Канон святому священномученику Евсевию, епископу Самосатскому

Припев: Святы́й священному́чениче Евсéвие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 05 июля (22 июня ст. ст.)

Глас 8.

Пе́снь 1.

Ирмо́с: Посе́ченный несеко́маго пресече́, и ви́де со́лнце зе́млю, ю́же не ви́де, лю́таго врага́, вода́ потопи́, и непроходи́мое про́йде Изра́иль, пе́снь же воспева́шеся: Го́сподеви пои́м, сла́вно бо просла́вися.

Соверше́нным све́том осия́емь, и свяще́нным лико́м, блаже́нне, сочиня́емь, и му́ченическим благосла́вием украша́емь, ве́рою пра́зднующия твою́, Евсе́вие блаже́нне, па́мять сохраня́й, Христа́ ми́лостива творя́.

Сла́достне жела́нием Христо́вым разжига́емь от ю́ности, пло́ть покори́л еси́, преблаже́нне, души́ свяще́нными си́лами и, сосу́д свяще́н показа́вся, лю́ди в преподо́бии, преподо́бне, упа́сл еси́, пома́зався ми́ром благода́ти.

Тя́ пастыренача́льника Ду́х Святы́й предлага́ет, ерети́чествующих мглу́ словесы́ светоно́сными твои́ми разоря́юща, му́дре, и я́ве показу́юща стезю́ пра́вую в ню́ преподо́бно входя́щим, вели́кий Евсе́вие, свети́ло серде́ц на́ших.

Богоро́дичен: Благослове́нная, Бо́га ро́ждшая, благословя́щия Тя́ ны́не, Пречи́стая, благослови́, к благи́м вхо́дом руководи́, и испо́лни Боже́ственных бла́г, и пе́ти укрепи́: Го́сподеви пое́м, сла́вно бо просла́вися.

Пе́снь 3.

Ирмо́с: Стра́х Тво́й, Го́споди, всади́ в сердца́ ра́б Твои́х и бу́ди на́м утвержде́ние, Тя́ во и́стине призыва́ющих.

Бы́л еси́ кро́ток и незло́бив, смиренному́др же и ти́х и любве́ Боже́ственныя испо́лнен, му́ченическими при кончи́не украси́лся еси́ венцы́.

Оде́ждами, и́же от кро́ве, Евсе́вие свяще́нне, сия́я, во свята́я восте́кл еси́, све́тло святы́х сла́вою венча́емь.

Облича́я А́риевы единомы́сленники, гоне́ния, блаже́нне, подъя́л еси́ и ну́ждную сме́рть, те́мже безсме́ртныя сла́вы сподо́бился еси́.

Богоро́дичен: Во́лею О́тчею Сло́во родила́ еси́, наи́тием Боже́ственнаго Ду́ха, Пресвята́я Де́во Ма́ти, архиере́ев сла́во, те́мже Тя́ пое́м.

Седа́лен, гла́с 4.

Уясни́в житие́ твое́ доброде́телей красота́ми, па́стырь наре́клся еси́, и святи́тель че́стен, преблаже́нне Евсе́вие, кро́вию же муче́ния себе́ украси́в, горе́ к Невеще́ственным преста́вился еси́ лико́м. С ни́миже о на́с Христа́, о́тче, моли́ поми́ловати ду́ши на́ша.

Богоро́дичен: Чи́стая, Всенепоро́чная Неискусому́жная, Я́же еди́на Безле́тнаго Сы́на и Сло́ва Бо́жия в ле́то ро́ждши, Сего́ со святы́ми и честны́ми патриа́рхи, и му́ченики, и проро́ки, и преподо́бными моли́ дарова́ти на́м очище́ние и ве́лию ми́лость.

Крестобогоро́дичен: На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко, Жи́знь все́х, вкуша́еши сме́рти, оживи́ти ме́ртвыя хотя́, я́ко Милосе́рд?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяще си́лу Твою́.

