Канон в неделю о мытаре и фарисее

Припев: Поми́луй мя, Бо́же, поми́луй мя.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Глас 4.

Пе́снь 1.

Ирмо́с: Я́ко по су́ху, пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

При́тчами вводя́й вся́ Христо́с, к жития́ исправле́нию, мытаря́ возвыша́ет от смире́ния, показа́в фарисе́я возвыше́нием смиря́ема.

От смире́ния че́сть высокотворя́щую, от возноше́ния же паде́ние ви́дя лю́тое, мытаре́вым ревну́й до́брым, и фарисе́йскую зло́бу возненави́ждь.

От возноше́ния испражня́ется вся́кое благо́е, от смире́ния же потребля́ется вся́кое зло́е: е́же облобыза́им ве́рнии, гнуша́ющеся я́ве о́браза тщесла́внаго.

Смиренному́дрым бы́ти Свои́м ученико́м хотя́ все́х Ца́рь, наказу́я уча́ше ревнова́ти мытаре́ву воздыха́нию и смире́нию.

Сла́ва: Я́ко мыта́рь стеню́, и рыда́ньми немо́лчными Го́споди, ны́не прихожду́ Твоему́ благоутро́бию: уще́дри и мене́, смире́нием жи́знь ны́не препровожда́юща.

И ны́не: Ра́зум, сове́т, ча́яние, те́ло, ду́шу и ду́х, Влады́чице, возлага́ю к Тебе́: лю́тых вра́г и напа́стей, и бу́дущаго преще́ния изба́ви, и спаси́ мя́.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

От гно́ища у́бо страсте́й смире́нный возноша́ется, от высоты́ же доброде́телей низпа́дает лю́те вся́к высокосе́рдый: его́же о́браза зло́бы убежи́м.

Тщесла́вие оттщетева́ет бога́тство пра́вды, смире́ние же расточа́ет страсте́й мно́жество: е́же подража́ющия ны́, ча́сти покажи́ мытаре́вы Спа́се.

Я́ко мыта́рь и мы́ бию́щеся в пе́рси, умиле́нием вопие́м: очи́сти Бо́же на́с, гре́шных, я́ко да сего́ прии́мем оставле́ние.

К ре́вности прии́дем ве́рнии, исправля́юще кро́ткое, смире́нию соживу́ще в стена́нии се́рдца, пла́че же и моли́тве, я́ко да и́мамы от Бо́га проще́ние.

Сла́ва: Отри́нем ве́рнии высокохва́льную горды́ню, возноше́ние же лю́тое, и дме́ние ме́рзкое, и зле́йшее фарисе́ево Бо́гу неле́пое свире́пство.

И ны́не: В Тебе́ еди́ном прибе́жищи наде́явся, да не отпаду́ до́браго ча́яния: но да улучу́ Твою́ по́мощь Чи́стая, вся́каго вре́да лю́тых избавля́емый.

Седа́льны, гла́с 4.

Смире́ние вознесе́ одержи́маго злы́ми, мытаря́ возстена́вша, и е́же очи́сти, к Зижди́телю воззва́ша: возноше́ние же низложи́ от пра́вды окая́ннаго фарисе́я велере́чующа. Те́мже поревну́им до́брым, злы́х отступа́юще.

Сла́ва: Смире́ние дре́вле вознесе́ мытаря́, пла́чем возопи́вша: очи́сти, и оправди́ся. Того́ подража́им вси́, во глубину́ зо́л впа́дшии, возопии́м Спа́су из глубины́ се́рдца: согреши́хом, очи́сти Еди́не Человеколю́бче.

И ны́не: Ско́ро приими́ Влады́чице, моле́ния на́ша, и сия́ принеси́ Твоему́ Сы́ну и Бо́гу, Госпоже́ Всенепоро́чная: разреши́ обстоя́ния к Тебе́ притека́ющих, сокруши́ ко́зни, и низложи́ де́рзость вооружа́ющихся безбо́жно на рабы́ Твоя́, Пречи́стая.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Изря́дный показа́ пу́ть возноше́ния, смире́ние, Сло́во смири́вшееся да́же и до зра́ка ра́бия: Его́же подража́я вся́кий, возноша́ется смиря́яся.

Вознесе́ся пра́ведник, и низпаде́ фарисе́й: во мно́жестве же зо́л отягча́емый смири́ся, но вознесе́ся мыта́рь, ненаде́жно оправда́емый.

Нищеты́ хода́тай, от бога́тства доброде́телей, безу́мие яви́ся: и бога́тство а́бие смире́ние оправда́ния от кра́йния нищеты́, ю́же стя́жим.

Предре́кл еси́ Влады́ко, велему́дрствующим противоста́ти вся́чески, и смире́нным благода́ть Твою́ подая́ Спа́се, смири́вшимся ны́не на́м Твою́ благода́ть низпосли́.

Сла́ва: К Боже́ственному возноше́нию при́сно возводя́ на́с Спа́с и Влады́ка, высокотво́рное показа́ смире́ние: но́ги бо ученико́м Свои́ма рука́ма обмы́.

