Канон святым мученикам Терентию, Публию, Африкану и прочим

Припев: Святи́и му́ченицы, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 23 апреля (10 апреля ст. ст.); 10 ноября (28 октября ст. ст.)

Глас 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Мно́жество страда́лец сла́вных, Христа́ умоли́те, мно́жество иму́щаго щедро́т, мно́жества ума́лити зо́л мои́х, я́ко да восхваля́ю ва́ше торжество́.

Служа́ще живо́му и и́стинному Бо́гу, страстоно́сцы, безду́шным че́сти бого́м ника́коже принесо́сте и жива́я Жизнода́вцу же́ртва принесо́стеся.

Пропове́даша безбо́жнии повеле́ние богоме́рзкое, и посреди́ суди́ща четы́редесять страда́лец пропове́даша Сло́во воплоще́нное, безслове́сия ми́р изба́вльшее.

Богоро́дичен: Пою́ Тя́, Де́во, я́ко Бо́га, Всепе́тая, воплоти́ла еси́ еди́на от Твои́х честны́х крове́й, Пресвята́я, и па́че сло́ва стра́шно породила́ еси́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Усты́ пропове́даша свяще́нными свои́ми Го́спода страда́льцы пред мучи́тели, стра́ждуще терпели́вно.

На у́ды ссещи́ся за Христа́ я́ве преда́шася страда́льцы, стра́стию разжже́нием Того́ возлюби́вше.

Разреши́ша соу́з суеты́ свя́заннии за Христа́, и́же с боже́ственным бы́вше Тере́нтием.

Богоро́дичен: Спаси́ мя, ро́ждшая Преблага́го Го́спода Ма́ти Чи́стая, утиши́ души́ моея́ многомяте́жную бу́рю.

Седа́лен, гла́с 4.

Четы́редесять Христо́вы страстоте́рпцы, си́лою Христо́вою вооруже́ни, бесо́вския полки́ низложи́вше ве́рою, уме́рше же, к безсме́ртному концу́, ра́дующеся, преидо́ша и на́м испроша́ют прегреше́ний оставле́ние, при́сно творя́щим те́х торжество́.

Сла́ва, и ны́не, богоро́дичен: Грехолюби́в сы́й, молю́ Тя, Безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити: гре́шным бо Ты́ еси́ очище́ние, и спасе́ние ве́рных, и заступле́ние.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя, Долготерпели́ве.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Украси́стеся, му́ченицы, вдая́нием боле́зней, сия́юще па́че сапфи́ра и зла́та тве́рдых подвиго́в показа́ньми.

Живоно́сное де́йство от Живонача́льныя Тро́ицы прие́мше, вся́ку боле́знь, вся́ку ме́ртвость ду́ш и теле́с отго́ните.

Не отве́ржемся Го́спода и де́моном безу́мным не пожре́м, — богому́дрии вопия́ху, истязу́еми боле́зньми и му́ками.

Богоро́дичен: Тя́, Всенепоро́чная Влады́чице, напа́стьми обстои́мь, на по́мощь призыва́ю: ускори́ и спаси́ мя, Я́же Спа́са Сло́ва ро́ждшая.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Низложи́сте пре́лести тве́рдость, страстоте́рпцы, растерза́ньми терпе́ния, всехва́льнии.

Крове́й тече́ньми изсуши́вше пре́лести глубину́, блаже́ннии, вся́ку ду́шу напои́сте.

Па́жить многоцве́тна показа́стеся, благово́ние Свята́го Ду́ха, боже́ственнии, испуща́юще, му́ченицы.

Богоро́дичен: Избавля́я, яви́ся, Пречи́стая, Сы́н Тво́й, ро́д челове́ческий, из Тебе́ ро́ждься Человеколю́бец.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Кре́постию Твое́ю, Иису́се, утвержде́ни, низложи́ша вра́жию си́лу и си́льни яви́шася вои́стинну, не́мощию плотско́ю бра́вшеся и пове́ргше кре́пкаго, честни́и и добропобе́днии му́ченицы.

Победи́в многообра́знаго зми́я, и сего́ нога́ми твои́ми сокруши́л еси́ я́ко вои́стинну главу́, победоно́сен на ве́рх тво́й вене́ц прия́л еси́, Тере́нтие, му́чениче Христо́в, святы́х а́нгел соприча́стниче.

