Конда́к 1.

Избра́нней от все́х родо́в, Бо́жией ма́тери и Цари́це пред пречи́стым Ея́ о́бразом, со умиле́нием хвале́бная пе́ния прино́сим: Ты́ же, я́ко иму́щая к ро́ду христиа́нскому милосе́рдие неизрече́нное, от бе́д и скорбе́й изба́ви все́х на́с Тебе́ зову́щих:

Ра́дуйся, Неве́сто Неневе́стная.

И́кос 1.

Арха́нгелов и А́нгелов чи́ни благогове́йно Тебе́ слу́жат и вся́ Небе́сныя Си́лы немо́лчными гла́сы Тя́, Богоро́дице Де́во, воспева́ют, я́ко ро́ждшую небе́сных во́инств Царя́: мы́ же земноро́днии, со тре́петом предстоя́ще чудотво́рному ли́ку Твоему́ бре́нными устна́ми вопие́м Ти́ си́це:

Ра́дуйся, от все́х родо́в ко искупле́нию ро́да на́шего избра́нная; ра́дуйся, Ду́ха Свята́го дарова́ний преиспо́лненная.

Ра́дуйся, Херуви́мов и Серафи́мов превозше́дшая; ра́дуйся, та́инству спасе́ния ро́да челове́ческаго послужи́вшая.

Ра́дуйся, свято́е вмести́лище Сло́ва Бо́жия; ра́дуйся, неопи́санное Сло́во О́тчее в ложесна́х Свои́х носи́вшая.

Ра́дуйся, проро́ческих глаго́лов нело́жное исполне́ние; ра́дуйся, вину́ прароди́телей ро́да на́шего рождество́м Твои́м искупи́вшая.

Ра́дуйся, предста́тельство ро́ду христиа́нскому от Бо́га дарова́нное; ра́дуйся, спасе́ния ро́да челове́ческаго нача́ло.

Ра́дуйся, ле́ствице Боже́ственнаго снисхожде́ния; ра́дуйся, мо́сте от земли́ к небеси́ земноро́дных возводя́й.

Ра́дуйся, Неве́сто Неневе́стная.

Конда́к 2.

Ви́дящи Пречи́стая с высоты́ небе́снаго жили́ща Своего́, иде́же с Сы́ном Свои́м во сла́ве пребыва́ет, озлобле́ние проти́ву святы́нь христиа́нских во стране́ Грузи́нстей, попуще́нием Бо́жиим во дни́ о́ны бы́вшее от Пе́рсскаго царя́ Абба́са, Грузи́нскую страну́ разори́вшаго и хра́мы Ея́ христиа́нския оскверни́вшаго, и храня́щи святу́ю ико́ну от такова́го поруга́ния, страны́ Росси́йския му́жу ве́рну и благогове́йну Стефа́ну, благопромысли́тельне ве́дати ю́ вспомоществова́ла еси́, Влады́чице. Стяжа́в у́бо се́й ве́рный ра́б святы́ню Твою́, во умиле́нии се́рдца, возопи́ Бо́гу: Аллилу́иа.

И́кос 2.

Разуме́ти хотя́ благогове́йный му́ж Гео́ргий недоуме́нную та́йну открове́ния Твоего́, Влады́чице, о не́коем безце́ннем би́сере, приста́вником име́ния его́ во стране́ Перси́дстей приобрете́ннем, с Патриа́рхом Филаре́том совеща́шеся. Мы́ же та́инственному вразумле́нию Преблагослове́нныя, свы́ше ве́рным рабо́м подава́емому, дивя́щеся, благогове́йно вопие́м к Не́й:

Ра́дуйся, сокрове́нныя та́йны благода́ти Бо́жия ве́рным открыва́ющая; ра́дуйся, устна́ми правосла́вных хвалу́ Бо́гови соверша́ющая.

Ра́дуйся, неве́рных ага́рян, святы́ню Твою́ презре́вших, посрамля́ющая; ра́дуйся, сла́вою чуде́с Твои́х ве́рных смы́слы озаря́ющая.

Ра́дуйся, почита́нию святы́х ико́н на́с наставля́ющая; ра́дуйся, Христо́ву ве́ру во стране́ на́шей утвержда́ющая.

Ра́дуйся, оби́тель и́ноков Кра́сныя Горы́ святы́м Твои́м о́бразом освяща́ющая; ра́дуйся, де́нь принесе́ния честны́я Твоея́ ико́ны исцеле́нием и́нока зна́меновавшая.

