Конда́к 1.
Взбра́нней Воево́де и Де́ве Богоро́дице, от все́х родо́в на спасе́ние на́ше избра́нней и, я́ко Ма́тери Христа́, Бо́га на́шего, достодо́лжно ублажа́емей, похва́льное пе́ние, ве́рнии, принесе́м и пред ико́ною Ея́ с наде́ждою и любо́вию моли́тву вознесе́м: изба́ви на́с, Влады́чице, от вра́г ви́димых и неви́димых, да спасе́ннии Тобо́ю воззове́м вси́ ра́достно:
Ра́дуйся, чи́стая Отрокови́це, те́плая Предста́тельнице о душа́х на́ших.
И́кос 1.
А́нгелов мно́жества и вся́ небе́сная во́инства сла́вят Тя́, Цари́цу Небесе́ и земли́. Просла́ви Тя́, Пречи́стая, и вели́кий кня́зь Дими́трий с во́и ру́сскими, егда́, я́ко победи́тель над нечести́выми ага́ряны, пу́ть сво́й к Первопресто́льному гра́ду соверша́я, в да́р чудотво́рную ико́ну Твою́ от люди́й гра́да Гре́бени прия́т. Те́мже, держа́ ю́ на объя́тиих свои́х, со дерзнове́нием возопи́ Преблагослове́нней:
Ра́дуйся, сре́тением ико́ны Твоея́ ве́рныя ратобо́рцы возвесели́вшая; ра́дуйся, е́ю благослове́ние Первопресто́льному гра́ду дарова́вшая.
Ра́дуйся, ше́ствием Твои́м зе́млю Ру́сскую освяти́вшая; ра́дуйся, к ве́ре христиа́нстей мно́гия лю́ди обрати́вшая.
Ра́дуйся, ага́рянскаго злове́рия Обличе́ние; ра́дуйся, ве́ры Правосла́вныя Утвержде́ние.
Ра́дуйся, с ве́рою прибега́ющим проше́ния исполня́ющая; ра́дуйся, лю́дем правосла́вным при́сно чудоде́ющая.
Ра́дуйся, ско́рая челове́ком Помо́щнице; ра́дуйся, прему́драя ве́рным Наста́внице.
Ра́дуйся, Вели́ких Моско́вских князе́й Покрови́тельнице; ра́дуйся, ро́да христиа́нскаго усе́рдная Засту́пнице.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 2.
Ви́дяще христолюби́вии лю́дие, в страда́ниих и ско́рбех су́щии, чудеса́ от ико́ны Твоея́, Влады́чице, быва́емая, от мно́гих ме́ст к Тебе́ стека́хуся и моли́твы возсыла́ху. Те́мже, получи́вше с ве́рою проси́мая, благода́рне из глубины́ серде́ц взыва́ху Бо́гу: Аллилу́иа.
И́кос 2.
Разуме́ша лю́дие промышле́ние Бо́жие о себе́, егда́, всечестна́я ико́на Твоя́, Богома́ти, я́ко со́лнце пресве́тлое, в сто́льный гра́д Москву́ святы́м вели́ким кня́зем Дими́трием принесе́ся. Сего́ ра́ди, све́тло пра́зднующе честна́го о́браза Твоего́ сре́тение, с любо́вию к Тебе́ взыва́ху:
Ра́дуйся, я́ко ико́на Твоя́ во спасе́ние на́м дарова́ся; ра́дуйся, я́ко то́ю собо́рная це́рковь Успе́ния украси́ся.
Ра́дуйся, зе́млю Ру́сскую в уде́л Себе́ избра́вшая; ра́дуйся, мно́гими чудесы́ лю́ди гра́да Гре́бени удиви́вшая.
Ра́дуйся, заблу́ждших гре́шников ско́рое Вразумле́ние; ра́дуйся, серде́ц на́ших Умиле́ние.
Ра́дуйся, Покро́ве чистоты́ и де́вства; ра́дуйся, Огражде́ние блага́го супру́жества.
