Канон святому священномученику Петру I Александрийскому

Припев: Священному́чениче Пéтре, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 08 декабря (25 ноября ст. ст.)

Глас 4.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Во светле́йших селе́ниих житие́ име́я, просвеще́ние ми́ пода́ждь моли́твами твои́ми, Пе́тре всеблаже́нне.

Зна́нию науче́н и свяще́нством украша́емь, всеблаже́нне Пе́тре, Христу́ прине́слся еси́ кро́вию.

У́тварь упещре́нная, я́коже многоце́нное возложе́ние, Христо́ве Це́ркви от Бо́га дарова́лся еси́, блаже́нне.

Богоро́дичен: Пречи́стая Богоро́дице, воплоще́нное, Присносу́щное и Пребоже́ственное Сло́во па́че естества́ ро́ждшую, пое́м Тя́.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.

Возше́л еси́, е́здя, я́ко на колесни́це, твое́ю кро́вию, прему́дре, к небе́сным, иде́же Предте́ча на́ш Христо́с вни́де, еди́н безгре́шный.

Жи́знь тле́нную оста́вил еси́ и жи́знь безсме́ртную обре́л еси́, блаже́нне, иде́же венцено́сец лику́еши, моля́ спасти́ся душа́м на́шим.

Я́коже фи́никс процве́л еси́ благопло́днейший, я́ко ма́слина плодоро́дна яви́лся еси́, богодохнове́нне, во дво́рех Госпо́дних, я́ко сми́рна и лива́н и я́ко ми́ро благово́ннейшее.

Богоро́дичен: Я́ко две́ри спаси́тельныя и ра́й кра́сный, Све́та присносу́щнаго о́блак, су́щу Святу́ю Де́ву воспое́м вси́, глаго́люще Ей: ра́дуйся.

Конда́к, гла́с 4.

Це́ркве недви́жимии и боже́ственнии пи́ргове, благоче́стия боже́ственнии столпи́ вои́стинну кре́пцыи, Кли́менте с Петро́м всехва́льнии, ва́шими моли́твами соблюди́те вся́.

Седа́лен, гла́с 8.

От вы́шняго суда́ Христо́ва предста́тельствова ста́ду, на па́житех благожи́зненных упа́сл еси́ всему́дрыми твои́ми догма́ты, отгна́в А́рия, я́ко во́лка некро́ткаго, вше́дшаго в ни́х безбо́жными уче́нии. Те́мже и ду́шу твою́ положи́л еси́ за ни́х, па́стырь наре́клся еси́, я́ко рече́ Госпо́дь, иера́рше Пе́тре блаже́нне, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не: Непоро́чная А́гница и нескве́рный черто́г, в дом Бо́жий Богоро́дица Мариа́м с весе́лием вво́дится пресла́вно, Ю́же а́нгели Бо́жии дорино́сят ве́рно, и вси́ ве́рнии блажа́т при́сно и благода́рственно пою́т Ей непреста́нно ве́лиим гла́сом: на́ша сла́ва и спасе́ние Ты́ еси́, Всенепоро́чная.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Доброде́телей ше́ствовав стезе́ю, о́тче, пости́гл еси́ оби́тели вы́шния, богоно́сне, свяще́нства пома́занием укра́шен и муче́ния сия́я кро́вию.

Ту́чами пото́ков твои́х крове́й, блаже́нне, угаси́л еси́ пе́щь пре́лести и гоня́щих погуби́л еси́ мра́к, священному́чениче достосла́вне.

Но́вый Пе́тр не́кий на́м яви́лся еси́, и́стинно апо́стольскими сия́я дарова́нии, священноде́тель же и свиде́тель страсте́й Влады́ки твоего́, всебога́те.

Богоро́дичен: Все́х до́брых исполне́ние ро́ждши, испо́лни на́ша, Де́во, моле́ния, грехо́в на́м избавле́ния прося́щи, и просвеще́ния, и ве́лия ми́лости.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

На ка́мень возше́д ве́ры, страстоте́рпче, неукло́нен пребы́л еси́ во искуше́нии сопроти́вных.

Ору́жием пла́менным Ду́ха Свята́го, иера́рше, Ария вредосло́вца Боже́ственным судо́м закла́л еси́.

Кре́постию укрепля́емь, сла́вне, Спа́совою, вра́жию си́лу и кре́пость попра́л еси́.

