Акафистник

Помочь сайту
·
·
·
·

Акафист Пресвятой Богородице пред иконой «Акафистная»

Память: 25 (12) января

Не утвержден для общецерковного использования.

Конда́к 1.

Избра́нней Предве́чным Царе́м во спасе́ние ро́ду христиа́нскому Небесе́ и земли́ Цари́це, я́ко на́шей несумне́нней Предста́тельнице и всемо́щней Засту́пнице, с любо́вию и умиле́нием сие́ ака́фистное пе́ние прино́сим:

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

И́кос 1.

А́нгелу небе́сному житие́м свои́м уподо́бившемуся, не́коему ста́рцу, в затво́ре на святе́й горе́ Афо́нстей житие́ свое́ проводя́щему и пред ико́ною Бо́жией Ма́тери каждодне́вно ака́фистное пе́ние со слова́ми «Ра́дуйся» вознося́щему, бы́сть иногда́ гла́с, от ико́ны тоя́ исходя́щий: «Ра́дуйся и ты́, ста́рче Бо́жий!». Сему́ ди́вному гла́су внима́я, и мы́ со благочести́вым ста́рцем Влады́чице Небе́сней воспева́ем:

Ра́дуйся, от сотворе́ния ми́ра Бо́гом в Неве́сты Себе́ предназна́ченная; ра́дуйся, в хра́ме свято́м Его́ в чистоте́ неземно́й воспита́нная.

Ра́дуйся, Спаси́тельницею ми́ра еще́ от проро́ков предсказа́нная; ра́дуйся, Ма́терию Бо́жиею ста́ти удосто́ившаяся.

Ра́дуйся, рождество́м Пресла́внаго Сы́на Своего́ на́м ра́дость избавле́ния от ве́чной сме́рти прине́сшая; ра́дуйся, бы́ть Ма́терию всему́ ро́ду христиа́нскому Сы́ном Свои́м предугото́ванная.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 2.

Ви́дя Пресвята́я Богоро́дица, я́ко у́жасом ве́лиим ста́рец объя́т бы́сть, кро́тким гла́сом глаго́ла ему́: Не убо́йся, оба́че во оби́тель свою́ поте́кши, объяви́ бра́тии и игу́мену о вразе́х, и́же бли́зко су́ть. А́ще кто́ сла́б бе́ в ду́се терпе́ния, да скрыва́ется, до́ндеже про́йдет искуше́ние, оба́че и́щущия страда́льческих венце́в да остаю́тся и, прии́м от Го́спода награ́ду, воспою́т Ему́ на не́бе: Аллилу́иа.

И́кос 2.

Ра́зумом свои́м не возмо́же пости́гнути ста́рец, я́ко ико́на Пресвяты́я Богоро́дицы, пред не́ю же о́н ака́фист в ке́ллии чита́ше, неве́домою си́лою к врата́м оби́тели перенесе́на бы́сть. Па́дше пред о́бразом с благогове́йною моли́твою, ста́рец та́же с пречи́стым о́бразом на рука́х ко игу́мену яви́ся, воспева́я Де́ве Чи́стей:

Ра́дуйся, от наше́ствия вра́жия ча́да Своя́ защища́ющая; ра́дуйся, ми́лость Свою́ и́м неуста́нно подаю́щая.

Ра́дуйся, от поги́бели ве́чной ду́ши на́ша отводя́щая; ра́дуйся, беды́ вели́кия руко́ю кре́пкою предотвраща́ющая.

Ра́дуйся, о спасе́нии на́шем постоя́нно пеку́щаяся; ра́дуйся, к го́рнему ца́рствию ду́ши пра́ведныя возводя́щая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 3.