Ра́дуйся, прибега́ющих к Тебе́ милосе́рдая Спору́чнице; ра́дуйся, оста́вленных врача́ми безме́здная Цели́тельнице.
Ра́дуйся, Боже́ственною сла́вою украше́нная; ра́дуйся, ди́вными чудеса́ми Просла́вленная.
Ра́дуйся, чи́стая Отрокови́це, те́плая Предста́тельнице о душа́х на́ших.
Конда́к 3.
Си́лою, да́нною Ти́ свы́ше, мно́гая чудеса́ сотвори́ла еси́, Влады́чице, в земли́ на́шей и не возмо́жно е́сть исчи́слити сла́вныя побе́ды над супоста́ты. Кня́зие бо ру́сстии, име́юще ико́ну Твою́, безстра́шно отража́ху вра́жия по́лчища, вопию́ще Бо́гу: Аллилу́иа.
И́кос 3.
Иму́ще Тя́ неусыпа́ющую Моли́твенницу и усе́рдную Засту́пницу, вся́кое уны́ние и стра́х отча́яния побежда́ем. Ты́ бо, стяжа́вши ве́лие дерзнове́ние к Сы́ну Твоему́ и Бо́гу на́шему, любо́вию покрыва́еши зе́млю ру́сскую и все́м твори́ши спасти́ся. Сего́ ра́ди, а́ще и неради́ви су́ще о свое́м спасе́нии, оба́че дерза́ем со умиле́нием глаго́лати Тебе́ такова́я:
Ра́дуйся, в беда́х и ско́рбех ско́рая Помо́щнице; ра́дуйся, те́плая о на́с пред Бо́гом Моли́твеннице.
Ра́дуйся, правосла́вных во́инов на по́ли бра́ни укрепля́ющая; ра́дуйся, еле́ем благода́ти Твоея́ ра́ны и́х врачу́ющая.
Ра́дуйся, ве́рная ча́да на по́двиги благословля́ющая; ра́дуйся, неве́рныя под но́ги и́х покаря́ющая.
Ра́дуйся, гре́шником гро́зное Обличе́ние; ра́дуйся, ка́ющимся человеколю́бное снисхожде́ние.
Ра́дуйся, духо́вная о́чи, е́же ви́дети грехи́, на́м открыва́ющая; ра́дуйся, благода́тную по́мощь ко исправле́нию подаю́щая.
Ра́дуйся, страсте́й па́губных исцеле́ние; ра́дуйся ду́ш на́ших спасе́ние.
Ра́дуйся, чи́стая Отрокови́це, те́плая Предста́тельнице о душа́х на́ших.
Конда́к 4.
Бу́рею недоуме́ний обдержи́ми бы́ша лю́дие, ви́дяще це́рковь Успе́ния Твоего́, Влады́чице, огне́м объя́ту. Егда́ же узре́ша ико́ну Твою́ на возду́се верху́ пла́мене стоя́щу и не сгара́ющу, просла́виша Бо́га ди́внаго в чудесе́х Свои́х и Тя́, Пресвята́я Де́во, О́гнь Божества́ во чре́ве Твое́м вмести́вшую, в ра́дости пою́ще: Аллилу́иа.
И́кос 4.
Слы́шаще чу́до от ико́ны Твоея́, Всеми́лостивая Богоро́дице, быва́емое, ка́ко во огни́, я́ко Неопали́мая Купина́, яви́ся несгара́ема, удивля́емся и, разуме́юще зна́мение ми́лости Твоея́, воспева́ем си́це:
Ра́дуйся, ико́ну Твою́ чуде́сне во огни́ сохра́ньшая; ра́дуйся, си́м зна́мением любо́вь Твою́ к на́м я́вльшая.
Ра́дуйся, огнезра́чная Пала́то на херуви́мех Седя́щаго; ра́дуйся, одушевле́нный Престо́ле го́рними и до́льними Влады́чествующаго.
Ра́дуйся, вочелове́чению Еди́наго от Тро́ицы непоро́чно послужи́вшая; ра́дуйся, Творца́ Не́ба и земли́ без се́мени воплоти́вшая.