Цельбы́ ра́ка му́ченик источа́ет, и стра́сти очища́ет, и ду́ш омыва́ет скве́рну, и де́монов погружа́ет полки́, все́х же благочести́вых сердца́ напая́ет благода́тию.

Богоро́дичен: Присе́нну прозря́ше Тя́ го́ру проро́к Авваку́м, Богоро́дице, из нея́же Бо́г па́че сло́ва про́йде, воплоща́емь, и ми́р спасе́, бу́рею лю́таго греха́ тя́жко одержи́мый.

Конда́к, гла́с 2.

Му́ченическая честна́я па́мять прии́де дне́сь, веселя́щи вся́ческая, Тере́нтия прему́драго и дружи́ны его́. Те́пле у́бо стеце́мся, да прии́мем исцеле́ния, си́и бо благода́ть от Бо́га прия́ша Ду́ха Свята́го исцеля́ти неду́ги ду́ш на́ших.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

У́ши, благопослушли́вы к боже́ственному исполне́нию, боже́ственная повеле́ния стяжа́вше, му́дрии, поя́сте преусе́рдно: благослове́н еси́, Го́споди Бо́же, во ве́ки.

Зако́ны боже́ственныя, страстоте́рпцы, противоположи́сте повеле́нием беззако́нных, веля́щих Христа́ отврещи́ся, Ему́же вопие́м: благослове́н еси́, Го́споди Бо́же, во ве́ки.

Удеса́ ка́знем отда́вше, отверго́стеся те́ла любве́ ра́ди Я́вльшагося на земли́ и пло́ть взе́мша, Ему́же песнопое́те, му́ченицы: Бо́же, благослове́н еси́.

Богоро́дичен: Истле́вшия дре́вле родонача́льники преступле́нием безме́стнаго согреше́ния, во утро́бе Христа́ неизрече́нно заче́нши, исправля́еши, Пренепоро́чная, Плодо́м чре́ва Твоего́.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

На суди́щи мучи́тельстем, богому́дрый Тере́нтий и Африка́н, Макси́м же и Помпии́й, Алекса́ндр, и Зифо́н, и сла́вный Фео́дор, вку́пе трегу́бицею спострада́вшая десяти́ца и трегу́бица еди́ницы, Спа́са все́х Христа́ испове́давше, до́блественно пострада́ша.

За Христа́ му́чими, и волу́ями жи́лами бие́ми, и неми́лостивно страда́льцы стру́жеми, трезу́бцы сре́чеми, и звере́м поверга́еми, и разжже́нными рожны́ в ре́бра опаля́еми, вопия́ху: свяще́нницы, благослови́те, лю́дие, превозноси́те Его́ во ве́ки.

Глаго́л жи́зни нося́ще, добропобе́днии му́ченицы умерщвле́нныя в пре́лести спасо́ша, враги́ умори́ша и, Христо́ву сме́рть и светоза́рныя изобража́юще стра́сти, му́ками многообра́зными блаже́нную кончи́ну прия́ша, пою́ще Его́ во вся́ ве́ки.

Богоро́дичен: Умерщвле́нную оживи́, па́дшую возста́ви, уя́звенную ду́шу мою́ исцели́ копие́м, Всенепоро́чная, пробо́дшим Боже́ственная ре́бра из утро́бы Твоея́ вопло́щшагося Спа́са, Его́же о́троцы благословя́т, свяще́нницы пою́т, лю́дие превозно́сят во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Целе́ние то́чит ра́ка му́ченик, от исто́чника Боже́ственнаго Ду́ха напая́ема при́сно. Преусе́рдно, прииди́те, почерпе́м, те́ло, се́рдце и ду́шу освяща́юще и Спа́са Христа́ велича́юще ве́рно, мучениколю́бцы.

Я́ко цве́ти боже́ственнаго села́, я́коже шипцы́ та́йнии, процвето́сте и благово́ния честна́го Це́рковь напо́лнисте, пре́лесть злосмра́дную вра́жию дале́че отгна́вше Боже́ственною благода́тию, му́ченицы Христо́вы четы́редесяте.

