Акафист Пресвятой Богородице пред иконой «Гидлянской»
Память Гидлянского (Гидельского) чудотворного местночтимого (Благовещенской епархии) образа Пресвятой Богородицы совершается 16 (3) марта. Акафист издан по благословению архиепископа Благовещенского и Тындинского Лукиана (Куценко).
Не утвержден для общецерковного использования.
Взбра́нней Воево́де и Всеблаго́й Засту́пнице ро́да христиа́нскаго, хвале́бное пе́ние прино́сим Ти́, Пресвята́я Де́во, у чуде́сно явле́ннаго о́браза Твоего́, имену́емаго Гидля́нским, мно́гими чудесы́ и зна́мении в земли́ то́й просла́вленнаго. Ты́ же, я́ко иму́щая милосе́рдие неизрече́нное, не отврати́ лица́ Твоего́ от на́с, Влады́чице, пред свято́ю ико́ною Твое́ю уми́льно зову́щих:
Арха́нгели и А́нгели дивя́тся неизрече́нному милосе́рдию Твоему́, Пресвята́я Де́во, к ро́ду челове́ческому, ему́же благоволи́ла чуде́сно дарова́ти во утеше́ние святы́й о́браз Тво́й в земли́ Гидля́нстей. Ты́ же простира́еши чрез о́ный лучи́ благода́ти Своея́ не то́кмо весняку́ Иоа́нну, но и все́м с ве́рою моля́щимся у о́наго и с умиле́нием зову́щим:
Ви́дяще ди́вный о́браз Тво́й, Блага́я Влады́чице, в земли́ вспа́ханней лежа́щий, и лучи́ от него́ пречу́дно исходя́щия, волы́ замро́ша и, на зе́млю па́дше, коле́на приклони́ша; Иоа́нн же, крестья́нин, боголюби́вый му́ж ве́си Гидля́нския, в недоуме́нии припаде́ ко о́бразу Твоему́, чуде́сно явле́нному, хвалу́ Бо́гу воздаде́, восклица́я: Аллилу́иа.
Ра́зум неуразуме́нный иму́ще о явле́нии ди́внаго о́браза Твоего́, из ка́мене изсече́ннаго, и не ве́дый, я́ко ми́лостивно восхоте́ла еси́ в ви́димом о́бразе Твое́м яви́ти неви́димую си́лу благода́ти и Ма́терняго попече́ния о земли́ Гидля́нстей, му́ж о́ный с тре́петом прия́т его́ на ру́це свои́, Богоро́дице, ме́рою в дла́нех его́ помести́вшийся, я́ко сокро́вище не́кое в до́м сво́й принесе́ и в сундуке́ сокры́. Мы́ же с ве́рою припа́дающе к ико́не Твое́й, Тебе́, Преблагослове́нная, похва́льно взыва́ем:
Си́лою Бо́жиею вразумле́нный о явле́нии чудотво́рнаго о́браза Твоего́, Влады́чице, да не сокры́т бу́дет новоявле́нный исто́чник чуде́с Твои́х, Иоа́нн Че́чик с домоча́дцы свои́ми слепото́ю оче́с наказа́ся. Сокруша́яся о неразу́мии свое́м, призва́ свяще́нника Петра́ Волпка́я и с покая́нием извлече́ о́браз Тво́й, Богома́ти, прозре́ние от него́ прия́т. Позна́ же, я́ко стра́ждущим во утеше́ние явле́н бы́сть, да, ви́дяще то́ки чуде́с от него́ источа́емыя, со слеза́ми благодаре́ния вопию́т о не́м Бо́гу: Аллилу́иа.
Иму́ще преди́вный о́браз Тво́й, Влады́чице, я́ко безце́нный да́р Бо́жий, со стра́хом и тре́петом на ру́це свои́ иере́й Пе́тр Волпка́й прия́т, отнесе́ его́ в це́рковь святы́я Мари́и Магдали́ны, иде́же во олтаре́, на престо́ле поста́влен бы́сть со Свято́ю Та́йною Христо́вою. Да вси́ живу́щии в ве́си Гидля́нстей позна́ют, я́ко любо́вь Твоя́ и попече́ние о лю́дех земли́ то́й пребыва́ет. Сего́ ра́ди благода́рственно Тебе́ воспева́ем:
Бу́рею скорбе́й и многоразли́чными печа́льми жите́йскими омраче́ннии, живу́щии в селе́нии Гидля́нстем, устреми́шася ко свято́му о́бразу Твоему́, я́ко ко исто́чнику бога́тых ми́лостей Твои́х. С ве́рою прихожда́ху и исцеле́ние неду́гов приима́ху, благода́рственно воспева́юще Го́споду, и́стинному Врачу́ ду́ш и теле́с: Аллилу́иа.
