Каноны всем святым преподобным отцам на Святой Горе Афонской просиявшим

Припе́в: Преподо́бнии отцы́ во Афо́нстей Горе́ просия́вшия, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 21 июня (08 июня ст. ст.)

Глас 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Бо́же все́х, да́р словесе́ пода́ждь ми́, Твоему́ рабу́, ны́не начина́ющему хвали́ти пе́сньми и́же во Афо́нстей Горе́ просия́вшия отцы́, Твою́ во́лю испо́лнившия.

Афо́нских отце́в свято́е собра́ние, су́щии во Афо́не, пе́сньми почти́м, дру́ги Пресвяты́я Де́вы и Христа́ Бо́га рачи́тельныя уго́дники, на́ша те́плыя предста́тели и моли́твенники непреста́нныя о спасе́нии ду́ш на́ших.

Вели́кия Ла́вры свяще́ннаго созда́теля в пе́снех почита́ю, Вели́каго Афана́сия, о́браз и начерта́ние бы́вшим во Афо́не отце́м, в виде́ниих вку́пе же и дея́ниих.

Богоро́дичен: Ра́дуйся, Пресвята́я Госпоже́, освяти́вшая Афо́н Твои́м прише́ствием; ра́дуйся, низложи́вшая та́мо и́долы; ра́дуйся, насади́вшая в Горе́ ве́ру и́стинную; ра́дуйся, неве́рие отту́ду отгна́вшая.

И́н, гла́с 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Ватопе́дскаго сла́внаго Ага́пия восхвали́ти до́лженствую, и́же Богоро́дичен гла́с услы́ша, и порабо́тися, и изба́ви своего́ влады́ку с сынми́ его́, я́ко свобо́ден сы́й ве́чныя му́ки.

Афана́сия, кра́сныя о́трасли Симе́нския оби́тели, похваля́ю житие́, Боже́ственнаго же Ака́кия но́ваго и преподо́бнаго Гаврии́ла И́верскаго, от мо́ря изъе́мшаго чудотво́рную ико́ну Врата́рницы.

Ка́ко не почту́ честна́го Генна́дия, узре́вшаго я́ве в Ватопе́де источи́вшийся еле́й чу́дом Богома́тере? Ка́ко же умолчу́ о Богоно́снем Гео́ргии, И́верския оби́тели созда́тели?

Богоро́дичен: Егда́ язы́ки разделя́ше Бо́г по числу́ а́нгел Свои́х, тогда́ прови́дя Тя́, Де́во, бы́ти в Ма́терь Свою́ Пречи́стую, отдели́ Тебе́ Го́ру сию́ вели́кую в достоя́ние неотъе́млемо.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Преподо́бнии отцы́ Афо́нстии, вы́, от Боже́ственныя благода́ти подви́гшеся, в Горе́ свяще́нныя огра́ды соста́висте и по́мощию Богома́тере мно́жества мона́шествующих в па́житех спасе́ния воспита́сте. Но и ны́не о на́с, ва́шем ста́де, моли́те, изба́витися на́м от вся́кия ну́жды и спасти́ся душа́м на́шим.

Богосло́ва вели́каго и свяще́нный орга́н Ду́ха Свята́го я́вльшагося, Григо́рия Пала́му воспева́ю, Све́та невече́рняго зри́теля, Богосло́вия ве́рным наста́вника нело́жнаго.

Пра́ведно е́сть восхвали́ти Григо́рия друга́го, в преде́лех ла́врских све́тло пости́вшагося, и соиме́ннаго тому́ Григо́рия Боже́ственнаго, оби́тель прехва́льну себе́ воздви́гшаго.

Богоро́дичен: Ра́дуйся, во жре́бий Себе́ Го́ру сию́ избра́вшая; ра́дуйся, Засту́пницею ме́ста сего́ бы́ти изво́лившая; ра́дуйся, ве́рным, пребыва́ющим зде́, Пода́тельнице земны́х бла́г; ра́дуйся, Спору́чнице ве́чнаго и́х спасе́ния.

