Канон святому преподобному Семеону Персидскому

Припев: Преподо́бне о́тче Симео́не, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 30 апреля (17 апреля ст. ст.)

Глас 5.

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Венце́м нетле́ния оде́явся и престо́лу Госпо́дню, всеблаже́нне, предстоя́, ве́рою чту́щия твое́ свято́е страда́ние моли́твами твои́ми при́сно спаса́й.

Че́стен сосу́д яви́лся еси́ Боже́ственнаго Ду́ха, Симео́не богоно́се, И́мже пома́зався, упа́сл еси́ лю́ди бога́тны па́лицею боже́ственных уче́ний, му́чениче, на воде́ разу́мней.

Уста́вил еси́ пре́лести, му́дре, тече́ния сла́дких твои́х слове́с боже́ственными тече́нии и кро́вными ка́плями, святи́телю сла́вне, сего́ ра́ди ве́рно пое́м тя́.

Богоро́дичен: Но́сиши рука́ми, Де́во, вся́ Нося́щаго и пита́еши я́ко Младе́нца Пода́теля млека́. Того́ у́бо моли́ лю́ди Твоя́ вся́ уще́дрити, ве́рно пою́щия Тя́.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Красно́ души́ движе́ния творя́ и ходя́ стезе́ю, к Бо́гу веду́щею, вся́каго безпу́тия лука́ваго уклони́лся еси́ и взя́лся еси́ к жи́зненней две́ри, сла́вне, ве́чнаго поко́я.

Удали́в по́мысл от страсте́й плотски́х, безкро́вны, о́тче, прине́сл еси́ же́ртвы Сло́ву, поже́ршемуся на́с ра́ди, и, Сего́ возвеща́я па́че сло́ва Боже́ственное воплоще́ние, пожре́н бы́л еси́, я́ко а́гнец незло́бив.

Свя́то твое́ проводи́в житие́, пребога́те, со святы́ми ны́не всели́лся еси́, страда́ньми просвети́в твою́ ду́шу, и возсия́в со́лнца, блаже́нне, светле́е, и сы́н све́та бы́в.

Богоро́дичен: Кля́твы прароди́тельныя на́с свободи́ла еси́, благослове́ньми все́х венча́вшаго Сло́ва вопло́щши, Чи́стая, при́сно благослове́нная, страстоте́рпцев удобре́ние и согреша́ющих очище́ние.

Седа́лен, гла́с 1.

Я́ко со́лнце, на́м свята́я твоя́ возсия́ па́мять, му́дре Симео́не святи́телю, страда́вших с тобо́ю ве́рных озаря́ющи, ю́же дне́сь сотворя́юще, вопие́м: моли́те о на́с, страстоте́рпцы, еди́наго Человеколю́бца.

Сла́ва, и ны́не, богоро́дичен: Боже́ственнаго естества́ не отлу́чься, пло́ть бы́в во чре́ве Твое́м, но Бо́г вочелове́чься и пребы́сть, И́же по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чную, еди́н Госпо́дь. Того́ приле́жно моли́ дарова́ти на́м ве́лию ми́лость.

Крестобогоро́дичен: Нескве́рная А́гница Сло́ва, нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Ведо́мь свя́зан, разреши́л еси́ хи́трости лука́ваго, священнотаи́нниче пребога́те, пострада́в до́блественне, венцы́ нетле́ния восприя́л еси́.

Глаго́л твои́х стрела́ми уязви́л еси́, священному́чениче Симео́не, беззако́ннующих собо́ры и огне́м крове́й многобо́жную ле́сть попали́л еси́.

Соста́вим ли́ки, блажа́ще богоно́снаго Симео́на, и Ана́нию сла́внаго, и с ни́ми подо́бныя, му́жески пострада́вшия му́ченики.

Богоро́дичен: Из Тебе́ пра́вды Со́лнце возсия́в па́че ума́, вселе́нную просвети́, Богора́дованная Отрокови́це, и пре́лести зи́му разруши́.

Пе́снь 5.

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Сто́лп и утвержде́ние Це́ркви Бо́жии я́влься, преблаже́нне, твои́м страда́нием непрекло́нну и непоколеби́му сию́ во ве́ки соблюди́ хода́тайствы твои́ми.

