Канон святому великомученику Феодору Тирону

Припев: Святы́й великому́чениче Фео́доре, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 02 марта (17 февраля ст. ст.); 04 марта (19 февраля ст. ст.)

Глас 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Боже́ственным по́двигом, му́чениче Христо́в, подви́гся и тече́ние сконча́в, ве́ру соблю́л еси́ Боже́ственную, пра́вды обре́л еси́ вене́ц.

Преесте́ственну сла́ву от Христа́ прии́м, страстоте́рпче, зе́млю всю́ обхо́диши, избавля́я вся́, ве́рою с благогове́нием к тебе́ притека́ющия.

Небе́сный, сла́вне, лико́вник, со безпло́тными сы́й, на земли́ призыва́ющия тя́ от бе́д и напа́стей избавля́й.

Богоро́дичен: Прему́дрость и Сло́во О́тчее несказа́нно ро́ждшая, души́ моея́ лю́тую исцели́ я́зву и се́рдца боле́знь укроти́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

О́гнь муче́ний тя́ не устраши́, те́мже о́гнь напа́стей к тебе́ прибега́ющим утиша́еши, Фео́доре.

Изба́ви моли́твами твои́ми одержа́щия мя́ печа́ли, му́чениче Христо́в, все́ углажда́я жите́йское стропо́тство.

Все́ се́рдце мое́ и помышле́ние простира́ю к тебе́ и ду́шу, твоея́, страстоте́рпче, по́мощи тре́буя.

Богоро́дичен: Уста́ви непостоя́нное помышле́ний мои́х смуще́ние, Ма́ти Бо́жия, е́же к Сы́ну Твоему́ направля́ющи движе́ние.

Седа́лен, гла́с 4.

Му́ченическими добро́тами укра́шен, Царю́ Небе́сному, му́чениче, ра́дуяся, венцено́сец предстои́ши, Фео́доре: на кре́ст бо воздви́жен бы́л еси́ Его́ ра́ди и гвозде́й пригвожде́ние, и воло́вых жи́л, и ногте́й, и очны́х зе́ниц изверте́ние претерпе́л еси́ тве́рдо. Те́мже тя́ ве́рою почита́ем, превели́кий.

Сла́ва, и ны́не, богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Прави́теля тя́ предлага́ю, Бо́жий уго́дниче, ты́ мя́ упра́ви ве́трилом Ду́ха и Боже́ственными ве́тры, пресла́вне.

От вся́каго, мо́лимся, изба́ви преще́ния, всеблаже́нне Фео́доре, тя́ ве́рою блажа́щия и Боже́ственную па́мять твою́ почита́ющия.

Ни живо́т, ни сме́рть, ни настоя́щая, ни гряду́щая, ни о́гнь, ни ра́ны, от Христа́, богому́дре, отлучи́ша тебе́.

Богоро́дичен: Под ле́том бы́вша, от Отца́ безле́тно возсия́вшаго, Богома́ти на́м родила́ еси́, Его́же моли́ спасти́ пою́щия Тя́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Му́чеников бы́в удобре́ние, му́чениче Христо́в, ве́рных по́мощь бу́ди и стена́ неруши́ма.

Едине́ния насла́ждься лу́чшаго, я́же па́че ума́ благи́х, Фео́доре, тя́ чту́щия спаси́.

Побежда́емь любо́вию Зижди́теля, жите́йская оттря́сл еси́ пристра́стия и Бо́гу благоугоди́л еси́.

Богоро́дичен: Его́же родила́ еси́, Де́во Всенепоро́чная, Бо́га Сло́ва, приле́жно моли́ о на́с, пою́щих Тя́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Побо́рник сы́й благоче́стия тепле́йший и пре́лести обличи́тель и́дольския бы́в, де́монов мечта́ния и страсте́й о́бразы души́ моея́ потреби́.

Утвержде́ние ми́ бу́ди и стена́, му́чениче, непобеди́ма, не́мощь и гни́лость ума́ моего́ утвержда́я, Фео́доре, твои́ми предста́тельствы и сохраня́я невре́дно.