И́н.

Ирмо́с: Еди́не, ве́дый челове́ческаго существа́ не́мощь и ми́лостивно в не вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Симе́нская оби́тель Дамиа́на произрасти́, Филофе́ева же па́ки друга́го возрасти́ Дамиа́на, преподобному́ченика, и с ни́м Боже́ственнаго Доме́тия, и́хже да ублажи́м.

Диони́сия пою́ чу́днаго, Крести́теля Иоа́нна оби́тель созда́вшаго, и Доме́тия, спо́стника Диони́сиева.

Диони́сий други́й, И́верская отра́сль, и Дамаски́н, ла́врское Боже́ственное удобре́ние, ны́не ублажа́ются, я́ко сугу́быя венцы́ прия́ша, страда́ния вку́пе и по́стничества.

Богоро́дичен: Ты́, Пречи́стая Де́во, спобо́рствовати обеща́лася еси́ всегда́ все́м, в Горе́ се́й воздвиза́ющим бра́нь с бори́телем, борю́щим челове́ки, те́мже, Влады́чице, по Твоему́ обеща́нию не оста́ви на́с, мо́лим Тя́.

Седа́лен, гла́с 4.

Ужасо́шася вку́пе вся́ А́нгелов во́инства, ви́дяще му́жество души́ и боре́ния ва́ша, я́же па́че естества́, отцы́ знаменоно́снии, ка́ко, те́лом веще́ственным обложе́ни су́ще, безпло́тныя враги́ победи́сте, и благода́рно пе́снь Го́сподеви побе́дную воспе́сте: сла́ва Тебе́, Го́споди, сла́ва Тебе́, укрепля́ющему ме́ртвенное челове́ков естество́.

Богоро́дичен: Ужаса́ет вся́к у́м человеколю́бие Твое́ мно́гое, Богоотрокови́це Мари́е, е́же показа́ла еси́ чи́ну и́ноческому зде́ постя́щихся: от всея́ бо земли́ собрала́ еси́ я́ в Го́ру сию́ вели́кую и я́ко Свое́ достоя́ние мона́хом сию́ дарова́ла еси́. Вели́ко вои́стинну е́же о на́с промышле́ние Твое́, Присноде́во.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Бо́га возлюби́вше от всея́ души́, преподо́бнии, вели́кия по́двиги соверши́ли есте́, та́же бли́жняго те́пле возлюби́вше, в разли́чных ме́стех Афо́на оби́тели воздви́гли есте́ и общежи́телей мно́жества в ты́я собра́ли есте́. Моли́теся у́бо, чадолюби́вии отцы́, и на́м любве́ исполни́тельми бы́ти и спасти́ся душа́м на́шим.

Пе́сньми почита́ю настоя́теля Ватопе́дскаго Евфи́мия, и́же свя́зан бы́сть вери́гами и погрузи́ся во глубине́ морсте́й, изобличи́ же у́мысл латиному́дренных и вене́ц муче́ния от руки́ Госпо́дни неувяда́емый прия́л е́сть.

Совоспева́ю и друга́го честна́го Евфи́мия, И́верския оби́тели созда́теля, я́ко, служа́щу ему́ не́когда Бо́гу, сто́лп узре́ся от су́щих с ни́м солнцеобра́зен. И Дохиа́рскаго созда́теля пою́, друга́го па́ки преподо́бнаго Евфи́мия.

Богоро́дичен: Ра́дуйся, те́плая Хода́таице о живу́щих во жре́бии Твое́м; ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пну бы́ти предре́кшая; ра́дуйся, ра́досте и спасе́ние ду́ш на́ших.

И́н.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му во спасе́ние на́ше и обновле́ние.

Восхвали́ти Феодо́сия досто́ит, Филофе́евския оби́тели наста́вника, и Феофа́на по́стника, Дохиа́рския оби́тели Боже́ственное удобре́ние, и Филаделфи́йскаго Феоли́пта высокоразу́мнаго, Честны́я Тро́ицы служи́тели ве́рныя.

