Конда́к 1.

Избра́нней от все́х родо́в Пречи́стей Де́ве Мари́и и Ма́тери Бо́га на́шего соста́вим похвалу́. Ты́ же, Влады́чице, я́ко зе́млю Ру́сскую под Сво́й Покро́в прии́мшая и оби́тели и́ноческия ико́нами чудотво́рными украси́вшая, сохрани́ оби́тель Твою́ и спаси́ все́х на́с, да зове́м Ти́:

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

И́кос 1.

Арха́нгелом Гаврии́лом воспита́нная во Свята́я Святы́х, Богоотрокови́це, свя́тости и благоле́пия церко́внаго во страна́х христиа́нских ревни́тельница быва́еши. Чрез ико́ну Твою́ Пече́рскую мно́гая чудеса́ во гра́де Ки́еве яви́вшая, по́слежде в зе́млю Бря́нскую по проше́нию благове́рнаго кня́зя Рома́на, слепото́ю неду́гующаго, с по́честьми отпра́вилася еси́. Отцы́ же Пече́рстии, провожда́я о́браз Тво́й, воспе́ша Ти́ такова́я:

Ра́дуйся, Непоро́чная, от пра́ведных Иоаки́ма и А́нны ро́ждшаяся; ра́дуйся, Цари́це Всеблага́я, спасе́ние всему́ ми́ру яви́вшая.

Ра́дуйся, зе́млю Ру́сскую во уде́л Себе́ избра́вшая; ра́дуйся, оби́тели Пече́рския свята́я Покрови́тельнице.

Ра́дуйся, нача́льником и́ноческаго жития́ Анто́нию и Феодо́сию в труде́х Помо́щнице; ра́дуйся, ико́ны, пи́саныя избра́нником Бо́жиим Али́пием, чудесы́ просла́вившая.

Ра́дуйся, ко гра́ду Бря́нску о́браз Сво́й чу́дный в лодии́ прове́дшая; ра́дуйся, ме́сто но́выя оби́тели в низо́вии Све́ны реки́ указа́вшая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 2.

Ви́девше и́ноцы и слуги́ кня́зевы, провожда́вшии святу́ю ико́ну, стра́нное исчезнове́ние ея́ но́щию, нача́ша скорбе́ти и сле́зы лия́ти, и иска́ти ю́ по гора́м и де́брем; и преплы́в Десну́ реку́, поидо́ша по гора́м. Егда́ же обрето́ша Пречи́стыя о́браз на ду́бе высо́це между́ ветве́й на верши́не горы́ стоя́щ, возопи́ша ра́достно: Аллилу́иа.

И́кос 2.

Разуме́вше вси́, я́ко сия́ е́сть во́ля Твоя́, Пресвята́я Де́во, посла́ша тогда́ ве́стника ко благове́рному кня́зю Рома́ну возвести́ти бы́вшее чу́до. Кня́зь же услы́шав, воспря́л еси́ ско́ро со одра́ своего́ с ра́достию вели́кою и повеле́ звони́ти по все́м церква́м Бо́жиим, да собере́тся собо́р ве́сь свяще́ный и вси́ лю́дие гра́да Бря́нска, и да вознесу́т моли́тву, глаго́люще си́це:

Ра́дуйся, Влады́чице ми́ра, Херуви́м пребо́льшая и Серафи́м честне́йшая; ра́дуйся, Благода́тная Мари́е, ли́ки А́нгельскими при́сно воспева́емая.

Ра́дуйся, све́тлый О́блаче, из Него́ же возсия́ Госпо́дь; ра́дуйся, Хра́ме святе́йший Христа́ Бо́га на́шего.

Ра́дуйся, о́бразом Твои́м честны́м преде́лы Бря́нския посети́вшая; ра́дуйся, я́ко о́браз се́й на го́ру высо́ку А́нгелы принесо́ша.

