Конда́к 1.

Избра́нная Де́во Мари́е, Цари́це на́ша Богоро́дице, осени́вшая страну́ Га́личскую ангелохва́льным явле́нием ико́ны Своея́, благода́рственная возсыла́ем Ти́ раби́ Твои́, Влады́чице:

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

И́кос 1.

А́нгел со́нмы на Небеси́ и христиа́н мно́жества на земли́ ра́дуются о Тебе́, Ма́ти на́ша, и ра́достно прино́сят Ти́ целова́ние сицево́е: ра́дуйся, Благода́тная, Госпо́дь с Тобо́ю. Мы́ же, зна́мение ви́дяще благоволе́ния Твоего́ к земли́ се́й, со умиле́нием взыва́ем:

Ра́дуйся, лю́дем гра́да Га́лича небе́сное утеше́ние; ра́дуйся, и́ночествующим оби́тели Нико́льския покро́в и защище́ние.

Ра́дуйся, преподо́бнаго Паи́сия укрепле́ние; ра́дуйся, всего́ собо́ра святы́х Га́личских увеселе́ние.

Ра́дуйся, ико́ною Твое́ю в ско́рбех все́м помога́ющая; ра́дуйся, во дни́ и в нощи́ оби́тель и гра́д покрыва́ющая.

Ра́дуйся, от бе́д страну́ на́шу огражда́ющая; ра́дуйся, печа́ль на́шу в ра́дость претворя́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 2.

Ви́дим, Свята́я Де́во, Твое́ ми́лостивое промышле́ние, я́ко покро́в Боже́ственный, распросте́ршийся над гра́дом Га́личем в преди́вней любви́ Матери́нстей Твое́й к лю́дем. Ты́, Всеми́лостивая Госпоже́, яви́ла еси́ ико́ну Твою́ во оби́тели Нико́льской, да сози́ждется хра́м во и́мя Успе́ния Твоего́, а́може лю́дие и и́ноцы да притека́ют и со слеза́ми воспева́ют пе́снь: Аллилу́иа.

И́кос 2.

Ра́зума превы́шшему явле́нию ико́ны Твоея́ ужа́сся, благочести́вый кти́тор, боля́рин Иоа́нн, о́бразу Твоему́, Влады́чице, поклони́ся до земли́, лю́дие же с тре́петом вопия́ху к Богоро́дице:

Ра́дуйся, Одиги́трие, чи́нми А́нгельскими носи́мая; ра́дуйся, Купино́ Неопали́мая.

Ра́дуйся, вся́кая сумне́ния боля́рина О́винова отри́нувшая; ра́дуйся, но́вое ме́сто пребыва́ния Своего́ показа́вшая.

Ра́дуйся, в де́нь Успе́ния Твоего́ двема́ А́нгелома зде́ явля́емая; ра́дуйся, Матери́нскою любо́вию все́х согрева́ющая.

Ра́дуйся, все́х скорбя́щих ра́достию осиява́ющая; ра́дуйся, прише́ствием Твои́м гра́д Тво́й прославля́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 3.

Си́лою свы́ше укрепи́ся от Тебе́, Всеблага́я Богоро́дице, кти́тор, егда́ услы́ша Боже́ственный гла́с об устрое́нии хра́ма в че́сть Успе́ния Твоего́, Пречи́стая Де́во, и со благогове́нием облобыза́ о́браз Тво́й, благода́рственно поя́ Бо́гу: Аллилу́иа.

И́кос 3

Иму́щи бога́тство милосе́рдия, Богома́ти, все́м лю́дем ру́ку по́мощи простира́еши. Сего́ ра́ди и игу́мен оби́тели сея́ преподо́бный Паи́сий, на Тя́ упова́ние возложи́в, благогове́йнаго стра́ха и ра́дости от виде́ния сего́ испо́лненный, пома́зоваше себе́ и бра́тию еле́ем от ико́ны Твоея́, и те́пле возсыла́ше Тебе́ такова́я:

Ра́дуйся, я́ко ико́на Твоя́, све́тлыми А́нгелы носи́мая, возду́х освяти́; ра́дуйся, я́ко о́браз Тво́й всю́ страну́ Га́личскую просвети́.

