Канон святому преподобному Никите Мидикийскому

Припев: Преподо́бне о́тче Ники́то, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 16 апреля (03 апреля ст. ст.)

Глас 2.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Све́том Боже́ственнаго блиста́ния, о́тче, озаря́емь, твою́ жи́знь Бо́гу освяти́л еси́, изде́тска избра́в де́вства светоно́сную све́тлость, е́юже уподо́бился еси́ безпло́тных чистоте́.

Наста́вником Боже́ственным и Честны́м Ду́хом пома́зан Богови́дным, мона́шествующих о́бразом чи́сто бесе́довал еси́ и пребы́л еси́ многосве́тлою осия́емь заре́ю, богоно́се, житие́ чисте́йшо стяжа́в.

Укрепи́вся си́лою Креста́, стра́сти увяди́л еси́ плотски́я и у́м просвети́л еси́, о Ники́то всему́дре, прилежа́нием уче́ний духо́вных, Боже́ственнаго зре́ния бога́тство неиждива́емо пло́дствовав.

Целому́дрием, блаже́нне, просве́щся и чистото́ю, ко свяще́нному возведе́н бы́л еси́ нача́льству: свяще́нства бо светле́йшею украси́лся еси́ оде́ждею, Боже́ственных та́инств, преподо́бне, хода́тай познава́емь.

Богоро́дичен: Превы́шши яви́лася еси́, Чи́стая, вся́кия ви́димыя и неви́димыя, Присноде́во, тва́ри, Зижди́теля бо родила́ еси́, я́ко благоволи́ воплоти́тися во утро́бе Твое́й, Его́же со дерзнове́нием моли́ спасти́ пою́щия Тя́.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Небе́сное стяжа́в жи́тельство, преподо́бне, светови́ден и све́тел, благоче́стия, о Ники́то, бы́л еси́ свети́льник, мно́гими укра́шен дарова́ньми.

Умертви́в мудрова́ния пло́ти твоея́, преподо́бне, доброде́телию оживи́л еси́ богому́дренно души́ боже́ственное и жи́зни нетле́нныя сподо́бился еси́.

Ра́дуяся, препроводи́л еси́ твое́ житие́, сла́вне, преиспещре́н добро́тами и кра́сными богате́я дарова́ньми, в ни́хже утверди́ся се́рдце твое́.

Возсия́л еси́, я́ко со́лнце, мона́шествующих чино́м, доброде́тельми украша́емь, о Ники́то богому́дре преподо́бне! Те́м тя́, ра́дующеся, ублажа́ем.

Богоро́дичен: Просвеща́ющаго концы́, Пресвята́я, родила́ еси́, пло́тию несозда́ннаго и пре́жде все́х Отцу́ Собезнача́льнаго, те́мже Тя́, Богоро́дицу, ве́рою чти́м.

Седа́лен, гла́с 4.

Водвори́лся еси́ в гора́х безмо́лвия, му́дре, воспита́лся еси́ во граде́х воздержа́ния я́ве, возвы́сився обою́ду, оста́вил еси́ долере́тныя сла́сти, жи́знь дости́гл еси́ небе́сную, во оби́тель всели́вся, в не́йже мо́лиши о на́с Бо́га.

Сла́ва, и ны́не, богоро́дичен: Де́во Всенепоро́чная, Я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ние прегреше́ний на́м дарова́ти.

Пе́снь 4.

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Кореносе́чец страсте́й, богоно́се, показу́емь, души́ чистото́ю богобо́рных исто́ргнул еси́ вся́кую душегу́бную пре́лесть, священнотаи́нниче прече́стне.

Взе́м побе́ды, пребога́те, вене́ц, в се́лех небе́сных ны́не почива́еши, блаже́нне, стра́сти оттря́с и в безстра́стие, о́тче, оде́явся.

Же́ртву я́ко непоро́чну, о́тче, житие́ твое́ Христу́ прине́сл еси́, Боже́ственныя любве́ испо́лнен и по́стничества украша́емь добро́тою, преблаже́нне.

Вити́йства душетле́нныя, богому́дре, е́реси я́сно изобличи́л еси́, Христо́ву чту́щ боже́ственную ико́ну, и Богома́тере, и святы́х все́х, свяще́ннейший.

