Канон святым апостолам Аристарху, Пуду и Трофиму

Припев: Святи́и апо́столи, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 28 апреля (15 апреля ст. ст.); 10 октября (27 сентября ст. ст.)

Глас 6.

Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Престо́лу Бо́жию предстоя́ще, я́ко слуги́, я́ко Христо́вы служи́тели, я́ко свети́льницы мы́сленнии, просвеще́ние проси́те на́м, чту́щим ва́шу па́мять, апо́столи.

На земли́ за милосе́рдие я́влься, ученики́ избра́ и служи́тели ва́с, со ины́ми мно́жайшими, Его́ возвеща́ющия всю́ду боже́ственное хоте́ние.

Свяще́ннейший ли́к, свяще́нных Христо́вых се́дмьдесят сочта́вшеся учени́к, с Па́влом всю́ зе́млю уче́ньми Боже́ственнаго све́та просвети́сте.

Свяще́ннейший Пу́д и сла́вный му́дрый Ариста́рх с Трофи́мом, я́ко зве́зды светоза́рныя, возсия́ша на земли́, пре́лести омраче́ние отгоня́ще.

Богоро́дичен: Да ни́жния с вы́шними премно́жеством милосе́рдия, Пречи́стая, совокупи́т, Бо́г пло́ть прия́т от Тебе́ и пребы́сть, е́же бе́, и по воплоще́нии.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Су́ще с Па́влом сла́вным, с ни́м ве́сь ми́р, я́ко зве́зды с со́лнцем, проидо́сте, све́том пропове́дания свяще́ннаго неве́дения тму́ отгоня́ще.

Вели́кими боле́зньми плотски́ми боле́зненный отъя́ша гре́х от среды́ Сло́ва ученицы́, безболе́зненный ве́рным в вы́шних поко́й обручи́вше.

По́двиги боже́ственными вои́стинну вра́жию зло́бу разори́сте всю́ и, хра́мы и́дольския низлага́юще, Бо́гу челове́ки хра́мы сотвори́сте.

Богоро́дичен: Пита́еши млеко́м все́х Пита́теля, Де́во, рожде́ннаго без тли́ из Пречи́стаго Твоего́ чре́ва и сокруше́нныя тле́ю челове́ки па́ки назида́юща.

Седа́лен, гла́с 1.

Я́ко у́тро, боголе́пно возсия́вше ми́ру, тму́ глубо́кую отгна́сте ве́рою пре́лести, апо́столи, и ду́ши просвети́сте. Те́мже вся́ светоза́рная Це́рковь пое́т дне́сь светоно́сную ва́шу па́мять, Христа́ велича́ющи.

Сла́ва, и ны́не, богоро́дичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.

Крестобогоро́дичен: Нескве́рная А́гница, А́гнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Пресу́щная Тро́ица я́ко трисве́тлую возжже́ свещу́, свяще́нныя Пу́да же, и Трофи́ма, и Ариста́рха, зе́млю боже́ственным сло́вом озаря́ющия.

Па́влу яви́стеся му́дрии спу́тницы, гоне́ния с ни́м многови́дна и беды́, сла́внии, бу́дущия ра́ди жи́зни, веселя́щеся, претерпе́сте.

Кро́вными тече́нии освяти́сте всю́ тва́рь, стра́ждуще, скве́рныя кро́ви, де́моном приноси́мыя, Христо́вою си́лою упраздни́сте, апо́столи.

Богоро́дичен: Кре́пость моя́, Пречи́стая, и прибе́жище, и необори́мая стена́, и к Бо́гу Моли́твенница су́щи, ве́чнаго мя́ пла́мене и гее́нны свободи́.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Истука́нныя низложи́ша и хра́мы и́дольския, сла́внии, созида́юще благода́тию, я́коже ски́нию, па́дшую преступле́ньми, сердца́ челове́ков, я́ко богопропове́дницы.