Фео́ну ка́ко оста́влю непохвале́на, свети́льника оби́тели Пантокра́торския и святи́теля по́слежде бы́вша Фессалони́тскаго? Ка́ко же словесы́ не почту́ Фео́фила мироточи́ваго, благоуха́ние испуща́ющаго па́че все́х арома́т?

Свяще́нныя оби́тели И́верския созда́теля похва́лим, Иоа́нна преподо́бнаго, Евфи́миева по пло́ти отца́, и с ни́м па́ки И́верския о́трасли, Иа́кова Богому́драго и Иа́кова друга́го, тве́рдыя Христо́вы преподобному́ченики пои́м.

Богоро́дичен: Ко́ль мно́гое промышле́ние Твое́ о Горе́ се́й, Влады́чице! Ты́ бо рекла́ еси́, я́ко бу́деши в доброде́телех наста́вник и учи́тель все́м, до́бре в не́й живу́щим, пита́тель же и вра́ч ду́ш и теле́с и́х.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.

Преподо́бнии отцы́ Афо́нстии, вы́, я́ко сла́вие сладкогла́снии, посреде́ де́брий Святы́я Го́ры живу́ще, спаси́тельным и́менем Иису́совым поуча́стеся при́сно, у́м сво́й просвеща́юще Боже́ственным све́том, се́рдца же услажда́юще отту́ду источа́ющеюся ра́достию, е́же моли́твами свои́ми и на́м подади́те, помина́ющим ва́с.

Иоаса́фа преподо́бнаго Диони́сиевы оби́тели в пе́сни похваля́ю, я́ко, ра́дуяся, кро́вь свою́ излия́л е́сть за любо́вь все́х Царя́ Христа́ и муче́ния вене́ц прия́л е́сть.

Подоба́ет вои́стинну Ка́ллиста вели́каго в пе́снех похвали́ти, му́дрый и Богодухнове́нный орга́н благода́ти, И́верския же оби́тели украше́ние и па́стыря сла́внаго.

Богоро́дичен: Ра́дуйся, Де́во, я́ко благослове́нием Твои́м осени́ Го́ру си́ла Вы́шняго; ра́дуйся, вертогра́д духо́вный благода́тию Бо́жиею в насле́дии Свое́м насади́вшая; ра́дуйся, я́ко удо́лия и де́бри его́ напо́лнишася и́ноки; ра́дуйся, я́ко просия́ во Афо́не мно́жество преподо́бных, моля́щихся о спасе́нии ду́ш на́ших.

И́н.

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия правосла́вно пою́щих Тя́.

Изря́дная отра́сль Зогра́фския оби́тели, почте́н да бу́дет в пе́снех Косма́ преподо́бный, и́же Богоро́дицу свои́ма очи́ма ви́де, и с ни́м да почте́н бу́дет священному́ченик Конста́нтий, и́же в Ла́вре поживе́.

О Го́споде ра́дуйся и ты́, оби́тель Кутлуму́сская, я́ко в преде́лех твои́х процвете́ Киприа́н вели́кий, Христо́в свяще́нник и преподобному́ченик.

Я́коже ма́ти в ча́дех, Диони́сиева оби́тель весели́тся: честна́го Мака́рия, но́ваго му́ченика, и Лео́нтия, от гро́ба пресла́вно источи́вшаго ми́ро благоуха́нно, сла́вит.

Богоро́дичен: Кто́ не ра́дуется, слы́ша обеща́ние Твое́, Пренепоро́чная Отрокови́це? Ты́ бо рекла́ еси́, я́ко зде́ до́бре живу́щия Сы́ну Твоему́ и Бо́гу предста́виши, проще́ние прегреше́ний и́м испроси́вши.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Преподо́бнии отцы́ Афо́нстии, вы́, многоразли́чныя по́двиги соверши́вше, си́ми от Горы́ сея́ возлете́сте в го́ры Небе́сныя и, жили́ще свое́ та́мо утверди́вше, ны́не упокоева́етеся душа́ми свои́ми, я́ко златы́я и вседо́брыя голуби́цы, иде́же помяни́те и на́с, восхваля́ющих вы́.

