Конда́к 1.

Избра́нней от все́х родо́в Пресвяте́й Де́ве Богоро́дице, Спаси́теля и Бо́га на́шего Иису́са Христа́ пло́тию ро́ждшей, я́ко Влады́чице Небесе́ и земли́, похва́льное прино́сим пе́ние. Ты́ же, любвеоби́льная на́ша Ма́ти, сохраня́й и спаса́й на́с от все́х враго́в ви́димых и неви́димых, да со умиле́нием зове́м Ти́:

Ра́дуйся, Блага́я Домострои́тельнице, житие́ на́ше до́бре устроя́ющая.

И́кос 1.

А́нгелов ли́цы и вся́ Небе́сныя Си́лы Тебе́, Цари́це Небе́сная, благогове́йно слу́жат и немо́лчными гла́сы Тя́ ублажа́ют; мы́ же, земноро́днии, Тя́ я́ко Всеми́лостивую Влады́чицу и Всеблагу́ю Ма́терь на́шу почита́ем и с любо́вию вопие́м:

Ра́дуйся, от все́х родо́в Бо́гом избра́нная; ра́дуйся, де́вственною чистото́ю, я́ко диади́мою, увенча́нная.

Ра́дуйся, благоволе́нием Отца́ Небе́снаго осене́нная; ра́дуйся, Ду́ха Свята́го оби́тель свяще́нная.

Ра́дуйся, Христа́ Бо́га на́шего Ма́ти Неискусобра́чная; ра́дуйся, ко́рене Дави́дова о́трасле многопло́дная.

Ра́дуйся, ско́рая челове́ком Помо́щнице; ра́дуйся, и́щущих Ца́рствия Бо́жия Путеводи́тельнице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 2.

Ви́дяще Тя́ на ико́не Твое́й, с Богомладе́нцем Христо́м на престо́ле возседа́ющую, и предстоя́щих преподо́бных Афана́сия Афо́нскаго и Михаи́ла Сина́дскаго с благогове́нием Сы́ну Твоему́ Боже́ственному и Тебе́, Пречи́стей Его́ Ма́тери, покланя́ющихся, велича́ем Тя́, я́ко Благу́ю Попечи́тельницу и Покрови́тельницу и́ноков Святы́я Горы́ Афо́нския, под Твои́м пречестны́м омофо́ром пребыва́ющих и непреста́нно Спаси́телю Бо́гу о Тебе́ пою́щих: Аллилу́иа.

И́кос 2.

Ра́зум челове́ческий пости́гнути не мо́жет вели́каго Твоего́ милосе́рдия к лю́дем, и́хже Сы́н Тво́й и Бо́г на Кресте́ Кро́вию Свое́ю честно́ю от грехо́в искупи́, ниже́ язы́к си́лу и́мать исчи́слити мно́жество благодея́ний и чудотворе́ний, Тобо́ю на́м низпосыла́емых, но все́ю душе́ю покланя́ющеся святе́й Твое́й ико́не, Пресвята́я Де́во, и со умиле́нием ю́ лобыза́юще, из глубины́ се́рдца взыва́ем Ти́:

Ра́дуйся, любве́ всесве́тлое жили́ще; ра́дуйся, ми́лостей Госпо́дних сокро́вище.

Ра́дуйся, цве́те Боже́ственнаго прозябе́ния; ра́дуйся, ра́досте всеми́рнаго заступле́ния.

Ра́дуйся, А́нгелов и святы́х ликова́ние; ра́дуйся, и́ноков и и́нокинь украше́ние.

Ра́дуйся, с ве́рою Тебе́ моля́щихся ско́рое услы́шание; ра́дуйся, ду́ш и серде́ц на́ших наде́жное успокое́ние.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 3.

Си́лу Боже́ственныя благода́ти ми́лостивно да́руеши, Преблагослове́нная Ма́ти, все́м во святе́м уде́ле Твое́м, Горе́ Афо́нской, подвиза́ющимся и и́ноческим житие́м Сы́ну Твоему́ и Спаси́телю на́шему Иису́су Христу́ благоугожда́ющим, я́же и вопию́т Ему́ непреста́нно: Аллилу́иа.