Ра́дуйся, безце́нный би́сер, святу́ю Твою́ ико́ну, я́коже рекла́ еси́, на́м дарова́вшая; ра́дуйся, безце́нный би́сер, Христа́, на спасе́ние на́ше ро́ждшая.

Ра́дуйся, честны́м Твои́м о́бразом страну́ на́шу посети́вшая; ра́дуйся, ми́рную оби́тель и́ноков неотъе́млемым бога́тством обогати́вшая.

Ра́дуйся, Неве́сто Неневе́стная.

Конда́к 3.

Си́ла Вы́шняго осеня́ет вы́ну с ве́рою притека́ющих к держа́вному покро́ву Твоему́, Влады́чице, и благогове́йно чту́щих чудотво́рную ико́ну Твою́, Богома́ти: е́й бо даде́ся благода́ть от Бо́га вся́к неду́г и вся́ку я́зю в лю́дех врачева́ти, те́мже благода́рственно вопие́м Бо́гу: Аллилу́иа.

И́кос 3.

Име́ющи промышле́ние те́плое о лю́дех страны́ зи́мния полу́нощи, Го́ру Кра́сную под кро́в Тво́й, Богома́ти, прия́ла еси́, и оби́тели и́ноков тоя́ честны́й о́браз Тво́й ми́лостивно дарова́ла еси́: да зря́ще то́ки чуде́с, преизоби́льно на моля́щихся Тебе́ с ве́рою излива́емыя, во умиле́нии, вопию́т Тебе́, Влады́чице:

Ра́дуйся, смире́нную оби́тель и́ноков Кра́сныя Горы́ держа́вным покро́вом Твои́м осеня́ющая; ра́дуйся, чудеса́ми от святы́я Твоея́ ико́ны Го́ру Кра́сную прославля́ющая.

Ра́дуйся, подо́бие благода́тнаго Афо́на во стране́ зи́мней полу́нощи яви́вшая; ра́дуйся, Го́ру Кра́сную житию́ и́ноческому чу́дно указа́вшая.

Ра́дуйся, в щи́т и огражде́ние ме́ста того́ цельбоно́сную ико́ну Твою́ дарова́вшая; ра́дуйся, посели́вшимся на се́й святе́й горе́ и́ноком оби́тель ти́хую созда́вшая.

Ра́дуйся, житие́ чи́на и́ноческаго во спасе́ние ду́ш устроя́ющая; ра́дуйся, все́м хотя́щым улучи́ти спасе́ние спобо́рствующая.

Ра́дуйся, Кра́сную Го́ру и обита́ющих на не́й благода́тным Твои́м омофо́ром покрыва́ющая; ра́дуйся, притека́ющих к Твоему́ покро́ву и заступле́нию не оставля́ющая.

Ра́дуйся, сла́бых на пути́ доброде́тели укрепля́ющая; ра́дуйся, заблу́ждших на пу́ть и́стинный наставля́ющая.

Ра́дуйся, Неве́сто Неневе́стная.

Конда́к 4.

Бу́рю вну́трь име́я помышле́ний сумни́тельных слепе́ц Питири́м, егда́ озаре́н бе́ сия́нием све́та, я́ко со́лнечным, смяте́ся и стра́хом обдержи́м бе́, мня́ше о се́м, я́ко о наважде́нии бесо́встем: мно́га бо ле́та сле́п бе́, с моли́твою зна́мение креста́ сотвори́, обра́щься ко хра́му и узре́ чу́дную Твою́, Влады́чице, ико́ну, светоза́рными луча́ми во хра́ме блиста́вшую, а́бие уразуме́, я́ко отверзо́шася о́чи его́ и слу́х его́ откры́ся, благода́рственное прине́с Бо́гу, ди́вному в де́лех, пе́ние: Аллилу́иа.

И́кос 4.

Слы́шав благове́рный ца́рь всея́ Росси́и Алекси́й, я́ко от святы́я ико́ны Твоея́, Влады́чице, я́же на Горе́ Кра́сней, цельбы́ многоразли́чных неду́г оби́льно подаю́тся, даде́ повеле́ние игу́мену оби́тели по градо́м и ве́сем вели́кия держа́вы своея́ с че́стию подоба́ющею ю́ обноси́ти: да прие́млют стра́ждущии врачество́ неду́гов теле́сных и душе́вных и во умиле́нии серде́ц взыва́ют Тебе́, Влады́чице:

Ра́дуйся, Христа́ Бо́га на́шего освяще́нный хра́ме; ра́дуйся, неизрече́нныя Его́ сла́вы вмести́лище.