Пе́сньми ублажа́ем житие́ твое́, гоне́ния же и сопротивле́ния, Симео́не пребога́те, и́хже ра́ди сподо́бился еси́ блаже́нныя кончи́ны.

Ми́ром боже́ственнаго пома́зания па́стырь бы́в, за ста́до пожре́н бы́л еси́, блаже́нне, я́коже ове́н наро́чит, и перворо́дных Це́ркви возвесели́л еси́.

Богоро́дичен: Да обря́щу Тя́, Влады́чице, изыма́ющую мя́ в ча́с Суда́ осужде́ния, ве́рно сла́вяй Тя́, и му́к изба́влюся, жду́щих мя́.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Яви́лся еси́ Боже́ственнаго испо́лнен утеше́ния, блаже́нне Симео́не, мече́м кончи́ну блаже́нную прие́м со святы́ми, све́тло пострада́вшими му́ченики.

Ю́нии и ста́рцы, мона́си и свяще́нницы, до́брым по́двигом подви́гшеся за Христа́, я́коже а́гницы, пожре́ни бы́ша.

Блаже́нно житие́ пожи́вше, страда́льцы, кончи́ну от Христа́ прия́сте блаже́нную, мече́м сконча́стеся, ра́дующеся.

Богоро́дичен: Из Тебе́ возсия́, Пресвята́я, Соде́тель, и заре́ю боже́ственнаго ра́зума су́щия в нощи́ неразу́мия просвети́.

Пе́снь 7.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Све́щник явля́я ра́зум, све́т позна́лся еси́, преподо́бне, во тме́ спя́щим неве́дения и разори́л еси́ огнеслужи́телей тму́, пострада́в пресла́вно.

Яви́лся еси́ посреди́ му́ченик, водя́ со́нм, с ни́миже, сконча́вся мече́м, взыва́л еси́, Симео́не богоно́сне: Бо́же, благослове́н еси́.

Собо́р многочи́сленных му́ченик почти́м, че́стно совокупля́емь от разли́чных градо́в, священноде́йственник боже́ственных и мона́хов богоно́сных.

Богоро́дичен: Исцели́, Пренепоро́чная, стра́сти се́рдца моего́, уста́ви смуще́ние ума́ моего́ обурева́емое, и спаси́ мя, пою́ща: Бо́же, благослове́н еси́.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

У́гль мы́сленный, Симео́не, показу́емь огню́ не послужи́л еси́, преблаже́нне, ве́щь же го́рьку многобо́жия попали́в, к незаходи́мому сия́нию, преподо́бне, преста́вился еси́.

Исцели́ на́ша не́мощи, му́чениче, мра́к отжени́ серде́ц на́ших и ве́чныя жи́зни покажи́ прича́стники твои́ми ко Влады́це все́х хода́тайствы.

Во́инство че́стно, собо́р Бо́жий му́ченик воспое́м, сточи́сленное, и́мже нача́льник бя́ше Симео́н до́блий, я́ко па́стырь и вели́к Це́ркве сто́лп.

Богоро́дичен: Да честно́е Твое́ прояви́т рождество́ купина́, неопали́ма ви́дена бы́сть, Пречи́стая: О́гнь бо Боже́ственный во утро́бе прие́мши, ника́коже опали́лася еси́. Те́мже Тя́ пое́м.

Пе́снь 9.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Я́ко прия́тно кади́ло, прине́слся еси́ все́х Царю́, я́ко заколе́ние свяще́нно, я́ко предобра́ же́ртва прия́тная, я́ко ми́ро, я́ко приноше́ния, я́ко ши́пок благово́нен, святи́телю досточу́дне.

Утверже́ние бы́в, святи́телю, все́м ве́рным, поже́рлся еси́, я́коже ове́н, и к мы́сленным преста́вился еси́ ца́рством и Царю́ все́х и Бо́гу, блаже́нне, предстои́ши, боже́ственною сла́вою облиста́емь.

Свята́я па́мять твоя́, я́коже вели́кое со́лнце, на́м возсия́, Симео́не, дне́сь, му́дре, и и́же с тобо́ю му́ченик, с ни́миже на́м проси́ от Христа́ благода́ти, и ми́лости, и согреше́ний избавле́ния.