Мо́ре, кони́ пресла́внии вои́стинну су́ще Бо́жии, безбо́жия возмути́вше, потопля́емыя в не́м пе́рвее пропове́данием боже́ственным оживи́сте.

Посеща́еми от Бо́га, боже́ственными посеще́нии ва́шими в боле́зни су́щия идолонеи́стовства и потопля́ющияся спасо́сте, спаси́тели на́м бы́вше.

Богоро́дичен: Свяще́нно свяще́нный дре́вле Иса́ия, просве́щся Ду́хом Боже́ственным, возопи́: се́ Де́ва прии́мет воплоща́ема Бо́га, за милосе́рдие необъя́тнаго.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Прему́дрый Трофи́м, и Ариста́рх вку́пе, и Пу́д чу́дный, я́ко ученицы́ Сло́ва и свяще́ннии Па́влу спу́тницы, свяще́нными пе́сньми да восхва́лятся.

Во́д испо́лнены Ду́ха, прему́дрии, я́ко вои́стинну су́ще, вся́ку ду́шу напои́сте уче́ния, от среды́ изъе́мше пла́мене преле́стнаго Боже́ственною благода́тию.

Соедине́ни ду́хом, разлуче́ния никоего́же име́сте телесе́м: вку́пе бо во главы́ с Па́влом пропове́дником усе́чени бы́сте, с ни́м и прославля́еми.

Богоро́дичен: Стра́нно Твое́ зача́тие, стра́нно, Отрокови́це, и стра́шно е́же па́че ума́ Твое́ рождество́, устра́ншияся дре́вле от Бо́га, Тому́ примиря́ющи и добро́ту пе́рвую воздаю́щи.

Конда́к, гла́с 4.

Яви́ся апо́стольский честны́й се́й пра́здник, просвеща́я на́с и грехо́вную мглу́ прогоня́я, зову́щим: яви́ся Све́т, и прии́де избавле́ние.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Нече́стия угаси́сте пе́щь ту́чами честна́го пропове́дания, я́ко апо́столи и я́ко боже́ственнии су́щи страда́льцы, крове́й то́ками и́дольскую ве́щь попали́сте, му́дрии, те́мже сла́вими есте́.

Двуна́десяти ученико́в яви́стеся втори́и ученицы́ Христо́вы, сла́внии, с Па́влом бо проше́дше всю́ зе́млю, беды́ подъя́сте мно́ги и с ни́м свяще́нную кончи́ну прия́сте.

Украси́стеся кра́сными ва́шими ра́нами, Ариста́рхе и Трофи́ме, просвети́стеся па́че вся́каго, сла́внии, зла́та с Пу́дом свяще́нным вои́стинну, о на́с всегда́ моля́ще Христа́.

Богоро́дичен: Блаже́нна от Свята́го яви́лася еси́ Ду́ха, Сове́та Вели́каго А́нгела вопло́щши, Сего́ боже́ственныя ученики́, в ми́р я́ко боже́ственныя мо́лния посла́вша, Чи́стая, просвети́ти ве́рныя.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Посека́юще коре́ния безбо́жия серпо́м боже́ственным, насади́сте ве́ру и́стинную и соверше́н ра́зум во благочести́вых сердца́х, богогла́снии.

Сло́вом боже́ственным сердца́ обнови́сте и, ра́зума се́мя се́явше, кла́с, му́дрии, многопло́ден пожа́сте, спасе́нных, апо́столи, мно́жество.

Непрекло́ннии столпи́ Це́ркве Христо́вы, виногра́да боже́ственнаго боже́ственное гро́здие, сла́дость жи́зни иска́пающе, Ариста́рх, и Пу́д, и Трофи́м да почту́тся.

Богоро́дичен: Сокру́шшееся, Де́во, челове́чество обнови́ла еси́ все́ но́вым рождество́м Твои́м, естества́ соу́зы па́че естества́ обно́вльши, Обра́дованная, Бо́га Жива́го Ма́ти.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Кре́пость отъя́та бы́сть го́рдаго, паде́ же возноси́мое его́ шата́ние, не́мощию бо плотско́ю святи́и сему́ спле́тшеся, победи́ша, и погуби́ша, и мучи́тельства его́ ве́рныя изба́виша.