Ра́дуйся, О́гнь Божества́ во чре́ве Твое́м вмести́вшая; ра́дуйся, Христа́, Бо́жию Си́лу и Бо́жию Прему́дрость, на́м породи́вшая.
Ра́дуйся, пла́мень огня́ гее́нскаго росо́ю моли́тв Твои́х угаша́ющая; ра́дуйся, хла́дная сердца́ на́ша огне́м любве́ Бо́жия воспламеня́ющая.
Ра́дуйся, от вся́ких бе́д и скорбе́й на́с сохраня́ющая; ра́дуйся, жили́ща на́ша от о́гненнаго запале́ния соблюда́ющая.
Ра́дуйся, чи́стая Отрокови́це, те́плая Предста́тельнице о душа́х на́ших.
Конда́к 5.
Боголюби́вая Храни́тельница яви́лася еси́, Влады́чице, егда́ зли́и та́тие, прише́дше в це́рковь, тща́хуся ри́зу ико́ны Твоея́ восхи́тити. Ты́ же, Пречи́стая, наказу́ющи, наказа́ла еси́ святота́тцы сия́, ины́я попали́вши огне́м от ли́ка ико́ны Твоея́ исше́дшим, ины́я же вразуми́ла еси́ воспе́ти Бо́гу: Аллилу́иа.
И́кос 5.
Ве́мы, вои́стину ве́мы, Влады́чице, я́ко не оста́виши ны́, беззащи́тныя, и воспрети́ши враго́м ви́димым и неви́димым, тща́щимся погуби́ти ду́ши на́ша и Ца́рствия Небе́снаго лиши́ти. Те́мже, я́ко обличи́ла еси́ святота́тцы злы́я, соблюди́ и на́с от злы́х та́тей кня́зя возду́шнаго, да благода́рственно Ти́ вопие́м:
Ра́дуйся, ро́да христиа́нскаго те́плая Засту́пнице; ра́дуйся, во оби́тели ра́йския блага́я Путеводи́тельнице.
Ра́дуйся, пра́ведный гне́в Бо́жий на ми́лость претворя́ющая; ра́дуйся, отча́янных и отве́рженных непреста́нно ми́лующая.
Ра́дуйся, помраче́нных смы́слом благода́тное Просвеще́ние; ра́дуйся, творя́щих злы́я по́хоти гро́зное Вразумле́ние.
Ра́дуйся, лука́выя прави́тели стро́го облича́ющая; ра́дуйся, оби́женныя и́ми любо́вию огражда́ющая.
Ра́дуйся, умерщвле́нныя грехми́ благода́тию Твое́ю оживля́ющая; ра́дуйся, наде́ждою бла́г ве́чных и́х увеселя́ющая.
Ра́дуйся, злы́я ра́спри умиря́ющая; ра́дуйся, и в ма́лых ско́рбех на́м помога́ющая.
Ра́дуйся, чи́стая Отрокови́це, те́плая Предста́тельнице о душа́х на́ших.
Конда́к 6.
Пропове́дуют гра́ди и ве́си земли́ на́шея чудеса́ Твоя́, Богороди́тельнице, и́хже Ты́ яви́ла еси́ в защище́нии люде́й правосла́вных. Те́мже и ико́на Твоя́ просла́вися мно́гими чудесы́ и яви́ся ру́сским вели́ким князе́м, я́ко щи́т и огражде́ние и на враги́ одоле́ние, и́же побе́ды улуча́вше, вопия́ху Бо́гу: Аллилу́иа.
И́кос 6.
Возсия́ оте́честву на́шему от ико́ны Твоея́, Влады́чице, ди́вная побе́да, егда́ правосла́внии во́ини изнесо́ша ю́ проти́ву изме́нников и инове́рных, хотя́щих гра́д Москву́ разори́ти и ве́ру Правосла́вную погуби́ти. Ты́ же, одоле́ние на враги́ дарова́вши, тьму́ неве́рия отгна́ла еси́, все́х же научи́ла еси́ с любо́вию взыва́ти:
Ра́дуйся, Зе́млю Ру́сскую возлюби́вшая; ра́дуйся, оте́чество на́ше в уде́л Себе́ избра́вшая.
