Конда́к 1.

Избра́нней от всего́ ро́да челове́ческаго бы́ти вмести́лищем воплоти́вшагося Сы́на Бо́жия, Бо́жией Ма́тери же и Де́ве, ми́ру до́льнему небе́сней засту́пнице, дерза́ем мы́, недосто́йнии и гре́шнии, воспе́ти ака́фистное похвале́ние в че́сть явле́ния Ея́ во гра́де Ельце́, зову́ще:

Ра́дуйся, Пресвята́я Богоро́дице, земли́ Ру́сския небе́сная храни́тельнице.

И́кос 1.

А́нгелов превы́сшая, от Бо́га Отца́, Бо́га Сы́на, Бо́га Ду́ха Свята́го сла́вою неизглаго́ланною на небеси́ увенча́нная, в да́р Влады́це вся́ческих от все́х родо́в земны́х принесе́нная, ве́сь ро́д челове́чь Себе́ усынови́вшая чрез Сы́на Своего́ Христа́ Бо́га на́шего, та́ко и оте́честву на́шему благоволи́ла еси́ яви́ти ми́лости Своя́, зе́млю Руси́ Ки́евския не́когда уде́лом Свои́м избра́вши, да вси́ живу́щии в не́й воспева́ют Тя́:

Ра́дуйся, Тобо́ю боле́зни на́ша врачу́ются; ра́дуйся, Твои́ми моли́твами вся́ проше́ния на́ша исполня́ются.

Ра́дуйся, Пресвята́я Ма́ти Госпо́дня; ра́дуйся, сла́внейшая Дщи́ ро́да челове́ческаго.

Ра́дуйся, ди́вная исполни́тельнице во́ли Созда́теля; ра́дуйся, от всея́ тва́ри сла́вимая и воспева́емая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 2.

Ви́дящи, Ма́ти Госпо́дня, благоче́стие наро́да ру́сскаго, я́ко то́й, отри́нув не́когда нече́стие язы́ческое, ко Христу́ Бо́гу, Сы́ну Твоему́, все́м се́рдцем прилепи́лся е́сть, возлюби́ла еси́ вельми́ люде́й ро́да сего́, принося́щих на вся́к де́нь Бо́гу пе́ние: Аллилу́иа.

И́кос 2.

Разуме́ша пра́отцы на́ша сла́ву и че́сть Бо́га христиа́нскаго, прославля́ху Его́ со Пречи́стою Богоро́дицею, хра́мы и оби́тели безчи́сленны воздвиза́я повсю́ду и украша́я и́х благоле́пием, иде́же и велича́ху Триеди́наго Бо́га и Тебе́ возсыла́ху похвалы́ сия́:

Ра́дуйся, моли́твеннице о на́с к Бо́гу, Бо́гом на́м дарова́нная; ра́дуйся, Дщи́ от земли́ происше́дшая, Ма́терию на́м Небе́сною я́вльшаяся.

Ра́дуйся, Го́сподем па́че ины́х возлю́бленная и возвели́ченная; ра́дуйся, Ма́тернею любо́вию на́с па́дших и недосто́йных возлюби́вшая.

Ра́дуйся, Бо́га и бли́жних люби́ти на́с науча́ющая; ра́дуйся, за грехи́ на́ша Го́спода Умилостивля́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 3.

Си́ла благода́ти Христо́вой храня́ше Ру́сь Святу́ю и преумножа́ше е́й Госпо́дь ми́лости бога́тыя моли́твами Пречи́стыя Ма́тере Своея́ по рече́нному: досто́ин де́латель мзды́ своея́, и́бо де́ло вели́кое вве́рено бы́сть наро́ду ру́сскому – храни́телем и́стиннаго Богопочита́ния бы́ти и ве́ру Правосла́вную содержа́ти, та́ко творя́ше сие́, пое́м: Аллилу́иа.

И́кос 3.