И ны́не: Я́ко Све́т непристу́пный Де́во ро́ждшая, души́ моея́ тьму́ свети́тельною заре́ю разжени́, и к стезя́м спасе́ния житие́ мое́ руково́дствуй.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Фарисе́евы доброде́тели потщи́мся подража́ти, и поревнова́ти мытаре́ву смире́нию, во обою́ ненави́дяще безме́стное мне́ние, и па́губу паде́ний.

Пра́вды тече́ние тще́тное обличи́ся, сопря́г в не́м фарисе́й мне́ние: а́бие же мыта́рь высокотво́рною доброде́телию стяжа́ спу́тника, смире́ние.

Колесни́чник в доброде́телех, мня́шеся тещи́ фарисе́й: но пе́ший, па́че лиди́йския колесни́цы теки́й, мыта́рь до́бре предвари́, припря́г щедро́те смире́ние.

Мытаре́ву при́тчу вси́ уразуме́вше умо́м, прииди́те поревну́им слеза́м, ду́х сокруше́нный Бо́гу принося́ще, грехо́в и́щуще оставле́ния.

Сла́ва: Возносли́вый и зло́бный, гордели́вый же и де́рзый дале́че отри́нем разу́мнии фарисе́ев нра́в, лю́тый велехва́льный, я́ко да не обнажи́мся Боже́ственныя благода́ти.

И ны́не: Же́зл си́лы Блага́я, все́м низпосли́ на́м к Тебе́ прибега́ющим, облада́ти посреде́ все́х вра́г подаю́щи, и вся́каго вре́да изыма́ющи.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Жития́ по́прище мыта́рь вку́пе и фарисе́й теча́ста: но о́в у́бо высокоу́мием содержи́мь, сра́мне утону́, о́в же смире́нием спасе́ся.

Жития́ бе́дное премину́юще мы́ тече́ние, подража́им мытаре́во у́бо мудрова́ние ревни́тельно: бежи́м же киче́ния ме́рзкаго фарисе́я, и жи́ви бу́дем.

Нра́вом поревну́им Спа́са Иису́са, и Его́ смире́нию, жела́юще непреста́нное ра́дости селе́ние получи́ти, во стране́ живу́щих водворя́ющеся.

Показа́л еси́ Влады́ко, Твои́м ученико́м высокотво́рное смире́ние, ле́нтием препоя́сан по чре́слом, но́зе умы́л еси́, и сему́ о́бразу подража́ти повеле́л еси́.

Сла́ва: Житие́ проидо́ста фарисе́й доброде́тельми, и мыта́рь прегреше́ньми. Но о́в у́бо от го́рдости умовре́дныя, отступи́ смире́ния: о́в же возноша́ется, смиренному́др я́влься.

И ны́не: На́га простото́ю, нехи́тростною же жи́знию созда́на, преступле́ния ле́стию оде́я мя́ вра́г, и пло́ти дебельство́м: ны́не же Твои́м хода́тайством Отрокови́це, спаса́юся.

Конда́к.

Фарисе́ева убежи́м высокоглаго́лания, и мытаре́ве научи́мся высоте́ глаго́л смире́нных, покая́нием взыва́юще: Спа́се ми́ра, очи́сти рабы́ Твоя́.

Конда́к 2-й.

Воздыха́ния принесе́м мыта́рская Го́сподеви, и к Нему́ присту́пим гре́шнии я́ко Влады́це: хо́щет бо спасе́ния все́х челове́ков, оставле́ние подае́т все́м ка́ющимся. На́с бо ра́ди воплоти́ся, Бо́г сы́й Отцу́ собезнача́льный.

И́кос:

Са́ми себе́ бра́тие вси́ смири́м воздыха́ньми, рыда́ньми побие́м со́весть: да в суде́ тогда́ ве́чном та́мо яви́мся ве́рнии, непови́нни, получи́вше оставле́ние. Та́мо бо е́сть вои́стинну ослабле́ние, е́же ви́дети на́м ны́не умо́лим: та́мо боле́знь отбеже́, печа́ль и из глубины́ воздыха́ния, во Еде́ме ди́внем, его́же Христо́с Зижди́тель, Бо́г сы́й Отцу́ собезнача́льный.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Оправда́ния де́лы возвыша́емый, сетьми́ тщесла́вия лю́те превознесе́ся фарисе́й, безме́рно хваля́ся: мыта́рь же ле́гким крило́м смире́ния возне́сся, Бо́гу прибли́жися.

Смире́ния а́ки ле́ствицею употреби́вся о́бразом мыта́рь, к небе́сней высоте́ возвы́сися: горды́нею же гнило́ю и безу́мием окая́нный возне́сся фарисе́й, сни́де до а́да преиспо́дняго.

Пра́ведных ловя́ у́бо лука́вый, образми́ тщесла́вия кра́дет: гре́шных же сетьми́ отча́яния связу́ет. Но у́бо от обои́х зо́л мытаря́ ревни́телие, изба́витися потщи́мся.

