Канон святому великомученику Георгию Победоносцу на обновление храма в Лидде

Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Де́лание Бо́жие гобзу́ющее яви́лся еси́, пита́я ве́рныя подража́нием благочести́вым, страстоте́рпче Гео́ргие, па́мять твою́ светоно́сную свяще́нно пра́зднующия и в се́й те́пло тя́ сла́вящия.

Разжже́ твое́, страстоте́рпче, се́рдце Боже́ственное раче́ние вои́стинну, самозва́н те́м к мучи́телем прише́л еси́, попаля́я многобо́жия пре́лесть и ра́зум све́тлости облиста́я спасе́ния.

Я́ко ле́в, упова́я, суди́щу предста́л еси́, возвеща́я я́вственно воплоще́ние Христо́во, И́мже ми́р изба́вися паде́ния дре́вняго, пе́рвое прия́т благопло́дие, треблаже́нне Гео́ргие.

Богоро́дичен: Избавля́я на́с осужде́ния дре́вняго, Сы́н Бо́жий бы́сть Сы́н Де́вы я́ко Челове́к, те́м Сего́ во двою́ существу́ и хоте́нию правове́рным се́рдцем сла́вим.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Ро́да и оте́чества сла́вы ра́достию отве́ргся, Христу́ после́довал еси́ и Го́рняго Сио́на жи́тель, му́чениче, яви́лся еси́ красне́йший.

Да насле́дник изя́щен и покори́в, Жива́го Бо́га сы́н яви́шися, претерпе́л еси́ ра́ны треволне́ния мучи́телей, му́чениче до́блий.

Богоро́дичен: Во всего́ Ада́ма оде́яся, И́же милосе́рдия ра́ди Но́вый Ада́м бы́сть из Тебе́, Пренепоро́чная, Еди́н сы́й челове́ков Созда́тель.

И́кос:

Во́инство на земли́ возненави́дев, му́чениче, на Небесе́х возжеле́л еси́ сла́вы и боле́зни поне́сл еси́ и лю́тую сме́рть. Те́м, дне́сь всесвяту́ю твою́ па́мять пра́зднующе, Христу́ прино́сим хвалу́, треблаже́нне Гео́ргие.

Богоро́дичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ и сло́ва, непреста́нно моли́ о воспева́ющих Тя́ пода́ти оставле́ние грехо́в на́ших все́х и исправле́ние жития́ ве́рою и любо́вию при́сно сла́вящим Тя́.

Крестобогоро́дичен: Нескве́рная А́гница, А́гнца и Па́стыря пове́шена на Дре́ве ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й.

Пе́снь 4.

Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Умерщвле́нное твое́ те́ло му́ками, блаже́нне, умерщвле́ннаго Сло́ва вообража́ет стра́сти, дарова́вшаго ти́ живо́т ве́чный.

Щито́м и́стинным огражде́н, побо́рники лжи́выя кре́пким смы́слом ку́пно погуби́л еси́, Богому́дре Гео́ргие.

Просла́вися твои́ми у́ды святы́ми, и́же в земны́х оде́яся неможе́ние, Сло́во. Те́м ве́чно тя́ прославля́ем, Гео́ргие.

Богоро́дичен: И́же бытие́ дарова́вый челове́ком и е́же до́бре бы́ти те́м, преступле́нием истле́вшим, Пречи́стая, дарова́, бы́в Челове́к.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т святы́й, обраща́яй из мра́чна неве́дения ве́рою воспева́ющия Тя́.

Вше́д му́жески в му́ченический по́двиг, и порази́л еси́ и́дольское, страстоте́рпче, свире́пство, те́лом сокруша́емь.

Тебе́ ка́мень све́тлый Влады́ка в венце́х вонзе́, страстоте́рпче, Свое́й Це́ркви подо́бно сия́юща.

Пожре́ся, я́ко а́гнец, до́браго Пастыренача́льника сме́рть вообрази́в, и прине́слся еси́ Вы́шней трапе́зе же́ртва непоро́чна.

Богоро́дичен: Спаси́ ны́ от бе́д и скорбе́й, Пречи́стая Богоро́дице, и му́к изба́ви бу́дущих моли́твами Твои́ми.

Пе́снь 6.

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Сосу́д раздробля́емь те́ла страда́нии, му́чениче, вра́жия вся́ ко́зни лука́выя му́жески разруши́л еси́, всеблаже́нне Гео́ргие.

Остроты́, разсека́ющия те́ло, и колесе́, му́чениче, и распаля́емы ве́щи пе́щныя, и́же к Бо́гу любо́вию распаля́емь, отню́д не устраши́лся еси́.

Богоро́дичен: Святы́й хра́м во святы́х Почива́ющему была́ еси́, Богома́ти: те́мже на́с, ве́рно пою́щих Тебе́, освяща́еши, Присноде́во.

Конда́к, гла́с 8.

К возбра́нному и ско́рому заступле́нию Твоему́ прибе́гше, ве́рнии, мо́лим изба́витися, страстоте́рпче Христо́в, от собла́зн вра́жиих воспева́ющим тя́, и вся́ких бе́д, и озлобле́ний, да зове́м: ра́дуйся, му́чениче Гео́ргие.

