Канон святому пророку Исаии и святому мученику Христофору Ликийскому

Припев: Святы́е прорóче Иса́ие и му́чениче Христофо́ре, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 22 мая (09 мая ст. ст.)

Глас 4.

Пе́снь 1.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Просвети́ мя́, Го́споди Бо́же мо́й, и наста́ви све́тло боже́ственнаго проро́ка Твоего́ сла́вное и честно́е восхвали́ти торжество́.

Боговеща́нная труба́ Иса́иина, огласи́вшая зе́млю, церко́вныя пита́тели созва́ пра́здновати па́мять его́.

Стра́сти теле́сныя, богоно́се, помысло́м душе́вным тве́рдо покори́в, сла́ву сподо́бися ви́дети Вседержи́теля.

Му́ченика: Прииди́те вси́ дне́сь, христоно́сцы, Христофо́ра па́мять, и́стины свиде́теля богому́драго, благоче́стно воспои́м.

Му́жески подвиза́вся на ле́сть, мучи́телей преще́ния, му́чениче страстоно́сче, кре́постию Христо́вою утвержда́емь, попра́л еси́.

Богоро́дичен: Же́зл прозря́ Тя́, Богоро́дице, цве́т же па́ки из Тебе́ воплоще́нное Сло́во, провозвести́ сла́вный Иса́ия, Пречи́стая.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Всю́ зарю́ духо́вную восприе́мь, провозгласи́л еси́, сла́вне, Сло́ва смотре́ния неизрече́нное та́инство.

Взя́лся еси́ к высоте́ небе́сней, и благоче́стия све́тлость показа́л еси́, и́дольскаго су́етия ты́ изобличи́в не́мощь.

Ка́меня в Сио́не пречестна́го, краеуго́льнаго, вселе́нную содержа́щаго, Влады́ку Христа́, Иса́ия проро́чествует, полага́ема.

Му́ченика: Ору́жием Креста́ огражда́емь, му́чениче Христофо́ре, ра́ны претерпе́л еси́, присножела́емаго наслажда́ешися, ра́дуяся.

Пло́ть у́бо ра́нами ссеца́шеся, боголюби́вая же твоя́ душа́ любо́вию пита́шеся, поуча́ющися Ца́рствия, Христофо́ре, наслажде́нию.

Богоро́дичен: Рече́ние вои́стинну испо́лнися Иса́иино: Де́ва бо роди́ воплоще́нна Жизнода́вца и Спа́са ду́ш на́ших.

Конда́к му́ченика, гла́с 2:

Свы́ше, прему́дре, зва́ние прия́л еси́, Христу́ тезоимени́т бы́в, Христофо́ре сла́вне, му́чеником Боже́ственная добро́то. С ни́ми же всегда́ моли́ согреше́ний разреше́ние дарова́ти на́м.

Седа́лен, гла́с 4.

От страсте́й теле́сных преочи́стив ду́шу, сла́ву ви́дел еси́ над все́ми су́щаго Бо́га, проро́че пребога́те. Просия́в проро́чества светоно́сными заря́ми, — Мла́до, — ре́кл еси́, — Отроча́ роди́тся, — Зижди́тель, спаса́ющий на́с от тли́ моли́твами твои́ми.

Му́ченика: По́двиг, сла́вне, муче́ния сконча́в, прия́л еси́ вене́ц побе́ды от Бо́га, Христофо́ре блаже́нне, Его́же умоли́ от бе́д изба́вити на́с.

Пе́снь 4.

Ирмо́с: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

На доброде́тельный возше́д ве́рх, чи́сто Жела́емому бесе́довал еси́ и ра́достно пе́л еси́: сла́ва си́ле Твое́й, Го́споди.

Проро́честей Иса́ия благода́ти вве́рен бы́сть, и Бо́жие жили́ще показа́ся, и небе́сных си́л сла́вы нетле́нныя сподо́бися.

Обнови́тися острово́м ре́кл еси́ при́точно, язы́ческим це́рквам, Боже́ственнаго Ду́ха испо́лнен, сла́вне, таи́нник неизрече́нных бы́в.

Му́ченика: Небе́сное насле́дие, му́чениче, восприя́л еси́, на земли́ по Христе́ подвиза́вся, и́дольскую же погаси́л еси́ пре́лесть му́жески лю́таго де́мона.

Же́нское тебе́ искуше́ние, му́чениче, приноша́ше, я́коже Ада́му пра́отцу зми́й пре́жде, но, побежде́н бы́в, стыдя́шеся, удавле́ния на тя́ простира́я.

Богоро́дичен: Отроча́ на́м даде́ся от проро́чицы, рожде́нное без боле́зни Богома́тере, Его́же нача́льство на ра́ме боже́ственный Иса́ия пропове́да.

Пе́снь 5.

Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны́, Бла́же, Тво́й ми́р да́руяй.

Сокрове́нное свы́ше та́инство зря́ и дре́вний сове́т Вы́шняго, е́же о на́с смотре́ние, богоглаго́ливе, возвести́л еси́.