Я́коже пе́рсть, пре́лести истни́вше, и неле́стни челове́ком наста́вницы яви́стеся и а́нгелом согра́ждане бы́сте, воспева́юще с ни́ми: свя́т, свя́т, свя́т, Оте́ц и Сы́н и Ду́х Святы́й.

Плотски́я исцеля́юще неду́ги и душе́вныя, апо́столи Госпо́дни, боле́зни и творя́ще ди́вная чудеса́, вся́, и́же в неразу́мии, привлеко́сте к ра́зуму све́та и́стиннаго, те́мже блажи́ми есте́.

Ума́ невеще́ственнаго ны́не наслажда́етеся, на небесе́х пра́зднующаго, апо́столи, блаже́нное упова́ние прие́мше, Трофи́ме богопропове́дниче, Пу́де всеизря́дне, сла́вный Ариста́рхе, о на́с воспомина́ние твори́те.

Богоро́дичен: Пла́мене гее́нскаго мя́ свободи́, Я́же па́че ума́ О́гнь ро́ждши нестерпи́мый, и ду́шу мою́ к любви́ возжзи́, Пречи́стая, Прише́дшаго о́гнь ра́зума, Отрокови́це, на зе́млю воврещи́, Богора́дованная.

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Престо́лꙋ бж҃їю предстоѧ́ще, ꙗ҆́кѡ слꙋги̑, ꙗ҆́кѡ хрⷭ҇тѡ́вы слꙋжи́тели, ꙗ҆́кѡ свѣти́льницы мы́сленнїи, просвѣще́нїе проси́те на́мъ, чтꙋ́щымъ ва́шꙋ па́мѧть, а҆пⷭ҇ли.

На землѝ за милосе́рдїе ꙗ҆́вльсѧ, ᲂу҆ч҃никѝ и҆збра̀, и҆ слꙋжи́тели ва́съ, со и҆ны́ми мно́жайшими є҆гѡ̀ возвѣща́ющыѧ всю́дꙋ бжⷭ҇твенное хотѣ́нїе.

Свѧще́ннѣйшїй ли́къ свѧще́нныхъ хрⷭ҇то́выхъ се́дмьдесѧтъ сочта́вшесѧ ᲂу҆чени̑къ, съ па́ѵломъ всю̀ зе́млю ᲂу҆че́ньми бжⷭ҇твеннагѡ свѣ́та просвѣти́сте.

Свѧще́ннѣйшїй пꙋ́дъ и҆ сла́вный, мꙋ́дрый а҆рїста́рхъ съ трофі́момъ, ꙗ҆́кѡ ѕвѣ́зды свѣтоза̑рныѧ возсїѧ́ша на землѝ, пре́лести ѡ҆мраче́нїе ѿгонѧ́ще.

Бг҃оро́диченъ: Да ни̑жнїѧ съ вы́шними премно́жествомъ милосе́рдїѧ, пречⷭ҇таѧ, совокꙋпи́тъ, бг҃ъ пло́ть прїѧ́тъ ѿ тебє̀, и҆ пребы́сть є҆́же бѣ̀ и҆ по воплоще́нїи.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Сꙋ́ще съ па́ѵломъ сла́внымъ, съ ни́мъ ве́сь мі́ръ ꙗ҆́кѡ ѕвѣ́зды съ со́лнцемъ проидо́сте, свѣ́томъ проповѣ́данїѧ свѧще́ннагѡ, невѣ́дѣнїѧ тмꙋ̀ ѿгонѧ́ще.

Вели́кими болѣ́зньми плотски́ми болѣ́зненный ѿѧ́ша грѣ́хъ ѿ среды̀, сло́ва ᲂу҆чн҃цы̀, безболѣ́зненный вѣ̑рнымъ въ вы́шнихъ поко́й ѡ҆брꙋчи́вше.