Во́инства тлетво́рнаго и тле́ннаго отре́клся еси́, во́инство же жи́зни, всеблаже́нне Фео́доре, до конца́ возлюби́л еси́, в не́мже победоно́сец показа́лся еси́, досточу́дне.

Богоро́дичен: Возсия́ от Сио́на Вы́шняго благоле́пие прия́тием пло́ти по соедине́нию неизглаго́ланному, из Тебе́, Неискусобра́чная, оде́явся, и ми́р просвети́.

Конда́к, гла́с 8:

Ве́ру Христо́ву, я́ко щи́т, вну́трь прии́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.

И́кос:

На престо́ле све́та Носи́маго, благода́рственно ве́рою воспева́ем Тя́, я́ко дарова́ние боже́ственное дарова́л еси́ — до́бляго во страда́нии Фео́дора, в житии́ треблаже́ннаго, я́ко побо́рника су́щаго и́стины, благочести́вым по́мыслом Тя́ жела́юща, Христе́, кре́пка победи́теля на льсти́ваго, я́ко непобеди́мый.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тя́, живота́ моего́ предста́теля, и засту́пника и́мам спасе́ния моего́, и храни́теля, богому́дре, утвержде́ние даю́ща ве́рою зову́щим: оте́ц на́ших Бо́же, благослове́н еси́.

Я́ко красно́ заколе́ние са́м себе́ Го́сподеви и свяще́ннейшее приве́л еси́, всеблаже́нне, и огне́м муче́ний всесоже́глся еси́, сла́вне, вопия́: оте́ц на́ших Бо́же, благослове́н еси́.

Живо́тнаго вдохнове́ния насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцеля́еши и зове́ши, ра́дуяся: оте́ц на́ших Бо́же, благослове́н еси́.

Богоро́дичен: Из утро́бы Твоея́ про́йде, вопло́щься, вся́ческих, Де́во, Госпо́дь. Те́м Тя́, Богоро́дицу, му́дрствующе правосла́вно, Сы́ну Твоему́ взыва́ем: оте́ц на́ших Бо́же, благослове́н еси́.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Вся́ческими, прехва́льне, треволне́нии окружа́еми и напа́стьми жите́йскими содержи́ми, предста́теля скоре́йша, и помо́щника, и спобо́рника, вси́ ве́рнии, тя́ моли́твенника Влады́це приво́дим, вопию́ще: не преста́й моли́ти о воспева́ющих всечестну́ю твою́ па́мять.

Грехо́вными вери́гами свя́зан, пребога́те, и прегреше́ний мои́х плени́цами око́ван, прибега́ю к покро́ву твоему́, венцено́сче, разреше́ния прося́, но я́ко чу́дно ко Влады́це все́х, богому́дре, дерзнове́ние име́я, моли́ спасти́ся Христа́ пою́щим во ве́ки вся́.

Му́ченическими светлостьми́ просвеще́н, всехва́льне, а́нгельским счи́слился еси́ чино́м, с ни́миже ра́дуяся и слику́я, му́чениче, при́сно, чудотво́рными исцеле́нии уясня́еши любо́вию тя́ чту́щия и ве́рно пою́щия: лю́дие, превозноси́те Христа́ во ве́ки вся́.

Богоро́дичен: Пло́тию приобщи́ся к челове́ком, я́ко Благоутро́бен, Соде́тель и Творе́ц тва́ри, из Тебе́, Неискусобра́чная Богороди́тельнице, сию́ прие́м: те́мже Богоро́дицу, ве́рнии, Тя́ и́стинно сла́вим, вопию́ще и ве́рно пою́ще: лю́дие, превозноси́те Христа́ во ве́ки вся́.

Пе́снь 9.

Ирмо́с: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Бо́дра тя́ храни́теля, великому́чениче, стяжа́вше, враго́в злоу́мие удо́бь отгоня́ща и Це́рквам подаю́ща ми́р, страстоте́рпче, непреста́нно ублажа́ем.

