Конда́к 1.

Избра́нней Влады́чице Богоро́дице Цари́це пе́снь похва́льную приноси́ти дерза́ем, я́ко Сия́, земноро́дных Засту́пница, любо́вию Свое́ю на́с при́сно покрыва́ет. О все́х благодея́ниях, быва́ющих от Нея́ на на́с, явле́нных и неявле́нных, умиле́нно вопие́м:

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

И́кос 1.

Одея́йся све́том, я́ко ри́зою, Госпо́дь Сла́вы Христо́с, Невмести́мый Бо́г на́ш, Его́же трепе́щут вся́ческая, пло́ть Челове́чу та́инственно прия́т от Тебе́, Богоро́дице. Тому́ поклони́мся, с благода́рностию о смире́нии Твое́м, Влады́чице, пою́ще Ти́:

Ра́дуйся, пло́де усе́рднаго моле́ния; ра́дуйся, соде́тельнице на́шего спасе́ния.

Ра́дуйся, христиа́н правосла́вных упова́ние; ра́дуйся, к Сы́ну Твоему́ благо́е дерзнове́ние.

Ра́дуйся, А́нгелов удивле́ние; ра́дуйся, ро́ду челове́ческому благослове́ние.

Ра́дуйся, утвержда́ющая вся́кое до́брое наме́рение; ра́дуйся, скорбе́й на ра́дость премене́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 2.

А́нгелов превзошла́ еси́, Всепе́тая Цари́це, благода́тию. Честне́йшую Херуви́мов и Сла́внейшую без сравне́ния Серафи́мов правосла́вно почита́ем Тя́, Богоро́дице, ра́достно воспева́я о Тебе́ Христу́ Бо́гу: Аллилу́иа.

И́кос 2.

Не и́мут вла́сти над Тобо́ю, Пресвята́я Де́во, ни гро́б, ниже́ сме́рти жа́ло, но в моли́твах неусы́пных любо́вь Твою́ ще́дро излива́еши на ве́рных, я́же благословя́т Тя́ благода́рно зва́нии си́ми:

Ра́дуйся, благоуха́ния честно́е селе́ние; ра́дуйся, ве́рных о Го́споде укрепле́ние.

Ра́дуйся, благочести́вых наде́яние; ра́дуйся, и́ноков умиле́ние.

Ра́дуйся, иере́ев благогове́ние; ра́дуйся, пра́ведных сохране́ние.

Ра́дуйся, враго́в низложе́ние; ра́дуйся, неве́рных посрамле́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 3.

Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице, оба́че, Блага́я су́щи, ве́ру приими́, и́бо любо́вь ве́си Боже́ственную на́шу: Ты́ бо христиа́н еси́ Предста́тельница, Тя́ велича́ем, пою́ще о Тебе́ Триеди́ному Бо́гу: Аллилу́иа.

И́кос 3.

Твое́ моле́ние, Богоро́дице, вы́ну Ми́лости бе́здну на гра́д на́ш призыва́ет, пра́ведный гне́в Бо́жий отво́дит, неду́жныя соде́лывает здра́выми, скорбя́щим утеше́ние прино́сит, ра́дость подае́т лю́дем правосла́вным, пою́щим Ти́ благода́рственныя пе́сни таковы́я:

Ра́дуйся, ми́лости Бо́жией водворе́ние; ра́дуйся, я́ко Рождество́м Твои́м ми́р изба́вися от тле́ния.

Ра́дуйся, Це́ркви кра́сное удобре́ние; ра́дуйся, о христиа́нах благо́е попече́ние.

Ра́дуйся, ра́дости ще́дрое подая́ние; ра́дуйся, отча́яния исторже́ние.

Ра́дуйся, проро́ков исполне́ние; ра́дуйся, серде́ц от страсте́й до́брое врачева́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 4.