Ла́вры свяще́нное воспита́ние пе́сньми почти́м, безпло́тнаго во пло́ти, Богоно́снаго Макси́ма, от Боже́ственнаго Ду́ха бога́тый да́р проро́чества прие́мшаго.

Ватопе́дския оби́тели почита́ю Боже́ственныя о́трасли, Неофи́та сла́внаго, гла́с услы́шавша Чи́стыя Богоотрокови́цы, и в преподо́бных просия́вшаго Никоди́ма.

Богоро́дичен: Ра́дуйся, я́ко на насле́дие Твое́ при́сно призира́еши; ра́дуйся, я́ко благода́ти Бо́жия и ми́лости Своея́ сподобля́еши е́; ра́дуйся, на ка́мени за́поведей Христо́вых сердца́ рабо́в Твои́х утвержда́ющая; ра́дуйся, благослове́ние Сы́на Твоего́ на на́с низводя́щая.

И́н.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Диони́сиевы оби́тели изря́дное удобре́ние, пе́т бу́ди по до́лгу, Ни́фонте чу́дный, Константи́ня гра́да бы́вый па́стырю и все́м преподо́бным ве́рше.

Весели́ся, честна́я оби́тель Дохиа́рская, обогати́вшися созида́телем сла́вным, му́дрым Неофи́том, обогаще́нным доброде́телию вся́кою, я́ко дре́во благопло́дное.

По́стнице Каре́йская, весели́ся и ты́ о Боже́ственнем Ду́се, процве́тши сла́внаго Некта́рия, во́ду сладча́йшую доброде́телей и преподо́бных купножи́теля.

Богоро́дичен: Спобо́рством Твои́м, Богороди́тельнице, огради́вшеся, я́ко всеору́жием кре́пким, Горы́ сея́ преподо́бнии все́ победи́ша во́инство де́монское и по́честь побе́ды прия́ша.

Конда́к, гла́с 4.

Онебеси́вшия Го́ру сию́, и показа́вшия в не́й житие́ а́нгельское, и мно́жество мона́хов собра́вшия отцы́, прииди́те, благохва́лим вси́, к ни́м взыва́юще: вся́кия беды́ и искуше́ния на́с изба́вите, мно́жество преподо́бных, Афо́нская похвало́.

И́кос:

О, ко́ль добро́ соедине́ние ва́ше, отцы́ Богому́дрии! О, ко́ль красе́н и сла́док о́бщий се́й ва́ш пра́здник, в не́мже вси́ вы́, в Горе́ се́й просия́вшии святи́и, зна́емии ку́пно и безъиме́ннии, о́бщее хвале́ние, я́коже духо́вная бра́тия, прие́млете! Подоба́ше бо во еди́нем ме́сте Го́сподеви угоди́вшим во еди́н де́нь и пра́здновати. Сего́ ра́ди и мы́, и́же во Афо́не мона́си и мирсти́и, во еди́но собра́вшеся, по до́лгу ва́с ублажа́ем, но́вии– дре́вних и сы́нове– отце́в, согла́сно вопию́ще: ме́сто сие́, в не́мже пожи́сте, от вся́каго зла́ спаса́йте, мно́жество преподо́бных, Афо́нская похвало́.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Преподо́бнии отцы́, во Афо́не возсия́вшии, луча́ми доброде́телей и Боже́ственных дарова́ний озаря́ете Го́ру сию́, я́ко зве́зды многосве́тлыя, и Не́бо друго́е ме́сто по́двигов ва́ших показа́сте, разгна́вше лю́тый мра́к де́монский. Не преста́йте моля́щеся за ны́ ко Го́споду.

Еди́н от святы́х, и́же во Афо́не, показа́ся Ни́фонт Богоно́сный, и́же пти́чим житие́м живя́ше в преде́лех ла́врских и проро́ческий да́р от Бо́га прия́т.

