Канон святым апостолам Иасону и Сосипатру

Припев: Святи́и апо́столи Иа́соне и Сосипа́тре, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 11 мая (28 апреля ст. ст.)

Глас 8.

Пе́снь 1.

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Со а́нгельскими живы́й ли́ки, и невече́рняго Све́та всегда́ исполня́емь, и прича́стием и́стинным обожа́емь, пребога́те, любо́вию пра́зднующия твою́ святу́ю па́мять просвети́, Го́сподеви пою́щия: сла́вно бо просла́вися.

Боже́ственное тя́ отню́д распали́, Иа́соне, жела́ние те́плое, те́мже после́довал еси́ о́гнь на зе́млю воврещи́ Прише́дшему, сла́вне, от Него́же просвеща́емь, све́тло взыва́л еси́: Го́сподеви пои́м, сла́вно бо просла́вися.

Умо́м невеще́ственным нра́вом подо́бяся, на земли́ на́с ра́ди ве́щию, блаже́нне, те́ла Я́вльшемуся ми́лостивно, преблаже́нне, служи́л еси́; служи́тель же Сего́ свяще́нен, зовы́й, бы́л еси́: Го́сподеви пои́м, сла́вно бо просла́вися.

Богоро́дичен: От Де́вы безму́жны ви́ден бы́сть, воплоща́емь за милосе́рдие мно́гое, Недоуме́нный, страстьми́ те́ла окая́нно пони́кших, возводя́ к безстра́стию я́ве стра́стию пло́ти Своея́, Ему́же обы́чно пои́м: сла́вно бо просла́вися.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Цевни́ца яви́лся еси́ Ду́ха, возглаша́я на́м уче́ния богокра́сная, отрева́я прелука́вая пе́ния.

Источи́ язы́к тво́й, я́коже река́, жи́зни исто́чники и го́рькия во́ды преле́стныя, изсуши́, сла́вне.

Исцеле́ния то́чат свяще́нныя твоя́, му́дре, мо́щи разли́чная, Ду́ха Свята́го де́йством и благода́тию.

Богоро́дичен: Умертви́, Пречи́стая, живопода́тельною мольбо́ю Твое́ю во мне́ живу́щий гре́х, Я́же Живо́т ро́ждшая.

Седа́лен:

Светосия́нными заря́ми слове́с честны́х, просвети́л еси́ все́х богоподо́бно, Иа́соне апо́столе, и тму́ отгна́л еси́, и, пострада́в, блаже́нне, источа́еши исцеле́ния, и теле́с уставля́еши лю́тыя боле́зни. Те́м, соше́дшеся, свято́е твое́ вси́ твори́м торжество́, Спа́са сла́вяще, и ве́рно вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Учени́к бы́в Па́влу, прему́дрому священнопропове́днику, подо́бник же Христу́, сла́вне, Того́ повину́яся боже́ственным манове́нием.

Черто́га оде́ждею укра́шен бы́л еси́ боже́ственныя Це́ркве, се́й Ду́хом, богоно́се, обручи́вся сла́дким сло́вом му́дрости твоея́.

Вра́ч преиску́сен злоотгони́тельными боже́ственными дла́ньми твои́ми неду́гующих бы́л еси́, исцеля́я стра́сти прелю́тыя.

Богоро́дичен: Неискусобра́чная Влады́чице, спаси́ мя, Спа́са Сло́ва ро́ждшая, и бе́д свободи́, и ве́чнующаго осужде́ния.

Пе́снь 5.

Ирмо́с: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.

Содержи́мыя ле́стию и па́губе безу́мно рабо́тающия челове́ки, преблаже́нне, боже́ственными уче́нии свободи́л еси́.

Я́коже не́кое свети́ло, на высоте́ богоразу́мия, Иа́соне предлежа́, привле́кл еси́ ко приста́нищу боже́ственному лю́те потопля́емыя.