Слы́шаша бли́жняя и да́льняя о ве́лиих чудесе́х и зна́мениих, от о́браза Твоего́ Гидля́нскаго быва́емых, с ве́рою и упова́нием на милосе́рдие Твое́ к нему́ притека́ху, с тре́петом благода́рнаго се́рдца, покланя́ющеся Ти́ в явле́ннем о́бразе Твое́м, в це́ркви поста́вленнем, я́ко Саме́й Тебе́ су́щей, со усе́рдием взыва́ху:
Боготе́чней звезде́ уподо́бися о́браз Тво́й, Пречи́стая Ма́ти, егда́ лучеза́рным сия́нием освети́ша ме́сто чуде́снаго обре́тения своего́ в по́ле Иоа́нна земледе́льца. Приклони́вши ми́лость Свою́ к крестья́нину, тя́жкими рабо́тами в по́ле изможде́нному, науча́еши его́ и подо́бных ему́ вели́кому Ма́тернему милосе́рдию Твоему́, не презира́еши бо, в те́плей моли́тве ру́це свои́ к Тебе́ простира́ющих, Бо́гу же вопию́щих: Аллилу́иа.
Ви́девше вси́ стра́нное и пресла́вное чу́до, со о́бразом Твои́м быва́емое, Пресвята́я Де́во, я́ко мно́гажды во хра́ме све́т Боже́ственный от него́ излуча́шеся, Тебе́, Звезды́ Незаходи́мыя Ма́ти, источа́ющей неоску́дную ми́лость Сы́на Твоего́ и Бо́га на́шего, немо́лчно хвалу́ и благодаре́ние прино́сим си́це:
Пропове́дуют немо́лчно лю́дие земли́ Гидля́нстей чудеса́ ве́лия, о́бразом Твои́м источа́емыя, Богоро́дице. От За́пад бо до Восто́к хва́льно и́мя Твое́: не отри́нула еси́ милосе́рдием Твои́м вся́каго приходя́щаго к Тебе́ и у цельбоно́сныя ико́ны Твоея́ моля́щагося, да позна́в ра́дости Богома́терняго заступле́ния Твоего́, си́льну Помо́щницу Тя́ уразуме́вше, всера́достно воспева́ют Бо́гу: Аллилу́иа.
Возсия́ла еси́ от и́стиннаго Со́лнца Пра́вды Заря́, Де́во Богоотрокови́це, мра́к греха́ и помраче́ния оче́с челове́ческих све́том Христо́выя и́стины просвеща́ющая. О́бразом Твои́м чудотво́рным излива́ла бо струи́ ми́лости и щедро́т Твои́х; мо́лим Тя́, Блага́я, потщи́ся пода́ти благода́ть Твою́ и на́м, в многообра́зных беда́х су́щим, и со умиле́нием вопию́щим Ти́:
Хотя́ по вре́мени яви́тися во сла́ве ве́лией, о́браз Тво́й, Богоро́дице, мно́гажды чуде́сно си́лою Бо́жиею перемеща́шеся к ме́сту явле́ния своего́ на по́ле земли́ Иоа́нновой, иде́же ве́рнии во́лю Бо́жию уразуме́ша, покло́нный сто́лп для о́браза Твоего́ сооруди́ша; у него́же оби́льно излива́ла еси́ по́мощь Твою́ ве́рным, подава́ющи все́м исцеле́ния многоразли́чны, с ве́рою вопию́щим Бо́гу: Аллилу́иа.