Ра́дуйся, Покрови́тельница ме́ста сего́ пребыва́ти восхоте́вшая; ра́дуйся, ро́ду свята́го кня́зя Михаи́ла Черни́говскаго сугу́бо благоволи́вшая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 3.

Си́лою и благода́тию Твое́ю, Всенепоро́чная, зе́млю Бря́нскую осени́ла еси́ и явле́нием ико́ны Твоея́ Пече́рския нело́жно показа́ла еси́, я́ко ме́ста сего́ Защи́тница и Влады́чица бу́деши. Позна́вше сие́, свяще́нницы и вси́ лю́дие ве́лиим гла́сом возопи́ша Бо́гу: Аллилу́иа.

И́кос 3.

Име́яй наде́жду на исцеле́ние, благове́рный кня́зь Рома́н со архиере́и и свяще́нницы, с мона́хи и все́ми людьми́ от ма́ла до вели́ка, со свещми́ и кади́лы прии́де на го́ру, и не могу́ще узре́ти тропы́, веду́щей ко дре́ву, иде́же стоя́ше ико́на сия́, воздохну́в из глубины́ души́, со слеза́ми взыва́ше:

Ра́дуйся, Богоро́дице Мари́е, Ма́ти Христа́ Бо́га на́шего; ра́дуйся, Всеми́лостивая Де́во, изво́лившая яви́ти чудотво́рный о́браз Тво́й.

Ра́дуйся, Пречу́дная Влады́чице, дарова́ти прозре́ние очесе́м вла́сть иму́щая; ра́дуйся, Богосве́тлая Свеще́, мра́к грехо́вный отгоня́ющая.

Ра́дуйся, сле́зную моли́тву не презира́ющая; ра́дуйся, у́хо Твое́ ко все́м моля́щим Тя́ в ско́рби серде́чней приклоня́ющая.

Ра́дуйся, я́ко Тобо́ю не то́кмо теле́сныя, но и душе́вныя о́чи отверза́ются; ра́дуйся, я́ко Тобо́ю красоту́ ми́ра Бо́жия созерца́ти науча́емся.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 4.

Бу́рю сумни́тельных помышле́ний отгна́в, благове́рный кня́зь обе́т даде́ Пречи́стей хра́м воздви́гнути и оби́тель на горе́ се́й, и земли́ отме́рити ще́дро, ели́ко взо́р челове́ческий возмо́жет узре́ти с ме́ста сего́. Те́мже в то́й ча́с уви́де ма́лу стезю́ пред собо́ю, и а́бие повеле́ Кре́ст во основа́ние оби́тели поста́вити, ра́достно поя́: Аллилу́иа.

И́кос 4.

Услы́ша Де́ва Всепе́тая гла́с моли́твы собо́рныя, ю́же еди́ными усты́ вознесо́ша вси́ лю́дие, тогда́ бо прозре́ вели́кий кня́зь Рома́н пе́рвых оче́с ясне́йше; те́мже со тре́петом повеле́ епи́скопу со архимандри́том и всему́ при́чту церко́вному прия́ти со дре́ва о́браз Пречи́стыя и целова́ше чудотво́рную ико́ну, со умиле́нием воспева́я си́це:

Ра́дуйся, Све́т и́стинный вселе́нней все́й яви́вшая; ра́дуйся, ди́вная на́ша Засту́пнице.

Ра́дуйся, Исто́чниче приснотеку́щий исцеле́ний; ра́дуйся, Наде́ждо на́шего спасе́ния.

Ра́дуйся, Цели́тельнице, слепы́х оче́с прозре́ние; ра́дуйся, Еди́на в жена́х Благослове́нная.

Ра́дуйся, Всенепоро́чная Де́во, безсе́менно Христа́ Бо́га воплоти́вшая; ра́дуйся, Све́том Боже́ственныя благода́ти возсия́вшая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 5.