Кре́пость тебе́ на де́моны дарова́ Влады́ка, стра́сти же души́ и телесе́ исцеля́ти, блаже́нне, всеблагочести́вейшим дерзнове́нием, моля́ся Спа́су, те́мже тя́ вси́ ублажа́ем.

Зарю́ Трисо́лнечную и еди́нственную созерца́яй, Еди́но в Тре́х Божество́, и нача́ло пренача́льное, и исто́чник бла́гости, страстоте́рпче, тя́ пою́щия сохраня́й.

Богоро́дичен: Изми́ мя́, Всенепоро́чная, мы́сленнаго плене́ния, избавле́ние воздаю́щи, Влады́чице, Сы́на Твоего́ распя́тие, е́же за все́х бы́вшее, избавле́ние, и ми́р, и спасе́ние пою́щим Тя́.

Свети́лен.

Искуси́вся, я́коже зла́то, огне́м и му́ками, досто́ин яви́лся еси́ да́р Бо́га Вы́шняго, Фео́доре страстоте́рпче, о на́с ны́не моли́ся.

Сла́ва, и ны́не, богоро́дичен: Держа́вным Твои́м покро́вом от враго́в наве́та на́с, Чи́стая, Твоя́ рабы́, сохрани́ вся́ невреди́мы, Тя́ бо стяжа́хом, еди́ну прибе́жище в ну́ждах.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Бжⷭ҇твеннымъ по́двигомъ, мч҃ниче хрⷭ҇то́въ, подви́гсѧ, и҆ тече́нїе сконча́въ, вѣ́рꙋ соблю́лъ є҆сѝ бжⷭ҇твеннꙋю, пра́вды ѡ҆брѣ́лъ є҆сѝ вѣне́цъ.

Преесте́ственнꙋ сла́вꙋ ѿ хрⷭ҇та̀ прїи́мъ, страстоте́рпче, зе́млю всю̀ ѡ҆бхо́диши, и҆збавлѧ́ѧ всѧ̑, вѣ́рою съ благоговѣ́нїемъ къ тебѣ̀ притека́ющыѧ.

Нбⷭ҇ный сла́вне лико́вникъ, со безпло́тными сы́й, на землѝ призыва́ющыѧ тѧ̀ ѿ бѣ́дъ и҆ напа́стей и҆збавлѧ́й.

Бг҃оро́диченъ: Премꙋ́дрость и҆ сло́во ѻ҆́ч҃ее несказа́ннѡ ро́ждшаѧ, дꙋшѝ моеѧ̀ лю́тꙋю и҆сцѣлѝ ꙗ҆́звꙋ, и҆ се́рдца болѣ́знь ᲂу҆кротѝ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ѻ҆́гнь мꙋче́нїй тѧ̀ не ᲂу҆страшѝ, тѣ́мже ѻ҆́гнь напа́стей, къ тебѣ̀ прибѣга́ющымъ, ᲂу҆тиша́еши, ѳео́дѡре.

И҆зба́ви моли́твами твои́ми ѡ҆держа́щїѧ мѧ̀ печа́ли, мꙋ́чениче хрⷭ҇то́въ, всѐ ᲂу҆глажда́ѧ жите́йское стропо́тство.

Всѐ се́рдце моѐ и҆ помышле́нїе простира́ю къ тебѣ̀ и҆ дꙋ́шꙋ, твоеѧ̀, страстоте́рпче, по́мощи тре́бꙋѧ.

Бг҃оро́диченъ: Оу҆ста́ви непостоѧ́нное помышле́нїй мои́хъ смꙋще́нїе, мт҃и бж҃їѧ, є҆́же къ сн҃ꙋ твоемꙋ̀ направлѧ́ющи движе́нїе.

Сѣда́ленъ, гла́съ д҃.

