Акафист иной Пресвятой Богородице пред иконой «Не рыдай мене, Мати»
Не утвержден для общецерковного использования.
Избра́нной пре́жде все́х ве́к предве́чным сове́том Пресвяты́я Тро́ицы во освяще́нное селе́ние Бо́га Сло́ва Преблагослове́нней Цари́це Богоро́дице ди́вней в зача́тии, ди́вней в житии́ и ди́вней в преставле́нии похва́льное сие́ дерза́ем принести́ пе́ние: Ты́ же, Влады́чице, иму́щая держа́ву непобеди́мую, и милосе́рдие неизрече́нное, от вся́ких зо́л и бе́д свободи́ страну́ на́шу правосла́вную, да зове́м Ти́:
А́нгельстии собо́ри, воплоще́ния та́йне чудя́щеся и Вседержи́телю о Не́й немо́лчныя хвалы́ всегда́ принося́ще, велича́ния прино́сят и Де́ве избра́нней, Богома́тери Пречи́стей, из Нея́ же на спасе́ние все́м Бо́г воплоти́ся; сего́ ра́ди, небожи́телем подража́я, да подви́жется вся́к земноро́дный и, испо́лнь Ду́ха ра́дования, да почита́ет о́н све́тло свяще́нное торжество́ Де́вы и Ма́тере, взыва́я Е́й та́ко:
Ви́дяще Пресвята́я Влады́чице, ско́рби серде́чныя, му́ки душе́вныя и и́скреннее покая́ние люде́й Твои́х Благоволи́ла еси́ яви́ти ико́ну Твою́, в благослове́ние и зна́мение торжества́, христолюби́вому наро́ду. Мы́ же к не́й припа́дающе с ве́рою и сокруше́нным се́рдцем, из глубины́ души́ вопие́м Бо́гу: Аллилу́иа.
Ра́зум недоразумева́ет досто́йно пе́сньми духо́вными восхваля́ти Тя́, Небе́сная Цари́це, я́ко пресла́вно вознесе́на еси́ Сы́ном в Небе́сныя кро́вы в честне́м Успе́нии Твое́м. И ны́не преукраше́нна еси́, Засту́пнице Многоми́лостивая на́ша, боже́ственными нетле́нныма ле́потами, и неуста́нно при́сно призира́еши на люде́й, озло́бленных грехи́ мно́гими, да противустоя́т они́ тве́рдо по́мощию Твое́ю все́м ско́рбем и напа́стем сея́ многотру́дныя жи́зни и, Цари́цу Небе́сную сла́вяще, тща́ние и́мут всегда́ восхваля́ти Ю́ та́ко:
Си́ла Вы́шняго осени́ Тя́, Пречи́стая, соде́лавши Тя́ Ма́терию Го́спода и Спаси́теля На́шего, и укрепи́ Тя́ на многоско́рбнем пути́ жития́ твоего́ земна́го, мы́ же ны́не воспомина́юще Твоя́ боле́зни, егда́ Ты́ услы́шала от Симео́на проро́ка о неми́лостивном убие́нии Сы́на Твоего́, про́сим Тя́: укрепи́ ны́ в тяготе́ ноше́ния креста́ земна́го на́шего и да́руй на́м позна́ние грехо́в и жале́ние о ни́х, покая́нием ве́лием и чу́днем обнови́ ду́ши на́ша и сподо́би с Тобо́й ку́пно во ве́ки воспева́ти Христу́: Аллилу́иа.
Иму́щи в Себе́ оби́льно благода́ть Бо́жию, Ты́, Всенепоро́чная, все́ житие́ Твое́ отдала́ еси́ благи́м попече́нием о Сы́не Твое́м и Го́споде, вся́ глаго́лы Его́ соблюда́ющи в се́рдце Твое́м. Мы́ же, гре́шнии, ско́рбное житие́ Твое́ на земли́ воспомина́юще, глаго́лем Тебе́ похвалы́ таковы́я:
Бу́рею жите́йских бе́д сотряса́еми, многови́дными печа́льми окружа́еми и тьмо́ю оскуде́ния ве́ры омрача́еми, к немерца́ющему све́ту любве́ от ико́ны Твоея́ сия́ющему притека́ем, Богома́ти, прося́щи от Тебе́ умире́ния ми́ра и просвеще́ния духо́внаго. И воспомина́юще страда́ние твоя́, егда́ не обрела́ еси́ Сы́на Твоего́, Го́спода на́шего Иису́са Христа́, в це́ркви и чрез три́ дни́ Его́ не ви́дела еси́; И про́сим у́бо Тя́: умоли́ Его́ и испроси́ у Него́ все́х грехо́в проще́ние и оставле́ние, да ве́чности с Тобо́ю воспои́м Ему́: Аллилу́иа.
