Конда́к 1.

Избра́нней от сложе́ния ми́ра предве́чным Бо́гом и Царе́м на спасе́ние ро́да челове́ческаго, я́ко вои́стину изба́вльшей на́с от вся́каго зла́, Богоро́дице благода́рственную пе́снь пое́м: и́мать бо дерзнове́ние ко Всеми́лостивому Влады́це от вся́ких на́с бе́д свобожда́ти. Сего́ ра́ди сла́вяще пречу́дное явле́ние святы́я ико́ны Ея́, зове́м Е́й:

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

И́кос 1.

А́нгелов святы́х со́нми, ви́дяще бли́з дре́вняго гра́да О́рши пресла́вное чудотво́рныя ико́ны Твоея́ явле́ние, восхваля́ют Тя́, Богоро́дице, и мы́ гре́шнии, зря́ще толи́кую ми́лость Твою́ на на́с, со умиле́нием дерзнове́нно Тебе́ вопие́м:

Ра́дуйся, гра́да О́рши просвеще́ние; ра́дуйся, всего́ ми́ра спасе́ние

Ра́дуйся, отпа́дших от ве́ры правосла́вныя воста́ние; ра́дуйся, ересе́й погубле́ние.

Ра́дуйся, Боже́ственнаго све́та озаре́ние; ра́дуйся, к Тебе́ прибега́ющим покро́ве.

Ра́дуйся, сле́з на́ших избавле́ние; ра́дуйся, я́ко от Тебе́ никто́же то́щ и неуте́шен оты́де.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 2.

Ви́де, Пресвята́я, лю́ди правосла́вныя земли́ Орша́нския, в ско́рбех и печа́лех к Тебе́ прибега́ющия, заступле́ния Твоего́ и́щущия, и прося́щия Тя́ от злочести́вых еретико́в и́х изба́вити. И дарова́ла еси́ и́м ми́р и в ве́ре укрепле́ние, да вси́ ве́рнии, ве́дуще сия́, Бо́гу воспою́т: Аллилу́иа.

И́кос 2.

Ра́зум неуразуме́нный чу́да Твоего́, Богоро́дице, лю́дие правосла́внии разуме́ти жела́ют, ка́ко яви́ла еси́ ико́ну Твою́ святу́ю бли́з пресла́вныя оби́тели Куте́инския, и́ноком в поможе́ние и все́м ве́рным во спасе́ние. Сего́ ра́ди и мы́, ми́лость Твою́ к на́м, Богоро́дице, прославля́юще, пое́м Ти́ такова́я:

Ра́дуйся, оби́димым заступле́ние; ра́дуйся, гони́телем ве́рных обличе́ние.

Ра́дуйся, и́ноком прибе́жище; ра́дуйся, свяще́нником весе́лие.

Ра́дуйся, лю́дем правосла́вным попече́ние; ра́дуйся, убо́гим ра́дование.

Ра́дуйся, скорбя́щим упова́ние; ра́дуйся, припа́дающим к ико́не Твое́й в напа́стех укрепле́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 3.

Си́ла свы́ше облече́ лю́ди правосла́вныя, взира́вшия, Богоро́дице, на о́браз Тво́й святы́й, его́же получи́ша от Тебе́ я́ко ве́лию святы́ню в по́мощь и заступле́ние, те́мже и́мя Твое́ просла́виша и Бо́гу воспе́ша: Аллилу́иа.

И́кос 3.

Иму́щи Пресвята́я попече́ние о святе́й оби́тели Куте́инстей, восхоте́ устро́ити та́мо ла́вру ве́лию, да яви́тся та́ покро́в и прибе́жище все́м правосла́вным, да и́ноцы смире́ннии, пред пречи́стым Твои́м о́бразом в не́й моля́щиися, взыва́ют Тебе́ си́це:

Ра́дуйся, пред Бо́гом за на́с предста́тельствующая; ра́дуйся, на пу́ть пра́вый наставля́ющая.

Ра́дуйся, страсте́й свобожда́ющая; ра́дуйся, ти́хостию ду́ши на́ша исполня́ющая.

Ра́дуйся, из глубины́ грехо́вныя возведе́ние; ра́дуйся, от напра́сныя сме́рти спасе́ние.

Ра́дуйся, А́нгелов велича́ние; ра́дуйся, бесо́в прогна́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 4.