Уста́вил еси́, му́дре, пре́лести гное́ние со́лию твои́х изря́дных уче́ний и неду́гующия е́ресию злове́рия, блаже́нне, исцели́л еси́, Евсе́вие.

Напра́вив лю́ди к приста́нищу спасе́ния, А́риево погрузи́л еси́ неве́рие кро́вным наводне́нием, па́стырю и му́чениче, святи́телей удобре́ние.

Звезда́ светла́ возсия́л еси́ в ми́ре, сия́нием свяще́нным озаря́я мы́сли, преблаже́нне, правосла́вных, те́мже тя́ ве́рно ублажа́ем.

Богоро́дичен: Усты́, Чи́стая, и язы́ком, и се́рдцем испове́даю Тя́, Зижди́теля Ма́терь, и молю́ Тя́: озари́ ду́шу мою́, омраче́нную согреше́ньми.

Пе́снь 5.

Ирмо́с: От но́щи неве́дения, Богове́дением просвети́вый концы́, просвети́ мя у́тром человеколю́бия Твоего́, Го́споди.

Уче́нии твои́ми, блаже́нне, правосла́вных утвержда́я мудрова́ние, за благоче́стие заточе́ние претерпе́л еси́.

Правосла́вия столпа́, и исцеле́ний исто́чника тя́ ве́мы, прему́дре святи́телю, и Це́ркве утвержде́ние.

Законоположе́нии Боже́ственными беззако́ннующия утвержда́я, Евсе́вие, от руки́ беззако́ннующих непра́ведну претерпе́л еси́ сме́рть.

Богоро́дичен: Све́тел све́щник, Богороди́тельнице, Боже́ственную свещу́ нося́щи, позна́лася еси́, вся́ озаря́ющую концы́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Пропове́дал еси́ Единосу́щное Сло́во и Собезнача́льнаго Отцу́ Сы́на, ме́рзскаго А́риева неи́стовства потреби́л еси́ су́етное мудрова́ние, Евсе́вие, благочести́вых неразсе́дное и тве́рдое огражде́ние.

Кропле́нием честны́х твои́х крове́й порфи́ру себе́ обагри́л еси́ ца́рску и вмести́лся еси́, о́тче, с весе́лием в Боже́ственное Ца́рствие, предстоя́ти Царю́ веко́в, всеблаже́нне Евсе́вие.

Я́ко ши́пок, я́ко благово́нен кри́н, я́ко ра́й Бо́жий, показа́лся еси́, посреде́ жи́зни име́я дре́во, Самоде́теля все́х и Го́спода, Евсе́вие. Ны́не на́с благово́ния исполня́еши Боже́ственнаго Ду́ха.

Богоро́дичен: Разуме́вше Богоглаго́ливии проро́цы та́инства Твоего́ безме́рную глубину́, сие́ я́ве провозвести́ша, Отрокови́це, гада́ньми и Боже́ственными прорече́нии: Сло́во бо О́тчее па́че сло́ва, Чи́стая, воплоти́ла еси́.

Конда́к, гла́с 4.

Благоче́стно во святи́тельстве пожи́в и муче́ния пу́ть проше́д, и́дольския угаси́л еси́ же́ртвы, святи́телю Евсе́вие, но я́ко име́яй дерзнове́ние ко Христу́ Бо́гу, моли́ спасти́ся душа́м на́шим.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Пе́сньми упражня́яся, святи́телю, и мольба́ми, успи́л еси́ стра́сти и на́м, ве́рным, бо́др яви́лся еси́ храни́тель, благоче́стно пою́щим тя́ и творя́щим твою́ па́мять.

Му́ченик я́влься и святи́тель, Небе́сная боже́ственне насле́довал еси́ и престо́лу предстои́ши Зижди́теля, вопия́: благослове́н еси́, Го́споди Бо́же, во ве́ки.

У́тро возсия́л еси́, пропове́дая возсия́вшаго от Отца́ пре́жде денни́цы, Иису́са Христа́, свети́льниче церко́вный, святи́телей украше́ние, страда́льцев удобре́ние.