Мꙋ́ченическими добро́тами ᲂу҆кра́шенъ, цр҃ю̀ нбⷭ҇номꙋ, мꙋ́чениче, ра́дꙋѧсѧ, вѣнцено́сецъ предстои́ши, ѳео́дѡре, на крⷭ҇тъ бо воздви́женъ бы́лъ є҆сѝ є҆гѡ̀ ра́ди, и҆ гвозде́й пригвожде́нїе, и҆ воло́выхъ жи́лъ, и҆ ногте́й, и҆ ѻ҆чны́хъ зѣ́ницъ и҆звертѣ́нїе претерпѣ́лъ є҆сѝ тве́рдѡ. тѣ́мже тѧ̀ вѣ́рою почита́емъ, превели́кїй.

Сла́ва, и҆ ны́нѣ, бг҃оро́диченъ: И҆́же на прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧсѧ, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ, вопло́щсѧ бо бг҃ъ вои́стиннꙋ, воцр҃и́сѧ надъ всѣ́ми ꙗ҆зы́ки, и҆ разꙋ́мнѡ ны́нѣ пои́мъ є҆мꙋ̀. є҆го́же ᲂу҆молѝ спасти́сѧ рабѡ́мъ твои̑мъ.

Крⷭ҇тобг҃оро́диченъ: И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Прави́телѧ тѧ̀ предлага́ю, бж҃їй ᲂу҆го́дниче, ты́ мѧ ᲂу҆пра́ви вѣ́триломъ дх҃а и҆ бжⷭ҇твенными вѣ́тры, пресла́вне.

Ѿ всѧ́кагѡ, мо́лимсѧ, и҆зба́ви преще́нїѧ, всеблаже́нне ѳео́дѡре, тѧ̀ вѣ́рою блажа́щыѧ, и҆ бжⷭ҇твеннꙋю па́мѧть твою̀ почита́ющыѧ.

Ни живо́тъ, ни сме́рть, ни настоѧ̑щаѧ, ни грѧдꙋ̑щаѧ, ни ѻ҆́гнь, ни ра̑ны, ѿ хрⷭ҇та̀, бг҃омꙋ́дре, ѿлꙋчи́ша тебѐ.

Бг҃оро́диченъ: Подъ лѣ́томъ бы́вша, ѿ ѻ҆ц҃а̀ безлѣ́тнѡ возсїѧ́вшаго, бг҃ома́ти, на́мъ родила̀ є҆сѝ: є҆го́же молѝ спастѝ пою́щыѧ тѧ̀.

Пѣ́снь є҃.

І҆рмо́съ: Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀, и҆но́гѡ не вѣ́мы.

Мч҃никѡвъ бы́въ ᲂу҆добре́нїе, мч҃ниче хрⷭ҇то́въ, вѣ́рныхъ по́мощь бꙋ́ди, и҆ стѣна̀ нерꙋши́ма.

Є҆дине́нїѧ насла́ждсѧ лꙋ́чшагѡ, ꙗ҆̀же па́че ᲂу҆ма̀ благи́хъ, ѳео́дѡре, тѧ̀ чтꙋ́щыѧ спасѝ.

Побѣжда́емь любо́вїю зижди́телѧ, житє́йскаѧ ѿтрѧ́слъ є҆сѝ пристра̑стїѧ, и҆ бг҃ꙋ благоꙋгоди́лъ є҆сѝ.

Бг҃оро́диченъ: Є҆го́же родила̀ є҆сѝ, дв҃о всенепоро́чнаѧ, бг҃а сло́ва, прилѣ́жнѡ молѝ ѡ҆ на́съ пою́щихъ тѧ̀.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Побо́рникъ сы́й благоче́стїѧ теплѣ́йшїй, и҆ пре́лести ѡ҆бличи́тель і҆́дѡльскїѧ бы́въ, де́мѡнѡвъ мечта̑нїѧ, и҆ страсте́й ѻ҆́бразы дꙋшѝ моеѧ̀ потребѝ.

Оу҆твержде́нїе мѝ бꙋ́ди и҆ стѣна̀, мч҃ниче, непобѣди́ма, не́мощь и҆ гни́лость ᲂу҆ма̀ моегѡ̀ ᲂу҆твержда́ѧ, ѳео́дѡре, твои́ми предста́тельствы, и҆ сохранѧ́ѧ невре́днѡ.