Ра́дуйся, вся́к во́зраст посеща́ющая; ра́дуйся, младе́нцы, я́ко Ма́ти, окормля́ющая.

Ра́дуйся, сироты́ и вдови́цы призрева́ющая; ра́дуйся, и́ночествующих благода́тно охраня́ющая.

Ра́дуйся, благу́ю мы́сль на се́рдце полага́ющая; ра́дуйся, люде́й Твои́х Ра́досте неча́янная.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 4.

Бу́рею наше́ствия междоусо́биц лю́тых Га́личская земля́ поколеба́ся, сро́дницы врази́ соде́яшася и кня́зие Васи́лий и Гео́ргий Га́личский дру́г на дру́га возста́ша. Ты́ же, Всеми́лостивая Ма́ти, яви́вшая ми́ру всему́ о́браз терпе́ния и злострада́ния при Кресте́ Сы́на Твоего́, научи́ лю́ди га́личския в пещи́ искуше́ний и бе́д взыва́ти Бо́гу: Аллилу́иа.

И́кос 4.

Слы́шав о Твое́м, о Всепе́тая Ма́ти, гряду́щем отше́ствии из гра́да Га́лича, о изнесе́нии ико́ны Ови́новския во гра́д Москву́ кня́зем Васи́лием Те́мным, преподо́бный Паи́сий со слеза́ми увеща́ его́ о́браз оста́вити. Оба́че кня́зь, не внима́я воздыха́нием серде́чным, повеле́ со стра́жею соверши́ти пренесе́ние. Лю́дие же вси́, почита́ющии пречи́стый ли́к Тво́й, Богома́ти, вопия́ху к Тебе́, Цари́це Небесе́ и земли́:

Ра́дуйся, гра́д Га́лич я́ко ма́лый Назаре́т Твои́м пребыва́нием возвели́чившая; ра́дуйся, проше́ния люде́й земли́ Га́личския во бла́го исполня́ющая.

Ра́дуйся, все́х си́рых защища́ющая; ра́дуйся, все́х ве́рных утеша́ющая.

Ра́дуйся, ико́ною Твое́ю Ови́новскою Москву́ посети́вшая; ра́дуйся, лю́дем моско́вским благослове́ние источи́вшая.

Ра́дуйся, любо́вь Твою́ к оби́тели возвраще́нием яви́вшая; ра́дуйся, ми́р глубо́кий враждова́вшим дарова́вшая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 5.

Боготе́чную звезду́ зри́м ико́ну Твою́, о ми́лостивая Де́во, ю́же хотя́щи па́ки возврати́ти га́личской Нико́льской оби́тели, Пречи́стая Богома́ти, рекла́ еси́ преподо́бному Паи́сию: приими́ ико́ну Мою́. Вше́д нау́трие во хра́м и обре́т ико́ну на ме́сте свое́м стоя́щую, с тре́петом и со слеза́ми благода́рными усты́ воззва́ преподо́бный к Бо́гу: Аллилу́иа.

И́кос 5.

Ви́девше возвраще́ние чу́дное ико́ны Твоея́, я́же мно́гою стра́жею охраня́ема бе́ во Успе́нском собо́ре гра́да Москвы́, оба́че си́лою Бо́жиею во еди́ну но́щь пренесе́ся во оби́тель Нико́льскую, вси́ лю́дие земли́ Га́личския благода́рне возопи́ша Богоро́дице:

Ра́дуйся, еди́ная Ра́досте на́ша; ра́дуйся, еди́ная на́ша Отра́до.

Ра́дуйся, к земли́ Га́личской благоволе́ние; ра́дуйся, от междоусо́бных бра́ней избавле́ние.