Умерщвле́нныя дре́вле су́щия змии́ным угрызе́нием, живото́чным твои́м сло́вом, блаже́нне, удиви́в, оживи́л еси́.

Богоро́дичен: Святе́йши яви́лася еси́ херуви́м, на земли́ вопло́щши все́х Влады́ку, Чи́стая Всенепоро́чная Влады́чице.

Пе́снь 6.

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Преуди́влься добро́те за милосе́рдие на́м Прибли́жшагося, Иа́соне апо́столе, сему́ после́довал еси́ и оста́вил еси́ жите́йскую красоту́.

Научи́вся боже́ственным, научи́л еси́ благода́тию, сла́вне, Тро́ическому сия́нию дре́вле слепоту́ обнося́щия неразу́мия безу́мие.

Неду́ги отгоня́ разли́чныя и прогоня́ зло́бныя ду́хи, лю́ди к позна́нию Госпо́дню обрати́л еси́, изба́вль от пре́лести лука́ваго.

Богоро́дичен: Я́ко до́ждь на руно́, спаси́тельное Сло́во в ложесна́ Твоя́ сни́де, и Челове́к из Тебе́ бы́сть, спаса́я мя́, Отрокови́це, хода́тайством Твои́м.

Конда́к:

Яви́стеся, я́ко зве́зды пресве́тлыя, просвеща́юще всю́ вселе́нную све́том пропове́дания, апо́столи боже́ственнии Иа́соне и Сосипа́тре, спаса́йте ве́рою чту́щих ва́с.

Пе́снь 7.

Ирмо́с: О́троцы благочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Боле́знем приближа́яся непреста́нным, боле́зни, Иа́соне, облегчи́л еси́ ве́рным и к неболе́зненному прия́тию наста́вил еси́ благоче́стно воспева́ющия: благослове́н Бо́г оте́ц на́ших.

Тле́ние уста́вил еси́ зло́бы, блаже́нне, и ра́зум насади́л еси́ спаси́тельный в мы́сли челове́ческия, и́мже просвеща́емь, Влады́це все́х взыва́л еси́: благослове́н Бо́г оте́ц на́ших.

Богоро́дичен: Нося́щи Христа́ на руку́, я́ко престо́л огнезра́чен, Всенепоро́чная, моли́ Его́, я́ко Сы́на Твоего́ и Го́спода, умири́ти ми́р, зову́щи: благослове́н Бо́г оте́ц на́ших.

Пе́снь 8.

Ирмо́с: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Искорени́л еси́ те́рние злохуле́ния се́менем Сло́ва, Иа́соне: стори́чествующий кла́с, спа́сшихся мно́жество, возде́лал еси́.

Просвеще́ние су́щих во тме́ тя́ свети́льника Та́рсу поставля́ет, блаже́нне, и́же сего́ престо́л стро́яща свяще́нно и преподо́бно, Иа́соне апо́столе.

Зако́нен бы́л еси́ учи́тель су́етней повину́вшимся ле́сти Еди́наго Бо́га чести́ несозда́ннаго, и́же тва́рем че́сти принося́щия спа́сл еси́.

Богоро́дичен: Воплоще́нна ро́ждши Бо́га Сло́ва, пло́ти на́шея стра́сти и душе́вныя, Отрокови́це, исцели́, да ве́рою Тя́ вси́ и любо́вию сла́вим.

Пе́снь 9.

Ирмо́с: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́: те́м Тя́, Богоро́дице, непреста́нно велича́ем.

Свяще́нныя соста́вим вси́ ли́ки, свяще́нно блажа́ще Иа́сона, вели́каго Христо́ва апо́стола, с ли́ки безпло́тными всегда́ веселя́щася.

Игра́ет тва́рь, лику́ющи ны́не в честне́м торжестве́ твое́м, сла́вне, апо́столи, проро́цы и вси́ му́ченицы ра́дуются, Иа́соне: с ни́миже тя́ ве́рою велича́ем.