Богоро́дичен: Де́ву по рождестве́, пое́м Тя, Богоро́дице, Ты бо Бо́га Сло́ва пло́тию ми́ру родила́ еси́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Целому́дренно и пра́ведно Бо́гу ты́ жи́тельствовав, коне́ц блаже́нный от Него́ прия́л еси́, всеблаже́нне Пе́тре.

Всесоверше́нную же́ртву и прия́тну, тебе́ сама́го прине́сл еси́, Пе́тре ди́вный, же́ртва тебе́ ра́ди бы́вшему Бо́гу.

Слове́с духо́вных испо́лнився, Ду́хом дви́жимь орга́н бы́л еси́, песнопоя́, богоглаго́ливе, неизрече́нная.

Богоро́дичен: Еди́на сло́вом пло́тию Сло́во ро́ждшая, изба́ви, мо́лимся, сете́й вра́жиих ду́ши на́ша.

Конда́к, гла́с 3.

Правосла́вными повеле́нии Це́рковь просвети́л еси́, за ню́же и пострада́в, Богоблаже́нне о́тче, А́рия отсту́пника отгна́в, те́мже твою́ пречестну́ю па́мять соверша́юще, правосла́вно вопие́м: ра́дуйся, Пе́тре, ка́меню ве́ре.

И́кос:

В ди́вней Александри́и потщи́мся ше́ствовати умо́м и у́зрим вели́кая стра́нная, та́мо соверша́ема, ка́ко на же́ртву себе́ предлага́ет, я́ко овча́ незло́бивое, первосвяще́нник и вели́кий побо́рник Пе́тр и ны́не созыва́ет на́с зде́, и святу́ю свою́ главу́ предложи́в, я́коже сне́дь честну́ю, ея́же наслади́вшеся вся́, правосла́вно возопие́м: ра́дуйся, Пе́тре, ка́меню ве́ре.

Пе́снь 7.

Ирмо́с: О́троцы благочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Житие́м боголе́пным укра́шен и боже́ственным све́том просвеща́емь, небе́сных в нехо́дная вше́л еси́, веселя́ся и вопия́, му́дре, Сотво́ршему: благослове́н Бо́г оте́ц на́ших.

Я́ко да пресве́тло благоугоди́ши Христу́ Бо́гу, богоблаже́нне, в ру́ки беззако́нных тя́ сама́го пре́дал еси́ во́лею, поя́, пребога́те: благослове́н Бо́г оте́ц на́ших.

Ве́сь просвеще́н, сподо́бился еси́ ви́дети Христа́, тебе́ показу́юща свою́ ри́зу, лю́те расте́рзану, истка́нную свы́ше, преподо́бне, — благослове́н еси́, — вопия́, — Бо́же оте́ц на́ших.

Богоро́дичен: Вся́, я́ко чиста́, прия́ла еси́ во утро́бе Твое́й Сло́во воплоща́емо, но Того́ моли́ очи́стити ми́ прегреше́ний ду́шу и те́ло, Пречи́стая, к Тебе́ чи́стою ве́рою прири́щущаго.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Жиру́ющую соску́тал еси́ па́губу А́риева зле́йшаго хуле́ния, от ве́рных собо́рища отсе́к и отгна́в церко́вных, богому́дре, огра́д.

Первостоя́тель ли́ка а́нгельскаго Пе́тр яви́ся, боже́ственный верхо́вник, сто́лп же му́чеников бы́л еси́, всему́дре Пе́тре богоно́се, и священноде́йствитель Боже́ственных та́инств.

Научи́вся от Боже́ственнаго вдохнове́ния бу́дущих ра́зуму, богоглаго́ливе, и е́же от земли́ проуве́дев твое́ преставле́ние муче́нием, к вы́шних Го́споду сла́вы Христу́ во ве́ки вся́.

Богоро́дичен: Во утро́бу Де́вы все́льшагося и от Нея́ стра́шно и па́че сло́ва дре́вняго Ада́ма обно́вльшаго, Го́спода по́йте и превозноси́те во вся́ ве́ки.

Пе́снь 9.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Предопределе́ннаго свяще́нно иера́ршествовати, и свяще́нства коне́ц благосла́вно прии́мша, и Христо́ву подража́вша стра́сть, Петра́ чу́днаго воспои́м.