Ра́дуйся, враго́в на́ших гро́зное Устраше́ние; ра́дуйся, ве́ры Правосла́вныя всемо́щное Защище́ние.
Ра́дуйся, Покро́вом Твои́м на́с покрыва́ющая; ра́дуйся, заблу́ждших к позна́нию И́стины приводя́щая.
Ра́дуйся, в де́нь ско́рби пла́ч ве́рных в ра́дость обрати́вшая; ра́дуйся, зна́мением ми́лости Твоея́ и́х сердца́ возвесели́вшая.
Ра́дуйся, щедро́ты Твоя́ ве́рным лю́дем излива́ющая; ра́дуйся, ико́ною Твое́ю и́м помога́ющая.
Ра́дуйся, несумне́нная на́ша Наде́ждо; ра́дуйся, ти́хое и до́брое Приста́нище.
Ра́дуйся, чи́стая Отрокови́це, те́плая Предста́тельнице о душа́х на́ших.
Конда́к 7.
Хотя́щи обнови́ти чудотво́рную ико́ну Твою́, Богома́ти, от мно́г ле́т в ве́тхость прише́дшу, сестра́ царе́ва со усе́рдием украси́ ю́ и, соверши́вши моле́бное пе́ние, возврати́ в новосозда́нную це́рковь, прославля́ющи Тя́, Пречи́стая, Бо́гу же взыва́ющи: Аллилу́иа.
И́кос 7.
Ди́вна дела́ Твоя́, Влады́чице, и кто́ возмо́жет досто́йно воспе́ти я́, издре́вле бо, я́ко зало́г ми́лости, ико́ну Твою́ оте́честву на́шему дарова́ла еси́ скорбя́щим на утеше́ние, боля́щим во здра́вие и все́м христиа́ном во спасе́ние. Сего́ ра́ди, благода́рни су́ще, на о́браз Тво́й с любо́вию взира́юще, со умиле́нием зове́м:
Ра́дуйся, пу́ть ко спасе́нию на́м указу́ющая; ра́дуйся, ду́ши ве́рных к ти́хому приста́нищу приводя́щая.
Ра́дуйся, пла́ч ма́терей о ча́дех свои́х утиша́ющая; ра́дуйся, ю́ных от растле́ния ми́ра сего́ спаса́ющая.
Ра́дуйся, подвиза́ющихся к Ца́рствию Небе́сному Путеводи́тельнице; ра́дуйся, душепа́губных ересе́й и раско́лов Искорени́тельнице.
Ра́дуйся, мра́к грехо́вный ду́ш на́ших просвеща́ющая; ра́дуйся, у́м на́ш в го́рняя вперя́ющая.
Ра́дуйся, пристра́стие к тле́нному бога́тству от на́с отража́ющая; ра́дуйся, сокро́вище нетле́нное на Небеси́ иска́ти все́х науча́ющая.
Ра́дуйся, моля́щихся Тебе́ и Сы́ну Твоему́ Покро́в и Заступле́ние; ра́дуйся, лю́те стра́ждущим ско́рое Вспоможе́ние.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 8.
Стра́нное чу́до яви́ла еси́, Богоро́дице, не́коей жене́, я́же глу́ха и не́ма су́щи, мимоходя́ше и моля́шеся пред ико́ною Твое́ю. Ты́ же, Милосе́рдая Ма́ти, не презре́вши моле́ния ея́, дарова́ла еси́ слу́х, безгла́сная же уста́ подви́гла еси́ благода́рно воспе́ти Бо́гу: Аллилу́иа.
И́кос 8.
Все́ житие́ на́ше на земли́ боле́знено и вся́кия ско́рби испо́лнено е́сть. Но ве́дуще Тя́, Пречи́стая, ско́рую Помо́щницу и благу́ю Засту́пницу ро́да христиа́нскаго, с ве́рою несумне́нною к Тебе́ прибега́ем и пред ико́ною Твое́ю чудотво́рною сле́зы пролива́ем, во умиле́нии зову́ще си́це:
Ра́дуйся, иере́ев честны́х Благослове́ние; ра́дуйся, и́ноком в по́двизех Поможе́ние.