Моли́твою Бо́гу на́шему припаде́м, слеза́ми и те́плыми воздыха́нии, подража́юще мытаре́во высокотво́рное смире́ние, пою́ще ве́рнии: благослове́н еси́ Бо́же оте́ц на́ших.

Сла́ва: Наказу́яй ученики́ предглаго́лал еси́ Влады́ко, не му́дрствовати высо́кая, совводи́тися же смире́нным уча́ Спа́се. Те́мже зове́м Тебе́ ве́рнии: благослове́н еси́ Бо́же оте́ц на́ших.

И ны́не: Иа́ковлю Тя́ добро́ту, и Боже́ственную ле́ствицу, от до́лу ю́же ви́де пе́рвее, просте́ртую к высоте́, ве́мы Чи́стая, низводя́щую свы́ше Бо́га воплоще́нна, и земны́я па́ки возводя́щую.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Смиренному́дренным нра́вом ми́лостива Го́спода мыта́рь воздохну́в обре́те, и спасе́н бы́сть: о́бразом же лю́тым язы́ка велере́чиваго, пра́вды отпаде́ фарисе́й.

Фарисе́ева киче́ния произволе́ния, и именова́ния чистоты́, бежи́м ве́рнии: ревну́юще мытаре́ву до́бре поми́лованному смире́нию и нра́ву.

Гла́сы мытаре́вы ве́рнии веща́им в це́ркви святе́й: Бо́же очи́сти, да с ни́м улучи́м проще́ние, па́губы велехва́льнаго изба́вльшеся фарисе́я.

Воздыха́нию мытаре́ву вси́ поревну́им, и Бо́гу бесе́дующе, те́плыми слеза́ми возопии́м Ему́: Человеколю́бче, согреши́хом, благоутро́бне Ще́дрый, очи́сти и спаси́.

Благослови́м Отца́ и Сы́на и Свята́го Ду́ха, Го́спода: Стена́нием мытаре́вым Бо́г преклони́ся, оправди́в же сего́, все́м показа́ преклоня́тися при́сно, воздыха́ньми же и слеза́ми, прегреше́ний прося́ще разреше́ние.

И ны́не: Не ве́м па́че Тебе́ ино́го заступле́ния, Тя́ предлага́ю моли́твенницу, Чи́стая Всенепоро́чная. Тя́ ко из Тебе́ рожде́нному хода́таицу дви́жу: все́х оскорбля́ющих мя́ свобо́дна покажи́.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Пу́ть возноше́ния смире́ние, от Христа́ взе́мше спасе́ния о́браз, мытаре́ву обы́чаю поревну́им, киче́ние возноше́ния дале́че отмета́юще, нра́вом же смиренному́дрия Бо́га умоля́юще.

Душе́вную горды́ню отве́ржим, нра́в пра́вый смиренному́дрия стя́жим, себе́ оправда́ти не тщи́мся, тщесла́вия киче́ние возненави́дим, и с мытаре́м Бо́га умо́лим.

Моли́твы Соде́телю ми́лости принесе́м мыта́рския, фарисе́йских отвраща́ющеся неблагода́рных моли́тв, и велехва́льных гласо́в, и́же на бли́жняго су́д возво́дят, да Бо́га ми́лостива и све́т привлече́м.

Мно́гим прегреше́ний собра́нием отягче́н, изоби́лием зло́бы мытаря́ преидо́х, и фарисе́ево велехва́льное киче́ние притяжа́х, отвсю́ду пу́ст все́х бы́в благи́х: Го́споди, пощади́ мя́.

Твоего́ сподо́би блаже́нства, Тебе́ ра́ди ду́хом ни́щих су́щих: уче́нием бо Твоего́ повеле́ния, ду́х сокруше́нный Тебе́ прино́сим, Спа́се, прие́м, спаси́ Тебе́ служа́щия.

Сла́ва: Бо́гу мыта́рь не́когда помоли́выйся, в це́рковь ве́рне вше́д, оправда́ся: воздыха́ньми бо и слеза́ми прише́д, сокруше́нием же се́рдца: все́ отложи́ грехо́в бре́мя очище́ньми.

И ны́не: Пе́ти, сла́вити, и блажи́ти Тя́ дава́й на́м, досто́йно чту́щим Тя́ Пречи́стая, и Рождество́ Твое́ велича́ющим, еди́на благослове́нная: Ты́ бо еси́ похвала́ христиа́ном, и к Бо́гу моли́твенница благоприя́тная.

Ексапостила́рий.

Сла́ва: Высокоре́чия убежи́м фарисе́ева зле́йшаго, смире́нию же навы́кнем мытаре́ву изря́днейшему, да вознесе́мся вопию́ще к Бо́гу со о́нем: очи́сти рабы́ Твоя́, роди́выйся от Де́вы Христе́ Спа́се во́лею, и Кре́ст претерпе́вый, совоздви́гнувый ми́р Твои́м Боже́ственным могу́тством.