Жезло́м укре́пльшася си́лы Госпо́дни, и свяще́нствовавша, и свяще́нствованна, и Христу́ прине́сшагося же́ртва, Петра́ богоно́снаго воспои́м.

Всесмеше́ннаго заре́ю Тро́ичною, и светле́йшаго ея́ насла́ждшася сия́ния, и на́м спасе́ния прося́ща, Петра́ богоприя́тнаго воспои́м.

Дае́ши оби́льно души́ мое́й спасе́ние, я́ко первосвяще́нник бо и́маши вла́сть вяза́ти и реши́ти прегреше́ний вины́, твои́ми моле́нии, свяще́ннейший.

Богоро́дичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющих, Тебе́ и ны́не на моли́тву подвиза́ем, да изба́вимся от вра́г на́ших.

Свети́лен.

Ны́не благонаро́чит яви́ся на́м де́нь, иму́щи свяще́нных прее́мник, свяще́нных апо́стол, Петра́ ку́пно и Кли́мента, пропове́дники ве́ры и непобеди́мыя му́ченики, и́хже ле́тнюю па́мять ве́рно соверша́ем вси́.

Сла́ва, и ны́не: Ю́же дре́вле предвозвести́ проро́ческое сосло́вие, ста́мну, и же́зл, и скрижа́ль, и несеко́мую го́ру, Мари́ю Богоотрокови́цу ве́рно да восхва́лим: дне́сь бо вво́дится во свята́я святы́х воспита́тися Го́сподеви.

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Во свѣтлѣ́йшихъ селе́нїихъ житїѐ и҆мѣ́ѧ, просвѣще́нїе мѝ пода́ждь, моли́твами твои́ми, пе́тре всеблаже́нне.

Зна́нїю наꙋче́нъ, и҆ свѧще́нствомъ ᲂу҆краша́емь, всеблаже́нне пе́тре, хрⷭ҇тꙋ̀ прине́слсѧ є҆сѝ кро́вїю.

Оу҆́тварь ᲂу҆пещре́ннаѧ, ꙗ҆́коже многоцѣ́нное возложе́нїе хрⷭ҇то́вѣ цр҃кви ѿ бг҃а дарова́лсѧ є҆сѝ, блаже́нне:

Бг҃оро́диченъ: Пречⷭ҇таѧ бцⷣе, воплоще́нное, присносꙋ́щное и҆ пребжⷭ҇твенное сло́во па́че є҆стества̀ ро́ждшꙋю пое́мъ тѧ̀.

Пѣ́снь г҃.

І҆рмо́съ: Нѣ́сть ст҃ъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Возше́лъ є҆сѝ ѣ҆́здѧ ꙗ҆́кѡ на колесни́цѣ, твое́ю кро́вїю, премꙋ́дре, къ нбⷭ҇нымъ, и҆дѣ́же предте́ча на́шъ хрⷭ҇то́съ вни́де, є҆ди́нъ безгрѣ́шный.

Жи́знь тлѣ́ннꙋю ѡ҆ста́вилъ є҆сѝ, и҆ жи́знь безсме́ртнꙋю ѡ҆брѣ́лъ є҆сѝ, блаже́нне, и҆дѣ́же вѣнцено́сецъ ликꙋ́еши, молѧ̀ спасти́сѧ дꙋша́мъ на́шымъ.

Ꙗ҆́коже фі́нїѯъ процвѣ́лъ є҆сѝ благопло́днѣйшїй: ꙗ҆́кѡ ма́слина плодоро́дна ꙗ҆ви́лсѧ є҆сѝ, бг҃одохнове́нне, во дво́рѣхъ гдⷭ҇нихъ, ꙗ҆́кѡ смѵ́рна и҆ лїва́нъ, и҆ ꙗ҆́кѡ мѵ́ро бл҃гово́ннѣйшее.

Бг҃оро́диченъ: Ꙗ҆́кѡ двє́ри спаси́тєльныѧ, и҆ ра́й кра́сный, свѣ́та присносꙋ́щнагѡ ѻ҆́блакъ, сꙋ́щꙋ ст҃ꙋ́ю дв҃ꙋ воспое́мъ всѝ, глаго́люще є҆́й: ра́дꙋйсѧ.

Конда́къ гла́съ д҃.