Ра́дуйся, безма́терних сиро́т любе́зное Воспита́ние; ра́дуйся, отроко́в благода́тное Просвеще́ние.
Ра́дуйся, супру́гом в любви́ Единомы́слие; ра́дуйся, ста́рцем наде́жное Подкрепле́ние.
Ра́дуйся, а́лчущих и жа́ждущих Пита́тельнице; ра́дуйся, о все́х на́с при́сная Моли́твеннице.
Ра́дуйся, благода́тное Утеше́ние все́х скорбя́щих; ра́дуйся, несокруши́мое защище́ние на Тя́ упова́ющих.
Ра́дуйся, в ча́с сме́ртный на́м помога́ющая; ра́дуйся, смире́нным Ца́рствие Небе́сное уготовля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 9.
Все́ естество́ а́нгельское диви́тся Твоему́ неизрече́нному милосе́рдию, Всеми́лостивая Влады́чице, зане́ те́плым Твои́м предста́тельством пред Сы́ном Твои́м ро́д челове́ческий заступа́еши, ве́сь ми́р от бе́д избавля́еши и от ве́чныя сме́рти спаса́еши все́х, с ве́рою к Тебе́ притека́ющих, Бо́гу же вопию́щих: Аллилу́иа.
И́кос 9.
Вети́и боговеща́ннии мно́гая пе́ния соста́виша в че́сть Твою́, Богоро́дице, в ни́хже по достоя́нию просла́виша Тя́ и воспе́ша чудеса́ от ико́н Твои́х явле́нная. Та́кожде и мы́, любо́вию объя́ти су́ще, дерза́ем благода́рственно принести́ Тебе́ похвалы́ сия́:
Ра́дуйся, Влады́чице, ми́лостивая о на́с пред Бо́гом Засту́пнице; ра́дуйся, христиа́ном Помо́щнице и милосе́рдая о гре́шных Предста́тельнице.
Ра́дуйся, Всецари́це, неду́ги на́ша благода́тию исцеля́ющая; ра́дуйся, блага́я Врата́рнице, две́ри ра́йския ве́рным отверза́ющая.
Ра́дуйся, благода́тная Богоро́дице Де́во, поги́бших Взыска́ние и все́х скорбя́щих Ра́досте; ра́дуйся, Ма́ти Де́во всепе́тая, христиа́н Похвало́.
Ра́дуйся, всеблага́я Скоропослу́шнице, проше́ния на́ша во бла́го исполня́ющая; ра́дуйся, неча́янную ра́дость ве́рным да́рующая.
Ра́дуйся, Благода́тная, Купино́ неопали́мая, о́гненнаго запале́ния на́с избавля́ющая; ра́дуйся, Влады́чице, неупива́емая Ча́ше, духо́вную на́шу жа́жду утоля́ющая.
Ра́дуйся, Пречи́стая, от ико́ны Твоея́ ми́лости на́м источа́ющая; ра́дуйся, Обра́дованная, во успе́нии Твое́м на́с не оставля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 10.
Спасти́ хотя́ ро́д челове́ческий, Человеколю́бец Госпо́дь дарова́ на́м Ма́терь Свою́ в покро́в и защище́ние. Те́мже, благода́рни су́ще, на Тя́ наде́емся, Влады́чице, и умиле́нно про́сим: бу́ди на́м всеблага́я Помо́щница, да в ра́дости воспои́м Бо́гу благода́рственную пе́снь: Аллилу́иа.
И́кос 10.
Стена́ необори́мая от ле́т дре́вних яви́лася еси́, Пречи́стая Влады́чице, в стране́ на́шей, излива́ющи чудеса́ и осеня́ющи благода́тною по́мощию христолюби́выя во́ины. Сия́ ве́дуще, благове́рнии кня́зие и вси́ лю́дие со благогове́нием вопия́ху Ти́ си́це:
Ра́дуйся, при́сно о на́с, гре́шных, промышля́ющая; ра́дуйся, в го́ды лю́тых испыта́ний на́с не оставля́ющая.