Богоро́дичен: Зако́ны естества́, Де́во, рождество́м Твои́м обновля́еши пресла́вно и истле́вшия ны́ злы́м преступле́нием очища́еши. Те́мже Тя́ по до́лгу восхваля́ем.

Пе́снь 8.

Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху; благослови́те, дела́ Госпо́дня, Го́спода.

Со святи́тели и му́ченики моли́, я́ко святи́тель и му́ченик, священнопропове́дниче Евсе́вие, Спа́са все́х обрести́ на́м ми́лость.

Благи́м нра́вом пожи́в, слове́сною па́лицею свяще́нное твое́ ста́до упа́сл еси́ и ерети́ческия зве́ри, всеблаже́нне, отгна́л еси́.

Отягче́нныя пия́нством пре́лести, ерети́чествующия всу́е ты́ облича́я, Евсе́вие, от те́х убие́н бы́л еси́, страда́в тве́рдо.

Богоро́дичен: Я́ко вы́шши небе́сных высо́т, вы́шнее пролила́ еси́ Сло́во, от земли́ возне́сшее па́дшее существо́ челове́ческое, Всепе́тая.

Пе́снь 9.

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с Безпло́тными ли́ки Тя́ велича́юще.

Ви́дети сподо́бился еси́, о́тче, да́льняя, свяще́нней твое́й души́ наде́емая, и к невече́рнему сия́нию, ра́дуяся, всели́лся еси́.

Красе́н яви́лся еси́ богоглаго́ланием, и благи́ми дея́нии, Евсе́вие, и всечестны́ми страда́ний, блаже́нне, светлостьми́.

Соста́вим ли́к ра́достен, свяще́ннаго восхваля́юще Евсе́вия, благоче́стия добро́тою укра́шена.

Ра́ка твоя́ дае́т благода́ть исцеле́ний, свята́я же па́мять твоя́, Евсе́вие, просвеща́ет ми́р, я́ко вели́кое со́лнце.

Богоро́дичен: Благолюби́вая Де́во, озло́бленную грехми́ ду́шу мою́ ублажи́, Я́же Преблага́го Бо́га пло́тию ро́ждшая.

Пѣ́снь а҃.

І҆рмо́съ: Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́тагѡ врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Соверше́ннымъ свѣ́томъ ѡ҆сїѧ́емь, и҆ свѧщє́ннымъ ликѡ́мъ, блаже́нне, сочинѧ́емь, и҆ мꙋ́ченическимъ благосла́вїемъ ᲂу҆краша́емь, вѣ́рою пра́зднꙋющыѧ твою̀, є҆ѵсе́вїе блаже́нне, па́мѧть, сохранѧ́й, хрⷭ҇та̀ ми́лостива творѧ̀.

Сла́достнѣ жела́нїемъ хрⷭ҇то́вымъ разжига́емь ѿ ю҆́ности, пло́ть покори́лъ є҆сѝ, преблаже́нне, дꙋшѝ, свѧще́нными си́лами, и҆ сосꙋ́дъ свѧще́нъ показа́всѧ: лю́ди въ преподо́бїи, преподо́бне, ᲂу҆па́слъ є҆сѝ, пома́завсѧ мѵ́ромъ благода́ти.

Тѧ̀ пастыренача́льника дх҃ъ ст҃ы́й предлага́етъ, є҆реті́чествꙋющихъ мглꙋ̀ словесы̀ свѣтоно́сными твои́ми разорѧ́юща, мꙋ́дре, и҆ ꙗ҆́вѣ показꙋ́юща стезю̀ пра́вꙋю, въ ню̀ преподо́бнѡ входѧ́щымъ, вели́кїй є҆ѵсе́вїе, свѣти́ло серде́цъ на́шихъ.

Бг҃оро́диченъ: Благослове́ннаѧ бг҃а ро́ждшаѧ, благословѧ́щыѧ тѧ̀ ны́нѣ, пречⷭ҇таѧ, благословѝ, къ благи̑мъ вхо́дѡмъ рꙋководѝ, и҆ и҆спо́лни бжⷭ҇твенныхъ бла̑гъ, и҆ пѣ́ти ᲂу҆крѣпѝ: гдⷭ҇еви пое́мъ, сла́внѡ бо просла́висѧ.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Бы́лъ є҆сѝ кро́токъ и҆ неѕло́бивъ, смиренномꙋ́дръ же и҆ ти́хъ, и҆ любвѐ бжⷭ҇твенныѧ и҆спо́лненъ, мꙋ́ченическими при кончи́нѣ ᲂу҆краси́лсѧ є҆сѝ вѣнцы̑.

Ѻ҆де́ждами, и҆́же ѿ кро́ве, є҆ѵсе́вїе свѧще́нне, сїѧ́ѧ, во ст҃а̑ѧ восте́клъ є҆сѝ, свѣ́тлѡ ст҃ы́хъ сла́вою вѣнча́емь.

Ѡ҆блича́ѧ а҆́рїєвы є҆диномы́сленники, гонє́нїѧ, блаже́нне, под̾ѧ́лъ є҆сѝ, и҆ нꙋ́жднꙋю сме́рть: тѣ́мже безсме́ртныѧ сла́вы сподо́билсѧ є҆сѝ.

Бг҃оро́диченъ: Во́лею ѻ҆́ч҃ею сло́во родила̀ є҆сѝ, наи́тїемъ бжⷭ҇твеннагѡ дх҃а, прест҃а́ѧ дв҃о мт҃и, а҆рхїере́євъ сла́во: тѣ́мже тѧ̀ пое́мъ.

Сѣда́ленъ, гла́съ д҃.

Оу҆ѧсни́въ житїѐ твоѐ добродѣ́телей красота́ми, па́стырь наре́клсѧ є҆сѝ, и҆ свѧти́тель че́стенъ, преблаже́нне є҆ѵсе́вїе, кро́вїю же мꙋче́нїѧ себѐ ᲂу҆краси́въ, горѣ̀ къ невеще́ствєннымъ преста́вилсѧ є҆сѝ ликѡ́мъ. съ ни́миже ѡ҆ на́съ хрⷭ҇та̀, ѻ҆́тче, молѝ, поми́ловати дꙋ́шы на́шѧ.

Бг҃оро́диченъ: Чтⷭ҇аѧ, всенепоро́чнаѧ и҆ неискꙋсомꙋ́жнаѧ, ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то ро́ждши, сего̀ со ст҃ы́ми и҆ честны́ми патрїа́рхи и҆ мꙋ́ченики, и҆ проро́ки, и҆ преподо́бными, молѝ, дарова́ти на́мъ ѡ҆чище́нїе и҆ ве́лїю ми́лость.

Крⷭ҇тобг҃оро́диченъ: На крестѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧще си́лꙋ твою̀.

Оу҆ста́вилъ є҆сѝ, мꙋ́дре, пре́лести гное́нїе, со́лїю твои́хъ и҆зрѧ́дныхъ ᲂу҆че́нїй: и҆ недꙋ́гꙋющыѧ є҆́ресїю ѕловѣ́рїѧ, блаже́нне, и҆сцѣли́лъ є҆сѝ, є҆ѵсе́вїе.

Напра́вивъ лю́ди къ приста́нищꙋ спасе́нїѧ, а҆́рїево погрꙋзи́лъ є҆сѝ невѣ́рїе, кро́внымъ наводне́нїемъ, па́стырю и҆ мꙋ́чениче, свѧти́телей ᲂу҆добре́нїе.

Ѕвѣзда̀ свѣтла̀ возсїѧ́лъ є҆сѝ въ мі́рѣ, сїѧ́нїемъ свѧще́ннымъ ѡ҆зарѧ́ѧ мы̑сли, преблаже́нне, правосла́вныхъ: тѣ́мже тѧ̀ вѣ́рнѡ ᲂу҆блажа́емъ.