Пѡ́двиги бжⷭ҇твенными вои́стиннꙋ вра́жїю ѕло́бꙋ разори́сте всю̀: и҆ хра́мы і҆́дѡльскїѧ низлага́юще, бг҃ꙋ человѣ́ки хра́мы сотвори́сте.

Бг҃оро́диченъ: Пита́еши млеко́мъ всѣ́хъ пита́телѧ, дв҃о, рожде́ннаго безъ тлѝ и҆зъ пречⷭ҇тагѡ твоегѡ̀ чре́ва, и҆ сокрꙋшє́нныѧ тле́ю человѣ́ки па́ки назида́юща.

Сѣда́ленъ, гла́съ а҃.

Ꙗ҆́кѡ ᲂу҆́тро бг҃олѣ́пнѡ возсїѧ́вше мі́рꙋ, тмꙋ̀ глꙋбо́кꙋю ѿгна́сте вѣ́рою пре́лести, а҆пⷭ҇ли, и҆ дꙋ́шы просвѣти́сте. тѣ́мже всѧ̀ свѣтоза́рнаѧ цр҃ковь пое́тъ дне́сь свѣтоно́снꙋю ва́шꙋ па́мѧть, хрⷭ҇та̀ велича́ющи.

Сла́ва, и҆ ны́нѣ, бг҃оро́диченъ: Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїѧ житїѧ̀, вѣ́рою и҆ любо́вїю при́снѡ тѧ̀ сла́вѧщымъ.

Крⷭ҇тобг҃оро́диченъ: Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи, ѿ смы́сла чи́ста, ѡ҆ гдⷭ҇ѣ пра́зднꙋющи.

Пресꙋ́щнаѧ трⷪ҇ца, ꙗ҆́кѡ трисвѣ́тлꙋю возжжѐ свѣщꙋ̀, свѧщє́нныѧ пꙋ́да же и҆ трофі́ма, и҆ а҆рїста́рха, зе́млю бжⷭ҇твеннымъ сло́вомъ ѡ҆зарѧ́ющыѧ.

Па́ѵлꙋ ꙗ҆ви́стесѧ мꙋ́дрїи спꙋ̑тницы, гонє́нїѧ съ ни́мъ многови̑дна, и҆ бѣды̑, сла́внїи, бꙋ́дꙋщїѧ ра́ди жи́зни, веселѧ́щесѧ претерпѣ́сте.

Кро́вными течє́нїи ѡ҆свѧти́сте всю̀ тва́рь стра́ждꙋще, сквє́рныѧ крѡ́ви, де́мѡнѡмъ приноси̑мыѧ, хрⷭ҇то́вою си́лою ᲂу҆праздни́сте, а҆пⷭ҇ли.

Бг҃оро́диченъ: Крѣ́пость моѧ̀, пречⷭ҇таѧ, и҆ прибѣ́жище, и҆ неѡбори́маѧ стѣна̀, и҆ къ бг҃ꙋ моли́твенница сꙋ́щи, вѣ́чнагѡ мѧ̀ пла́мене и҆ гее́нны свободѝ.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

И҆стꙋка̑нныѧ низложи́ша, и҆ хра́мы і҆́дѡльскїѧ, сла́внїи, созида́юще благода́тїю, ꙗ҆́коже ски́нїю па́дшꙋю престꙋпле́ньми, сердца̀ человѣ́кѡвъ, ꙗ҆́кѡ бг҃опроповѣ̑дницы.

Мо́ре, конѝ пресла́внїи вои́стиннꙋ сꙋ́ще бж҃їи, безбо́жїѧ возмꙋти́вше, потоплѧ́ємыѧ въ не́мъ пе́рвѣе проповѣ́данїемъ бжⷭ҇твеннымъ ѡ҆живи́сте.

Посѣща́еми ѿ бг҃а бжⷭ҇твенными посѣщє́нїи ва́шими, въ болѣ́зни сꙋ́щыѧ і҆дѡлонеи́стовства, и҆ потоплѧ́ющыѧсѧ спасо́сте, спаси́тели на́мъ бы́вше.

