Акафистник

Помочь сайту
·
·
·
·

Канон святому преподобномученику Стефану Новому

Память: 11 декабря (28 ноября)

Глас 6.

Припев: Преподобному́чениче о́тче Стефа́не, моли́ Бо́га о на́с.

Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Ра́достно ты́ проше́д те́сную стезю́ поста́, муче́ния широто́ю вра́жия попали́л еси́ стремле́ния и простра́нную жи́знь, блаже́нне, насле́довал еси́.

Ко́рень тя́, непло́дный пре́жде, пло́дствует А́нны тезоимени́тый, я́ко дре́вле Самуи́ла, и да́вшему тя́ дае́т Бо́гу, жития́ твоего́, му́дре, благода́ть зна́менающи.

В свяще́ннейший Боже́ственный мона́хов прише́д чи́н, я́ко светле́йшая звезда́, доброде́тельми возсия́л еси́, ве́рныя озаря́я та́инственно, преподо́бне Стефа́не.

Стесни́в те́ло заключе́нием те́снаго до́му, впери́л еси́ у́м к небе́сным, му́дре, восхожде́нии до́бре распространя́яся.

Богоро́дичен: Непрохо́дную две́рь, чи́стый чистоты́ хра́м, до́брую в жена́х, Святу́ю Влады́чицу гла́сы свяще́нными, свяще́ннии лю́дие, просла́вим.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

У́м тво́й, зре́нием к Бо́гу удобря́емь, о́тче, красне́йший яви́ся, и благода́ти вся́кия испо́лнен вои́стинну, и Боже́ственныя све́тлости прича́стник.

Честне́й ико́не Христо́ве и Того́ Ро́ждшия покланя́яся, блаже́нне, царя́ злочести́ваго повеле́ние ме́рзское возненави́де си́лою Боже́ственнаго Ду́ха.

Желе́зы тебе́, желе́зно иму́ща се́рдце, пребезу́мный, связа́в, отсыла́ет в темни́цу я́ко храни́теля Христо́вых догма́т, Стефа́не всеблаже́нне.

Твоя́ кра́сныя я́вственно име́л еси́, преподо́бне, но́ги, муче́ния к стезя́м ступа́ющия све́тло и главы́ вра́жия сокруша́ющия, Стефа́не многострада́льне.

Богоро́дичен: Из Тебе́, еди́ныя Чи́стыя, Пребоже́ственное Сло́во воплоти́ся, я́ко ве́сть, и спасе́ ны́ от тли́, покланя́ющияся за милосе́рдие Боже́ственному Его́ снизхожде́нию.

Седа́лен, гла́с 1.

Кро́вь твоя́, му́дре, та́йно зове́т от земли́ к Бо́гу, я́коже А́велева, Богому́дре, я́сно бо пропове́да Христо́во вочелове́чение. Те́мже посрами́л еси́ иконора́тных пре́лесть и преше́л еси́ в Небе́сныя черто́ги, моли́ спасти́ на́с.

Поще́нием просвети́вся, я́ко зла́то в горни́ле, облиста́л еси́, му́дре, зако́нным страда́нием и вене́ц прия́л еси́, твоему́ зва́нию подо́бен. Те́м, ра́дующеся, всесвяту́ю твою́ па́мять пра́зднуем, твоя́ по́двиги почита́юще, приснопа́мятне Стефа́не.

Богоро́дичен: Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ Боже́ственными моли́твами Твои́ми.

Крестобогоро́дичен: Зря́щи Тя́, Христе́, всенепоро́чная Ма́ти, ме́ртва на Кресте́ просте́рта, вопия́ше: Сы́не мо́й, собезнача́льне Отцу́ и Ду́ху, что́ неизрече́нное Твое́ сие́ строе́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста, о Го́споде пра́зднующи.

Све́том Ду́ха просвеща́емь, мольба́ми Боже́ственными слепы́м све́т, о́тче, по́дал еси́, твоего́ Влады́ку и Бо́га подража́в, Богодохнове́нне.

Ви́ден бы́л еси́ издале́ча пла́вающими в мо́ри, окормля́я ты́я, блаже́нне, к ти́хому приста́нищу Боже́ственною благода́тию, призыва́ющия твое́ ве́рно, о́тче Стефа́не, и́мя.

Священноде́йствуемь, я́коже заколе́ние свяще́нное прине́слся еси́ тебе́ ра́ди Пожре́нному, Стефа́не, и перворожде́нных во оби́телех воспочи́л еси́, ра́дуяся.