Ра́ка, иде́же лежи́т терпели́вое и многострада́льное те́ло твое́, сла́вне Иа́соне, зари́ испуща́ет всегда́ и тму́ боле́зней разоря́ет, преблаже́нне.

Богоро́дичен: Я́вльшися Ма́ти Всенепоро́чная Емману́ила, воплоще́ннаго из ложе́сн Твои́х, обожи́вшаго естество́ челове́ческое, те́мже Тя́, Пресвята́я Богороди́тельнице, ублажа́ем.

Пѣ́снь а҃.

І҆рмо́съ: Посѣ́ченый несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль: пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Со а҆́гг҃льскими живы́й ли́ки, и҆ невече́рнѧгѡ свѣ́та всегда̀ и҆сполнѧ́емь, и҆ прича́стїемъ и҆́стиннымъ ѡ҆божа́емь, пребога́те, любо́вїю пра́зднꙋющыѧ твою̀ свѧтꙋ́ю па́мѧть просвѣтѝ, гдⷭ҇еви пою́щыѧ: сла́внѡ бо просла́висѧ.

Бжⷭ҇твенное тѧ̀ ѿню́дъ распалѝ, і҆а́сѡне, жела́нїе те́плое: тѣ́мже послѣ́довалъ є҆сѝ ѻ҆́гнь на зе́млю воврещѝ прише́дшемꙋ, сла́вне, ѿ негѡ́же просвѣща́емь, свѣ́тлѡ взыва́лъ є҆сѝ: гдⷭ҇еви пои́мъ, сла́внѡ бо просла́висѧ.

Оу҆мѡ́мъ невеще́ствєннымъ нра́вомъ подо́бѧсѧ, на землѝ на́съ ра́ди ве́щїю, бл҃же́нне, тѣ́ла ꙗ҆́вльшемꙋсѧ ми́лостивнѡ, пребл҃же́нне, слꙋжи́лъ є҆сѝ: слꙋжи́тель же сегѡ̀ свѧще́ненъ, зовы́й, бы́лъ є҆сѝ: гдⷭ҇еви пои́мъ, сла́внѡ бо просла́висѧ.

Бг҃оро́диченъ: Ѿ дв҃ы безмꙋ́жны ви́дѣнъ бы́сть воплоща́емь, за милосе́рдїе мно́гое, недоꙋмѣ́нный, страстьмѝ тѣ́ла ѻ҆каѧ́ннѡ пони́кшихъ, возводѧ̀ къ безстра́стїю ꙗ҆́вѣ, стра́стїю пло́ти своеѧ̀. є҆мꙋ́же ѻ҆бы́чнѡ пои́мъ: сла́внѡ бо просла́висѧ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Цѣвни́ца ꙗ҆ви́лсѧ є҆сѝ дх҃а, возглаша́ѧ на́мъ ᲂу҆чє́нїѧ бг҃окра̑снаѧ, ѿрѣва́ѧ прелꙋка̑ваѧ пѣ̑нїѧ.

И҆сточѝ ѧ҆зы́къ тво́й, ꙗ҆́коже рѣка̀, жи́зни и҆сто́чники, и҆ гѡ́рькїѧ во́ды прелє́стныѧ и҆зсꙋшѝ, сла́вне.

И҆сцѣлє́нїѧ то́чатъ свѧщє́нныѧ твоѧ̑, мꙋ́дре, мо́щы разли̑чнаѧ, дх҃а ст҃а́гѡ дѣ́йствомъ и҆ бл҃года́тїю.

Бг҃оро́диченъ: Оу҆мертвѝ, пречⷭ҇таѧ, живопода́тельною мольбо́ю твое́ю во мнѣ̀ живꙋ́щїй грѣ́хъ, ꙗ҆́же живо́тъ ро́ждшаѧ.