Си́лою свы́ше укрепле́нныя и к Твоему́ всеми́лостивому заступле́нию с ве́рою прите́кшии, непреобори́мая Защи́тнице на́ша, два́дцать ше́сть си́льных ду́хом и́ноков, в числе́ ко́их бе́ и са́м настоя́тель, пребыва́ху в оби́тели. Ста́рец, ему́ же небе́сное открове́ние бы́сть, та́кожде пребыва́ше ку́пно с ни́ми, бе́ бо для о́ных уте́шителем в предстоя́щем искуше́нии, неуста́нно вопию́щим к Бо́гу: Аллилу́иа.

И́кос 3.

Иму́щи наме́рение обрати́ти в католи́чество правосла́вныя христиа́ны, врази́ во оби́тель приидо́ша и к ба́шне, в не́й же му́жественныя и́ноцы пребыва́ху, приступи́вши, ле́стными увеща́ниями склони́ти и́х ко отрече́нию от правосла́вия потща́хуся. Увещава́я и́х призна́ти па́пу главо́ю вселе́нския це́ркви, лати́няне за сие́ побо́рником правосла́вия вся́кия ми́лости обеща́ху. Оба́че ве́рнии сыны́ своея́ правосла́вныя це́ркви непрекло́нными остава́хуся и пред ико́ною Ма́тери Бо́жией та́ко моля́хуся:

Ра́дуйся, от лати́нян на́ша несумне́нная Защи́то; ра́дуйся, в ве́ре правосла́вной на́ше необори́мое Укрепле́ние.

Ра́дуйся, от ересе́й и лжеуче́ний на́ше кре́пкое Огражде́ние; ра́дуйся, в тя́жких беда́х на́ше сла́достное Утеше́ние.

Ра́дуйся, в Ца́рствие Бо́жие на́ша му́драя Руководи́тельнице; ра́дуйся, пред Го́сподом на́ша ми́лостивая Засту́пнице.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 4.

Бу́рею не́нависти к ве́ре правосла́вной одержи́мии, правосла́вия врази́ ба́шню хвра́стием и дре́вом обложи́ша и, не ме́для, запали́ша ю́. В пла́менней моли́тве Го́споду благодаре́ние возда́вше, я́коже сподо́би я́ прия́ти му́ченичестии све́тлыя венцы́, и́ноцы поя́ху Бо́гу: Аллилу́иа.

И́кос 4.

Слы́шавше ми́лость Твою́, Богоро́дице, чрез чудотво́рную ико́ну Твою́ явле́нную, е́ю же Ты́ предвари́ла еси́ ста́рца о бе́дствии, ве́рнии зело́ обра́довани бы́ша, я́ко ико́на Твоя́ та́же бы́сть обре́тена невреди́мою под разва́линами оби́тели. Мы́ же, такове́й ве́лией ми́лости Твоея́ дивя́шеся, вопие́м Ти́:

Ра́дуйся, я́ко па́ки на ра́дость лю́дем в ико́не Свое́й яви́лася еси́; ра́дуйся, я́ко то́ю ико́ною чудеса́ ве́лии источи́ла еси́.

Ра́дуйся, Тобо́ю бо мы́ в доброде́телех укрепля́емся; ра́дуйся, Твои́м бо заступле́нием мы́ пред неве́рными похваля́емся.

Ра́дуйся, Тебя́ бо мы́ пред все́м ми́ром велича́ем; ра́дуйся, на Тебе́ бо мы́ всеце́ло упова́ем.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 5.

Боготе́чней звезде́ подо́бна яви́ся ико́на Твоя́, Присноде́во Мари́е, во утеше́ние и укрепле́ние бра́тии Зогра́фския оби́тели, пред не́ю же лампа́да те́плится неугаси́мо. И́ноцы за Литурги́ею ака́фистное пе́ние пред не́ю возглаша́ют, по сему́ она́ наименова́на «Ака́фистная» бы́сть. И позна́вши си́лу, в не́й явле́нную Тобо́ю, пе́снь благодаре́ния возно́сят Бо́гу: Аллилу́иа.

И́кос 5.

