Правило покаянное в блудной страсти пребывающих

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Пра́вило покаѧ́нїѧ, а҆́ще не ᲂу҆страни́лсѧ страсте́й, ᲂу҆́мъ и҆ тѣ́ло своѐ ѡ҆скверни́хъ.

Глаго́летъ же Пра́вило со ᲂу҆миле́нїемъ, и҆ сокрꙋше́ннымъ се́рдцемъ, ꙗ҆́кѡ ѡ҆сꙋ́жденникъ: потре́ба же тогда̀ и҆ слеза́мъ бы́ти.

Твори́тъ покло́ны, глаго́лѧ:

Бж҃е, млⷭ҇тивъ бꙋ́ди мнѣ̀ грѣ́шномꙋ. [Три́жды.]

Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.

Гдⷭ҇и, поми́лꙋй. [Три́жды.]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ, да прїи́детъ црⷭ҇твїе твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. Хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.

Гдⷭ҇и, поми́лꙋй. [в҃і.]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Прїиди́те, поклони́мсѧ цр҃е́ви на́шемꙋ бг҃ꙋ. [Покло́нъ.]

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. [Покло́нъ.]

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ. [Покло́нъ.]

Ѱало́мъ н҃:

Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе: возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀: возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ ѿ ѡ҆скверне́нїѧ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Ѽ го́ре мнѣ̀ грѣ́шномꙋ! па́че всѣ́хъ человѣ̑къ ѻ҆каѧ́ненъ є҆́смь: покаѧ́нїѧ нѣ́сть во мнѣ̀: да́ждь мѝ гдⷭ҇и сле́зы, да пла́чꙋсѧ дѣ́лъ мои́хъ го́рькѡ.

Кто̀ твори́тъ такѡва́ѧ, ꙗ҆́коже а҆́зъ; ꙗ҆́коже бо свинїѧ̀ лежи́тъ въ калꙋ̀, та́кѡ и҆ а҆́зъ грѣхꙋ̀ слꙋжꙋ̀: но ты̀ гдⷭ҇и, и҆сто́ргни мѧ̀ ѿ гнꙋ́са сегѡ̀, и҆ да́ждь мѝ се́рдце твори́ти за́пѡвѣди твоѧ̑.

Ꙗ҆́кѡ блꙋ́дный сы́нъ, прїидо́хъ и҆ а҆́зъ ще́дре: прїими́ мѧ, ѻ҆́ч҃е, возвраща́ющасѧ, ꙗ҆́кѡ є҆ди́наго ѿ нає́мникъ твои́хъ бж҃е, и҆ поми́лꙋй мѧ̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Пречⷭ҇таѧ бцⷣе, прїимѝ недосто́йнꙋю мл҃твꙋ мою̀, и҆ сохрани́ мѧ ѿ на́глыѧ сме́рти, и҆ да́рꙋй мѝ пре́жде конца̀ покаѧ́нїе.

И҆зба́ви, бцⷣе, ѿ ѡ҆бдержа́щихъ мѧ̀ грѣхѡ́въ: ꙗ҆́кѡ и҆но́гѡ ᲂу҆пова́нїѧ не и҆мꙋ̀, ра́звѣ тебє̀, и҆ ѿ тебє̀ ро́ждшагосѧ гдⷭ҇а.

Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.

Гдⷭ҇и, поми́лꙋй. [м҃.]

Дꙋшѐ моѧ̀, почто̀ грѣха́ми богатѣ́еши; почто̀ во́лю дїа́волю твори́ши; въ чесо́мъ наде́ждꙋ полага́еши; преста́ни ѿ си́хъ, и҆ ѡ҆брати́сѧ къ бг҃ꙋ съ пла́чемъ, зовꙋ́щи: млⷭ҇рде гдⷭ҇и, поми́лꙋй мѧ̀ грѣ́шнаго.