Дне́сь Макси́ма, ве́рнии, и Алекса́ндра вку́пе, и Фео́дора, Зифо́на и Помпии́я, Африка́на же и Тере́нтия с про́чими страда́льцы ве́рно восхва́лим и ублажи́м, воспева́юще те́х по́двиги.

Земля́ у́бо кро́вь ва́шу и телеса́ пострада́вшая в себе́ прия́т, не́бо же — боже́ственныя ду́хи, а́нгельская во́инства, че́стно собра́вшеся в побе́де, му́дрии, и Христо́с я́ко победи́тели венча́.

Богоро́дичен: Просвети́, две́ре све́та, ду́шу мою́, лю́тыми помраче́нную преступле́ньми, омраче́нную и бе́дствующую, и дне́ прича́стника Боже́ственнаго покажи́, я́ко да сла́влю Тя́, Предста́тельницу ве́рных непосты́дную.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Мно́жество страда́лєцъ сла́вныхъ, хрⷭ҇та̀ ᲂу҆моли́те, мно́жество и҆мꙋ́щаго щедро́тъ, мно́жєства ᲂу҆ма́лити ѕѡ́лъ мои́хъ, ꙗ҆́кѡ да восхвалѧ́ю ва́ше торжество̀.

Слꙋжа́ще живо́мꙋ и҆ и҆́стинномꙋ бг҃ꙋ, страстоно́сцы, бездꙋ́шнымъ че́сти богѡ́мъ ника́коже принесо́сте, и҆ жива́ѧ жизнода́вцꙋ же́ртва принесо́стесѧ.

Проповѣ́даша безбо́жнїи повелѣ́нїе богоме́рзское, и҆ посредѝ сꙋди́ща четы́редесѧть страда́лєцъ проповѣ́даша сло́во воплоще́нное, безслове́сїѧ мі́ръ и҆зба́вльшее.

Бг҃оро́диченъ: Пою́ тѧ, дв҃о, ꙗ҆́кѡ бг҃а, всепѣ́таѧ, воплоти́ла є҆сѝ є҆ди́на ѿ твои́хъ чⷭ҇тны́хъ крове́й, прест҃а́ѧ, и҆ па́че сло́ва стра́шнѡ породила̀ є҆сѝ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Оу҆сты̀ проповѣ́даша свѧще́нными свои́ми гдⷭ҇а страда́льцы предъ мꙋчи́тєли, стра́ждꙋще терпѣли́внѡ.

На ᲂу҆́ды ссѣщи́сѧ за хрⷭ҇та̀ ꙗ҆́вѣ преда́шасѧ страда́льцы, стра́стїю разжже́нїемъ того̀ возлюби́вше.

Разрѣши́ша соꙋ́зъ сꙋеты̀ свѧ́заннїи за хрⷭ҇та̀, и҆̀же съ бжⷭ҇твеннымъ бы́вше тере́нтїемъ.

Бг҃оро́диченъ: Спаси́ мѧ, ро́ждшаѧ пребл҃га́го гдⷭ҇а, мт҃и чⷭ҇таѧ, ᲂу҆тишѝ дꙋшѝ моеѧ̀ многомѧте́жнꙋю бꙋ́рю.

Сѣда́ленъ, гла́съ д҃.

Четы́редесѧть хрⷭ҇тѡ́вы страстоте́рпцы си́лою хрⷭ҇то́вою воѡрꙋже́ни, бѣсѡ́вскїѧ полкѝ низложи́вше вѣ́рою, ᲂу҆ме́рше же къ безсме́ртномꙋ концꙋ̀ ра́дꙋющесѧ преидо́ша, и҆ на́мъ и҆спроша́ютъ прегрѣше́нїй ѡ҆ставле́нїе, при́снѡ творѧ́щымъ тѣ́хъ торжество̀.

Сла́ва, и҆ ны́нѣ, бг҃оро́диченъ: Грѣхолюби́въ сы́й, молю́ тѧ, безгрѣ́шнаго бг҃а ро́ждшꙋю, взе́млющаго грѣхѝ мі́ра, пречⷭ҇таѧ, многогрѣ́шнꙋю дꙋ́шꙋ мою̀ ᲂу҆ще́дрити, и҆ грѣхѝ моѧ̑ мнѡ́гїѧ ѡ҆чи́стити: грѣ̑шнымъ бо ты̀ є҆сѝ ѡ҆чище́нїе и҆ спасе́нїе вѣ́рныхъ, и҆ застꙋпле́нїе.