Богоро́дичен: Све́тлыми сия́ньми, Пречи́стая Ма́ти Бо́жия, озари́ мо́й у́м, тмо́ю лю́таго неразу́мия одержи́мый, я́ко да, улучи́в боже́ственное просвеще́ние, вели́чия Твоя́ возвещу́, Присноде́во.

Пѣ́снь а҃.

І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Вѣнце́мъ нетлѣ́нїѧ ѡ҆дѣ́ѧвсѧ, и҆ престо́лꙋ гдⷭ҇ню, всебл҃же́нне, предстоѧ̀, вѣ́рою чтꙋ́щыѧ твоѐ свѧто́е страда́нїе, моли́твами твои́ми при́снѡ спаса́й.

Че́стенъ сосꙋ́дъ ꙗ҆ви́лсѧ є҆сѝ бжⷭ҇твеннагѡ дх҃а, сѷмеѡ́не бг҃оно́се: и҆́мже пома́завсѧ, ᲂу҆па́слъ є҆сѝ лю́ди бога̑тны па́лицею бжⷭ҇твенныхъ ᲂу҆че́нїй, мꙋ́чениче, на водѣ̀ разꙋ́мнѣй.

Оу҆ста́вилъ є҆сѝ пре́лести, мꙋ́дре, течє́нїѧ, сла́дкихъ твои́хъ слове́съ бжⷭ҇твенными течє́нїи, и҆ кро́вными ка́плѧми, ст҃и́телю сла́вне: сегѡ̀ ра́ди вѣ́рнѡ пое́мъ тѧ̀.

Бг҃оро́диченъ: Но́сиши рꙋка́ми, дв҃о, всѧ̑ носѧ́щаго, и҆ пита́еши, ꙗ҆́кѡ млⷣнца, пода́телѧ млека̀. того̀ ᲂу҆̀бо молѝ, лю́ди твоѧ̑ всѧ̑ ᲂу҆ще́дрити, вѣ́рнѡ пою́щыѧ тѧ̀.

Пѣ́снь г҃.

І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.

Краснѡ̀ дꙋшѝ движє́нїѧ творѧ̀, и҆ ходѧ̀ стезе́ю къ бг҃ꙋ ведꙋ́щею, всѧ́кагѡ безпꙋ́тїѧ лꙋка́вагѡ ᲂу҆клони́лсѧ є҆сѝ, и҆ взѧ́лсѧ є҆сѝ къ жи́зненнѣй две́ри, сла́вне, вѣ́чнагѡ поко́ѧ.

Оу҆дали́въ по́мыслъ ѿ страсте́й плотски́хъ, безкрѡ́вны, ѻ҆́ч҃е, прине́слъ є҆сѝ жє́ртвы, сло́вꙋ поже́ршемꙋсѧ на́съ ра́ди, и҆ сегѡ̀ возвѣща́ѧ па́че сло́ва бжⷭ҇твенное воплоще́нїе, пожре́нъ бы́лъ є҆сѝ ꙗ҆́кѡ а҆́гнецъ неѕло́бивъ.

Свѧ́тѡ твоѐ проводи́въ житїѐ, пребога́те, со ст҃ы́ми ны́нѣ всели́лсѧ є҆сѝ, страда́ньми просвѣти́въ твою̀ дꙋ́шꙋ, и҆ возсїѧ́въ со́лнца, бл҃же́нне, свѣтлѣ́е, и҆ сы́нъ свѣ́та бы́въ.

Бг҃оро́диченъ: Клѧ́твы прароди́тельныѧ на́съ свободи́ла є҆сѝ, благослове́ньми всѣ́хъ вѣнча́вшаго сло́ва вопло́щши, чⷭ҇таѧ, при́снѡ благослове́ннаѧ, страстоте́рпцєвъ ᲂу҆добре́нїе, и҆ согрѣша́ющихъ ѡ҆чище́нїе.

Сѣда́ленъ, гла́съ а҃.