Богоро́дичен: Я́ко похвалу́, я́ко держа́ву ми́ра и утвержде́ние, я́ко приста́нище благоути́шно, я́ко весе́лию вино́вну, Тя́, Пречи́стая, сла́вим, крася́щиися вси́ в сла́ве Твое́й.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Я́ко кро́ток, в земли́ кро́тких всели́лся еси́, Ники́то му́дре, побо́рник бы́в по и́стине, всеприснопа́мятне, и испове́дания венце́м све́тло украша́емь.

К Боже́ственному Све́ту ны́не преста́вился еси́, преподо́бне, Све́та бы́в сы́н возлю́блен, в ра́дости и красоте́ с ли́ки а́нгельскими ра́достно веселя́ся.

Неизрече́нныя сла́дости ра́йския бы́л еси́ ны́не прича́стник, приста́нище бо всеблагоути́шное обурева́емым показа́лся еси́ и а́лчущих, блаже́нне, препита́тель бы́л еси́.

Богоро́дичен: Глаго́лы Твоя́ помина́юще, ны́не Тя́ ублажа́ем: Тобо́ю, Пренепоро́чная, блаже́нство несказа́нное и жи́знь нестаре́емую и́стинно восприя́хом.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Блаже́нных наде́жд получи́л еси́, о́тче всеблаже́нне, блаже́нства Влады́чня бы́в насле́дник и Боже́ственнаго осия́ния.

Светоно́сныя свещи́ име́я сугу́бы испове́дания твоего́ и по́стничества, в небеса́ вмести́лся еси́, богоно́се Ники́то пребога́те.

Наслажда́яся безконе́чныя и Боже́ственныя сла́дости в небе́сных ны́не, о́тче, ски́ниих, о на́с моли́ все́х Влады́ку и Го́спода.

Богоро́дичен: Ны́не к Тебе́ прибега́ю, Пречи́стая, спаси́ мя мольба́ми Твои́ми и соблюди́, ели́ка бо хо́щеши, мо́жеши, я́ко Ма́ти Всемогу́щаго.

Конда́к, гла́с 2.

Небе́сный у́м и житие́ стяжа́в, сия́еши я́сно, я́коже со́лнце, све́тлостию де́л, просвеща́еши су́щия во тме́ жите́йстей, о́тче Ники́то, и, приводя́ все́х к Бо́гу, моли́ непреста́нно о все́х на́с.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Твоя́ кро́тость вельми́ в пе́рсть смири́ мучи́теля суровство́, ча́стыми мольба́ми сего́ умори́вши, ве́сть бо во́лю твори́ти боя́щихся Его́ Госпо́дь.

Гро́м догма́тов твои́х и светоно́сная мо́лния жития́ твоего́ ми́р уясни́, ве́рныя озаря́ющи боговеща́нными сия́ньми, словесы́ же и дея́нии све́тло, священнотаи́нниче богоблаже́нне.

Кре́постию вжиля́емь Уте́шителя, де́монских полко́в и се́тей ерети́ческих, богому́дре, избежа́л еси́ и к небе́сней высоте́ возше́л еси́, с ли́ки безпло́тных ны́не водворя́яся.

Богоро́дичен: Хра́м была́ еси́ свяще́н вся́ хоте́нием, Де́во, Созда́вшаго, Того́ бо вмести́ла еси́, все́ми Невмести́маго, ми́р обновля́юща. Те́мже Тя́, Богоро́дицу, пропове́дуем.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Вся́ко превозше́д чу́вство, треблаже́нне, мы́сленному ны́не прибли́жился еси́ Све́ту, всече́стне, боговиде́ния сподобля́емь и просвеще́ния исполня́емь, зовы́й: благослови́те, вся́ дела́ Госпо́дня, Го́спода.

Ме́ртвостию страсте́й я́ве облече́н, к живоно́сному изше́л еси́ ликова́нию, всеблаже́нне, благоче́стием разжиза́емь и доброде́тельми осия́емь, зовы́й: превозноси́те, вся́ дела́ Госпо́дня, Го́спода.

Вся́ку доброде́тель, богому́дре, от младе́нства извы́к, при кончи́не по́двиг твои́х венце́м украша́емь благода́тным показа́лся еси́ и по́честь прия́л еси́, поя́: превозноси́те, вся́ дела́ Госпо́дня, Го́спода.

Свы́ше на́с ны́не назира́еши, о́тче, твоему́ Влады́це предстоя́, побе́ды, тезоимени́те, дерзнове́ние мно́го име́я и душе́внаго прося́, сла́вне, спасе́ния, священноявле́нне, ста́ду твоему́.

