Канон святому преподобному Паисию Великому

Припев: Преподо́бне о́тче Паи́сие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 02 июля (19 июня ст. ст.)

Глас 4.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Прииди́те, воспои́м вси́ Богому́драго Паи́сия, отце́в верхо́вника, преподо́бных красоту́, по́стников основа́ние, покая́ния пропове́дника, и душа́м на́шим засту́пника и храни́теля необори́ма, и все́х ве́рных утвержде́ние.

От блага́го ко́рене до́бр пло́д позна́лся еси́, блаже́нне, от христолюби́вых роди́телей прозя́бл еси́ Боже́ственная ве́твь, нося́щая кра́сныя плоды́ доброде́телей, и́миже ве́рных сердца́ благоуха́л еси́ и пе́ти научи́л еси́ Бо́жия чудеса́.

Ю́ну ти́ су́щу о́троку и осироте́вшу от отца́, ма́ти твоя́, блаже́нне, ору́жием печа́ли пробода́шеся; а́бие же А́нгел Госпо́день во сне́ предста́ е́й и се́тование разреши́ и тебе́, я́ко свяще́нное приноше́ние, да́ти Бо́гу благовести́, ку́пно же и научи́ пе́ти Бо́жия чудеса́.

Богоро́дичен: Ю́на Отроча́ ражда́ется на́м из Де́вы Ма́тере, Ада́ма дре́внейшее, Бо́г Сы́й Преве́чный и Соде́тель вся́ческих. Восхоте́в вообрази́тися в чужде́е, ми́р от тли́ изба́ви, и собо́р по́стников совокупи́ Небе́сным си́лам, и пе́ти научи́ все́х Боже́ственная Его́ чудеса́.

Пе́снь 3.

Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Позна́н бы́л еси́ от пеле́н освяще́н Бо́гу, Паи́сие преподо́бне, и, взе́м тво́й кре́ст, к Нему́ поте́кл еси́ те́пле жи́тельством непоро́чным, и воздержа́нием, и жития́ све́тлостию. Сего́ ра́ди всели́лся еси́ во оби́тели Небе́сныя, помяни́ у́бо и на́с, тя́ помина́ющих и пою́щих: венце́в сла́вы сподо́би.

Оте́чество твое́, сла́вне, Еги́пет просвети́ся честны́м рождество́м твои́м, Нитри́йская гора́ освяти́ся сла́вным житие́м твои́м, вся́ же вселе́нная, чудя́щися, хва́лит па́че есте́ственныя по́двиги твоя́, вси́ же тя́ ку́пно моли́твенника ко Христу́ предлага́ем, блаже́нне Паи́сие.

Ди́вно показа́л еси́ твое́ поще́ние, Паи́сие, еди́нощи в седми́це яды́й, си́м те́ло твое́ смиря́я и по́мыслы души́ укроща́я; к сему́ же и нищету́ самово́льную Христа́ ра́ди стяжа́в, от все́х жите́йских свобо́ден пребы́л еси́, доброде́тельми же обогати́лся еси́. Те́мже и на́с, обнища́вших до́брыми де́лы, моли́твами твои́ми обогати́ и венце́в сла́вы сподо́би.

Богоро́дичен: Ди́вная вели́чия на Тебе́ Госпо́дь сотвори́, Де́во Чи́стая. Сего́ ра́ди пое́м Твое́ рождество́ и сла́вим из Тебе́ рожде́ннаго я́ко Бо́га же и Челове́ка, Его́же моли́ приле́жно с преподо́бными отцы́ и со все́ми святы́ми поми́ловати ду́ши на́ша.

Седа́лен, гла́с 8:

Красоты́ мирски́я измла́да, преподо́бне, возненави́дев, еди́наго Христа́ от се́рдца возлюби́л еси́ и, Тому́ все́ю душе́ю прилепи́вся, я́ко безпло́тен, на земли́ пожи́л еси́ с пло́тию, сла́ву же мимотеку́щую и бога́тство нивочто́же вмени́в, Небе́сное бога́тство восприя́л еси́ и сла́ву ве́чную. Те́мже и ублажа́ем свято́е твое́ успе́ние и, сие́ торжеству́юще, вопие́м ти́: Богоблаже́нне о́тче на́ш Паи́сие, моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

Богоро́дичен: Я́ко Де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: О́гнь бо всели́ся в Тя́ Божества́ и я́ко Младе́нца дои́ши Зижди́теля и Го́спода. Те́мже, А́нгельский и челове́ческий ро́д, досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му рождеству́ Твоему́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

В кре́пости свое́й вра́г преве́тхий, твоея́ души́ не моги́й кре́пости поколеба́ти, ухищря́ет любоиме́нием тебе́ улови́ти: а́бие явля́ется христолюби́вому кня́зю во о́бразе А́нгела прелука́вый, мно́жество зла́та и сребра́ тебе́ да́ти повелева́яй. Ты́ же, сие́ отри́нув, врага́ посрами́л еси́, при́сно поя́: сла́ва, Христе́, си́ле Твое́й.