Ра́дуйся, в пра́вой ве́ре Укрепле́ние; ра́дуйся, наде́ждою спасе́ния Ободре́ние.
Ра́дуйся, Еди́ному Бо́гу рабо́тати науча́ющая; ра́дуйся, за́поведи Бо́жия исполня́ти помога́ющая.
Ра́дуйся, и́щущим спасе́ния пу́ть указу́ющая; ра́дуйся, и благода́ть и́м ниспосыла́ющая.
Ра́дуйся, го́рестная воздыха́ния на́ша утиша́ющая; ра́дуйся, сле́зы с лани́т отира́ющая.
Ра́дуйся, николи́же на́с, гре́шных, забыва́ющая; ра́дуйся, непреста́нно за на́с Христу́ моля́щаяся.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 11.
Пе́ние умиле́нное и благода́рственное прино́сим Ти́, Пречи́стая Влады́чице, я́ко во дни́ гоне́ния безбо́жнаго зе́млю на́шу сохрани́ла еси́. Умоли́, Милосе́рдая Ма́ти, Сы́на Твоего́ и Бо́га на́шего, е́же Це́ркви росси́йстей в ми́ре и благоде́нствии пребыва́ти и огради́ти ю́ от неве́рия, раско́ла и ересе́й, да вси́ еди́ными усты́ и еди́ным се́рдцем сподо́бимся воспева́ти Бо́гу: Аллилу́иа.
И́кос 11.
Светоза́рная Твоя́ ико́на, Всепе́тая Богоро́дице, ю́же дре́вле благове́рный кня́зь Дими́трий на объя́тиях свои́х ноша́ше, и до дне́сь благогове́йно почита́ется в преде́лех земли́ Моско́вския. Ве́рнии бо лю́дие, возжеле́вше благода́ти тоя́ име́ти прича́стие, хра́мы во сла́ву Твою́ созида́ют и пред о́бразом Твои́м взыва́ют си́це:
Ра́дуйся, все́х притека́ющих к Тебе́ ско́рая Услы́шательнице; ра́дуйся, изнемога́ющих от уны́ния и печа́ли блага́я Уте́шительнице.
Ра́дуйся, воздыха́ний на́ших не отверга́ющая; ра́дуйся, смяте́нным душа́м ми́р и поко́й подаю́щая.
Ра́дуйся, на кня́зи и сы́ны челове́ческия наде́ятися на́м возбраня́ющая; ра́дуйся, ко́зни диа́вольския побежда́ти на́м помога́ющая.
Ра́дуйся, я́ко Моско́вскую зе́млю возлюби́ла еси́; ра́дуйся, я́ко хра́мы Гре́бневския в не́й устро́ити благоволи́ла еси́.
Ра́дуйся, Богоро́дских преде́лов ди́вное украше́ние; ра́дуйся, гра́да Одинцо́ва незри́мое охране́ние.
Ра́дуйся, ве́сь на реце́ Кля́зьме ико́ною Твое́ю благослови́вшая; ра́дуйся, все́х на́с Твои́м Покро́вом не оставля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 12.
Благода́ти Твоея́ не лиши́ на́с, Влады́чице, погря́зших в пучи́не беззако́ний и лю́те стра́ждущих. Оба́че всю́ наде́жду на Тя́ возлага́ем и, на о́браз Тво́й со умиле́нием взира́ем, от него́же вси́ скорбя́щии и обремене́ннии грехми́ мно́гими спасе́ние и цельбы́ прие́млют и ра́достно о Тебе́ воспева́ют Всеблаго́му Бо́гу: Аллилу́иа.
И́кос 12.