Бу́рю вну́трь име́я помышле́ний сумни́тельных, печа́тник Спиридо́н притече́ ко о́бразу Твоему́, Богоро́дице, прося́ по́мощи Твоея́ и утеше́ния; прия́в же от Тебе́ кре́пость на труды́ своя́, Влады́чице, Бо́гу возопи́: Аллилу́иа.

И́кос 4.

Слы́шаще гони́телие ве́ры правосла́вныя, я́ко Сама́ Влады́чица яви́ ико́ну Свою́ святу́ю в заступле́ние ве́рным, убоя́шася зело́, не сме́юще же нико́его зла́ сотвори́ти оби́тели Куте́инстей, отступи́ша от нея́. Мы́ же, дивя́щеся таково́му попече́нию Твоему́ о и́ноцех правосла́вных, пое́м Ти́ си́це:

Ра́дуйся, тишину́ и ми́р подава́ющая; ра́дуйся, напа́стей прило́ги отгоня́ющая.

Ра́дуйся, чернеце́м смире́нным покро́ве; ра́дуйся, оби́телем правосла́вным утвержде́ние.

Ра́дуйся, от злоде́йствия супоста́т огражда́ющая; ра́дуйся, от сме́рти и тли́ на́с спаса́ющая.

Ра́дуйся, в ско́рбех лю́тых утеше́ние; ра́дуйся, в гоне́ниих вра́жеских защище́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 5.

Боготе́чная звезда́ и покро́в яви́лася еси́, Богоро́дице, все́м притека́ющим ко святе́й ико́не Твое́й Орша́нстей, я́ко свети́ло светоза́рное во тьме́ ересе́й возсия́вшей, да и на́с гре́шных, на ту́ взира́ющих, Бо́гу научи́ши взыва́ти: Аллилу́иа.

И́кос 5.

Ви́де преподо́бный Афана́сий, я́ко в годи́ну лю́тую никто́же от челове́к возмо́же помощи́ ему́, но то́чию от Тебе́, Влады́чице, ча́я по́мощи, возложи́ на Тя́ все́ упова́ние свое́; получи́в же отве́т благоприя́тен, та́ко воспросла́ви и́мя Твое́:

Ра́дуйся, ми́рови прибе́жище; ра́дуйся, ми́лости исто́чниче.

Ра́дуйся, заступле́ния у Тебе́ и́щущим стено́; ра́дуйся, в жите́йстем мо́ри пла́вающим приста́нище.

Ра́дуйся, благода́тнаго ми́ра пода́ние; ра́дуйся, от напа́стей огражде́ние.

Ра́дуйся, мглу́ ду́ш на́ших озаря́ющая; ра́дуйся, нетле́нную благода́ть да́рующая.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 6.

Пропове́дует оби́тель Куте́инская чудеса́ Твоя́, Богоро́дице, от святы́я ико́ны Твоея́ истека́ющая, Ты́ бо озари́ла еси́ све́том Правосла́вия вся́ зе́мли Бе́лыя Руси́, попра́вши хитросплете́ния вра́жия. Та́ко и на́ша ду́ши озари́ све́том любве́ Твоея́, да и мы́ под омофо́ром Твои́м честны́м просла́вим Бо́га, вопию́ще Ему́: Аллилу́иа.

И́кос 6.

Возсия́ па́ки све́т ико́ны Твоея́, Богоро́дице, егда́ благоволи́ла еси́ подо́бию пречу́днаго о́браза Твоего́ написа́тися для Орша́нския же́нския оби́тели Свята́го Успе́ния, да и́нокини правосла́вныя, зря́ще на ли́к Тво́й святы́й, взыва́ют Тебе́ си́це:

Ра́дуйся, и́ночествующим укрепле́ние; ра́дуйся, вдови́ц пра́ведных утеше́ние.

Ра́дуйся, де́вам целому́дренным похвало́; ра́дуйся, все́м ве́рным покро́ве.

Ра́дуйся, пла́мень страсте́й угаша́ющая; ра́дуйся, у́м на́ш просвеща́ющая.

Ра́дуйся, Царя́ Преве́чнаго Ма́ти; ра́дуйся, чистоты́ неувяда́емый цве́те.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 7.

