Конда́к 1.

Избра́нной от все́х родо́в Пресвяте́й Де́ве Богоро́дице благогове́йное пе́ние прино́сим Ти́, раби́ Твои́, Всеблага́я Ма́ти. Ты́ же, я́ко иму́щи милосе́рдие неизрече́нное, оби́тели Святого́рстей ико́ну Свою́ и цельбоно́сный исто́чник дарова́ла еси́, излива́я на́м вели́кия и бога́тыя ми́лости Своя́. Да уте́шеннии Тобо́ю, зове́м Ти́ си́це:

Ра́дуйся, Богоро́дице Де́во, цельбоно́сною водо́ю на́с освяща́ющая.

И́кос 1.

Арха́нгел Гаврии́л, возвеща́я та́йну воплоще́ния Сы́на Бо́жия, прорече́ Ти́, Чи́стая: «Ра́дуйся, благода́тная Мари́е, Госпо́дь с Тобо́ю, Благослове́нна Ты́ в жена́х и благослове́н Пло́д чре́ва Твоего́». Мы́ же, благове́стнику Бо́га Вы́шняго подража́я, благогове́йно зове́м Ти́:

Ра́дуйся, Ты́ бо Отца́ Безнача́льнаго Благослове́ние; ра́дуйся, Ты́ бо Ду́ха Свята́го Жили́ще.

Ра́дуйся, Отроча́ мла́до, О́тчее Сия́ние на́м роди́вшая; ра́дуйся, Ма́ти Пречи́стая, пре́жде рождества́ и по рождестве́ Де́ва пребы́вшая.

Ра́дуйся, Оде́ющагося Све́том, я́ко ри́зою, пелена́ми пови́вшая; ра́дуйся, я́ко Тобо́ю вся́ вселе́нная весе́лия исполня́ется.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 2.

Ви́дяще пречу́дную ико́ну Твою́ «Цельбоно́сныя воды́ Источи́тельница», ве́рная ча́да Твоя́ уразуме́ша, я́ко ми́лостивно восхоте́ла еси́ ви́димым о́бразом Свои́м благода́ть и си́лу Богома́терняго попече́ния оби́тели и все́м притека́ющим ко о́бразу и исто́чнику Твоему́ яви́ти, воспе́ша Промысли́телю Бо́гу: Аллилу́иа.

И́кос 2.

Разуме́ша богопросвеще́ннии и́ноцы благоволе́ние Твое́ Свы́ше, ме́сто оби́тели своея́ Свято́ю горо́ю и во и́мя Креста́ Госпо́дня наименова́ша. Да в не́й новоявле́нному о́бразу Твоему́, я́ко исто́чнику чуде́с и благода́ти Твоея́, благогове́йно припа́дающе Ти́ славосло́вити дерза́ют:

Ра́дуйся, светоза́рное Свети́ло, оби́тель на́шу озаря́ющее; ра́дуйся, спасе́ние душа́м на́шим устроя́ющая.

Ра́дуйся, Сы́на Твоего́ на ми́лости к на́м недосто́йным приклоня́ющая; ра́дуйся, Предста́тельнице пред Бо́гом, ми́р от бе́д спаса́ющая.

Ра́дуйся, в посте́, моли́тве и богомы́слии пребыва́ющим при́сно спребыва́ющая; ра́дуйся, изнемога́ющим в напа́стех и искуше́ниих ско́ро помога́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 3.

Си́лою Бо́жией вразумля́еми, позна́ша, я́ко Сама́ Ты́ изво́лила оби́тели и ве́рным Твои́м ико́ну Свою́ дарова́ти, я́ко исто́чник неисповеди́маго милосе́рдия и благода́ти Твоея́. Пред не́ю же Преди́вному Бо́гу с весе́лием воспева́ем: Аллилу́иа.

И́кос 3.

Иму́щим неопису́емое сокро́вище ве́ры, Твоего́, о Пресвята́я Де́во, ли́ка Пречи́стаго благослове́ние, осия́ла еси́ луча́ми ми́лости Твоея́ го́ру и оби́тель Святого́рскую, да вся́к притека́яй в о́ную, ми́лости Твоея́ сподо́бився, воспева́ет Ти́ такова́я:

Ра́дуйся, осене́нием Твоея́ ико́ны си́лу вра́жию прогоня́ющая; ра́дуйся, с ве́рою моля́щим Ти ся вели́кия ми́лости явля́ющая.

Ра́дуйся, ми́лости сокро́вище многоце́нное на́м открыва́ющая; ра́дуйся, Держа́вная Засту́пнице, неви́димо на́м спребыва́ющая.