Пою́ще Твоя́ чудеса́, взира́ем на о́браз Тво́й, Богома́ти. Ты́ бо, десни́цею Младе́нца Христа́ объе́млющи, мо́лишися о на́с, О́н же, мольбы́ Твоя́ прие́мля, ми́лостивно благословля́ет Тя́ в зна́мение Своего́ благоволе́ния. О се́м у́бо удивля́ющеся, с любо́вию вопие́м Ти́ си́це:
Ра́дуйся, Творца́ вся́ческих на руку́ Твое́ю держа́щая; ра́дуйся, о на́с к Нему́ при́сно хода́тайствующая.
Ра́дуйся, Цари́це, Царе́м ца́рствующих избра́нная; ра́дуйся, Влады́чице, Го́сподем госпо́дствующих просла́вленная.
Ра́дуйся, све́том ра́дости ду́ши ободря́ющая; ра́дуйся, грехо́вную мглу́ на́шу разгоня́ющая.
Ра́дуйся, лука́вых духо́в Низложе́ние; ра́дуйся, все́х христиа́н Упова́ние.
Ра́дуйся, Свети́льниче златы́й, не́бо и зе́млю освяща́ющий; ра́дуйся, Же́зле пра́вый, пу́ть к Бо́гу указу́ющий.
Ра́дуйся, неугаси́мая Лампа́до, в нощи́ жития́ на́м светя́щая; ра́дуйся, светови́дная Ле́ствице, к престо́лу Госпо́дню приводя́щая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 13.
О, Всепе́тая Ма́ти, Пречи́стая Де́во, Всеми́лостивая Госпоже́ Богоро́дице, приими́ от на́с, недосто́йных ра́б Твои́х, ма́лое сие́ моле́ние, в простоте́ се́рдца Тебе́ приноси́мое, и изба́ви на́с от вся́кия ско́рби, зо́л и боле́зней, не оста́ви на́с ма́терним Твои́м предста́тельством и Ца́рствия Небе́снаго сподо́би, о Тебе́ вопию́щих: Аллилу́иа.
И́кос 1.
А́нгелов мно́жества и вся́ небе́сная во́инства сла́вят Тя́, Цари́цу Небесе́ и земли́. Просла́ви Тя́, Пречи́стая, и вели́кий кня́зь Дими́трий с во́и ру́сскими, егда́, я́ко победи́тель над нечести́выми ага́ряны, пу́ть сво́й к Первопресто́льному гра́ду соверша́я, в да́р чудотво́рную ико́ну Твою́ от люди́й гра́да Гре́бени прия́т. Те́мже, держа́ ю́ на объя́тиих свои́х, со дерзнове́нием возопи́ Преблагослове́нней:
Ра́дуйся, сре́тением ико́ны Твоея́ ве́рныя ратобо́рцы возвесели́вшая; ра́дуйся, е́ю благослове́ние Первопресто́льному гра́ду дарова́вшая.
Ра́дуйся, ше́ствием Твои́м зе́млю Ру́сскую освяти́вшая; ра́дуйся, к ве́ре христиа́нстей мно́гия лю́ди обрати́вшая.
Ра́дуйся, ага́рянскаго злове́рия Обличе́ние; ра́дуйся, ве́ры Правосла́вныя Утвержде́ние.
Ра́дуйся, с ве́рою прибега́ющим проше́ния исполня́ющая; ра́дуйся, лю́дем правосла́вным при́сно чудоде́ющая.
Ра́дуйся, ско́рая челове́ком Помо́щнице; ра́дуйся, прему́драя ве́рным Наста́внице.
Ра́дуйся, Вели́ких Моско́вских князе́й Покрови́тельнице; ра́дуйся, ро́да христиа́нскаго усе́рдная Засту́пнице.
Ра́дуйся, Чи́стая Отрокови́це, те́плая Предста́тельнице о душа́х на́ших.
Конда́к 1.