Иму́ще по́мощь Всевы́шняго, осеня́емое Твои́м Богома́ти покро́вом, крепля́шеся оте́чество на́ше и в не́м растя́ше ве́ра Правосла́вная – се́мя Христо́во, на до́брую по́чву ру́сскую все́янное, и́же стокра́тный пло́д Се́ятелю принесло́ е́сть в сердца́х рабо́в Христо́вых, благодаря́щих Пречи́стую Ма́терь Госпо́дню та́ко:

Ра́дуйся, Ма́ти на́ша, многообра́зне милосе́рдие на́м явля́ющая; ра́дуйся, воспе́тая богодухнове́нными уста́ми проро́ков.

Ра́дуйся, киво́те святы́ни Ду́ха Свята́го; ра́дуйся, Дщи́ Царе́ва, Ея́же сла́ва вну́трь Ея́.

Ра́дуйся, Влады́чице, ря́сны златы́ми доброде́телей оде́яна и преиспещре́на; ра́дуйся, горо́ ту́чная, горо́ усыре́нная, ю́же благоволи́ Бо́г жи́ти в не́й.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 4.

Бу́ря гне́ва Бо́жия излия́ся на страну́ на́шу во дни́ о́ны, егда́ тя́жко согреши́ша отцы́ на́ши, во бране́х междоусо́бных истребля́я бра́т бра́та своего́, и сего́ ра́ди попусти́ Госпо́дь наше́ствие ага́рянское во вразумле́ние заблу́ждшим, да пока́явшеся воззову́т Бо́гу: Аллилу́иа.

И́кос 4.

Слы́шаша, я́ко рече́ Писа́ние: его́же лю́бит Госпо́дь, наказу́ет, лю́дие ру́сстии, разуме́ша си́лу Ду́ха Свята́го, пременя́ющаго устрое́ние мы́слей и серде́ц челове́ческих и зло́е во благо́е претворя́ющаго, смири́шася до зла́ и Тебе́ я́ко Бо́жией Ма́тери глаго́лаше:

Ра́дуйся, злочести́вое и́го монго́льское сокруши́вшая; ра́дуйся, Ру́сь Святу́ю па́че пре́жняго сла́вою Свое́ю осени́вшая.

Ра́дуйся, я́ко моли́твы избра́нника Твоего́ преподо́бнаго Се́ргия услы́шавшая; ра́дуйся, его́ моли́твами гне́в на ми́лость премени́ти Сы́на Своего́ умоли́вшая.

Ра́дуйся, во́ином ру́сским на по́ли Кулико́вом побе́ду дарова́вшая; ра́дуйся, ско́ро в беда́х и напа́стех на́с утеша́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 5.

Боготе́чную звезду́, честно́е Твое́ явле́ние, на́м показа́ла еси́, Влады́чице Всепе́тая, во дни́ но́ваго наше́ствия гро́знаго ха́на тата́рскаго Тамерла́на со ра́тию неисчи́слимою, его́же клевре́ты сатани́нския на Ру́сь посыла́ху, дабы́ Правосла́вие и ро́д правосла́вный истреби́ти, оба́че укрепля́еми наде́ждою на Тя́, Пресвята́я, не престава́ху ве́рнии зва́ти Ти́: Аллилу́иа.

И́кос 5.

Ви́дяще но́вое испыта́ние тя́жкое, я́ко тьмочи́сленное во́йско ага́рянское на Москву́ иду́ще, гра́д Еле́ц разори́ша до основа́ния и вся́ живу́щия в не́м умертви́ша, кня́зя же еле́цкаго Фео́дора плени́ша, наро́д ру́сский укрепи́ся ду́хом, и Ма́терь Бо́га Своего́ призыва́я, взыва́л си́це:

Ра́дуйся, ду́х и́стины Христо́вой в сердца́х обновля́ющая; ра́дуйся, ре́вность о сла́ве Бо́жией в ду́ши на́ша вселя́ющая.