Избавле́ние от тле́ния ми́ру прии́де, Богоро́дице, Тобо́ю. Се́ бо блажи́м и сла́вим ве́рнии, по до́лгу. Ты́ же, Де́во, гра́д на́ш непоколеби́м сохраня́яй, Сте́ну бо необори́мую, тве́рдую Предста́тельницу и прибе́жище ду́ш на́ших Тя́ ве́мы, пою́ще Бо́гу: Аллилу́иа.

И́кос 4.

Диа́кон Фили́пп четвери́цу нечести́вых разбо́йников обличи́, и ти́и тща́шеся ста́рца погуби́ти, но Ты́, Преблагослове́нная Влады́чице, Сама́ яви́лася, све́том неизрече́нным облиста́ема, моля́щагося сохра́нши. Мы́ же ны́не ве́дуще, я́ко Ты́, Госпоже́ Богоро́дице, стено́ю неруши́мою и защи́тою кре́пкою гра́ду на́шему явля́ешися, пое́м Ти́ благода́рственныя пе́сни:

Ра́дуйся, ве́рных заступле́ние; ра́дуйся, гра́да на́шего от бе́д сохране́ние.

Ра́дуйся, вражду́ иму́щих примире́ние; ра́дуйся, от напра́сныя сме́рти избавле́ние.

Ра́дуйся, греха́ пресече́ние; ра́дуйся, посыла́ющая вразумле́ние.

Ра́дуйся, Све́та непристу́пнаго озаре́ние; ра́дуйся, упова́ющих на Тя́ благода́тное посеще́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 5.

Еди́на Чи́стая и Преблагослове́нная, Влады́чице Богоро́дице, Цари́це Небе́сная, при́сно предваря́ющая Хода́тайством пред Сы́ном Твои́м Христо́м Бо́гом проше́ния на́ша, не отри́ни благода́ть Твою́ от на́с по грехо́м на́шим, но посли́ на́м покая́ния да́р и ми́ром огради́ на́с, да воспое́м о Тебе́ Вседержи́телю: Аллилу́иа.

И́кос 5.

Влады́чицы о́браз но́вый напи́сан бы́сть по заве́ту подви́жника благоче́стия Фили́ппа, и па́мять чу́днаго явле́ния Преблагослове́нныя Богоро́дицы в трие́х во́зрастех трие́ дни́ све́тло духо́вно торжеству́ем, ра́достно воспева́я Засту́пнице Усе́рдной ро́да христиа́нскаго:

Ра́дуйся, изря́дныя ми́лости явле́ние; ра́дуйся, ра́дости умноже́ние.

Ра́дуйся, гра́да на́шего осене́ние; ра́дуйся, пра́веднику ди́вное посеще́ние.

Ра́дуйся, даю́щая умиле́ние; ра́дуйся, все́м хотя́щая спасе́ния.

Ра́дуйся, пла́чущим до́брое утеше́ние; ра́дуйся, моля́щихся Тебе́ сохране́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 6.

О Тебе́ ра́дуется, Благода́тная, вся́кая тва́рь, А́нгельский собо́р и челове́ческий ро́д, Освяще́нный Хра́ме и Раю́ Слове́сный, Де́вственная похвало́, из Нея́же Бо́г воплоти́ся и Младе́нец бы́сть, пре́жде ве́к Сы́й Бо́г на́ш. Ложесна́ бо Твоя́ Престо́л сотвори́ и чре́во Твое́ простра́ннее небе́с соде́ла. Мы́ же пред о́бразом Твои́м Честны́м дерзнове́нно пое́м Бо́гу: Аллилу́иа.

И́кос 6.

Пропове́дницы благода́тныя по́мощи от ико́ны Твоея́ чудотво́рныя су́ть все́ мно́жество Тобо́ю, Цари́це Небе́сная, спасе́нных: стра́ждущих, боля́щих, скорбя́щих и грехми́ пре́жде обремене́нных. Мы́ же, в со́нме и́х бы́ти жела́юще, благода́рственно Богоро́дице пое́м пе́сни таковы́я:

Ра́дуйся, по́мощи Бо́жией призва́ние; ра́дуйся, стре́л лука́ваго отгна́ние.