Крⷭ҇тобг҃оро́диченъ: И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бжⷭ҇тво̀.

Оу҆краси́стесѧ мч҃ницы вдаѧ́нїемъ болѣ́зней, сїѧ́юще па́че сапфі́ра и҆ зла́та, тве́рдыхъ подвигѡ́въ показа́ньми.

Живоно́сное дѣ́йство ѿ живонача́льныѧ трⷪ҇цы прїе́мше, всѧ́кꙋ болѣ́знь, всѧ́кꙋ ме́ртвость дꙋ́шъ и҆ тѣле́съ ѿго́ните.

Не ѿве́ржемсѧ гдⷭ҇а, и҆ де́мѡнѡмъ безꙋ̑мнымъ не пожре́мъ, бг҃омꙋ́дрїи вопїѧ́хꙋ, и҆стѧзꙋ́емїи болѣ́зньми и҆ мꙋ́ками.

Бг҃оро́диченъ: Тѧ̀, всенепоро́чнаѧ влⷣчце, напа́стьми ѡ҆бстои́мь, на по́мощь призыва́ю: ᲂу҆скорѝ и҆ спаси́ мѧ, ꙗ҆́же сп҃са сло́ва ро́ждшаѧ.

Пѣ́снь є҃.

І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебє̀ и҆но́гѡ не вѣ́мы.

Низложи́сте пре́лести тве́рдость, страстоте́рпцы, растерза́ньми терпѣ́нїѧ, всехва́льнїи.

Крове́й тече́ньми и҆зсꙋши́вше пре́лести глꙋбинꙋ̀, бл҃же́ннїи, всѧ́кꙋ дꙋ́шꙋ напои́сте.

Па́жить многоцвѣ́тна показа́стесѧ, бл҃гово́нїе ст҃а́гѡ дх҃а бжⷭ҇твеннїи и҆спꙋща́юще, мч҃ницы.

Бг҃оро́диченъ: И҆збавлѧ́ѧ ꙗ҆ви́сѧ, пречⷭ҇таѧ, сн҃ъ тво́й, ро́дъ человѣ́ческїй, и҆зъ тебє̀ ро́ждсѧ чл҃вѣколю́бецъ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Крѣ́постїю твое́ю, і҆и҃се, ᲂу҆твержде́ни, низложи́ша вра́жїю си́лꙋ, и҆ си́льни ꙗ҆ви́шасѧ вои́стиннꙋ, не́мощїю плотско́ю бра́вшесѧ, и҆ пове́ргше крѣ́пкаго, честні́и и҆ добропобѣ́днїи мч҃ницы.

Побѣди́въ многоѻбра́знаго ѕмі́а, и҆ сегѡ̀ нога́ми твои́ми сокрꙋши́лъ є҆сѝ ꙗ҆́кѡ вои́стиннꙋ главꙋ̀: побѣдоно́сенъ на ве́рхъ тво́й вѣне́цъ прїѧ́лъ є҆сѝ, тере́нтїе мч҃ниче хрⷭ҇то́въ, ст҃ы́хъ а҆́гг҃лъ соприча́стниче.

Цѣлбы̑ ра́ка мч҃никъ и҆сточа́етъ, и҆ стра̑сти ѡ҆чища́етъ, и҆ дꙋ́шъ ѡ҆мыва́етъ скве́рнꙋ, и҆ де́мѡнѡвъ погрꙋжа́етъ полкѝ: всѣ́хъ же бл҃гочести́выхъ сердца̀ напаѧ́етъ бл҃года́тїю.

Бг҃оро́диченъ: Присѣ́ннꙋ прозрѧ́ше тѧ̀ го́рꙋ прⷪ҇ро́къ а҆ввакꙋ́мъ, бцⷣе, и҆зъ неѧ́же бг҃ъ па́че сло́ва про́йде воплоща́емь, и҆ мі́ръ спасѐ, бꙋ́рею лю́тагѡ грѣха̀ тѧ́жкѡ ѡ҆держи́мый.