Прояви́в ве́лию любо́вь к лю́дем, Ты́, я́ко не́жная и забо́тливая Ма́ти, яви́ла еси́ еще́ одну́ Свою́ ико́ну имену́емую «Хиланда́рская», я́же бы́сть в Афо́нстей Хиланда́рстей оби́тели, иде́же пребыва́ют Твои́ ико́ны «Млекопита́тельница» и «По́пская». За таково́е Твое́ попече́ние о лю́дех Свои́х, восхваля́ем Тя́:

Ра́дуйся, Путеводи́тельнице подви́жников благочести́вых к Го́рнему Ца́рствию; ра́дуйся, и́ноков пустыннолюби́вых приводя́щая к Небе́сному Иерусали́му.

Ра́дуйся, го́ру Афо́нскую благоуха́нием испо́лнившая; ра́дуйся, на оби́тели Хиланда́рстей Твое́ благоволе́нием яви́вшая.

Ра́дуйся, душе́вныя и теле́сныя боле́зни ико́ною Твое́ю ско́ро врачу́ющая; ра́дуйся, в зало́г ми́лости Твоея́ ико́ну Твою́ дарова́вшая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 6.

Пропове́дует Це́рковь Христо́ва чудеса́ Твоя́, Богоро́дице, наипа́че бо чрез ико́ны Твоя́ излива́еши струи́ ми́лостей и щедро́т все́м бе́дствующим и тре́бующим по́мощи Твоея́. Сего́ ра́ди, славосло́вяще Тя́, Сы́ну Твоему́ и Бо́гу на́шему вопие́м: Аллилу́иа.

И́кос 6.

Возсия́ на́м ико́на Твоя́, Присноде́во, чу́дом но́вым от нея́ исте́кшим, егда́ возгоре́ся по нераде́нию екклисиа́рха иконоста́с, и́же бы́сть в собо́рнем хра́ме и в не́м же бя́ше чудотво́рная ико́на Твоя́. И а́ще иконоста́с едва́ не испепели́ся ве́сь, оба́че святы́й о́браз Тво́й, Богома́ти, не пострада́ от огня́, пребыва́я невреди́мым к утеше́нию ве́рующих, пою́щих Ти́:

Ра́дуйся, ико́ну Твою́ честну́ю несгара́ему в огни́ соде́лавшая; ра́дуйся, си́лою Боже́ственною си́лу о́гненную погуби́вшая.

Ра́дуйся, ико́ны Твоя́ чудотво́рныя, я́ко зве́зды в земле́ Афо́нстей умно́жившая; ра́дуйся, ве́сь ми́р ико́нами Свои́ми освяти́вшая.

Ра́дуйся, ми́ра излия́нием от ико́н Твои́х милосе́рдие Твое́ к на́м показу́ющая; ра́дуйся, благода́тию и сла́вою чуде́с преди́вно сия́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 7.

Хотя́ Человеколю́бец Христо́с яви́ти любо́вь Свою́ к лю́дем, Честно́ю Его́ Кро́вию искупле́нным, дарова́ Тебе́, Ма́терь Свою́, ро́ду христиа́нскому в покро́в и защище́ние. Не лиши́ и на́с Твоего́ те́плаго заступле́ния, сла́вящих пречестно́е и́мя Твое́ и поклоня́ющихся чудотво́рному о́бразу Твоему́, Сы́ну Твоему́ зову́щих: Аллилу́иа.

И́кос 7.

Но́вое и преди́вное чу́до яви́ Ака́фистная ико́на Твоя́, Пресвята́я Богоро́дице, бы́сть бо от нея́ открове́ние свято́му Са́вве Се́рбскому о сокро́вище, и́же бе́ бли́з святы́я оби́тели его́. Сие́ сокро́вище наше́дши, оби́тель ста́рец благоустроя́ше, сла́вя чу́дную Помо́щницу свою́:

Ра́дуйся, в ну́ждах на́ших ско́ро помога́ющая; ра́дуйся, на благоустрое́ние оби́телей сре́дства ще́дро посыла́ющая.