И́кос 3.

И́мут Тя́ вои́стину Благу́ю Домострои́тельницу и́ноков чи́ни, во святе́й Ла́вре преподо́бнаго Афана́сия подвиза́ющиися, и́мже Ты́ в зало́г благоволе́ния Своего́ ми́лостиво дарова́ла еси́ чудотво́рную ико́ну Твою́ «Экономи́сса» имену́емую; сего́ ра́ди вопие́м Ти́:

Ра́дуйся, Святы́я Горы́ Афо́нския неусы́пная храни́тельнице; ра́дуйся, и́ноков афо́нских блага́я попечи́тельнице.

Ра́дуйся, Христо́вых подви́жников Небе́сная сла́во; ра́дуйся, пустынножи́телей Боже́ственная отра́до.

Ра́дуйся, духо́внаго са́да в жре́бии Твое́м насади́тельнице; ра́дуйся, благочести́во живу́щих в ра́йския оби́тели води́тельнице.

Ра́дуйся, мона́шествующих верхо́вная Игу́мение; ра́дуйся, святы́х оби́телей окормле́ние и ра́дование.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 4.

Бу́рю недоуме́ний в себе́ превозмога́я, преподо́бный Афана́сий, оста́вивый оби́тель свою́, сре́те Тя́ на пути́, Пресвята́я Де́во, и услы́ша от Тебе́ словеса́ сия́: «А́з помогу́ ти́, оба́че не оставля́й Ла́вры своея́, просла́витися бо и́мать среди́ оби́телей афо́нских, в не́йже и́ноцы вы́ну воспева́ти бу́дут А́нгельскую пе́снь Бо́гу: Аллилу́иа».

И́кос 4.

Слы́шав от Тебе́, Преблага́я Влады́чице, я́ко Ты́ еси́ Ма́терь Го́спода Иису́са Христа́, зело́ удиви́ся преблаже́нный ста́рец и, зна́мения от Тебе́ испроси́в во увере́ние и́стинности обетова́ния Твоего́, со умиле́нием серде́чным возопи́ Тебе́ си́це:

Ра́дуйся, в жена́х преблагослове́нная; ра́дуйся, Госпо́дня и на́ша Ма́ти всесла́вная.

Ра́дуйся, Боже́ственная ра́досте А́нгелов и челове́ков; ра́дуйся, прибе́жище ка́ющихся гре́шников.

Ра́дуйся, сла́вити Бо́га на́с науча́ющая; ра́дуйся, ле́ствице, от земли́ на Не́бо приводя́щая.

Ра́дуйся, и́ноков усе́рдная Храни́тельнице; ра́дуйся, ми́лостивая на́ша Хода́таице и Засту́пнице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 5.

Боготе́чная звезда́ явля́ешися, Цари́це Небе́сная, все́м и́щущим спасе́ния и под кро́в Тво́й всемо́щный прибега́ющим, к Со́лнцу Пра́вды си́х приво́диши, да во умиле́нии серде́чнем вопию́т Бо́гу: Аллилу́иа.

И́кос 5.

Ви́де преподо́бный Афана́сий, я́ко по глаго́лу Ма́тери Бо́жия от ударе́ния по́соха его́ вода́ из ка́мене истече́, со благогове́нием к нога́м Ея́ пречи́стым припа́сти восхоте́, оба́че Де́ва Пресвята́я в то́йже ча́с неви́дима бы́сть. Мы́ же вели́каго ра́ди чудесе́ сего́ благогове́ния исполня́ющеся, воспева́ем Преблагослове́нней та́ко:

Ра́дуйся, ду́ш на́ших ве́рное спасе́ние; ра́дуйся, все́х скорбя́щих утеше́ние.

Ра́дуйся, Святы́я Горы́ Афо́нския просвети́тельнице; ра́дуйся, всея́ вселе́нныя попечи́тельнице.