Конда́къ, гла́съ в҃:

Мч҃ническаѧ честна́ѧ па́мѧть прїи́де дне́сь, веселѧ́щи всѧ́чєскаѧ, тере́нтїа премꙋ́драгѡ и҆ дрꙋжи́ны є҆гѡ̀. те́плѣ ᲂу҆̀бо стеце́мсѧ, да прїи́мемъ и҆сцѣлє́нїѧ: сі́и бо бл҃года́ть ѿ бг҃а прїѧ́ша дх҃а ст҃а́гѡ, и҆сцѣлѧ́ти недꙋ́ги дꙋ́шъ на́шихъ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Оу҆́ши благопослꙋшли̑вы къ бжⷭ҇твенномꙋ и҆сполне́нїю, бжⷭ҇твєннаѧ повелѣ̑нїѧ стѧжа́вше, мꙋ́дрїи, поѧ́сте преꙋсе́рднѡ: бл҃гослове́нъ є҆сѝ, гдⷭ҇и бж҃е, во вѣ́ки.

Зако́ны бжⷭ҇твєнныѧ стрⷭ҇тоте́рпцы, противоположи́сте повелѣ́нїємъ беззако́нныхъ, велѧ́щихъ хрⷭ҇та̀ ѿврещи́сѧ. є҆мꙋ́же вопїе́мъ: бл҃гослове́нъ є҆сѝ, гдⷭ҇и бж҃е, во вѣ́ки.

Оу҆деса̀ ка́знемъ ѿда́вше, ѿверго́стесѧ тѣ́ла, любвѐ ра́ди ꙗ҆́вльшагѡсѧ на землѝ и҆ пло́ть взе́мша. є҆мꙋ́же пѣснопое́те, мч҃ницы: бж҃е, бл҃гослове́нъ є҆сѝ.

Бг҃оро́диченъ: И҆стлѣ́вшыѧ дре́вле родонача́льники престꙋпле́нїемъ безмѣ́стнагѡ согрѣше́нїѧ, во ᲂу҆тро́бѣ хрⷭ҇та̀ неизрече́ннѡ заче́нши, и҆справлѧ́еши, пренепоро́чнаѧ, плодо́мъ чре́ва твоегѡ̀.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

На сꙋди́щи мꙋчи́тельстѣмъ, бг҃омꙋ́дрый тере́нтїй, и҆ а҆фрїка́нъ, маѯі́мъ же и҆ помпиі́й, а҆леѯа́ндръ и҆ зифѡ́нъ, и҆ сла́вный ѳео́дѡръ, вкꙋ́пѣ трегꙋ́бицею спострада́вшаѧ десѧти́ца, и҆ трегꙋ́бица є҆ди́ницы, сп҃са всѣ́хъ хрⷭ҇та̀ и҆сповѣ́давше, до́блественнѡ пострада́ша.

За хрⷭ҇та̀ мꙋ́чими, и҆ волꙋ́ѧми жи́лами бїе́ми, и҆ неми́лостивнѡ страда́льцы стрꙋ́жеми, трезꙋ̑бцы срѣ́чеми, и҆ ѕвѣрє́мъ поверга́еми, и҆ разжже́нными рожны̀ въ ре́бра ѡ҆палѧ́еми вопїѧ́хꙋ: свѧще́нницы, бл҃гослови́те, лю́дїе, превозноси́те є҆го̀ во вѣ́ки.

Глаго́лъ жи́зни носѧ́ще добропобѣ́днїи мч҃ницы, ᲂу҆мерщвлє́нныѧ въ пре́лести спасо́ша, врагѝ ᲂу҆мори́ша, и҆ хрⷭ҇то́вꙋ сме́рть, и҆ свѣтоза̑рныѧ и҆з̾ѡбража́юще стра̑сти, мꙋ́ками многоѻбра́зными бл҃же́ннꙋю кончи́нꙋ прїѧ́ша, пою́ще є҆го̀ во всѧ̑ вѣ́ки.