Боже́ственная благода́ть, ико́не Твое́й дарова́нная, созыва́ет ве́рных собо́ры пе́сньми духо́вными сла́вити Тя́, Пресла́вная Присноде́во, и поклоня́тися Сы́ну Твоему́ Боже́ственному; те́мже архиере́и и свяще́нницы, мона́си и мирсти́и согла́сно воспева́ют: Аллилу́иа.

И́кос 5.

Ви́дя явле́нное Тобо́ю чу́до, Богома́ти, прозре́вый кня́зь Рома́н свои́ма рука́ма на хра́м Бо́жий бре́вна руби́ти нача́т и лю́дем все́м повеле́ твори́ти та́кожде. Егда́ же це́рковь во и́мя сла́внаго Успе́ния Твоего́ воздви́гнута бы́сть и освяще́на, служи́ти собо́рне Литурги́ю Боже́ственную архиере́ю повеле́, все́м се́рдцем сицева́я воспева́яй:

Ра́дуйся, одушевле́нный Хра́ме Бо́жий; ра́дуйся, Пречи́стая, прему́дрости сокро́вище.

Ра́дуйся, Боже́ственное жили́ще вели́каго Царя́; ра́дуйся, светоза́рная Ски́ние, Бо́га вмести́вшая.

Ра́дуйся, зе́млю Бря́нскую в достоя́ние Себе́ избра́вшая; ра́дуйся, оби́тели Све́нския Устрои́тельнице блага́я.

Ра́дуйся, ико́ну Свою́ Пече́рскую основа́нием оби́тели положи́вшая; ра́дуйся, то́ю мно́гия исцеле́ния и чудесы́ яви́вшая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 6.

Пропове́дует оби́тель Све́нская предста́тельство Твое́, Влады́чице, все́м приходя́щим с ве́рою, и́бо чудотво́рный о́браз Тво́й, я́ко киво́т Заве́та, на ме́сте, избра́ннем Тобо́ю, пребыва́ет и чудесы́ благоуха́ет; Твои́м бо предста́тельством плене́нныя свобожда́еши, очи́ма исцеле́ние да́руеши, духо́в нечи́стых изгоня́еши. Сего́ ра́ди изба́вленнии Тобо́ю благода́рственно взыва́ют: Аллилу́иа.

И́кос 6

Возсия́вшая благода́ть в вертогра́де Твое́м духо́внем, Всепе́тая, и́щущих спасе́ния привлека́ет мно́жество. Отону́дуже мно́зи иера́рси и ста́рцы честни́и во уедине́нии ми́рно подвиза́хуся на ме́сте о́ном под покро́вом Твои́м, Цари́це Небе́сная, и вели́ких чудотво́рцев Анто́ния и Феодо́сия, с ве́рою в и́х заступле́ние, па́че же со упова́нием на милосе́рдие Бо́жие. Мы́ же, недосто́йнии, стезе́ю отце́в на́ших ше́ствующе, со усе́рдием притека́ем к чудотво́рному о́бразу Твоему́, взыва́юще си́це:

Ра́дуйся, благода́тных явле́ний испо́лненная; ра́дуйся, моли́твы на́ша прие́млющая.

Ра́дуйся, бе́ды и ско́рби на́ша зря́щая; ра́дуйся, сле́зы уны́ния и отча́яния изсуша́ющая.

Ра́дуйся, и́ноческаго жития́ Покрови́тельнице; ра́дуйся, мона́шескаго чи́на Небе́сная Нача́льнице.

Ра́дуйся, вла́сти предержа́щия к разуме́нию во́ли Бо́жия призыва́ющая; ра́дуйся, послуша́нию соверше́нному науча́ющая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 7.