Взбра́нней Воево́де и Де́ве Богоро́дице, от все́х родо́в на спасе́ние на́ше избра́нней и, я́ко Ма́тери Христа́, Бо́га на́шего, достодо́лжно ублажа́емей, похва́льное пе́ние, ве́рнии, принесе́м и пред ико́ною Ея́ с наде́ждою и любо́вию моли́тву вознесе́м: изба́ви на́с, Влады́чице, от вра́г ви́димых и неви́димых, да спасе́ннии Тобо́ю воззове́м вси́ ра́достно:
Ра́дуйся, чи́стая Отрокови́це, те́плая Предста́тельнице о душа́х на́ших.
Моли́тва пе́рвая.
О, Цари́це Всеблага́я и те́плая Засту́пнице! К Тебе́, еди́ней на́шей Наде́жди и Упова́нию, прекло́ньше коле́на, приле́жно мо́лимся: услы́ши проше́ния на́ша, из глубины́ се́рдца Тебе́ приноси́мая и бу́ди на́м, блужда́ющим по распу́тиям ско́рбныя жи́зни, ве́рная ко спасе́нию Путеводи́тельница.
О, держа́вная Засту́пнице! Ты́ дре́вле князе́м ру́сским была́ еси́ во бра́нех Вспоможе́ние и на враги́ Одоле́ние, мно́гажды зе́млю на́шу от наше́ствия иноплеме́нных сохраня́ющи и лю́ди ру́сския спаса́ющи. Ны́не же, пред святы́м о́бразом Твои́м предстоя́ще, усе́рдное благодаре́ние прино́сим и те́пле мо́лимся: заступа́й и на бу́дущее вре́мя зе́млю Ру́сскую, умилосе́рдися о на́с, в суете́ жи́знь свою́ провожда́ющих, и прости́ недосто́йных, водвори́ в душа́х на́ших ми́р и тишину́, егда́ же пости́гнет искуше́ние, помози́ прия́ти е́, я́ко вразумле́ние, па́че же принести́ и́стинныя плоды́ покая́ния.
О, Пречи́стая Богоро́дице! Да́руй па́стырем Це́ркве ре́вность и благоче́стие, прави́телем му́дрость и правосу́дие, во́ином му́жество и кре́пость и все́м лю́дем, я́же ко спасе́нию поле́зная. В ча́с же кончи́ны на́шея отжени́ от на́с духо́в зло́бы поднебе́сных, и́щущих поги́бели на́шея, и сподо́би, Всеми́лостивая Влады́чице, непреткнове́нно проити́ возду́шная мыта́рства и дости́гнути Ца́рства Небе́снаго, иде́же вси́ святи́и вку́пе с Тобо́ю прославля́ют Триеди́наго Бо́га Отца́, и Сы́на, и Свята́го Ду́ха во ве́ки веко́в. Ами́нь.
Моли́тва втора́я.
О пречу́дная и превы́шшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти, пречи́стая Одиги́трие Мари́е! услы́ши на́с гре́шных и недосто́йных в ча́с се́й моля́щихся и припа́дающих к Твоему́ пречи́стому о́бразу со слеза́ми и умиле́нно глаго́лющих: изведи́ на́с от ро́ва страсте́й, Влады́чице Преблага́я, изба́ви на́с от вся́кия ско́рби и печа́ли, огради́ от вся́кия напа́сти и злы́я клеветы́, и от непра́веднаго и лю́таго наве́та вра́жия. Мо́жеши бо, о благода́тная Ма́ти на́ша от вся́каго зла́ сохрани́ти лю́ди Твоя́ и вся́ким благодея́нием снабди́ти и спасти́: ра́зве Тебе́ ины́я Предста́тельницы в бе́дах и обстоя́ниих, и те́плыя Хода́таицы о на́с, гре́шных, не и́мамы. Умоли́, Госпоже́ пресвята́я, Сы́на Твоего́ Христа́ Бо́га на́шего, да удосто́ит на́с Ца́рствия Небе́снаго: сего́ ра́ди всегда́ сла́вим Тя́, я́ко вино́вницу спасе́ния на́шего, и превозно́сим свято́е и великоле́пное и́мя Отца́ и Сы́на и Свята́го Ду́ха, в Тро́ице сла́вимаго и поклоня́емаго Бо́га, во ве́ки веко́в. Ами́нь.