Хотя́щи просла́вити уго́дника Твоего́ преподо́бнаго Афана́сия, да по́двигом му́ченическим стя́жет вене́ц от Го́спода, упра́вила еси́ его́ в Купя́тицкий монасты́рь, Богоро́дице, иде́же Го́споду рабо́таше, и́мя Твое́ прославля́ше и Бо́гу вы́ну взыва́ше: Аллилу́иа.

И́кос 7.

Ди́внаго, Пресвята́я, яви́ла еси́ свети́льника земли́ Белору́сской, преподо́бнаго Афана́сия, засту́пника и моли́твенника за на́с, недосто́йных, да и мы́, зря́ще такову́ю Твою́ ми́лость к лю́дем правосла́вным, и человеколю́бие Твое́ восхваля́юще, воспое́м Тебе́ си́це:

Ра́дуйся, благода́ти Исто́чниче; ра́дуйся, о ми́ре на́шем Хода́таице.

Ра́дуйся, милосе́рдия бе́здно; ра́дуйся, преподо́бных сла́во.

Ра́дуйся, о́гненнаго муче́ния на́с свобожда́ющая; ра́дуйся, нача́льника мыта́рств дале́че отгоня́ющая.

Ра́дуйся, на́с от кля́твы избавля́ющая; ра́дуйся, пла́ч на́ш в ра́дость претворя́ющая.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 8.

Стра́нное зри́м чу́до, Богоро́дице, ка́ко труды́ еретико́в тще́тны сотвори́ла еси́ и печа́тнику Спиридо́ну ду́х му́дрости дарова́ла еси́, сего́ ра́ди то́й труда́ми свои́ми вся́ зе́мли Белору́сския прему́дростию кни́жною испо́лни, и Бо́га просла́ви, глаго́ля: Аллилу́иа.

И́кос 8.

Ве́сь гра́д дре́вний О́рша, чу́дною ико́ною Твое́ю осеня́емый, бы́сть вои́стину стена́ и прибе́жище правосла́вным, Влады́чице, к Тебе́ бо притека́ющим заступле́ние была́ еси́, и на́м недосто́йным, взира́ющим на о́браз Тво́й, Богоро́дице, покро́в бу́ди и утеше́ние, да и мы́, я́коже святы́й Афана́сий и печа́тник Спиридо́н, восхва́лим и́мя Твое́ преблаго́е та́ко:

Ра́дуйся, всечестны́й Черто́же Бо́жий; ра́дуйся, Ма́ти, вы́шшая Небе́с.

Ра́дуйся, грехо́вную печа́ль потребля́ющая; ра́дуйся, исцеле́ний бога́тство излива́ющая.

Ра́дуйся, сокро́вище спасе́ния; ра́дуйся, исто́чниче нетле́ния.

Ра́дуйся, Горо́ несеко́мая, ю́же Дании́л прови́де; ра́дуйся, же́зле пречестны́й, его́же Иса́ия прорече́.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 9.

Вся́кия исцели́ боле́зни, и печа́ли го́рькия изба́ви на́с, Богоро́дице, усе́рдно моля́щихся пред чудотво́рным о́бразом Твои́м, ве́си бо ско́рби на́ша, Пречи́стая. Бу́ди на́м по́мощь и прибе́жище неруши́мое, да сподо́бившеся ми́лостей от Тебе́, Преблага́я, и́мя Твое́ просла́вим и Бо́гу возопие́м: Аллилу́иа.

И́кос 9.

Вети́и лжему́дреннии, ви́дяще чудеса́, от ико́ны Твоея́, Пресвята́я, исходя́щая, недоумева́ют, ка́ко хитросплете́ния и́х растерза́вши, лю́дем правосла́вным ми́р и безмяте́жие подала́ еси́. Мы́ же, Твоему́ промышле́нию о на́с, Богоро́дице, чудя́щеся, воспева́ем Ти́ си́це:

Ра́дуйся, дре́внюю кля́тву разруши́вшая; ра́дуйся, ерети́ческое лжему́дрие обличи́вшая.

Ра́дуйся, Храни́тельнице живота́ на́шего; ра́дуйся, две́ре, е́юже про́йде Христо́с.

Ра́дуйся, ка́ющимся проще́ние; ра́дуйся, неду́гующим исцеле́ние.

Ра́дуйся, па́дшим воста́ние; ра́дуйся, погиба́ющим упова́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 10.