Слы́шавше от ве́рных учени́к Сы́на Твоего́, я́ко Го́спода на́шего Иису́са Христа́, мучи́телие поя́ша и связа́ша. Сие́ у́бо воспомина́юще ны́не про́сим Тя́, всесвята́я Де́во и Ма́ти Всевы́шняго, умоли́ Его́, да возврати́т на́м доброде́тели, чрез гре́х изги́бшия, и богоуго́дному житию́ нача́ло положи́ти сподо́бит ны́, зову́щия ти́ си́це:
Боготе́чную звезду́ наставля́ющую ве́рных ше́ствовати по пути́ Бо́жию, зри́м святу́ю ико́ну Твою́, Богома́ти: к не́йже припа́дающии лю́дие прие́млют здра́вие те́ла, оче́с прозре́ние, разслабле́нии укрепле́ние и вси́ благода́рно пою́т Го́сподеви: Аллилу́иа.
Ви́девше Возлю́бленнаго Сы́на Твоего́ на Кресте́ между́ двема́ разбо́йников распя́таго, Пречи́стая Де́во, вели́кую ско́рбь боголюби́ваго и матери́нскаго се́рдца Твоего́ слеза́ми наде́жды растворя́ла еси́, Его́же умоли́, Влады́чице, да пода́ст на́м да́р милосе́рдия Своего́ в ча́с сме́рти на́шея да напита́ет ны́ Те́лом и Кро́вию Свое́ю Боже́ственною пред кончи́ною на́шей. Сего́ ра́ди с наде́ждою и любо́вию взыва́ем ти́ си́це:
Предстоя́ще пред Пречи́стым и чу́дным Твои́м о́бразом, Влады́чице, мы́ зря́ще Тя́ пред Кресто́м Сы́на Твоего́ и на гро́б Его́ взира́юще, преклоня́ем коле́на серде́ц на́ших пред честны́ми страда́ниями Его́ и Твои́м изму́ченным Ма́терним се́рдцем, его́ же ору́жие про́йде, и благогове́йно со стра́хом взира́юще на ору́дия страда́ний Го́спода на́шего Сладча́йшаго Иису́са Христа́, в смире́нии про́сим проще́ния согреше́ний на́ших и с благодаре́нием взыва́ем Ему́: Аллилу́иа.
Возсия́ заря́ искупле́ния на горе́ Голго́фе, когда́ Сы́н тво́й своя́ боже́ственныя дла́ни на Кресте́ распросте́р, му́кою свое́ю ве́сь ми́р от мра́ка сме́ртнаго свобожда́я. Твоея́ ма́терния печа́ли при Кресте́ Сы́на Твоего́ бы́вшей, егда́ ви́дела еси́ Его́ стра́ждуща за вся́ челове́ки му́кою неизглаго́ланною. Те́мже, я́ко искуше́нней вся́чески и сострада́ти в са́мых тя́жких ско́рбях и лише́ниях на́м могу́щей, взыва́ем си́це:
Хотя́щи яви́ти ве́лию любо́вь Свою́ к лю́дям, Человеколю́бец Госпо́дь Тебе́, Ма́терь Свою́ Пренепоро́чную, покро́в и защи́ту ро́ду христиа́нскому дарова́, да бу́деши печа́льным утеше́ние, скорбя́щим ра́дование, отча́янным наде́жда, ве́чныя му́ки Свои́м хода́тайством избавля́ющая и к небе́сному весе́лию все́х приводя́щая, вопию́щих непреста́нно гла́сом хвале́ния Сы́ну Твоему́ и Бо́гу на́шему: Аллилу́иа.
Но́вую показа́л еси́ на́м ми́лость Свою́ Спаси́тель ро́да челове́ческаго явле́нием чудотво́рныя Твоея́, о Богома́ти ико́ны, нарече́нныя «Не рыда́й, мене́, ма́ти». Мы́ же, грехми́ благода́ти лиши́вшися, ви́дяще я́ко с ве́рою приходя́щия к не́й получа́ют по́мощь и ско́рое исцеле́ние, воспева́ем Ти́ сицева́я:
Стра́нники и прише́льцы есмы́ на земли́ се́й, в ско́рбех и боле́знех мно́гих гра́да Небе́снаго взыску́ющия. Ты́ же, я́ко Благомо́щна, по Бо́зе Еди́на еси́ на́ше прибе́жище. Привлецы́ же все́х, пред свято́ю ико́ною Твое́ю покланя́ющихся, от любве́ земны́я к Небе́сней Боже́ственней любви́, к сокро́вищу некра́домому и Би́серу многоце́нному, и́же е́сть Христо́с Бо́г. Да неколе́блемо храня́ще ве́ру правосла́вную, не отсту́пим от Спа́са на́шего, ниже́ да постыди́мся и́мени Его́. То́й бо е́сть кре́пость на́ша и си́ла, Бо́г и ра́дование. Ему́ Еди́ному покланя́емся, пою́ще: Аллилу́иа.