Ра́дуйся, Царя́ ца́рствующих одушевле́нный гра́де; ра́дуйся, пала́то и черто́же Небе́сный.

Ра́дуйся, Це́ркви правосла́вныя похвало́; ра́дуйся, держа́вы Росси́йския кре́посте и утвержде́ние.

Ра́дуйся, градо́в и ве́сей на́ших благода́тное охране́ние; ра́дуйся, все́х христиа́н, к Тебе́ притека́ющих, непосты́дное упова́ние.

Ра́дуйся, от все́х родо́в досто́йно ублажа́емая; ра́дуйся, все́х на́с от бе́д и скорбе́й прише́ствием честна́го Твоего́ о́браза избавля́ющая.

Ра́дуйся, су́щих в стра́нствии ко взыска́нию го́рняго гра́да направля́ющая; ра́дуйся, Путеводи́тельнице на́ша к ве́чным оби́телем.

Ра́дуйся, Неве́сто Неневе́стная.

Конда́к 5.

Боготе́чней звезде́ подо́бна яви́ся Твоя́, Богома́ти, ико́на, по во́ли Твое́й святе́й от восто́ка на саму́ю полу́нощь принесе́нная, ю́же, я́ко да́р небе́сный, восприе́мше и́ноцы Красного́рстии, поста́виша в собо́рную це́рковь оби́тели, и в весе́лии поя́ху благи́х пода́телю Бо́гу: Аллилу́иа.

И́кос 5.

Ви́дящи среброковача́ Гаврии́ла, зе́льне пла́чуща пред Твои́м чудотво́рным о́бразом, Влады́чице, я́коже бо тогда́ умилосе́рдися, сы́на его́ на одре́ боле́зни лежа́ща воздви́гла и здра́ва сотвори́ла еси́, си́це и о мне́ умилосе́рдися, Преблагослове́нная Богоро́дице, и грехми́ умерщвле́нную мою́ ду́шу воскреси́, зову́щу:

Ра́дуйся, Ма́ти Царя́ живота́ и Победи́теля сме́рти; ра́дуйся, благоволе́ние Сы́на Твоего́, Христа́ Бо́га на́шего, на́м стяжа́вшая.

Ра́дуйся, све́тлыми луча́ми чуде́с от святы́я Твоея́ ико́ны страну́ Росси́йскую озаря́ющая; ра́дуйся, бога́тыя да́ры исцеле́ний и ми́лости прося́щим Тя́ пред чу́дною Твое́ю ико́ною источа́ющая.

Ра́дуйся, моле́ния на́ша, приноси́мая Тебе́ с ве́рою и любо́вию ми́лостивно прие́млющая; ра́дуйся, теле́сныя неду́ги ве́рно почита́ющих Тя́ ско́ро исцеля́ющая.

Ра́дуйся, печа́ль на́шу в ра́дость претворя́ющая; ра́дуйся, от сле́з и скорбе́й на́с избавля́ющая.

Ра́дуйся, ско́рбных о ча́дех роди́телей утеше́ние; ра́дуйся, ча́д и́х благода́тное охране́ние и спасе́ние.

Ра́дуйся, покро́ве на́м в животе́ и по сме́рти; ра́дуйся, спасе́ние на́ше на пра́ведном суде́ Бо́жием.

Ра́дуйся, Неве́сто Неневе́стная.

Конда́к 6.

Пропове́дника творя́щи купца́ Гео́ргия во́ли Своея́, рекла́ еси́ к нему́, Влады́чице: приста́вник име́ния твоего́ Стефа́н, сы́й в Перси́де, купи́ тебе́ безце́нный би́сер, егда́ же принесе́т к тебе́, ты́ посли́ о́ный в Дви́нскую о́бласть, на Чермну́ю го́ру. Позна́в у́бо о се́м Гео́ргий Твое́, Пречи́стая, к ме́сту тому́ осо́бое благоволе́ние, воспряну́ воспе́ти к ро́ждшемуся от Тебе́ Бо́гу: Аллилу́иа.

И́кос 6.

Возсия́ла сла́ва Бо́жия на святе́й Горе́ Кра́сней от пречу́дныя Твоея́ ико́ны, Богома́ти, пред не́юже предстоя́ще, со умиле́нием мо́лимся Ти́, услы́ши на́с, вопию́щих Тебе́ усе́рдно:

Ра́дуйся, Го́ру полу́нощную прише́ствием чудотво́рнаго Твоего́ о́браза осени́вшая; ра́дуйся, чуде́с неоскудева́ющий исто́чник на не́й яви́вшая.