Ра́дуйся, пра́во стоя́ти за ве́ру пра́вую на́с подвиза́ющая; ра́дуйся, во бране́х за оте́чество правосла́вное на́с укрепля́ющая.

Ра́дуйся, венцы́ му́ченическия убие́нным правосла́вным во́ином уготовля́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 6.

Пропове́дник во́ли Госпо́дни бы́сть святи́тель Киприа́н, егда́, ви́дя бе́дствие наро́да своего́, повеле́ из гра́да Влади́мира святы́ню ве́лию, ико́ну Богома́тери, во гра́д Москву́ изнести́, да щи́т и огражде́ние гра́ду сто́льному и все́м живу́щим в не́м пребу́дет, вопию́щим в ско́рби Го́споду: Аллилу́иа.

И́кос 6.

Возсия́ я́ко луча́ со́лнечная ве́сть прера́достная, я́ко Сама́ Пречи́стая во о́бразе святе́м Свое́м во гра́д Москву́ на спасе́ние ве́рным изы́де. Сего́ ра́ди лю́дие исходя́ще в сре́тение святы́ни, моля́ху Тя́, взыва́я: «О Влады́чице, спаси́ зе́млю Ру́сскую», и зва́ху Тебе́ та́ко:

Ра́дуйся, помо́щнице на́ша, испра́шивающая у Го́спода на́м грехо́в отпуще́ние; ра́дуйся, умоля́ющая Его́ пода́ти беззако́нием на́шим проще́ние.

Ра́дуйся, покая́ния па́дших прие́млющая и к престо́лу Бо́жию вознося́щая; ра́дуйся, из глубины́ грехо́вныя к высоте́ духо́вней на́с возводя́щая.

Ра́дуйся, гне́в Госпо́день, пра́ведно дви́жимый на на́с, Твои́м моле́нием умягча́ющая; ра́дуйся, уче́нием благода́ти и доны́не на́с пита́юшая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 7.

Хотя́ше злочести́вый Тамерла́н зе́млю ру́сскую огне́м и мече́м плени́ти и уже́ стоя́ше со мно́гою ра́тию на реце́ Сосне́ в преде́лех моско́вских, я́ко гра́ду Ельцу́ и все́й стране́ то́й уже́ разоре́нным бы́ти. Внеза́пу же устраши́ся виде́нием Богоро́дицы в то́й ча́с, егда́ лю́дие моско́встии срета́ху ико́ну Влади́мирскую и моля́шеся пред не́ю, поя́: Аллилу́иа.

И́кос 7.

Но́вое зна́мение сверши́ся благоволе́ния Бо́жия: дре́млющу Тамерла́ну в шатре́ свое́м, ви́де внеза́пу святи́телей мно́гих со жезла́ми златы́ми, над ни́ми же Жену́, благоле́пия и вели́чия неопи́саннаго испо́лненную, окруже́нную мо́лниями и во́инством, устреми́вшимся на него́. Тамерла́н же устраши́ся и очну́ся, недоумева́я, что́ е́сть виде́ние сие́. Мы́ же разуме́юще прославля́ем Богоро́дицу зва́нии си́ми:

Ра́дуйся, достохва́льная Де́во Ма́ти Госпо́дня; ра́дуйся, предве́стнице прише́дшаго в ми́р Спаси́теля.

Ра́дуйся, златоза́рное зна́мение побе́ды Его́ над тьмо́ю сме́рти; ра́дуйся, в со́ниих и виде́ниих мно́гим показу́ющая я́ко сла́вен рожде́нный Тобо́ю Христо́с Бо́г на́ш.

Ра́дуйся, и неве́рных подвиза́ющая прославля́ти всехва́льное и́мя Его́; ра́дуйся, те́м явле́нием Твои́м но́вое зна́мение благода́ти в Це́ркви показу́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 8.