Помы́сли, дꙋшѐ моѧ̀, го́рькїй ча́съ сме́рти, и҆ стра́шный сꙋ́дъ творца̀ твоегѡ̀ и҆ бг҃а: а҆́гг҃ли бо гро́знїи по́ймꙋтъ тѧ̀, дꙋшѐ, и҆ въ вѣ́чный ѻ҆́гнь введꙋ́тъ: ᲂу҆̀бо пре́жде сме́рти пока́йсѧ, вопїю́щи: гдⷭ҇и, поми́лꙋй мѧ̀ грѣ́шнаго.

И҆ покло́новъ и҃, съ мл҃твою:

Бж҃е, млⷭ҇тивъ мѝ бꙋ́ди, и҆ прости́ мѧ блꙋ́днаго за и҆́мѧ твоѐ ст҃о́е.

Мл҃тва ст҃а́гѡ васі́лїа вели́кагѡ:

Па́ки запѧ́тъ бы́хъ ѻ҆каѧ́нный ᲂу҆мо́мъ и҆ лꙋка́вымъ ѻ҆бы́чаемъ, рабо́таѧ грѣхꙋ̀. Па́ки кнѧ́зь тьмы̀ и҆ стра́стныхъ сла́достей роди́тель, плѣне́на мѧ̀ сотворѝ, и҆ ꙗ҆́коже раба̀ смире́ннаго, тогѡ̀ хотѣ́нїємъ, и҆ жела́нїємъ плотски̑мъ рабо́тати принꙋжда́етъ мѧ̀. И҆ что̀ сотворю̀, гдⷭ҇и мо́й, и҆ и҆зба́вителю, и҆ застꙋ́пниче ᲂу҆пова́ющымъ на тѧ̀, а҆́ще не къ тебѣ̀ па́ки возвращꙋ́сѧ и҆ постеню̀, и҆ млⷭ҇ти и҆спрошꙋ̀ ѡ҆ содѣ́ѧнныхъ мно́ю; Но бою́сѧ и҆ трепе́щꙋ, да не ка́кѡ всегда̀ и҆сповѣ́даѧсѧ, и҆ ѿстꙋпи́ти ѕлы́хъ ѡ҆бѣщава́ѧсѧ, и҆ на кі́йждо ча́съ согрѣша́ѧ: и҆ не возда́въ мл҃твы моеѧ̀ тебѣ̀ бг҃ꙋ моемꙋ̀, долготерпѣ́нїе твоѐ воздви́гнꙋ къ негодова́нїю. И҆ кто̀ стерпи́тъ гнѣ́ва твоегѡ̀, гдⷭ҇и; Вѣ́дый ᲂу҆́бѡ мно́жество щедро́тъ твои́хъ, и҆ пꙋчи́нꙋ чл҃вѣколю́бїѧ твоегѡ̀, па́ки возверза́ю себѐ на млⷭ҇ть твою̀, и҆ взыва́ю тѝ: є҆́же согрѣши́хъ, простѝ. Поми́лꙋй мѧ̀ па́дшаго, да́ждь мѝ рꙋ́кꙋ по́мощи, въ ти́нѣ сласте́й погрꙋже́нномꙋ. Не ѡ҆ста́ви, гдⷭ҇и, созда́нїе твоѐ растли́тисѧ беззако́ньми мои́ми и҆ грѣхѝ мои́ми: но ѻ҆бы́чнымъ твои́мъ млⷭ҇рдїемъ и҆ бл҃гостїю принꙋжда́емь, и҆зба́ви ѿ ка́ла и҆ скве́рны тѣле́сныѧ и҆ стра́стныхъ помышле́нїй, ѡ҆сквернѧ́ющихъ всегда̀ дꙋ́шꙋ мою̀ ѻ҆каѧ́ннꙋю: се́ бо, гдⷭ҇и, ꙗ҆́коже зри́ши, нѣ́сть въ не́й мѣ́ста чи́ста, но всѧ̀ прокази́сѧ, и҆ всѐ тѣ́ло ѡ҆б̾ѧ́тъ ꙗ҆́зва. Са́мъ ᲂу҆́бѡ, чл҃вѣколю́бче, врачꙋ̀ дꙋ́шъ и҆ тѣле́съ и҆ млⷭ҇ти и҆сто́чниче, ѡ҆чи́сти тꙋ̀ сле́зъ мои́хъ тече́нїемъ, си́хъ и҆злива́ѧ на мѧ̀ ѻ҆би́льнѡ: и҆зле́й на мѧ̀ чл҃вѣколю́бїе твоѐ, и҆ да́ждь мѝ и҆сцѣле́нїе и҆ ѡ҆чище́нїе, и҆ и҆сцѣлѝ сокрꙋше́нїе моѐ, и҆ не ѿвратѝ лица̀ твоегѡ̀ ѿ менє̀, да не ꙗ҆́коже ве́щь, поѧ́стъ мѧ̀ ѿча́ѧнїѧ ѻ҆́гнь: но ꙗ҆́коже ре́клъ є҆сѝ, нело́жный бж҃е, ꙗ҆́кѡ ве́лїѧ ра́дость быва́етъ на нб҃сѝ ѡ҆ є҆ди́номъ грѣ́шницѣ ка́ющемсѧ, сїѐ сотворѝ и҆ на мнѣ̀ грѣ́шнѣмъ, и҆ не затворѝ ᲂу҆́шїю бл҃гоꙋтро́бїѧ твоегѡ̀, въ мл҃твѣ покаѧ́нїѧ моегѡ̀, но ѿве́рзи и҆̀хъ, и҆ ꙗ҆́кѡ кади́ло и҆спра́ви тꙋ̀ пред̾ тобо́ю: вѣ́си бо не́мощь є҆стества̀ созда́телю, и҆ ᲂу҆до́бь поползнове́нїе ю҆́ности, и҆ тѧ́жесть тѣ́ла, и҆ презира́еши грѣхѝ, и҆ покаѧ́нїе прїе́млеши призыва́ющихъ тѧ̀ и҆́стиною. Ꙗ҆́кѡ бл҃гослови́сѧ и҆ просла́висѧ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:

Многомлⷭ҇тиве, нетлѣ́нне, нескве́рне, безгрѣ́шне гдⷭ҇и, ѡ҆чи́сти мѧ̀ непотре́бнаго раба̀ твоего̀ ѿ всѧ́кїѧ скве́рны плотскі́ѧ со и҆нѣ́ми всѣ́ми беззакѡ́нїи мои́ми, и҆ ꙗ҆ви́ мѧ нескве́рна влⷣко, за бл҃гость хрⷭ҇та̀ твоегѡ̀, и҆ ѡ҆ст҃и́ мѧ наше́ствїемъ прест҃а́гѡ твоегѡ̀ дх҃а: ꙗ҆́кѡ да возбнꙋ́въ ѿ мглы̀ нечи́стыхъ похотѣ́нїй и҆ всѧ́кїѧ скве́рны, сподо́блюсѧ чи́стою со́вѣстїю ѿве́рсти сквє́рнаѧ моѧ̑ и҆ нечи̑стаѧ ᲂу҆ста̀, и҆ воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:

Влⷣко хрⷭ҇тѐ бж҃е, и҆́же стрⷭ҇тьмѝ твои́ми стра̑сти моѧ̑ и҆сцѣли́вый, и҆ ꙗ҆́звами твои́ми ꙗ҆́звы моѧ̑ ᲂу҆врачева́вый, да́рꙋй мнѣ̀, мно́гѡ тебѣ̀ прегрѣши́вшемꙋ, сле́зы ᲂу҆миле́нїѧ, срастворѝ моемꙋ̀ тѣ́лꙋ ѿ ѡ҆бонѧ́нїѧ животворѧ́щагѡ тѣ́ла твоегѡ̀, и҆ насладѝ дꙋ́шꙋ мою̀ твое́ю чⷭ҇тно́ю кро́вїю, ѿ го́рести, є҆́юже мѧ̀ сопроти́вникъ напоѝ: возвы́си мо́й ᲂу҆́мъ къ тебѣ̀, до́лꙋ пони́кшїй, и҆ возведѝ ѿ про́пасти поги́бели, ꙗ҆́кѡ не и҆́мамъ покаѧ́нїѧ, не и҆́мамъ ᲂу҆миле́нїѧ, не и҆́мамъ слезы̀ ᲂу҆тѣ́шительныѧ, возводѧ́щїѧ ча̑да ко своемꙋ̀ наслѣ́дїю. Ѡ҆мрачи́хсѧ ᲂу҆мо́мъ въ жите́йскихъ страсте́хъ, не могꙋ̀ воззрѣ́ти къ тебѣ̀ въ болѣ́зни, не могꙋ̀ согрѣ́тисѧ слеза́ми ꙗ҆̀же къ тебѣ̀ любвѐ. Но влⷣко гдⷭ҇и і҆и҃се хрⷭ҇тѐ, сокро́вище бл҃ги́хъ, да́рꙋй мнѣ̀ покаѧ́нїе всецѣ́лое, и҆ се́рдце люботрꙋ́дное во взыска́нїе твоѐ: да́рꙋй мнѣ̀ бл҃года́ть твою̀, и҆ ѡ҆бновѝ во мнѣ̀ зра́ки твоегѡ̀ ѡ҆́браза. Ѡ҆ста́вихъ тѧ̀, не ѡ҆ста́ви менє̀: и҆зы́ди на взыска́нїе моѐ: возведѝ къ па́жити твое́й, и҆ сопричти́ мѧ ѻ҆вца́мъ и҆збра́ннагѡ твоегѡ̀ ста́да: воспита́й мѧ̀ съ ни́ми ѿ ѕла́ка бжⷭ҇твенныхъ твои́хъ та́инствъ, мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ. А҆ми́нь.

Мл҃тва ко прест҃ѣ́й бцⷣѣ:

Прест҃а́ѧ влⷣчце моѧ̀ бцⷣе, ст҃ы́ми твои́ми и҆ всеси́льными мольба́ми ѿженѝ ѿ менє̀ ѻ҆каѧ́ннагѡ раба̀ твоегѡ̀ сла́бости тѣле́сныѧ и҆ погасѝ пла́мень страсте́й мои́хъ, и҆зба́ви мѧ̀ ѿ мно́гихъ и҆ лю́тыхъ воспомина́нїй, и҆ предпрїѧ́тїй, и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́на є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ во вѣ́ки вѣкѡ́въ. А҆ми́нь.

Мл҃тва ко а҆́гг҃лꙋ храни́телю:

А҆́гг҃ле хрⷭ҇то́въ, прида́нный мнѣ̀ на соблюде́нїе дꙋшѝ и҆ тѣ́лꙋ моемꙋ̀ грѣ́шномꙋ ѿ ст҃а́гѡ кр҃ще́нїѧ, къ тебѣ̀ припа́даѧ молю́сѧ, храни́телю мо́й ст҃ы́й. а҆́зъ же свое́ю лѣ́ностїю и҆ свои́мъ ѕлы́мъ ѻ҆бы́чаемъ прогнѣ́вахъ твою̀ пречⷭ҇тꙋю свѣ́тлость, и҆ ѿгна́хъ тѧ̀ ѿ себє̀ всѣ́ми стꙋ́дными дѣ́лы, ѕлы́ми и҆ лꙋка́выми по́мыслы, блꙋ́днымъ возбѣше́нїемъ, самохотѣ́нїемъ на всѧ́кое плотско́е вожделѣ́нїе, є҆гѡ́же и҆ ско́ти безслове́снїи не творѧ́тъ! да ка́кѡ возмо́жеши воззрѣ́ти на мѧ̀, и҆лѝ пристꙋпи́ти ко мнѣ̀ а҆́ки псꙋ̀ смердѧ́щемꙋ; кото́рыма ѻ҆чи́ма, а҆́гг҃ле хрⷭ҇то́въ, воззри́ши на мѧ̀, ѡ҆пле́тшасѧ ѕлѣ̀ во гнꙋ́сныхъ дѣ́лѣхъ; да ка́кѡ ᲂу҆жѐ возмогꙋ̀ ѿпꙋще́нїѧ проси́ти гѡ́рькимъ и҆ ѕлы̑мъ мои̑мъ и҆ лꙋка̑вымъ дѣѧ́нїємъ, въ нѧ́же впа́даю по всѧ̑ дни̑ и҆ нѡ́щи, и҆ на всѧ́къ ча́съ; Но молю́сѧ тѝ припа́даѧ, храни́телю мо́й ст҃ы́й, ᲂу҆млⷭ҇рдисѧ на мѧ̀ грѣ́шнаго и҆ недосто́йнаго раба̀ твоего̀, бꙋ́ди мѝ помо́щникъ и҆ застꙋ́пникъ на ѕла́го моего̀ сопроти́вника, ст҃ы́ми твои́ми мл҃твами, и҆ црⷭ҇твїѧ бж҃їѧ прича́стника мѧ̀ сотворѝ, со всѣ́ми ст҃ы́ми, всегда̀, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ѿ ѡ҆скверне́нїѧ, ѿ і҆ере́а гл҃го́лемаѧ:

Гдⷭ҇и бж҃е на́шъ, є҆ди́не бл҃гі́й и҆ чл҃вѣколю́бче, є҆ди́не ст҃ы́й и҆ на ст҃ы́хъ почива́ѧй, и҆́же верхо́вномꙋ твоемꙋ̀ а҆пⷭ҇лꙋ петрꙋ̀ ꙗ҆ви́вый видѣ́нїемъ, ничто́же скве́рно и҆лѝ нечи́сто мнѣ́ти, ѿ тебє̀ сотворе́нныхъ на пи́щꙋ и҆ въ наслажде́нїе человѣ́кѡмъ, и҆ сосꙋ́домъ твои́мъ и҆збра́ннымъ, а҆пⷭ҇ломъ па́ѵломъ, всѧ̑ чи̑ста чи̑стымъ заповѣ́давый: ты̀ са́мъ влⷣко прест҃ы́й, призыва́нїемъ стра́шнагѡ и҆ пречⷭ҇тагѡ твоегѡ̀ и҆́мене, и҆ зна́менїемъ чⷭ҇тна́гѡ и҆ животворѧ́щагѡ крⷭ҇та̀, бл҃гословѝ и҆ ѡ҆чи́сти мѧ̀ раба̀ твоего̀ ѡ҆скве́рншагосѧ ѿ всѧ́кагѡ непрїѧ́зненнагѡ дꙋ́ха, ѿ всѧ́кагѡ мечта́нїѧ и҆ га́да ꙗ҆дови́тагѡ, ѿ всѧ́кагѡ беззако́нїѧ и҆ всѧ́кїѧ ле́сти, ѿ всѧ́кагѡ потво́ра и҆ ѿ всѧ́кїѧ сꙋеты̀, и҆ ѿ всѧ́кагѡ недꙋ́га, и҆ всѧ́кїѧ ꙗ҆́зи, и҆ ѿ всѧ́кагѡ проти́внагѡ ѕлодѣ́йства дїа́волѧ. И҆ ны́нѣ недосто́йнаго менѐ раба̀ твоего̀, сподо́би по твоемꙋ̀ млⷭ҇рдїю слꙋжи́ти пречⷭ҇тымъ твои̑мъ та́йнамъ. И҆ пре́жде ѡ҆чи́сти мѝ дꙋ́шꙋ и҆ тѣ́ло ѿ всѧ́кїѧ скве́рны, и҆ ѡ҆ста́ви всѧ́кое прегрѣше́нїе, во́льное и҆ нево́льное, є҆́же согрѣши́хъ во всѧ̑ дни̑ живота̀ моегѡ̀, дѣ́ломъ, сло́вомъ и҆ помышле́нїемъ, во днѝ и҆ въ нощѝ, и҆ до ны́нѣшнѧгѡ часа̀. И҆ да́ждь мѝ гдⷭ҇и, слꙋже́нїе сїѐ стра́шное нбⷭ҇ныхъ чинѡ́въ, и҆ прича́стїе пречⷭ҇тыхъ твои́хъ та̑инъ, не въ сꙋ́дъ, ни во ѡ҆сꙋжде́нїе, но въ проще́нїе грѣхѡ́въ, и҆ въ дх҃а ст҃а́гѡ прише́ствїе, и҆ живо́тъ присносꙋ́щныѧ ра́дости, є҆го́же ᲂу҆гото́валъ є҆сѝ и҆́стиннымъ твои̑мъ слꙋже́бникѡмъ. Сохрани́ мѧ, влⷣко всеси́льне, ѿ всѧ́кагѡ грѣха̀ и҆ ѕло́бы, соблюдѝ нескве́рна и҆ непоро́чна ѿ всѧ́кїѧ прока́зы проти́внагѡ дїа́вола: и҆ да́ждь мѝ гдⷭ҇и, слꙋжи́ти тебѣ̀ въ преподо́бїи и҆ пра́вдѣ до послѣ́днѧгѡ днѐ и҆ часа̀ и҆ сконча́нїѧ моегѡ̀: ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ѿ ѡ҆скверне́нїѧ, ст҃а́гѡ васі́лїа:

Многомлⷭ҇тиве, нетлѣ́нне, нескве́рне, безгрѣ́шне гдⷭ҇и, ѡ҆чи́сти мѧ̀ непотре́бнаго раба̀ твоего̀ ѿ всѧ́кїѧ скве́рны плотскі́ѧ и҆ дꙋше́вныѧ, и҆ ѿ невнима́нїѧ и҆ ᲂу҆ны́нїѧ моегѡ̀ прибы́вшꙋю мѝ нечистотꙋ̀, со и҆нѣ́ми всѣ́ми беззакѡ́нїи мои́ми, и҆ ꙗ҆ви́ мѧ нескве́рна влⷣко, за бл҃гость хрⷭ҇та̀ твоегѡ̀, и҆ ѡ҆ст҃и́ мѧ наше́ствїемъ прест҃а́гѡ твоегѡ̀ дх҃а: ꙗ҆́кѡ да возбнꙋ́въ ѿ мглы̀ нечи́стыхъ привидѣ́нїй дїа́вольскихъ, и҆ всѧ́кїѧ скве́рны, сподо́блюсѧ чи́стою со́вѣстїю ѿве́рсти сквє́рнаѧ моѧ̑ и҆ нечи̑стаѧ ᲂу҆ста̀, и҆ воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва прпⷣбнѣй мр҃і́и є҆гѵ́петской:

Ѽ, равноа́гг҃льнаѧ и҆ всесвѣ́тлаѧ мр҃і́е прпⷣбнаѧ, ᲂу҆бѣли́вшаѧ ри́зꙋ дꙋшѝ своеѧ̀ въ кро́ви а҆́гнчей и҆ зрѧ́щаѧ ны́нѣ на нб҃сѝ невече́рнїй свѣ́тъ црⷭ҇твїѧ нбⷭ҇нагѡ! Помѧнѝ мѧ̀, грѣ́шнагѡ и҆ ᲂу҆бо́гагѡ раба̀ твоегѡ̀, въ бг҃опрїѧ́тныхъ твои́хъ къ бг҃ꙋ моли́твахъ и҆ защитѝ мѧ̀ ѿ ловле́нїѧ врага̀, вѣ́си бо є҆гѡ̀ ко́зни и҆ лю́тꙋю въ се́мъ житїѝ на ны̀ бра́нь. Да́рꙋй мѝ сле́зы покаѧ́нїѧ, ѡ҆мыва́ющїѧ дꙋше́внꙋю мою̀ скве́рнꙋ, и҆спросѝ мѝ ѡ҆ставле́нїе грѣхѡ́въ и҆ житїѧ̀ и҆справле́нїе, и҆зба́ви мѧ̀ ѿ ѕлы́хъ мои́хъ ѻ҆бы́чаевъ, лѣ́ности и҆ нерадѣ́нїѧ, наꙋчѝ мѧ̀ постоѧ́нствꙋ и҆ крѣ́пости въ борьбѣ̀ съ мои́ми грѣхо́вными на́выками, и҆ помозѝ напечатлѣ́ти въ се́рдцѣ мое́мъ и҆ ᲂу҆мѣ̀ пресвѣ́тлый ѻ҆́бразъ тобо́ю люби́магѡ хрⷭ҇та̀, ᲂу҆ѧзвѝ мою̀ дꙋ́шꙋ є҆гѡ̀ всепроща́ющею любо́вїю, да не ѡ҆скорблю̀ млⷭ҇рдїе є҆гѡ̀ но́выми грѣха́ми. Оу҆молѝ ѡ҆ мнѣ̀ и҆ ми́лостивꙋю спорꙋ́чницꙋ твою̀, пречⷭ҇тꙋю дв҃ꙋ бцⷣꙋ, да и҆ мнѣ̀, недосто́йномꙋ, да́рꙋетъ всеси́льнꙋю свою̀ по́мощь и҆ наста́витъ на стезю̀ сп҃се́нїѧ. Во и҆схо́дѣ же ѿ сегѡ̀ мі́ра, ѽ, ма́ти прпⷣбнаѧ, сподо́би мѧ̀ причаще́нїѧ ст҃ы́хъ бж҃е́ственныхъ та́инъ: въ стра́шный ча́съ сме́рти помозѝ, на воздꙋ́шныхъ мыта́рствахъ застꙋпѝ и҆ предста́тельствомъ твои́мъ ѿве́рзи мѝ две́ри нбⷭ҇нагѡ црⷭ҇твїѧ, и҆дѣ́же по трꙋдѣ́хъ и҆ по́двизѣхъ ны́нѣ водворѧ́ешисѧ, зрѧ̀ и҆ прославлѧ́ѧ пресла́дкагѡ и҆скꙋпи́телѧ твоегѡ̀, прише́дшагѡ въ мі́ръ грѣ́шныѧ сп҃стѝ и҆ бж҃е́ственною свое́ю кро́вїю ѡ҆мыва́ющагѡ на́съ ѿ всѧ́кагѡ грѣха̀, є҆мꙋ́же сла́ва, че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ и҆ прест҃ы́мъ и҆ животворѧ́щимъ дх҃омъ въ безконе́чныѧ вѣ́ки. А҆ми́нь.

Моли́тва прпⷣбномꙋ мѡѷсе́ю ᲂу҆́гринꙋ:

Ѽ пречꙋ́дный и҆ бг҃оно́сный ѻ҆́тче мѡѷсе́е, и҆зрѧ́дный ᲂу҆го́дниче хрⷭ҇то́въ и҆ вели́кїй чꙋдотво́рче, къ тебѣ̀ смире́нно припа́даемъ и҆ мо́лимсѧ: да́ждь на́мъ бы́ти прича́стникѡмъ любвѐ твоеѧ̀ къ бг҃ꙋ и҆ бли́жнемꙋ, помозѝ на́мъ твори́ти во́лю гдⷭ҇ню въ простотѣ̀ се́рдца и҆ смире́нїи, за́пѡвѣди гдⷭ҇ни соверша́ти непогрѣши́тельнѡ, при́зри бл҃гоꙋтро́бнѡ на всѧ́кꙋю дꙋ́шꙋ вѣ́рныхъ твои́хъ чти́телей, ми́лости и҆ по́мощи твоеѧ̀ и҆́щꙋщихъ. Є҆́й, всебл҃гі́й ᲂу҆го́дниче бж҃їй, ᲂу҆слы́ши на́съ, молѧ́щихсѧ тебѣ̀, и҆ не пре́зри на́съ, тре́бꙋющихъ твоегѡ̀ застꙋпле́нїѧ и҆ досто́йнꙋю пѣ́снь тебѣ̀ приносѧ́щихъ: тебѐ ᲂу҆блажа́емъ, ѻ҆́тче мѡѷсе́е, тѧ̀ воспѣва́емъ, чⷭ҇тоты̀ свѣти́льниче, прославлѧ́юще млⷭ҇тиваго бг҃а, во ст҃ѣ́й безнача́льнѣй трⷪ҇цѣ сла́вимагѡ: ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва чⷭ҇тно́мꙋ крⷭ҇тꙋ̀:

Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀. Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀, та́кѡ да поги́бнꙋтъ бѣ́си ѿ лица̀ лю́бѧщихъ бг҃а, и҆ зна́менꙋющихсѧ крⷭ҇тнымъ зна́менїемъ, и҆ въ весе́лїи глаго́лющихъ: ра́дꙋйсѧ, пречⷭ҇тны́й и҆ животворѧ́щїй крⷭ҇те гдⷭ҇ень, прогонѧ́ѧй бѣ́сы си́лою на тебѣ̀ пропѧ́тагѡ гдⷭ҇а на́шегѡ і҆и҃са хрⷭ҇та̀, во а҆́дъ сше́дшагѡ, и҆ попра́вшагѡ си́лꙋ дїа́волю, и҆ дарова́вшагѡ на́мъ тебѐ, крⷭ҇тъ сво́й чⷭ҇тны́й, на прогна́нїе всѧ́кагѡ сꙋпоста́та. Ѽ пречⷭ҇тны́й и҆ животворѧ́щїй крⷭ҇те гдⷭ҇ень! помога́й мѝ со ст҃о́ю гпⷭ҇же́ю дв҃ою бцⷣею, и҆ со всѣ́ми ст҃ы́ми во вѣ́ки. А҆ми́нь.

Та́же глаго́летъ:

Сла́ва тебѣ̀ бж҃е на́шъ, сла́ва тебѣ̀.

Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ, бл҃же, дꙋ́шы на́шѧ. *

* Ѿ па́схи до вознесе́нїѧ вмѣ́стѡ сеѧ̀ мл҃твы глаго́лемъ тропа́рь:

Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ. [Три́жды.]

Ѿ вознесе́нїѧ до трⷪ҇цы начина́емъ мл҃твы со Ст҃ы́й бж҃е: ѡ҆пꙋска́юще всѧ̑ предшє́ствꙋющаѧ.

Досто́йно є҆́сть ꙗ҆́кѡ вои́стиннꙋ, бл҃жи́ти тѧ̀ бцⷣꙋ, приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. Чⷭ҇тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ. *

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. [Три́жды.]

Гдⷭ҇и і҆и҃се хрⷭ҇тѐ бж҃е на́шъ, мл҃твъ ра́ди пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ, спаси́ мѧ грѣ́шнаго.

* Ѿ па́схи до вознесе́нїѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ і҆рмо́съ ѳ҃-ѧ пѣ́сни пасха́льнагѡ канѡ́на:

А҆́гг҃лъ вопїѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскр҃се тридне́венъ ѿ гро́ба, и҆ мє́ртвыѧ воздви́гнꙋвый: лю́дїе весели́тесѧ.

Свѣти́сѧ, свѣти́сѧ, но́вый і҆ерⷭ҇ли́ме: сла́ва бо гдⷭ҇нѧ на тебѣ̀ возсїѧ̀. Ликꙋ́й ны́нѣ, и҆ весели́сѧ сїѡ́не. Ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.

Въ попра́зднство дванадесѧ́тыхъ пра́здникѡвъ глаго́лемъ и҆́хъ задосто́йники.