Ра́дуйся, в ско́рбех ско́ро помога́ющая; ра́дуйся, ве́рных и малове́рных от бе́д спаса́ющая.

Ра́дуйся, честны́м Покро́вом Твои́м на́с осеня́ющая; ра́дуйся, печа́ль на́шу в ра́дость претворя́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 6.

Пропове́дует земля́ Га́личская преди́вная чудеса́ Твоя́, Богома́ти, я́же на ве́рныя чрез святу́ю ико́ну Твою́ Ови́новскую благода́тно излива́еши: боля́щим исцеле́ния подае́ши и все́м в земны́х испыта́ниих по́мощь Твою́ простира́еши, вопию́щим к Бо́гу: Аллилу́иа.

И́кос 6.

Возсия́ но́вая благода́ть от ико́ны Твоея́ Ови́новския немерца́ющею заре́ю чуде́с, Пресвята́я Де́во; и оби́тель Нико́льская но́вое и́мя прия́т в че́сть Успе́ния Твоего́, в не́йже и́ноцы и вси́ лю́дие, обра́дованнии Твои́м заступле́нием, с весе́лием вопию́т Тебе́ сицева́я:

Ра́дуйся, о поми́ловании на́с гре́шных умоля́ющая; ра́дуйся, на пу́ть смире́ния и терпе́ния наставля́ющая.

Ра́дуйся, оскуде́ние оби́тели Твоея́ восполня́ющая; ра́дуйся, ско́рбь на́шу в ра́дость претворя́ющая.

Ра́дуйся, от враго́в ви́димых и неви́димых защища́ющая; ра́дуйся, от мно́гих бе́д на́с избавля́ющая.

Ра́дуйся, вся́кий неду́г исцеля́ющая; ра́дуйся, от паде́ния на́с охраня́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 7.

Хотя́ проще́ние прия́ти, кня́зь Васи́лий стра́ха Бо́жия испо́лнися, егда́ услы́ша о пренесе́нии небе́снем чудотво́рныя ико́ны Ови́новския из гра́да Москвы́ в Га́лич: сего́ ра́ди со слеза́ми припаде́ ко о́бразу Богома́тере; услы́шан же в моле́нии свое́м бы́в, те́пле возопи́ Бо́гу: Аллилу́иа.

И́кос 7.

Но́вое зна́мение бы́сть в преде́лех Га́личских, егда́ кня́зь Васи́лий во искупле́ние своея́ вины́ повеле́ устро́ити но́вую оби́тель и хра́м во и́мя Васи́лия Вели́каго. Те́мже и мы́ взыва́ем к Богоро́дице:

Ра́дуйся, чу́дно оби́тель и́ноческую созда́вшая; ра́дуйся, хра́му свята́го Васи́лия в не́й бы́ти изво́лившая.

Ра́дуйся, благослове́ние подвиза́ющимся дарова́вшая; ра́дуйся, ве́рно живу́щия любо́вию Твое́ю утеша́ющая.

Ра́дуйся, прило́ги вра́жия от оби́телей отража́ющая; ра́дуйся, прило́ги мы́сленныя отгоня́ти науча́ющая.

Ра́дуйся, на труды́ и по́двиги и́ноки вразумля́ющая; ра́дуйся, па́мять сме́ртную стяжава́ти наставля́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 8.

Стра́нники и прише́льцы есмы́ в ми́ре се́м мы́ бре́ннии, те́мже мо́лим Тя́, Богома́ти, и про́сим: не лиши́ на́с Твоея́ по́мощи и заступле́ния, да сподо́бимся Тебе́ хвале́бную пе́ти пе́снь: Аллилу́иа.

И́кос 8.

Все́м, в ско́рбех жите́йских обурева́емым, вои́стину яви́ся благода́тная отра́да о́браз Тво́й, имену́емый Ови́новский, к нему́же мы́ ны́не приходя́ще, вопие́м Ти́ со умиле́нием:

Ра́дуйся, бе́д и напа́стей незри́мое избавле́ние; ра́дуйся, гре́шников ка́ющихся проще́ние.