Ра́дуйся, наде́жное прибе́жище все́м ка́ющимся; ра́дуйся, ти́хое приста́нище от бе́д стра́ждущим.

Ра́дуйся, все́х притека́ющих к ико́не Твое́й покро́вом Твои́м осеня́ющая; ра́дуйся, гла́су моле́ния все́х скорбя́щих внима́ющая.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 6.

Пропове́дник чуде́с Твои́х, Преблага́я Влады́чице, яви́ся преподо́бный Афана́сий, егда́ по возвраще́нии во святу́ю оби́тель свою́ со изумле́нием ве́лиим обре́те кладовы́я все́м потре́бным преиспо́лненныя. Сего́ ра́ди прославля́юще попече́ние Твое́ о все́х, на Тя́ упова́ющих, Ма́ти Бо́жия, со умиле́нием вопие́м Бо́гу: Аллилу́иа.

И́кос 6.

Возсия́ неизрече́нный све́т Твоея́ бла́гости, Преблагослове́нная Де́во, все́м скорбя́щим, пла́чущим и во искуше́нии су́щим: слы́шащи бо на́ша сле́зныя моли́твы, подае́ши все́м чуде́сное от бе́д избавле́ние, восхваля́ющим Тя́ за ми́лости Твоя́ та́ко:

Ра́дуйся, Спаси́теля ми́ра ро́ждшая; ра́дуйся, ми́р от пото́па грехо́внаго спаса́ющая.

Ра́дуйся, зна́мение ми́лости Бо́жия Собо́ю на́м явля́ющая; ра́дуйся, явле́нием чуде́с от святы́я ико́ны Твоея́ все́х све́тло веселя́щая.

Ра́дуйся, ско́рби и сле́зы на́ша в ра́дость претворя́ющая; ра́дуйся, стра́ждущих и безпомо́щных неви́димо укрепля́ющая.

Ра́дуйся, все́х пра́ведных лю́бящая; ра́дуйся, ка́ющихся гре́шников ми́лующая.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 7.

Хотя́ Всеми́лостивый Госпо́дь яви́ти Свою́ Боже́ственную любо́вь к созда́нию Своему́, дарова́ на́м Твою́, Богома́ти, ико́ну, «Экономи́сса» имену́емую, да ви́дяще чудеса́, от нея́ быва́емая, вси́ лю́дие с ве́рою и наде́ждою умиле́нно взыва́ют Пода́телю бла́г: Аллилу́иа.

И́кос 7.

Но́вое свиде́тельство неви́димаго прису́тствия Твоего́ показа́ла еси́ на́м, Небе́сная Цари́це, егда́ в Ла́вре свята́го Афана́сия зва́ние эконо́ма упраздни́ла еси́, Сама́ Экономи́сса оби́тели сея́ бы́ти восхоте́вши и все́ попече́ние о не́й Себе́ усво́ивши. Те́мже смире́нно мо́лим Тя́, Пречи́стая: не оста́ви по́мощию Твое́ю и на́с, вопию́щих Ти́ си́це:

Ра́дуйся, Би́сер Боже́ственный произве́дшая; ра́дуйся, чистото́ю Свое́ю тва́рь превозше́дшая.

Ра́дуйся, две́ри ра́йския на́м отверза́ющая; ра́дуйся, свя́тостию Свое́ю Небеса́ украша́ющая.

Ра́дуйся, благове́стие Небе́снаго Оте́чества; ра́дуйся, духо́вный сто́лпе правосла́внаго мона́шества.

Ра́дуйся, о ро́де челове́честем усе́рдная моли́твеннице; ра́дуйся, во гресе́х погиба́ющих неча́янная спасе́ния ра́досте.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 8.

Стра́нники и прише́льцы есмы́ на земли́, оба́че Ты́, Влады́чице, облегча́еши многоско́рбное житие́ на́ше, подаю́щи по́мощь, утеше́ние и ра́дость духо́вную. Сего́ ра́ди, почита́юще чудотво́рную ико́ну Твою́, во умиле́нии серде́чнем Тобо́ю на́м благоде́ющему Бо́гу вопие́м: Аллилу́иа.