Ра́дуйся, оби́тели святы́я попече́нием Твои́м не оставля́ющая; ра́дуйся, недостаю́щее в ни́х при́сно восполня́ющая.

Ра́дуйся, на моли́тву ве́рных па́ки призыва́ющая; ра́дуйся, подвиза́тися в благоче́стии и́м неуста́нно помога́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 8.

Стра́нное чу́до зри́м о Тебе́, Богома́ти, Ты́ бо от чудотво́рныя ико́ны Твоея́ ско́рую по́мощь ве́рным подае́ши. За сие́ и́ноцы Хиланда́рския оби́тели, велича́я ико́ну Твою́ Ака́фистную еще́ и Скоропослу́шницею, Го́споду благодаре́ние возно́сят: Аллилу́иа.

И́кос 8.

Ве́сь ми́р любо́вию Твое́ю объе́млеши, Присноде́во, в ико́не Твое́й приснопоклоня́емей всю́ поднебе́сную обтека́ющи. Ты́ бо, я́коже и Сы́н Тво́й, не хо́щеши сме́рти гре́шника, но е́же обрати́тися и жи́ву ему́ бы́ти. За таково́е милосе́рдие Твое́ взыва́ем Тебе́ си́це:

Ра́дуйся, вре́менно наказу́ющая и ве́чно ми́лующая; ра́дуйся, и́стинному покая́нию на́с науча́ющая.

Ра́дуйся, в земно́м уде́ле на́с не оставля́ющая; ра́дуйся, в оби́телех небе́сных на́с ра́достно встреча́ющая.

Ра́дуйся, спаси́тельною и́стиною на́с вразумля́ющая; ра́дуйся, от поги́бельнаго пути́ на́с сохраня́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 9.

Вся́ких ми́лостей и щедро́т Пода́тельницу, немо́лчно Тя́ хва́лят сердца́ на́ша, Пресвята́я Богоро́дице. Ты́ же бу́ди на́м Хода́таицею к Сы́ну Твоему́ в де́нь Стра́шнаго Суда́, воспомяну́в тогда́ гре́шных моле́ния и сподо́бив пе́ти Бо́гу: Аллилу́иа.

И́кос 9.

Вети́и многовеща́ннии не возмо́гут досто́йно воспе́ти Тво́й сла́достный ли́к, ниже́ изъясни́ти си́лу чуде́с Твои́х на вся́кую по́льзу челове́ком явля́емую, мы́ же похва́льная воспева́ем Тебе́ си́це:

Ра́дуйся, Бо́жией во́ли на́м та́йны открыва́ющая; ра́дуйся, Его́ пра́ведный гне́в ми́лостивно умягча́ющая.

Ра́дуйся, луча́ми чуде́с Свои́х на́с просвеща́ющая; ра́дуйся, вдо́в и сиро́т покро́вом Свои́м покрыва́ющая.

Ра́дуйся, пресве́тлая Боже́ственная красото́; ра́дуйся, богому́дрых прему́драя добро́то.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 10.

Спасе́ния и́щуще, к Твоему́ ми́лостивому заступле́нию прибега́ем, Милосе́рдная Ма́ти, и чудотво́рныя ико́ны Твоя́ со благогове́нием и ве́рою честву́ем. Те́мже, воспомина́я неисче́тная чудотворе́ния Твоя́, вопие́м Всемогу́щему Бо́гу: Аллилу́иа.

И́кос 10

Стено́ необори́мая все́м лю́дем Ты́ еси́, Пресвята́я Де́во. Ты́ бо сле́зы на́ша отира́еши, ми́р смуще́нным душа́м на́шим подава́я. Ты́ бо не оставля́еши на́с в годи́ны лихи́х испыта́ний, си́лы душе́вныя и теле́сныя благода́тию Свое́ю на́м подкрепля́я. Сего́ ра́ди услы́ши на́с, зову́щих Ти́:

Ра́дуйся, на земли́ на́с не оставля́ющая; ра́дуйся, ру́ку по́мощи все́м призыва́ющим Тя́ простира́ющая.

