мощь ока­зал пле­мян­ник пре­по­доб­но­го Ми­ха­и­ла Ни­ки­фор, впо­след­ствии ви­зан­тий­ский им­пе­ра­тор Ни­ки­фор Фо­ка (963–969), ко­то­рый, на­ве­щая сво­е­го дя­дю, по­зна­ко­мил­ся с ним. По­сле пя­ти­де­ся­ти лет неустан­ных ино­че­ских по­дви­гов пре­по­доб­ный Ми­ха­ил Ма­ле­ин мир­но ото­шел ко Гос­по­ду в 962 г.

См. так­же: "Па­мять пре­по­доб­но­го от­ца на­ше­го Ми­ха­и­ла Ма­ле­и­на" в из­ло­же­нии свт. Ди­мит­рия Ро­стов­ско­го.