Ра́дуйся, милосе́рдие и любо́вь Твою́ к оби́тели и́ноков показа́вшая; ра́дуйся, благо́е о не́й промышле́ние Свое́ яви́вшая.

Ра́дуйся, теле́сныя неду́ги на́ша врачу́ющая; ра́дуйся, в душе́вных ско́рбех на́с утеша́ющая.

Ра́дуйся, благоче́стия Наста́внице; ра́дуйся, и́ноческаго жития́ Руководи́тельнице.

Ра́дуйся, до́брыя ко спасе́нию ду́ш обе́ты прие́млющая; ра́дуйся, благи́м наме́рением и начина́нием на́шим спосо́бствующая.

Ра́дуйся, злы́я от наважде́ния врага́ быва́емая по́мыслы от на́с отгоня́ющая; ра́дуйся, вра́жия ко́зни, я́ко паучи́ну, расторга́ющая.

Ра́дуйся, Неве́сто Неневе́стная.

Конда́к 7.

Хотя́ да́ти благослове́ние новоустро́енней оби́тели и́ноков, Раи́фской нарече́нней, Архипа́стырь Каза́нский Лавре́нтий, ли́к Тво́й, Влады́чице, от чудотво́рнаго Твоего́ Красного́рскаго о́браза тожде́ственно списа́в, торже́ственно с моле́бным пе́нием, во оби́тель Раи́фскую внесе́. Свиде́телем же бы́в соверши́вшихся от сея́ святы́я Твоея́, Влады́чице, ико́ны зна́мений и чуде́с, ра́достно возопи́ Бо́гу: Аллилу́иа.

И́кос 7.

Но́вую купе́ль Силоа́мскую зри́м, Пречи́стая Богоро́дице, хра́м Тво́й, и́же в Раи́фе: вся́к бо неду́г и вся́ку я́зю душе́вную и теле́сную врачу́еши с ве́рою и любо́вию к Тебе́ притека́ющих и благогове́йно чту́щих и лобыза́ющих святы́й о́браз Тво́й. Сего́ ра́ди, иму́ще но́вое неизрече́нное сокро́вище Твои́х ми́лостей, ра́достно вопие́м Ти́, Пречи́стая:

Ра́дуйся, купе́ль, в не́йже душе́вныя неду́ги на́ша, врачу́ются; ра́дуйся, исто́чниче жа́ждущим во́ду жи́зни источи́вший.

Ра́дуйся, слепы́м теле́сныма очи́ма зре́ние подава́ющая; ра́дуйся, глухи́м слу́х отверза́ющая.

Ра́дуйся, разсла́бленныя те́лом укрепля́ющая; ра́дуйся, лежа́щыя на одре́ боле́зней возставля́ющая.

Ра́дуйся, пла́вающыя по вода́м от бу́рь и потопле́ния спаса́ющая; ра́дуйся, вла́ющияся в пучи́не жите́йскаго мо́ря к ти́хому приста́нищу спасе́ния направля́ющая.

Ра́дуйся, ору́жие, и́мже устраша́ются полки́ де́монския; ра́дуйся, щи́те, и́мже покрыва́ются оби́тели и́ноков.

Ра́дуйся, ти́хое пустынножи́телей весе́лие; Ра́дуйся, ти́хое обурева́емых в се́м ве́це приста́нище.

Ра́дуйся, Неве́сто Неневе́стная.

Конда́к 8.

Стра́нно слы́шати и неудо́бно разуме́ти злы́м неве́рием омраче́нным, ка́ко от святы́х ико́н Твои́х, Влады́чице, зна́мения и чудеса́ быва́ют: на́м же те́пле ве́рующим словеси́, Тобо́ю к первоначерта́нней благове́стником ева́нгельских та́ин святе́й ико́не рече́нному: благода́ть ро́ждшагося от Мене́ и Моя́ с си́м о́бразом да бу́дет, удо́бно е́сть разуме́ти и пра́ведно упова́ти, я́ко и со свято́ю Твое́ю ико́ною, «Грузи́нскою», благода́ть Твоя́ и си́ла пребыва́ет вы́ну: сего́ ра́ди с благогове́йным стра́хом предстоя́ще, чте́м и воздае́м е́й че́сть, я́ко Тебе́ са́мой, на́м прису́щей, ра́достно пою́ще Бо́гу: Аллилу́иа.