Цр҃кве недви́жимїи и҆ бжⷭ҇твеннїи пѵ́ргове, благоче́стїѧ бжⷭ҇твеннїи столпѝ, вои́стиннꙋ крѣ́пцыи, кли́менте съ петро́мъ всехва́льнїи, ва́шими моли́твами соблюди́те всѧ̑.

Сѣда́ленъ гла́съ и҃.

Ѿ вы́шнѧгѡ сꙋда̀ хрⷭ҇то́ва предста́тельствова ста́дꙋ, на па́житехъ благожи́зненныхъ ᲂу҆па́слъ є҆сѝ, всемꙋ́дрыми твои́ми догма̑ты, ѿгна́въ а҆́рїа ꙗ҆́кѡ во́лка некро́ткаго, вше́дшаго въ ни́хъ безбо́жными ᲂу҆чє́нїи. тѣ́мже и҆ дꙋ́шꙋ твою̀ положи́лъ є҆сѝ за ни́хъ, па́стырь наре́клсѧ є҆сѝ, ꙗ҆́кѡ речѐ гдⷭ҇ь: і҆ера́рше пе́тре блаже́нне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ: Непоро́чнаѧ а҆́гница, и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Добродѣ́телей ше́ствовавъ стезе́ю, ѻ҆́ч҃е, пости́глъ є҆сѝ ѻ҆би́тєли вы̑шнїѧ, бг҃оно́сне, свѧще́нства пома́занїемъ ᲂу҆кра́шенъ, и҆ мꙋче́нїѧ сїѧ́ѧ кро́вїю.

Тꙋ́чами пото́кѡвъ твои́хъ крове́й, бл҃же́нне, ᲂу҆гаси́лъ є҆сѝ пе́щь пре́лести, и҆ гонѧ́щихъ погꙋби́лъ є҆сѝ мра́къ, свѧщенномꙋ́чениче достосла́вне.

Но́вый пе́тръ нѣ́кїй на́мъ ꙗ҆ви́лсѧ є҆сѝ, и҆́стиннѡ а҆пⷭ҇льскими сїѧ́ѧ дарова̑нїи, свѧщеннодѣ́тель же и҆ свидѣ́тель стрⷭ҇те́й влⷣки твоегѡ̀, всебога́те.

Бг҃оро́диченъ: Всѣ́хъ до́брыхъ и҆сполне́нїе ро́ждши, и҆спо́лни на̑ша, дв҃о, молє́нїѧ, грѣхѡ́въ на́мъ и҆збавле́нїѧ просѧ́щи, и҆ просвѣще́нїѧ, и҆ ве́лїѧ ми́лости.

Пѣ́снь є҃.

І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

На ка́мень возше́дъ вѣ́ры, страстоте́рпче, неꙋкло́ненъ пребы́лъ є҆сѝ во и҆скꙋше́нїи сопроти́вныхъ.

Ѻ҆рꙋ́жїемъ пла́меннымъ дх҃а ст҃а́гѡ, і҆ера́рше, а҆́рїа вредосло́вца бжⷭ҇твеннымъ сꙋдо́мъ закла́лъ є҆сѝ.

Крѣ́постїю ᲂу҆крѣплѧ́емь, сла́вне, сп҃совою, вра́жїю си́лꙋ и҆ крѣ́пость попра́лъ є҆сѝ.

Бг҃оро́диченъ: Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а сло́ва пло́тїю мі́рꙋ родила̀ є҆сѝ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Цѣломꙋ́дреннѡ и҆ пра́веднѡ бг҃ꙋ ты̀ жи́тельствовавъ, коне́цъ блаже́нный ѿ негѡ̀ прїѧ́лъ є҆сѝ, всеблаже́нне пе́тре.

Всесоверше́ннꙋю же́ртвꙋ и҆ прїѧ́тнꙋ, тебѐ сама́го прине́слъ є҆сѝ, пе́тре ди́вный, же́ртва тебє̀ ра́ди бы́вшемꙋ бг҃ꙋ.

Слове́съ дх҃о́вныхъ и҆спо́лнивсѧ, дх҃омъ дви́жимь ѻ҆рга́нъ бы́лъ є҆сѝ пѣснопоѧ̀, бг҃оглаго́ливе, неизречє́ннаѧ.

Бг҃оро́диченъ: Є҆ди́на сло́вомъ пло́тїю сло́во ро́ждшаѧ, и҆зба́ви, мо́лимсѧ, сѣте́й вра́жїихъ дꙋ́шы на́шѧ.