Богоро́дичен: Ты́ Отцу́ неразлу́чнаго, в ложесна́х богому́жно пожи́вша, безсе́менно зачала́ еси́ и несказа́нно родила́ еси́, Богороди́тельнице Пречи́стая: те́мже Тя́, спасе́ние все́х на́с, познава́ем.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Боже́ственныя све́тлости, я́ко чи́ст, сподо́бился еси́, доброде́телей ви́ды облиста́яся и испове́дания венце́м я́ве украша́емь, те́мже всепра́зднственный пра́здник тво́й ублажа́ем.

Смы́сленно, блаже́нне, твою́ жи́знь соверши́л еси́, повеле́ньми Спа́са управля́емь, ны́не же, се́ни преше́дшей, прера́достно жи́знь ве́чную досто́йно получи́л еси́, богоявле́нно, свяще́ннейше.

Теку́щих бы́стро прете́кл еси́ мяте́ж, к ти́хому же, Ники́то, Ца́рства Христо́ва, ра́дуяся, устреми́лся еси́ приста́нищу, к нему́же на́с наста́ви, о́тче, тя́ блажа́щия и твою́ па́мять почита́ющия.

Богоро́дичен: Тя́ свиде́ния се́нь прообразова́, в не́йже скрижа́ли, и ста́мна, и златы́й ковче́г, я́коже бо она́ о́ныя, та́ко и Ты́ Безнача́льнаго Сло́ва во утро́бе вмести́ла еси́, Богоро́дице, воплоща́ема.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Свѣ́томъ бжⷭ҇твеннагѡ блиста́нїѧ, ѻ҆́ч҃е, ѡ҆зарѧ́емь, твою̀ жи́знь бг҃ꙋ ѡ҆свѧти́лъ є҆сѝ, и҆здѣ́тска и҆збра́въ дѣ́вства свѣтоно́снꙋю свѣ́тлость, є҆́юже ᲂу҆подо́билсѧ є҆сѝ безпло́тныхъ чистотѣ̀.

Наста́вникомъ бжⷭ҇твеннымъ и҆ честны́мъ, дх҃омъ пома́занъ бг҃ови́днымъ, мона́шествꙋющихъ ѻ҆́бразомъ чи́стѡ бесѣ́довалъ є҆сѝ, и҆ пребы́лъ є҆сѝ многосвѣ́тлою ѡ҆сїѧ́емь заре́ю, бг҃оно́се, житїѐ чистѣ́йшо стѧжа́въ.

Оу҆крѣпи́всѧ си́лою крⷭ҇та̀, стра̑сти ᲂу҆вѧди́лъ є҆сѝ плотскі̑ѧ и҆ ᲂу҆́мъ просвѣти́лъ є҆сѝ, ѽ нїки́то всемꙋ́дре! прилѣжа́нїемъ ᲂу҆че́нїй дꙋхо́вныхъ, бжⷭ҇твеннагѡ зрѣ́нїѧ бога́тство неиждива́емо пло́дствовавъ.

Цѣломꙋ́дрїемъ, бл҃же́нне, просвѣ́щсѧ и҆ чистото́ю, ко свѧще́нномꙋ возведе́нъ бы́лъ є҆сѝ нача́льствꙋ: свѧще́нства бо свѣтлѣ́йшею ᲂу҆краси́лсѧ є҆сѝ ѻ҆де́ждею бжⷭ҇твенныхъ та́инствъ, прпⷣбне, хода́тай познава́емь.

Бг҃оро́диченъ: Превы́шши ꙗ҆ви́ласѧ є҆сѝ, чⷭ҇таѧ, всѧ́кїѧ ви́димыѧ и҆ неви́димыѧ, приснодв҃о, тва́ри: зижди́телѧ бо родила̀ є҆сѝ, ꙗ҆́кѡ бл҃говолѝ воплоти́тисѧ во ᲂу҆тро́бѣ твое́й. є҆го́же со дерзнове́нїемъ молѝ, спастѝ пою́щыѧ тѧ̀.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Нбⷭ҇ное стѧжа́въ жи́тельство, прпⷣбне, свѣтови́денъ и҆ свѣ́телъ бл҃гоче́стїѧ, ѽ нїки́то, бы́лъ є҆сѝ свѣти́льникъ, мно́гими ᲂу҆кра́шенъ дарова́ньми.