Ра́дуйся, усе́рдное о на́с пред Бо́гом заступле́ние; ра́дуйся, ежеча́сное все́х ве́рных охране́ние.

Ра́дуйся, неду́гов теле́сных исцеле́ние; ра́дуйся, от у́з де́монских свобожде́ние.

Ра́дуйся, воздыха́ния на́ша не отверга́ющая; ра́дуйся, щедро́ты и ми́лости Твоя́ на на́с излива́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 9.

Вся́кое тща́ние о хране́нии Твоего́ ди́внаго о́браза и́ноцы оби́тели Успе́нския да и́мут Твое́ю по́мощию, Богома́ти, и, подвиза́ющеся в посте́, моли́тве и бде́нии, но́щию и дне́м мо́лятся пред ни́м и Бо́гу вопию́т: Аллилу́иа.

И́кос 9.

Вети́йство на́ше не довле́ет ко изглаго́ланию все́х чуде́с от Твоея́ ико́ны, Богоро́дице Де́во, ве́домых на́м и неве́домых. Но Ты́, я́ко милосе́рдая Ма́ти, научи́ на́с взыва́ти к Тебе́ ве́рно:

Ра́дуйся, благода́тная Богоро́дице Де́во; ра́дуйся, ми́лости пода́тельнице.

Ра́дуйся, те́плая о на́с Хода́таице; ра́дуйся, всеблага́я Врата́рнице.

Ра́дуйся, к го́рнему ми́ру у́м на́ш направля́ющая; ра́дуйся, ду́х на́ш устремля́ти к Бо́гу науча́ющая.

Ра́дуйся, сердца́ на́ша моли́твою просвеща́ющая; ра́дуйся, ти́хое и безмяте́жное житие́ на́м да́рующая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 10.

Спасти́ хотя́щи многоско́рбныя лю́ди от бе́д не то́кмо во гра́де Га́личе, но и в сто́льнем гра́де Москве́, и во ины́х граде́х, ве́сех и оби́телех, излива́еши благода́ть от ико́ны Твоея́ Ови́новския все́м ве́рным, вопию́щим к Бо́гу: Аллилу́иа.

И́кос 10.

Стена́ еси́ и́ноческому ли́ку, Пречи́стая Де́во Мари́е, и до сконча́ния ве́ка наде́жду несокруши́мую и́мамы о святе́й ико́не Твое́й. Те́мже, Ма́ти Бо́жия, с любо́вию и ра́достию зове́м Тебе́:

Ра́дуйся, я́ко чистоте́ и целому́дрию на́с науча́еши; ра́дуйся, я́ко по́мыслы на́ша просвеща́еши.

Ра́дуйся, я́ко се́рдце на́ше к покая́нию направля́еши; ра́дуйся, я́ко бу́ри искуше́ний отража́еши.

Ра́дуйся, я́ко боле́зни душе́вныя и теле́сныя исцеля́еши; ра́дуйся, я́ко житие́ на́ше до́бре устроя́еши.

Ра́дуйся, я́ко припа́дающих к пречестне́й ико́не Твое́й от вся́ких бе́д защища́еши; ра́дуйся, я́ко от собла́знов ми́ра сего́ на́с огражда́еши.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 11.

Пе́ние умиле́нное приими́ от на́с, Всепе́тая Де́во, на ра́дость дарова́вшая на́м Свою́ святу́ю ико́ну, да вку́пе со А́нгелы и земноро́дными просла́вим Бо́га, зову́ще: Аллилу́иа.

И́кос 11.

Све́том боже́ственным украси́ся земля́ Га́личская в явле́нии чу́дныя ико́ны Твоея́ Ови́новския, та́ко просвети́ и на́с, ны́не взыва́ющих Тебе́ си́це:

Ра́дуйся, ми́ра всего́ помо́щнице; ра́дуйся, милосе́рдия исто́чниче.