Страсте́й Твои́х, Го́споди, приснотеку́щий исто́чник страсте́й на́с отмыва́ет, прише́л бо еси́, Спа́се, я́коже Иса́ия проро́к научи́.

Богочести́вый Иса́ия, от Бо́га изше́д, Отца́, Сло́ва и Свята́го Ду́ха в Естестве́ Еди́ном, Тро́ицу Еди́ну неве́дущим пропове́да.

Му́ченика: Просвеще́нием благода́ти улови́л еси́ лю́ди и неи́стовство безбо́жных мучи́телей разори́л еси́ я́ве, на земли́, му́дре, оде́ян свы́ше де́йством.

Небе́сное изво́лив наслажде́ние я́ве па́че земна́го, му́дре Христофо́ре, претерпе́л еси́ кре́пко муче́ния боле́зни, Кресто́м укрепля́емь.

Богоро́дичен: На о́блаце, Го́споди, седя́щаго чи́сте Всепе́тыя Ма́тере, Иса́ия ви́де Тя́ я́сно, еги́петския низлага́юща и́долы.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Ду́хом воображе́н, Иса́ия узре́ на престо́ле Госпо́дьства сла́ву блеща́щуся, песносло́вимую трисвяты́м гла́сом, Тричи́сленную.

Ко усто́м боя́щимся твои́м прино́сит у́гль, Иса́ие, серафи́м, клеща́ми взе́м, и Бо́гу проро́ка соверша́ет, та́йно освяще́нна.

Сбытие́ издале́ча зря́ прорече́ний, Иса́ия у́мно со а́нгелы ра́дуется и, игра́я, сла́вит Испо́лнившаго его́ пропове́дания.

Му́ченика: Не к кро́ви, ни к пло́ти бра́нь взе́м до́блий, но нача́ла побежда́ше и де́моны, неви́димою си́лою Сы́на Бо́жия укрепля́емь.

Возлюби́в благоле́пно жела́ний кра́й, страстоте́рпче, не чу́л еси́ боле́зней стру́жемь, мы́сль твою́ возвыша́я всегда́ ко Влады́це твоему́.

Богоро́дичен: Де́ву, во утро́бе заче́ншую зря́ и ро́ждшую, Иса́ия, проро́к сла́вный, воплоще́нна Сло́ва, Сы́на Бо́жия, ны́не ра́дуется.

Конда́к, гла́с 2.

Проро́чества дарова́ние прие́м, пророкому́чениче, Иса́ие богопропове́дниче, все́м изъясни́л еси́ вочелове́чение Госпо́дне, возгласи́в велегла́сно конце́м: се́ Де́ва во чре́ве прии́мет.

И́кос:

Вси́ сни́демся, и́же во страна́х, воспе́ти досто́йно Иса́ию, ве́рнии, во проро́цех ди́внаго: то́й бо, коне́ц проро́чества восприи́м, ми́р просвеща́ет, все́м вку́пе та́йну Боже́ственнаго соедине́ния провозвести́в, с те́ми все́ми возопи́в: с на́ми Бо́г неви́димый, се́ Де́ва во чре́ве прии́мет.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Спаси́тельное на́м приходя́щее зря́ Иса́ия избавле́ние, — прии́дет, — возопи́, — оте́ц на́ших Бо́же, благослове́н еси́.

Проро́чества благода́тию и муче́ния венце́м Иса́ия увязе́ся, — кре́пость моя́ и пе́ние мое́, — оте́ц на́ших Бо́же, благослове́н еси́.

Благоче́стия преде́лы и жития́ зако́ны богоно́сным язы́ком положи́л еси́, проро́че богодухнове́нне, — оте́ц на́ших Бо́же, благослове́н еси́.

Му́ченика: Муче́ния пу́ть терпе́нием теки́й, Христофо́р в небе́сных живе́т се́лех, поя́: оте́ц на́ших Бо́же, благослове́н еси́.

Нече́стия пла́мень благоче́стия росо́ю Христофо́р увяди́, в пе́снех зовы́й: оте́ц на́ших Бо́же, благослове́н еси́.

Богоро́дичен: Де́вства ви́дев пачеесте́ственное рождество́ и чистоты́ све́тлость, Иса́ия возопи́: оте́ц на́ших Бо́же, благослове́н еси́.

Пе́снь 8.

Ирмо́с: В Вавило́не о́троцы, боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени, ороша́еми, поя́ху: благослови́те, вся́ дела́ Госпо́дня, Го́спода.

Весе́лия ри́зою женихо́вою обложе́н обра́зно, ра́дуется ны́не ве́село Иса́ия сла́вный и, боже́ственныя пи́щи наслажда́яся, со а́нгелы веща́ет: благослови́те, вся́ дела́ Госпо́дня, Го́спода.