И я́ко побежде́н бы́сть вра́г и ктому́ уже́ не моги́й прибли́житися к тебе́, оба́че, я́ко ле́в сы́й, рыка́яй и иски́й кого́ поглоти́ти, похи́ти два́ твоя́ ученика́ во иуде́йское нече́стие: о́ваго у́бо, я́ко про́ста, сло́вом улови́: еще́ не приити́ Месси́и – Христу́; о́ваго же, увы́, и обре́затися, и единому́дрствовати со иуде́и сотвори́ скверна́выя ра́ди жены́, неве́дущия пе́ти: сла́ва, Христе́, си́ле Твое́й.

Го́спода Бо́га милосе́рдию подража́я, преподо́бне, прише́дшаго в ми́р гре́шныя спасти́, приле́жно взыска́вый а́гнцы твоя́ и обреты́й, а́бие исхи́тил еси́ я́ от па́губнаго во́лка и Христо́ву ста́ду сочета́л еси́, все́м подая́ о́браз покая́ния и все́м повелева́я при́сно пе́ти: сла́ва, Христе́, си́ле Твое́й.

Богоро́дичен: Господороди́тельнице, Госпоже́ Цари́це, Блага́го Бо́га ро́ждши и Сама́ Блага́я су́щи, Ты́ мне́ предста́ни в ча́с сме́ртный, и изба́ви мя́ от руки́ бесо́вския, и от го́рьких мыта́рств, и вся́каго ина́го муче́ния и сподо́би мя́ одесну́ю ста́ти Сы́на Твоего́, со все́ми избра́нными Его́, в Де́нь Су́дный, моли́твами Твои́ми, Чи́стая.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Име́я наставля́ющую тя́ Бо́жия Ду́ха си́лу, в непроходи́мой пусты́ни живы́й, скача́, я́коже еле́нь, по гора́м, жела́л еси́, о́тче, ра́йския добро́ты. Сего́ ра́ди не да́л еси́ сна́ твои́ма очи́ма, блаже́нне Паи́сие, ни ве́ждома дрема́ния, до́ндеже сподо́бился еси́ пра́ведных селе́ния, е́же угото́ва Бо́г лю́бящим Его́.

Посто́м предочи́стився и ума́ чистото́ю просвети́вся, восхище́н бы́л еси́ в ра́й, узре́л еси́ селе́ния пра́ведных и оби́тели святы́х и пи́щи Небе́сный вкуси́л еси́. Те́мже и на́м, сла́вящим па́мять твою́, прича́стником бы́ти о́ныя моли́ся.

А́нгелов мно́жество ви́дено бы́сть, сохраня́ющих ученики́ твоя́, и́же, тобо́ю наставля́еми, а́нгельское на земли́ подража́ху житие́ и попира́ху си́лу вра́жию, с ни́миже ны́не почива́я во Ца́рствии Небе́снем, блаже́нне Паи́сие, моли́ся Христу́ спасти́ся душа́м на́шим.

Богоро́дичен: А́нгелов святе́йшая вои́стинну яви́лася еси́, Влады́чице, я́ко на Него́же они́ зре́ти не мо́гут, Ты́ Сего́ родила́ еси́ и я́ко Младе́нца на руку́ Твое́ю носи́ла еси́. Те́мже моли́ Его́, я́ко Сы́на Твоего́ и Бо́га на́шего, о чту́щих Тя́ при́сно, с Паи́сием блаже́нным.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

И́же во отце́х вели́кий Ефре́м, слы́шав Боже́ственный свы́ше гла́с, пове́дающ пресла́вная о тебе́, блаже́нне, а́бие вожделе́ ви́дети тя́. Ско́ро у́бо потече́ ко Еги́пту и, я́ко прии́де и обре́те тя́, вельми́ удиви́ся Боже́ственней твое́й све́тлости и Ду́ха благода́ти, те́мже благодаря́ще и сла́вяще Бо́га, ку́пно же и моля́шеся с тобо́ю о душа́х на́ших.

