Конда́к 1.

Избра́нная и те́плая ми́ра Засту́пнице и всея́ земли́ Росси́йския и Це́ркви Правосла́вныя, Ку́рскаго кра́я Отра́до и Утеше́ние. Я́ко озаре́ннии зна́мением Твоея́ благода́ти, под се́нь святы́я Твоея́ ико́ны притека́ем. Ты́ же я́ко исто́чник неизсяка́емый, помога́й на́м во юдо́ли бе́д и скорбе́й, да благода́рственно вопие́м Ти́:

Ра́дуйся, Пречи́стая, зна́мением ве́чныя ра́дости ми́р утеша́ющая.

И́кос 1.

А́нгели и челове́цы удиви́шася, ка́ко по Вознесе́нии Христо́ве враго́в Его́ к ве́ре обрати́ла еси́, Влады́чице, егда́ бо они́ воспроси́ша от Тебе́ зна́мения, возде́ла еси́ ру́це с моли́твою, и внеза́пу на пе́рсех Твои́х возсия́ Младе́нец Христо́с. Сему́ зна́мению чудя́щеся, и мы́ вопие́м Ти́:

Ра́дуйся, дре́вле неве́рных зна́мением Твои́м ко Христу́ обрати́вшая; ра́дуйся, и ны́не сомня́щихся чудесы́ просвеща́ющая.

Ра́дуйся, ико́ною Зна́мения возвесели́вшая Ку́рский кра́й; ра́дуйся, то́ю сохраня́ющая его́ от лю́тых бе́д.

Ра́дуйся, уте́шившая ве́рных в ага́рянском плене́нии; ра́дуйся, и на́с ободря́ющая в де́монских ко́знех.

Ра́дуйся, ико́нами Твои́ми всю́ Росси́ю осени́вшая; ра́дуйся, те́ми я́ко звезда́ми ко спасе́нию на́с путеводя́щая.

Ра́дуйся, ми́лостию ми́лостиво от ни́х наро́д в пра́вой ве́ре сохраня́ющая; ра́дуйся, я́ко Тобо́ю за Правосла́вие спаса́ет Бо́г зе́млю Ру́сскую.

Ра́дуйся, свято́е се́рдце, возлюби́вшее все́х и вся́; ра́дуйся, ча́ше, в не́йже сле́зы ми́ра в сла́дкое вино́ ра́дования претворя́ются.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 2.

Ви̜́дяще Ру́сь, я́ко Рахи́ль, пла́чущую о ча́дех свои́х, погиба́ющих под и́гом ага́рянским, благоволи́ла еси́, Влады́чице, во утеше́ние разоре́нныя о́бласти Ку́рския яви́ти чудотво́рную ико́ну Твою́, ю́же в лесу́ при ко́рени дре́ва обре́т просте́ц не́кий и с любо́вию облобыза́ и узре́в исто́чник воды́, зде́ исте́кший, ра́достно Бо́гу возопи́: Аллилу́иа.

И́кос 2.

Разуме́ша ве́рнии но́вое зна́мение ми́лости Твоея́ благода́тныя, егда́ разсече́нную мече́м ага́рянским ико́ну Твою́ па́ки обре́те прише́д из пле́на иере́й Боголю́б в ку́ще цвето́в. Егда́ же о́н с моли́твою на уста́х соедини́ ча́сти ея́, и сотвори́ся ико́на це́ла, вси́ со удивле́нием сего́ ра́ди возопи́ша:

Ра́дуйся, необори́мая стено́ Правосла́вия; ра́дуйся, сто́лпе Вселе́нския Це́ркви.

Ра́дуйся, иере́я Боголю́ба сподо́бившая послужи́ти ико́не Твое́й; ра́дуйся, вдохну́вшая ему́ му́ченическое дерзнове́ние.

Ра́дуйся, я́ко о́н с любо́вию претерпе́ пле́н за святы́ню Твою́; ра́дуйся, пред о́чию его́ разсече́ну ико́ну сотвори́вшая це́лу.