И́кос 8.

Все́м во Святе́й Горе́ Афо́нской жи́тельствующим уте́шительно е́сть возноси́ти моле́ния своя́ на ме́сте явле́ния Пресвяты́я Богоро́дицы свято́му Афана́сию и пред ико́ною, соверши́вшееся зде́ чу́до изобража́ющею, воспева́ти Преблагослове́нней Де́ве хвале́ния таковы́я:

Ра́дуйся, на Небеси́ благословля́емая и на земли́ сла́вимая; ра́дуйся, всея́ тва́ри честне́йшая и благоле́пнейшая.

Ра́дуйся, Боже́ственный исто́чниче сладча́йшия сла́дости; ра́дуйся, Де́во Пречи́стая, преиспо́лненная неизрече́нныя ра́дости.

Ра́дуйся, всего́ ми́ра Боже́ственное утеше́ние; ра́дуйся, ро́да челове́ческаго наде́ждо и упова́ние.

Ра́дуйся, от бе́д и напа́стей на́ша охрани́тельнице; ра́дуйся, ко благоче́стию Всеблага́я на́ша наста́внице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 9.

Все́ упова́ние на́ше на Тя́ возлага́ем, Ма́ти Бо́жия, ве́мы бо, я́ко милосе́рдию Твоему́ не́сть конца́: Ты́ бо и гре́шных ми́луеши, и погиба́ющих взыску́еши, и печа́льных возвеселя́еши, и неду́жных от одра́ боле́зненнаго возставля́еши, и непреста́нно о на́с хода́тайствуеши пред Сы́ном Твои́м и Бо́гом на́шим, Ему́же мы́ с любо́вию пое́м: Аллилу́иа.

И́кос 9.

Вети́и многовеща́ннии не мо́гут исчести́ бе́здну щедро́т Твои́х, Всеблага́я Ма́ти, ро́ду челове́ческому Тобо́ю излива́емых. И мы́, сла́дость утеше́ния в ну́ждах и печа́лех на́ших позна́вше, с ве́рою и любо́вию пред о́бразом Твои́м чудотво́рным моле́ния возно́сим сицева́я:

Ра́дуйся, всея́ вселе́нныя держа́вная Влады́чице; ра́дуйся, спасе́ния на́шего при́сная Хода́таице.

Ра́дуйся, Бо́га Отца́ Дщи́ возлю́бленная; ра́дуйся, Сы́на Бо́жия Ма́ти Пресвята́я.

Ра́дуйся, Бо́га Ду́ха Свята́го пала́то прекра́сная; ра́дуйся, Небеси́ и земли́ Цари́це всепе́тая.

Ра́дуйся, боля́щих милосе́рдная Цели́тельнице; ра́дуйся, вдо́в и сиро́т незри́мая Пита́тельнице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 10.

Спасе́ния зало́г от обдержа́щих на́с ско́рбей и боле́зней дарова́ся на́м честна́я ико́на Твоя́, Богороди́тельнице Де́во, да вси́, ви́дяще явля́емую Тобо́ю ми́лость, вопию́т со умиле́нием Бо́гу: Аллилу́иа.

И́кос 10.

Стена́ еси́ лико́м и́ноческим, Богоро́дице Де́во, и все́м усе́рдно к Тебе́ прибега́ющим, и́бо Небесе́ и земли́ Творе́ц дарова́ ми́рови Тя́, Ма́терь Свою́, да бу́деши все́м земноро́дным в по́мощь и спасе́ние. Сего́ ра́ди, предстоя́ще пред о́бразом Твои́м святы́м, благогове́йно воспева́ем Тя́ пе́нии си́ми:

Ра́дуйся, всю́ вселе́нную любо́вию покрыва́ющая; ра́дуйся, от па́губных се́тей ве́рныя спаса́ющая.

Ра́дуйся, А́нгельских умо́в удивле́ние; ра́дуйся, челове́ческаго ро́да украше́ние.