Ни́л, ла́врский мирото́чец, и Никоди́м, Кавсокали́вский цве́т, от Христа́ возлю́блен бы́вый, но́вый му́ченик, в пе́снех и пе́ниих похвали́тася досто́йно.

Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице; ра́дуйся, во бра́ни, в боле́знех и труде́х и́х премилосе́рдая Уте́шительнице; ра́дуйся, благоде́нственное житие́ на земли́ и всеблаже́нное на Небеси́ и́м устроя́ющая; ра́дуйся, наде́ждо и спасе́ние ду́ш на́ших.

И́н.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Ка́ко не почту́ в ли́це Боже́ственных оте́ц до́бляго Ники́фора, и́же безмо́лвно живя́ше в преде́лех пусты́нных и духо́вных дарова́ний сподо́бися досто́йно?

Па́вел, дву́х оби́телий кти́тор, Гео́ргиевы и Ксиропота́мския, по́стников добро́та, просия́вый на кончи́не, я́коже друго́е со́лнце, да похва́лится в пе́снех.

Пе́снь воспева́ю Пахо́мию, Боже́ственней отра́сли Кавсокали́встей, но́вому му́ченику Христо́ву, сугу́бый вене́ц прие́мшему от руки́ Госпо́дни.

Богоро́дичен: Влады́чица ми́ру Ты́ еси́, Присноде́во, изря́днее же Горы́ сея́ Влады́чица еси́ и Предста́тельница, спаса́ющи сию́ от вся́каго искуше́ния и вре́да.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Афо́на насе́льницы и храни́телие, по Богоро́дице на́ши предста́телие и многообра́знии благоде́телие и назира́телие, столпи́ о́гненнии, стоя́щии с любо́вию и ра́достию о́крест Ма́тере Све́та, не преста́йте моля́щеся за ны́ ко Го́споду.

Молча́льником пе́рвейший во Афо́не Пе́тр почита́ется, пожи́вый жи́знию невеще́ственною и прогна́вый во пло́ти безпло́тныя де́моны, и́же на́г всю́ свою́ жи́знь прохожда́ше и даро́в Ду́ха Свята́го сподо́бися бога́тно, Богоро́дицы моли́твами.

Рома́на сла́вна, по́стников украше́ние и му́чеником Христо́вым весе́лие, почти́м в пе́снех, его́же ла́врская по́стница процвете́, я́ко шипо́к благоуха́нен.

Богоро́дичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем; ра́дуйся, всему́ благо́му вхо́д се́мо подаю́щая; ра́дуйся, прило́г вся́каго зла́ от жре́бия Своего́ отража́ющая.

И́н.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Са́вва да похвале́н бу́дет, иера́рх Боже́ственный, и́же от Христа́ чуде́с прия́т си́лу и Се́рбскую зе́млю просвети́, я́ко со́лнце, с Симео́ном вку́пе, отце́м свои́м по пло́ти, сы́ном же по ду́ху, источи́вшим из гро́ба благово́нное ми́ро, Хиланда́рския оби́тели Боже́ственнии созда́телие.

Пе́сньми почти́м Симео́на, Филофе́евския оби́тели наста́вника изря́днаго, и мироточи́ваго Си́мона, на ка́мени созда́вшаго оби́тель превысо́кую наставле́нием Небе́сныя звезды́ и чуде́с си́лу от Бо́га прие́мшаго и вла́сть на ду́хи нечи́стыя.

Игра́й па́ки и лику́й, честна́я оби́тель Диони́сиева, возрасти́вшая Боже́ственнаго Филофе́я, по́стников украше́ние, его́же из темни́цы изба́ви Богоро́дица Мари́я, его́же честна́я глава́, я́ко со́лнце, просия́.