Ра́дуйся, дре́вних испове́дников сла́во; ра́дуйся, но́вых му́чеников весе́лие.

Ра́дуйся, и на́с науча́ющая страда́ти за ве́ру Христо́ву; ра́дуйся, сла́досте за Христа́ погиба́ющих.

Ра́дуйся, светоно́сный о́блак, вознося́й до вра́т небе́сных.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 3.

Си́лою Вы́шняго от гра́да Ры́льска возвраща́ла еси́, Богома́ти, чу́дную ико́ну Твою́ в де́брь лесну́ю, на ме́сто явле́ния тоя́. Ца́рь же Фео́дор оби́тель та́мо созда́, да приходя́щий от мно́гих стра́н лю́дие со исцеле́нием теле́сным и ду́ши своя́ покая́нием уврачу́ют, зову́ще непреста́нно Бо́гу: Аллилу́иа.

И́кос 3.

Я́ко иму́щая держа́ву непобеди́мую, чуде́сно спасла́ еси́, Богома́ти, от сожже́ния ага́рянскаго пусты́нную оби́тель Твою́ и во гла́де ея́ снабдева́ше потре́бным, иногда́ же и небе́снаго благоуха́ния всю́ исполня́ше. Сего́ ра́ди в теплоте́ серде́чной вопие́м Ти́:

Ра́дуйся, в лесно́м уедине́нии оби́тель Твою́ охраня́ющая; ра́дуйся, земну́ю красу́ пусты́ни Небе́сной сла́вою возвели́чившая.

Ра́дуйся, спаса́ющихся зде́, озари́вшая да́ром прозре́ния; ра́дуйся, му́дростию и́х спаса́ющая богомо́льцев.

Ра́дуйся, ре́вностным явля́ющаяся в виде́нии; ра́дуйся, лени́вых устраша́ющая в со́ниях.

Ра́дуйся, я́ко Тобо́ю хрома́я еще́ на пути́ исцеле́; ра́дуйся, я́ко Тобо́ю слепа́я кре́ст оби́тели Твоея́ издале́че узре́.

Ра́дуйся, разсла́бленную воздви́гшая водо́ю исто́чника; ра́дуйся, бесо́в изгна́ние и безу́мных здра́вие.

Ра́дуйся, собира́ющая зде́ лю́ди в ты́сящах мно́гих; ра́дуйся, все́м подаю́щая благода́ть на благода́ть.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 4.

Бу́рею неве́рия одержи́м к чудотво́рней ико́не Твое́й, Всеблага́я, слепото́ю наказу́ется кня́зь Васи́лий Шемя́ка, но в покая́ние прише́д па́ки восприе́млет зре́ние теле́сное вку́пе же и душе́вное, со стра́хом поя́: Аллилу́иа.

И́кос 4.

Ви́девше гра́ждане ку́рския в нощи́ по стена́м гра́да ходя́щу Ди́вную Жену́ с шестию́ светоно́сными му́жи, разуме́ша, я́ко Цари́ца Небе́сная прии́де спасти́ и́х от бе́д и от поги́бели, и, восприи́мше неча́янную ра́достную побе́ду на враги́, возопи́ша:

Ра́дуйся, взбра́нная Воево́до; ра́дуйся, изве́стная Засту́пнице.

Ра́дуйся, сле́зныя моли́твы прие́млющая; ра́дуйся, с Небе́с на по́мощь на́м ускоря́ющая.

Ра́дуйся, мо́ре изоби́льных ми́лостей Бо́жиих; ра́дуйся, исто́чниче благоде́нствия земли́ Ку́рския.

Ра́дуйся, при гла́де в земли́ Росси́йстей благопло́дие е́й пода́вшая; ра́дуйся, хле́бом ея́ ины́я страны́ напита́вшая.

Ра́дуйся, обнесе́нием ико́ны Твоея́ спаса́вшая ни́вы от саранчи́; ра́дуйся, умножа́ющая благорастворе́ние дожде́й.