Ра́дуйся, спасе́ния на́шего глави́зно; ра́дуйся, ра́досте на́ша и в се́й, и в бу́дущей жи́зни.

Ра́дуйся, моли́твам ве́рных ми́лостивно вне́млющая; ра́дуйся, лю́бящим Тя́ любо́вию Твое́ю воздаю́щая.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 11.

Пе́ние всеумиле́нное прино́сим Ти́, Небесе́ и земли́ Цари́це, и благодаря́ще Сы́на Твоего́ и Бо́га на́шего за вся́ Его́ благодея́ния на́м, недосто́йным, хода́тайством Твои́м подава́емыя, со благогове́нием вопие́м Ему́: Аллилу́иа.

И́кос 11.

Светоприе́мную свещу́ зри́м Тя́, Влады́чице на́ша Богоро́дице, о́браз бо Тво́й святы́й немерцаю́щими луча́ми благода́ти мглу́ грехо́вную прогоня́ет и на све́тлую стезю́ доброде́телей наставля́ет с ве́рою зову́щих Ти́ сицева́я:

Ра́дуйся, Ю́же воспева́ют Небе́сная во́инства; ра́дуйся, Ю́же превозно́сят святы́х со́нми.

Ра́дуйся, ра́дость ве́лию всему́ ро́ду челове́ческому дарова́вшая; ра́дуйся, правосла́вным христиа́ном пу́ть спасе́ния указу́ющая.

Ра́дуйся, ра́досте Боже́ственнаго весе́лия; ра́дуйся, ми́ра всего́ покро́ве и спасе́ние.

Ра́дуйся, ти́хое приста́нище стра́нствующим; ра́дуйся, блаже́нное поко́ище ста́рости.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 12.

Благода́ть Боже́ственную пода́ждь на́м, Пречи́стая Ма́ти, да се́ю вспомоществу́еми, по пути́ спаси́тельному ше́ствовати возмо́жем и житие́м доброде́тельным Го́споду на́шему угоди́ти потщи́мся, Ему́же непреста́нно пое́м: Аллилу́иа.

И́кос 12.

Пою́ще ми́лости Твоя́ и вели́чие Твое́ прославля́юще, Влады́чице на́ша Богоро́дице, ра́дуемся о Тебе́, я́ко и́мамы такову́ю всеблагу́ю и премилосе́рдную Засту́пницу и Хода́таицу о на́с пред Бо́гом, и с любо́вию воспева́ем Ти́ си́це:

Ра́дуйся, Купино́ Неопали́мая; ра́дуйся, Стено́ Неруши́мая.

Ра́дуйся, и́ноческих оби́телей покро́ве и снабде́ние; ра́дуйся, благочести́вых домо́в и супру́жеств благослове́ние.

Ра́дуйся, ско́рбных утеша́ющая; ра́дуйся, неду́жных исцеля́ющая.

Ра́дуйся, немощны́м и ста́рым помо́щнице; ра́дуйся, а́лчущих и жа́ждущих пита́тельнице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 13.

О Всепе́тая Ма́ти, Пресла́вная Влады́чице Богоро́дице! Приими́ сия́ моле́ния на́ша, от всея́ души́ Тебе́ ны́не на́ми возноси́мая, и Сы́на Твоего́ и Бо́га на́шего о на́с умоли́, Ему́же смире́нно покланя́емся и со умиле́нием пое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов ли́цы и вся́ Небе́сныя Си́лы Тебе́, Цари́це Небе́сная, благогове́йно слу́жат и немо́лчными гла́сы Тя́ ублажа́ют; мы́ же, земноро́днии, Тя́ я́ко Всеми́лостивую Влады́чицу и Всеблагу́ю Ма́терь на́шу почита́ем и с любо́вию вопие́м:

Ра́дуйся, от все́х родо́в Бо́гом избра́нная; ра́дуйся, де́вственною чистото́ю, я́ко диади́мою, увенча́нная.

Ра́дуйся, благоволе́нием Отца́ Небе́снаго осене́нная; ра́дуйся, Ду́ха Свята́го оби́тель свяще́нная.