И́кос 8.

Вся́ при́сно горе́ су́щи и с Небе́сными Си́лами вы́ну пребыва́ющи, на́с земноро́дных не оставля́еши, Богома́ти, те́плым предста́тельством пред Сы́ном и Бо́гом Твои́м: ма́тернее бо дерзнове́ние к Нему́ и́маши. Сего́ ра́ди предстоя́ще пречи́стому Твоему́ о́бразу, со слеза́ми покая́ния вопие́м ти́, Богороди́тельнице:

Ра́дуйся, Путеводи́тельнице ве́рная, к небе́сному оте́честву до́бре на́с направля́ющая; ра́дуйся, Ма́ти Царя́ небеси́ и земли́, врата́ ра́йския на́м отверза́ющая.

Ра́дуйся, Домострои́тельнице, житие́ на́ше к небе́сному устроя́ющая; ра́дуйся, ве́чная бла́га Сы́на Твоего́ на́м явля́ющая.

Ра́дуйся, от скорбе́й и бе́д зде́ на́с спаса́ющая; ра́дуйся, ве́чных му́к и огня́ гее́нскаго по сме́рти на́с избавля́ющая.

Ра́дуйся, все́х притека́ющих с ве́рою и любо́вию к Тебе́ сугу́бо ми́лующая; ра́дуйся, моли́твы на́ша, приноси́мыя Тебе́ пред чудотво́рным Твои́м о́бразом, ко престо́лу Сы́на Твоего́ и Бо́га на́шего вознося́щая.

Ра́дуйся, блага́я на́ша Помо́щнице; ра́дуйся, непосты́дное на́ше упова́ние и ве́рное спасе́ние.

Ра́дуйся, Неве́сто Неневе́стная.

Конда́к 9.

Вся́каго естества́ Арха́нгельскаго и А́нгельскаго Превы́сшая, Херуви́м и Серафи́м Честне́йшая, Пресвята́я Де́во, Бо́га бо Царя́ Небе́сных Си́л Невмести́маго во утро́бе Свое́й вмести́ла еси́, Нося́щаго ве́сь ми́р дла́нию на рука́х носи́ла еси́, и вся́кое естество́ Пита́ющаго млеко́м пита́ла еси́: те́мже вои́стину Ма́терь Бо́жию и Хода́таицу ро́да христиа́нскаго Тя́ ве́дуще, со дерзнове́нием вопие́м Бо́гу: Аллилу́иа.

И́кос 9.

Вети́и многовеща́нныя не ве́дят ки́ими словесы́ благохва́льными подоба́ет велича́ти Тя́, Богома́ти, по достоя́нию, недоуме́ет бо вся́к язы́к досто́йно пе́ти Тя́, Богоро́дице: оба́че, Блага́я су́щи, приими́ ми́лостивно, а́ще и немощны́ми смы́слы сложе́нная, но от чи́стаго се́рдца приноси́мая Тебе́ в похвалу́ сицева́я пе́ния:

Ра́дуйся, пренепоро́чная Отрокови́це, преве́чным сове́том ко спасе́нию ро́да на́шего избра́нная; ра́дуйся, Же́но, Ея́же се́мя сокруши́ главу́ дре́вняго зми́я.

Ра́дуйся, в жена́х Преблагослове́нная; ра́дуйся, благода́ть у Бо́га обре́тшая.

Ра́дуйся, Арха́нгельское веща́ние о воплоще́нии Еди́наго от Святы́я Тро́ицы смире́нно прия́вшая; ра́дуйся, кро́ткая раба́ Госпо́дня.

Ра́дуйся, сосу́де, Ду́хом Бо́жиим освяще́нный; ра́дуйся, си́лою Всевы́шняго осене́нная.

Ра́дуйся, Спаси́теля на́ших ду́ш ро́ждшая; ра́дуйся, па́дший ро́д на́ш с правосу́дием Бо́жиим примири́вшая.

Ра́дуйся, Еде́м затворе́нный рождество́м Твои́м ми́ру отве́рзшая; ра́дуйся, от плене́ния а́да рождество́м Твои́м свободи́вшая.

Ра́дуйся, Неве́сто Неневе́стная.

Конда́к 10.

