Канон святым мученицам Минодоре, Митродоре и Нимфодоре

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Тро́ицу несозда́нную, Ю́же благоче́стно пропове́дасте, ми́лостиву на́м сотвори́те, му́ченицы сла́внии, ны́не чту́щим ва́ша боже́ственныя стра́сти и исправле́ния, богоблаже́ннии.

О глаго́лех небрего́ша мучи́теля отрокови́цы, боже́ственным огражда́еми ору́жием ве́ры, и подъя́ша му́к треволне́ние и сме́рть непра́ведну за вся́ческих Жи́знь.

Си́лою укрепля́емы всемо́щною Зижди́теля, му́жеский прия́ша нра́в всечестны́я и зми́я стропти́ваго и велича́ваго нога́ми попра́ша и на зе́млю низложи́ша.

Богоро́дичен: Я́ко одушевле́н хра́м, я́ко нетле́нну ски́нию, я́ко две́рь небе́сную, я́ко Боже́ственную трапе́зу, я́ко пала́ту и престо́л Влады́чень, Мари́ю Чи́стую пе́сньми почти́м.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Умерщвле́нный умо́м пребеззако́нный мучи́тель Жи́зни на́шея, Христа́, лю́те отврещи́ся понужда́ше тя́, му́ченице Минодо́ро, ураня́я.

Взира́ющия к Бо́гу мучи́тель не пощаде́, но же́злием неми́лостивно сокруши́ у́ды твоя́, вене́ц тебе́ плеты́й ве́чный, му́ченице, неувяда́ющий.

Му́ками, требога́тии святи́и му́ченицы, сокро́вище на небесе́х и ве́чнующую сла́ву обрето́ша, я́сно Бо́гу прибли́жишася.

Богоро́дичен: Я́вльшися, души́ моея́ тму́ отжени́ и грехо́вныя плени́цы расто́ргни, Чи́стая Де́во, и спаси́ мя́, ро́ждшая Всеще́драго.

Седа́лен, гла́с 4.

Удиви́шася ва́шему терпе́нию мно́гому небе́снии ли́цы безпло́тных си́л: я́коже бо ино́му стра́ждущу пребыва́сте, го́лени и соста́вы сокруша́еми, сме́рть го́рькую терпя́ще и же́нским те́лом зми́я отсту́пника сокруша́юще, де́вы, неве́сты Жизнода́вца, ве́ры побо́рницы.

Богоро́дичен: От ко́рене Иессе́ева и от чре́сл Дави́довых Богоотрокови́ца Мариа́м ражда́ется дне́сь на́м; ра́достию бо ра́дуются вся́ческая и обновля́ются. Сра́дуйтеся ку́пно, не́бо и земля́, восхвали́те Ю́, оте́чествия язы́к. Иоаки́м весели́тся, и А́нна торжеству́ет, зову́щи: непло́ды ражда́ет Богоро́дицу и Пита́тельницу Жи́зни на́шея.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Сия́ющи луча́ми Креста́, присноблаже́нная Митродо́ра, к дре́ву привя́зана, терпя́ше о́гненную му́ку, пре́лести у́глие росо́ю любве́ Христо́вы погаша́ющи.

Явле́нным виде́нием по́мысл простира́ющи, зря́щи Жениха́ добро́ты недомы́сленныя, бие́ма же́злием, присноблаже́нная Митродо́ра терпя́ше до́блественне боле́зни.

Украси́стеся, де́вы, и све́тло просла́вистеся, препросла́вленное Сло́во вся́чески возлюби́вше, Его́же уя́звлены любо́вию, претерпе́сте страсте́й наше́ствия кре́пце.

Богоро́дичен: Умерщвле́нна мя́ зло́бою льсти́ваго, Всенепоро́чная, Жи́знь ро́ждшая, оживи́, к Тебе́ бо прибего́х; и впа́дшася во глубину́ грехо́вную возведи́, я́ко ми́лостива, Всенепоро́чная.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Нра́в терпели́в и непобеди́мь смы́сл му́ченицы пред суди́щем показа́вше, побе́ды вене́ц себе́ исплето́ша.

Ны́не терпи́т желе́зных ногте́й терза́ния кре́пко пове́шена Нимфодо́ра, Жениха́ возлюби́вши Безсме́ртнаго.

Трисве́тлыя свещи́, трикро́вная хра́мина, селе́ние Тро́ицы, да похва́лятся пе́сньми де́вы богому́дрыя.

Богоро́дичен: Тя́ еди́ну избра́нну и добру́ и непоро́чну обре́т, воплоща́ется Пребоже́ственное Сло́во из Тебе́, Богора́дованная.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Ви́дети жела́юще Твою́ добро́ту недомы́сленную, уязвля́еми любо́вию Твое́ю сладча́йшею, Безнача́льне Сло́ве, му́к лю́тость до́блественне претерпе́ша.