И ны́не: Творе́ц созда́ния, и Бо́г все́х, пло́ть челове́ческую прия́т из непоро́чныя утро́бы Твоея́, Всепе́тая Богоро́дице: и тле́нное мое́ естество́ все́ обнови́, па́ки я́коже пре́жде рождества́ оста́вль по рождестве́. Отону́дуже Тя́ ве́рою вси́ восхваля́юще зове́м: ра́дуйся ми́ру сла́во.

Пѣ́снь а҃.

І҆рмо́съ: Ꙗ҆́кѡ по сꙋ́хꙋ, пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

При́тчами вводѧ́й всѧ̑ хрⷭ҇то́съ, къ житїѧ̀ и҆справле́нїю, мытарѧ̀ возвыша́етъ ѿ смире́нїѧ, показа́въ фарїсе́а возвыше́нїемъ смирѧ́ема.

Ѿ смире́нїѧ че́сть высокотворѧ́щꙋю, ѿ возноше́нїѧ же паде́нїе ви́дѧ лю́тое, мытарє́вымъ ревнꙋ́й дѡ́брымъ, и҆ фарїсе́йскꙋю ѕло́бꙋ возненави́ждь.

Ѿ возноше́нїѧ и҆спражнѧ́етсѧ всѧ́кое бл҃го́е, ѿ смире́нїѧ же потреблѧ́етсѧ всѧ́кое ѕло́е: є҆́же ѡ҆блобыза́имъ вѣ́рнїи, гнꙋша́ющесѧ ꙗ҆́вѣ ѡ҆́браза тщесла́внагѡ.

Смиренномꙋ̑дрымъ бы́ти свои̑мъ ᲂу҆ч҃нкѡ́мъ хотѧ̀ всѣ́хъ цр҃ь, наказꙋ́ѧ ᲂу҆ча́ше ревнова́ти мытаре́вꙋ воздыха́нїю и҆ смире́нїю.

Сла́ва: Ꙗ҆́кѡ мыта́рь стеню̀, и҆ рыда́ньми немо́лчными гдⷭ҇и, ны́нѣ прихождꙋ̀ твоемꙋ̀ бл҃гоꙋтро́бїю: ᲂу҆ще́дри и҆ менѐ, смире́нїемъ жи́знь ны́нѣ препровожда́юща.

И҆ ны́нѣ: Ра́зꙋмъ, совѣ́тъ, ча́ѧнїе, тѣ́ло, дꙋ́шꙋ и҆ дꙋ́хъ, влⷣчце, возлага́ю къ тебѣ̀: лю́тыхъ вра̑гъ и҆ напа́стей, и҆ бꙋ́дꙋщагѡ преще́нїѧ и҆зба́ви, и҆ сп҃си́ мѧ.

Пѣ́снь г҃.

І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й рѡ́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Ѿ гно́ища ᲂу҆́бѡ страсте́й смире́нный возноша́етсѧ, ѿ высоты́ же добродѣ́телей низпа́даетъ лю́тѣ всѧ́къ высокосе́рдый: є҆гѡ́же ѡ҆́браза ѕло́бы ᲂу҆бѣжи́мъ.

Тщесла́вїе ѿтщетѣва́етъ бога́тство пра́вды, смире́нїе же расточа́етъ страсте́й мно́жество: є҆́же подража́ющыѧ ны̀, ча́сти покажѝ мытаре́вы сп҃се.

Ꙗ҆́кѡ мыта́рь и҆ мы̀ бїю́щесѧ въ пє́рси, ᲂу҆миле́нїемъ вопїе́мъ: ѡ҆чи́сти бж҃е на́съ грѣ́шныхъ, ꙗ҆́кѡ да сегѡ̀ прїи́мемъ ѡ҆ставле́нїе.

Къ ре́вности прїи́демъ вѣ́рнїи, и҆справлѧ́юще кро́ткое, смире́нїю соживꙋ́ще въ стена́нїи се́рдца, пла́чѣ же и҆ мл҃твѣ, ꙗ҆́кѡ да и҆́мамы ѿ бг҃а проще́нїе.

Сла́ва: Ѿри́немъ вѣ́рнїи высокохва́льнꙋю горды́ню, возноше́нїе же лю́тое, и҆ дме́нїе ме́рзкое, и҆ ѕлѣ́йшее фарїсе́ево бг҃ꙋ нелѣ́пое свирѣ́пство.

И҆ ны́нѣ: Въ тебѣ̀ є҆ди́номъ прибѣ́жищи надѣ́ѧвсѧ, да не ѿпадꙋ̀ до́брагѡ ча́ѧнїѧ: но да ᲂу҆лꙋчꙋ̀ твою̀ по́мощь чⷭ҇таѧ, всѧ́кагѡ вре́да лю́тыхъ и҆збавлѧ́емый.

Сѣда́льны, гла́съ д҃.