Бг҃оро́диченъ: Оу҆сты̀, чⷭ҇таѧ, и҆ ѧ҆зы́комъ, и҆ се́рдцемъ, и҆сповѣ́даю тѧ̀ зижди́телѧ мт҃рь, и҆ молю̀ тѧ̀: ѡ҆зарѝ дꙋ́шꙋ мою̀, ѡ҆мраче́ннꙋю согрѣше́ньми.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Оу҆чє́нїи твои́ми, блаже́нне, правосла́вныхъ ᲂу҆твержда́ѧ мꙋдрова́нїе, за благоче́стїе заточе́нїе претерпѣ́лъ є҆сѝ.

Правосла́вїѧ столпа̀, и҆ и҆сцѣле́нїй и҆сто́чника тѧ̀ вѣ́мы, премꙋ́дре свѧти́телю, и҆ цр҃кве ᲂу҆твержде́нїе.

Законоположє́нїи бжⷭ҇твенными беззако́ннꙋющыѧ ᲂу҆твержда́ѧ, є҆ѵсе́вїе, ѿ рꙋкѝ беззако́ннꙋющихъ непра́веднꙋ претерпѣ́лъ є҆сѝ сме́рть.

Бг҃оро́диченъ: Свѣ́телъ свѣ́щникъ, бг҃ороди́тельнице, бжⷭ҇твеннꙋю свѣщꙋ̀ носѧ́щи позна́ласѧ є҆сѝ, всѧ̑ ѡ҆зарѧ́ющꙋю концы̀.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Проповѣ́далъ є҆сѝ є҆диносꙋ́щное сло́во, и҆ собезнача́льнаго ѻ҆ц҃ꙋ̀ сн҃а: ме́рзскагѡ а҆́рїева неи́стовства потреби́лъ є҆сѝ сꙋ́етное мꙋдрова́нїе, є҆ѵсе́вїе, благочести́выхъ неразсѣ́дное и҆ тве́рдое ѡ҆гражде́нїе.

Кропле́нїемъ честны́хъ твои́хъ крове́й, порфѵ́рꙋ себѣ̀ ѡ҆багри́лъ є҆сѝ ца́рскꙋ, и҆ вмѣсти́лсѧ є҆сѝ, ѻ҆́тче, съ весе́лїемъ въ бж҃е́ственное црⷭ҇твїе, предстоѧ́ти цр҃ю̀ вѣкѡ́въ, всебл҃же́нне є҆ѵсе́вїе.

Ꙗ҆́кѡ ши́покъ, ꙗ҆́кѡ бл҃гово́ненъ крі́нъ, ꙗ҆́кѡ ра́й бж҃їй показа́лсѧ є҆сѝ, посредѣ̀ жи́зни и҆мѣ́ѧ дре́во, самодѣ́телѧ всѣ́хъ и҆ гдⷭ҇а, є҆ѵсе́вїе, ны́нѣ на́съ благово́нїѧ и҆сполнѧ́еши бжⷭ҇твеннагѡ дх҃а.

Бг҃оро́диченъ: Разꙋмѣ́вше бг҃оглаго́ливїи прⷪ҇ро́цы та́инства твоегѡ̀ безмѣ́рнꙋю глꙋбинꙋ̀, сїѐ ꙗ҆́вѣ провозвѣсти́ша, ѻ҆трокови́це, гада́ньми и҆ бжⷭ҇твенными проречє́нїи: сло́во бо ѻ҆́ч҃ее па́че сло́ва, чⷭ҇таѧ, воплоти́ла є҆сѝ.

Конда́къ, гла́съ д҃.

Бл҃гоче́стнѡ во ст҃и́тельствѣ пожи́въ, и҆ мꙋче́нїѧ пꙋ́ть проше́дъ, і҆́дѡльскїѧ ᲂу҆гаси́лъ є҆сѝ жє́ртвы, ст҃и́телю є҆ѵсе́вїе: но ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ, молѝ, спасти́сѧ дꙋша́мъ на́шымъ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Пѣ́сньми ᲂу҆пражнѧ́ѧсѧ, свѧти́телю, и҆ мольба́ми ᲂу҆спи́лъ є҆сѝ стра̑сти, и҆ на́мъ вѣ̑рнымъ бо́дръ ꙗ҆ви́лсѧ є҆сѝ храни́тель, бл҃гоче́стнѡ пою́щымъ тѧ̀, и҆ творѧ́щымъ твою̀ па́мѧть.

