Канон святому священномученику Ипполиту Остинскому, Римскому

Пе́снь 1.

Ирмо́с: Колесни́цы фарао́новы и си́лу его́ вве́рже в мо́ре Кре́пкий во бране́х, воспое́м пе́снь но́вую, я́ко просла́вися.

Гряди́те, му́ченическими воспое́м пе́сньми священному́ченика, богоза́рною зря́ще благода́тию све́тло просия́вша, Христа́ сла́вяще всегда́.

Ты́ за ста́до слове́сное, от Христа́ вруче́нное, Сего́ подража́я, в беде́ су́щия изря́дне, о́тче, ду́шу положи́л еси́ и сугу́бым венце́м украси́лся еси́.

Свяще́нным от повеле́ния Бо́жия ра́дования пома́зався еле́ем му́ченическим, Ипполи́те, назна́менался еси́ кро́вию.

Богоро́дичен: Неопа́льну Моисе́й в горе́ Сина́йстей купину́ зря́ше, Тя́ прописа́вшую, Де́во, заре́ю неопа́льшуся Боже́ственнаго огня́, и́бо Бо́га родила́ еси́.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

А́гнцы слове́сныя упа́сл еси́ и, я́коже а́гня ове́ц, предпоже́рлся еси́, все́х Первопа́стыря и Бо́жия А́гнца подража́я.

Млеко́м слове́сным, Ипполи́те, пасо́мыя богодохнове́нно напои́л еси́, Христо́ва же свиде́тельства, ра́дуяся, испи́л еси́ ча́шу.

Собо́ры страда́льцев водя́й, за благоче́стие прия́л еси́ муче́ние, еди́наго сла́вя Бо́га Отца́ с Сы́ном и Боже́ственным Ду́хом.

Богоро́дичен: Ра́дуйся, Ма́ти Неискусобра́чная, я́же Бо́га Сло́ва во утро́бе Твое́й вмести́вшая и ро́ждшая Воплоще́ннаго, я́ко Бо́га ку́пно и Челове́ка.

Пе́снь 4.

Ирмо́с: Твоего́ на земли́ явле́ния, Христе́ Бо́же, пропове́дая проро́к прише́ствие, с весе́лием вопия́ше: сла́ва си́ле Твое́й, Го́споди.

Доброде́телей твои́х я́ко многоплете́нная боже́ственная плени́ца, я́ко па́стырь бо и свиде́тель, Ипполи́те, от Бо́га почествова́лся еси́, зело́ о Не́м веселя́ся.

Приноше́ние А́велево превозше́л еси́, слове́сныя бо а́гнцы приве́л еси́ Бо́гу, и твое́ю кро́вию, ра́дуяся, Влады́це предста́л еси́.

Ерети́чествующих пакиглаго́льное зломы́слие Ду́хом победи́в, блаже́нне, священному́ченик изря́ден любо́вию Влады́ки бы́л еси́.

Богоро́дичен: Я́ко ви́деша а́нгели, Де́во Чи́стая, от утро́бы Твоея́ произше́дшаго Сы́на Бо́жия, с весе́лием глаго́лаху: сла́ва Рождеству́ Твоему́, Влады́чице.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ты́ му́ченик и́стинен свяще́нником бы́л еси́ и му́чеником святи́тель и сугу́быми блиста́еши дарова́ньми, Ипполи́те.

Ка́мение у́бо златоза́рное и ле́потное, Ипполи́те, заре́ю же твоего́ священнонача́льства украси́ся твое́ страда́ние.

Ба́сни е́ллинския благоче́стно ты́ изобличи́л еси́, о изря́дне в му́ченицех! и пребеззако́нную ле́сть евре́ев Боже́ственною благода́тию.

Богоро́дичен: Тя́ ору́жие непобеди́мое на враги́ предлага́ем, Тя́, упова́ние и наде́жду на́шего спасе́ния, Богоневе́сто, стяжа́хом.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Поже́рл еси́ Спа́су же́ртву хвале́ния в Це́ркви преподо́бных, я́ко Бо́гу хода́тай же и челове́ком, и усе́рдно ду́шу твою́ приве́л еси́ кро́вию.

Прия́л еси́ дарова́ний мно́жество Ду́хом, священному́чениче, от Бо́га во отверзе́нии боже́ственных усте́н твои́х и приво́диши, благода́рно тебе́ умерщвля́я.