Ди́вно просла́вися о́браз Тво́й, Богоро́дице, чудеса́ми от него́ быва́емыми все́м притека́ющим ко всемо́щному предста́тельству Твоему́. Не то́кмо исцеле́ние неду́гов дарова́ла еси́, но и воскреше́ние уме́рших явля́ла еси́, во увере́ние си́лы Бо́жия и Твоего́ Богома́терняго к Бо́гу заступле́ния. Сицевы́х явле́ний помина́ние творя́ще, в бу́ре жития́ на́шего ру́ку по́мощи се́ю ико́ною Твое́ю получи́ти тщи́мся, и Тебе́, Благода́тная, взыва́ем:
Стра́нная и пресла́вная чудеса́, от о́браза Гидля́нскаго быва́емыя, ви́девши, владе́лица селе́ния Ги́дле, А́нна Домбро́вская, возжела́ша це́рковь на ме́сте явле́ния его́ сооруди́ти, да в не́й пра́выя ве́ры покло́нницы притека́я ко Пречи́стому о́бразу Твоему́, воспою́т хвале́бную пе́снь Бо́гу: Аллилу́иа.
Вся́к язы́к не мо́жет пове́дати та́йну явле́ния о́браза Твоего́, Влады́чице, на не́мже ви́дим Тя́, на руку́ держа́щую Преве́чнаго Младе́нца, Сы́на Бо́жия. Вся́к бо с ве́рою к нему́ приходя́й, в боле́знех ско́рое исцеле́ние прие́млет. Восхоте́ша лю́дие дарми́ послужи́ти Ти́, Всепе́тая, вме́сто столпа́ покло́ннаго воздвиго́ша Тебе́ хра́м ка́менный в ве́си Гидля́нстей во сла́ву Пречи́стаго Успе́ния Твоего́, да в не́м просла́вися о́браз Тво́й, у него́же взыва́ша Ти́ та́ко:
Вся́кое естество́ челове́ческое со удивле́нием приклоня́ется смире́нне и че́стне пред вели́чеством непостижи́мыя та́йны исцеле́ний, от о́браза Твоего́ цельбоно́снаго источа́емых. Не то́кмо в земли́ Ля́дстей, но и во ины́х страна́х явля́еши ми́лость Твою́ все́м почита́ющим о́браз Тво́й. О Тебе́ же, превосходя́щей вся́кую похвалу́ земну́ю, Небе́сному Влады́це, воплоще́нному Сы́ну Бо́жию, благода́рно воспева́ем: Аллилу́иа.
Вети́йства челове́ческия не мо́гут изъясни́ти по достоя́нию мно́жество чуде́с Твои́х, от о́браза Твоего́ быва́емых. Я́ко все́м конце́м земли́ простира́еши ру́ку по́мощи и низпосыла́еши ве́рным земли́ плодоно́сие, благорастворе́ние возду́хов и вся́кое изоби́лие плодо́в и бла́г земны́х. Мы́ же, смире́нне испове́дующе вели́кое на́м заступле́ние Твое́, из глубины́ серде́ц на́ших вопие́м Ти́:
Спасти́ хотя́ще мно́гия лю́дие от находя́щих скорбе́й и боле́зней и ве́ру и́х утверди́ти во всеси́льное заступле́ние Твое́, Пресвята́я Де́во, Человеколю́бец Госпо́дь дарова́ те́м, Влады́чице, чудотво́рный о́браз Тво́й, я́же, я́ко свети́льник неугаса́ющий, Боже́ственным све́том сия́ет все́м, огне́м же любве́ Твоея́ ко святе́й Це́ркви Христо́вой вся́ привлека́ет, да согла́сно пою́т Творцу́ вся́ческих: Аллилу́иа.
Стена́ еси́, Влады́чице, и ве́рное огражде́ние оби́тели Твоея́ и всему́ ми́ру, заступа́ющая на́с от враго́в ви́димых и неви́димых, ве́рою и любо́вию чту́щих Тя́ и честно́му о́бразу Твоему́ поклоня́ющихся и у него́же принося́щих те́плыя благодаре́ния такова́я:
Пе́ние и мольбы́ всеумиле́нныя прино́сим Ти́ с любо́вию, Богоро́дице, вели́кое бо мно́жество чуде́с явля́еши помазу́ющимся еле́ем от чудотво́рнаго о́браза Твоего́; вся́ сия́ благодея́ния, Тобо́ю явля́емыя, помина́юще, ро́ждшемуся от Тебе́ Боже́ственному Сло́ву благогове́йно воспева́ем: Аллилу́иа.