Ра́дуйся, по Бо́зе на́ше Прибе́жище и Заступле́ние; ра́дуйся, от ну́жд и печа́ли непрело́жное Избавле́ние.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 4.

Бу́рю недоуме́ний и сумни́тельных помышле́ний в ра́дость преложи́ла еси́, Пресвята́я Де́во, егда́ ико́ну Твою́ Святого́рскую дарова́ла еси́. Ю́же а́ки Саму́ Тя́ с на́ми су́щую зря́ща, сестры́ оби́тели Крестовоздви́женския благода́рно возопи́ша Бо́гу: Аллилу́иа.

И́кос 4.

Слы́шаще лю́дие кра́я Аму́рскаго о но́вом явле́нии ми́лости Твоея́, Богома́ти, ра́довахуся, с ве́рою и упова́нием поклони́шася пред цельбоно́сною ико́ною Твое́ю, е́й же первопи́санней иногда́ рекла́ еси́: «С се́ю благода́ть Моя́ и си́ла», Тебе́, Благода́тная, гла́сом хвале́ния прино́сят такова́я:

Ра́дуйся, вселе́нныя Похвало́, во оби́тели на́шей обита́лище Себе́ на земли́ устро́ившая; ра́дуйся, бла́гости Бе́здно, оби́тель на́шу чудесы́ вся́кими просла́вившая.

Ра́дуйся, земно́е житие́ на́ше до́бре устроя́ющая; ра́дуйся, от опа́сных обстоя́ний на́с избавля́ющая.

Ра́дуйся, моли́твам изнемога́ющих в по́двиге ве́ры внима́ющая; ра́дуйся, под Тво́й Покро́в и заступле́ние Ма́тернее все́х прие́млющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 5.

Боготе́чней звезде́ уподо́бися ико́на Твоя́, Влады́чице, все́м, притека́ющим на Святу́ю го́ру Твою́, источа́я неоску́дное благодея́ние Сы́на Бо́жия, воплоще́ннаго из Тебе́, Де́во Чи́стая. За такову́ю ми́лость на́м от Бо́га явле́нную, воспева́ем Ему́: Аллилу́иа.

И́кос 5.

Ви́девше промышле́ние Бо́жие в написа́нии ико́ны Твоея́ чу́дныя, Влады́чице, испо́лнихомся вси́ ра́дости ве́лия о благоволе́нии Твое́м новоустро́енней оби́тели и́ночестей. И в не́й поста́вленному о́бразу Твоему́, я́ко у многосве́тлаго свети́льника, Тебе́ возопи́ша:

Ра́дуйся, о́браз Тво́й честны́й во освяще́ние и утеше́ние на́м дарова́вшая; ра́дуйся, ико́ною Твое́ю но́выя ми́лости Бо́жии на Аму́рстей земли́ явля́ющая.

Ра́дуйся, в ви́димом о́бразе Твое́м неви́димую благода́ть излива́ющая; ра́дуйся, зало́г спаси́тельный на́м в ико́не Твое́й да́рующая.

Ра́дуйся, Исто́чниче многово́дный, ико́ною Твое́ю струи́ благода́тныя источа́ющий; ра́дуйся, лучеза́рный Све́те, благода́тию Свое́ю все́х ве́рных освяща́ющий.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 6.

Пропове́дницы благосты́ни Твоея́ яви́шася насе́льницы оби́тели Твоея́ Святого́рския, в те́плей моли́тве ру́це свои́ к Тебе́ у святы́я ико́ны Твоея́ простира́юще, познаю́ще Твое́ Богома́тернее о ни́х заступле́ние, рожде́нному от Тебе́ Христу́ Бо́гу воспева́ют: Аллилу́иа.

И́кос 6.

Возсия́ благода́ть от Пречу́днаго о́браза Твоего́, Богоизбра́нная Де́во, я́ко Со́лнце пресве́тлое на Святе́й горе́, источи́ла еси́ лучи́ чуде́с и ми́лости Твоея́ все́м приходя́щим к о́ной и моля́щимся Ти́ во умиле́нии се́рдца, воспева́ющим такова́я:

Ра́дуйся, и́нокинь Святого́рских при́сное Ра́дование; ра́дуйся, мирски́х люде́й непосты́дное Упова́ние.

Ра́дуйся, Кла́дезю неисчерпа́емыя ра́дости; ра́дуйся, Цве́те благоуха́нный неизрече́нныя сла́дости.

Ра́дуйся, благода́ти Твоея́ и ми́лости на́с не лиша́ющая; ра́дуйся, оби́тель Твою́ покро́вом Свои́м пречу́дно огражда́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 7.