Во́инства тлетво́рнагѡ и҆ тлѣ́ннагѡ ѿре́клсѧ є҆сѝ, во́инство же жи́зни, всеблаже́нне ѳео́дѡре, до конца̀ возлюби́лъ є҆сѝ, въ не́мже побѣдоно́сецъ показа́лсѧ є҆сѝ, досточꙋ́дне.

Бг҃оро́диченъ: Возсїѧ̀ ѿ сїѡ́на вы́шнѧгѡ благолѣ́пїе, прїѧ́тїемъ пло́ти по соедине́нїю неизглаго́ланномꙋ, и҆зъ тебє̀, неискꙋсобра́чнаѧ, ѡ҆дѣ́ѧвсѧ, и҆ мі́ръ просвѣтѝ.

Конда́къ, гла́съ и҃:

Вѣ́рꙋ хрⷭ҇то́вꙋ, ꙗ҆́кѡ щи́тъ, внꙋ́трь прїи́мъ въ се́рдцѣ твое́мъ, проти̑вныѧ си̑лы попра́лъ є҆сѝ, многострада́льче: и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ, ѳео́дѡре, ꙗ҆́кѡ непобѣди́мый.

І҆́косъ:

На престо́лѣ свѣ́та носи́маго, благода́рственнѡ вѣ́рою воспѣва́емъ тѧ̀: ꙗ҆́кѡ дарова́нїе бжⷭ҇твенное дарова́лъ є҆сѝ, до́блѧго во страда́нїи ѳео́дѡра, въ житїѝ треблаже́ннаго, ꙗ҆́кѡ побо́рника сꙋ́щаго и҆́стины, благочести́вымъ по́мысломъ тѧ̀ жела́юща, хрⷭ҇тѐ, крѣ́пка побѣди́телѧ на льсти́ваго, ꙗ҆́кѡ непобѣди́мый.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.

Тѧ̀ живота̀ моегѡ̀ предста́телѧ, и҆ застꙋ́пника и҆́мамъ спасе́нїѧ моегѡ̀, и҆ храни́телѧ, бг҃омꙋ́дре, ᲂу҆твержде́нїе даю́ща вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

Ꙗ҆́кѡ красно̀ заколе́нїе, са́мъ себѐ гдⷭ҇еви, и҆ свѧще́ннѣйшее приве́лъ є҆сѝ, всеблаже́нне: и҆ ѻ҆гне́мъ мꙋче́нїй всесоже́глсѧ є҆сѝ, сла́вне, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Живо́тнагѡ вдохнове́нїѧ насыща́ѧсѧ, блаже́нне, бжⷭ҇твеннагѡ дх҃а, дꙋ́хи ѿгонѧ́еши, недꙋ́ги и҆сцѣлѧ́еши, и҆ зове́ши ра́дꙋѧсѧ: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: И҆зъ ᲂу҆тро́бы твоеѧ̀ про́йде, вопло́щсѧ всѧ́ческихъ, дв҃о, гдⷭ҇ь. тѣ́мъ тѧ̀ бцⷣꙋ мꙋ́дрствꙋюще правосла́внѡ, сн҃ꙋ твоемꙋ̀ взыва́емъ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Всѧ́ческими, прехва́льне, треволнє́нїи ѻ҆крꙋжа́еми, и҆ напа́стьми жите́йскими содержи́ми, предста́телѧ скорѣ́йша, и҆ помо́щника, и҆ спобо́рника, всѝ вѣ́рнїи тѧ̀ моли́твенника влⷣцѣ приво́димъ, вопїю́ще: не преста́й моли́ти ѡ҆ воспѣва́ющихъ всечестнꙋ́ю твою̀ па́мѧть.