Оу҆мертви́въ мꙋдрова̑нїѧ пло́ти твоеѧ̀, прпⷣбне, добродѣ́телїю ѡ҆живи́лъ є҆сѝ бг҃омꙋ́дреннѡ дꙋшѝ бжⷭ҇твенное, и҆ жи́зни нетлѣ́нныѧ сподо́билсѧ є҆сѝ.

Ра́дꙋѧсѧ, препроводи́лъ є҆сѝ твоѐ житїѐ, сла́вне, преиспещре́нъ добро́тами и҆ кра́сными богатѣ́ѧ дарова́ньми, въ ни́хже ᲂу҆тверди́сѧ се́рдце твоѐ.

Возсїѧ́лъ є҆сѝ ꙗ҆́кѡ со́лнце мона́шествꙋющихъ чинѡ́мъ, добродѣ́тельми ᲂу҆краша́емь, ѽ нїки́то бг҃омꙋ́дре прпⷣбне! тѣ́мъ тѧ̀ ра́дꙋющесѧ ᲂу҆блажа́емъ.

Бг҃оро́диченъ: Просвѣща́ющаго концы̀, прест҃а́ѧ, родила̀ є҆сѝ пло́тїю несозда́ннаго, и҆ пре́жде всѣ́хъ ѻ҆ц҃ꙋ̀ собезнача́льнаго: тѣ́мже тѧ̀ бцⷣꙋ вѣ́рою чти́мъ.

Сѣда́ленъ, гла́съ д҃.

Водвори́лсѧ є҆сѝ въ гора́хъ безмо́лвїѧ, мꙋ́дре, воспита́лсѧ є҆сѝ во гра́дѣхъ воздержа́нїѧ ꙗ҆́вѣ, возвы́сивсѧ ѻ҆бою́дꙋ, ѡ҆ста́вилъ є҆сѝ долѣрє́тныѧ сла̑сти, жи́знь дости́глъ є҆сѝ нбⷭ҇нꙋю, во ѻ҆би́тель всели́всѧ, въ не́йже мо́лиши ѡ҆ на́съ бг҃а.

Сла́ва, и҆ ны́нѣ, бг҃оро́диченъ: Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ: Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ̀ человѣ́ка. тѣ́мъ зовꙋ́ тѝ: сла́ва си́лѣ твое́й, гдⷭ҇и.

Кореносѣ́чецъ страсте́й, бг҃оно́се, показꙋ́емь, дꙋшѝ чистото́ю бг҃обо́рныхъ и҆сто́ргнꙋлъ є҆сѝ всѧ́кꙋю дꙋшегꙋ́бнꙋю пре́лесть, свѧщеннотаи́нниче прече́стне.

Взе́мъ побѣ́ды, пребога́те, вѣне́цъ, въ се́лѣхъ нбⷭ҇ныхъ ны́нѣ почива́еши, блаже́нне, стра̑сти ѿтрѧ́съ, и҆ въ безстра́стїе, ѻ҆́ч҃е, ѡ҆дѣ́ѧвсѧ.

Же́ртвꙋ ꙗ҆́кѡ непоро́чнꙋ, ѻ҆́ч҃е, житїѐ твоѐ хрⷭ҇тꙋ̀ прине́слъ є҆сѝ, бжⷭ҇твенныѧ любвѐ и҆спо́лненъ и҆ по́стничества ᲂу҆краша́емь добро́тою, преблаже́нне.

Виті̑йства дꙋшетлѣ̑нныѧ, бг҃омꙋ́дре, є҆́реси ꙗ҆́снѡ и҆з̾ѡбличи́лъ є҆сѝ, хрⷭ҇то́вꙋ чтꙋ́щъ бжⷭ҇твеннꙋю і҆кѡ́нꙋ и҆ бг҃омт҃ре, и҆ ст҃ы́хъ всѣ́хъ, свѧще́ннѣйшїй.

Бг҃оро́диченъ: Ꙗ҆́кѡ похвалꙋ̀, ꙗ҆́кѡ держа́вꙋ мі́ра и҆ ᲂу҆твержде́нїе, ꙗ҆́кѡ приста́нище благоꙋти́шно, ꙗ҆́кѡ весе́лїю вино́внꙋ тѧ̀, пречⷭ҇таѧ, сла́вимъ, красѧ́щїисѧ всѝ въ сла́вѣ твое́й.