Мꙋ́ченикъ ꙗ҆́вльсѧ и҆ свѧти́тель, нбⷭ҇наѧ бжⷭ҇твеннѣ наслѣ́довалъ є҆сѝ и҆ прⷭ҇то́лꙋ предстои́ши зижди́телѧ, вопїѧ̀: бл҃гослове́нъ є҆сѝ, гдⷭ҇и бж҃е, во вѣ́ки.

Оу҆́тро возсїѧ́лъ є҆сѝ, проповѣ́даѧ возсїѧ́вшаго ѿ ѻ҆ц҃а̀ пре́жде денни́цы, і҆и҃са хрⷭ҇та̀, свѣти́льниче цр҃ко́вный, ст҃и́телей ᲂу҆краше́нїе, страда́льцєвъ ᲂу҆добре́нїе.

Бг҃оро́диченъ: Зако́ны є҆стества̀, дв҃о, ржⷭ҇тво́мъ твои́мъ ѡ҆бновлѧ́еши пресла́внѡ, и҆ и҆стлѣ́вшыѧ ны̀ ѕлы́мъ престꙋпле́нїемъ ѡ҆чища́еши. тѣ́мже тѧ̀ по до́лгꙋ восхвалѧ́емъ.

Пѣ́снь и҃.

І҆рмо́съ: Бг҃оглаго́ливїи ѻ҆́троцы, въ пещѝ со ѻ҆гне́мъ пла́мень попира́юще, поѧ́хꙋ: благослови́те, дѣла̀ гдⷭ҇нѧ, гдⷭ҇а.

Со свѧти́тєли и҆ мꙋ́ченики молѝ, ꙗ҆́кѡ свѧти́тель и҆ мч҃никъ, свѧщеннопроповѣ́дниче є҆ѵсе́вїе, сп҃са всѣ́хъ, ѡ҆брѣстѝ на́мъ ми́лость.

Бл҃ги́мъ нра́вомъ пожи́въ, слове́сною па́лицею свѧще́нное твоѐ ста́до ᲂу҆па́слъ є҆сѝ, и҆ є҆реті́чєскїѧ ѕвѣ́ри, всебл҃же́нне, ѿгна́лъ є҆сѝ.

Ѡ҆тѧгчє́нныѧ пїѧ́нствомъ пре́лести, є҆реті́чествꙋющыѧ всꙋ́е, ты̀ ѡ҆блича́ѧ, є҆ѵсе́вїе, ѿ тѣ́хъ ᲂу҆бїе́нъ бы́лъ є҆сѝ, страда́въ тве́рдѡ.

Бг҃оро́диченъ: Ꙗ҆́кѡ вы́шши нбⷭ҇ныхъ высо́тъ, вы́шнее родила̀ є҆сѝ сло́во, ѿ землѝ возне́сшее па́дшее сꙋщество̀ человѣ́ческое, всепѣ́таѧ.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Ви́дѣти сподо́билсѧ є҆сѝ, ѻ҆́тче, да̑льнаѧ, сщ҃е́ннѣй твое́й дꙋшѝ надѣ́ємаѧ, и҆ къ невече́рнемꙋ сїѧ́нїю ра́дꙋѧсѧ всели́лсѧ є҆сѝ.

Красе́нъ ꙗ҆ви́лсѧ є҆сѝ бг҃оглаго́ланїемъ, и҆ бл҃ги́ми дѣѧ̑нїи, є҆ѵсе́вїе, и҆ всечⷭ҇тны́ми страда́нїй, бл҃же́нне, свѣтлостьмѝ.

Соста́вимъ ли́къ ра́достенъ, свѧще́ннаго восхвалѧ́юще є҆ѵсе́вїа, благоче́стїѧ добро́тою ᲂу҆кра́шена.