Ꙗ҆́кѡ со́лнце на́мъ свѧта́ѧ твоѧ̀ возсїѧ̀ па́мѧть, мꙋ́дре сѷмеѡ́не ст҃и́телю, страда́вшихъ съ тобо́ю, вѣ́рныхъ ѡ҆зарѧ́ющи, ю҆́же дне́сь сотворѧ́юще вопїе́мъ: моли́те ѡ҆ на́съ, страстоте́рпцы, є҆ди́наго чл҃вѣколю́бца.

Сла́ва, и҆ ны́нѣ, бг҃оро́диченъ: Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по рождествѣ̀ мт҃рь тѧ̀ дв҃ꙋ, ꙗ҆́кѡ пре́жде рождества̀ сохрани́въ всенепоро́чнꙋю, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю млⷭ҇ть.

Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃.

І҆рмо́съ: Бжⷭ҇твенное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.

Ведо́мь свѧ́занъ, разрѣши́лъ є҆сѝ хи́трѡсти лꙋка́вагѡ, свѧщеннотаи́нниче пребога́те, пострада́въ до́блественнѣ, вѣнцы̀ нетлѣ́нїѧ воспрїѧ́лъ є҆сѝ.

Глагѡ́лъ твои́хъ стрѣла́ми ᲂу҆ѧзви́лъ є҆сѝ, свѧщенномꙋ́чениче сѷмеѡ́не, беззако́ннꙋющихъ собо́ры: и҆ ѻ҆гне́мъ крове́й многобо́жнꙋю ле́сть попали́лъ є҆сѝ.

Соста́вимъ ли́ки, блажа́ще бг҃оно́снаго сѷмеѡ́на и҆ а҆на́нїю сла́внаго, и҆ съ ни́ми подѡ́бныѧ, мꙋ́жески пострада́вшыѧ мꙋ́ченики.

Бг҃оро́диченъ: И҆зъ тебє̀ пра́вды сл҃нце возсїѧ́въ па́че ᲂу҆ма̀, вселе́ннꙋю просвѣтѝ, бг҃ора́дованнаѧ ѻ҆трокови́це, и҆ пре́лести зи́мꙋ разрꙋшѝ.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ, ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.

Сто́лпъ и҆ ᲂу҆твержде́нїе цр҃кви бж҃їи ꙗ҆́вльсѧ, пребл҃же́нне, твои́мъ страда́нїемъ, непрекло́ннꙋ и҆ непоколеби́мꙋ сїю̀ во вѣ́ки соблюдѝ хода́тайствы твои́ми.

Пѣ́сньми ᲂу҆блажа́емъ житїѐ твоѐ, гонє́нїѧ же и҆ сопротивлє́нїѧ, сѷмеѡ́не пребога́те: и҆́хже ра́ди сподо́билсѧ є҆сѝ блаже́нныѧ кончи́ны.

Мѵ́ромъ бжⷭ҇твеннагѡ пома́занїѧ па́стырь бы́въ, за ста́до пожре́нъ бы́лъ є҆сѝ, блаже́нне, ꙗ҆́коже ѻ҆ве́нъ наро́читъ, и҆ перворо́дныхъ цє́ркви возвесели́лъ є҆сѝ.

Бг҃оро́диченъ: Да ѡ҆брѧ́щꙋ тѧ̀, влⷣчце, и҆з̾има́ющꙋю мѧ̀ въ ча́съ сꙋда̀ ѡ҆сꙋжде́нїѧ, вѣ́рнѡ сла́вѧй тѧ̀, и҆ мꙋ́къ и҆зба́влюсѧ ждꙋ́щихъ мѧ̀.

Пѣ́снь ѕ҃.

І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.

Ꙗ҆ви́лсѧ є҆сѝ бжⷭ҇твеннагѡ и҆спо́лненъ ᲂу҆тѣше́нїѧ, бл҃же́нне сѷмеѡ́не, мече́мъ кончи́нꙋ бл҃же́ннꙋю прїе́мъ, со ст҃ы́ми свѣ́тлѡ пострада́вшими мꙋ́ченики.

Ю҆́нїи и҆ ста́рцы, мона́си и҆ свѧще́нницы, до́брымъ по́двигомъ подви́гшесѧ за хрⷭ҇та̀, ꙗ҆́коже а҆́гницы пожре́ни бы́ша.