Смире́н, незло́бив, про́ст, кро́ток и молчали́в бы́л еси́, о́тче, па́че челове́ка вои́стинну. Сего́ ра́ди Кро́ткому Па́стырю – Христу́, я́ко овча́ незло́биво, усе́рдно после́довал, еси́ и, я́ко А́нгел, Тому́ послужи́в, ны́не со А́нгелы весели́шися на земли́ кро́тких. Помина́й на́с, чту́щих тя́, Паи́сие блаже́нне.

Иису́са сла́дкаго жела́я при́сно насыща́тися кра́сныя добро́ты, в гора́х и в пеще́рах заключи́лся еси́, во мно́гих по́двизех и нищете́ живы́й. Прии́де тебе́ Госпо́дь, и ума́лена тя́ зело́ возвели́чи, и, обнища́вша во́льне Его́ ра́ди, вельми́ тя́ обогати́ Небе́сным Ца́рством, иде́же ны́не с Ни́м ца́рствуеши. Моли́ся приле́жно и на́м в Ца́рствие Небе́сное вни́ти.

Богоро́дичен: Иису́са Сла́дкаго ро́ждшая, Отрокови́це Богороди́тельнице, Иису́са Всеще́драго и Человеколюби́ваго, Иису́са еди́наго Благоутро́бнаго, Того́ моли́, Влады́чице ми́ра, с по́стники и преподо́бными, поми́ловати ду́ши на́ша.

Конда́к, гла́с 8:

От мла́да зва́нию Го́спода твоего́ после́довал еси́ усе́рдно, блаже́нне, вся́, я́же в ми́ре кра́сная, Его́ ра́ди оста́вив. Кре́ст тво́й на ра́мена взе́м, всели́лся еси́ в пусты́ню, и, та́мо а́нгельски пожи́в, те́ло твое́ посто́м и моли́твами изнури́л еси́, и мно́гим пу́ть бы́л еси́ ко спасе́нию, вся́ возводя́ к Боже́ственней высоте́, Паи́сие преподо́бне, отце́в и по́стников тве́рдое основа́ние.

И́кос:

Прииди́те, Богоизбра́ннии мона́шествующих собо́ри, похва́лим ны́не и пе́сньми почти́м свяще́нную па́мять пречу́днаго отца́, блаже́ннаго Паи́сия, взыва́юще ему́ такова́я: ра́дуйся, боголюби́вых роди́телей рожде́ние; ра́дуйся, от са́мых пеле́н свяще́нное Бо́гу приноше́ние. Ра́дуйся, я́ко ми́ра сего́ вся́ кра́сная оста́вил еси́; ра́дуйся, я́ко к жесто́кому житию́ себе́ напра́вил еси́. Ра́дуйся, я́ко вся́ уме́ты бы́ти вмени́л еси́; ра́дуйся, я́ко еди́наго то́кмо Христа́ возлюби́л еси́. Ра́дуйся, вся́ се́ти вра́жия до конца́ разруши́вый; ра́дуйся, терпе́нием по́двигов твои́х А́нгелы удиви́вый. Ра́дуйся, я́ко те́ло твое́ посто́м и бде́нием удручи́л еси́; ра́дуйся, я́ко ду́шу твою́ моли́твою и ума́ чистото́ю просвети́л еси́. Ра́дуйся, безмо́лвия и пусты́ни люби́телю; ра́дуйся, по́стников и мона́хов Богому́дрый учи́телю. Ра́дуйся, Паи́сие преподо́бне, отце́в и по́стников тве́рдое основа́ние.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Язы́к челове́ч не мо́жет изрещи́ по́двиги твоя́, блаже́нне, па́че бо естества́ подвиза́лся еси́, мно́гажды и надо́лзе без пи́щи пребыва́я. Сего́ ра́ди, я́ко вели́кое со́лнце, просия́л еси́ во вся́ ми́ра концы́, и ны́не со А́нгелы лику́я на Небесе́х, помина́й на́с, чту́щих пречестну́ю па́мять твою́.

Вели́к по́стник вои́стинну показа́лся еси́, преподо́бне: а́лчбою бо и жа́ждою томи́л еси́ пло́ть твою́, жела́я наслади́тися Небе́снаго Хле́ба – Христа́, Его́же ны́не, о́тче Паи́сие, насыща́яся, и на́м прича́стником бы́ти О́наго моли́ся.

Еди́ницу Трисвяту́ю песносло́вил еси́, Отца́, и Сы́на, и Ду́ха Всесвята́го, Тро́ицу Неразде́льную, от Нея́же де́йство чуде́с прия́л еси́, е́же исцеля́ти неду́ги разли́чныя и прогоня́ти ду́хи лука́вые, те́мже па́мять твою́ почита́ем, досточу́дне.