Ра́дуйся, мо́ря щедро́т Бо́жиих излия́ние; ра́дуйся, здра́вия подая́ние.

Ра́дуйся, неду́гов врачева́ние; ра́дуйся, тяготы́ духо́вныя избавле́ние.

Ра́дуйся, подвиза́ющая исполня́ти Госпо́дни веле́ния; ра́дуйся, наставля́ющая твори́ти Бо́гу благодаре́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 7.

Осеня́еши гра́д на́ш, Всепе́тая Влады́чице Богоро́дице, кре́стным зна́мением Сы́на Твоего́ и Бо́га на́шего, и Матери́нским Твои́м благослове́нием. Мы́ же со умиле́нием пое́м о Тебе́ Тро́ице Единосу́щней и Неразде́льней: Аллилу́иа.

И́кос 7.

Херуви́мов Честне́йшую и Серафи́мов Сла́внейшую Богоро́дицу воспое́м пред честно́ю и чудотво́рною ико́ною Ея́ Луга́нскою, ра́ди преди́вныя любве́, ро́ду христиа́нскому вы́ну явля́емыя, зва́нии си́ми:

Ра́дуйся, даю́щая трезве́ние; ра́дуйся, ско́рби забве́ние.

Ра́дуйся, правосла́вных умиле́ние; ра́дуйся, ве́рным спасе́ние.

Ра́дуйся, неве́рных вразумле́ние; ра́дуйся, заблу́ждших покая́ние.

Ра́дуйся, моли́твы возноше́ние; ра́дуйся, прия́тное благоуха́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 8.

Вити́йство вся́кое ску́дно е́сть во е́же изобрази́ти Пресла́вную Чистоту́ Твою́, Присноде́во и Богоро́дице! Недоуме́нно е́сть разуме́ти Боговоплоще́ния Та́йну челове́ком; се́й же и Го́рняя Во́инства, дивя́щеся, непреста́нно пою́т Бо́гу: Аллилу́иа.

И́кос 8.

Апо́столов двана́десять зве́зды златы́е прообразу́ют во о́бразе Твое́м честне́м, Присноде́во Всесвята́я. Те́мже Це́рковь, служи́телями Сло́ва науче́нная, правосла́вно восхваля́ет Тя́ зва́нии таковы́ми:

Ра́дуйся, апо́столов пропове́дание; ра́дуйся, ми́ру просвеще́ние.

Ра́дуйся, щедро́т многопло́дие; ра́дуйся, ми́лости Бо́жией излия́ние.

Ра́дуйся, ско́рби отгна́ние; ра́дуйся, Све́та И́стиннаго сия́ние.

Ра́дуйся, к покая́нию воззва́ние; ра́дуйся, врачу́ющая отча́яние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 9.

Луга́нск благоукраси́ся сла́вно о́бразом достохва́льным Всесвяты́я Де́вы, та́кожде и удосто́ися посеще́ния Цари́цею Небе́сною, лю́дие же правосла́внии, зде́ живу́щии, упова́ние по Го́споде возлага́ют на Пресвяту́ю Богоро́дицу и благода́рно пою́т Бо́гу: Аллилу́иа.

И́кос 9.

У́жасом объя́ти бы́ша разбо́йники, егда́ Све́том невече́рним но́щь озари́ся при явле́нии Бо́жия Ма́тери, оба́че жестокосе́рдии не сподо́бишася Тя́, Богоро́дице, зре́ти. Мы́ же, пред ико́ною Твое́ю предстоя́ще, се́рдцем и мы́слию ко Первоо́бразу возно́симся, хотя́ще Ми́лости Твоея́ удосто́итися, ра́достне взыва́ем:

Ра́дуйся, серде́ц освяще́ние; ра́дуйся, о́бразе терпе́ния.

Ра́дуйся, печа́лей го́рьких утоле́ние; ра́дуйся, супру́гом благослове́ние.

Ра́дуйся, младе́нцев взыгра́ние; ра́дуйся, отроко́в соблюде́ние.