Честны́м твои́м глаго́лом пре́жде на по́лы сухи́й здра́в яви́ся ве́сь, удиви́вся, му́чениче, да́нной ти́ благода́ти с высоты́ оби́льно челове́ков на исправле́ние.

Богоро́дичен: На Тя́, Пренепоро́чная, спасе́ния моего́ наде́жды возложи́х, к Твоему́ покро́ву прибего́х, бу́ди ми́, Отрокови́це, помо́щница, лю́тых избавля́ющи мя́.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Му́ченическими венча́ почестьми́ по́стническия твоя́ труды́ и́стинно, преподо́бне Стефа́не, подвигополо́жник еди́н Бо́г на́ш, на уби́йцы укрепи́вый тя́.

Подвиза́яся благосла́вно, со мно́жеством му́ченик в темни́цах приобща́яся, му́чениче, обре́лся еси́, тя́ бо, я́ко зве́зды незаходи́мое со́лнце, обстоя́ще, пребо́льше просвеща́хуся.

Глаго́лы Боже́ственными свяще́нныя испове́дники и подража́тели Боже́ственных страсте́й ублажа́ем, три́ ста́ и четы́редесять и два́, безбо́жных пора́товавшия.

Власо́в отъя́тие руга́тельно, уше́с отре́зание и ру́к, уде́с же Боже́ственных пожже́ние по ико́не Христо́ве подъя́ше мно́жество преподо́бных благосла́внейшее.

Богоро́дичен: Пресвята́я, Я́же Бо́га еди́на на земли́ я́ко и́стинно Пресвята́го ро́ждшая, Тя́, Богоро́дицу, при́сно пропове́дающия освяти́ и спаси́ хода́тайством Твои́м.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Слове́с твои́х си́лы зло́бы обрета́тель претерпе́ти не возмо́же, те́мже ю́зам тя́, Стефа́не, и ра́нам, сме́рти же ну́ждней суро́во льсте́ц предаде́.

Я́ко хле́б, пеко́мь огне́м и за но́зе неми́лостивно пове́шаемь, всесоже́глся еси́, Па́вле, и Бо́гу же́ртва прине́слся еси́, соводворе́ния му́ченик сподобля́емь.

Зако́нно пострада́вше заключе́ни и удавле́нием житие́ оста́вльше во Ефе́се преподо́бнии мона́си, о́смь к три́десятим, я́же ве́рою и любо́вию ублажа́ем.

Кре́пко судя́щему проти́вился еси́, и ра́нами ра́ниму твоему́ те́лу, умре́ти изво́лил еси́ за Христа́ еди́наго безсме́ртнаго, достосла́вне Пе́тре великоимени́тый.

Богоро́дичен: Еди́ну Всепе́тую и до́брую в жена́х Богороди́тельницу, христиа́н сте́ну необори́мую, пречи́стую Влады́чицу несомне́нным се́рдцем ублажа́ем.

Конда́к, гла́с 8.

Тро́ицы рачи́теля и Боже́ственнаго Стефа́на восхва́лим ве́рно пе́сньми, празднолю́бцы, от се́рдца, я́ко почествова́вша начерта́ние кра́сное Влады́ки и Ма́тере Его́, и согла́сно ны́не от любве́ возопии́м ему́, ра́дующеся: ра́дуйся, о́тче присносла́вне.

И́кос:

И́же за́висти оте́ц и Бо́га чу́ждь, искуше́ния тебе́ мно́га и треволне́ния воздви́же, не терпя́ зре́ти твоего́ Боже́ственнаго жития́ и пра́ваго твоего́ непреткнове́ннаго ше́ствия. Ме́рзский лука́вствия на тя́ сшива́ет, мне́вся бы́ти учени́к, я́коже Иу́да пре́жде, и тебе́ в ру́ки беззако́нных, о́тче, потща́ся вложи́ти, Христа́ пропове́дающа све́тло и Того́ о́бразу любо́вию кла́няющася, Того́ ра́ди му́ченический вене́ц прия́л еси́, Стефа́не.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Возвести́ся тебе́ коне́ц, блаже́нне, вседе́тельным хоте́нием, те́мже бо́льшему посту́ вда́л еси́ себе́ и от сла́вы в сла́ву прехо́диши, убие́н за Христа́, су́щаго над все́ми Бо́га.