Ра́дуйся, Христа́ Бо́га на́шего Ма́ти Неискусобра́чная; ра́дуйся, ко́рене Дави́дова о́трасле многопло́дная.

Ра́дуйся, ско́рая челове́ком Помо́щнице; ра́дуйся, и́щущих Ца́рствия Бо́жия Путеводи́тельнице.

Ра́дуйся, Блага́я Домострои́тельнице, житие́ на́ше до́бре устроя́ющая.

Конда́к 1.

Избра́нней от все́х родо́в Пресвяте́й Де́ве Богоро́дице, Спаси́теля и Бо́га на́шего Иису́са Христа́ пло́тию ро́ждшей, я́ко Влады́чице Небесе́ и земли́, похва́льное прино́сим пе́ние. Ты́ же, любвеоби́льная на́ша Ма́ти, сохраня́й и спаса́й на́с от все́х враго́в ви́димых и неви́димых, да со умиле́нием зове́м Ти́:

Ра́дуйся, Блага́я Домострои́тельнице, житие́ на́ше до́бре устроя́ющая.

Моли́тва.

О Пречи́стая Де́во Богоро́дице, Преми́лостивая Влады́чице, вы́шшая А́нгел и Арха́нгел, Цари́це Небесе́ и земли́, люде́й правосла́вных тве́рдое огражде́ние, вся́каго до́ма и семе́йства христиа́нскаго благоустрои́тельнице, тружда́ющихся во благоче́стии благослове́ние, нужда́ющихся неистощи́мое бога́тство, си́рых и вдови́ц пита́тельнице, де́вствующих чистото́ и сла́во, ма́терей ти́хое весе́лие, отроко́в му́дросте и науче́ние, наста́вников и детоводи́телей соверше́нный ра́зуме. Ве́руем в держа́вный Тво́й покро́в над Оте́чеством на́шим и над мале́йшим из на́с, искупле́нным Боже́ственною Кро́вию Сы́на Твоего́. Ве́руем, я́ко в се́й ико́не Твое́й, в благослове́ние от Святы́я Горы́ Афо́нския на́м да́нней, Сама́ Ты́ низпосыла́еши Твое́ ма́тернее благослове́ние градо́м и ве́сем на́шим и вся́кому до́му, на Тя́ упова́ние иму́щему. Те́мже со благогове́йным тре́петом благода́рным се́рдцем преклоня́емся пред си́м но́вым зна́мением вели́кия любве́ Твоея́, Влады́чице, к на́м, недосто́йным. Воспомина́юще же Твое́ чуде́сное явле́ние преподо́бному Афана́сию, не́когда в ну́жди и ско́рби бы́вшему и, я́ко пребу́деши при́сная Домострои́тельница его́ оби́тели, от Тебе́ ми́лостивное обеща́ние прие́мшему, смире́нно мо́лим Тя́: о Премилосе́рдая Ма́ти ро́да христиа́нскаго, бу́ди и на́м, гре́шным и недосто́йным рабо́м Твои́м, му́драя Домострои́тельница, житие́ на́ше до́бре устроя́ющая. Вся́кое соо́бщество, вся́кий до́м и семе́йство во благоче́стии и Правосла́вии, единомы́слии, послуша́нии и дово́льстве соблюди́, заблу́ждшия на пу́ть пра́вый наста́ви, ста́рость поддержи́, младе́нцы воспита́й, все́х на́с вразуми́. Облегчи́ и возста́ви изнемога́ющия, сохрани́ лю́ди Твоя́ от вся́кия ну́жды, боле́зни, гла́да, губи́тельства, гра́да, огня́, от вся́каго зла́го обстоя́ния и вся́каго нестрое́ния. Стране́ на́шей, гра́ду на́шему (или́: ве́си на́шей, или́: оби́тели на́шей) и вся́кой души́ христиа́нстей исхода́тайствуй ми́р и ве́лию ми́лость ны́не и при́сно и во ве́ки веко́в. Ами́нь.