Я́ко кри́ны в ве́рте страда́льцев, процвето́ша пресла́вныя отрокови́цы и Це́рковь воня́ми разли́чных му́к облагово́ниша Ду́ха благода́тию.

Жениха́ Безсме́ртнаго Еди́наго жела́юще, неви́димою си́лою укрепля́еми, ви́димую сме́рть явле́нно преоби́деша де́вы отрокови́цы.

Богоро́дичен: Свя́т всели́выйся в ложесна́ Твоя́ Госпо́дь, святе́йшу обре́т Тя́ и чисте́йшу тва́ри всея́, Богома́ти Господоимени́тая, Пречи́стая Влады́чице.

Конда́к, гла́с 4.

За Тро́ицу терпели́вно страда́льчествовавшия, многоко́зненнаго врага́ победи́сте, бра́тски обле́кшеся Ду́хом, те́мже водвори́стеся с пятьми́ де́вами в небе́сном, страстоте́рпицы, черто́зе, и со а́нгелы Всецарю́ в весе́лии непреста́нно предстоите́.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Жре́ти и́долом глухи́м злочести́ваго мучи́теля повелева́юща оплева́сте, вопию́ще, отрокови́цы: отце́в на́ших Бо́же, благослове́н еси́.

Просвеще́ннии умо́м богонача́льными заря́ми, мглу́ и́дольскую очерни́сте, всехва́льныя, пою́ще: отце́в на́ших Бо́же, благослове́н еси́.

Ни отсече́ния уде́с, ни гоне́ние, ни ско́рбь Христа́ отлучи́ти отню́д возмого́ша, вопию́щим му́ченицам: отце́в на́ших Бо́же, благослове́н еси́.

Богоро́дичен: Преесте́ственно Зижди́теля от утро́бы Твоея́, Де́во, роди́ти сподо́билася еси́, земны́я назида́юща, пою́щия ве́рою: Бо́же, благослове́н еси́.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Изостри́вшеся любо́вию Творца́, притупи́сте жа́ла змии́ная, в же́нстем телеси́ му́жеския восприе́мше по́двиги, и венцы́ небе́сными венча́стеся.

Спле́тшеся посреде́ по́двига, неви́димыя враги́ с пло́тию безпло́тныя победи́ша богому́дрии отрокови́цы, вопию́ще: благослови́те, вся́ дела́ Госпо́дня, Го́спода.

О Бо́зе Спа́се вжиля́еми, о Христе́ Иису́се возмога́юще, вра́жию некре́пкую погуби́сте держа́ву, воспева́юще: вся́кая дела́, благослови́те, Госпо́дня, Го́спода.

Ца́рство вы́шнее получи́сте, со Христо́м Иису́сом ца́рствующе, испещре́ны ра́нами му́к, добро́тою укра́шены, досточу́дныя отрокови́цы.

Богоро́дичен: Я́ко Бо́жие нескве́рное жили́ще, Его́же прия́ла еси́ воплоща́ема и во дву́ естеству́ зна́ема, Отрокови́це, Ему́же пое́м: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Ви́дети жела́юще добро́ту Жениха́, всеобра́зным ма́нием к Нему́, богоно́сицы, безсме́ртию поучи́стеся в ме́ртвеннем телеси́. Те́м досто́йно ублажа́етеся.

Яви́стеся мучи́телей посреде́, а́ки в во́лцех суро́вых, а́гницы нескве́рныя, си́х зверови́дное пребора́ющия, и Христу́, благоприя́тна я́ко же́ртва, принесо́стеся.

Вене́ц исплето́сте ку́пно неветша́ющ, де́вы, Боже́ственныя улучи́вше сла́вы, и Ца́рствия и́стинно непоколеби́маго прия́ти, я́ко му́ченицы, с му́ченики сподо́бистеся.

Ея́же сподо́бистеся сла́вы, е́же получи́сте ликова́ние, соверша́ющим любо́вию ва́шу па́мять улучи́ти моли́теся, я́ко дерзнове́ние иму́ще ко Влады́це, честны́я де́вы.

Богоро́дичен: Пощади́ мя́, Христе́, егда́ хо́щеши суди́ти ми́р со сла́вою, разори́ мглу́ страсте́й мои́х моли́твами Ро́ждшия Тя́ и честны́х му́чениц Твои́х, я́ко Бла́г и Многоми́лостив.

Свети́лен.

Со́лнце отню́дуже произы́де мы́сленное по пло́ти дне́сь озари́ ми́р от непло́дных ложе́сн. Те́мже, игра́юще, вопие́м: ра́дуйся, Мари́е, пра́отцев избавле́ние.