Смире́нїе вознесѐ ѡ҆держи́магѡ ѕлы́ми, мытарѧ̀ возстена́вша, и҆ є҆́же ѡ҆чи́сти, къ зижди́телю воззва́ша: возноше́нїе же низложѝ ѿ пра́вды ѡ҆каѧ́ннаго фарїсе́а велерѣ́чꙋюща. тѣ́мже поревнꙋ́имъ дѡ́брымъ, ѕлы́хъ ѿстꙋпа́юще.

Сла́ва: Смире́нїе дре́вле вознесѐ мытарѧ̀, пла́чемъ возопи́вша: ѡ҆чи́сти, и҆ ѡ҆правди́сѧ. того̀ подража́имъ всѝ, во глꙋбинꙋ̀ ѕѡ́лъ впа́дшїи, возопїи́мъ сп҃сꙋ и҆з̾ глꙋбины̀ се́рдца: согрѣши́хомъ, ѡ҆чи́сти є҆ди́не чл҃вѣколю́бче.

И҆ ны́нѣ: Ско́рѡ прїимѝ влⷣчце, молє́нїѧ на̑ша, и҆ сїѧ̑ принесѝ твоемꙋ̀ сн҃ꙋ и҆ бг҃ꙋ, гпⷭ҇жѐ всенепоро́чнаѧ: разрѣшѝ ѡ҆бстоѧ̑нїѧ къ тебѣ̀ притека́ющихъ, сокрꙋшѝ кѡ́зни, и҆ низложѝ де́рзость воѡрꙋжа́ющихсѧ безбо́жнѡ на рабы̑ твоѧ̑, пречⷭ҇таѧ.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

И҆зрѧ́дный показа̀ пꙋ́ть возноше́нїѧ, смире́нїе, сло́во смири́вшеесѧ да́же и҆ до зра́ка ра́бїѧ: є҆го́же подража́ѧ всѧ́кїй, возноша́етсѧ смирѧ́ѧсѧ.

Вознесе́сѧ првⷣникъ, и҆ низпадѐ фарїсе́й: во мно́жествѣ же ѕѡ́лъ ѡ҆тѧгча́емый смири́сѧ, но вознесе́сѧ мыта́рь, ненаде́жнѡ ѡ҆правда́емый.

Нищеты̀ хода́тай, ѿ бога́тства добродѣ́телей, безꙋ́мїе ꙗ҆ви́сѧ: и҆ бога́тство а҆́бїе смире́нїе ѡ҆правда́нїѧ ѿ кра́йнїѧ нищеты̀, ю҆́же стѧ́жимъ.

Предре́клъ є҆сѝ влⷣко, велемꙋ́дрствꙋющымъ противоста́ти всѧ́чески, и҆ смирє́ннымъ бл҃года́ть твою̀ подаѧ̀ сп҃се, смири́вшымсѧ ны́нѣ на́мъ твою̀ бл҃года́ть низпослѝ.

Сла́ва: Къ бж҃е́ственномꙋ возноше́нїю при́снѡ возводѧ̀ на́съ сп҃съ и҆ влⷣка, высокотво́рное показа̀ смире́нїе: но́ги бо ᲂу҆ч҃нкѡ́мъ свои́ма рꙋка́ма ѡ҆бмы̀.

И҆ ны́нѣ: Ꙗ҆́кѡ свѣ́тъ непристꙋ́пный дв҃о ро́ждшаѧ, дꙋшѝ моеѧ̀ тьмꙋ̀ свѣти́тельною заре́ю разженѝ, и҆ къ стезѧ́мъ сп҃се́нїѧ житїѐ моѐ рꙋково́дствꙋй.

Пѣ́снь є҃.

І҆рмо́съ: Бж҃їимъ свѣ́тѡмъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ молю́сѧ, тѧ̀ вѣ́дѣти сло́ве бж҃їй и҆́стиннагѡ бг҃а, ѿ мра́ка грѣхо́внагѡ взыва́юща.

Фарїсе́евы добродѣ́тели потщи́мсѧ подража́ти, и҆ поревнова́ти мытаре́вꙋ смире́нїю, во ѻ҆бою̀ ненави́дѧще безмѣ́стное мнѣ́нїе, и҆ па́гꙋбꙋ паде́нїй.

Пра́вды тече́нїе тще́тное ѡ҆бличи́сѧ, сопрѧ́гъ въ не́мъ фарїсе́й мнѣ́нїе: а҆́бїе же мыта́рь высокотво́рною добродѣ́телїю стѧжа̀ спꙋ́тника, смире́нїе.

Колесни́чникъ въ добродѣ́телехъ, мнѧ́шесѧ тещѝ фарїсе́й: но пѣ́шїй, па́че лѷді́йскїѧ колесни́цы текі́й, мыта́рь до́брѣ предварѝ, припрѧ́гъ щедро́тѣ смире́нїе.

Мытаре́вꙋ при́тчꙋ всѝ ᲂу҆разꙋмѣ́вше ᲂу҆мо́мъ, прїиди́те поревнꙋ́имъ слеза́мъ, дꙋ́хъ сокрꙋше́нный бг҃ꙋ приносѧ́ще, грѣхѡ́въ и҆́щꙋще ѡ҆ставле́нїѧ.