Я́ко боже́ственно страда́льцев Твои́х, Христе́, собра́ние, о наде́жди лежа́щих, я́ко настоя́щими уже́ пита́ющеся, и сладча́е жи́зни вменя́ющим сме́рть.

Богоро́дичен: О, чу́до, все́х чуде́с нове́йшее! Я́ко Де́ва, во утро́бе вся́ческая Содержа́щаго неискусому́жно заче́нши, не тесновмести́.

Седа́лен, гла́с 1.

Свети́льник присносия́нен яви́лся еси́ ми́ру, просвеща́я мо́лниями боже́ственных твои́х слове́с ве́рных помышле́ния, святи́телю Ипполи́те. Те́мже вси́ свяще́нную твою́ и боже́ственную па́мять дне́сь ра́достно соверша́ем и ве́рно почита́ем.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Му́ченическими све́тлостьми и свяще́нническими просвеща́еши, священному́чениче явле́нне, вопию́щия Христу́ в па́мяти твое́й: препе́тый Го́споди, Бо́же оте́ц на́ших, благослове́н еси́.

Предве́дящаго издале́че страда́ние свяще́ннейшее, о́тче, муче́ния зря́, предстоя́ща тебе́, ра́дуяся, взыва́л еси́: препе́тый Го́споди, Бо́же оте́ц на́ших, благослове́н еси́.

Ра́ны претерпе́в от разжже́нныя любве́ муче́ния, терпели́вно со дерзнове́нием вопия́ше Ипполи́т: препе́тый Го́споди, Бо́же оте́ц на́ших, благослове́н еси́.

Богоро́дичен: Безсе́менно во утро́бе и преесте́ственно прие́мшую непреме́ннаго Бо́га, за милосе́рдие к челове́ком прише́дша, препе́тый Го́споди, Бо́же оте́ц на́ших, благослове́н еси́.

Пе́снь 8.

Ирмо́с: Во о́бразе а́нгела, я́вльшагося в пещи́ о́гненней песносло́вцем, Христа́ Бо́га по́йте, о́троцы, свяще́нницы, благослови́те, лю́дие, превозноси́те во вся́ ве́ки.

Я́ко мягка́ и ту́чна же́ртва: до́брый бо па́стырь, я́ко овча́, приво́дится Христу́, взыва́я: свяще́нницы, благослови́те, лю́дие, превозноси́те во вся́ ве́ки.

Му́ченическим венце́м блиста́я, Це́ркви Твое́й, Христе́, иера́рх возсия́, — по́йте, о́троцы, — ра́дуяся, взыва́я, — лю́дие, превозноси́те во вся́ ве́ки.

По преще́ннем отве́те сме́ртнем Христо́в страда́лец, ра́дуяся, Ипполи́т вопия́ше: о́троцы, Христа́ благослови́те, лю́дие, превозноси́те во вся́ ве́ки.

Богоро́дичен: Неизглаго́ланно и безсе́менно заче́ншую и Ро́ждшую ра́дость вселе́нней — Христа́ Бо́га, по́йте, о́троцы, свяще́нницы, благослови́те и превозноси́те во вся́ ве́ки.

Пе́снь 9.

Ирмо́с: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Я́ко всесла́вен священному́ченик, сугу́бою уясни́л еси́ заре́ю Христо́ву Це́рковь и весели́ши сердца́ тя пою́щих. Те́мже тя́ вси́ досто́йно блажи́м.

Исто́чник источи́в уче́ний, всеблаже́нне, Христо́ве Це́ркви, из му́ченических крове́й пото́ки ре́чно Бо́гу прино́сиши, те́мже тя́ вси́ блажи́м, Ипполи́те.

Научи́л еси́ Еди́ному, богоглаго́ливе, Бо́гу покланя́тися в Тро́ице, Зижди́телю все́х ви́димых же тва́рей и неви́димых, му́ченическим же украси́лся еси́ венце́м.

Богоро́дичен: Блиста́яй Тебе́ а́нгел предста́ и луча́ми де́вства Твоего́ вельми́ просвети́ся, себе́ сама́го я́ко сво́йственныя забы́ сла́вы, е́же — ра́дуйся, — со стра́хом Тебе́ веща́ше.