Сѣда́ленъ:

Свѣтосїѧ́нными зарѧ́ми слове́съ чⷭ҇тны́хъ, просвѣти́лъ є҆сѝ всѣ́хъ бг҃оподо́бнѡ, і҆а́сѡне а҆пⷭ҇ле, и҆ тмꙋ̀ ѿгна́лъ є҆сѝ: и҆ пострада́въ, бл҃же́нне, и҆сточа́еши и҆сцѣлє́нїѧ, и҆ тѣле́съ ᲂу҆ставлѧ́еши лю̑тыѧ болѣ̑зни. тѣ́мъ соше́дшесѧ свѧто́е твоѐ всѝ твори́мъ торжество̀, сп҃са сла́вѧще, и҆ вѣ́рнѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Оу҆чени́къ бы́въ па́ѵлꙋ премꙋ́дромꙋ свѧщеннопроповѣ́дникꙋ, подо́бникъ же хрⷭ҇тꙋ̀, сла́вне, тогѡ̀ повинꙋ́ѧсѧ бжⷭ҇твєннымъ манове́нїємъ.

Черто́га ѻ҆де́ждею ᲂу҆кра́шенъ бы́лъ є҆сѝ бжⷭ҇твенныѧ цр҃кве, се́й дх҃омъ, бг҃оно́се, ѡ҆брꙋчи́всѧ, сла́дкимъ сло́вомъ мꙋ́дрости твоеѧ̀.

Вра́чь преискꙋ́сенъ, ѕлоѿгони́тельными бжⷭ҇твенными дла́ньми твои́ми, недꙋ́гꙋющихъ бы́лъ є҆сѝ, и҆сцѣлѧ́ѧ стра̑сти прелю̑тыѧ.

Бг҃оро́диченъ: Неискꙋсобра́чнаѧ влⷣчце, спаси́ мѧ, сп҃са сло́ва ро́ждшаѧ, и҆ бѣ́дъ свободѝ, и҆ вѣ́чнꙋющагѡ ѡ҆сꙋжде́нїѧ.

Пѣ́снь є҃.

І҆рмо́съ: Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀, гдⷭ҇и, преднаставлѧ́ѧ мѧ̀, на стезю̀ за́повѣдей твои́хъ, напра́ви.

Содержи̑мыѧ ле́стїю, и҆ па́гꙋбѣ безꙋ́мнѡ рабо́тающыѧ человѣ́ки, пребл҃же́нне, бжⷭ҇твенными ᲂу҆чє́нїи свободи́лъ є҆сѝ.

Ꙗ҆́коже нѣ́кое свѣти́ло на высотѣ̀ бг҃оразꙋ́мїѧ, і҆а́сѡне, предлежѧ̀, привле́клъ є҆сѝ ко приста́нищꙋ бжⷭ҇твенномꙋ, лю́тѣ потоплѧ́ємыѧ.

Оу҆мерщвлє́нныѧ дре́вле сꙋ́щыѧ ѕмїи́нымъ ᲂу҆грызе́нїемъ, живото́чнымъ твои́мъ сло́вомъ, бл҃же́нне, ᲂу҆диви́въ, ѡ҆живи́лъ є҆сѝ.

Бг҃оро́диченъ: Свѧтѣ́йши ꙗ҆ви́ласѧ є҆сѝ херꙋві̑мъ, на землѝ вопло́щши всѣ́хъ влⷣкꙋ, чⷭ҇таѧ всенепоро́чнаѧ влⷣчце.

Пѣ́снь ѕ҃.

І҆рмо́съ: Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́сѧ.

Преꙋди́вльсѧ добро́тѣ, за милосе́рдїе на́мъ прибли́жшагѡсѧ, і҆а́сѡне а҆пⷭ҇ле, семꙋ̀ послѣ́довалъ є҆сѝ, и҆ ѡ҆ста́вилъ є҆сѝ жите́йскꙋю красотꙋ̀.