Ра́дуйся, ста́рцем утеше́ние; ра́дуйся, и по сме́рти наде́яние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 10.

Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве на́с с ни́ми вчини́, и венце́в сла́вы сподо́би, да вси́ сла́вящия Тя́ ку́пно пое́м Бо́гови: Аллилу́иа.

И́кос 10.

Вы́шняго освяще́нный До́ме, Горо́, неудобовосходи́мая челове́ческими по́мыслы, Богоро́дице Всеблага́я, со умиле́нием предстои́м ны́не пред ико́ною Твое́ю и дерзнове́нием дви́жими воспе́ти Тя́, Засту́пнице Усе́рдная на́ша, дерза́ем возглаша́ти сия́ словеса́ похвалы́:

Ра́дуйся, благословля́ющая приходя́щих к ико́не Твое́й на поклоне́ние; ра́дуйся, ве́рных сла́дкое лобза́ние.

Ра́дуйся, да́рующая младе́нцев взыгра́ние; ра́дуйся, матери́нства лю́дем от Бо́га дарова́ние.

Ра́дуйся, в супру́жестве живу́щих ра́дование; ра́дуйся, и́нокам спасе́ния стяжа́ние.

Ра́дуйся, тьмы́ жите́йския озаре́ние; ра́дуйся, серде́ц освяще́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 11.

Освяще́ние на́ше, Христо́с Спаси́тель, из Тебе́, Богоро́дице, произы́де, печа́ть Де́вства неруши́му сохрани́в, всего́ в Себе́ челове́ка от я́звы лю́тыя греха́ свободи́в. Те́мже о Тебе́, Де́во Чи́стая, Бо́гу пло́ть да́вшей смире́нием Свои́м, пое́м благода́рно: Аллилу́иа.

И́кос 11.

Ро́ду челове́ческому пу́ть обоже́ния откры́ся, егда́ возласи́ла Чи́стая благове́стнику Гаврии́лу: Се́, Раба́ Госпо́дня. Бу́ди Ми́ по глаго́лу твоему́. Всеблаги́й Бо́г вочелове́чися на́с ра́ди, Безнача́льный от Тебе́, Чи́стый Исто́чниче, пло́тию нача́ло прия́т. Лю́дие правосла́внии Богоро́дицу И́стинную Тя́ почита́ют, и пою́т сия́ похвалы́:

Ра́дуйся, Посыла́ющая терпе́ние; ра́дуйся, любве́ умноже́ние.

Ра́дуйся, младе́нцем здра́вия подая́ние; ра́дуйся, ю́ных воспита́ние.

Ра́дуйся, зре́лости наставле́ние; ра́дуйся, ста́рости поддержа́ние.

Ра́дуйся, немощны́х укрепле́ние; ра́дуйся, сердца́м благо́е утеше́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 12.

И́же во гра́де Луга́нске бы́вшим явле́нием Твои́м, Пресла́вная Де́во Богоро́дице, утеша́еши и ны́не с ве́рою притека́ющих к ико́не Твое́й чудотво́рней, и лю́дие правосла́внии от Тебе́ проси́маго прия́ти сподобля́ются: неду́жнии исцеле́ния, скорбя́щии отра́ду, и ну́жд вся́ческих избавле́ние да́руеши прося́щим. Те́мже со благодаре́нием о Тебе́, Влады́чице, взыва́ют вси́ Бо́гу: Аллилу́иа.

И́кос 12.

Трисия́ннаго Со́лнца Све́том озари́тися моли́, Богоро́дице, певце́м Твои́м, сла́вящим торжество́ Твое́: Ты́ бо Сокро́вище свяще́нное благоволи́ла еси́ дарова́ти гра́ду на́шему, светоза́рную ико́ну Твою́, мно́га зна́мения соверши́ла еси́ от нея́, и благода́ти струи́ источа́еши додне́сь. Те́мже, упова́я на неоску́дныя ми́лости Твоя́ на́м, недосто́йным, дерзнове́нно пое́м сицева́я:

Ра́дуйся, люде́й гра́да на́шего до́брое сохране́ние; ра́дуйся, в жите́йском мо́ре спаси́тельное окормле́ние.