Бг҃оро́диченъ: Свѧще́ннѡ свѧще́нный дре́вле и҆са́їа, просвѣ́щсѧ дх҃омъ бжⷭ҇твеннымъ, возопѝ: сѐ дв҃а прїи́метъ воплоща́ема бг҃а, за милосе́рдїе неѡб̾ѧ́таго.

Пѣ́снь ѕ҃.

І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Премꙋ́дрый трофі́мъ и҆ а҆рїста́рхъ вкꙋ́пѣ, и҆ пꙋ́дъ чꙋ́дный, ꙗ҆́кѡ ᲂу҆ч҃ницы̀ сло́ва, и҆ свѧще́ннїи па́ѵлꙋ спꙋ̑тницы, свѧще́нными пѣ́сньми да восхва́лѧтсѧ.

Во́дъ и҆спо́лнєны дх҃а, премꙋ́дрїи, ꙗ҆́кѡ вои́стиннꙋ сꙋ́ще, всѧ́кꙋ дꙋ́шꙋ напои́сте ᲂу҆че́нїѧ, ѿ среды̀ и҆з̾е́мше пла́мене преле́стнагѡ, бжⷭ҇твенною бл҃года́тїю.

Соедине́ни дꙋ́хомъ, разлꙋче́нїѧ никоегѡ́же и҆мѣ́сте тѣлесє́мъ: вкꙋ́пѣ бо во главы̑ съ па́ѵломъ проповѣ́дникомъ ᲂу҆сѣ́чени бы́сте, съ ни́мъ и҆ прославлѧ́еми.

Бг҃оро́диченъ: Стра́нно твоѐ зача́тїе, стра́нно, ѻ҆трокови́це, и҆ стра́шно, є҆́же па́че ᲂу҆ма̀, твоѐ ржⷭ҇тво̀, ᲂу҆стра́ншыѧсѧ дре́вле ѿ бг҃а томꙋ̀ примирѧ́ющи, и҆ добро́тꙋ пе́рвꙋю воздаю́щи:

Конда́къ, гла́съ д҃.

Ꙗ҆ви́сѧ а҆пⷭ҇льскїй честны́й се́й пра́здникъ просвѣща́ѧ на́съ, и҆ грѣхо́внꙋю мглꙋ̀ прогонѧ́ѧ, зовꙋ́щымъ: ꙗ҆ви́сѧ свѣ́тъ, и҆ прїи́де и҆збавле́нїе.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: благослове́нъ є҆сѝ, бж҃е ѻ҆тє́цъ на́шихъ.

Нече́стїѧ ᲂу҆гаси́сте пе́щь тꙋ́чами честна́гѡ проповѣ́данїѧ, ꙗ҆́кѡ а҆пⷭ҇ли и҆ ꙗ҆́кѡ бжⷭ҇твеннїи сꙋ́щи страда́льцы, крове́й то́ками і҆́дѡльскꙋю ве́щь попали́сте, мꙋ́дрїи: тѣ́мже сла́вими є҆стѐ

Двꙋна́десѧти ᲂу҆ч҃никѡ́въ ꙗ҆ви́стесѧ вторі́и ᲂу҆ч҃ницы̀ хрⷭ҇тѡ́вы, сла́внїи: съ па́ѵломъ бо проше́дше всю̀ зе́млю, бѣды̑ под̾ѧ́сте мнѡ́ги, и҆ съ ни́мъ свѧще́ннꙋю кончи́нꙋ прїѧ́сте.

Оу҆краси́стесѧ кра́сными ва́шими ра́нами, а҆рїста́рхе и҆ трофі́ме, просвѣти́стесѧ па́че всѧ́кагѡ, сла́внїи, зла́та съ пꙋ́домъ свѧще́ннымъ вои́стиннꙋ, ѡ҆ на́съ всегда̀ молѧ́ще хрⷭ҇та̀.