Сла́ва: Возносли́вый и҆ ѕло́бный, гордели́вый же и҆ де́рзый дале́че ѿри́немъ разꙋ́мнїи фарїсе́евъ нра́въ, лю́тый велехва́льный, ꙗ҆́кѡ да не ѡ҆бнажи́мсѧ бж҃е́ственныѧ бл҃года́ти.

И҆ ны́нѣ: Же́злъ си́лы бл҃га́ѧ, всѣ̑мъ низпослѝ на́мъ къ тебѣ̀ прибѣга́ющымъ, ѡ҆блада́ти посредѣ̀ всѣ́хъ вра̑гъ подаю́щи, и҆ всѧ́кагѡ вре́да и҆з̾има́ющи.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живѡ́тъ мо́й, многомлⷭ҇тиве.

Житїѧ̀ по́прище мыта́рь вкꙋ́пѣ и҆ фарїсе́й теча́ста: но ѻ҆́въ ᲂу҆́бѡ высокоꙋ́мїемъ содержи́мь, сра́мнѣ ᲂу҆тонꙋ̀, ѻ҆́въ же смире́нїемъ сп҃се́сѧ.

Житїѧ̀ бѣ́дное преминꙋ́юще мы̀ тече́нїе, подража́имъ мытаре́во ᲂу҆́бѡ мꙋдрова́нїе ревни́тельнѡ: бѣжи́мъ же киче́нїѧ ме́рзкагѡ фарїсе́а, и҆ жи́ви бꙋ́демъ.

Нра́вѡмъ поревнꙋ́имъ сп҃са і҆и҃са, и҆ є҆гѡ̀ смире́нїю, жела́юще непреста́нное ра́дости селе́нїе полꙋчи́ти, во странѣ̀ живꙋ́щихъ водворѧ́ющесѧ.

Показа́лъ є҆сѝ влⷣко, твои̑мъ ᲂу҆ч҃нкѡ́мъ высокотво́рное смире́нїе, ле́нтїемъ препоѧ́санъ по чре́слѡмъ, но́зѣ ᲂу҆мы́лъ є҆сѝ, и҆ семꙋ̀ ѡ҆́бразꙋ подража́ти повелѣ́лъ є҆сѝ.

Сла́ва: Житїѐ проидо́ста фарїсе́й добродѣ́тельми, и҆ мыта́рь прегрѣше́ньми. но ѻ҆́въ ᲂу҆́бѡ ѿ го́рдости ᲂу҆мовре́дныѧ, ѿстꙋпѝ смире́нїѧ: ѻ҆́въ же возноша́етсѧ, смиренномꙋ́дръ ꙗ҆́вльсѧ.

И҆ ны́нѣ: На́га простото́ю, нехи́тростною же жи́знїю созда́на, престꙋпле́нїѧ ле́стїю ѡ҆дѣ́ѧ мѧ̀ вра́гъ, и҆ пло́ти дебельство́мъ: ны́нѣ же твои́мъ хода́тайствомъ ѻ҆трокови́це, сп҃са́юсѧ.

Конда́къ.

Фарїсе́ева ᲂу҆бѣжи́мъ высокоглаго́ланїѧ, и҆ мытаре́вѣ наꙋчи́мсѧ высотѣ̀ глагѡ́лъ смире́нныхъ, покаѧ́нїемъ взыва́юще: сп҃се мі́ра, ѡ҆чи́сти рабы̑ твоѧ̑.

Конда́къ в҃.

Воздыха̑нїѧ принесе́мъ мыта̑рскаѧ гдⷭ҇ви, и҆ къ немꙋ̀ пристꙋ́пимъ грѣ́шнїи ꙗ҆́кѡ влⷣцѣ: хо́щетъ бо спасе́нїѧ всѣ́хъ человѣ́кѡвъ, ѡ҆ставле́нїе подае́тъ всѣ̑мъ ка́ющымсѧ. на́съ бо ра́ди воплоти́сѧ, бг҃ъ сы́й ѻ҆ц҃ꙋ̀ собезнача́льный.

І҆́косъ:

Са́ми себѐ бра́тїе всѝ смири́мъ воздыха́ньми, рыда́ньми побїе́мъ со́вѣсть: да въ сꙋдѣ̀ тогда̀ вѣ́чномъ та́мѡ ꙗ҆ви́мсѧ вѣ́рнїи, непови́нни, полꙋчи́вше ѡ҆ставле́нїе. та́мѡ бо є҆́сть вои́стиннꙋ ѡ҆слабле́нїе, є҆́же ви́дѣти та́мъ ны́нѣ ᲂу҆мо́лимъ: та́мѡ болѣ́знь ѿбѣжѐ, печа́ль и҆ и҆з̾ глꙋбины̀ воздыха̑нїѧ, во є҆де́мѣ ди́внѣмъ, є҆гѡ́же хрⷭ҇то́съ зижди́тель, бг҃ъ сы́й ѻ҆ц҃ꙋ̀ собезнача́льный.