Ра́дуйся, Све́том благоче́стия озаре́ние; ра́дуйся, мо́лние, нече́стия попале́ние.

Ра́дуйся, обурева́емым страстьми́ ти́хое приста́нище; ра́дуйся, благода́ти неистощи́мое сокро́вище.

Ра́дуйся, оби́димых ско́рое избавле́ние; ра́дуйся, ве́рным боже́ственное услажде́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 13.

О всепе́тая Ма́ти, ро́ждшая все́х святы́х Святе́йшее Сло́во, ны́нешнее прие́мши приноше́ние, от вся́кия изба́ви напа́сти все́х, и бу́дущия изми́ му́ки, Тебе́ вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Одея́йся све́том, я́ко ри́зою, Госпо́дь Сла́вы Христо́с, Невмести́мый Бо́г на́ш, Его́же трепе́щут вся́ческая, пло́ть Челове́чу та́инственно прия́т от Тебе́, Богоро́дице. Тому́ поклони́мся, с благода́рностию о смире́нии Твое́м, Влады́чице, пою́ще Ти́:

Ра́дуйся, пло́де усе́рднаго моле́ния; ра́дуйся, соде́тельнице на́шего спасе́ния.

Ра́дуйся, христиа́н правосла́вных упова́ние; ра́дуйся, к Сы́ну Твоему́ благо́е дерзнове́ние.

Ра́дуйся, А́нгелов удивле́ние; ра́дуйся, ро́ду челове́ческому благослове́ние.

Ра́дуйся, утвержда́ющая вся́кое до́брое наме́рение; ра́дуйся, скорбе́й на ра́дость премене́ние.

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Конда́к 1.

Избра́нней Влады́чице Богоро́дице Цари́це пе́снь похва́льную приноси́ти дерза́ем, я́ко Сия́, земноро́дных Засту́пница, любо́вию Свое́ю на́с при́сно покрыва́ет. О все́х благодея́ниях, быва́ющих от Нея́ на на́с, явле́нных и неявле́нных, умиле́нно вопие́м:

Ра́дуйся, Преди́вная Де́во и Ма́ти, гра́да Луга́нска Покро́ве и Украше́ние.

Моли́тва.

О Пресвята́я Влады́чице Богоро́дице, Ма́ти Упова́ния на́шего Христа́ Бо́га! При́зри на ны́ гре́шныя и недосто́йныя, сше́дшиися просла́вити Тя́ славосло́вием у о́браза, и́мже гра́д на́ш благослове́ние от Тебе́ прие́млет. Усе́рдно мо́лим Тя́, Цари́це Небе́сная, сохрани́ лю́ди Твоя́! Спаси́ все́х, ве́рою моля́щихся Тебе́, да́рующи вся́, я́же ко спасе́нию, проше́ния; супру́жества в ми́ре и единомы́слии соблюди́, младе́нцы воспита́й, ю́ность наста́ви, ста́рость поддержи́, малоду́шныя уте́ши, расточе́нныя собери́, прельще́нныя обрати́ и соедини́ Святе́й Собо́рней и Апо́стольстей Це́ркви. Изба́ви, Всесвята́я Де́во, гра́д се́й и вся́кий гра́д и страну́ от гла́да, губи́тельства, тру́са, пото́па, огня́, меча́, наше́ствия иноплеме́нных и междоусо́бныя бра́ни, ми́р Христо́в низпосыла́ющи вы́ну. Сама́, Всепе́тая Ма́ти, все́м утеше́нием бу́ди, я́ко ве́си коего́ждо проше́ние.

Ты́ бо еси́ по́мощь безпомо́щным, наде́жда безнаде́жным, обурева́емым сохране́ние, пла́вающим приста́нище, неду́гующим врачева́ние, и Тя́, Пресвята́я, прославля́ем во ве́ки. Ами́нь.