Пѣ́снь є҃.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы.

Ꙗ҆́кѡ кро́токъ, въ землѝ кро́ткихъ всели́лсѧ є҆сѝ, нїки́то мꙋ́дре, побо́рникъ бы́въ по и҆́стинѣ, всеприснопа́мѧтне, и҆ и҆сповѣ́данїѧ вѣнце́мъ свѣ́тлѡ ᲂу҆краша́емь.

Къ бжⷭ҇твенномꙋ свѣ́тꙋ ны́нѣ преста́вилсѧ є҆сѝ, прпⷣбне, свѣ́та бы́въ сы́нъ возлю́бленъ, въ ра́дости и҆ красотѣ̀ съ ли́ки а҆́гг҃льскими ра́достнѡ веселѧ́сѧ.

Неизрече́нныѧ сла́дости ра́йскїѧ бы́лъ є҆сѝ ны́нѣ прича́стникъ: приста́нище бо всеблагоꙋти́шное ѡ҆бꙋрева́ємымъ показа́лсѧ є҆сѝ, и҆ а҆́лчꙋщымъ, бл҃же́нне, препита́тель бы́лъ є҆сѝ.

Бг҃оро́диченъ: Глаго́лы твоѧ̑ помина́юще, ны́нѣ тѧ̀ ᲂу҆блажа́емъ: тобо́ю, пренепоро́чнаѧ, блаже́нство несказа́нное и҆ жи́знь нестарѣ́емꙋю и҆́стиннѡ воспрїѧ́хомъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Бл҃же́нныхъ наде́ждъ полꙋчи́лъ є҆сѝ, ѻ҆́ч҃е всеблаже́нне, бл҃же́нства влⷣчнѧ бы́въ наслѣ́дникъ, и҆ бжⷭ҇твеннагѡ ѡ҆сїѧ́нїѧ.

Свѣтонѡ́сныѧ свѣщы̀ и҆мѣ́ѧ сꙋгꙋ̑бы, и҆сповѣ́данїѧ твоегѡ̀ и҆ по́стничества, въ нб҃са̀ вмѣсти́лсѧ є҆сѝ, бг҃оно́се нїки́то пребога́те.

Наслажда́ѧсѧ безконе́чныѧ и҆ бжⷭ҇твенныѧ сла́дости, въ нбⷭ҇ныхъ ны́нѣ, ѻ҆́ч҃е, ски́нїихъ, ѡ҆ на́съ молѝ всѣ́хъ влⷣкꙋ и҆ гдⷭ҇а.

Бг҃оро́диченъ: Ны́нѣ къ тебѣ̀ прибѣга́ю, пречⷭ҇таѧ, спаси́ мѧ мольба́ми твои́ми, и҆ соблюдѝ: є҆ли̑ка бо хо́щеши, мо́жеши, ꙗ҆́кѡ мт҃и всемогꙋ́щагѡ.

Конда́къ, гла́съ в҃.

Нбⷭ҇ный ᲂу҆́мъ и҆ житїѐ стѧжа́въ, сїѧ́еши ꙗ҆́снѡ, ꙗ҆́коже со́лнце свѣ́тлостїю дѣ́лъ, просвѣща́еши сꙋ́щыѧ во тмѣ̀ жите́йстѣй, ѻ҆́ч҃е нїки́то, и҆ приводѧ̀ всѣ́хъ къ бг҃ꙋ, молѝ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.

Твоѧ̀ кро́тость вельмѝ въ пе́рсть смирѝ мꙋчи́телѧ сꙋровство̀, ча́стыми мольба́ми сего̀ ᲂу҆мори́вши: вѣ́сть бо во́лю твори́ти боѧ́щихсѧ є҆гѡ̀ гдⷭ҇ь.

Гро́мъ догма́тѡвъ твои́хъ, и҆ свѣтоно́снаѧ мо́лнїѧ житїѧ̀ твоегѡ̀ мі́ръ ᲂу҆ѧснѝ, вѣ̑рныѧ ѡ҆зарѧ́ющи бг҃овѣща́нными сїѧ́ньми, словесы́ же и҆ дѣѧ̑нїи свѣ́тлѡ, свѧщеннотаи́нниче бг҃облаже́нне.