И́кос:

Вели́к в предста́тельствах на земли́ показа́лся еси́, Госпо́день уго́дниче и дру́же, ве́рныя бо лю́ди покрыва́я, спаса́еши при́сно, сла́вне. Те́м ве́рою и любо́вию вопие́м тебе́, многострада́льче: ра́дуйся, и́мже просвеща́ется ми́р; ра́дуйся, и́мже во́инство озаря́ется; ра́дуйся, ве́рных от пле́на избавле́ние; ра́дуйся, ю́зников ско́рое заступле́ние; ра́дуйся, высото́ с ве́рою притека́ющих к тебе́ те́пле; ра́дуйся, обогати́телю лю́бящих тя́ и в ско́рби весе́лие; ра́дуйся, я́ко сы́й люде́й огражде́ние; ра́дуйся, я́ко подае́ши во бране́х побежде́ние; ра́дуйся, звездо́, просвеща́ющая пла́вающия; ра́дуйся, реши́телю вся́каго озлобле́ния; ра́дуйся, к нему́же вся́к ве́рный прибега́ет; ра́дуйся, и́мже восхваля́ется Созда́тель; ра́дуйся, му́чениче Гео́ргие.

Пе́снь 7.

Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Жива́ бы́л еси́ же́ртва, му́чениче, за ны́ Пожре́ному, я́ко овча́ти, де́моном же́ртвы, всу́е приноси́мыя, упраздни́л еси́, о Христе́ укрепля́емь.

Яви́ся благопло́ден, я́ко лоза́, принося́ гро́здие на́м терпе́ния, сла́вне, вино́ ка́плюще Боже́ственное, сердца́ все́х благочести́вых веселя́щее.

У́ды да́л еси́ усе́рдно разсека́ти за Христа́, пребы́л же еси́ неотлуче́н Того́ любве́, преблаже́нне, и насле́дник все́х бла́г, веселя́ся.

Богоро́дичен: Хвалу́ Бо́гу прино́сит вся́ тва́рь, от Твоего́ ро́ждшуся, Пренепоро́чная Отрокови́це, пречи́стаго чре́ва и дре́вния все́х на́с кля́твы Изба́вльшему.

Пе́снь 8.

Ирмо́с: Изба́вителю все́х всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Упра́витель пла́вающим изя́щный, помо́щник в ско́рбех вели́к яви́лся еси́, Гео́ргие, спаса́еши ве́рою к тебе́ и несомне́нным се́рдцем притека́ющия.

И́стины яви́лся еси́ побо́рник и лжи́ бы́л еси́ оглаго́льник, на́м же па́ки утвержде́ние, страстоте́рпче, ве́рою вопию́щим: благослови́те вся́ дела́ Госпо́дня Го́спода.

Кропле́нием крове́й твои́х погаси́л еси́ пре́лести, Гео́ргие, у́глие и ве́рных напои́л еси́ сердца́, ве́рно тя́ воспева́ющих и соверша́ющих сла́вную па́мять твою́.

Богоро́дичен: От Иессе́ева ко́рене прозябла́ еси́ и зло́бный ко́рень исто́ргнула еси́, Соде́теля тва́ри прозя́бши, Отрокови́це, Ему́же пое́м: благослови́те вся́ дела́ Госпо́дня Го́спода.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Я́ко у́тро, я́ко со́лнце, све́тло возсия́в, и тва́рь просвети́л еси́ страсте́й незаходи́мыми заря́ми, чуде́с же мно́гих явле́нии, Гео́ргие, му́чеников ра́дование. Те́м тя́ любо́вию ублажа́ем.

Ка́пля Боже́ственныя сла́дости, Гео́ргие, яви́лся еси́, страстну́ю на́шу го́ресть взе́мля и ослажда́я всегда́ ду́ши же и сердца́ ве́рою тя́ блажа́щих, достосла́вне.

Освяти́л еси́ кро́вию зе́млю и ду́хом весе́лия Небе́сная испо́лнил еси́, му́чениче. Те́м вся́ка душа́ тя́ благочести́вых, я́ко уго́дника Госпо́дня, лю́бит при́снаго и помо́щника тя́ напису́ет.

Богоро́дичен: Гла́с Ти́ прино́сим Боже́ственнаго Гаврии́ла весе́лия, зову́ще: ра́дуйся, ра́дость вселе́нней, ско́рби Потреби́теля поро́ждши и Е́вино отъе́мши поноше́ние; ра́дуйся, Де́во Неискусобра́чная.

Свети́лен.

Струя́ми крове́й твои́х преле́стныя пла́мы погаси́л еси́, блаже́нне, и мучи́телей свире́пство до конца́ погуби́л еси́, и Христа́ просла́вил еси́, Гео́ргие страстоте́рпче. Те́м вене́ц прия́л еси́ нетле́ния и жи́зни от десни́цы Вы́шняго.

Богоро́дичен: Не́сть во мне́ отню́д наде́жды спасе́ния, Де́во, я́ко зле́ впадо́х во глубину́ прегреше́ний и жду́ преще́ния стра́шныя му́ки и ко́злищ ча́сти; но уще́дри мя́ пре́жде Суда́, я́ко су́щи тепла́ Засту́пница, Богоро́дице.