Бг҃оро́диченъ: Бл҃же́нна ѿ ст҃а́гѡ ꙗ҆ви́ласѧ є҆сѝ дх҃а, совѣ́та вели́кагѡ а҆́гг҃ла вопло́щши, сегѡ̀ бжⷭ҇твєнныѧ ᲂу҆ч҃никѝ въ мі́ръ, ꙗ҆́кѡ бжⷭ҇твєнныѧ мѡ́лнїѧ, посла́вша, чⷭ҇таѧ, просвѣти́ти вѣ̑рныѧ.

Пѣ́снь и҃.

І҆рмо́съ: И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Посѣка́юще корє́нїѧ безбо́жїѧ серпо́мъ бжⷭ҇твеннымъ, насади́сте вѣ́рꙋ и҆́стиннꙋю, и҆ соверше́нъ ра́зꙋмъ во бл҃гочести́выхъ сердца́хъ, бг҃огла́снїи.

Сло́вомъ бжⷭ҇твеннымъ сердца̀ ѡ҆бнови́сте, и҆ ра́зꙋма сѣ́мѧ сѣ́ѧвше, кла́съ, мꙋ́дрїи, многопло́денъ пожа́сте, спасе́нныхъ, а҆пⷭ҇ли, мно́жество.

Непрекло́ннїи столпѝ цр҃кве хрⷭ҇то́вы, вїногра́да бжⷭ҇твеннагѡ бжⷭ҇твенное гро́здїе, сла́дость жи́зни и҆ска́пающе, а҆рїста́рхъ и҆ пꙋ́дъ, и҆ трофі́мъ да почтꙋ́тсѧ.

Бг҃оро́диченъ: Сокрꙋ́шшеесѧ, дв҃о, человѣ́чество ѡ҆бнови́ла є҆сѝ всѐ но́вымъ ржⷭ҇тво́мъ твои́мъ, є҆стества̀ соꙋ́зы па́че є҆стества̀ ѡ҆бно́вльши, ѡ҆бра́дованнаѧ, бг҃а жива́гѡ мт҃и.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ.

Крѣ́пость ѿѧ́та бы́сть го́рдагѡ, паде́ же возноси́мое є҆гѡ̀ шата́нїе, не́мощїю бо плотско́ю свѧті́и семꙋ̀ спле́тшесѧ, побѣди́ша и҆ погꙋби́ша, и҆ мꙋчи́тельства є҆гѡ̀ вѣ̑рныѧ и҆зба́виша.

Ꙗ҆́коже пе́рсть пре́лести и҆стни́вше, и҆ неле́стни человѣ́кѡмъ наста̑вницы ꙗ҆ви́стесѧ, и҆ а҆́гг҃лѡмъ согра́ждане бы́сте, воспѣва́юще съ ни́ми: ст҃ъ, ст҃ъ, ст҃ъ, ѻ҆ц҃ъ и҆ сн҃ъ, и҆ дх҃ъ ст҃ы́й.

Плѡтскі́ѧ и҆сцѣлѧ́юще недꙋ́ги, и҆ дꙋшє́вныѧ, а҆пⷭ҇ли гдⷭ҇ни, болѣ̑зни, и҆ творѧ́ще ди̑внаѧ чꙋдеса̀, всѧ̑ и҆̀же въ неразꙋ́мїи привлеко́сте къ ра́зꙋмꙋ свѣ́та и҆́стиннагѡ: тѣ́мже блажи́ми є҆стѐ.

Оу҆ма̀ невеще́ственнагѡ ны́нѣ наслажда́етесѧ на нб҃сѣ́хъ пра́зднꙋющагѡ, а҆пⷭ҇ли, бл҃же́нное ᲂу҆пова́нїе прїе́мше, трофі́ме бг҃опроповѣ́дниче, пꙋ́де всеизрѧ́дне, сла́вный а҆рїста́рхе, ѡ҆ на́съ воспомина́нїе твори́те.