Хотя́ще обнови́ти и благоукра́сити о́браз Тво́й, Богома́ти, принесо́ша и́ноцы святы́ню сию́ в ца́рствующий гра́д Москву́ госуда́рю вели́кому кня́зю и всея́ Руси́ самоде́ржцу с моле́нием вели́ким. Зря́ще, я́ко мно́гу вре́мени мину́вшу, потемне́ сребро́ и обломи́ся зла́то на окла́де ико́ны дре́вния, помоли́ся госуда́рь Пречи́стей и умили́ся се́рдцем, и наказа́ среброде́лателем свои́м окла́д обнови́ти и ка́мением драгоце́нным украси́ти; благочести́вии же и́ноцы воспе́ша благода́рственно Бо́гу: Аллилу́иа.

И́кос 7.

Но́вое и пресла́вное чу́до яви́ла еси́, Изба́вительнице, егда́ в ка́менней це́ркви по веле́нию госуда́реву во оби́тели Све́нстей возводи́мей, попуще́нием Бо́жиим паде́ние сво́дов бы́сть. Игу́мен Мартиниа́н с бра́тиею чудоде́йствием Твои́м невреди́м из о́ныя це́ркви изы́де; Ти́хон же ста́рец и с ни́м шестьна́десять иску́сных де́лателей церко́вных и о́троки то́кмо ра́ны ма́лыя получи́ша, оба́че ни еди́наго от си́х сме́рть уязви́. Те́мже, вси́ изба́вленнии от внеза́пныя поги́бели воспе́ша Ти́ такова́я:

Ра́дуйся, Ма́ти Бо́жия, любо́вию к ро́ду челове́ческому преиспо́лненная; ра́дуйся, безвре́менно поги́бнути тружда́ющимся не попусти́вшая.

Ра́дуйся, ка́мение па́дающее незри́мо удержа́вшая; ра́дуйся, заступле́нием Твои́м зако́ны естества́ изменя́ющая.

Ра́дуйся, Де́во Мари́е, Отрокови́це, чистоты́ и целому́дрия испо́лненная; ра́дуйся, Ма́ти Ми́лостивая, отроко́в от сме́рти спаса́ющая.

Ра́дуйся, Благослове́нная, две́ри милосе́рдия бе́дствующим отверза́ющая; ра́дуйся, гре́шником неча́янную ра́дость обновле́ния души́ покая́нием да́рующая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 8.

Стра́нное и пресла́вное чу́до яви́ла еси́, Взбра́нная Воево́до, егда́ во времена́ о́ныя полки́ иноплеме́нников, виде́нием гро́зным устраши́вши, в бе́гство обрати́ла еси́ и от разоре́ния оби́тель Твою́ и гра́д Бря́нск сохрани́ла еси́. Сего́ ра́ди и́ноцы и вси́ лю́дие возопи́ша ра́достно: Аллилу́иа.

И́кос 8.

Во дни́ наше́ствия га́ллов и с ни́ми два́десяти язы́к, ко гра́ду Бря́нску устреми́вшихся, благове́рнии лю́дие ше́ствие со ико́ною Твое́ю о́крест гра́да устро́иша, и, о чудесе́! по́лчища вра́жеская обрати́шася вспя́ть. Те́мже вси́, спасе́ннии Тобо́ю, из глубины́ души́ воззва́ша си́це:

Ра́дуйся, све́т ти́хий от многочу́днаго о́браза Твоего́ излива́ющая; ра́дуйся, сия́нием Ли́ка Твоего́ враги́ ослепля́ющая.

Ра́дуйся, сердца́ и́ноков отгна́нием враго́в возвесели́вшая; ра́дуйся, жи́телей гра́да Бря́нска в ве́ре утверди́вшая.

Ра́дуйся, я́ко Тобо́ю сопроти́вныя до конца́ побежда́ем; ра́дуйся, я́ко Тобо́ю сете́й неви́димых избега́ем.

Ра́дуйся, я́ко на бра́нь со страстьми́ повеле́нием Твои́м ополча́емся; ра́дуйся, я́ко Тобо́ю наде́жду на спасе́ние ве́чное обрета́ем.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 9.