Конда́къ, гла́съ г҃.

Правосла́вными повелє́нїи цр҃ковь просвѣти́лъ є҆сѝ, за ню́же и҆ пострада́въ, бг҃обл҃же́нне ѻ҆́тче, а҆́рїа ѿстꙋ́пника ѿгна́въ, тѣ́мже твою̀ пречестнꙋ́ю па́мѧть соверша́юще, правосла́вно вопїе́мъ: ра́дꙋйсѧ, пе́тре, ка́меню вѣ́рѣ.

І҆́косъ:

Въ ди́внѣй а҆леѯандрі́и потщи́мсѧ ше́ствовати ᲂу҆мо́мъ и҆ ᲂу҆́зримъ вели́каѧ стра́ннаѧ, та́мо соверша́ема, ка́кѡ на же́ртвꙋ себѐ предлага́етъ, ꙗ҆́кѡ ѻ҆вча̀ неѕло́бивое, первосвѧще́нникъ и҆ вели́кїй побо́рникъ пе́тръ и҆ ны́нѣ созыва́етъ на́съ здѣ̀, и҆ ст҃ꙋ́ю свою̀ главꙋ̀ предложи́въ, ꙗ҆́кѡже снѣ́дь честнꙋ́ю, є҆ѧ́же наслади́вшесѧ всѧ̑, правосла́вно возопїе́мъ: ра́дꙋйсѧ, пе́тре, ка́меню вѣ́рѣ.

Пѣ́снь з҃.

І҆рмо́съ: Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.

Житїе́мъ бг҃олѣ́пнымъ ᲂу҆кра́шенъ, и҆ бжⷭ҇твеннымъ свѣ́томъ просвѣща́емь нбⷭ҇ныхъ въ нехѡ́днаѧ вше́лъ є҆сѝ веселѧ́сѧ, и҆ вопїѧ̀, мꙋ́дре, сотво́ршемꙋ: бл҃гослове́нъ бг҃ъ ѻ҆тє́цъ на́шихъ.

Ꙗ҆́кѡ да пресвѣ́тлѡ благоꙋгоди́ши хрⷭ҇тꙋ̀ бг҃ꙋ, бг҃облаже́нне, въ рꙋ́ки беззако́нныхъ тѧ̀ сама́го пре́далъ є҆сѝ во́лею, поѧ̀, пребога́те: бл҃гослове́нъ бг҃ъ ѻ҆тє́цъ на́шихъ.

Ве́сь просвѣще́нъ, сподо́билсѧ є҆сѝ ви́дѣти хрⷭ҇та̀, тебѣ̀ показꙋ́юща свою̀ ри́зꙋ, лю́тѣ расте́рзанꙋ, и҆стка́ннꙋю свы́ше, прпⷣбне, бл҃гослове́нъ є҆сѝ, вопїѧ̀, бж҃е ѻ҆тє́цъ на́шихъ.

Бг҃оро́диченъ: Всѧ̀ ꙗ҆́кѡ чиста̀ прїѧ́ла є҆сѝ во ᲂу҆тро́бѣ твое́й сло́во воплоща́емо: но того̀ молѝ ѡ҆чи́стити мѝ прегрѣше́нїй дꙋ́шꙋ и҆ тѣ́ло, пречⷭ҇таѧ, къ тебѣ̀ чи́стою вѣ́рою прири́щꙋщагѡ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

Жирꙋ́ющꙋю соскꙋ́талъ є҆сѝ па́гꙋбꙋ, а҆́рїева ѕлѣ́йшагѡ хꙋле́нїѧ, ѿ вѣ́рныхъ собо́рища ѿсѣ́къ, и҆ ѿгна́въ церко́вныхъ, бг҃омꙋ́дре, ѡ҆гра́дъ.

Первостоѧ́тель ли́ка а҆́гг҃льскагѡ пе́тръ ꙗ҆ви́сѧ, бжⷭ҇твенный верхо́вникъ, сто́лпъ же мꙋ́ченикѡвъ бы́лъ є҆сѝ, всемꙋ́дре пе́тре бг҃оно́се, и҆ свѧщеннодѣ́йствитель бжⷭ҇твенныхъ та́инствъ.