Вся́ су́щи в вы́шних, но и ни́жних не отступа́еши, ра́зум пода́ждь на́м, всеусе́рдная предста́тельнице, на́ша Небе́сная Цари́це: из у́ст бо на́с скве́рных ка́ко мо́щно пе́ти Твоему́ и́мени? О, Богоблаже́нная и Пренепоро́чная Отрокови́це, я́ко благи́х еси́ на́м хода́таица, си́льна еси́ вспомоществова́ти во вся́кой на́ми тре́буемой по́мощи, да Тебе́ со умиле́нием зове́м си́це:
Вся́кое естество́ а́нгельское удиви́ся вели́кому твоему́, Богома́ти, терпе́нию: печа́ли, бо, ско́рби и боле́зни сокры́ла еси́ в се́рдце Свое́м, ви́дящее поруга́ние Сы́на твоего́ от беззако́нных люде́й, оба́че ми́лости Твоя́ к ро́ду челове́ческому и по успе́нии Свое́м не оста́вила еси́, поуча́ющи все́х пе́ти Бо́гу: Аллилу́иа.
Вити́я многовеща́нныя, я́ко ры́бы безгла́сныя ви́дим о Тебе́ Богоро́дице: недоуме́ют бо глаго́лати е́же ка́ко спосле́дствующи страда́нием Сы́на Твоего́ со святы́ми апо́столы всему́ ми́ру благовести́ла еси́ сме́рть и воскресе́ние Его́: по успе́нии же Свое́м неви́димо с Небе́сных круго́в благосе́рдно назира́еши ми́р па́че же в честны́х ико́нах Твои́х простира́еши любо́вь Свою́ к лю́дем, зна́мения и чудеса́ содева́ющи все́м с ве́рою к Тебе́ притека́ющим: те́мже ми́р ве́сь от умиле́ния се́рдца взыва́ет Тебе́:
Спаси́тельное приста́нище дарова́ся на́м свята́я и ди́вная ико́на Твоя́, Богоро́дице Де́во, с не́ю и доны́не си́ла Твоя́ благода́тная пребыва́ет, ве́ру в на́с утвержда́ет и на пу́ть покая́ния наставля́ет. Сего́ ра́ди предстоя́ще пред не́ю, мо́лим Тя́, Пречи́стая, помози́ на́м безпоро́чно пройти́ пу́ть жи́зни сея́ вре́менныя, соблюди́ на́с в чистоте́ и свя́тости и приведи́ на́с в Ца́рствие Сы́на Твоего́, да и мы́, Тобо́ю спасе́ннии, возмо́жем та́мо со а́нгелы и ли́ки святы́х ве́чно воспева́ти хвале́бную пе́снь Бо́гу: Аллилу́иа.
Стена́ еси́ Богоро́дице Де́во, все́м к Тебе́ прибега́ющим: к Небе́сным взята́ и земны́х не оставля́еши, Пресвята́я Богоро́дице, святы́м Твои́м предста́тельством и и́маши ве́лие дерзнове́ние к Сы́ну Твоему́ и Бо́гу на́шему. Те́мже утверди́ в ми́ре глубо́це правосла́вных житие́ и вся́ поле́зная да́руй на́м, да велича́юще воспева́ем Ти́:
Пе́нием и пе́сньми духо́вными восхваля́ем Тя́, Небесе́ и земли́ Цари́це, вы́сшую небе́с и чи́стшую све́тлостей со́лнечных. Велича́ем Тя́, Ма́ти А́гнца Непоро́чнаго, прише́дшаго в ми́р распя́тие претерпе́ти и обнови́ти растле́вшее грехо́м естество́ на́ше. Ты́ у́бо от Свои́х Пречи́стых крове́й Пло́ть Сы́ну Твоему́ заимода́вшая и те́м ди́вною посо́бницею спасе́ния на́шего яви́вшаяся, обновле́нию на́шему послужи́ла еси́. Сего́ ра́ди мо́лим Тя́, неизрече́нную в ми́лости: просвети́ на́с све́том Сы́на Твоего́, да не отлуче́ни бу́дем любве́ Бо́жией, но о Христе́ греху́ уме́рши, и Христу́ приобщи́вшися, со Христо́м и воскре́снем, пою́ще Ему́: Аллилу́иа.