Хотя́ просла́вити ико́ну Твою́, Богома́ти, Всеми́лостивый Госпо́дь на́ш Иису́с Христо́с мно́гими чудесы́ озна́менова принесе́ние ея́, да вси́ притека́ющии к не́й от боле́зней теле́сных и душе́вных свобожда́ются, по́мощь Твою́ иму́ще, Бо́гу хвале́бную пе́снь воспева́ют: Аллилу́иа.

И́кос 7.

Ди́вное и пресла́вное промышле́ние яви́ла еси́, Пречи́стая, егда́ оби́тель Святого́рская свята́го исто́чника лиши́шася. По моли́твам к Тебе́ у ико́ны Твоея́ «Цельбоно́сныя воды́ Источи́тельница» возвраще́ние о́наго и́ноцы умоли́ша, с весе́лием воспе́ша Ти́:

Ра́дуйся, Благода́ть Свою́ святе́й воде́ исто́чника излива́ющая; ра́дуйся, ра́дости всему́ ми́ру принося́щая.

Ра́дуйся, Аму́рския земли́ Покро́в и огражде́ние; ра́дуйся, в страда́ниих на́ших при́сное Утеше́ние.

Ра́дуйся, чи́стым се́рдцем ве́ру у свята́го исто́чника укрепля́ющая; ра́дуйся, вода́ми исто́чника исцеле́ние души́ и те́ла подава́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 8.

Стра́нныя и пресла́вныя чудеса́ позна́хом о Тебе́, о Богома́ти, я́ко не то́кмо ико́ною Твое́ю благода́тныя да́ры подае́ши, но и водо́ю исто́чника Твоего́ чуде́сне происте́кшаго, ми́лость Твою́ бога́тую на́м явля́еши, подвиза́я на́с хвале́бно зва́ти Бо́гу: Аллилу́иа.

И́кос 8.

Все́м с ве́рою вся́ подае́ши, Пречи́стая, приходя́щим ко свято́му исто́чнику и ко о́бразу Твоему́ Святого́рскому, во оби́тели просла́вленному, о си́х все́х, Влады́чице, благода́рственно вопие́м Ти́:

Ра́дуйся, я́ко в пречу́дней ико́не Твое́й зало́г ми́лости ве́чныя обрета́ем; ра́дуйся, я́ко на Тя́ упова́ние возложи́вше, преплы́ти бе́здну мо́ря жите́йскаго ча́ем.

Ра́дуйся, Благода́тная Ма́ти, под благи́й Покро́в Тво́й все́х собира́ющая; ра́дуйся, без святы́я по́мощи Своея́ на́с не оставля́ющая.

Ра́дуйся, многоле́тною отра́дою и утеше́нием оби́тели Твоея́ пребыва́ющая; ра́дуйся, ми́лость Бо́жию чрез Твое́ предста́тельство на́м ниспосыла́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 9.

Вся́кое естество́ а́нгельское и челове́ческое диви́тся усмотре́нию Твоему́, Пресвята́я Де́во, отража́я враго́в ви́димых и неви́димых от оби́тели Твоея́, ико́ну Твою́ ди́вную я́ко щи́т и огражде́ние дарова́ла еси́, незри́мо по́мощию Твое́ю защища́я все́х подвиза́ющихся на горе́ Святе́й и исполня́я проше́ния призыва́ющих и́мя Твое́ свято́е, зову́щих Сы́ну Твоему́ Христу́ Бо́гу на́шему: Аллилу́иа.

И́кос 9.

Вети́йствующий язы́к не мо́жет изрещи́ безме́рныя благодея́ния Твоя́, от святы́я ико́ны и на святе́м исто́чнице явле́нныя, восхваля́юще Бо́га за таковы́я ми́лости по предста́тельству Твоему́, прино́сим Ти́ такова́я:

Ра́дуйся, на Святе́й горе́ ико́ною Твое́ю пресла́вно чудоде́йствующая; ра́дуйся, де́тскую ве́ру лжеиме́нному ра́зуму предпочита́ющая.

Ра́дуйся, в чудесе́х и виде́ниих Свои́х то́кмо чи́стым душа́м открыва́ющаяся; ра́дуйся, еди́ное на́ше Упова́ние, лю́бящих и чту́щих Тя́ в беда́х не оставля́ющая.

Ра́дуйся, Прибе́жище на́ше, в годи́ну бе́дствий на по́мощь на́м ускоря́ющая; ра́дуйся, отча́янных от ро́ва поги́бельнаго исхища́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 10.