Богоро́дичен: Еди́наго от Тро́ицы Христа́ родила́ еси́ на́м, Всесвята́я Де́во Богороди́тельнице, и Того́ млеко́м пита́ла еси́, все́м пи́щу даю́щаго, и на руку́ Твое́ю носи́ла еси́, вся́ нося́щаго, и на святы́х и преподо́бных почива́ющаго, и вся́ Тебе́ ра́ди, Чи́стая, освяща́ющаго.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Лю́ди, неве́дущия Святы́я Тро́ицы, науча́емы же от не́коего ста́рца почита́ти дво́ицу, ты́, блаже́нне, воображе́нием ко́шниц с тремя́ ушесы́ научи́л еси́ та́инству Святы́я Тро́ицы, сказу́я и я́сно пропове́дуя все́м, я́ко Еди́н Бо́г в Трие́х Ли́цах неразде́льно сла́вится во ве́ки.

И́же мона́хом бы́л еси́ наста́вник и па́стырь овца́м на па́жити Бо́жия сло́ва, сугу́бу благода́ть от Го́спода прия́л еси́, Паи́сие, и венцы́ нетле́нны и ве́чную ра́дость; и ны́не лику́я, в весе́лии пое́ши Го́спода во вся́ ве́ки.

Кто́ изрече́т по́двиги твоя́, о всеблаже́нне Паи́сие! Ты́ бо, безпло́тен, пожи́л еси́ на земли́ и ны́не преше́л еси́ к Небе́сным во гла́се ра́дования, к Трисо́лнечному Све́ту, иде́же во Отце́ зри́ши Сы́на и Ду́ха Всесвята́го, Тро́ицу во Еди́нице, Е́йже покланя́ющеся, вси́ пое́м во вся́ ве́ки.

Богоро́дичен: Кто́ изрече́т на Тебе́ бы́вшее стра́шное та́инство, о Богороди́тельнице! Ты́ бо еди́на яви́лася еси́ во все́х ро́дех Де́ва и Ма́ти, Бо́га Сло́ва ро́ждши, де́вствуеши па́ки. Те́мже вси́ преподо́бнии к Тебе́ прибега́ют и, де́вство держа́ние, от Тебе́, Влады́чице, усыновле́ния ча́ют.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

А́нгельскому житию́ поревнова́л еси́, всеблаже́нне: равноа́нгельно в Нитри́йстей горе́ пожи́л еси́ и Святе́й Тро́ице в коне́ц угоди́л еси́. Те́м и равноа́нгельну по́честь от Бо́га сподо́бился еси́ прия́ти: ны́не со апо́столы, му́ченики, преподо́бными и со все́ми пра́ведными лику́я, помина́й на́с, чту́щих пречестну́ю па́мять твою́.

Го́ры и хо́лмы да взыгра́ют, и все́ мно́жество мона́шествующих да воспле́щет дне́сь, я́ко наста́ на́м светоно́сный тво́й пра́здник, всеблаже́нне Паи́сие, испо́лнь ра́дости и весе́лия духо́внаго, испо́лнь благоуха́ния и просвеще́ния. И ны́не, иму́ще тя́ поще́ния пра́вило и законополо́жника, ра́дуемся.

От ра́б недосто́йных приими́ хвалу́, преподо́бне Паи́сие, и жития́ сего́ непостоя́нную пучи́ну да́руй на́м немяте́жно прейти́, и моли́тву о на́с к Бо́гу сотвори́, че́стно почита́ющих твою́ па́мять, и одержа́щих и жду́щих на́с зо́л изба́ви, да во ве́ки тебе́ вели́чием.

Богоро́дичен: О́крест Тебе́ предстоя́т преподо́бных ли́ки, Пресвята́я Богоро́дице, я́ко сы́нове дне́, от Тебе́, и́стинныя Ма́тере Све́та, усыновле́ни и, Твое́ю сла́вою крася́щеся, хва́лят Тя́ немо́лчными гла́сы. И́хже моли́твами и уго́дника Твоего́ Паи́сия, поми́луй на́с, недосто́йных ра́б Твои́х, и от все́х злы́х свободи́, и Ца́рствия Небе́снаго сподо́би, да во ве́ки Тебе́ велича́ем, Чи́стая.

Свети́лен:

От Нитри́йския пусты́ни возсия́в, вселе́нную просвеща́еши, мона́хов мно́жества ра́дуются о твое́й па́мяти и Еги́пет торжеству́ет, о Паи́сие Богоно́се, не преста́й у́бо моли́тися о душа́х на́ших.