Ра́дуйся, от смертоно́сныя я́звы избавле́ние; ра́дуйся, и жи́зни ве́чныя наслажде́ние.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 5.

Боготе́чныя ико́ны Зна́мения слы́шав чудеса́, ца́рь Фео́дор со сла́вою прие́млет ю́ в первопресто́льный гра́д и о́крест тоя́ о́браза проро́ков написа́ти повелева́ет, и ри́зою многоце́нною украша́ет. Ра́дуется ку́пно с ни́м и вся́ Москва́, пою́ще: Аллилу́иа.

И́кос 5.

Узре́ша но́ваго избра́нника Бо́жия гра́ждане ку́рския, егда́ от ико́ны Зна́мения во о́трочестве исцеле́н бы́сть Преподо́бный Серафи́м и Тобо́ю, Влады́чице, просвеща́ем, я́ко со́лнце возблиста́ свя́тостию и чудесы́ всему́ Правосла́вному ми́ру, с любо́вию пою́щу Ти́:

Ра́дуйся, все́х ра́достей Ра́досте; ра́дуйся, таи́ннице душе́внаго умиле́ния.

Ра́дуйся, све́тлосте моли́твенных созерца́ний; ра́дуйся, сокро́вище смиренному́дрых.

Ра́дуйся, Преподо́бнаго Серафи́ма ти́хая кре́посте; ра́дуйся, святи́теля Иоаса́фа пла́менная ре́вносте.

Ра́дуйся, но́вых свети́льников на́м явля́ющая; ра́дуйся, и́м подража́ти на́с науча́ющая.

Ра́дуйся, пресве́тлая сла́во святы́х; ра́дуйся, кре́посте немощны́х.

Ра́дуйся, я́ко Тобо́ю ско́рбь утоля́ется; ра́дуйся, я́ко Тобо́ю заря́ ве́чности сия́ет.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 6.

Пропове́дник си́лы Твоея́ бы́сть слепе́ц не́кий, и́же с ве́рою припа́в к ико́не Твое́й и умы́в о́чи от явле́ннаго исто́чника Твоего́, внеза́пу прозре́ и, ви́дев красоту́ ми́ра Бо́жия и селе́ния сла́вы Твоея́, с ра́достию и весе́лием прославля́ше, поя́ сему́: Аллилу́иа.

И́кос 6.

Возсия́ла еси́ ле́ствицею к небеси́ не́коей вдови́це, я́же блу́днаго ра́ди своего́ жития́ восхоте́ удави́тися. Узре́вше же на о́блацех ико́ну Твою́ Зна́мения, уразуме́ Бо́жие долготерпе́ние и ми́лость и от сме́ртнаго уны́ния к чи́стому покая́нию востече́. Мы́ же я́ко Спору́чнице гре́шных вопие́м:

Ра́дуйся, гре́шницу обрати́вшая к покая́нию; ра́дуйся, очи́стившая ю́ по́двигом стра́нствования.

Ра́дуйся, от отча́яния приводя́щая к ми́рной кончи́не; ра́дуйся, освяще́ние ду́ш и теле́с.

Ра́дуйся, бу́ри ко́зней бесо́вских смиря́ющая; ра́дуйся, све́тлый о́блаче, ми́лостьми Бо́жиими на́с покрыва́ющая.

Ра́дуйся, я́ко прогна́нием лука́вых прило́гов вра́жиих на́с от поги́бели избавля́ющая; ра́дуйся, преодоле́ние поро́чных жела́ний.

Ра́дуйся, отсека́ющая пристра́стие к земны́м утеше́ниям; ра́дуйся, устроя́ющая жи́знь во Христе́.

Ра́дуйся, су́щим во тьме́ поро́ка излива́ющая све́т спасе́ния; ра́дуйся, по терни́стому пути́ в ра́й руководя́щая.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 7.