Крѣ́постїю вжилѧ́емь ᲂу҆тѣ́шителѧ, де́мѡнскихъ полкѡ́въ и҆ сѣ́тей є҆реті́ческихъ, бг҃омꙋ́дре, и҆збѣжа́лъ є҆сѝ: и҆ къ нбⷭ҇нѣй высотѣ̀ возше́лъ є҆сѝ, съ ли́ки безпло́тныхъ ны́нѣ водворѧ́ѧсѧ.

Бг҃оро́диченъ: Хра́мъ была̀ є҆сѝ свѧще́нъ всѧ̑ хотѣ́нїемъ, дв҃о, созда́вшагѡ: того́ бо вмѣсти́ла є҆сѝ всѣ́ми невмѣсти́маго, мі́ръ ѡ҆бновлѧ́юща. тѣ́мже тѧ̀ бцⷣꙋ проповѣ́дꙋемъ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Всѧ́ко превозше́дъ чꙋ́вство, треблаже́нне, мы́сленномꙋ ны́нѣ прибли́жилсѧ є҆сѝ свѣ́тꙋ, всече́стне, бг҃овидѣ́нїѧ сподоблѧ́емь и҆ просвѣще́нїѧ и҆сполнѧ́емь, зовы́й: благослови́те, всѧ̑ дѣла̀ гдⷭ҇нѧ, гдⷭ҇а.

Ме́ртвостїю страсте́й ꙗ҆́вѣ ѡ҆блече́нъ, къ живоно́сномꙋ и҆зше́лъ є҆сѝ ликова́нїю, всебл҃же́нне, благоче́стїемъ разжиза́емь, и҆ добродѣ́тельми ѡ҆сїѧ́емь, зовы́й: превозноси́те, всѧ̑ дѣла̀ гдⷭ҇нѧ, гдⷭ҇а.

Всѧ́кꙋ добродѣ́тель, бг҃омꙋ́дре, ѿ младе́нства и҆звы́къ, при кончи́нѣ пѡ́двигъ твои́хъ вѣнце́мъ ᲂу҆краша́емь, бл҃года́тнымъ показа́лсѧ є҆сѝ, и҆ по́честь прїѧ́лъ є҆сѝ, поѧ̀: превозноси́те, всѧ̑ дѣла̀ гдⷭ҇нѧ, гдⷭ҇а.

Свы́ше на́съ ны́нѣ назира́еши, ѻ҆́ч҃е, твоемꙋ̀ влⷣцѣ предстоѧ̀, побѣ́ды тезоимени́те, дерзнове́нїе мно́го и҆мѣ́ѧ, и҆ дꙋше́внагѡ просѧ̀, сла́вне, спасе́нїѧ, свѧщенноѧвле́нне, ста́дꙋ твоемꙋ̀.

Бг҃оро́диченъ: Ты̀ ѻ҆ц҃ꙋ̀ неразлꙋ́чнаго, въ ложесна́хъ бг҃омꙋ́жнѡ пожи́вша, безсѣ́меннѡ зачала̀ є҆сѝ, и҆ несказа́ннѡ родила̀ є҆сѝ, бг҃ороди́тельнице пречⷭ҇таѧ: тѣ́мже тѧ̀ спасе́нїе всѣ́хъ на́съ познава́емъ.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Бжⷭ҇твенныѧ свѣ́тлости ꙗ҆́кѡ чи́стъ сподо́билсѧ є҆сѝ, добродѣ́телей ви́ды ѡ҆блиста́ѧсѧ, и҆ и҆сповѣ́данїѧ вѣнце́мъ ꙗ҆́вѣ ᲂу҆краша́емь: тѣ́мже всепра́зднственный пра́здникъ тво́й ᲂу҆блажа́емъ.

Смы́сленнѡ, бл҃же́нне, твою̀ жи́знь соверши́лъ є҆сѝ, повелѣ́ньми сп҃са ᲂу҆правлѧ́емь: ны́нѣ же сѣ́ни преше́дшей, прера́достнѡ жи́знь вѣ́чнꙋю досто́йнѡ полꙋчи́лъ є҆сѝ, бг҃оѧвле́ннѡ свѧще́ннѣйше.

Текꙋ́щихъ быстрѡ̀ прете́клъ є҆сѝ мѧте́жъ, къ ти́хомꙋ же, нїки́то, црⷭ҇тва хрⷭ҇то́ва ра́дꙋѧсѧ ᲂу҆стреми́лсѧ є҆сѝ приста́нищꙋ: къ немꙋ́же на́съ наста́ви, ѻ҆́ч҃е, тѧ̀ блажа́щыѧ, и҆ твою̀ па́мѧть почита́ющыѧ.