Наꙋчи́всѧ ѿ бжⷭ҇твеннагѡ вдохнове́нїѧ бꙋ́дꙋщихъ ра́зꙋмꙋ, бг҃оглаго́ливе, и҆ є҆́же ѿ землѝ проꙋвѣ́дѣвъ твоѐ преставле́нїе мꙋче́нїемъ, къ вы́шнихъ гдⷭ҇ꙋ сла́вы хрⷭ҇тꙋ̀ во вѣ́ки всѧ̑.

Бг҃оро́диченъ: Во ᲂу҆тро́бꙋ дв҃ы все́льшагосѧ, и҆ ѿ неѧ̀ стра́шнѡ и҆ па́че сло́ва дре́внѧго а҆да́ма ѡ҆бно́вльшаго гдⷭ҇а, по́йте и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, рождество̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

Пред̾ѡпредѣле́ннаго свѧще́ннѡ і҆ера́ршествовати, и҆ свѧще́нства коне́цъ благосла́внѡ прїи́мша, и҆ хрⷭ҇то́вꙋ подража́вша стрⷭ҇ть, петра̀ чꙋ́днаго воспои́мъ.

Жезло́мъ ᲂу҆крѣ́пльшасѧ си́лы гдⷭ҇ни, и҆ свѧще́нствовавша, и҆ свѧще́нствованна, и҆ хрⷭ҇тꙋ̀ прине́сшагосѧ же́ртва, петра̀ бг҃оно́снаго воспои́мъ.

Всесмѣше́ннаго заре́ю трⷪ҇чною, и҆ свѣтлѣ́йшагѡ є҆ѧ̀ насла́ждшасѧ сїѧ́нїѧ, и҆ на́мъ спасе́нїѧ просѧ́ща, петра̀ бг҃опрїѧ́тнаго воспои́мъ.

Дае́ши ѻ҆би́льнѡ дꙋшѝ мое́й спасе́нїе, ꙗ҆́кѡ первосвѧще́нникъ бо и҆́маши вла́сть вѧза́ти и҆ рѣши́ти прегрѣше́нїй вины̑, твои́ми молє́нїи, свѧще́ннѣйшїй.

Бг҃оро́диченъ: Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋпле́нїе къ тебѣ̀ прибѣга́ющихъ, тебѐ и҆ ны́нѣ на моли́твꙋ подвиза́емъ, да и҆зба́вимсѧ ѿ вра̑гъ на́шихъ.

Свѣти́ленъ.

Ны́нѣ благонаро́читъ ꙗ҆ви́сѧ на́мъ де́нь, и҆мꙋ́щи свѧще́нныхъ преє́мникъ, свѧще́нныхъ а҆пⷭ҇лъ, петра̀ кꙋ́пнѡ и҆ кли́мента, проповѣ́дники вѣ́ры, и҆ непобѣди̑мыѧ мꙋ́ченики: и҆́хже лѣ́тнюю па́мѧть вѣ́рнѡ соверша́емъ всѝ.

Сла́ва, и҆ ны́нѣ: Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇еви.

Труды священномученика Петра I Александрийского

• Правила (из слова о покаянии)

Смотреть все труды в библиотеке →

Свя­той свя­щен­но­му­че­ник Петр, ар­хи­епи­скоп Алек­сан­дрий­ский, ро­дил­ся и вы­рос в Алек­сан­дрии. Был вы­со­ко­об­ра­зо­ван, за­ни­мал долж­ность на­чаль­ни­ка Алек­сан­дрий­ской шко­лы. В 300 го­ду он всту­пил в управ­ле­ние Алек­сан­дрий­ской Цер­ко­вью, став пре­ем­ни­ком сво­е­го учи­те­ля и ду­хов­но­го на­став­ни­ка, бла­жен­но­го епи­ско­па Фе­о­ны.

Из­гнан­ный из го­ро­да во вре­мя пре­сле­до­ва­ния хри­сти­ан при им­пе­ра­то­рах Дио­кли­ти­ане и Мак­си­ми­ане, свя­той Петр, по­бы­вав во мно­гих об­ла­стях им­пе­рии, вновь вер­нул­ся в свой род­ной го­род, чтобы в это опас­ное вре­мя сно­ва лич­но воз­гла­вить Алек­сан­дрий­скую Цер­ковь. Свя­ти­тель тай­но по­се­щал за­клю­чен­ных в тем­ни­це хри­сти­ан, под­дер­жи­вая в них твер­дость в ве­ре, по­мо­гал вдо­вам и си­ро­там, про­по­ве­до­вал Сло­во Бо­жие, непре­стан­но мо­лил­ся и со­вер­шал Бо­го­слу­же­ния. И Гос­подь хра­нил его от рук го­ни­те­лей.