Хотя́щи спасти́ гра́д Ку́рск от разруше́ния, возвести́ла еси́ но́щию нерукотво́рным таи́нственным зво́ном о гряду́щих вразе́х. Та́ко и ны́не, Влады́чице, гла́сом чуде́с Твои́х возбуди́ на́с от сна́ грехо́внаго, да исправле́нием жития́ спасе́мся от ве́чныя сме́рти, пою́ще: Аллилу́иа.

И́кос 7.

Но́выя зна́мения и чудеса́ ви́дяще, дерза́йте у́бо, лю́дие Бо́жии: се́ бо ве́лию благода́ть подае́т Цари́ца Небе́сная от чудотво́рныя ико́ны Своея́, да вся́ блага́я пред не́ю проси́мая исполня́ются. Ве́ра на́ша спасе́т на́с, и уте́шит Влады́чица, внегда́ к Не́й припа́даем, зову́ще:

Ра́дуйся, посреде́ на́с ны́не су́щая; ра́дуйся, та́йны серде́ц на́ших ве́дущая.

Ра́дуйся, гла́дным трапе́зо сладкопита́нная; ра́дуйся, в ну́ждах предста́тельство ско́рое.

Ра́дуйся, наста́вников благода́тная му́дросте; ра́дуйся, уча́щихся до́брая помо́щнице.

Ра́дуйся, утеше́ние ста́рости; ра́дуйся, кре́посте изнемога́ющих.

Ра́дуйся, уны́лых ободре́ние; ра́дуйся, гони́мых прибе́жище.

Ра́дуйся, из ту́чи бе́д све́тлою наде́ждою облиста́ющая; ра́дуйся, вся́ к жи́зни поле́зная да́рующая.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 8.

Стра́шно бе́ ви́дети, егда́ бо страна́ Ку́рская изнемога́ше от холе́рныя сме́рти, лю́дие с во́плем припа́даше к Тебе́, Всеми́лостивая, и со слеза́ми покая́ния обнесо́ша о́браз Тво́й с моле́бным пе́нием о́крест гра́да, и преста́ губи́тельство сме́ртное. И пла́ч го́рький измени́ся в ра́достную пе́снь спаса́ющему Тобо́ю на́с Бо́гу: Аллилу́иа.

И́кос 8.

Всехва́льную и святу́ю чудотво́рную ико́ну Твою́, Присноде́во, все́ жи́тели о́бласти Ку́рския с неизрече́нною ра́достию и благогове́нием всегда́ прие́млют в до́мы своя́, те́пле вопию́ще: «И отку́да на́м сие́, да прии́де Ма́терь Го́спода на́шего к на́м»,– и припа́дают со слеза́ми, си́це моля́шеся:

Ра́дуйся, ра́дость и благода́ть в до́мы принося́щая; ра́дуйся, любо́вию и согла́сием се́мьи осеня́ющая.

Ра́дуйся, благода́тное ве́яние святы́ни на́м явля́ющая; ра́дуйся, благоуха́нием ми́рныя тишины́ духо́вныя на́с озаря́ющая.

Ра́дуйся, спаса́ющая в тя́жких ско́рбех ма́терей и ча́д; ра́дуйся, ве́чная сла́во чи́стых де́в и многострада́льных ма́терей.

Ра́дуйся, всеси́льное дерзнове́ние роди́тельской моли́твы; ра́дуйся, ча́д малове́рных к Бо́гу обраще́ние.

Ра́дуйся, вдови́ц духо́вное ра́дование; ра́дуйся, небе́сный жре́бий сиро́тствующих.

Ра́дуйся, земна́го благоде́нствия изоби́лие; ра́дуйся, наипа́че страда́ньми небе́сное сча́стье устроя́ющая.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 9.

Вся́ку печа́ль утоля́еши, Де́во Пречи́стая. Сего́ ра́ди бли́жний и да́льний перенесе́ние ико́ны Твоея́ све́тло пра́зднующе, изоби́льно я́ко весе́нния во́ды на поклоне́ние о́ной теку́т, и прие́млюще дарова́ние, о Тебе́ сла́вят Бо́га пе́снию: Аллилу́иа.