Бг҃оро́диченъ: Пла́мене гее́нскагѡ мѧ̀ свободѝ, ꙗ҆́же па́че ᲂу҆ма̀ ѻ҆́гнь ро́ждши нестерпи́мый, и҆ дꙋ́шꙋ мою̀ къ любвѝ возжзѝ, пречⷭ҇таѧ, прише́дшагѡ ѻ҆́гнь ра́зꙋма, ѻ҆трокови́це, на зе́млю воврещѝ, бг҃ора́дованнаѧ.

Жизнь и труды апостолов – Святые апостолы Аристарх, Пуд и Трофим

Апостол от 70-ти Аристарх, епископ Апамейский

Свя­той апо­стол от 70-ти Ари­старх упо­ми­на­ет­ся свя­тым апо­сто­лом Пав­лом в По­сла­нии к Ко­лос­ся­нам (Кол.4:10) и к Фили­мо­ну (Флм.1:24). Свя­той апо­стол Ари­старх со­пут­ство­вал апо­сто­лу Пав­лу, а впо­след­ствии был по­став­лен епи­ско­пом в си­рий­ский го­род Апа­мею (па­мять так­же 15 ап­ре­ля).

Жития апостолов от 70-ти Аристарха, Пуда и Трофима

Свя­тые апо­сто­лы Ари­старх, Пуд и Тро­фим бы­ли из чис­ла 70-ти апо­сто­лов, ко­то­рых Гос­подь Иисус Хри­стос по­слал пе­ред Со­бою с еван­гель­ским бла­го­ве­сти­ем (Лк.10:1-24).

Свя­той апо­стол Ари­старх, со­труд­ник свя­то­го апо­сто­ла Пав­ла, стал епи­ско­пом си­рий­ско­го го­ро­да Апа­меи. Имя его неод­но­крат­но упо­ми­на­ет­ся в кни­ге Де­я­ний свя­тых апо­сто­лов (Деян.19:29, 20:4, 27:2) и в По­сла­ни­ях апо­сто­ла Пав­ла (Кол.4:10; Флп.1:24).

Свя­той апо­стол Пуд упо­ми­на­ет­ся во 2-м По­сла­нии апо­сто­ла Пав­ла к Ти­мо­фею (2Тим.4:21). Он за­ни­мал вы­со­кое по­ло­же­ние чле­на рим­ско­го Се­на­та. В сво­ем до­ме свя­той при­ни­мал пер­во­вер­хов­ных апо­сто­лов, со­би­рал ве­ру­ю­щих хри­сти­ан. Дом его был об­ра­щен в цер­ковь, по­лу­чив­шую на­зва­ние "Пас­тыр­ской". В ней, по пре­да­нию, свя­щен­но­дей­ство­вал сам свя­той апо­стол Петр.

Свя­той апо­стол Тро­фим про­ис­хо­дил из го­ро­да Едес­сы. Имя его упо­ми­на­ет­ся в Кни­ге Де­я­ний свя­тых апо­сто­лов (Деян.20:4) и во 2-м По­сла­нии апо­сто­ла Пав­ла к Ти­мо­фею (2Тим.4:20). Он был уче­ни­ком и спут­ни­ком свя­то­го апо­сто­ла Пав­ла, раз­де­ляя с ним все скор­би и го­не­ния.

Все три апо­сто­ла при­ня­ли му­че­ни­че­скую кон­чи­ну в Ри­ме при им­пе­ра­то­ре Нероне (54–68), од­новре­мен­но со свя­тым апо­сто­лом Пав­лом († ок. 67).

См. так­же: "Па­мять свя­тых апо­сто­лов Ари­стар­ха, Пу­да и Тро­фи­ма" в из­ло­же­нии свт. Ди­мит­рия Ро­стов­ско­го.

См. так­же: "Па­мять свя­тых Апо­сто­лов Мар­ка, Ари­стар­ха и Зи­ны" в из­ло­же­нии свт. Ди­мит­рия Ро­стов­ско­го.