Блаже́нно житїѐ пожи́вше страда́льцы, кончи́нꙋ ѿ хрⷭ҇та̀ прїѧ́сте бл҃же́ннꙋю, мече́мъ сконча́стесѧ ра́дꙋющесѧ.

Бг҃оро́диченъ: И҆зъ тебє̀ возсїѧ̀, прест҃а́ѧ, содѣ́тель, и҆ заре́ю бж҃е́ственнагѡ ра́зꙋма сꙋ́щыѧ въ нощѝ неразꙋ́мїѧ просвѣтѝ.

Пѣ́снь з҃.

І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Свѣ́щникъ ꙗ҆влѧ́ѧ ра́зꙋмъ, свѣ́тъ позна́лсѧ є҆сѝ, преподо́бне, во тмѣ̀ спѧ́щымъ невѣ́дѣнїѧ, и҆ разори́лъ є҆сѝ ѻ҆гнеслꙋжи́телей тмꙋ̀, пострада́въ пресла́внѡ.

Ꙗ҆ви́лсѧ є҆сѝ посредѝ мч҃никъ водѧ̀ со́нмъ, съ ни́миже сконча́всѧ мече́мъ, взыва́лъ є҆сѝ, сѷмеѡ́не бг҃оно́сне: бж҃е, бл҃гослове́нъ є҆сѝ.

Собо́ръ многочи́сленныхъ мч҃никъ почти́мъ, че́стнѡ совокꙋплѧ́емь ѿ разли́чныхъ градѡ́въ, свѧщеннодѣ́йствєнникъ бжⷭ҇твенныхъ, и҆ мона́хѡвъ бг҃оно́сныхъ.

Бг҃оро́диченъ: И҆сцѣлѝ, пренепоро́чнаѧ, стра̑сти се́рдца моегѡ̀, ᲂу҆ста́ви смꙋще́нїе ᲂу҆ма̀ моегѡ̀ ѡ҆бꙋрева́емое, и҆ спаси́ мѧ пою́ща: бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ, гдⷭ҇а, по́йте, и҆ превозноси́те во всѧ̑ вѣ́ки.

Оу҆́гль мы́сленный, сѷмеѡ́не, показꙋ́емь, ѻ҆гню̀ не послꙋжи́лъ є҆сѝ, пребл҃же́нне: ве́щь же го́рькꙋ многобо́жїѧ попали́въ, къ незаходи́момꙋ сїѧ́нїю, преподо́бне, преста́вилсѧ є҆сѝ.

И҆сцѣлѝ на́шѧ не́мѡщи, мч҃ниче, мра́къ ѿженѝ серде́цъ на́шихъ, и҆ вѣ́чныѧ жи́зни покажѝ прича́стники твои́ми ко влⷣцѣ всѣ́хъ хода́тайствы.

Во́инство че́стно собо́ръ бж҃їй мꙋ́чєникъ воспое́мъ, сточи́сленное, и҆̀мже нача́льникъ бѧ́ше сѷмеѡ́нъ до́блїй, ꙗ҆́кѡ па́стырь и҆ вели́къ цр҃кве сто́лпъ.

Бг҃оро́диченъ: Да чⷭ҇тно́е твоѐ проѧви́тъ ржⷭ҇тво̀ кꙋпина̀, неѡпали́ма ви́дѣна бы́сть, пречⷭ҇таѧ: ѻ҆́гнь бо бжⷭ҇твенный во ᲂу҆тро́бѣ прїе́мши, ника́коже ѡ҆пали́ласѧ є҆сѝ. тѣ́мже тѧ̀ пое́мъ.

Пѣ́снь ѳ҃.

І҆рмо́съ: И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

Ꙗ҆́кѡ прїѧ́тно кади́ло прине́слсѧ є҆сѝ всѣ́хъ цр҃ю̀, ꙗ҆́кѡ заколе́нїе свѧще́нно, ꙗ҆́кѡ предобра̀ же́ртва прїѧ́тнаѧ, ꙗ҆́кѡ мѵ́ро, ꙗ҆́кѡ приношє́нїѧ, ꙗ҆́кѡ ши́покъ благово́ненъ, ст҃и́телю досточꙋ́дне.