Стра́нное со́ние сие́ узре́вше ха́н тата́рский, вопроси́ вельмо́ж санови́тых свои́х, хотя́ уразуме́ти бы́вшее. Ти́и же реко́ша ему́, я́ко Жена́ Велеле́пная – Ма́терь Бо́жия е́сть, христиа́ном засту́пница и защи́тница. Нечести́вый же се́й в стра́се возопи́: «О, та́ко мы́ не одоле́ем и́х», и в бе́гство обрати́ся. Ве́рнии же просла́виша Бо́га ди́внаго во святы́х Свои́х, вопию́ще: Аллилу́иа.

И́кос 8.

Вся́ дружи́на кня́жеская дивля́хуся, зря́ще Тамерла́на зверонра́внаго внеза́пу вспя́ть от Ельца́ в степи́ бежа́щаго со все́ю ра́тию свое́ю, посра́мленнаго явле́нием Богома́тери. Во́йско же ру́сское и ве́сь наро́д воспе́ша Е́й похвалы́ сия́:

Ра́дуйся, горды́ню нечести́вых посрамля́ющая; ра́дуйся, кре́посте на́ша, от лица́ вра́жия на́с сохраня́ющая.

Ра́дуйся, многоязы́чное во́йско иноплеме́нников порази́вшая; ра́дуйся, многохи́трость лука́ваго посрами́вшая.

Ра́дуйся, гра́де огражде́ния и наде́ждо на́шего спасе́ния; ра́дуйся, на клевре́ты сатани́нския на́ше ору́жие и одоле́ние.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 9.

Вся́кия похвалы́ досто́йна еси́, Пресвята́я Богоро́дице, не́когда гре́ком проти́ву наше́ствия славя́н ратобо́рствовавшая, и корабли́ и́х потопи́вшая и ви́хрем морски́м разве́явшая. Та́ко, Де́во Влады́чице, и си́м славя́ном, то́кмо уже́ пра́во стоя́щим в ве́ре правосла́вной, в гро́зный ча́с беды́ вели́кия на враги́ противоста́ла еси́, егда́ Тя́ призыва́ху, поя́: Аллилу́иа.

И́кос 9.

Вети́я многовеща́нныя я́ко рабы́ безгла́сныя умолка́ют, мы́ же просла́вим Ма́терь Госпо́дню, и́бо в де́нь то́й возсия́ла сла́ва Бо́жия на брега́х До́на ре́ки, я́ко Госпо́дь чрез Пречи́стую Богоро́дицу побора́ше нечести́вых и в бе́гство полки́ и́х обрати́вше, во́йску ру́сскому я́ко но́вому Изра́илю сора́туя, сего́ ра́ди Возбра́нную Воево́ду, восхва́лим зва́нии си́ми:

Ра́дуйся, я́ко луча́ со́лнца Боже́ственнаго тьму́ вра́жию попаля́ющая; Ра́дуйся, мглу́ бесо́вскую посеще́нием Свои́м разгоня́ющая.

Ра́дуйся, в явле́ниих Свои́х в пра́вой ве́ре люде́й утвержда́ющая; Ра́дуйся, дубра́во, осеня́ющая на́с от зно́я страсте́й и прохла́дою бла́гости покрыва́ющая.

Ра́дуйся, от смертоно́сныя ра́ны рабо́в Бо́жиих, прибега́ющих к Тебе́, цели́тельнице; Ра́дуйся, во́инств христиа́нских ра́тнице непреобори́мая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 10.

Спасти́ хотя́ страну́ на́шу и в не́й Це́рковь Свою́ святу́ю, Госпо́дь мно́гажды чрез Ма́терь Свою́ от вра́г и напа́стей, от бе́д и ко́зней защища́ше оте́чество на́ше, храня́ще е́ за ве́ру Правосла́вную, запове́да бо не́когда: врата́ а́дова не одоле́ют ея́. Посему́ лю́дие росси́йстии николи́же престава́ху Бо́гу пе́ти: Аллилу́иа.