Бг҃оро́диченъ: Оу҆мерщвле́ннꙋю ѡ҆живѝ, па́дшꙋю возста́ви, ᲂу҆ѧ́звеннꙋю дꙋ́шꙋ мою̀ и҆сцѣлѝ, копїе́мъ, всенепоро́чнаѧ, пробо́дшимъ бжⷭ҇твєннаѧ ре́бра и҆зъ ᲂу҆тро́бы твоеѧ̀ вопло́щшагѡсѧ сп҃са. є҆го́же ѻ҆́троцы бл҃гословѧ́тъ, свѧще́нницы пою́тъ, лю́дїе превозно́сѧтъ во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. Тѣ́мже пречи́стꙋю бцⷣꙋ, вѣ́рнїи, велича́емъ.

Цѣле́нїе то́читъ ра́ка мч҃никъ, ѿ и҆сто́чника бжⷭ҇твеннагѡ дх҃а напаѧ́ема при́снѡ: преꙋсе́рднѡ прїиди́те, почерпе́мъ, тѣ́ло, се́рдце и҆ дꙋ́шꙋ ѡ҆свѧща́юще, и҆ сп҃са хрⷭ҇та̀ велича́юще вѣ́рнѡ, мч҃николю́бцы.

Ꙗ҆́кѡ цвѣ́ти бжⷭ҇твеннагѡ села̀, ꙗ҆́коже шипцы̀ та́йнїи процвѣто́сте, и҆ бл҃гово́нїѧ честна́гѡ цр҃ковь напо́лнисте, пре́лесть ѕлосмра́днꙋю вра́жїю дале́че ѿгна́вше, бжⷭ҇твенною бл҃года́тїю мч҃ницы хрⷭ҇тѡ́вы четы́редесѧте.

Дне́сь маѯі́ма, вѣ́рнїи, и҆ а҆леѯа́ндра вкꙋ́пѣ, и҆ ѳео́дѡра, зифѡ́на и҆ помпиі́а, а҆фрїка́на же и҆ тере́нтїа, съ про́чими страда́льцы, вѣ́рнѡ восхва́лимъ и҆ ᲂу҆блажи́мъ, воспѣва́юще тѣ́хъ по́двиги.

Землѧ̀ ᲂу҆́бѡ кро́вь ва́шꙋ, и҆ тѣлеса̀ пострада̑вшаѧ въ себѐ прїѧ́тъ, не́бо же бжⷭ҇твєнныѧ дх҃и: а҆́гг҃льскаѧ вѡ́инства че́стнѡ собра́вшесѧ въ побѣ́дѣ мꙋ́дрїи, и҆ хрⷭ҇то́съ ꙗ҆́кѡ побѣди́тели вѣнча̀.

Бг҃оро́диченъ: Просвѣтѝ, две́ре свѣ́та, дꙋ́шꙋ мою̀ лю́тыми помраче́ннꙋю престꙋпле́ньми, ѡ҆мраче́ннꙋю и҆ бѣ́дствꙋющꙋю, и҆ днѐ прича́стника бжⷭ҇твеннаго покажѝ, ꙗ҆́кѡ да сла́влю тѧ̀ предста́тельницꙋ вѣ́рныхъ непосты́днꙋю.

Жития мучеников Терентия, Помпия (Публия), Африкана, Максима, Зинона, Александра, Феодора и иных

Свя­той му­че­ник Те­рен­тий и его дру­жи­на по­стра­да­ли при им­пе­ра­то­ре Де­кии (249–251). Им­пе­ра­тор из­дал указ, в ко­то­ром по­ве­ле­ва­лось всем под­дан­ным при­но­сить жерт­вы язы­че­ским идо­лам.