Спасти́ хотя́щи мно́гия лю́ди от бе́д и скорбе́й, всю́ду явля́еши, Богома́ти, ро́ду на́шему неоскудева́емый от своея́ ико́ны «Грузи́нския» исто́чник ми́лости. Красного́рскую бо оби́тель от запале́ния о́гненнаго во дни́ о́ны неврежде́нну сохрани́ла еси́, угаси́вши свире́пеющую о́крест ея́ си́лу о́гненную, в ца́рствующем же гра́де Москве́ и в пусты́ни Раи́фстей благода́ти струи́ от ико́ны Твоея́ источа́еши все́м, с ве́рою покланя́ющымся Тебе́, и во ины́х граде́х и ве́сех на́ших чту́щым Тя́ поле́зное подае́ши. Те́мже, прославля́юще Бо́га, дарова́вшаго на́м о Тебе́ благода́ть такову́ю, при́сно вопие́м Ему́: Аллилу́иа.

И́кос 10.

Стена́ еси́ кре́пкая, Богоро́дице Де́во, оби́тели Красного́рския и пусты́ни Раи́фския огра́да несокруши́мая, чи́ну же и́ноческому украше́ние и сла́ва. Сего́ ра́ди, моля́щеся, вопие́м Ти́, Пречи́стая: покры́й с ве́рою покланя́ющыяся Тебе́ пред Твои́м чудотво́рным о́бразом от бе́д и скорбе́й, с любо́вию Тебе́ вопию́щих:

Ра́дуйся, кре́пкая от находя́щих на ны́ напа́стей и бе́д Храни́тельнице; ра́дуйся, оби́телей и́ноческих неусы́пная Блюсти́тельнице.

Ра́дуйся, от свире́пеющаго пла́мене, во дни́ о́ны, оби́тель Красного́рскую, по те́плому моле́нию и́ноков, ди́вно сохрани́вшая; ра́дуйся, благорастворе́ние возду́хов и спаси́тельный до́ждь благовре́менно то́й ниспосла́вшая.

Ра́дуйся, жития́ чи́на и́ноческаго украше́ние и добро́то; ра́дуйся, в бу́рю искуше́ний и бе́д на́с спаса́ющая.

Ра́дуйся, помышле́ния на́ши освяща́ющая; ра́дуйся, сердца́ на́ша очища́ющая.

Ра́дуйся, душегуби́тельный пла́мень страсте́й на́ших угаша́ющая; ра́дуйся, мра́к сатани́нских искуше́ний разсеява́ющая.

Ра́дуйся, житию́ на́шему благослове́ние Бо́жие низводя́щая; ра́дуйся, мы́сленная очеса́ на́ша к го́рним оби́телем направля́ющая.

Ра́дуйся, Неве́сто Неневе́стная.

Конда́к 11.

Пе́ние хвале́бное прино́сят Ти́, Влады́чице, лю́дие богоспаса́емаго гра́да Арха́нгельска, егда́ гра́д и́х еди́ною в ле́то освяща́ется прише́ствием Твоего́ чудотво́рнаго о́браза, и со свети́льники и кади́льницы гряду́ще во сре́тение его́, ра́достно вопию́т Бо́гу: Аллилу́иа.

И́кос 11.

Светоза́рными луча́ми чуде́с ико́ны Твоея́, Влады́чице, на святе́й Горе́ Кра́сней немерца́емо сия́ет и Росси́йскую страну́ на́шу правосла́вную благода́тно озаря́ет, прогоня́юще вся́кое те́мное де́йство вра́жие си́лою Бо́жиею, побужда́ющи на́с пред не́ю Тебе́, Богоизбра́нная Отрокови́це, хвале́бная пе́ния возноси́ти:

Ра́дуйся, на пути́ на́шего спасе́ния неугаси́мый свети́льниче ве́ры и благоче́стия; ра́дуйся, луче́ незаходи́маго со́лнца.

Ра́дуйся, немерца́ющая во стране́ на́шей правосла́вия звездо́; ра́дуйся, доброде́тели пу́ть освеща́ющая.

Ра́дуйся, заре́, со́лнце пра́вды явля́ющая; ра́дуйся, све́те, мра́к неве́дения отгоня́ющая.

Ра́дуйся, купино́ неопали́мая, Бо́га яви́вшая; ра́дуйся, престо́ле о́гненный Вседержи́теля.

Ра́дуйся, чистоты́ сокро́вище; ра́дуйся, цве́те неувяда́емыя сла́вы.

Ра́дуйся, Вы́шняго освяще́нное Боже́ственное селе́ние; ра́дуйся, я́ко Тобо́ю даде́ся ра́дость все́м, Тя́, Богоро́дице, зову́щым.

Ра́дуйся, Неве́сто Неневе́стная.

Конда́к 12.