Пѣ́снь з҃:

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆ц҃ъ на́шихъ.

Ѡ҆правда́нїѧ дѣ́лы возвыша́емый, сѣтьмѝ тщесла́вїѧ лю́тѣ превознесе́сѧ фарїсе́й, безмѣ́рнѡ хвалѧ́сѧ: мыта́рь же ле́гкимъ крило́мъ смире́нїѧ возне́ссѧ, бг҃ꙋ прибли́жисѧ.

Смире́нїѧ а҆́ки лѣ́ствицею ᲂу҆потреби́всѧ ѡ҆́бразомъ мыта́рь, къ нбⷭ҇нѣй высотѣ̀ возвы́сисѧ: горды́нею же гнило́ю и҆ безꙋ́мїемъ ѻ҆каѧ́нный возне́ссѧ фарїсе́й, сни́де до а҆́да преиспо́днѧгѡ.

Пра́ведныхъ ловѧ̀ ᲂу҆́бѡ лꙋка́вый, ѡ҆бразмѝ тщесла́вїѧ кра́детъ: грѣ́шныхъ же сѣтьмѝ ѿча́ѧнїѧ свѧзꙋ́етъ. но ᲂу҆́бѡ ѿ ѻ҆бои́хъ ѕѡ́лъ мытарѧ̀ ревни́телїе, и҆зба́витисѧ потщи́мсѧ.

Мл҃твою бг҃ꙋ на́шемꙋ припаде́мъ, слеза́ми и҆ те́плыми воздыха́нїи, подража́юще мытаре́во высокотво́рное смире́нїе, пою́ще вѣ́рнїи: бл҃гослове́нъ є҆сѝ бж҃е ѻ҆тє́цъ на́шихъ.

Сла́ва: Наказꙋ́ѧй ᲂу҆ч҃нкѝ предглаго́лалъ є҆сѝ влⷣко, не мꙋ́дрствовати высѡ́каѧ, совводи́тисѧ же смирє́ннымъ ᲂу҆чѧ̀ сп҃се. тѣ́мже зове́мъ тебѣ̀ вѣ́рнїи: бл҃гослове́нъ є҆сѝ бж҃е ѻ҆тє́цъ на́шихъ.

И҆ ны́нѣ: І҆а́кѡвлю тѧ̀ добро́тꙋ, и҆ бж҃е́ственнꙋю лѣ́ствицꙋ, ѿ до́лꙋ ю҆́же ви́дѣ пе́рвѣе, просте́ртꙋю къ высотѣ̀, вѣ́мы чⷭ҇таѧ, низводѧ́щꙋю свы́ше бг҃а воплоще́нна, и҆ земны̑ѧ па́ки возводѧ́щꙋю.

Пѣ́снь и҃:

І҆рмо́съ: И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Смиренномꙋ́дреннымъ нра́вомъ млⷭ҇тива гдⷭ҇а мыта́рь воздохнꙋ́въ ѡ҆брѣ́те, и҆ сп҃се́нъ бы́сть: ѡ҆́бразомъ же лю́тымъ ѧ҆зы́ка велерѣ́чивагѡ, пра́вды ѿпадѐ фарїсе́й.

Фарїсе́ева киче́нїѧ произволе́нїѧ, и҆ и҆менова́нїѧ чистоты̀, бѣжи́мъ вѣ́рнїи: ревнꙋ́юще мытаре́вꙋ до́брѣ поми́лованномꙋ смире́нїю и҆ нра́вꙋ.

Гла́сы мытаре́вы вѣ́рнїи вѣща́имъ въ цр҃кви ст҃ѣ́й: бж҃е ѡ҆чи́сти, да съ ни́мъ ᲂу҆лꙋчи́мъ проще́нїе, па́гꙋбы велехва́льнагѡ и҆зба́вльшесѧ фарїсе́а.

Воздыха́нїю мытаре́вꙋ всѝ поревнꙋ́имъ, и҆ бг҃ꙋ бесѣ́дꙋюще, те́плыми слеза́ми возопїи́мъ є҆мꙋ̀: чл҃вѣколю́бче, согрѣши́хомъ, бл҃гоꙋтро́бне ще́дрый, ѡ҆чи́сти и҆ сп҃сѝ.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а: Стена́нїемъ мытаре́вымъ бг҃ъ преклони́сѧ, ѡ҆правди́въ же сего̀, всѣ́мъ показа̀ преклонѧ́тисѧ при́снѡ, воздыха́ньми же и҆ слеза́ми, прегрѣше́нїй просѧ́ще разрѣше́нїе.

И҆ ны́нѣ: Не вѣ́мъ па́че тебѐ и҆но́гѡ застꙋпле́нїѧ, тѧ̀ предлага́ю мл҃твенницꙋ, чⷭ҇таѧ всенепоро́чнаѧ. тѧ̀ ко и҆з̾ тебѐ рожде́нномꙋ хода́таицꙋ дви́жꙋ: всѣ́хъ ѡ҆скорблѧ́ющихъ мѧ̀ свобо́дна покажѝ.