И́кос 9.

Вети́я ми́лостей Твои́х яви́ся архимандри́т Изра́иль, егда́ у́бо напое́н бы́в от послу́шника я́дом, притече́ с ве́рою к чудотво́рней ико́не Твое́й и вкуше́нием свята́го еле́я спасе́ние от сме́рти и здра́вие обре́те, на́с же научи́ зва́ти к Тебе́:

Ра́дуйся, Влады́чице жи́зни и сме́рти; ра́дуйся, страда́ньми влеку́щая к пла́менней моли́тве.

Ра́дуйся, чрез око́вы враго́в ми́лость Бо́жию явля́ющая; ра́дуйся, проще́нию оби́д науча́ющая.

Ра́дуйся, послу́шника о́наго обрати́вшая к покая́нию; ра́дуйся, умягче́ние жесто́ких серде́ц.

Ра́дуйся, зло́ претворя́ющая во бла́го; ра́дуйся, я́ко Тобо́ю позна́ем любо́вь Бо́жию.

Ра́дуйся, недове́домое вражду́ющих примире́ние; ра́дуйся, Ма́ти великоду́шия, Е́йже вся́ возмо́жна.

Ра́дуйся, от вра́т сме́ртных к здра́вию возвраще́ние; ра́дуйся, продолжа́ющая жи́знь к покая́нию.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 10.

Спасе́ния на́шего вра́г диа́вол мно́гажды науча́ше люде́й, неве́рием омраче́нных, погуби́ти святы́й о́браз Тво́й, но посра́млен бы́сть. Мы́ же, зря́ще неве́рие и вся́ е́реси я́ко пра́х возмета́емы от руки́ Госпо́дни, правосла́вно пое́м: Аллилу́иа.

И́кос 10.

Сте́ны хра́ма восколеба́шеся, смяте́ся ве́сь гра́д от стра́шнаго взры́ва, угото́ваннаго ко истребле́нию ико́ны Твоея́, Влады́чице. Оба́че чу́дная святы́ня сия́ це́ла пребы́сть посреде́ разруше́ния кра́йняго, исполня́я ра́достию ми́р Правосла́вный, и́бо не оставля́ет и доны́не е́же взыва́ти к Тебе́:

Ра́дуйся, чу́дом и́стину Правосла́вия возвести́вшая; ра́дуйся, посрамля́ющая неве́рных дела́ми ру́к и́х.

Ра́дуйся, не допусти́вшая взры́ва в хра́ме при Богослуже́нии; ра́дуйся, спа́сшая мно́жество ве́рных от жесто́кия сме́рти.

Ра́дуйся, начина́ния зла́я разруша́ющая; ра́дуйся, вся́ к сла́ве Бо́жией обраща́ющая.

Ра́дуйся, стыдо́м покрыва́ющая иконобо́рцев; ра́дуйся, возвели́чившая почита́ние святы́х ико́н.

Ра́дуйся, кощу́нников изступле́нием ума́ наказу́ющая; ра́дуйся, исправля́ющая отсту́пников и еретико́в.

Ра́дуйся, до́ждь о́гненный испуща́ющая на ерети́ческия плете́ния; ра́дуйся, живоно́сное росо́ на па́житях Правосла́вия.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 11.

Воспева́ют Тя́, Де́во всепе́тая, со́нмы святы́х, и́же в житии́ с терпе́нием покро́ву Твоему́ вда́вшеся, Ца́рствия Небе́снаго по́двигом до́брым достиго́ша. Бу́ди у́бо и на́м на земли́ блага́я Путеводи́тельница, да Тобо́ю обря́щем небе́сную сла́ву, пою́ще с Небе́сными ли́ками: Аллилу́иа.

И́кос 11.