Бо́га пе́рвее отлучи́вшиися, де́монскими прельще́ннии словесы́, пра́ведно отступи́ша земли́ чи́стыя, окая́ннии, проро́ка гласово́м после́дованно, и пе́ти не мо́гут: благослови́те, вся́ дела́ Госпо́дня, Го́спода.

Пре́лесть оста́вивше, к Боже́ственному притеко́ша сия́нию мно́жества язы́к и Христо́ве Це́ркви обручи́шася, я́коже дре́вле рече́ Иса́ия, и пе́сньми ны́не пою́т: благослови́те, вся́ дела́ Госпо́дня, Го́спода.

Му́ченика: Идолонеи́стовства на́гло приража́ема волна́, му́ченическими отсека́шеся тве́рдыми супротивообра́зными противле́нии за Христа́ прие́млющих беды́ и вопию́щих: благослови́те, вся́ дела́ Госпо́дня, Го́спода.

В ца́рскую багряни́цу обагре́нную от крове́й твои́х, му́чениче, красно́ оде́ян ны́не, Христофо́ре непобеди́ме, со а́нгельскими ли́ки лику́еши и пое́ши Соде́телю твоему́: благослови́те, вся́ дела́ Госпо́дня, Го́спода.

Богоро́дичен: Де́ва Богома́ти Отрокови́ца я́ко Младе́нца держи́т Сло́ва, все́м даю́щаго жи́знь и вся́ сотво́ршаго, я́коже рече́ пре́жде Иса́ия, и, ра́дуяся, взыва́ше: благослови́те, вся́ дела́ Госпо́дня, Го́спода.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Престо́лу предста́л еси́ све́тло, богоприя́тне, Влады́ки си́л, сла́вы же Того́ наслади́вся, твоего́ благоче́стия собира́я плоды́, всеблаже́нне сла́вне. Те́м тя́ вси́ велича́ем.

Прииди́те ны́не, све́та проро́ческаго дарова́ния жела́ющии, прия́ти кни́гу усе́рдно Иса́ии, богоразу́мия испо́лнену: тве́рдым жела́нием внима́ем, да Боже́ственныя зари́ испо́лнимся.

Ду́хом све́тлости я́ве осия́емь, Иса́ие богоно́се, вся́, ве́рою творя́щия честну́ю твою́ и светоно́сную па́мять, моли́ спасе́ние получи́ти, да тя́ вси́ велича́ем.

Му́ченика: Вене́ц све́тел я́ко победи́тель прие́м, Христофо́ре всесла́вне, сца́рствуеши Влады́це, тя́ в му́ках укре́пльшему и ру́ку живоно́сну пода́вшему одоле́ти злонача́льника.

Кро́вию му́ченическою све́тло омы́вся, озари́лся еси́, пречу́дне, ны́не же в де́вственнем черто́зе, с Женихо́м ра́дуяся, вше́л еси́, ми́ра же ми́ру прося́, не преста́й, му́чениче сла́вне.

Богоро́дичен: У́гля мы́сленнаго, Чи́стая Богоневе́сто, Иса́ия Его́же ви́де но́сиши на руку́, Богома́ти, зра́ку на́шему соединя́ема и ми́ру спасе́ние све́тло подаю́ща, те́м Тя́ вси́ велича́ем.

Пѣ́снь а҃.

І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колєсни́цы фараѡ́нѡвы и҆ си́лꙋ.

Просвѣтѝ мѧ̀, гдⷭ҇и бж҃е мо́й, и҆ наста́ви свѣ́тлѡ бжⷭ҇твеннагѡ прⷪ҇ро́ка твоегѡ̀ сла́вное и҆ честно́е восхвали́ти торжество̀.

Бг҃овѣща́ннаѧ трꙋба̀ и҆са́їина, ѡ҆гласи́вшаѧ зе́млю, церкѡ́вныѧ пита́тели созва̀, пра́здновати па́мѧть є҆гѡ̀.

Стра̑сти тѣлє́сныѧ, бг҃оно́се, помыслѡ́мъ дꙋшє́внымъ тве́рдѡ покори́въ, сла́вꙋ сподо́бисѧ ви́дѣти вседержи́телѧ.

Мꙋ́ченика: Прїиди́те, всѝ дне́сь хрⷭ҇тоно́сцы, хрїстофо́ра па́мѧть, и҆́стины свидѣ́телѧ бг҃омꙋ́драгѡ, благоче́стнѡ воспои́мъ.

Мꙋ́жески подвиза́всѧ на ле́сть, мꙋчи́телей прещє́нїѧ, мч҃ниче страстоно́сче, крѣ́постїю хрⷭ҇то́вою ᲂу҆твержда́емь, попра́лъ є҆сѝ.

Бг҃оро́диченъ: Же́злъ прозрѧ̀ тѧ̀, бцⷣе, цвѣ́тъ же па́ки и҆зъ тебє̀ воплоще́нное сло́во, провозвѣстѝ сла́вный и҆са́їа, пречⷭ҇таѧ.

Пѣ́снь г҃.