Ко­гда этот указ по­лу­чил пра­ви­тель Аф­ри­ки Фор­ту­на­ти­ан, он со­звал на­род на пло­ща­ди, по­ка­зал страш­ные ору­дия пы­ток и объ­явил, что все без ис­клю­че­ния долж­ны при­не­сти жерт­вы идо­лам. Мно­гие, ис­пу­гав­шись му­че­ний, со­гла­си­лись, но со­рок хри­сти­ан во гла­ве со свя­тым Те­рен­ти­ем му­же­ствен­но за­яви­ли о сво­ей вер­но­сти Спа­си­те­лю. Фор­ту­на­ти­ан уди­вил­ся их сме­ло­сти и спро­сил, как они, ра­зум­ные лю­ди, мо­гут ис­по­ве­до­вать Бо­гом То­го, Кто был рас­пят иуде­я­ми как зло­дей. В от­вет на это свя­той Те­рен­тий сме­ло от­ве­тил, что они ве­ру­ют в Спа­си­те­ля, доб­ро­воль­но пре­тер­пев­ше­го Крест­ную смерть и в тре­тий день Вос­крес­ше­го. Фор­ту­на­ти­ан по­нял, что Те­рен­тий сво­им при­ме­ром во­оду­шев­ля­ет дру­гих, и ве­лел за­то­чить его в тем­ни­цу вме­сте с тре­мя его бли­жай­ши­ми дру­зья­ми – Аф­ри­ка­ном, Мак­си­мом и Пом­пи­ем. Осталь­ных му­че­ни­ков, в том чис­ле Зи­но­на, Алек­санд­ра и Фе­о­до­ра, Фор­ту­на­ти­ан ре­шил при­ну­дить к от­ре­че­нию от Хри­ста. Од­на­ко ни уго­во­ры, ни страш­ные му­че­ния не по­ко­ле­ба­ли свя­тых му­че­ни­ков: их жгли рас­ка­лен­ным же­ле­зом, по­ли­ва­ли ра­ны ук­су­сом, рас­ти­ра­ли со­лью, стро­га­ли же­лез­ны­ми ког­тя­ми. Несмот­ря на стра­да­ния, свя­тые не ос­ла­бе­ва­ли в ис­по­ве­да­нии Хри­ста, и Гос­подь укреп­лял их.

Фор­ту­на­ти­ан ве­лел при­ве­сти стра­даль­цев в храм и еще раз пред­ло­жил им при­не­сти жерт­ву идо­лам. Му­же­ствен­ные во­и­ны Хри­сто­вы воз­зва­ли к Бо­гу: "Бо­же Все­силь­ный, про­лив­ший неко­гда огонь на Со­дом за без­за­ко­ние его, ра­зо­ри и ныне этот нече­сти­вый храм идоль­ский, ра­ди ис­ти­ны Тво­ей". Идо­лы упа­ли с гро­хо­том и рас­сы­па­лись, а за­тем раз­ру­шил­ся весь храм. Разъ­ярен­ный пра­ви­тель при­ка­зал каз­нить их. Му­че­ни­ки, сла­вя Бо­га, пре­кло­ни­ли свои го­ло­вы под меч па­ла­ча.

По­сле каз­ни 36 му­че­ни­ков Фор­ту­на­ти­ан при­звал к се­бе Те­рен­тия, Мак­си­ма, Аф­ри­ка­на и Пом­пия, по­ка­зал им каз­нен­ных и сно­ва пред­ло­жил при­не­сти жерт­ву идо­лам. Му­че­ни­ки от­ка­за­лись. Пра­ви­тель на­ло­жил на них тя­же­лые око­вы и при­ка­зал мо­рить в тем­ни­це го­ло­дом. Но­чью Ан­гел Гос­по­день снял с му­че­ни­ков око­вы и на­пи­тал их. На­ут­ро стра­жа на­шла свя­тых бод­ры­ми и пол­ны­ми сил. То­гда Фор­ту­на­ти­ан при­ка­зал волх­вам и за­кли­на­те­лям на­ве­сти в тем­ни­цу змей и вся­ких га­дов. Стра­жи через от­вер­стие в кры­ше за­гля­ну­ли в тем­ни­цу и уви­де­ли нев­ре­ди­мых му­че­ни­ков, ко­то­рые мо­ли­лись, а змеи пол­за­ли у их ног. Ко­гда за­кли­на­те­ли, ис­пол­няя при­ка­за­ние, от­кры­ли две­ри тем­ни­цы, змеи, не слу­шая за­кли­на­ний, бро­си­лись на них и ста­ли жа­лить. Разъ­ярен­ный Фор­ту­на­ти­ан по­ве­лел обез­гла­вить свя­тых му­че­ни­ков. Хри­сти­ане взя­ли их свя­тые те­ла и по­греб­ли с че­стью за го­ро­дом.

См. так­же: "Стра­да­ние свя­то­го му­че­ни­ка Те­рен­тия и про­чих с ним" в из­ло­же­нии свт. Ди­мит­рия Ро­стов­ско­го.