Спасти́ся хотя́щим на́м и под кро́в Тво́й прибега́ющим, бу́ди, Пресвята́я Де́во, Помо́щница неоску́дная. Сохрани́ на́с от бе́д и напа́стей, от отча́яния и паде́ния грехо́внаго, да вси́ в ско́рбех и печа́лех исцеле́ние и утеше́ние прии́мем, у ико́ны Твоея́ Триипоста́сному Бо́гу воспева́я: Аллилу́иа.

И́кос 10.

Стена́ необори́мая и заступле́ние кре́пкое, все́м прибега́ющим с моли́твою к Тебе́ у святы́я ико́ны Твоея́ и на ме́сте исто́чника Твоего́. Те́м же у́бо и на́с недосто́йных огради́ от зла́го обстоя́ния и лю́тых боле́зней, по́мощь Твою́ да́руя зову́щим:

Ра́дуйся, в ви́димом о́бразе Твое́м неви́димо по́мощь Свою́ излива́ющая; ра́дуйся, дерзнове́нно бе́здну ми́лости Бо́жия на на́с призыва́ющая.

Ра́дуйся, Исто́чниче непрестаю́щия ра́дости; ра́дуйся, Ча́ше неисчерпа́емыя бла́гости.

Ра́дуйся, Отра́до на́ша и ди́вное о на́с Попече́ние; ра́дуйся, Правосла́вныя ве́ры и Це́ркви Утвержде́ние.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 11.

Пе́ние всеумиле́нное не довле́ет восхвали́ти по достоя́нию ми́лости Твоя́, Преблагослове́нная Де́во, у ико́ны Твоея́ и на святе́м исто́чнице от святы́я воды́ Твоея́ бы́вшая, не то́кмо христиа́ном, но и инове́рным по́мощь Твою́ и исцеле́ние дарова́ла еси́. Познава́я глубину́ милосе́рдия Твоего́, Пречи́стая, сподо́би на́с до конца́ жи́зни на́шея Еди́ному Бо́гу воспева́ти: Аллилу́иа.

И́кос 11.

Светоза́рне сия́ет во оби́тели цельбоно́сная ико́на Твоя́, Де́во Чи́стая, источа́ющи моля́щимся то́ки по́мощи и исцеле́ний благода́тных, наставля́ющи во тьме́ грехо́вней блужда́ющих. Све́тлому пути́ Христо́ву поревнова́вше, вели́чие Твое́ прославля́ют, воспева́юще Ти́ такова́я:

Ра́дуйся, исто́чник ди́вный на́м яви́ти благоволи́вшая; ра́дуйся, ве́сь на́шу чу́дно освяти́вшая.

Ра́дуйся, боля́щих немздоприи́мная Цели́тельнице; ра́дуйся, скорбя́щих Ра́досте и оби́димых Засту́пнице.

Ра́дуйся, любве́ Боже́ственныя Явле́ние; ра́дуйся, чуде́с пресла́вных Соверше́ние.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 12.

Благода́ть Бо́жию с Небесе́ испроси́ на́м, Влады́чице, к Пречи́стому о́бразу Твоему́ притека́ющим и усе́рдно Ти́ моля́щимся. Простри́ ру́це по́мощи Твоея́, Покрови́тельнице на́ша, и яви́ на́м ми́лость Твою́ многоразли́чну, да всегда́ Бо́гу пое́м: Аллилу́иа.

И́кос 12.

Пою́ще Твоя́ дре́вняя и но́вая чудеса́, Богороди́тельнице, от святы́х ико́н Твои́х и от воды́ исто́чник святы́х бы́вшая, хва́лим Тя́, наде́жную Предста́тельницу на́шу, и о чу́дней ико́не и исто́чнице цельбоно́сныя воды́ Твоея́, благосе́рдая Ма́ти, со усе́рдием воспева́ем похвалы́ сицевы́я:

Ра́дуйся, чудеса́ми Твои́ми у исто́чника умы́ к го́рнему возводя́щая; ра́дуйся, Ма́тернею любо́вию Твое́ю ве́сь ми́р христиа́нский объе́млющая.

Ра́дуйся, с небе́сных высо́т на на́с призира́ющая; ра́дуйся, росо́ю Твоея́ бла́гости все́х на́с освяща́ющая.

Ра́дуйся, прегреше́ния на́ша Богома́терней ми́лостию покрыва́ющая; ра́дуйся, исто́чником Прему́дрости Христо́вой все́х на́с напоя́ющая.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 13.