Тезоиме́нно первострада́льцу спросла́вился еси́, и́бо камену́емь неми́лостивно, и влачи́мь, и бие́мь, кровьми́ испо́лнил еси́ зе́млю и ду́шу твою́ Го́споду, ра́дуяся, пре́дал еси́.

На сто́гнах, му́чениче Стефа́не, гра́дских неми́лостивно влачи́мь, угла́дил еси́ муче́ния стезю́ ве́рным, на ню́же наступа́ющии кре́пко к Небе́сному гра́ду я́ве доидо́ша.

Богоро́дичен: Свяще́ннейшии проро́цы провозвести́ша, Чи́стая, явле́ннейше та́инство честна́го Твоего́ Рождества́, и ны́не мы́, сбытие́ све́тло разуме́юще, благоче́стно Тя́ ублажа́ем.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Свире́пейше, я́коже зве́рие, восхи́тиша Христо́ва а́гнца бию́щии, убива́юще и с му́жи беззако́нными спогреба́юще, пребеззако́нием живу́щии.

Неми́лостивно твою́ главу́ вра́г сокруши́, ю́же Бо́г в высоча́йших венце́м венча́ победи́тельным, вене́чниче многострада́льне, сла́ва му́чеников и все́х преподо́бных.

Терпели́вно мучи́телю противля́яся, Богому́дрый Андре́й ра́нами раздробля́ется, и неми́лостивно умерщвля́ется пра́ведный, поя́ Влады́це Христу́ во ве́ки.

Святе́йший до́м уже́ бы́в, и́же над все́ми святы́ми Воспочива́ющаго, во твое́м име́л еси́ се́рдцы живу́ща, многострада́льне Стефа́не, во вся́ ве́ки.

Богоро́дичен: Кропле́нием Боже́ственныя Кро́ве, Богоблагода́тная, из ре́бр истоще́нныя Сы́на Твоего́ и Бо́га, лука́вым грехо́м прибы́вшую мне́ скве́рну,— молю́ся Тебе́,— омы́й, Де́во.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и, Тя́ ублажа́ем.

Ви́дев, ра́дуяся, А́нгелов чи́ны, патриа́рхов, преподо́бных, проро́ков, страда́льцев, апо́столов же и пра́ведных все́х, Богодохнове́нне, с ни́миже совокупля́яся, помяни́, заступи́ на земли́ чи́сте ублажа́ющих тя́.

Я́ко све́т, я́ко у́тро, я́ко вели́кое со́лнце, я́ко не́бо, назве́зденное чуде́с светлостьми́ и я́звами святы́ми бы́л еси́, все́х помышле́ния, благохва́лящих тя́, Стефа́не, украша́я и́стинно, му́чениче многострада́льне.

Тве́рдыми по́стничества по́двиги низложи́в тьмы́ нача́ла, о́тче, пре́жде и в после́дняя пострада́в кре́пко, всеконе́чней па́губе сия́ преда́в, Стефа́не, му́чеников добро́то и преподо́бных похвало́.

Твоя́ пресла́вная па́мять дне́сь пресве́тлыми заря́ми даро́в Ду́ха озаря́ет земна́я исполне́ния, ю́же ра́достно ны́не пра́зднующия просвети́ и освяти́ ны́, Богоблаже́нне Стефа́не.

Богоро́дичен: Све́та прия́телище, Богора́дованная, священному́чеников и́стинно утвержде́ние и преподо́бных все́х похвало́, спаси́ ны́ от бе́д и обстоя́ний, и враго́в наше́ствия, воспева́ющия Тя́.

Свети́лен.

Боле́зньми по́стническими началозло́бнаго зми́я до конца́ умертви́л еси́, на конце́ же вене́ц муче́ния взе́м, Стефа́не всехва́льне, поклоне́ние подая́ честны́м образо́м, я́ко ве́дый на первообра́зное я́ве преходи́ти, всеблаже́нне.

Сла́ва, и ны́не: Неизрече́ннаго Рождества́ была́ еси́ всенепоро́чная Неве́ста, я́ко су́щи чисте́йший хра́м, Богоро́дице, Све́та бо преве́чнаго, в Тя́ все́льшагося, родила́ еси́ — Бо́га Сло́ва, пою́ще Твое́ у́бо Рождество́, велича́ем досто́йно Тебе́, всенепоро́чная Отрокови́це.

Yandex Metrika