Ра́дуйся, Тебе́ Ма́терию Бо́жиею имену́ющим непреста́нно помога́ющая; ра́дуйся, в беда́х на на́с находя́щих ны́ укрепля́ющая.

Ра́дуйся, я́ко вся́ возмо́жна Тебе́ на́м показу́ющая; ра́дуйся, пу́ть ко спасе́нию на́м указу́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 11.

Пе́ние всеумиле́нное пред ико́нами Твои́ми прино́сим Ти́ раби́ Твои́, Богоро́дице. Не пре́зри на́с, Госпоже́ Всеми́лостивая, но благопослушли́ва бу́ди к на́м, с ве́рою и благогове́нием Твоему́ Боже́ственному о́бразу покланя́ющимся и Сы́на Твоего́ восхваля́ющим богокра́сною пе́снию: Аллилу́иа.

И́кос 11.

Све́тлыми луча́ми чуде́с Твои́х, Богоро́дице Де́во, ду́ши на́ша све́тло просвеща́еши, от тьмы́ поги́бельныя и́х исхища́я. Мы́ же с любо́вию чту́ще Тя́, я́ко Ма́терь Сы́на Бо́жия и ро́да христиа́нскаго, вопие́м Ти́:

Ра́дуйся, я́ко Госпо́дь с Тобо́ю и Тобо́ю с на́ми; ра́дуйся, я́ко покро́в Тво́й Святы́й простира́еши над на́ми.

Ра́дуйся, я́ко Неопали́мая Купина́ нетле́нною пребыва́еши; ра́дуйся, я́ко Живоно́сный Исто́чник жа́жду ве́чныя пра́вды в лю́дех утоля́еши.

Ра́дуйся, я́ко Цве́т Неувяда́емый ду́ши на́ша благоуха́нием исполня́ющая; ра́дуйся, я́ко Стена́ Неруши́мая от бу́рь жите́йских на́с защища́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 12.

Благода́ть Боже́ственную я́вно в чудотво́рных ико́нах Твои́х пребыва́ющую не отыми́ от на́с, Пресвята́я Де́во, за грехи́ и беззако́ния на́ша. Не оста́ви на́с Свои́м чу́дным заступле́нием и на Стра́шнем Суде́ Сы́на Твоего́ проще́ние у Го́спода на́м исхода́тайствуй, да во сла́ве неизрече́нней у́зрим Христа́ Бо́га на́шего и воспое́м Ему́: Аллилу́иа.

И́кос 12.

Пою́ще пе́сни хвалы́ и благодаре́ния Тебе́, Де́во Всепе́тая, восхваля́ем Тя́ вси́, я́ко тве́рдую Предста́тельницу за на́с, гре́шных, и покланя́емся Тебе́ с любо́вию, о на́с моля́щейся пред Го́сподем, ве́руем бо и упова́ем, я́ко испро́сиши на́м у Него́ спасе́ние и жи́знь ве́чную, вопию́щим Ти́ си́це:

Ра́дуйся, Бо́га и челове́ка соедини́вшая; ра́дуйся, спасе́ние челове́ческое устро́ившая.

Ра́дуйся, цвета́ми доброде́телей ве́рных украша́ющая; ра́дуйся, ри́зою Свое́ю с матери́нскою любо́вию и́х покрыва́ющая.

Ра́дуйся, от дома́шния бра́ни и вражды́ единокро́вныя ми́ром огражда́ющая; ра́дуйся, во благи́х наме́рениях на́м при́сно помога́ющая.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 13.