О Всепе́тая Ма́ти, Пресвята́я Богоро́дице, вели́кия ра́ди ми́лости Твоея́ наре́кшаяся во святе́й ико́не Твое́й «Цельбоно́сныя воды́ Источи́тельница», приими́ ми́лостивно сие́ ма́лое моле́ние на́ше, в похвалу́ Тебе́ приноси́мое. И я́ко неоскудева́ющий исто́чник благода́ти, уврачу́й не́мощи ду́ш и теле́с на́ших и умоли́ Сы́на Твоего́ Христа́ Бо́га на́шего о все́х, с ве́рою и любо́вию к Пречи́стому о́бразу Твоему́ притека́ющих, Бо́гу же вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгел Гаврии́л, возвеща́я та́йну воплоще́ния Сы́на Бо́жия, прорече́ Ти́, Чи́стая: «Ра́дуйся, благода́тная Мари́е, Госпо́дь с Тобо́ю, Благослове́нна Ты́ в жена́х и благослове́н Пло́д чре́ва Твоего́». Мы́ же, благове́стнику Бо́га Вы́шняго подража́я, благогове́йно зове́м Ти́:

Ра́дуйся, Ты́ бо Отца́ Безнача́льнаго Благослове́ние; ра́дуйся, Ты́ бо Ду́ха Свята́го Жили́ще.

Ра́дуйся, Отроча́ мла́до, О́тчее Сия́ние на́м роди́вшая; ра́дуйся, Ма́ти Пречи́стая, пре́жде рождества́ и по рождестве́ Де́ва пребы́вшая.

Ра́дуйся, Оде́ющагося Све́том, я́ко ри́зою, пелена́ми пови́вшая; ра́дуйся, я́ко Тобо́ю вся́ вселе́нная весе́лия исполня́ется.

Ра́дуйся, Богоро́дице Де́во, цельбоно́сною водо́ю на́с освяща́ющая.

Конда́к 1.

Избра́нной от все́х родо́в Пресвяте́й Де́ве Богоро́дице благогове́йное пе́ние прино́сим Ти́, раби́ Твои́, Всеблага́я Ма́ти. Ты́ же, я́ко иму́щи милосе́рдие неизрече́нное, оби́тели Святого́рстей ико́ну Свою́ и цельбоно́сный исто́чник дарова́ла еси́, излива́я на́м вели́кия и бога́тыя ми́лости Своя́. Да уте́шеннии Тобо́ю, зове́м Ти́ си́це:

Ра́дуйся, Богоро́дице Де́во, цельбоно́сною водо́ю на́с освяща́ющая.

Моли́тва Пресвяте́й Богоро́дице пред Святого́рским о́бразом Ея́ «Цельбоно́сныя воды́ Источи́тельница».

К Тебе́ обраща́ем взо́ры свои́, о Блага́я Влады́чице, Го́спода Иису́са Христа́ Пресвята́я Ма́ти. Воззри́ ми́лостивым о́ком на на́с, предстоя́щих пред свято́ю ико́ною Твое́ю, имену́емою «Цельбоно́сныя воды́ Источи́тельница». Изле́й на на́с ми́лости Твоя́, о Богома́ти! Смире́нно мо́лим Тя́: на пу́ть пра́вый наста́ви на́с, Све́том Христо́вой И́стины на́с просвети́, сердца́ на́ша умягчи́, ве́ру укрепи́, наде́жду утверди́, да́ра любви́ к Бо́гу и бли́жним сподо́би. Ты́ бо еси́ гре́шников Спору́чница и По́мощь, ненаде́ющихся Наде́яние и Ра́дость, оби́димым Покрови́тельница, су́щим в беда́х и напа́стех Вспоможе́ние и Заступле́ние. Озари́ немерца́ющим Све́том благода́ти Твоея́, Госпоже́, сесте́р оби́тели Святого́рския и все́х притека́ющих ко о́бразу Твоему́, в не́й просла́вленному. Свое́ю любо́вию, любоблагоутро́бная Ма́ти, согре́й хла́дная сердца́ на́ша и умоли́ Свои́м те́плым предста́тельством ро́ждшагося от Тебе́ Го́спода Бо́га и Спа́са на́шего Иису́са Христа́, да прости́т на́м вся́ согреше́ния на́ша и укрепи́т на́с си́лою Свое́ю Свы́ше к исполне́нию Боже́ственных за́поведей Свои́х. Да та́ко по Бо́зе, име́я в Тебе́ Еди́ней тве́рдую наде́жду и упова́ние спасе́ния на́шего, просла́вим всесвято́е и великоле́пое и́мя Отца́, и Сы́на, и Свята́го Ду́ха, всегда́, ны́не и в безконе́чныя ве́ки. Ами́нь.