І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Всю̀ зарю̀ дꙋхо́внꙋю воспрїе́мь, провозгласи́лъ є҆сѝ, сла́вне, сло́ва смотре́нїѧ неизрече́нное та́инство.

Взѧ́лсѧ є҆сѝ къ высотѣ̀ нбⷭ҇нѣй, и҆ благоче́стїѧ свѣ́тлость показа́лъ є҆сѝ, і҆́дѡльскагѡ сꙋ́етїѧ ты̀ и҆зѡбличи́въ не́мощь.

Ка́менѧ въ сїѡ́нѣ пречестна́го, краеꙋго́льнагѡ, вселе́ннꙋю содержа́щаго, влⷣкꙋ хрⷭ҇та̀, и҆са́їа прⷪ҇ро́чествꙋетъ, полага́ема.

Мꙋ́ченика: Ѻ҆рꙋ́жїемъ крⷭ҇та̀ ѡ҆гражда́емь, мч҃ниче хрїстофо́ре, ра̑ны претерпѣ́лъ є҆сѝ, присножела́емагѡ наслажда́ешисѧ ра́дꙋѧсѧ.

Пло́ть ᲂу҆́бѡ ра́нами ссѣца́шесѧ, бг҃олюби́ваѧ же твоѧ̀ дꙋша̀ любо́вїю пита́шесѧ, поꙋча́ющисѧ црⷭ҇твїѧ, хрїстофо́ре, наслажде́нїю.

Бг҃оро́диченъ: Рече́нїе вои́стиннꙋ и҆спо́лнисѧ и҆са́їино: дв҃а бо родѝ воплоще́нна жизнода́вца, и҆ сп҃са дꙋ́шъ на́шихъ.

Конда́къ мч҃нка, гла́съ в҃:

Свы́ше, премꙋ́дре, зва́нїе прїѧ́лъ є҆сѝ, хрїстꙋ̀ тезоимени́тъ бы́въ, хрїстофо́ре сла́вне, мч҃нкѡмъ боже́ственнаѧ добро́то. съ ни́ми же всегда̀ молѝ согрѣше́нїй разрѣше́нїе дарова́ти на́мъ.

Сѣда́ленъ, гла́съ д҃.

Ѿ страсте́й тѣле́сныхъ преѡчи́стивъ дꙋ́шꙋ, сла́вꙋ ви́дѣлъ є҆сѝ надъ всѣ́ми сꙋ́щагѡ бг҃а, прⷪ҇ро́че пребога́те: просїѧ́въ прⷪ҇ро́чества свѣтоно́сными зарѧ́ми, мла́до, ре́клъ є҆сѝ, ѻ҆троча̀ роди́тсѧ зижди́тель, спаса́ющїй на́съ ѿ тлѝ моли́твами твои́ми.

Мꙋ́ченика: По́двигъ, сла́вне, мꙋче́нїѧ сконча́въ, прїѧ́лъ є҆сѝ вѣне́цъ побѣ́ды ѿ бг҃а, хрїстофо́ре блаже́нне: є҆го́же ᲂу҆молѝ, ѿ бѣ́дъ и҆зба́вити на́съ.

Пѣ́снь д҃.

І҆рмо́съ: Твоегѡ̀ на землѝ ꙗ҆вле́нїѧ, хрⷭ҇тѐ бж҃е, проповѣ́дꙋѧ прⷪ҇ро́къ прише́ствїе, съ весе́лїемъ вопїѧ́ше: сла́ва си́лѣ твое́й, гдⷭ҇и.

На добродѣ́тельный возше́дъ ве́рхъ, чи́стѡ жела́емомꙋ бесѣ́довалъ є҆сѝ, и҆ ра́достнѡ пѣ́лъ є҆сѝ: сла́ва си́лѣ твое́й, гдⷭ҇и.

Прⷪ҇ро́честѣй и҆са́їа благода́ти ввѣ́ренъ бы́сть, и҆ бж҃їе жили́ще показа́сѧ, и҆ небе́сныхъ си́лъ сла́вы нетлѣ́нныѧ сподо́бисѧ.

Ѡ҆бнови́тисѧ ѻ҆стровѡ́мъ ре́клъ є҆сѝ при́точнѡ, ꙗ҆зы́чєскимъ цр҃квамъ, бжⷭ҇твеннагѡ дх҃а и҆спо́лненъ, сла́вне, таи́нникъ неизрече́нныхъ бы́въ.

Мꙋ́ченика: Нбⷭ҇ное наслѣ́дїе, мꙋ́чениче, воспрїѧ́лъ є҆сѝ, на землѝ по хрⷭ҇тѣ̀ подвиза́всѧ: і҆́дѡльскꙋю же погаси́лъ є҆сѝ пре́лесть мꙋ́жески лю́тагѡ де́мѡна.