Оу҆тверже́нїе бы́въ, ст҃и́телю, всѣ̑мъ вѣ̑рнымъ, поже́рлсѧ є҆сѝ ꙗ҆́коже ѻ҆ве́нъ, и҆ къ мы́слєннымъ преста́вилсѧ є҆сѝ црⷭ҇твѡмъ, и҆ цр҃ю̀ всѣ́хъ и҆ бг҃ꙋ, бл҃же́нне, предстои́ши, бжⷭ҇твенною сла́вою ѡ҆блиста́емь.

Свѧта́ѧ па́мѧть твоѧ̀, ꙗ҆́коже вели́кое со́лнце на́мъ возсїѧ̀, сѷмеѡ́не, дне́сь, мꙋ́дре, и҆ и҆̀же съ тобо́ю мч҃никъ: съ ни́миже на́мъ просѝ ѿ хрⷭ҇та̀ бл҃года́ти и҆ ми́лости, и҆ согрѣше́нїй и҆збавле́нїѧ.

Бг҃оро́диченъ: Свѣ́тлыми сїѧ́ньми, пречⷭ҇таѧ мт҃и бж҃їѧ, ѡ҆зарѝ мо́й ᲂу҆́мъ, тмо́ю лю́тагѡ неразꙋ́мїѧ ѡ҆держи́мый: ꙗ҆́кѡ да ᲂу҆лꙋчи́въ бжⷭ҇твенное просвѣще́нїе, вели̑чїѧ твоѧ̑ возвѣщꙋ̀, приснодв҃о.

Священномученик Симеон, епископ, мученики Авделай, Анания и иные многие

Свя­щен­но­му­че­ник Си­ме­он, епи­скоп Пер­сид­ский, по­стра­дал во вре­мя го­не­ния на хри­сти­ан от Пер­сид­ско­го ца­ря Са­по­ра II (310–381). Он был епи­ско­пом го­ро­да Селев­кии – Кте­зи­фо­на. Свя­ти­те­ля окле­ве­та­ли в свя­зях с Гре­че­ским го­су­дар­ством и враж­деб­ных дей­стви­ях про­тив Пер­сид­ско­го ца­ря.

В 344 го­ду царь из­дал указ, по ко­то­ро­му хри­сти­ане бы­ли об­ло­же­ны тя­же­лым на­ло­гом. Ко­гда неко­то­рые из них от­ка­за­лись его пла­тить (это бы­ло пред­став­ле­но как бунт), царь от­крыл же­сто­кое го­не­ние на хри­сти­ан. Свя­то­го Си­мео­на как мни­мо­го вра­га Пер­сид­ско­го цар­ства при­ве­ли на суд в же­лез­ных око­вах вме­сте с дву­мя пре­сви­те­ра­ми-му­че­ни­ка­ми Ав­де­ла­ем и Ана­ни­ей. Свя­той епи­скоп да­же не по­кло­нил­ся ца­рю. Тот спро­сил, по­че­му он не воз­дал ему долж­ных по­че­стей. Свя­ти­тель от­ве­тил: "Рань­ше я кла­нял­ся тво­е­му са­ну, те­перь же, ко­гда я при­ве­ден для то­го, чтобы от­речь­ся от мо­е­го Бо­га и от­сту­пить от сво­ей ве­ры, мне не по­до­ба­ет те­бе кла­нять­ся".