Богоро́дичен: На высо́цем и све́тлем престо́ле, Влады́чице, яви́лася еси́ седя́щи, вся́ блиста́ющися, ли́цы же мона́хов неизче́тни стоя́ху о́крест Тебе́, на полу́денных преде́лех Афо́нских и Святы́я Горы́ о́крест, и явля́хуся, я́ко о́гненнии столпи́, и́же бы́ша ны́не восхваля́емии отцы́.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Преподо́бнии отцы́ Афо́нстии, Цари́цы Небе́сныя ополче́ние, нача́ла тьмы́ посо́бием Ея́ победи́вшии, пло́ть умертви́вшии и ду́х оживи́вшии, благода́ти прия́вшии Боже́ственное де́йство, не преста́йте моля́щеся за ны́ ко Го́споду.

Ра́дуйся, Ватопе́дская честна́я оби́тель, обогати́вшаяся двана́десятию страда́льцы преподо́бными, и́же изобличи́ша му́жественно царя́ Михаи́ла и патриа́рха Иоа́нна латиному́дренных, те́мже и пре́дани бы́ша сме́рти удавле́ния, и сугу́быя венцы́ от Бо́га восприя́ша.

Весели́ся, И́верская честна́я оби́тель, я́ко мно́ги принесла́ еси́ Бо́гу от твои́х ча́д преподобному́ченики, и́же ве́ржени бы́ша во глубину́ морску́ю, зане́ лжеслове́сие латиному́дренных мужему́дренне изобличи́ша.

Богоро́дичен: Ра́дуйся, Е́юже вся́ оби́тели Горы́ огражда́ются; ра́дуйся, Е́юже вся́ ко́зни вра́жия разруша́ются; ра́дуйся, на благоутро́бие к на́м Сы́на Своего́ приклоня́ющая: ра́дуйся, Е́юже и́мут дерзнове́ние к Нему́ раби́ Тво́й.

И́н.

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Игра́й и ра́дуйся и ты́, оби́тель Зогра́фская, Го́сподеви прине́сшая сы́ны твоя́, два́десять и четы́ри Боже́ственныя преподобному́ченики, и́же му́жески у́мысл латиному́дренных посрами́вше, я́ко всесожже́ния свяще́нная, огне́м сконча́ша.

И ты́, честна́я по́стнице Каре́йская, лику́й ны́не и ра́дуйся, и́бо и ты́ ча́да твоя́ принесла́ еси́ Христо́ви, тве́рдыя преподобному́ченики, и́же мече́м посече́ни бы́ша во главу́, поне́же защити́ша оте́ческий догма́т и лати́нскую пре́лесть упраздни́ша.

Тро́ичен: Приими́, Всесвята́я Тро́ице Честна́я, и́хже Гора́ Афо́нская прино́сит Ти́, я́ко нача́тки же́ртвы избра́нныя, вся́, Тебе́ уго́ждшия пре́жде и по́слежде в не́й, зна́емыя и незна́емыя, и моли́твами и́х от вся́каго вре́да все́х на́с сохраня́й.

Богоро́дичен: Пе́сни благода́рственныя вси́ мы́, в Горе́ се́й живу́щии, прино́сим Ти́, Ма́ти Бо́жия, я́ко спаса́еши на́с при́сно от вся́каго обстоя́ния, пита́еши, устроя́еши и о на́с промышля́еши. Но мо́лим Ти́ ся́, и Боже́ственнаго Ца́рствия по кончи́не на́шей сподо́би ны́.

Свети́лен.

Ра́дуйся, Горо́ Афо́нская сла́вная, моли́твенники твоя́ иму́щи просия́вшия в тебе́ Богоно́сныя отцы́: дне́сь пра́здник ра́достен с насе́льники твои́ми сотво́рши, почита́й собо́р и́х.

Сла́ва, и ны́не: Ра́дуйся, Присноде́во, прорече́ние Твое́ ви́дящи испо́лнено, я́ко Гора́ сия́ свята́ бу́дет, и́бо подвиза́вшиися в не́й отцы́, и́хже дне́сь почита́ем, яви́шася вои́стинну свя́ти, де́лом запечатле́вше проро́чество Твое́, Отрокови́це.