Наꙋчи́всѧ бжⷭ҇твєннымъ, наꙋчи́лъ є҆сѝ бл҃года́тїю, сла́вне, трⷪ҇ческомꙋ сїѧ́нїю, дре́вле слѣпотꙋ̀ ѡ҆бносѧ́щыѧ неразꙋ́мїѧ безꙋ́мїе.

Недꙋ́ги ѿгонѧ̀ разли̑чныѧ, и҆ прогонѧ̀ ѕлѡ́бныѧ дꙋ́хи, лю́ди къ позна́нїю гдⷭ҇ню ѡ҆брати́лъ є҆сѝ, и҆зба́вль ѿ пре́лести лꙋка́вагѡ.

Бг҃оро́диченъ: Ꙗ҆́кѡ до́ждь на рꙋно̀, спаси́тельное сло́во въ ложесна̀ твоѧ̑ сни́де, и҆ чл҃вѣ́къ и҆зъ тебє̀ бы́сть, спаса́ѧ мѧ̀, ѻ҆трокови́це, хода́тайствомъ твои́мъ.

Конда́къ:

Ꙗ҆ви́стесѧ ꙗ҆́кѡ ѕвѣ́зды пресвѣ̑тлыѧ, просвѣща́юще всю̀ вселе́ннꙋю свѣ́томъ проповѣ́данїѧ, а҆пⷭ҇ли бжⷭ҇твеннїи, і҆а́сѡне и҆ сѡсїпа́тре: спаса́йте вѣ́рою чтꙋ́щихъ ва́съ.

Пѣ́снь з҃.

І҆рмо́съ: Ѻ҆́троцы бл҃гочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.

Болѣ́знемъ приближа́ѧсѧ непреста̑ннымъ, болѣ̑зни, і҆а́сѡне, ѡ҆блегчи́лъ є҆сѝ вѣ̑рнымъ, и҆ къ неболѣ́зненномꙋ прїѧ́тїю наста́вилъ є҆сѝ, бл҃гоче́стнѡ воспѣва́ющыѧ: бл҃гослове́нъ бг҃ъ ѻ҆тє́цъ на́шихъ.

Тлѣ́нїе ᲂу҆ста́вилъ є҆сѝ ѕло́бы, бл҃же́нне, и҆ ра́зꙋмъ насади́лъ є҆сѝ спаси́тельный въ мы̑сли человѣ́чєскїѧ, и҆́мже просвѣща́емь, влⷣцѣ всѣ́хъ взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Носѧ́щи хрⷭ҇та̀ на рꙋкꙋ̀, ꙗ҆́кѡ прⷭ҇то́лъ ѻ҆гнезра́ченъ, всенепоро́чнаѧ, молѝ є҆го̀ ꙗ҆́кѡ сн҃а твоего̀ и҆ гдⷭ҇а, ᲂу҆мири́ти мі́ръ зовꙋ́щи: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.

И҆скорени́лъ є҆сѝ те́рнїе ѕлохꙋле́нїѧ сѣ́менемъ сло́ва, і҆а́сѡне: стори́чествꙋющихъ кла́съ спа́сшихсѧ мно́жество воздѣ́лалъ є҆сѝ.

Просвѣще́нїе сꙋ́щихъ во тмѣ́ тѧ свѣти́льника та́рсꙋ поставлѧ́етъ, блаже́нне, и҆́же сегѡ̀ престо́лъ стро́ѧща, свѧще́ннѡ и҆ преподо́бнѡ, і҆а́сѡне а҆пⷭ҇ле.

Зако́ненъ бы́лъ є҆сѝ ᲂу҆чи́тель, сꙋ́етнѣй повинꙋ́вшымсѧ ле́сти, є҆ди́наго бг҃а честѝ несозда́ннаго, и҆̀же тва́ремъ чє́сти приносѧ́щыѧ спа́слъ є҆сѝ.