Богоро́дичен: О́блак ле́гкий еси́, Чи́стая, на не́мже седя́, прии́де во Еги́пет Вседержи́тель Госпо́дь и свети́льники преподо́бныя соде́ла, с ни́миже моли́ся, Влады́чице, спасти́ся на́м.

Житие преподобного Паисия Великого

Пре­по­доб­ный Па­и­сий Ве­ли­кий ро­дил­ся в Егип­те в по­ло­вине IV ве­ка. Еще в дет­стве, ли­шив­шись от­ца, он сво­ей ма­те­рью был по­свя­щен Бо­гу и в от­ро­че­стве, слу­жа кли­ри­ком цер­ков­ным, по­ка­зал се­бя бла­го­че­сти­вым и рев­ност­ным ис­пол­ни­те­лем сво­их обя­зан­но­стей.

В зре­лом воз­расте при­нял ино­че­ство в од­ном еги­пет­ском ски­ту, где дол­го под­ви­зал­ся, на­став­ля­е­мый свя­тым Пам­вой (IV в.; па­мять 18/31 июля). Под его опыт­ным ру­ко­вод­ством пре­по­доб­ный Па­и­сий про­шел су­ро­вую шко­лу по­движ­ни­че­ства, жил в со­вер­шен­ном уеди­не­нии, три го­да не ви­дя ли­ца че­ло­ве­че­ско­го, изу­чал Свя­щен­ное Пи­са­ние, по­стил­ся, мо­лил­ся и пре­успе­вал во вся­кой доб­ро­де­те­ли. По смер­ти сво­е­го учи­те­ля пре­по­доб­ный Па­и­сий, уже укре­пив­ший­ся в по­дви­гах, уда­лил­ся в глу­би­ну пу­сты­ни, где ис­сек се­бе пе­ще­ру, и там в без­мол­вии слу­жил Гос­по­ду.

Ве­ли­кие по­движ­ни­че­ские тру­ды пре­по­доб­но­го Па­и­сия ста­ли при­вле­кать к нему мно­го­чис­лен­ных по­сле­до­ва­те­лей из мо­на­хов и ми­рян, и во­круг пе­ще­ры воз­ник­ла ино­че­ская Лав­ра, на­сель­ни­ки ко­то­рой жи­ли под его ру­ко­вод­ством. Глав­ной ино­че­ской доб­ро­де­те­лью пре­по­доб­ный Па­и­сий счи­тал без­услов­ное под­чи­не­ние лич­ной во­ли оте­че­ской во­ле опыт­ных в по­движ­ни­че­стве стар­цев, ко­то­рые по­уча­ли и ру­ко­во­ди­ли но­во­на­чаль­ных ино­ков в труд­ных ас­ке­ти­че­ских упраж­не­ни­ях. Од­них из воз­лю­бив­ших ино­че­скую жизнь пре­по­доб­ный учил про­во­дить вре­мя в мо­лит­ве и чте­нии Св. Пи­са­ния, дру­гих за­став­лял сов­мест­но петь и воз­гре­вать в се­бе брат­скую лю­бовь и еди­но­мыс­лие, иным ве­лел за­ни­мать­ся ре­мес­ла­ми, чтобы они вме­сте с физи­че­ским тру­дом упраж­ня­лись и в доб­ро­де­те­ли, до­бы­вая про­пи­та­ние не толь­ко для се­бя, но и для бед­ных. Ко­гда ино­че­ская об­щи­на бы­ла вполне бла­го­устро­е­на, пре­по­доб­ный, стре­мясь к уеди­не­нию, уда­лил­ся в пу­сты­ню, про­слав­лен­ную по­дви­га­ми св. Ам­мо­на (IV в.; па­мять 4/17 ок­тяб­ря).

Но и здесь ве­ли­кие по­дви­ги и мно­гие чу­де­са со­бра­ли во­круг кел­лии пре­по­доб­но­го Па­и­сия рев­ни­те­лей бла­го­че­стия, и воз­ник­ла но­вая лав­ра, ко­то­рой ру­ко­во­дил один из его уче­ни­ков по его уста­ву.

За свои ве­ли­кие по­дви­ги пре­по­доб­ный Па­и­сий был удо­сто­ен от Гос­по­да со­зер­ца­ния небес­ных тайн. Скон­чал­ся он в глу­бо­кой ста­ро­сти, мо­щи его, про­слав­лен­ные чу­де­са­ми, бы­ли по­том пе­ре­не­се­ны в Пи­си­дию (в Ма­лой Азии).

См. так­же: "Жи­тие пре­по­доб­но­го от­ца на­ше­го Па­и­сия Ве­ли­ко­го" в из­ло­же­нии свт. Ди­мит­рия Ро­стов­ско­го.