Ра́дуйся, от А́нгел воспева́емая на Небеси́; ра́дуйся, от ве́рных восхваля́емая на земли́.

Ра́дуйся, похвало́ ми́ра и утвержде́ние; ра́дуйся, все́м скорбя́щим прибе́жище и заступле́ние.

Ра́дуйся, лю́дем страны́ Га́личския благода́тное вспоможе́ние; ра́дуйся, злы́х серде́ц умягче́ние.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 12.

Благода́ть Твою́, Пречи́стая Де́во, да́руй все́м сыново́м и дще́рем страны́ на́шея, да воспое́м усе́рдно Бо́гу: Аллилу́иа.

И́кос 12.

Пою́ще чудеса́ Твоея́ ми́лости, явле́нная свято́му Га́личскому кня́зю Дими́трию Кра́сному, чти́вшему умиле́нно ико́ну Ови́новскую, мо́лим Тя́, Пресвята́я Де́во: не лиши́ и на́с ми́лости Твоея́, вопию́щих та́ко:

Ра́дуйся, Це́ркве Небе́сныя красото́; ра́дуйся, Це́ркве земны́я похвало́.

Ра́дуйся, А́нгельскими со́нмы воспева́емая; ра́дуйся, кня́жеским ро́дом прославля́емая.

Ра́дуйся, в напа́стех всемо́щное упова́ние; ра́дуйся, ико́ну Твою́ чу́дно изъе́мшая из пла́мене.

Ра́дуйся, и на́с от запале́ния страсте́й сохраня́ющая; ра́дуйся, ро́су благода́ти низпосыла́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 13.

О Всепе́тая Ма́ти, приими́ от на́с сие́ благода́рственное пе́ние, я́ко ли́к Тво́й святы́й на ра́дость даде́ся все́м, вопию́щим к Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел со́нмы на Небеси́ и христиа́н мно́жества на земли́ ра́дуются о Тебе́, Ма́ти на́ша, и ра́достно прино́сят Ти́ целова́ние сицево́е: ра́дуйся, Благода́тная, Госпо́дь с Тобо́ю. Мы́ же, зна́мение ви́дяще благоволе́ния Твоего́ к земли́ се́й, со умиле́нием взыва́ем:

Ра́дуйся, лю́дем гра́да Га́лича небе́сное утеше́ние; ра́дуйся, и́ночествующим оби́тели Нико́льския покро́в и защище́ние.

Ра́дуйся, преподо́бнаго Паи́сия укрепле́ние; ра́дуйся, всего́ собо́ра святы́х Га́личских увеселе́ние.

Ра́дуйся, ико́ною Твое́ю в ско́рбех все́м помога́ющая; ра́дуйся, во дни́ и в нощи́ оби́тель и гра́д покрыва́ющая.

Ра́дуйся, от бе́д страну́ на́шу огражда́ющая; ра́дуйся, печа́ль на́шу в ра́дость претворя́ющая.

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Конда́к 1.

Избра́нная Де́во Мари́е, Цари́це на́ша Богоро́дице, осени́вшая страну́ Га́личскую ангелохва́льным явле́нием ико́ны Своея́, благода́рственная возсыла́ем Ти́ раби́ Твои́, Влады́чице:

Ра́дуйся, Ма́ти Бо́жия, зе́млю Га́личскую о́бразом Свои́м охраня́ющая.

Моли́тва.

О Пресвята́я Де́во Мари́е, Ма́ти Бо́жия, приими́ многоболе́зненное воздыха́ние на́ше, и да́руй коему́ждо проше́нию исполне́ние, скорбя́щим ско́рби облегчи́, оби́димых от оби́д изба́ви, немощны́м и разсла́бленным и боля́щим здра́вие да́руй, и сохрани́ на́с во ве́ки веко́в. Ами́нь.