Же́нское тебѣ̀ и҆скꙋше́нїе, мꙋ́чениче, приноша́ше, ꙗ҆́коже а҆да́мꙋ пра́ѻц҃ꙋ ѕмі́й пре́жде, но побѣжде́нъ бы́въ стыдѧ́шесѧ, ᲂу҆давлє́нїѧ на тѧ̀ простира́ѧ.

Бг҃оро́диченъ: Ѻ҆троча̀ на́мъ даде́сѧ ѿ прⷪ҇ро́чицы, рожде́нное безъ болѣ́зни бг҃ома́тере: є҆гѡ́же нача́льство на ра́мѣ бжⷭ҇твенный и҆са́їа проповѣ́да.

Пѣ́снь є҃.

І҆рмо́съ: Просвѣще́нїе твоѐ, гдⷭ҇и, низпослѝ на́мъ и҆ ѿ мглы̀ прегрѣше́нїй разрѣшѝ ны̀, бл҃же, тво́й ми́ръ да́рꙋѧй.

Сокрове́нное свы́ше та́инство зрѧ̀, и҆ дре́внїй совѣ́тъ вы́шнѧгѡ, є҆́же ѡ҆ на́съ смотре́нїе, бг҃оглаго́ливе, возвѣсти́лъ є҆сѝ.

Страсте́й твои́хъ, гдⷭ҇и, приснотекꙋ́щїй и҆сто́чникъ, страсте́й на́съ ѿмыва́етъ: прише́лъ бо є҆сѝ, сп҃се, ꙗ҆́коже и҆са́їа прⷪ҇ро́къ наꙋчѝ.

Бг҃очести́вый и҆са́їа, ѿ бг҃а и҆зше́дъ ѻ҆ц҃а̀, сло́ва и҆ ст҃а́го дх҃а, въ є҆стествѣ̀ є҆ди́номъ, трⷪ҇цꙋ є҆ди́нꙋ, невѣ́дꙋщымъ проповѣ́да.

Мꙋ́ченика: Просвѣще́нїемъ бл҃года́ти ᲂу҆лови́лъ є҆сѝ лю́ди, и҆ неи́стовство безбо́жныхъ мꙋчи́телей разори́лъ є҆сѝ ꙗ҆́вѣ, на землѝ, мꙋ́дре, ѡ҆дѣ́ѧнъ свы́ше дѣ́йствомъ.

Нбⷭ҇ное и҆зво́ливъ наслажде́нїе ꙗ҆́вѣ, па́че земна́гѡ, мꙋ́дре хрїстофо́ре, претерпѣ́лъ є҆сѝ крѣ́пкѡ мꙋче́нїѧ болѣ́зни, крⷭ҇то́мъ ᲂу҆крѣплѧ́емь.

Бг҃оро́диченъ: На ѻ҆́блацѣ, гдⷭ҇и, сѣдѧ́щаго чи́стѣ, всепѣ́тыѧ мт҃ре, и҆са́їа ви́дѣ тѧ̀ ꙗ҆́снѡ, є҆гѵ́пєтскїѧ низлага́юща і҆́дѡлы.

Пѣ́снь ѕ҃.

І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Дх҃омъ воѡбраже́нъ и҆са́їа, ᲂу҆зрѣ̀ на престо́лѣ гдⷭ҇ьства сла́вꙋ блеща́щꙋсѧ, пѣсносло́вимꙋю трист҃ы́мъ гла́сомъ, тричи́сленнꙋю.

Ко ᲂу҆стѡ́мъ боѧ́щымсѧ твои̑мъ прино́ситъ ᲂу҆́гль, и҆са́їе, серафі́мъ, клеща́ми взе́мъ, и҆ бг҃ꙋ прⷪ҇ро́ка соверша́етъ, та́йнѡ ѡ҆свѧще́нна.

Сбытїѐ и҆здале́ча зрѧ̀ прорече́нїй и҆са́їа, ᲂу҆́мнѡ со а҆́гг҃лы ра́дꙋетсѧ, и҆ и҆гра́ѧ сла́витъ, и҆спо́лнившаго є҆гѡ̀ проповѣ̑данїѧ.

Мꙋ́ченика: Не къ кро́ви, ни къ пло́ти бра́нь взе́мъ до́блїй, но нача̑ла побѣжда́ше и҆ де́мѡны, неви́димою си́лою сн҃а бж҃їѧ ᲂу҆крѣплѧ́емь.

Возлюби́въ благолѣ́пнѡ жела́нїй кра́й, страстоте́рпче, не чꙋ́лъ є҆сѝ болѣ́зней стрꙋ́жемь, мы́сль твою̀ возвыша́ѧ всегда̀ ко влⷣцѣ твоемꙋ̀.

Бг҃оро́диченъ: Дв҃ꙋ во ᲂу҆тро́бѣ заче́ншꙋю зрѧ̀, и҆ ро́ждшꙋю, и҆са́їа проро́къ сла́вный, воплоще́нна сло́ва сн҃а бж҃їѧ, ны́нѣ ра́дꙋетсѧ.

Конда́къ, гла́съ в҃.