Грѣхо́вными вери́гами свѧ́занъ, пребога́те, и҆ прегрѣше́нїй мои́хъ плени́цами ѡ҆ко́ванъ, прибѣга́ю къ покро́вꙋ твоемꙋ̀, вѣнцено́сче, разрѣше́нїѧ просѧ̀: но ꙗ҆́кѡ чꙋ́дно ко влⷣцѣ всѣ́хъ, бг҃омꙋ́дре, дерзнове́нїе и҆мѣ́ѧ, молѝ спасти́сѧ хрⷭ҇та̀ пою́щымъ во вѣ́ки всѧ̑.

Мꙋ́ченическими свѣтлостьмѝ просвѣще́нъ, всехва́льне, а҆́гг҃льскимъ счи́слилсѧ є҆сѝ чинѡ́мъ: съ ни́миже ра́дꙋѧсѧ, и҆ сликꙋ́ѧ, мч҃ниче, при́снѡ, чꙋдотво́рными и҆сцѣлє́нїи ᲂу҆ѧснѧ́еши, любо́вїю тѧ̀ чтꙋ́щыѧ, и҆ вѣ́рнѡ пою́щыѧ: лю́дїе, превозноси́те хрⷭ҇та̀ во вѣ́ки всѧ̑.

Бг҃оро́диченъ: Пло́тїю приѡбщи́сѧ къ человѣ́кѡмъ, ꙗ҆́кѡ бл҃гоꙋтро́бенъ, содѣ́тель и҆ творе́цъ тва́ри, и҆зъ тебє̀, неискꙋсобра́чнаѧ бг҃ороди́тельнице, сїю̀ прїе́мъ: тѣ́мже бцⷣꙋ вѣ́рнїи тѧ̀ и҆́стиннѡ сла́вимъ, вопїю́ще, и҆ вѣ́рнѡ пою́ще: лю́дїе, превозноси́те хрⷭ҇та̀ во вѣ́ки всѧ̑.

Пѣ́снь ѳ҃.

І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Бо́дра тѧ̀ храни́телѧ, великомꙋ́чениче, стѧжа́вше, врагѡ́въ ѕлоꙋ́мїе ᲂу҆до́бь ѿгонѧ́ща, и҆ цр҃квамъ подаю́ща ми́ръ, страстоте́рпче, непреста́ннѡ ᲂу҆блажа́емъ.

Крѣ́пость тебѣ̀ на де́мѡны дарова̀ влⷣка, стра̑сти же дꙋшѝ и҆ тѣлесѐ и҆сцѣлѧ́ти, бл҃же́нне, всеблагочести́вѣйшимъ дерзнове́нїемъ, молѧ́сѧ сп҃сꙋ: тѣ́мже тѧ̀ всѝ ᲂу҆блажа́емъ.

Зарю̀ трисо́лнечнꙋю и҆ є҆ди́нственнꙋю созерца́ѧй, є҆ди́но въ тре́хъ бж҃ество̀, и҆ нача́ло пренача́льное, и҆ и҆сто́чникъ бла́гости, страстоте́рпче, тѧ̀ пою́щыѧ сохранѧ́й.

Бг҃оро́диченъ: И҆зми́ мѧ, всенепоро́чнаѧ, мы́сленнагѡ плѣне́нїѧ, и҆збавле́нїе воздаю́щи, влⷣчце, сн҃а твоегѡ̀ распѧ́тїе, є҆́же за всѣ́хъ бы́вшее и҆збавле́нїе, и҆ ми́ръ, и҆ спасе́нїе пою́щымъ тѧ̀.

Свѣти́ленъ.

И҆скꙋси́всѧ ꙗ҆́коже зла́то ѻ҆гне́мъ и҆ мꙋ́ками, досто́инъ ꙗ҆ви́лсѧ є҆сѝ да́ръ бг҃а вы́шнѧгѡ, ѳео́дѡре страстоте́рпче, ѡ҆ на́съ ны́нѣ моли́сѧ.