Вся́кое проше́ние благо́е исполня́еши благоволе́нием Твои́м, Богороди́тельнице, я́ко Ма́ти су́щи Зижди́теля все́х; не оставля́еши ми́лостию и избра́нный До́м Тво́й на Десне́ реце́; се́ бо игу́мену Варна́ве с бра́тиею ка́менную це́рковь со трапе́зою вно́вь устро́ити помога́еши, да сверши́вше де́ло благо́е, вознесу́т моли́тву Бо́гу, пою́ще: Аллилу́иа.

И́кос 9

Вети́и многоглаго́ливыя умолко́ша, не могу́ще досто́йно изъясни́ти чудеса́ Твоя́, Присноде́во, от ико́ны Све́нския происходя́щая. Не то́кмо кня́зя от слепоты́ изба́вила еси́, но и дще́рь купе́ческую, и боля́рыню Кара́чевскую, и сы́на слуги́ ея́ от боле́зни оче́с исцели́ла еси́ ми́лостивно, па́че и во ины́х боле́знех цели́тельница явля́ешися, еще́ же и му́чимых от вла́сти те́мных си́л свобожда́еши. Сего́ ра́ди мы́ благода́рным се́рдцем пое́м Ти́:

Ра́дуйся, скорбя́щих серде́ц блага́я Уте́шительнице; ра́дуйся, благослове́нная А́гнице и непоро́чная Влады́чице.

Ра́дуйся, рая́ Кла́с Невозде́ланный прозя́бшая; ра́дуйся, наве́ты лука́выя до конца́ низлага́ющая.

Ра́дуйся, Две́ре Госпо́дня непроходи́мая; ра́дуйся, в беда́х и напа́стех Стено́ неруши́мая.

Ра́дуйся, Кре́посте упова́ющим на Тя́ несумне́нно; ра́дуйся, Отра́до и Наде́ждо боля́щим неисце́льно.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 10.

Спасе́ния ра́ди ду́ш мно́гих поста́влен бы́сть казначе́й ла́вры Пече́рския Иоа́нн во игу́мена оби́тели Све́нския, иде́же уста́вы устрожа́ше; и́ноцы же не́цыи о то́м печа́лишася и госуда́рю царю́ на игу́мена се́товаша. Оба́че Твои́м промышле́нием, Всечи́стая, оби́тель процвета́ше и все́м вся́ на по́льзу бы́сть. Мы́ же Ма́тернее попече́ние Твое́ зря́ще, пе́снь хвале́бную пое́м Бо́гу: Аллилу́иа.

И́кос 10.

Стена́ еси́ все́м и прибе́жище прося́щим заступле́ния Твоего́, Преблага́я, не то́кмо бо от вра́г вне́шних огражда́еши, но и от клеветы́ челове́ческия и ко́зней лука́вых духо́в изыма́еши моля́щих Тя́ и взыва́ющих Ти́ такова́я:

Ра́дуйся, Благода́тная, в ле́то Безле́тнаго породи́вшая; ра́дуйся, Всенепоро́чная, младе́нца Христа́ млеко́м пита́вшая.

Ра́дуйся, Престо́ле сла́вы Святы́я Тро́ицы; ра́дуйся, Боже́ственная трапе́зо и ста́мно всезлата́я.

Ра́дуйся, не́мощи на́ша душе́вныя и теле́сныя ве́дущая; ра́дуйся, на одре́ лежа́щия лечбо́ю моли́твы Твоея́ исцеля́ющая.

Ра́дуйся, я́ко Тобо́ю непра́ведное осужде́ние облича́ется; ра́дуйся, я́ко Тобо́ю и́стина возвыша́ется.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 11.

Пе́ние велегла́сное прино́сим Ти́, Храни́тельнице на́ша Всеми́лостивая, я́ко во дни́ ско́рбных обстоя́ний и бе́дствий наро́дных ве́лию любо́вь к ро́ду челове́чу явля́еши. Отону́дуже о Тебе́, я́ко о Засту́пнице земли́ Ру́сския взыва́ем во вся́ времена́: Аллилу́иа.