Бг҃оро́диченъ: Тѧ̀ свидѣ́нїѧ сѣ́нь проѡбразова̀, въ не́йже скрижа̑ли и҆ ста́мна, и҆ златы́й ковче́гъ: ꙗ҆́коже бо ѻ҆на̀ ѻ҆́ныѧ, та́кѡ и҆ ты̀ безнача́льнаго сло́ва во ᲂу҆тро́бѣ вмѣсти́ла є҆сѝ, бцⷣе, воплоща́ема.

Пре­по­доб­ный Ни­ки­та Ис­по­вед­ник, игу­мен оби­те­ли Ми­ди­кий­ской, ро­дил­ся в Ке­са­рии Вифин­ской (се­ве­ро-за­пад Ма­лой Азии) в бла­го­че­сти­вой се­мье. Мать умер­ла на 8-й день по­сле его рож­де­ния, и отец, по име­ни Фила­рет, по­стриг­ся в мо­на­хи. Ре­бе­нок остал­ся на по­пе­че­нии ба­буш­ки, вос­пи­тав­шей его в ис­тин­но хри­сти­ан­ском ду­хе. С юно­ше­ских лет свя­той Ни­ки­та при­слу­жи­вал в церк­ви и на­хо­дил­ся в по­слу­ша­нии у от­шель­ни­ка Сте­фа­на. По его бла­го­сло­ве­нию свя­той Ни­ки­та на­пра­вил­ся в Ми­ди­кий­ский мо­на­стырь, где игу­ме­ном был свя­той Ни­ки­фор (па­мять 13 мар­та).

Через семь лет доб­ро­де­тель­ной жиз­ни в мо­на­сты­ре, сла­вив­шем­ся стро­го­стью уста­ва, пре­по­доб­ный Ни­ки­та был ру­ко­по­ло­жен во пре­сви­те­ра. Пре­по­доб­ный Ни­ки­фор, зная свя­тую жизнь мо­ло­до­го ино­ка, по­ру­чил ему управ­ле­ние оби­те­лью, так как сам был тя­же­ло бо­лен.

Не жа­лея сил, пре­по­доб­ный Ни­ки­та стал за­бо­тить­ся о про­цве­та­нии и бла­го­устрой­стве мо­на­сты­ря. Лич­ным при­ме­ром стро­гой мо­на­ше­ской жиз­ни он на­став­лял бра­тию. Вско­ре сла­ва о вы­со­кой жиз­ни на­сель­ни­ков оби­те­ли при­влек­ла ту­да мно­гих, ищу­щих спа­се­ния. Через несколь­ко лет чис­ло мо­на­хов уве­ли­чи­лось до 100 че­ло­век.

Ко­гда пре­по­доб­ный Ни­ки­фор в глу­бо­кой ста­ро­сти ото­шел ко Гос­по­ду, бра­тия еди­но­душ­но из­бра­ла игу­ме­ном пре­по­доб­но­го Ни­ки­ту.

Гос­подь удо­сто­ил свя­то­го Ни­ки­ту да­ра чу­до­тво­ре­ния. По его мо­лит­ве глу­хо­не­мо­му от­ро­ку воз­вра­тил­ся дар ре­чи; две бес­но­ва­тые жен­щи­ны по­лу­чи­ли ис­це­ле­ние; ли­шен­но­му рас­суд­ка вер­нул­ся ра­зум, и мно­гие дру­гие боль­ные ис­це­ля­лись от сво­их неду­гов.