В это смут­ное вре­мя на Цер­ковь Хри­сто­ву вос­стал учи­тель зло­че­стия Арий, от­ри­цав­ший Бо­же­ство Иису­са Хри­ста. Свя­той Петр вы­сту­пил про­тив него, про­клял ере­ти­ка и от­лу­чил его от Церк­ви. И да­же то­гда, ко­гда Арий через уче­ни­ков свя­ти­те­ля упра­ши­вал вла­ды­ку Пет­ра снять с него от­лу­че­ние, утвер­ждая, что он рас­ка­и­ва­ет­ся и от­ка­зы­ва­ет­ся от сво­е­го лже­уче­ния, свя­ти­тель, ру­ко­во­ди­мый Ду­хом Свя­тым, про­ви­дел лжи­вость и ко­вар­ство ари­е­ва от­ре­че­ния и за­ве­щал сво­ей пастве не ве­рить Арию и не при­ни­мать его в цер­ков­ное об­ще­ние.

Под муд­рым окорм­ле­ни­ем свя­то­го Пет­ра Алек­сан­дрий­ская Цер­ковь, несмот­ря на го­не­ния, креп­ла и умно­жа­лась. Но вот по при­ка­зу им­пе­ра­то­ра Мак­си­ми­а­на (305–311) свя­ти­тель был схва­чен и осуж­ден на смерт­ную казнь. Мно­же­ство лю­дей со­бра­лось у вхо­да в тем­ни­цу, вы­ра­жая свое него­до­ва­ние. Же­лая из­бе­жать на­род­но­го мя­те­жа и кро­во­про­ли­тия, свя­ти­тель на­пра­вил вла­стям пись­мо, в ко­то­ром пред­ла­гал разо­брать зад­нюю сте­ну тем­ни­цы с тем, чтобы его смог­ли тай­но от на­ро­да вы­ве­сти на казнь. Тем­ной но­чью свя­той Петр cам вы­шел на­встре­чу па­ла­чам, ко­то­рые вы­ве­ли его за го­род­ские сте­ны и обез­гла­ви­ли на том же са­мом ме­сте, где неко­гда был каз­нен свя­той апо­стол Марк, а го­лос с неба, ко­то­рый слы­ша­ла од­на свя­тая де­ва в эту ночь, воз­ве­стил: "Петр – на­ча­ло апо­сто­лов, Петр – ко­нец алек­сан­дрий­ских му­че­ни­ков". Это про­изо­шло в 311 го­ду.

Утром, узнав о кон­чине сво­е­го епи­ско­па, тол­пы лю­дей на­пра­ви­лись к ме­сту каз­ни, взя­ли те­ло и го­ло­ву му­че­ни­ка, при­нес­ли в цер­ковь и, об­ла­чив в епи­скоп­ские одеж­ды, по­са­ди­ли на вре­мя от­пе­ва­ния на гор­нем ме­сте. При жиз­ни свя­той Петр са­дил­ся лишь на под­но­жие его, по­то­му что, по сло­вам свя­ти­те­ля, ви­дел Бо­же­ствен­ный свет, окру­жа­ю­щий гор­нее ме­сто, и не дер­зал по сми­ре­нию всхо­дить на него. Свя­той Петр, ве­ли­кий рев­ни­тель пра­во­сла­вия, из­ве­стен и как глу­бо­кий бо­го­слов. Вы­держ­ки из его кни­ги "О Бо­же­стве" за­чи­ты­ва­лись на Ефес­ском и Хал­ки­дон­ском Со­бо­рах. Из его со­чи­не­ний наи­бо­лее из­вест­ны и вы­со­ко це­ни­мы Цер­ко­вью "Пра­ви­ла".


См. так­же: "Жи­тие и стра­да­ние свя­то­го свя­щен­но­му­че­ни­ка Пет­ра, ар­хи­епи­ско­па Алек­сан­дрий­ско­го" в из­ло­же­нии свт. Ди­мит­рия Ро­стов­ско­го.