Сла́ва, и҆ ны́нѣ, бг҃оро́диченъ: Держа́внымъ твои́мъ покро́вомъ, ѿ врагѡ́въ навѣ́та на́съ, чⷭ҇таѧ, твоѧ̑ рабы̑ сохранѝ всѧ̑ невреди̑мы: тѧ́ бо стѧжа́хомъ є҆ди́нꙋ прибѣ́жище въ нꙋ́ждахъ.

Краткое житие великомученика Феодора Тирона

В го­ро­де Ама­сии, в Пон­тий­ской об­ла­сти, во вре­мя го­не­ния им­пе­ра­то­ра Мак­си­ми­а­на (286–305 гг.) на хри­сти­ан, во­ин Фе­о­дор (Фе­дор) вме­сте с дру­ги­ми хри­сти­а­на­ми был при­нуж­да­ем от­речь­ся от Хри­ста и при­не­сти жерт­ву идо­лам. От­ка­зав­шись ис­пол­нить это, Фе­о­дор был под­верг­нут же­сто­ким му­че­ни­ям и за­клю­чен в тем­ни­цу. Здесь во вре­мя мо­лит­вы он был уте­шен чу­дес­ным яв­ле­ни­ем Гос­по­да Иису­са Хри­ста. Через неко­то­рое вре­мя му­че­ни­ка вы­ве­ли из тем­ни­цы и раз­ны­ми пыт­ка­ми сно­ва при­нуж­да­ли от­речь­ся от Хри­ста. На­ко­нец, ви­дя непре­клон­ность му­че­ни­ка, пра­ви­тель при­го­во­рил его к со­жже­нию. Свя­той Фе­о­дор сам бес­тре­пет­но взо­шел на ко­стер, и здесь с мо­лит­вой и сла­во­сло­ви­ем пре­дал свою ду­шу Бо­гу. Бы­ло это око­ло 305 го­да.

Через 50 лет по­сле кон­чи­ны свя­то­го Фе­о­до­ра им­пе­ра­тор Юли­ан От­ступ­ник (361–363 гг.), же­лая осквер­нить хри­сти­ан­ский Ве­ли­кий пост, при­ка­зал Кон­стан­ти­но­поль­ско­му епар­ху (гра­до­на­чаль­ни­ку) каж­дый день в те­че­ние пер­вой неде­ли по­ста тай­но кро­пить кро­вью идоль­ских жертв съест­ные при­па­сы, про­да­ва­е­мые на рын­ках. Свя­той Фе­о­дор в ноч­ном ви­де­нии явил­ся Кон­стан­ти­но­поль­ско­му ар­хи­епи­ско­пу Ев­док­сию и ве­лел ему объ­явить хри­сти­а­нам, чтобы они не по­ку­па­ли на рын­ках осквер­нен­ные при­па­сы и упо­треб­ля­ли в пи­щу ко­ли­во (ку­тью), т. е. ва­ре­ную пше­ни­цу с ме­дом. В па­мять это­го со­бы­тия Пра­во­слав­ная Цер­ковь до сих пор еже­год­но от­ме­ча­ет па­мять ве­ли­ко­му­че­ни­ка Фе­о­до­ра Ти­ро­на в первую суб­бо­ту Ве­ли­ко­го по­ста. На­ка­нуне в пят­ни­цу по­сле за­ам­вон­ной мо­лит­вы слу­жит­ся мо­ле­бен свя­то­му Фе­о­до­ру Ти­ро­ну и бла­го­слов­ля­ет­ся ку­тья.