В те го­ды при им­пе­ра­то­ре Льве Ар­мя­нине (813–820) воз­об­но­ви­лась ико­но­бор­че­ская ересь и уси­ли­лось го­не­ние на свя­тые ико­ны. Пра­во­слав­ные епи­ско­пы из­го­ня­лись и ссы­ла­лись. В Ца­рь­гра­де в 815 го­ду был со­зван со­бор ере­ти­ков, на ко­то­ром они сверг­ли с пре­сто­ла свя­то­го пат­ри­ар­ха Ни­ки­фо­ра (806–815; † 828), а на его ме­сто из­бра­ли ере­ти­ка из ми­рян Фе­о­до­та. На ме­сто со­слан­ных и за­клю­чен­ных пра­во­слав­ных епи­ско­пов бы­ли так­же по­став­ле­ны ере­ти­ки. Им­пе­ра­тор при­звал к се­бе игу­ме­нов всех мо­на­сты­рей и пы­тал­ся при­влечь их к ико­но­бор­че­ской ере­си. В чис­ле при­зван­ных был и пре­по­доб­ный Ни­ки­та, ко­то­рый твер­до сто­ял за пра­во­слав­ное ис­по­ве­да­ние. По его при­ме­ру все игу­ме­ны оста­лись вер­ны по­чи­та­нию свя­тых икон. За это их по­са­ди­ли в тем­ни­цу. Пре­по­доб­ный Ни­ки­та му­же­ствен­но пре­тер­пе­вал все ис­пы­та­ния и под­дер­жи­вал твер­дость ду­ха в дру­гих за­клю­чен­ных.

То­гда им­пе­ра­тор и лже­па­три­арх Фе­о­дот ре­ши­ли хит­ро­стью уло­вить упор­ству­ю­щих. Им объ­яви­ли, что им­пе­ра­тор да­ру­ет всем сво­бо­ду и раз­ре­ша­ет по­кло­не­ние ико­нам при од­ном усло­вии: ес­ли они при­мут При­ча­ще­ние от лже­па­три­ар­ха Фе­о­до­та. Дол­го со­мне­вал­ся пре­по­доб­ный, мо­жет ли он всту­пить в цер­ков­ное об­ще­ние с ере­ти­ком, но дру­гие уз­ни­ки умо­ли­ли его при­ча­стить­ся вме­сте с ни­ми. Усту­пая их моль­бам, пре­по­доб­ный Ни­ки­та по­шел в храм, где для об­ма­на ис­по­вед­ни­ков бы­ли вы­став­ле­ны ико­ны, и при­нял При­ча­стие. Но ко­гда он вер­нул­ся к се­бе в мо­на­стырь и уви­дел, что го­не­ние на ико­ны про­дол­жа­ет­ся, то рас­ка­ял­ся в сво­ем по­ступ­ке, вер­нул­ся в Кон­стан­ти­но­поль и стал без­бо­яз­нен­но об­ли­чать ико­но­бор­че­скую ересь. Все уго­во­ры им­пе­ра­то­ра бы­ли им от­верг­ну­ты.

Пре­по­доб­ный Ни­ки­та вновь был за­то­чен в тем­ни­цу, где про­был шесть лет, до кон­чи­ны им­пе­ра­то­ра Льва Ар­мя­ни­на. Там, пе­ре­но­ся го­лод и скор­би, пре­по­доб­ный Ни­ки­та си­лой сво­их мо­литв со­вер­шал чу­де­са: по его мо­лит­ве Фри­гий­ский царь без вы­ку­па от­пу­стил двух плен­ни­ков; три че­ло­ве­ка, по­тер­пев­ших ко­раб­ле­кру­ше­ние, о ко­то­рых мо­лил­ся пре­по­доб­ный Ни­ки­та, бы­ли вол­на­ми вы­бро­ше­ны на бе­рег.

В 824 го­ду при но­вом им­пе­ра­то­ре Ми­ха­и­ле (820–829) пре­по­доб­ный Ни­ки­та ото­шел ко Гос­по­ду. Те­ло его бы­ло пе­ре­ве­зе­но на ко­раб­ле в Ми­ди­кий­ский мо­на­стырь епи­ско­пом Ефес­ским Фе­о­фи­лом и ар­хи­епи­ско­пом Со­лун­ским Иоси­фом. На пу­ти в мо­на­стырь по­гре­баль­ную про­цес­сию встре­тил епи­скоп Плу­си­ад­ский Па­вел с мно­же­ством ино­ков и ми­рян. От гро­ба пре­по­доб­но­го Ни­ки­ты со­вер­ша­лись мно­гие ис­це­ле­ния. Он был по­гре­бен в гроб­ни­це сво­е­го на­став­ни­ка пре­по­доб­но­го Ни­ки­фо­ра. По­сле по­гре­бе­ния у гроб­ни­цы свя­то­го так­же со­вер­ша­лись чу­де­са.

См. так­же: "Жи­тие пре­по­доб­но­го от­ца на­ше­го Ни­ки­ты Ис­по­вед­ни­ка" в из­ло­же­нии свт. Ди­мит­рия Ро­стов­ско­го.