Светоза́рную свещу́ су́щим во тьме́ я́вльшуюся зри́м святы́й о́браз Тво́й, о Ма́ти Све́та: се́й бо сердца́ на́ша благода́тию озаря́ет и к ра́зуму Боже́ственному вся́ наставля́ет. Сего́ ра́ди вопие́м хвале́бныя пе́сни таковы́я:
Благода́ть Твою́ свы́ше пода́ждь на́м, Пресвята́я Де́во, ко Пречи́стому о́бразу Твоему́ притека́ющих и Тя́, Ма́терь Све́та, в пе́снех велича́ющих. Отгони́ мглу́ серде́ц на́ших, да́руй же все́м на́м непреста́нно мы́слию возноси́тися в страну́ Ве́чнаго Све́та, иде́же Ты́ прославля́ешися с Сы́ном Твои́м и Бо́гом на́шим, Ему́же вся́ Небе́сныя Си́лы с тре́петом воспева́ют: Аллилу́иа.
Пою́ще Твоя́ дре́вния и но́выя ми́лости, Богома́ти, о́бразом Твои́м Гидля́нским явля́емыя, к нему́же на ме́сто обре́тения его́ лю́дие от все́х конце́в земли́ притека́ют, ча́юще от Тебе́ скорбе́й избавле́ния, бла́г земны́х и ве́чных сподобле́ния. Покро́вом Твои́м не престава́й покрыва́ти и на́с, рабо́в Твои́х, принося́щих Ти́ похвалы́ таковы́я:
О Всепе́тая Ма́ти, Богоневе́сто Влады́чице, ро́ждшая все́х святы́х Святе́йшее Сло́во! Приими́ сие́ ма́лое хвале́бное песнопе́ние на́ше у ико́ны Твоея́, Тебе́ приноси́мое, и изба́ви все́х к Тебе́ прибега́ющих от вся́кия ну́жды и печа́ли, смертоно́сных боле́зней и вся́каго зла́го обстоя́ния. Насле́дники Ца́рствия Небе́снаго соде́лай ны́, да с ли́ки а́нгельскими непреста́нно пое́м Бо́гу: Аллилу́иа.
Этот конда́к читается трижды, затем и́кос 1-й и конда́к 1-й.
Арха́нгели и А́нгели дивя́тся неизрече́нному милосе́рдию Твоему́, Пресвята́я Де́во, к ро́ду челове́ческому, ему́же благоволи́ла чуде́сно дарова́ти во утеше́ние святы́й о́браз Тво́й в земли́ Гидля́нстей. Ты́ же простира́еши чрез о́ный лучи́ благода́ти Своея́ не то́кмо весняку́ Иоа́нну, но и все́м с ве́рою моля́щимся у о́наго и с умиле́нием зову́щим:
Взбра́нней Воево́де и Всеблаго́й Засту́пнице ро́да христиа́нскаго, хвале́бное пе́ние прино́сим Ти́, Пресвята́я Де́во, у чуде́сно явле́ннаго о́браза Твоего́, имену́емаго Гидля́нским, мно́гими чудесы́ и зна́мении в земли́ то́й просла́вленнаго. Ты́ же, я́ко иму́щая милосе́рдие неизрече́нное, не отврати́ лица́ Твоего́ от на́с, Влады́чице, пред свято́ю ико́ною Твое́ю уми́льно зову́щих:
О Пречи́стая Богома́ти, Влады́чице! Услы́ши многоболе́зненное воздыха́ние на́ше пред чти́мою ико́ною Твое́ю, имену́емою Гидля́нскою, в земли́ Ля́дстей просия́вшею. Я́коже та́мо, та́коже и зде́ при́зри на ча́да Твоя́, ко святе́й ико́не Твое́й с ве́рою припа́дающия. Тебе́ у́бо про́сим: не пре́зри на́с, недосто́йных, моля́щихся Тебе́ и по́мощи Твоея́ прося́щих. Бу́ди в печа́лех утеше́ние, в неду́зех лю́тых стра́ждущим исцеле́ние, напа́ствуемым ско́рая Покрови́тельнице, очесы́ неду́гующим прозре́ния Пода́тельнице, ссу́щим младе́нцем и отроко́м в боле́знех ско́рая Предста́тельнице.