И́кос 10.

Стена́ еси́ держа́ве Росси́йстей и прегра́да неодоли́мая, и щи́т кре́пок, и Воево́да всехва́льная, Ма́ти Госпо́дня, в и́ноцех свои́х два́жды явле́нных во гра́де Ельце́ благослове́ние Свое́ посыла́ющая и по земли́ Руси́ Свято́й незри́мо ше́ствующая. Спаси́ и поми́луй на́с, Де́во Богоро́дице, к тебе́ бо зове́м:

Ра́дуйся, земли́ ру́сския Цари́це Небе́сная; Ра́дуйся, страны́ на́шея держа́вная покрови́тельнице.

Ра́дуйся, простира́ющая над на́ми омофо́р Сво́й честны́й; Ра́дуйся, Ру́сь Святу́ю покро́вом Свои́м покрыва́ющая.

Ра́дуйся, та́йны промышле́ния Бо́жия о наро́де Свое́м лю́дем открыва́ющая; Ра́дуйся, дарова́нием ико́н чудотво́рных благода́ть неоску́дную гре́шным да́рующая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 11.

Пе́ние сие́ от у́ст на́ших недосто́йных приими́, Всепе́тая, пред ико́ною Твое́ю Еле́цкой приноси́мое, в па́мять чуде́снаго явле́ния Твоего́ напи́санною, и́мже Присноблагослове́нная, спасла́ еси́ Ру́сь Святу́ю – уде́л Сво́й. Защити́ и поми́луй и ны́не на́с убо́гих, я́коже и пре́жде поми́ловала еси́ отце́в на́ших, да во ве́ки пое́м Тебе́ хвалу́: Аллилу́иа.

И́кос 11.

Светоприе́мныя свещи́, ико́ны Ма́тери Госпо́дни по все́й земли́ страны́ Росси́йския сия́ют я́ко зна́мения попече́ния ве́лия Влады́чицы о на́с, промышля́ющей о прославля́ющих Ю́, сего́ ра́ди и отцы́ на́ши нареко́ша Ру́сь Святу́ю домо́м Пресвяты́я Богоро́дицы, да и мы́, недосто́йныя ча́да, воспое́м Е́й:

Ра́дуйся, избра́вшая не́когда зе́млю ру́сскую прее́мницею благода́ти страны́ Византи́йския; ра́дуйся, о но́вом наро́де Богоизбра́ннем в земле́ на́шей промышля́ющая.

Ра́дуйся, я́ко лю́дие росси́йстии, на Тя́ упова́вшия, не посрами́вшая; ра́дуйся, не оста́вившая на́с и егда́ согреши́ша тя́жко.

Ра́дуйся, я́ко по преумноже́нию беззако́ний преумножа́ется благода́ть Твоя́, да не поги́бнем лю́те; ра́дуйся, в ско́рбех и печа́лех на́с утеша́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 12.

Благода́ть Христо́ва сохрани́т Ру́сь христиа́нскую и ми́р ве́сь, а́ще пока́ется наро́д ру́сский правосла́вный, – рекла́ еси́ Пречи́стая не́когда в виде́нии избра́нным Свои́м. Да воспла́чемся о гресе́х свои́х, и продли́т Госпо́дь долготерпе́ние Свое́ ро́ду челове́чу, мы́ же возопии́м Всемогу́щему Бо́гу: Аллилу́иа.

И́кос 12.

Пое́м Тя́, прославля́ем Тя́, отверза́ем уста́ на́ша к пе́нию Твоему́, Всепе́тая, оба́че изнемога́я от не́мощи, дерза́ем приноси́ти похвалы́ Ти́. Да не отве́ржеши на́с за грехи́ на́ша, но при́зри на словеса́ си́и:

Ра́дуйся, злата́я кади́льнице – сокро́вище ве́лие на́м Бо́гом да́нное; ра́дуйся, ро́д челове́чь доны́не млеко́м ми́лости Своея́ пита́ющая.