Бг҃оро́диченъ: Воплоще́нна ро́ждши бг҃а сло́ва, пло́ти на́шеѧ стра̑сти и҆ дꙋшє́вныѧ, ѻ҆трокови́це, и҆сцѣлѝ, да вѣ́рою тѧ̀ всѝ и҆ любо́вїю сла́вимъ.

Пѣ́снь ѳ҃.

І҆рмо́съ: Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь спасе́нїѧ мі́рови была̀ є҆сѝ: тѣ́мъ тѧ̀, бцⷣе, непреста́ннѡ велича́емъ.

Свѧщє́нныѧ соста́вимъ всѝ ли́ки, свѧще́ннѡ блажа́ще і҆а́сѡна, вели́каго хрⷭ҇то́ва а҆пⷭ҇тола, съ ли́ки безпло́тными всегда̀ веселѧ́щасѧ.

И҆гра́етъ тва́рь ликꙋ́ющи ны́нѣ въ честнѣ́мъ торжествѣ̀ твое́мъ, сла́вне, а҆пⷭ҇ли, прⷪ҇ро́цы и҆ всѝ мч҃ницы ра́дꙋютсѧ, і҆а́сѡне: съ ни́миже тѧ̀ вѣ́рою велича́емъ.

Ра́ка, и҆дѣ́же лежи́тъ терпѣли́вое и҆ многострада́льное тѣ́ло твоѐ, сла́вне і҆а́сѡне, зари̑ и҆спꙋща́етъ всегда̀, и҆ тмꙋ̀ болѣ́зней разорѧ́етъ, пребл҃же́нне.

Бг҃оро́диченъ: Ꙗ҆́вльшисѧ мт҃и всенепоро́чнаѧ є҆мманꙋ́ила, воплоще́ннагѡ и҆зъ ложе́снъ твои́хъ, ѡ҆божи́вшагѡ є҆стество̀ человѣ́ческое. тѣ́мже тѧ̀, прест҃а́ѧ бг҃ороди́тельнице, ᲂу҆блажа́емъ.

Жизнь и труды апостолов – Святой апостол Иасон

Апостолы от 70-ти Иасон и Сосипатр, мученица Керкира дева и иные многие

Апо­стол Иа­сон про­ис­хо­дил из Тар­са (Ма­лая Азия). Он был пер­вым хри­сти­а­ни­ном в го­ро­де. Апо­стол Со­си­патр был ро­дом из Аха­ии. Оба они ста­ли уче­ни­ка­ми апо­сто­ла Пав­ла, ко­то­рый да­же на­звал их сво­и­ми "срод­ни­ка­ми" (Рим.16,21). Свя­той Иа­сон был по­став­лен епи­ско­пом в род­ном го­ро­де Тар­се, а свя­той Со­си­патр – в Ико­нии. С еван­гель­ской про­по­ве­дью они от­пра­ви­лись на за­пад и в 63 го­ду до­стиг­ли ост­ро­ва Кер­ки­ры в Иони­че­ском мо­ре близ Гре­ции.

Там они по­стро­и­ли цер­ковь во имя пер­во­му­че­ни­ка Сте­фа­на и мно­гих кре­сти­ли. Пра­ви­тель ост­ро­ва узнал об этом и за­клю­чил их в тем­ни­цу, где си­де­ли семь раз­бой­ни­ков: Са­тор­ний, Иа­кис­хол, Фав­сти­ан, Иан­ну­а­рий, Мар­са­лий, Ев­фра­сий и Мам­мий. Апо­сто­лы об­ра­ти­ли их ко Хри­сту. За ис­по­ве­да­ние Хри­ста семь уз­ни­ков му­че­ни­че­ски скон­ча­лись в кот­ле с рас­топ­лен­ной смо­лой, се­рой и вос­ком.