Прⷪ҇ро́чества дарова́нїе прїе́мъ, прⷪ҇рокомч҃нче, и҆са́їе бг҃опроповѣ́дниче, всѣ̑мъ и҆з̾ѧсни́лъ є҆сѝ вочл҃вѣ́ченїе гдⷭ҇не, возгласи́въ велегла́снѡ концє́мъ, сѐ дв҃а во чре́вѣ прїи́метъ.

І҆́косъ:

Всѝ сни́демсѧ, и҆̀же во страна́хъ, воспѣ́ти досто́йнѡ и҆са́їю, вѣ́рнїи, во прⷪ҇ро́цѣхъ ди́внаго: то́й бо коне́цъ прⷪ҇ро́чества воспрїи́мъ, мі́ръ просвѣща́етъ, всѣ̑мъ вкꙋ́пѣ та́йнꙋ бжⷭ҇твеннагѡ соедине́нїѧ провозвѣсти́въ, съ тѣ́ми всѣ́ми возопи́въ: съ на́ми бг҃ъ неви́димый, сѐ дв҃а во чре́вѣ прїи́метъ.

Пѣ́снь з҃.

І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.

Спаси́тельное на́мъ приходѧ́щее зрѧ̀ и҆са́їа и҆збавле́нїе, прїи́детъ, возопѝ: ѻ҆тє́цъ на́шихъ бж҃е, бл҃гослове́нъ є҆сѝ.

Прⷪ҇ро́чества бл҃года́тїю, и҆ мꙋче́нїѧ вѣнце́мъ, и҆са́їа ᲂу҆вѧзе́сѧ, крѣ́пость моѧ̀ и҆ пѣ́нїе. моѐ: ѻ҆тє́цъ на́шихъ бж҃е, бл҃гослове́нъ є҆сѝ.

Благоче́стїѧ предѣ́лы, и҆ житїѧ̀ зако́ны, бг҃оно́снымъ ꙗ҆зы́комъ положи́лъ є҆сѝ, прⷪ҇ро́че бг҃одꙋхнове́нне: ѻ҆тє́цъ на́шихъ бж҃е, бл҃гослове́нъ є҆сѝ.

Мꙋ́ченика: Мꙋче́нїѧ пꙋ́ть терпѣ́нїемъ текі́й хрїстофо́ръ, въ нбⷭ҇ныхъ. живе́тъ се́лѣхъ, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Нече́стїѧ пла́мень, благоче́стїѧ росо́ю хрїстофо́ръ ᲂу҆вѧдѝ, въ пѣ́снехъ зовы́й: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Дѣ́вства ви́дѣвъ, пачеесте́ственное ржⷭ҇тво̀, и҆ чистоты̀ свѣ́тлость, и҆са́їа возопѝ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Въ вавѷлѡ́нѣ ѻ҆́троцы бжⷭ҇твенною распала́еми ре́вностїю, мꙋчи́телѧ и҆ пла́мене преще́нїе мꙋ́жески попра́ша, и҆ посредѣ̀ ѻ҆гнѧ̀ вве́ржени, ѡ҆роша́еми поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Весе́лїѧ ри́зою женихо́вою ѡ҆бложе́нъ ѻ҆бра́знѡ, ра́дꙋетсѧ ны́нѣ ве́селѡ и҆са́їа сла́вный, и҆ бжⷭ҇твенныѧ пи́щи наслажда́ѧсѧ, со а҆́гг҃лы вѣща́етъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃а пе́рвѣе ѿлꙋчи́вшїисѧ, де́мѡнскими прельще́ннїи словесы̀, пра́веднѡ ѿстꙋпи́ша землѝ чи́стыѧ ѻ҆каѧ́ннїи, прⷪ҇ро́ка гласовѡ́мъ послѣ́дованнѡ, и҆ пѣ́ти не мо́гꙋтъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пре́лесть ѡ҆ста́вивше, къ бжⷭ҇твенномꙋ притеко́ша сїѧ́нїю, мно́жєства ꙗ҆зы̑къ, и҆ хрⷭ҇то́вѣ цр҃кви ѡ҆брꙋчи́шасѧ, ꙗ҆́коже дре́вле речѐ и҆са́їа, и҆ пѣ́сньми ны́нѣ пою́тъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Мꙋ́ченика: І҆дѡлонеи́стовства, на́глѡ приража́ема волна̀, мꙋ́ченическими ѿсѣка́шесѧ тве́рдыми сꙋпротивоѻбра́зными противлє́нїи, за хрⷭ҇та̀ прїе́млющихъ бѣды̑, и҆ вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Въ ца́рскꙋю багрѧни́цꙋ, ѡ҆багре́ннꙋю ѿ крове́й твои́хъ, мꙋ́чениче, краснѡ̀ ѡ҆дѣ́ѧнъ ны́нѣ, хрїстофо́ре непобѣди́ме, со а҆́гг҃льскими ли̑ки ликꙋ́еши, и҆ пое́ши содѣ́телю твоемꙋ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Дв҃а бг҃ома́ти ѻ҆трокови́ца, ꙗ҆́кѡ млⷣнца держи́тъ сло́ва, всѣ̑мъ даю́щаго жи́знь, и҆ всѧ̑ сотво́ршаго, ꙗ҆́коже речѐ пре́жде и҆са́їа, и҆ ра́дꙋѧсѧ взыва́ше: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты̀ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Прⷭ҇то́лꙋ предста́лъ є҆сѝ свѣ́тлѡ, бг҃опрїѧ́тне, влⷣки си́лъ: сла́вы же тогѡ̀ наслади́всѧ, твоегѡ̀ благоче́стїѧ собира́ѧ плоды̀, всеблаже́нне сла́вне. тѣ́мъ тѧ̀ всѝ велича́емъ.