И́кос 11.

Светоприе́мная свеща́ яви́лася еси́, Де́во, христиа́ном во дни́ гоне́ния на Це́рковь Ру́сскую, егда́ мно́зи святы́ни рука́ми безбо́жных отъя́ты от ве́рных бы́ша; оба́че ве́ру из серде́ц моля́щихся исто́ргнути никто́же возмо́же; сего́ ра́ди новому́ченицы и испове́дницы, му́ки лю́тыя от богобо́рных терпя́ще му́жественно, взыва́ше Ти́:

Ра́дуйся, же́зле Ааро́нов, прозя́бший нетле́ние; ра́дуйся, Ле́ствице Иа́ковля, е́юже сни́де Бо́г.

Ра́дуйся, я́ко Кресто́м Сы́на Твоего́ низложи́ся а́д; ра́дуйся, я́ко от муче́ния ве́чнаго Тобо́ю свободи́хомся.

Ра́дуйся, за Христа́ страда́ния прие́млющим превели́кая Помо́щнице; ра́дуйся, я́ко Тобо́ю страда́ния превозмога́я, вы́шния ра́дости исполня́емся.

Ра́дуйся, я́ко заблу́ждшия и отча́янныя от поги́бели Тобо́ю избавля́ются; ра́дуйся, я́ко Тобо́ю естество́ челове́ческое Небе́сныя сла́вы сподобля́ется.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 12.

Благода́ть от ико́ны Твоея́ излива́ется оби́льно, Присноде́во, я́ко пи́санными со о́браза Твоего́ Све́нскаго изображе́нии освяща́еши страну́ Росси́йскую, и́миже сто́льный гра́д Москва́, и Яросла́вль, и ины́я гра́ды красу́ются, и да́льняя Сиби́рская страна́ ра́дуется, иму́щи Тя́ Покрови́тельницу. Те́мже у́бо во все́х конце́х земли́ на́шея велича́ем Тя́, вознося́ще пе́снь Бо́гу: Аллилу́иа.

И́кос 12.

Пою́ще ми́лости и чудеса́ Твоя́, Присноде́во, явле́нныя во оби́тели Све́нстей от ле́т дре́вних и до ны́не, с ве́рою припа́даем пред новопи́санным честны́м о́бразом Твои́м во оби́тели возрожде́нней, я́ко исцеле́ния да́руеши оби́льно и боле́зни вся́кия врачу́еши, и просвеща́еши, и спаса́еши всех, призыва́ющих Тя́, и вопию́щих Ти́ такова́я:

Ра́дуйся, Держа́вная ми́ра Засту́пнице; ра́дуйся, держа́вы на́шея Небе́сная Влады́чице.

Ра́дуйся, Обра́дованная, ми́ру ве́сть благу́ю яви́вшая; ра́дуйся, Всесве́тлая Пала́то все́ми Влады́чествующаго.

Ра́дуйся, я́ко сла́ва ди́вныя ико́ны Све́нския ве́дома все́й земли́ Ру́сской; ра́дуйся, пи́санныя с нея́ о́бразы чудесы́ мно́гими просла́вившая.

Ра́дуйся, сохрани́ти страну́ на́шу от междоусо́бныя бра́ни Бо́га умоля́ющая; ра́дуйся, омофо́ром Свои́м зе́млю Ру́сскую покрыва́ющая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 13.