Благода́ти Твоея́ никогда́же оскудева́ющия неизсяка́емый исто́чник яви́ла еси́, Богороди́тельнице, чудотво́рную Твою́ ико́ну, от нея́же вси́ скорбя́щии и обремене́ннии грехи́ мно́гими спасе́ние и цельбы́ во вся́ времена́ прие́млют и ра́достно о Тебе́ воспева́ют всеблаго́му Бо́гу: Аллилу́иа.

И́кос 12.

Пою́ще Твоя́ пресла́вная чудеса́, Богома́ти, от святы́я Твоея́ ико́ны неоску́дно на́м подава́емая, и вся́ упова́ния на́ша на Тя́, Засту́пнице, возлага́юще, со умиле́нием вопие́м Ти́:

Ра́дуйся, непосты́дное христиа́н упова́ние в бу́дущем ве́це; ра́дуйся, в де́лании за́поведей Сы́на Твоего́ пребыва́ющих спаса́ющая.

Ра́дуйся, в животе́ се́м на́с во здра́вии сохраня́ющая; ра́дуйся, в стра́шный ча́с сме́рти на́с не оставля́ющая.

Ра́дуйся, ве́рным рабо́м Твои́м христиа́нскую кончи́ну устроя́ющая; ра́дуйся, на суде́ пра́веднем Сы́на Твоего́ ве́рным слуга́м Твои́м вожделе́нный гла́с Его́ слы́шати сподобля́ющая.

Ра́дуйся, все́м хотя́щим спасти́ся и в ра́зум и́стины приити́ Блага́я Одиги́трие; ра́дуйся, все́х, в сокруше́нии серде́чнем ка́ющихся гре́шников, несомне́нное спасе́ние.

Ра́дуйся, Рождество́м Твои́м две́ри рая́ ми́ру отве́рзшая; ра́дуйся, земноро́дных с небе́сными к ве́чному весе́лию сочета́вшая.

Ра́дуйся, от А́нгел при́сно воспева́емая; ра́дуйся, и от земноро́дных досто́йно ублажа́емая.

Ра́дуйся, Неве́сто Неневе́стная.

Конда́к 13.

О, всепе́тая Ма́ти, Пресвята́я Госпоже́, Де́во Богоро́дице, не отри́ни сие́ ма́лое моле́ние на́ше, смире́нно приноси́мое Тебе́ ны́не пред чудотво́рным о́бразом Твои́м, презира́ющи бе́здну грехо́в на́ших: изба́ви все́х на́с от бе́д и скорбе́й в животе́ се́м и гряду́щия ве́чныя изми́ му́ки нелицеме́рно о Тебе́ вопию́щих Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгелов и А́нгелов чи́ни благогове́йно Тебе́ слу́жат и вся́ Небе́сныя Си́лы немо́лчными гла́сы Тя́, Богоро́дице Де́во, воспева́ют, я́ко ро́ждшую небе́сных во́инств Царя́: мы́ же земноро́днии, со тре́петом предстоя́ще чудотво́рному ли́ку Твоему́ бре́нными устна́ми вопие́м Ти́ си́це:

Ра́дуйся, от все́х родо́в ко искупле́нию ро́да на́шего избра́нная; ра́дуйся, Ду́ха Свята́го дарова́ний преиспо́лненная.

Ра́дуйся, Херуви́мов и Серафи́мов превозше́дшая; ра́дуйся, та́инству спасе́ния ро́да челове́ческаго послужи́вшая.

Ра́дуйся, свято́е вмести́лище Сло́ва Бо́жия; ра́дуйся, неопи́санное Сло́во О́тчее в ложесна́х Свои́х носи́вшая.

Ра́дуйся, проро́ческих глаго́лов нело́жное исполне́ние; ра́дуйся, вину́ прароди́телей ро́да на́шего рождество́м Твои́м искупи́вшая.

Ра́дуйся, предста́тельство ро́ду христиа́нскому от Бо́га дарова́нное; ра́дуйся, спасе́ния ро́да челове́ческаго нача́ло.

Ра́дуйся, ле́ствице Боже́ственнаго снисхожде́ния; ра́дуйся, мо́сте от земли́ к небеси́ земноро́дных возводя́й.

Ра́дуйся, Неве́сто Неневе́стная.

Конда́к 1.