Прїиди́те, ны́нѣ, свѣ́та прⷪ҇ро́ческагѡ дарова́нїѧ жела́ющїи, прїѧ́ти кни́гꙋ ᲂу҆се́рднѡ и҆са́їи, бг҃оразꙋ́мїѧ и҆спо́лненꙋ: тве́рдымъ жела́нїемъ внима́емъ, да бжⷭ҇твенныѧ зарѝ и҆спо́лнимсѧ.

Дх҃омъ свѣ́тлости ꙗ҆́вѣ ѡ҆сїѧ́емь, и҆са́їе бг҃оно́се, всѧ̑ вѣ́рою творѧ́щыѧ честнꙋ́ю твою̀ и҆ свѣтоно́снꙋю па́мѧть, молѝ спасе́нїе полꙋчи́ти: да тѧ̀ всѝ велича́емъ.

Мꙋ́ченика: Вѣне́цъ свѣ́телъ, ꙗ҆́кѡ побѣди́тель, прїе́мъ, хрїстофо́ре всесла́вне, сца́рствꙋеши влⷣцѣ, тѧ̀ въ мꙋ́кахъ ᲂу҆крѣ́пльшемꙋ, и҆ рꙋ́кꙋ живоно́снꙋ пода́вшемꙋ, ѡ҆долѣ́ти ѕлонача́льника.

Кро́вїю мꙋ́ченическою свѣ́тлѡ ѡ҆мы́всѧ, ѡ҆зари́лсѧ є҆сѝ, пречꙋ́дне, ны́нѣ же въ дѣ́вственнѣмъ черто́зѣ, съ женихо́мъ ра́дꙋѧсѧ вше́лъ є҆сѝ: ми́ра же мі́рꙋ просѧ̀, не преста́й, мꙋ́чениче сла́вне.

Бг҃оро́диченъ: Оу҆́глѧ мы́сленнаго, чⷭ҇таѧ бг҃оневѣ́сто, и҆са́їа є҆го́же ви́дѣ, но́сиши на рꙋкꙋ̀, бг҃омт҃и, зра́кꙋ на́шемꙋ соединѧ́ема, и҆ мі́рꙋ спасе́нїе свѣ́тлѡ подаю́ща: тѣ́мъ тѧ̀ всѝ велича́емъ.

Иса́ия

Житие пророка Исаии

Жил в VIII ве­ке до Р. X. Цар­ско­го ро­да, сын св. про­ро­ка Амо­са. Был же­нат, имел сы­на (Ис.8,3,18). При­зван Бо­гом к про­ро­че­ско­му слу­же­нию в цар­ство Озии, ца­ря Иудеи, и про­ро­че­ство­вал око­ло 60-ти лет при Иоафа­ме, Аха­зе, Езе­кии и Ма­нас­сии. Один из ве­ли­ких про­ро­ков. По яс­но­сти про­ро­че­ства о рож­де­нии, жиз­ни и осо­бен­но стра­да­ни­ях Иису­са Хри­ста, Его вос­ста­нии из мерт­вых про­рок Ис­а­ия на­зы­ва­ет­ся вет­хо­за­вет­ным еван­ге­ли­стом. Во вре­мя оса­ды Иеру­са­ли­ма он, по­мо­лив­шись, из­вел из-под го­ры Си­он ис­точ­ник во­ды, ко­то­рый был на­зван Си­ло­ам, т. е. «по­слан­ный от Бо­га». Скон­чал­ся му­че­ни­че­ски: по по­ве­ле­нию ца­ря Ма­нас­сии был пе­ре­пи­лен де­ре­вян­ной пи­лой.

См. так­же: "Жи­тие свя­то­го про­ро­ка Ис­а­ии" в из­ло­же­нии свт. Ди­мит­рия Ро­стов­ско­го.