Ра́ка твоѧ̀ дае́тъ благода́ть и҆сцѣле́нїй, ст҃а́ѧ же па́мѧть твоѧ̀, є҆ѵсе́вїе, просвѣща́етъ мі́ръ, ꙗ҆́кѡ вели́кое сл҃нце.

Бг҃оро́диченъ: Бл҃голюби́ваѧ дв҃о, ѡ҆ѕло́бленнꙋю грѣхмѝ дꙋ́шꙋ мою̀ ᲂу҆блажѝ, ꙗ҆́же преблага́го бг҃а пло́тїю ро́ждшаѧ.

Краткое житие священномученика Евсевия, епископа Самосатского

Свя­щен­но­му­че­ник Ев­се­вий, епи­скоп Са­мо­сат­ский, твер­до сто­ял за пра­во­слав­ное ис­по­ве­да­ние, утвер­жден­ное на I Все­лен­ском Со­бо­ре в Ни­кее в 325 го­ду, за что тер­пел пре­сле­до­ва­ния от ари­ан, неод­но­крат­но ли­шав­ших его ка­фед­ры и из­го­няв­ших в за­то­че­ние. Им­пе­ра­тор Кон­стан­ций (337–361), по­кро­ви­тель ари­ан, узнав о том, что у свя­ти­те­ля Ев­се­вия хра­нит­ся со­бор­ный акт об из­бра­нии на Ан­тио­хий­скую ка­фед­ру пра­во­слав­но­го ар­хи­епи­ско­па Ме­ле­тия, по­слал к нему при­каз от­дать этот акт. Свя­ти­тель ре­ши­тель­но от­ка­зал­ся ис­пол­нить при­ка­за­ние. Раз­гне­ван­ный им­пе­ра­тор по­слал ска­зать, что ес­ли он не от­даст акт, то ему от­се­кут пра­вую ру­ку. Свя­той Ев­се­вий про­тя­нул по­слан­но­му обе ру­ки со сло­ва­ми: "От­се­ки­те, но ак­та со­бо­ра, в ко­то­ром об­ли­ча­ет­ся зло­ба и без­за­ко­ние ари­ан, я не от­дам". Им­пе­ра­тор Кон­стан­ций уди­вил­ся сме­ло­сти епи­ско­па, но не при­чи­нил ему вре­да.