Ко́ль возлю́бленна селе́ния Твоя́, Пречи́стая, ко́ль вожделе́н хра́м Тво́й святы́й, иде́же я́ко со́лнце сия́ет пречу́дная ико́на Твоя́, пред не́ю же па́стыри и святи́тели благода́рственное прино́сят пе́ние. Ея́ же ра́ди ве́рнии сладкогла́сно сла́вят Го́спода Вы́шняго. Се́рдце мое́ возра́довася о Тебе́, Всенепоро́чная; сего́ ра́ди пе́снию вопию́ Ти́:

Ра́дуйся, ца́рствующая во сла́ве ико́ны Твоея́; ра́дуйся, Цари́це любве́ и щедро́т.

Ра́дуйся, медоно́сный цве́те ра́дования; ра́дуйся, вино́ духо́внаго торжества́.

Ра́дуйся, при́сно ю́ное умиле́ние ста́рости; ра́дуйся, чи́стое ра́дование мла́дости.

Ра́дуйся, пучи́но тиша́йшаго безстра́стия; ра́дуйся, сподобля́ющая да́ра спаси́тельных сле́з.

Ра́дуйся, ра́досте пра́ведных о Го́споде; ра́дуйся, забве́ние все́х го́рестей.

Ра́дуйся, святе́йшая Неве́сто, ми́р обручи́вшая Бо́гу; ра́дуйся, эде́мская ро́зо, от ея́ же благоуха́ния сердца́ я́ко во́ск истаева́ют.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 12.

Благода́ти Твоея́ неве́дуще, отмета́ются поклоне́ния ико́не Твое́й заблу́ждшия лю́дие: не разуме́ют бо я́ко Ма́терь еси́ Всемогу́щаго, но хуле́нием и неве́рием па́ки распина́ют Сы́на Твоего́. Ты́ же злато́ю мре́жею любви́ Твоея́ улови́ и те́х в послуша́ние и́стины, да ве́рою пра́вою пою́т: Аллилу́иа.

И́кос 12.

Пою́ще глубину́ Твоего́ милосе́рдия, ве́руем я́ко моли́тва Твоя́ восхища́ет от а́да преиспо́дняго, я́ко сле́зы Твоя́ отверза́ют две́ри ра́йския на́м многогре́шным. Те́м же, любвеоби́льная Ма́ти, помина́й все́х живы́х и уме́рших, горе́ и до́лу вопию́щих Ти́:

Ра́дуйся, Ю́же пою́т а́нгели и святи́и на небеси́; ра́дуйся, Е́юже спаса́ются гре́шнии на земли́.

Ра́дуйся, су́щим во а́де му́к осла́бу подаю́щая; ра́дуйся, я́ко Тобо́ю вся́ тва́рь свобо́ду сла́вы ча́д Бо́жиих ча́ет.

Ра́дуйся, возблиста́вшая на́м нетле́ние в Святы́х Та́йнах Сы́на Твоего́;

Ра́дуйся, зна́мением ве́чныя ра́дости сме́рть озари́вшая.

Ра́дуйся, в ча́с кончи́ны утеше́ние и отра́до; ра́дуйся, в де́нь Суда́ всера́достное поми́лование.

Ра́дуйся, ра́дость всео́бщаго воскресе́ния; ра́дуйся, побе́дная пе́снь искупле́нных.

Ра́дуйся, Е́ю же Бо́г бу́дет вся́ческая и во все́х; ра́дуйся, Ма́ти све́та, ми́ра спасе́ние.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 13.

О Всеблаже́нная Ма́ти, пода́ждь ра́дость и поко́й все́м велича́ющим Тя́ и моли́ Сы́на Твоего́, да поми́лует ми́р: заблу́ждшия спасе́т, уме́ршия прости́т, на́с же во Ца́рствии Свое́м помяне́т, о Тебе́ вопию́щих Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели и челове́цы удиви́шася, ка́ко по Вознесе́нии Христо́ве враго́в Его́ к ве́ре обрати́ла еси́, Влады́чице, егда́ бо они́ воспроси́ша от Тебе́ зна́мения, возде́ла еси́ ру́це с моли́твою, и внеза́пу на пе́рсех Твои́х возсия́ Младе́нец Христо́с. Сему́ зна́мению чудя́щеся, и мы́ вопие́м Ти́:

Ра́дуйся, дре́вле неве́рных зна́мением Твои́м ко Христу́ обрати́вшая; ра́дуйся, и ны́не сомня́щихся чудесы́ просвеща́ющая.