Тю­рем­ный сто­рож, ви­дя их му­че­ни­че­ский по­двиг, объ­явил се­бя хри­сти­а­ни­ном. За это ему от­ру­би­ли ле­вую ру­ку, по­том обе но­ги и за­тем го­ло­ву. Апо­сто­лов Иа­со­на и Со­си­па­тра пра­ви­тель при­ка­зал бить кну­том и сно­ва за­клю­чить в тюрь­му.

Ко­гда дочь пра­ви­те­ля, де­ви­ца Кер­ки­ра, узна­ла, как му­че­ни­ки стра­да­ют за Хри­ста, она объ­яви­ла се­бя хри­сти­ан­кой и раз­да­ла все свои укра­ше­ния ни­щим. Взбе­шен­ный пра­ви­тель пы­тал­ся уго­во­рить дочь от­речь­ся от Хри­ста, но свя­тая Кер­ки­ра твер­до сто­я­ла и про­тив уго­во­ров, и про­тив угроз. То­гда озлоб­лен­ный отец при­ду­мал ужас­ное на­ка­за­ние до­че­ри: он при­ка­зал по­ме­стить ее в от­дель­ной тем­ни­це и впу­стить к ней раз­бой­ни­ка и блуд­ни­ка Му­ри­на, чтобы тот обес­че­стил неве­сту Хри­сто­ву.

Но ко­гда раз­бой­ник по­до­шел к две­ри тюрь­мы, на него на­пал мед­ведь. Свя­тая Кер­ки­ра услы­ша­ла шум и име­нем Хри­сто­вым ото­гна­ла зве­ря, а за­тем мо­лит­вой ис­це­ли­ла ра­ны Му­ри­на. По­сле это­го свя­тая Кер­ки­ра про­све­ти­ла его Хри­сто­вой ве­рой, свя­той Му­рин объ­явил се­бя хри­сти­а­ни­ном и тут же был каз­нен.

Пра­ви­тель при­ка­зал под­жечь тюрь­му, но свя­тая де­ви­ца оста­лась жи­ва. То­гда по при­ка­зу злоб­ству­ю­ще­го от­ца она бы­ла по­ве­ше­на на де­ре­во, уду­ше­на ед­ким ды­мом и рас­стре­ля­на стре­ла­ми. По­сле ее кон­чи­ны пра­ви­тель ре­шил каз­нить всех хри­сти­ан на ост­ро­ве Кер­ки­ре. Му­че­ни­ки Зи­нон, Ев­се­вий, Неон и Ви­та­лий, про­све­щен­ные апо­сто­ла­ми Иа­со­ном и Со­си­па­тром, бы­ли со­жже­ны.

Жи­те­ли Кер­ки­ры, спа­са­ясь от го­не­ния, пе­ре­пра­ви­лись на со­сед­ний ост­ров. Пра­ви­тель с от­ря­дом во­и­нов по­плыл, но был по­гло­щен вол­на­ми. Сме­нив­ший его пра­ви­тель при­ка­зал бро­сить апо­сто­лов Иа­со­на и Со­си­па­тра в ко­тел с ки­пя­щей смо­лой, но ко­гда уви­дел их невре­ди­мы­ми, со сле­за­ми вос­клик­нул: "Бо­же Иа­со­нов и Со­си­па­тров, по­ми­луй ме­ня!"

Осво­бож­ден­ные апо­сто­лы кре­сти­ли пра­ви­те­ля и да­ли ему имя Се­ва­сти­ан. С его по­мо­щью апо­сто­лы Иа­сон и Со­си­патр по­стро­и­ли на ост­ро­ве несколь­ко церк­вей и, до­жив там до глу­бо­кой ста­ро­сти, сво­ей го­ря­чей про­по­ве­дью при­умно­жи­ли ста­до Хри­сто­во.

См. так­же: "Па­мять свя­тых апо­сто­лов Иа­со­на и Со­си­па­тра и свя­той му­че­ни­цы Кер­ки­ры де­вы" в из­ло­же­нии свт. Ди­мит­рия Ро­стов­ско­го.