Царь стал убеж­дать его по­кло­нить­ся солн­цу, в про­тив­ном слу­чае он угро­жал со­вер­шен­но ис­тре­бить хри­сти­ан­ство в стране. Но ни убеж­де­ния, ни угро­зы не по­ко­ле­ба­ли му­же­ствен­но­го свя­ти­те­ля, и его по­ве­ли в тем­ни­цу. По до­ро­ге свя­ти­те­ля уви­дел ев­нух Усфа­зан, быв­ший на­став­ник ца­ря. Он встал и по­кло­нил­ся епи­ско­пу, но свя­ти­тель от­вер­нул­ся от него и уко­рил в том, что он, бу­дучи хри­сти­а­ни­ном, из стра­ха пе­ред ца­рем по­кло­нил­ся солн­цу. Ев­нух всем серд­цем рас­ка­ял­ся, сме­нил до­ро­гие одеж­ды на гру­бые и, си­дя у две­рей двор­ца, горь­ко пла­кал: "Го­ре мне, как я пред­ста­ну пе­ред Бо­гом мо­им, от Ко­то­ро­го от­рек­ся? Вот – Си­ме­он, и тот от­вер­нул­ся от ме­ня!" Царь Са­пор узнал о пе­ча­ли сво­е­го лю­би­мо­го вос­пи­та­те­ля и спро­сил его, что слу­чи­лось. Тот от­кры­то ска­зал ца­рю, что горь­ко рас­ка­и­ва­ет­ся в сво­ем от­ступ­ни­че­стве и не бу­дет боль­ше по­кло­нять­ся солн­цу, а толь­ко Еди­но­му Ис­тин­но­му Бо­гу. Царь уди­вил­ся та­кой вне­зап­ной ре­ши­мо­сти стар­ца и лас­ко­во убеж­дал его не уни­жать бо­гов, ко­то­рым по­кло­ня­лись их от­цы. Но Усфа­зан был непре­кло­нен, и его осу­ди­ли на смерт­ную казнь. Един­ствен­ной прось­бой му­че­ни­ка Усфа­за­на бы­ло, чтобы гла­ша­таи опо­ве­сти­ли весь го­род, что он уми­ра­ет не за пре­ступ­ле­ние пе­ред ца­рем, а как хри­сти­а­нин. Царь ис­пол­нил его прось­бу.

Узнал о кон­чине му­че­ни­ка Усфа­за­на и свя­ти­тель Си­ме­он и со сле­за­ми воз­бла­го­да­рил Гос­по­да. Ко­гда его вто­рич­но вы­зва­ли к ца­рю, свя­ти­тель Си­ме­он вновь от­ка­зал­ся по­кло­нить­ся язы­че­ским бо­гам и ис­по­ве­дал ве­ру во Хри­ста. Раз­гне­ван­ный царь ве­лел на гла­зах у свя­ти­те­ля усечь ме­чом всех хри­сти­ан, на­хо­див­ших­ся в тем­ни­це. Без стра­ха шли на казнь хри­сти­ане, бла­го­слов­ля­е­мые свя­ти­те­лем, они са­ми под­к­ло­ня­ли го­ло­вы под меч. Так был обез­глав­лен и спут­ник свя­ти­те­ля Си­мео­на свя­щен­ник Ав­де­лай. Ко­гда оче­редь до­шла до свя­щен­ни­ка Ана­нии, он вдруг за­тре­пе­тал. То­гда один из вель­мож, свя­той Фу­сик, тай­ный хри­сти­а­нин, ис­пу­гал­ся, что Ана­ния от­ре­чет­ся от Хри­ста, и гром­ко вос­клик­нул: "Не стра­шись, ста­рец, за­крой гла­за, и ты тот­час уви­дишь Бо­же­ствен­ный Свет Гос­по­да на­ше­го Иису­са Хри­ста". Этим воз­гла­сом он вы­дал се­бя. Царь при­ка­зал вы­рвать свя­то­му Фу­си­ку язык и со­драть с него ко­жу. Вме­сте со свя­тым Фу­си­ком бы­ла за­му­че­на и его дочь му­че­ни­ца Ас­кит­рея. По­след­ним по­до­шел к па­ла­чу свя­ти­тель Си­ме­он и с мо­лит­вой под­к­ло­нил го­ло­ву на пла­ху († 13 ап­ре­ля 344). Всю пас­халь­ную неде­лю до 23-го ап­ре­ля про­дол­жа­лись каз­ни. Му­че­ни­че­скую кон­чи­ну при­нял и свя­той Азат ев­нух, близ­кий ца­рю са­нов­ник. Ис­точ­ни­ки ука­зы­ва­ют, что стра­да­ния при­ня­ли 1000 му­че­ни­ков, за­тем еще 100 и еще 150.

См. так­же: "Стра­да­ние свя­то­го свя­щен­но­му­че­ни­ка Си­мео­на, епи­ско­па Пер­сид­ско­го" в из­ло­же­нии свт. Ди­мит­рия Ро­стов­ско­го.