О Всепе́тая Ма́ти, Небе́сная Цари́це и Влады́чице, Де́во Богоро́дице, ми́лостивно приня́в сие́ ака́фистное пе́ние, изба́ви на́с от вся́кия напа́сти, боле́зни и внеза́пныя сме́рти, и я́ко ста́рцу Бо́жию не́когда «Ра́дуйся!» возгласи́ла еси́, та́ко и на́м возгласи́: «Ра́дуйтеся и вы́, ча́да Бо́жии!», вопию́щим Сы́ну Твоему́ и Бо́гу на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелу небе́сному житие́м свои́м уподо́бившемуся, не́коему ста́рцу, в затво́ре на святе́й горе́ Афо́нстей житие́ свое́ проводя́щему и пред ико́ною Бо́жией Ма́тери каждодне́вно ака́фистное пе́ние со слова́ми «Ра́дуйся» вознося́щему, бы́сть иногда́ гла́с, от ико́ны тоя́ исходя́щий: «Ра́дуйся и ты́, ста́рче Бо́жий!». Сему́ ди́вному гла́су внима́я, и мы́ со благочести́вым ста́рцем Влады́чице Небе́сней воспева́ем:

Ра́дуйся, от сотворе́ния ми́ра Бо́гом в Неве́сты Себе́ предназна́ченная; ра́дуйся, в хра́ме свято́м Его́ в чистоте́ неземно́й воспита́нная.

Ра́дуйся, Спаси́тельницею ми́ра еще́ от проро́ков предсказа́нная; ра́дуйся, Ма́терию Бо́жиею ста́ти удосто́ившаяся.

Ра́дуйся, рождество́м Пресла́внаго Сы́на Своего́ на́м ра́дость избавле́ния от ве́чной сме́рти прине́сшая; ра́дуйся, бы́ть Ма́терию всему́ ро́ду христиа́нскому Сы́ном Свои́м предугото́ванная.

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Конда́к 1.

Избра́нней Предве́чным Царе́м во спасе́ние ро́ду христиа́нскому Небесе́ и земли́ Цари́це, я́ко на́шей несумне́нней Предста́тельнице и всемо́щней Засту́пнице, с любо́вию и умиле́нием сие́ ака́фистное пе́ние прино́сим:

Ра́дуйся, Пресвята́я Богоро́дице, ра́дость духо́вную на́м без конца́ подаю́щая.

Моли́тва.

О Пречу́дная и Превы́сшая все́х тва́рей Цари́це и Богоро́дице, Небе́снаго Царя́ Христа́ Бо́га на́шего Ма́ти, припа́даем и покланя́емся Тебе́ пред свято́ю и пречестно́ю ико́ною Твое́ю, е́юже ди́вныя и пресла́вныя чудеса́ содева́еши! Смире́нно мо́лим Тя́, всеси́льная ро́да на́шего Засту́пнице, услы́ши на́с и удиви́ на на́с пребога́тыя ми́лости Твоя́, и проше́ния на́ша, приноси́мая Тебе́, я́ко блага́я Скоропослу́шница, испо́лни. Благода́тию Твое́ю ду́ши на́ша освяти́ и не отыма́й от на́с покро́ва Своего́, под ни́м же при́сно пребыва́я, я́ко Стено́ю Неруши́мою защище́ни пребу́дем от все́х бе́д и напа́стей, от вся́каго врага́ и супоста́та, от все́х злы́х ко́зней вра́жиих на на́с при́сно находя́щих. Благоуха́нием непоро́чней души́ Своея́ напо́лни ду́ши на́ша, да возвеселя́тся сердца́ на́ша, и́бо не́сть никто́ в ми́ре се́м миле́е и прекра́снее Тебе́, Де́во Пресвята́я! Ты́ еси́ на́ше Бога́тство, Ты́ еси́ на́ше Сокро́вище, Ты́ еси́ на́ше Упова́ние и на́ша Защи́то! К Тебе́ Еди́ней в печа́лех на́ших притека́ем и у Тебе́ Еди́ней утеше́ние получи́ти ча́ем. О Всепе́тая Де́во Богоро́дице, не преста́й моли́тися о на́с, недосто́йных рабе́х Твои́х, сла́вящих Тя́ и почита́ющих, и наде́жду на Тебе́ иму́щих, ны́не и при́сно, и во ве́ки веко́в. Ами́нь.

Yandex Metrika