О, Всесвята́я Ма́ти Бо́жия, Де́во Пренепоро́чная, ны́нешнее приими́ приноше́ние на́ше, и к Сы́ну Твоему́ вознеси́ моли́тву о на́с, недосто́йных, да от напра́сныя поги́бели и вся́кия ско́рби изба́вит на́с, вопию́щих о Тебе́ с любо́вию: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгелом Гаврии́лом воспита́нная во Свята́я Святы́х, Богоотрокови́це, свя́тости и благоле́пия церко́внаго во страна́х христиа́нских ревни́тельница быва́еши. Чрез ико́ну Твою́ Пече́рскую мно́гая чудеса́ во гра́де Ки́еве яви́вшая, по́слежде в зе́млю Бря́нскую по проше́нию благове́рнаго кня́зя Рома́на, слепото́ю неду́гующаго, с по́честьми отпра́вилася еси́. Отцы́ же Пече́рстии, провожда́я о́браз Тво́й, воспе́ша Ти́ такова́я:

Ра́дуйся, Непоро́чная, от пра́ведных Иоаки́ма и А́нны ро́ждшаяся; ра́дуйся, Цари́це Всеблага́я, спасе́ние всему́ ми́ру яви́вшая.

Ра́дуйся, зе́млю Ру́сскую во уде́л Себе́ избра́вшая; ра́дуйся, оби́тели Пече́рския свята́я Покрови́тельнице.

Ра́дуйся, нача́льником и́ноческаго жития́ Анто́нию и Феодо́сию в труде́х Помо́щнице; ра́дуйся, ико́ны, пи́саныя избра́нником Бо́жиим Али́пием, чудесы́ просла́вившая.

Ра́дуйся, ко гра́ду Бря́нску о́браз Сво́й чу́дный в лодии́ прове́дшая; ра́дуйся, ме́сто но́выя оби́тели в низо́вии Све́ны реки́ указа́вшая.

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Конда́к 1.

Избра́нней от все́х родо́в Пречи́стей Де́ве Мари́и и Ма́тери Бо́га на́шего соста́вим похвалу́. Ты́ же, Влады́чице, я́ко зе́млю Ру́сскую под Сво́й Покро́в прии́мшая и оби́тели и́ноческия ико́нами чудотво́рными украси́вшая, сохрани́ оби́тель Твою́ и спаси́ все́х на́с, да зове́м Ти́:

Ра́дуйся, Пресвята́я Богоро́дице Де́во, Све́нская похвало́ и на́ше при́сное утеше́ние.

Моли́тва.

О, Всеми́лостивая Ма́ти, Пречи́стая Де́во Богоро́дице, Возбра́нная Воево́до правосла́вных! Благода́рным се́рдцем и усты́ славосло́вим Тя́ при́сно пред Све́нскою ико́ною Твое́ю, ю́же я́ко Боже́ственное украше́ние Це́ркве Ру́сския и зало́г ми́лости Твоея́ ве́рным лю́дем дарова́ла еси́. Се́ю бо ико́ною благода́ть Бо́жию, Правосла́вней Це́ркви прису́щую, явля́еши, егда́ то́чиши исцеле́ния, напа́стей избавля́еши, бесо́в прогоня́еши, наше́ствия иноплеме́нных отража́еши.

Те́мже приле́жно мо́лим Ти ся, Богома́ти: проба́ви и на пре́дняя вели́кия ми́лости Твоя́ любо́вию чту́щим Тя́, Правосла́вие утверди́, отпа́дшия от пра́выя ве́ры к позна́нию и́стины напра́ви и уста́ нечести́вых, ху́лящих Святу́ю Це́рковь, загради́. Оте́честву на́шему ми́р и на враги́ побе́ды да́руй, огради́ на́с от нахожде́ния супоста́т, междоусо́бныя бра́ни и вся́каго зла́, па́че же от душегуби́тельных страсте́й свободи́, во е́же умре́ти ми́ру и жи́ти Сы́ну и Бо́гу Твоему́ в соблюде́нии за́поведей Его́. И сподо́би на́с, Предста́тельнице на́ша непосты́дная, на Стра́шнем Суде́ одесну́ю Престо́ла Бо́жия ста́ти и с ли́ки А́нгелов и святы́х та́мо восхваля́ти пречестно́е и́мя Сы́на Твоего́, со Безнача́льным Его́ Отце́м и Пресвяты́м Ду́хом во ве́ки. Ами́нь.