Ра́дуйся, ико́ною Зна́мения возвесели́вшая Ку́рский кра́й; ра́дуйся, то́ю сохраня́ющая его́ от лю́тых бе́д.

Ра́дуйся, уте́шившая ве́рных в ага́рянском плене́нии; ра́дуйся, и на́с ободря́ющая в де́монских ко́знех.

Ра́дуйся, ико́нами Твои́ми всю́ Росси́ю осени́вшая; ра́дуйся, те́ми я́ко звезда́ми ко спасе́нию на́с путеводя́щая.

Ра́дуйся, ми́лостию ми́лостиво от ни́х наро́д в пра́вой ве́ре сохраня́ющая; ра́дуйся, я́ко Тобо́ю за Правосла́вие спаса́ет Бо́г зе́млю Ру́сскую.

Ра́дуйся, свято́е се́рдце, возлюби́вшее все́х и вся́; ра́дуйся, ча́ше, в не́йже сле́зы ми́ра в сла́дкое вино́ ра́дования претворя́ются.

Ра́дуйся, Пречи́стая, зна́мением ве́чныя ра́дости ми́р утеша́ющая.

Конда́к 1.

Избра́нная и те́плая ми́ра Засту́пнице и всея́ земли́ Росси́йския и Це́ркви Правосла́вныя, Ку́рскаго кра́я Отра́до и Утеше́ние. Я́ко озаре́ннии зна́мением Твоея́ благода́ти, под се́нь святы́я Твоея́ ико́ны притека́ем. Ты́ же я́ко исто́чник неизсяка́емый, помога́й на́м во юдо́ли бе́д и скорбе́й, да благода́рственно вопие́м Ти́:

Ра́дуйся, Пречи́стая, зна́мением ве́чныя ра́дости ми́р утеша́ющая.

Моли́тва.

О Цари́це Небе́сная! Кто́ изочте́т вели́кое мно́жество чуде́с Твои́х, кто́ исчи́слит во́пли моли́твенных проше́ний, то́ки умиле́нных сле́з, благода́рных воздыха́ний, проли́тых пред ико́ною Твое́ю. Ове́яна у́бо вся́ она́ ско́рбию наро́дною, пла́чем угнете́нных и ра́достною хвало́ю уте́шенных. Припа́даху к не́й лю́дие, поне́сшия ага́рянское и́го, пла́каху Москва́ в сму́тное вре́мя, взыва́ше Ку́рск в наше́ствие вра́жеское. Вопия́ше вся́ о́бласть во дни́ смертоно́сных боле́зней и бе́д, и вся́ ско́рби на ра́дость прелага́ла еси́. Те́мже и ны́не благослови́ зе́млю Ру́сскую. Спаси́ от греха́, поги́бели и собла́знов страну́ на́шу. Изле́й благода́ть на тру́д земледе́льческий и на вся́кое благо́е начина́ние обще́ственное. Помяни́, Пресвята́я Де́во, по и́мени все́х предстоя́щих и моля́щихся и вся́ лю́ди, тре́бующия Твоего́ утеше́ния, по́мощи и милосе́рдия. Ты́ у́бо ве́си та́йная серде́ц на́ших. Те́мже все́м по потре́бе и́х проше́ния испо́лни. Изря́днее же заблу́ждших обрати́ к покая́нию, на́с же все́х умудри́ све́том Ева́нгельския любви́ и до́брых де́л. Архипа́стыри и па́стыри и вся́ ве́рныя в Правосла́вии до сме́рти тве́рды покажи́, в Ца́рство Небе́сное упра́ви и со Христо́м жи́ти сотвори́ во ве́ки веко́в. Ами́нь.