Светоприе́мную свещу́ ико́ну Твою́ дарова́ла еси́ на́м, Влады́чице, во тьме́ нечу́вствия пребыва́ющим и в земны́х ве́щех утеше́ние и́щущим, но не обрета́ющим, да возбну́в от омраче́ния грехо́внаго, о́чи своя́ горе́ возведе́м, Тебе́ же возопие́м такова́я:
Благода́ть ве́лия свы́ше дарова́на святе́й ико́не Твое́й, Преблагослове́нная Ма́ти Бо́жия, е́же убо́гих назира́ти, боля́щих исцеля́ти, та́кожде помога́ти бе́дствующым, утеша́ти скорбя́щих и все́х заблу́ждших на пу́ть и́стины обраща́ти. Те́мже вси́ тружда́ющиися и обремене́ннии, иму́ще в Тебе́ Благу́ю Ма́терь и чрез Тебе́ неизглаго́ланныя ми́лости прие́млюще, уми́льно вопию́т Бо́гу: Аллилу́иа.
Пою́ще Тебе́ пе́сни хвалы́ и благодаре́ния Тебе́ Де́во Всепе́тая о все́х благодея́ниях в оте́честве и гра́де на́шем явле́нных про́сим по́мощи на́м в сму́тное сие́ вре́мя, огради́ на́с Цари́це Небе́сная от враго́в ви́димых и неви́димых, да зове́м Ти́ усе́рдне:
О, Всепе́тая Ма́ти, человеколюби́вая Влады́чице на́ша Богоро́дице! Услы́ши сие́ немощно́е моле́ние с любо́вию и тре́петом припа́дающих к честне́й и сла́вней ико́не твое́й, и огради́ ны́ от вся́каго зла́го обстоя́ния, ско́рби и боле́зни, удержи́ от паде́ний грехо́вных, па́дших возста́ви к покая́нию, и вся́ потре́бная к благочести́вой жи́зни да́руй. Да спаса́емыя тобо́ю во ве́ки сподо́бимся Го́сподеви воспева́ти: Аллилу́иа.
Этот конда́к читается трижды, затем и́кос 1-й и конда́к 1-й.
А́нгельстии собо́ри, воплоще́ния та́йне чудя́щеся и Вседержи́телю о Не́й немо́лчныя хвалы́ всегда́ принося́ще, велича́ния прино́сят и Де́ве избра́нней, Богома́тери Пречи́стей, из Нея́ же на спасе́ние все́м Бо́г воплоти́ся; сего́ ра́ди, небожи́телем подража́я, да подви́жется вся́к земноро́дный и, испо́лнь Ду́ха ра́дования, да почита́ет о́н све́тло свяще́нное торжество́ Де́вы и Ма́тере, взыва́я Е́й та́ко:
Избра́нной пре́жде все́х ве́к предве́чным сове́том Пресвяты́я Тро́ицы во освяще́нное селе́ние Бо́га Сло́ва Преблагослове́нней Цари́це Богоро́дице ди́вней в зача́тии, ди́вней в житии́ и ди́вней в преставле́нии похва́льное сие́ дерза́ем принести́ пе́ние: Ты́ же, Влады́чице, иму́щая держа́ву непобеди́мую, и милосе́рдие неизрече́нное, от вся́ких зо́л и бе́д свободи́ страну́ на́шу правосла́вную, да зове́м Ти́:
О Всеми́лостивая Госпоже́, Цари́це Богоро́дице, от все́х родо́в избра́нная и все́ми ро́ды небе́сными ублажа́емая! Воззри́ ми́лостиво на предстоя́щия пред свято́ю ико́ною Твое́ю лю́ди сия́, усе́рдно моля́щияся Тебе́, и сотвори́ предста́тельством Твои́м и заступле́нием у Сы́на Твоего́ и Бо́га на́шего, да никто́же оты́дет от ме́ста сего́ то́щ упова́ния своего́ и посра́млен в наде́жде свое́й, но да прии́мет ки́йждо от Тебе́ вся́ по благо́му изволе́нию се́рдца своего́, по ну́жде и потре́бе свое́й, во спасе́ние души́ и во здра́вие те́лу.