Христофо́р Ликийский

Мученики Христофор, Каллиникия и Акилина

Свя­той му­че­ник Хри­сто­фор жил в III ве­ке и по­стра­дал око­ло 250 го­да, при им­пе­ра­то­ре Де­кии (249–251). О жиз­ни и чу­де­сах его су­ще­ству­ет мно­го раз­лич­ных ска­за­ний, па­мять его чтит­ся и в Во­сточ­ной, и в За­пад­ной Церк­вах. (Па­мять му­че­ни­ка Хри­сто­фо­ра осо­бен­но чтит­ся в Ис­па­нии, где к его мо­лит­вам при­бе­га­ют при за­раз­ных бо­лез­нях.) О про­ис­хож­де­нии его го­во­рит­ся по-раз­но­му. По од­ним ис­точ­ни­кам – он про­ис­хо­дит из ха­на­не­ев, по дру­гим – ки­но­це­фа­лов.

Свя­той Хри­сто­фор был че­ло­ве­ком вы­со­ко­го ро­ста и необы­чай­ной си­лы, ли­цо же его бы­ло зве­ро­об­раз­но. По пре­да­нию, свя­той Хри­сто­фор пер­во­на­чаль­но имел кра­си­вую на­руж­ность, но, же­лая из­бег­нуть со­блаз­нов для се­бя и окру­жа­ю­щих, про­сил Гос­по­да дать ему без­об­раз­ное ли­цо, что и ис­пол­ни­лось. До сво­е­го Кре­ще­ния он но­сил имя Ре­прев (негод­ный), что бы­ло свя­за­но с его обез­об­ра­жен­ной внеш­но­стью. Еще до Кре­ще­ния Ре­прев ис­по­ве­до­вал ве­ру во Хри­ста и об­ли­чал тех, кто пре­сле­до­вал хри­сти­ан. За это он од­на­жды был из­бит неким Вак­хом и при­нял по­бои со сми­ре­ни­ем. Вско­ре по­сле это­го бы­ли при­сла­ны 200 во­и­нов, чтобы при­ве­сти его, из­вест­но­го си­ла­ча, к им­пе­ра­то­ру Де­кию. Ре­прев под­чи­нил­ся без со­про­тив­ле­ния. В пу­ти про­изо­шли чу­де­са: су­хая трость в ру­ке свя­то­го рас­цве­ла, по мо­лит­ве его умно­жи­лись хле­бы, ко­то­рых недо­ста­ва­ло у пут­ни­ков, по­доб­но умно­же­нию хле­бов Спа­си­те­лем в пу­стыне. Во­и­ны, со­про­вож­дав­шие Ре­пре­ва, бы­ли по­ра­же­ны чу­де­са­ми, уве­ро­ва­ли во Хри­ста и вме­сте с Ре­пре­вом бы­ли кре­ще­ны ан­тио­хий­ским епи­ско­пом Ва­ви­лой.

Ко­гда свя­той Хри­сто­фор был при­ве­ден к им­пе­ра­то­ру, тот ужас­нул­ся его на­руж­но­сти и ре­шил за­ста­вить его от­речь­ся от Хри­ста не на­си­ли­ем, а хит­ро­стью. Он при­звал двух жен­щин-блуд­ниц, Кал­ли­ни­кию и Аки­ли­ну, при­ка­зал им скло­нить Хри­сто­фо­ра к от­ре­че­нию от Хри­ста и до­бить­ся со­гла­сия его при­не­сти жерт­ву идо­лам. Но жен­щи­ны бы­ли са­ми об­ра­ще­ны свя­тым Хри­сто­фо­ром к ве­ре во Хри­ста и, вер­нув­шись к им­пе­ра­то­ру, объ­яви­ли се­бя хри­сти­ан­ка­ми, за что бы­ли под­верг­ну­ты же­сто­ким ис­тя­за­ни­ям и скон­ча­лись му­че­ни­ца­ми. Де­кий при­го­во­рил к каз­ни так­же по­слан­ных за свя­тым Хри­сто­фо­ром во­и­нов, ко­то­рые уве­ро­ва­ли во Хри­ста. Им­пе­ра­тор при­ка­зал бро­сить му­че­ни­ка в мед­ный рас­ка­лен­ный ящик. Од­на­ко свя­той Хри­сто­фор не ис­пы­ты­вал стра­да­ний и остал­ся невре­дим. По­сле мно­гих же­сто­ких ис­тя­за­ний му­че­ни­ку на­ко­нец от­сек­ли го­ло­ву ме­чом. Это про­изо­шло в 250 го­ду в Ли­кии. Сво­и­ми чу­де­са­ми свя­той му­че­ник Хри­сто­фор об­ра­тил ко Хри­сту до 50 ты­сяч языч­ни­ков, о чем сви­де­тель­ству­ет свя­той Ам­вро­сий. Впо­след­ствии мо­щи свя­то­го Хри­сто­фо­ра бы­ли пе­ре­не­се­ны в То­ле­до, а позд­нее – в аб­бат­ство Сен-Де­ни во Фран­ции.

См. так­же: "Стра­да­ние свя­то­го му­че­ни­ка Хри­сто­фо­ра" в из­ло­же­нии свт. Ди­мит­рия Ро­стов­ско­го.