Избра́нней от все́х родо́в, Бо́жией ма́тери и Цари́це пред пречи́стым Ея́ о́бразом, со умиле́нием хвале́бная пе́ния прино́сим: Ты́ же, я́ко иму́щая к ро́ду христиа́нскому милосе́рдие неизрече́нное, от бе́д и скорбе́й изба́ви все́х на́с Тебе́ зову́щих:

Ра́дуйся, Неве́сто Неневе́стная.

Моли́тва пе́рвая.

Приими́, всеблагомо́щная Пречи́стая Госпоже́ Влады́чице Богороди́тельнице, сия́ честны́я да́ры от на́с, недосто́йных рабо́в Твои́х, к Твоему́ цельбоно́сному о́бразу пе́ние возсыла́ющих со умиле́нием, я́ко Тебе́ Само́й су́щей ту́ и послу́шающей моле́ния на́ша и подаю́щей с ве́рою прося́щым по коему́ждо проше́нию и исполне́ние: скорбя́щым ско́рби облегча́еши, немощны́м здра́вие да́руеши, разсла́бленных и неду́жных исцеля́еши и от бе́сных бе́сы прогоня́еши, оби́димыя от оби́д избавля́еши, и наси́луемых спаса́еши, гре́шных проща́еши, прокаже́нных очища́еши и ма́лых дете́й ми́луеши, и непло́дныя от непло́дства разреша́еши. Еще́, Госпоже́ Влады́чице, от у́з и темни́ц свобожда́еши и вся́кия многоразли́чныя стра́сти исцеля́еши и о́чныя боле́зни врачу́еши и от смертоно́сныя я́звы избавля́еши: вся́ бо возмо́жна су́ть хода́тайством Твои́м к Сы́ну Твоему́, Христу́ Бо́гу на́шему. О Всепе́тая Ма́ти, пречи́стая Богоро́дице! не преста́й моли́ти о на́с, недосто́йных рабе́х Твои́х, сла́вящих Тя́ и почита́ющих, и поклоня́ющихся пречи́стому о́бразу Твоему́ и наде́жду иму́щих невозвра́тну, и ве́ру несумне́нну, к Тебе́, Присноде́ве, пресла́вней и непоро́чней, сла́вящих и чту́щих и пою́щих тя́ во ве́ки веко́в. Ами́нь.

Моли́тва втора́я.

К Тебе́, Богоизбра́нная Отрокови́це, пресвята́я Де́во Богоро́дице, Небесе́ и земли́ Цари́це, припа́дающе вопие́м: услы́ши моле́ний на́ших гла́с и не отврати́ лица́ Твоего́ от на́с, недосто́йных. Приими́, Всеблага́я, от недосто́йных ра́б Твои́х, чту́щих всече́стное и́мя Твое́, и с ве́рою покланя́ющихся Тебе́ пред чудотво́рным Твои́м о́бразом, приноси́мое ны́не те́плое моле́ние на́ше: вознеси́ е́ к Престо́лу Сы́на Твоего́, Христа́ Бо́га на́шего, да ми́лостив бу́дет к непра́вдам на́шым и не возда́ст на́м по дело́м на́шим, но да проба́вит щедро́ты Своя́. Ве́мы, я́ко не́смы досто́йни, по грехо́м на́шым, от Него́ поми́ловани бы́ти, а́ще не Ты́, Влады́чице, умо́лиши Его́ о на́с: вся́ бо мо́жеши испроси́ти у Него́, ма́тернее бо к нему́ и́маши дерзнове́ние. Сего́ ра́ди к Тебе́, я́ко всемо́щней и всеблаго́й Засту́пнице на́шей прибега́ем, усе́рдно моля́щеся: испроси́ у ро́ждшагося от Тебе́ единоро́днаго Сы́на Бо́жия, Христа́ Бо́га на́шего, все́м на́м в святооте́честей правосла́вной ве́ре тве́рдое, до конца́ дни́й на́ших пребыва́ние и во все́х за́поведех Госпо́дних неукло́нное хожде́ние, да про́чее вре́мя живота́ на́шего пожи́вше во вся́ком благоче́стии и чистоте́, сподо́бимся ми́рныя Христиа́нския кончи́ны и до́браго отве́та на страшне́м суде́ Сы́на Твоего́ и Бо́га на́шего. И та́ко дости́гнем, под кро́вом Твоея́ по́мощи, живота́ ве́чнаго во Ца́рствии Отца́ све́тов, Ему́же, ку́пно со Единоро́дным Его́ Сы́ном и Святы́м Ду́хом, подоба́ет сла́ва, че́сть и поклоне́ние, ны́не и при́сно и во ве́ки веко́в. Ами́нь.