Пѣ́снь ѳ҃:

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо всечⷭ҇таѧ ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Пꙋ́ть возноше́нїѧ смире́нїе, ѿ хрⷭ҇та̀ взе́мше спасе́нїѧ ѡ҆́бразъ, мытаре́вꙋ ѻ҆бы́чаю поревнꙋ́имъ, киче́нїе возноше́нїѧ дале́че ѿмета́юще, нра́вомъ же смиренномꙋ́дрїѧ бг҃а ᲂу҆молѧ́юще.

Дꙋше́внꙋю горды́ню ѿве́ржимъ, нра́въ пра́вый смиренномꙋ́дрїѧ стѧ́жимъ, себѐ ѡ҆правда́ти не тщи́мсѧ, тщесла́вїѧ киче́нїе возненави́димъ, и҆ съ мытаре́мъ бг҃а ᲂу҆мо́лимъ.

Мл҃твы содѣ́телю ми́лости принесе́мъ мыта̑рскїѧ, фарїсе́йскихъ ѿвраща́ющесѧ неблагода́рныхъ мл҃твъ, и҆ велехва́льныхъ гласѡ́въ, и҆̀же на бли́жнѧго сꙋ́дъ возво́дѧтъ, да бг҃а млⷭ҇тива и҆ свѣ́тъ привлече́мъ.

Мно́гимъ прегрѣше́нїй собра́нїемъ ѡ҆тѧгче́нъ, и҆з̾ѻби́лїемъ ѕло́бы мытарѧ̀ преидо́хъ, и҆ фарїсе́ево велехва́льное киче́нїе притѧжа́хъ, ѿвсю́дꙋ пꙋ́стъ всѣ́хъ бы́въ бл҃ги́хъ: гдⷭ҇и, пощади́ мѧ.

Твоегѡ̀ сподо́би бл҃же́нства, тебѐ ра́ди дꙋ́хомъ ни́щихъ сꙋ́щихъ: ᲂу҆че́нїемъ бо твоегѡ̀ повелѣ́нїѧ, дꙋ́хъ сокрꙋше́нный тебѣ̀ прино́симъ, сп҃се прїе́мъ, сп҃сѝ тебѣ̀ слꙋжа́щыѧ.

Сла́ва: Бг҃ꙋ мыта́рь нѣ́когда помоли́выйсѧ, въ цр҃ковь вѣ́рнѣ вше́дъ, ѡ҆правда́сѧ: воздыха́ньми бо и҆ слеза́ми прише́дъ, сокрꙋше́нїемъ же се́рдца: всѐ ѿложѝ грѣхѡ́въ бре́мѧ ѡ҆чище́ньми.

И҆ ны́нѣ: Пѣ́ти, сла́вити, и҆ бл҃жи́ти тѧ̀ дава́й на́мъ, досто́йнѡ чтꙋ́щымъ тѧ̀ пречⷭ҇таѧ, и҆ ржⷭ҇тво̀ твоѐ велича́ющымъ, є҆ди́на бл҃гослове́ннаѧ: ты́ бо є҆сѝ похвала̀ хрⷭ҇тїа́нѡмъ, и҆ къ бг҃ꙋ мл҃твенница бл҃гопрїѧ́тнаѧ.

Є҆ѯапостїла́рїй.

Сла́ва: Высокорѣ́чїѧ ᲂу҆бѣжи́мъ фарїсе́ева ѕлѣ́йшагѡ, смире́нїю же навы́кнемъ мытаре́вꙋ и҆зрѧ́днѣйшемꙋ, да вознесе́мсѧ вопїю́ще къ бг҃ꙋ со ѻ҆́нѣмъ: ѡ҆чи́сти рабы̑ твоѧ̑, роди́выйсѧ ѿ дв҃ы хрⷭ҇тѐ сп҃се во́лею, и҆ крⷭ҇тъ претерпѣ́вый, совоздви́гнꙋвый мі́ръ твои́мъ бж҃е́ственнымъ могꙋ́тствомъ.

И҆ ны́нѣ: Творе́цъ созда́нїѧ, и҆ бг҃ъ всѣ́хъ, пло́ть человѣ́ческꙋю прїѧ́тъ и҆з̾ непоро́чныѧ ᲂу҆тро́бы твоеѧ̀, всепѣ́таѧ бцⷣе: и҆ тлѣ́нное моѐ є҆стество̀ всѐ ѡ҆бновѝ, па́ки ꙗ҆́коже пре́жде ржⷭ҇тва̀ ѡ҆ста́вль по ржⷭ҇твѣ̀. ѿѻнꙋ́дꙋже тѧ̀ вѣ́рою всѝ восхвалѧ́юще зове́мъ: ра́дꙋйсѧ мі́рꙋ сла́во.