По­сле Кон­стан­ция во­ца­рил­ся Юли­ан От­ступ­ник (361–363). На­сту­пи­ло еще бо­лее труд­ное вре­мя – на­ча­лось от­кры­тое го­не­ние на хри­сти­ан. Свя­ти­тель Ев­се­вий, скры­вая свой сан, в одеж­де во­и­на про­шел через всю Си­рию, Фини­кию и Па­ле­сти­ну, утвер­ждая хри­сти­ан в пра­во­слав­ной ве­ре. Он по­став­лял в пу­сту­ю­щие церк­ви свя­щен­ни­ков и диа­ко­нов, ру­ко­по­ла­гал епи­ско­пов, от­вер­гав­ших ари­ан­скую ересь. По­сле ги­бе­ли Юли­а­на От­ступ­ни­ка во­ца­рил­ся бла­го­че­сти­вый царь Иови­ан (363–364), в прав­ле­ние ко­то­ро­го го­не­ние пре­кра­ти­лось. Воз­вра­тив­ший­ся из ссыл­ки ар­хи­епи­скоп Ме­ле­тий по со­ве­ту свя­то­го Ев­се­вия в 379 го­ду со­звал в Ан­тио­хии По­мест­ный Со­бор. В нем участ­во­ва­ло 27 епи­ско­пов и бы­ло под­твер­жде­но пра­во­слав­ное ве­ро­уче­ние, при­ня­тое на I Все­лен­ском Со­бо­ре. Ари­ане, бо­ясь твер­дых ис­по­вед­ни­ков пра­во­сла­вия – свя­ти­те­лей Ме­ле­тия, Ев­се­вия и Пе­ла­гия, поль­зо­вав­ших­ся боль­шим ува­же­ни­ем им­пе­ра­то­ра, по­ста­ви­ли свои под­пи­си под со­бор­ным опре­де­ле­ни­ем. По­сле смер­ти им­пе­ра­то­ра Иови­а­на на­ча­лось прав­ле­ние ари­а­ни­на Ва­лен­та (364–378). Пра­во­слав­ные вновь ста­ли под­вер­гать­ся пре­сле­до­ва­ни­ям. Свя­той Ме­ле­тий был из­гнан в Ар­ме­нию, свя­той Пе­ла­гий – в Ара­вию, а свя­ти­тель Ев­се­вий осуж­ден на за­то­че­ние во Фра­кию. По­лу­чив цар­ский указ, свя­той Ев­се­вий но­чью уехал из Са­мо­са­ты, чтобы предот­вра­тить воз­му­ще­ние по­чи­тав­ше­го его на­ро­да. Узнав об отъ­ез­де епи­ско­па, ве­ру­ю­щие на­стиг­ли его и с пла­чем умо­ля­ли воз­вра­тить­ся. Свя­ти­тель от­ка­зал­ся ис­пол­нить прось­бу па­со­мых, ска­зав, что сле­ду­ет по­ви­но­вать­ся су­ще­ству­ю­щей вла­сти. Свя­ти­тель убеж­дал па­со­мых твер­до дер­жать­ся пра­во­сла­вия, бла­го­сло­вил их и от­пра­вил­ся на ме­сто ссыл­ки. На Са­мо­сат­скую ка­фед­ру был по­слан ари­а­нин Ев­но­мий, од­на­ко на­род не при­нял ере­ти­ка. Пра­во­слав­ные не хо­ди­ли в храм и из­бе­га­ли встре­чи с ним. Ере­тик-ари­а­нин по­нял, что не смо­жет при­влечь к се­бе са­мо­сто­я­тель­ную паст­ву.

Всту­пив­ший на пре­стол им­пе­ра­тор Гра­ци­ан (375–383) воз­вра­тил из из­гна­ния всех по­стра­дав­ших при ари­а­нах пра­во­слав­ных ар­хи­ере­ев. Свя­ти­тель Ев­се­вий так­же воз­вра­тил­ся в Са­мо­са­ты и про­дол­жил тру­ды по цер­ков­но­му бла­го­устро­е­нию. Вме­сте со свя­тым Ме­ле­ти­ем они по­став­ля­ли на ме­сто ари­ан пра­во­слав­ных ар­хи­ере­ев и свя­щен­но­слу­жи­те­лей. Око­ло 380 го­да он при­был в ари­ан­ский го­род До­ли­хи­ны, чтобы по­ста­вить в нем пра­во­слав­но­го епи­ско­па Ма­ри­на. Жен­щи­на-ари­ан­ка сбро­си­ла с кры­ши че­ре­пи­цу, ко­то­рая про­би­ла го­ло­ву свя­ти­те­лю. Уми­рая, он по при­ме­ру Спа­си­те­ля про­стил ей ви­ну и про­сил окру­жав­ших не де­лать ей зла. Те­ло свя­ти­те­ля Ев­се­вия бы­ло пе­ре­не­се­но в Са­мо­са­ты и с пла­чем по­гре­бе­но его па­со­мы­ми. На ме­сто свя­ти­те­ля был воз­ве­ден его пле­мян­ник, бла­жен­ный Ан­тиох, и Са­мо­сат­ская Цер­ковь про­дол­жа­ла твер­до ис­по­ве­до­вать пра­во­слав­ную ве­ру, проч­но на­саж­ден­ную тру­да­ми свя­то­го свя­щен­но­му­че­ни­ка Ев­се­вия.

См. так­же: "Жи­тие и стра­да­ния свя­то­го свя­щен­но­му­че­ни­ка Ев­се­вия, епи­ско­па Са­мо­сат­ско­го" в из­ло­же­нии свт. Ди­мит­рия Ро­стов­ско­го.