Спасти́ хотя́ лю́ди Твоя́, Богоро́дице, от ерети́ческаго злосмра́дия, яви́ла еси́ на́м о́браз Тво́й чудотво́рный, ми́лости ве́рныя исполня́ющий, нече́стие же вра́жие опаля́ющий, и все́м лю́дем правосла́вным да́рующий благоприя́тно пе́ти Бо́гу: Аллилу́иа.

И́кос 10.

Стена́ еси́ похваля́ющим чудеса́ Твоя́, Богоро́дице, и покро́в все́м ко благоутро́бию Твоему́ прибега́ющим, те́мже и мы́, недосто́йнии раби́ Твои́, Пресвята́я, ве́дуще промышле́ние Твое́ о на́с, мо́лим о хода́тайстве Твое́м пред Сы́ном Единоро́дным, да, стяжа́вше спасе́ние душа́м на́шим, с любо́вию воспое́м Тебе́ сицева́я:

Ра́дуйся, помо́щнице на́ша необори́мая; ра́дуйся, Моли́твеннице на́ша неусыпа́емая.

Ра́дуйся, окормле́ние в ю́ности; ра́дуйся, же́зле в ста́рости.

Ра́дуйся, от тя́жких и лю́тых грехо́в спаса́ющая; ра́дуйся, неможе́ние ду́ш на́ших исцеля́ющая.

Ра́дуйся, от прило́гов диа́вольских избавля́ющая; ра́дуйся, вся́ блага́я твори́ти на́м подава́ющая.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 11.

Пе́ние умиле́нное прино́сим Ти́, о Ма́ти на́ша, ве́дуще Тя́ Засту́пницу ро́да христиа́нскаго, да́рующую на́м упова́ние и любо́вию напоя́ющую сердца́ на́ша. Ты́ же, иму́щи дерзнове́ние ко Го́споду Бо́гу, всея́ тва́ри Соде́телю, не преста́й моли́тися о на́с пред престо́лом Влады́чним, да поми́лует все́х, вопию́щих Ему́: Аллилу́иа.

И́кос 11.

Светоза́рное свети́ло ико́на Твоя́, о Пречи́стая Де́во, бы́сть на́м; то́ю бо Боже́ственным све́том у́м на́ш просвеща́еши, и тьму́ ерети́ческия пре́лести отгоня́еши, все́м же ве́рным ми́р, ра́зум и в ве́ре укрепле́ние да́руеши, вопию́щим к Тебе́ такова́я:

Ра́дуйся, све́том Боже́ственным на́с осиява́ющая; ра́дуйся, ра́достию сердца́ на́ша исполня́ющая.

Ра́дуйся, мра́к неве́дения отгоня́ющая; ра́дуйся, из нездра́вия во здра́вие претворя́ющая.

Ра́дуйся, две́ре вседуше́внаго покая́ния; ра́дуйся, ду́ш всесоверше́нное спасе́ние.

Ра́дуйся, невозбра́нное от земли́ на Не́бо преселе́ние; ра́дуйся, на Небесе́х на́ше оправда́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 12.

Благода́ти исто́чник бы́сть на́м о́браз Тво́й пресвяты́й, Влады́чице, от скорбе́й избавля́яй и на покая́ние на́с призыва́яй, да, зря́ще на пречи́стый ли́к Тво́й, очи́стимся от скве́рны духо́вныя, и испро́сим у великодарови́таго Бо́га все́м долго́м на́шим отпуще́ние, в чистоте́ и свя́тости поживе́м и и́мя Его́ просла́вим, в ра́дости глаго́люще: Аллилу́иа.

И́кос 12.

Пою́ще Твоя́ чудеса́, прославля́ем и́мя Твое́, Богоро́дице, иму́ще бо Тя́ Засту́пницу усе́рдную, от Нея́же Са́м Бо́г воплоти́ся и спасе́ние все́м ве́рным дарова́, взира́ем на о́браз Тво́й святы́й, Влады́чице, и со умиле́нием воспева́ем Ти́ си́це:

Ра́дуйся, Роди́тельнице Неискусому́жная Сы́на Преве́чнаго; ра́дуйся, прия́телище непоро́чное Ду́ха Свята́го.

Ра́дуйся, ра́дости Хода́таице всему́ ми́ру; ра́дуйся, Светоно́сная се́не Небе́сная.

Ра́дуйся, вре́менным наказа́нием неве́жды умудря́ющая; ра́дуйся, согреша́ющих покая́ние ми́лостиво прие́млющая.