Ра́дуйся, таи́ннице промышле́ний Госпо́дних о Свято́й Руси́; ра́дуйся, наро́да ру́сскаго правосла́внаго сла́во и похвало́.

Ра́дуйся, царе́й Боговенча́нных небе́сная держа́во; ра́дуйся, наро́ды и племена́ во и́стине Правосла́вия наставля́ющая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 13.

О Ма́ти Всепе́тая, Влады́чице Преблагослове́нная, пе́ние на́ше приими́ и к престо́лу Сы́на Твоего́ вознеси́, спаси́ и поми́луй лю́ди Твоя́ и зе́млю Руси́ Свято́й па́ки защити́ и возроди́ ю́ я́ко ца́рство Твое́, да удо́бее возмощи́ на́м и Ца́рствия Небе́снаго дости́гнути, пото́мком же на́шим ве́ру Правосла́вную помоги́ в непоро́чности соблюсти́, да несконча́емо пою́т лю́дие Бо́гу хвалу́: Аллилу́иа. Аллилу́иа. Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов превы́сшая, от Бо́га Отца́, Бо́га Сы́на, Бо́га Ду́ха Свята́го сла́вою неизглаго́ланною на небеси́ увенча́нная, в да́р Влады́це вся́ческих от все́х родо́в земны́х принесе́нная, ве́сь ро́д челове́чь Себе́ усынови́вшая чрез Сы́на Своего́ Христа́ Бо́га на́шего, та́ко и оте́честву на́шему благоволи́ла еси́ яви́ти ми́лости Своя́, зе́млю Руси́ Ки́евския не́когда уде́лом Свои́м избра́вши, да вси́ живу́щии в не́й воспева́ют Тя́:

Ра́дуйся, Тобо́ю боле́зни на́ша врачу́ются; ра́дуйся, Твои́ми моли́твами вся́ проше́ния на́ша исполня́ются.

Ра́дуйся, Пресвята́я Ма́ти Госпо́дня; ра́дуйся, сла́внейшая Дщи́ ро́да челове́ческаго.

Ра́дуйся, ди́вная исполни́тельнице во́ли Созда́теля; ра́дуйся, от всея́ тва́ри сла́вимая и воспева́емая.

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Конда́к 1.

Избра́нней от всего́ ро́да челове́ческаго бы́ти вмести́лищем воплоти́вшагося Сы́на Бо́жия, Бо́жией Ма́тери же и Де́ве, ми́ру до́льнему небе́сней засту́пнице, дерза́ем мы́, недосто́йнии и гре́шнии, воспе́ти ака́фистное похвале́ние в че́сть явле́ния Ея́ во гра́де Ельце́, зову́ще:

Ра́дуйся, Пресвята́я Богоро́дице, земли́ Ру́сския небе́сная храни́тельнице.

Моли́тва.

О Де́во Пресвята́я Богоро́дице, земли́ Ру́сския и ми́ра всего́ храни́тельнице и засту́пнице, про́сим Тя́, чадолюби́вая Ма́ти, да́руй на́м покая́ние во гресе́х и наста́ви ра́зум на́ш к позна́нию и́стины во спасе́ние, гра́д на́ш и вся́ гра́ды и ве́си христиа́нския защити́ и сохрани́, спаси́ все́х и́миже ве́си судьба́ми и та́мо умоли́, держа́вная Цари́це, зе́млю Ру́сскую покая́нием возроди́ти и к Ца́рству Небе́сному путево́дствуй на́с, гре́шных и убо́гих, да та́мо воспое́м Бо́гу в Тро́ице Святе́й сла́вимому, Отцу́ и Сы́ну и Свято́му Ду́ху пе́снь хвале́ния, ны́не и при́сно и во ве́ки веко́в. Ами́нь.