Иное жизнеописание великомученика Феодора Тирона

Свя­той му­че­ник Фе­о­дор Ти­рон был во­и­ном в го­ро­де Ала­сии Пон­тий­ской об­ла­сти (се­ве­ро-во­сточ­ная об­ласть Ма­лой Азии, тя­нув­ша­я­ся вдоль бе­ре­га Пон­та Эвк­син­ско­го, т. е. Чер­но­го мо­ря), под на­чаль­ством неко­е­го Врин­ка. Его при­нуж­да­ли при­не­сти жерт­ву идо­лам. Свя­той Фе­о­дор твер­до во все­услы­ша­ние ис­по­ве­дал свою ве­ру во Хри­ста Спа­си­те­ля. На­чаль­ник дал ему несколь­ко дней на раз­мыш­ле­ние, во вре­мя ко­то­рых свя­той Фе­о­дор уси­лен­но мо­лил­ся. Его об­ви­ни­ли в под­жо­ге язы­че­ско­го хра­ма и бро­си­ли в тем­ни­цу на го­лод­ную смерть. Там ему явил­ся Гос­подь Иисус Хри­стос, уте­шил и под­кре­пил его. При­ве­ден­ный вновь к пра­ви­те­лю, свя­той Фе­о­дор еще раз сме­ло и без­бо­яз­нен­но ис­по­ве­дал свою ве­ру, за что был пре­дан но­вым ис­тя­за­ни­ям и осуж­ден на со­жже­ние. Му­че­ник Фе­о­дор без тре­пе­та взо­шел на ко­стер и с мо­лит­вой и сла­во­сло­ви­ем пре­дал свою свя­тую ду­шу Бо­гу.

Это про­изо­шло око­ло 306 го­да при рим­ском им­пе­ра­то­ре Га­ле­рии (305–311). Непо­вре­жден­ное ог­нем те­ло свя­то­го Фе­о­до­ра бы­ло по­гре­бе­но в го­ро­де Ев­ха­и­тах, неда­ле­ко от Ама­сии. Впо­след­ствии мо­щи его бы­ли пе­ре­не­се­ны в Ца­рь­град, в храм, освя­щен­ный во имя его. Гла­ва же его на­хо­дит­ся в Ита­лии, в го­ро­де Га­эте.

Спу­стя 50 лет по­сле му­че­ни­че­ской кон­чи­ны свя­то­го Фе­о­до­ра им­пе­ра­тор Юли­ан От­ступ­ник (361–363), же­лая над­ру­гать­ся над хри­сти­а­на­ми, при­ка­зал гра­до­на­чаль­ни­ку Кон­стан­ти­но­по­ля окроп­лять в первую сед­ми­цу Ве­ли­ко­го по­ста все съест­ные при­па­сы на рын­ках идо­ло­жерт­вен­ной кро­вью. Свя­той Фе­о­дор, явив­шись во сне ар­хи­епи­ско­пу Ев­док­сию, по­ве­лел ему объ­явить всем хри­сти­а­нам, чтобы ни­кто не по­ку­пал ни­че­го на рын­ках, а ели ва­ре­ную пше­ни­цу с ме­дом – ко­ли­во (ку­тью, или со­чи­во). В па­мять это­го со­бы­тия Пра­во­слав­ная Цер­ковь еже­год­но со­вер­ша­ет празд­но­ва­ние свя­то­му ве­ли­ко­му­че­ни­ку Фе­о­до­ру Ти­ро­ну в суб­бо­ту пер­вой неде­ли Ве­ли­ко­го по­ста. В на­ве­че­рие суб­бо­ты, в пят­ни­цу, на Бо­же­ствен­ной ли­тур­гии Пре­ждео­свя­щен­ных Да­ров по­сле за­ам­вон­ной мо­лит­вы чи­та­ет­ся Ка­нон мо­леб­ный свя­то­му ве­ли­ко­му­че­ни­ку Фе­о­до­ру, со­став­лен­ный пре­по­доб­ным Иоан­ном Да­мас­ки­ным. По­сле это­го ко­ли­во бла­го­слов­ля­ет­ся и раз­да­ет­ся ве­ру­ю­щим. Празд­но­ва­ние ве­ли­ко­му­че­ни­ку Фе­о­до­ру в суб­бо­ту пер­вой сед­ми­цы Ве­ли­ко­го по­ста опи­сы­вал пат­ри­арх Кон­стан­ти­но­поль­ский Нек­та­рий (381–397).

См. так­же: "Стра­да­ние свя­то­го ве­ли­ко­му­че­ни­ка Фе­о­до­ра Ти­ро­на" в из­ло­же­нии свт. Ди­мит­рия Ро­стов­ско­го.