Ра́дуйся, воздыха́ний на́ших услы́шание; ра́дуйся, в ча́с испыта́ний на́ше заступле́ние.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 13.

О, преди́вная Ма́ти, все́х святы́х святе́йшая, преблагослове́нная Влады́чице на́ша Богоро́дице, ны́нешнее на́ше приими́ моле́ние и от вся́каго зла́го обстоя́ния на́с изба́ви и от тьмы́ изведи́, да узре́вше све́т неизрече́нный Сы́на Твоего́, и́мя Твое́ просла́вим и Бо́гу воспое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов святы́х со́нми, ви́дяще бли́з дре́вняго гра́да О́рши пресла́вное чудотво́рныя ико́ны Твоея́ явле́ние, восхваля́ют Тя́, Богоро́дице, и мы́ гре́шнии, зря́ще толи́кую ми́лость Твою́ на на́с, со умиле́нием дерзнове́нно Тебе́ вопие́м:

Ра́дуйся, гра́да О́рши просвеще́ние; ра́дуйся, всего́ ми́ра спасе́ние

Ра́дуйся, отпа́дших от ве́ры правосла́вныя воста́ние; ра́дуйся, ересе́й погубле́ние.

Ра́дуйся, Боже́ственнаго све́та озаре́ние; ра́дуйся, к Тебе́ прибега́ющим покро́ве.

Ра́дуйся, сле́з на́ших избавле́ние; ра́дуйся, я́ко от Тебе́ никто́же то́щ и неуте́шен оты́де.

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Конда́к 1.

Избра́нней от сложе́ния ми́ра предве́чным Бо́гом и Царе́м на спасе́ние ро́да челове́ческаго, я́ко вои́стину изба́вльшей на́с от вся́каго зла́, Богоро́дице благода́рственную пе́снь пое́м: и́мать бо дерзнове́ние ко Всеми́лостивому Влады́це от вся́ких на́с бе́д свобожда́ти. Сего́ ра́ди сла́вяще пречу́дное явле́ние святы́я ико́ны Ея́, зове́м Е́й:

Ра́дуйся, Преми́лостивая Влады́чице, Орша́нская похвало́ и все́м ве́рным утеше́ние.

Моли́тва.

О преблагослове́нная Влады́чице на́ша Богоро́дице! Вы́шшая Небе́с и вся́ го́рняя во́инства превосходя́щая, простри́ ру́ку Твою́ держа́вную на на́с, недосто́йных ра́б Твои́х, и сохрани́ ми́р и безмяте́жие в лю́дех правосла́вных, свяще́нники благослови́, мона́хи защити́, лю́ди вся́ умири́, во́инство же укрепи́, гра́д се́й соблюди́, и на́с все́х, моля́щихся Тебе́ пред пречи́стым о́бразом Твои́м, покры́й Свои́м человеколю́бием. И я́коже дре́вле дарова́ла еси́ оби́тели Куте́инстей и всему́ гра́ду О́рши от ерети́ческаго злово́ния избавле́ние, та́ко и ны́не изба́ви на́с от вся́кия скве́рны духо́вныя. И я́коже не оста́вила еси́ преподо́бнаго Афана́сия в годи́ну тя́жкую, та́ко и на́с, малоду́шных, во вре́мя скорбе́й на́ших не оста́ви, Влады́чице, но бу́ди на́м все́м отра́да и утеше́ние. Да сподо́бившеся ми́лости Твоея́, получи́м грехо́в на́ших оставле́ние и жития́ на́шего исправле́ние. Ты́ бо еси́ Ма́ти на́ша и Засту́пница, немощны́х си́ла и малоду́шных кре́пость! Ты́ на́ше упова́ние и покро́в! Исцели́ на́с от вся́кия боле́зни душе́вныя и теле́сныя, да́руй на́м, Де́во Преблага́я, в житии́ на́шем тишину́ и поко́й. И сподо́би ны́, егда́ яви́тся Судия́ Вселе́нней во второ́м прише́ствии Свое́м, вни́ти в Небе́сное Ца́рство, иде́же вси́ святи́и прославля́ют в Тро́ице сла́вимаго Бо́га, Отца́ и Сы́на и Свята́го Ду́ха, и Твое́ ми́лостивое предста́тельство, ны́не и при́сно и во ве́ки веко́в. Ами́нь.