Конда́к 1.

Взбра́нной Воево́де, Госпоже́ Цари́це Богоро́дице, похва́льная дерза́ем приноси́ти пе́ния. Ты́ же, я́ко иму́щая бе́здну милосе́рдия и пучи́ну щедро́т, от вся́ких на́с бе́д свободи́ те́плым Твои́м к Бо́гу предста́тельством, да зове́м Ти́:

Ра́дуйся, упова́ние на́ше и в ско́рбех всемо́щная Засту́пнице.

И́кос 1.

А́нгельстии ли́цы дивя́тся, зря́ в Тебе́ та́йну от ве́ка сокрове́нную и в после́дняя ле́та все́м явле́нную; мы́ же, а́ще и до́лжни в молча́нии пребыва́ти, дерза́ем зва́ти си́це:

Ра́дуйся, во чре́ве прие́мшая пре́жде ве́к от Отца́ Рожде́ннаго; ра́дуйся, роди́вшая Сы́на Емману́ила, е́же е́сть сказа́емо: с на́ми Бо́г.

Ра́дуйся, Цари́це, одесну́ю Царя́ сла́вы предстоя́щая; ра́дуйся, ря́сны златы́ми оде́яна и преукра́шена.

Ра́дуйся, оби́телище Бо́га Жива́го; ра́дуйся, До́ме, его́же Прему́дрость Себе́ созда́.

Ра́дуйся, Кла́дезю во́ды Жи́вы; ра́дуйся, Врата́, и́миже Госпо́дь про́йде и не отверзо́шася.

Ра́дуйся, упова́ние на́ше и в ско́рбех всемо́щная Засту́пнице.

Конда́к 2.

Ви́дящи Елисаве́т Де́ву Пресвяту́ю испо́лнь Ду́ха Свята́го, и сама́ те́мже Ду́хом рече́: Благослове́на Ты́ в жена́х, и благослове́н Пло́д чре́ва Твоего́! и отку́ду мне́ сие́, да прии́де Ма́ти Го́спода моего́ ко мне́? Мы́ же, раби́ смире́ннии, та́кожде не ве́мы, отку́ду яви́ся на́м се́й о́браз цельбоно́сный, пред ни́мже главы́ прикло́ньше, уми́льно рече́м Го́сподеви: Аллилу́иа.

И́кос 2.

Ра́зум вся́к недоуме́ет разуме́ти, ки́ими дарми́ послужи́ти Ти́, Всесвята́я Де́во? Мы́ у́бо потщи́мся, подража́я волхво́м богопросвеще́нным, принести́ пред пречи́стый о́браз Тво́й, вме́сто зла́та, сми́рны и лива́на, упова́ние, любы́ и ве́ру на́шу, и́хже возлага́юще, пое́м:

Ра́дуйся, Ковче́же, и́мже тва́рь от потопле́ния грехо́внаго свободи́ся; ра́дуйся, Земле́ невозде́ланная, Пло́д Живо́тный прине́сшая.

Ра́дуйся, О́блаче, от грехо́внаго зно́я покрыва́ющий; ра́дуйся, ка́плями благода́ти Бо́жией ду́ши на́ша ороша́ющая.

Ра́дуйся, Купино́, огне́м Божества́ неопа́льна пребы́вшая; ра́дуйся, от огня́ стра́стнаго на́с свобожда́ющая.

Ра́дуйся, Кади́льнице злата́я, Ду́ха Бо́жия пребыва́лище; ра́дуйся, Трапе́зо, нося́щая Хле́б жи́зни.

Ра́дуйся, упова́ние на́ше и в ско́рбех всемо́щная Засту́пнице.

Конда́к 3.

Си́лою свы́ше облецы́ на́с, Всеси́льная, во бране́х проти́ву ко́зней вра́жиих, да возмо́жем неколе́блемо стоя́ти в правове́рии и неумо́лчно Сы́ну Твоему́ взыва́ти: Аллилу́иа.

И́кос 3.

Иму́щи мно́зи гра́ди и ве́си, хра́мы и оби́тели сокро́вища вели́кия – Твои́, Де́во, ико́ны честни́и. А́ще и разноли́чни о́бразы ти́и, оба́че Еди́нем Ду́хом чудеса́ излива́ют, и́хже воспева́юще, глаго́лем ра́достно:

Ра́дуйся, всего́ ми́ра неруши́мая Стено́; ра́дуйся, страны́ на́шея Покро́ве и Огражде́ние.

Ра́дуйся, Царегра́ду благослове́ние Небе́сное; ра́дуйся, Нову́граду зна́мение ми́лости Бо́жией.

Ра́дуйся, Смоле́нску Путеводи́тельнице к Небеси́; ра́дуйся, Каза́ни сокро́вище пребога́тое.

Ра́дуйся, Пече́рская Сла́во; ра́дуйся, Поча́евская Похвало́.

Ра́дуйся, упова́ние на́ше и в ско́рбех всемо́щная Засту́пнице.

Конда́к 4.

Бу́рю вну́трь име́ют помышле́ний сумни́тельных суему́дрении филосо́фи ми́ра сего́, егда́ зря́т, ка́ко от святы́я ико́ны Твоея́, о Де́во, истека́ют то́ки благода́ти. Мы́ же, просвеще́ни све́том и́стинныя ве́ры, пред о́бразом поклоне́ние Первообра́зным прино́сим, Еди́ному Бо́гу поя́: Аллилу́иа.

И́кос 4.

Слы́шав во сне́ иере́й Иоа́нн чу́дныя словеса́ ста́рца, я́ко и́мать прия́ти ико́ну Богоро́дичу, от нея́же излию́тся благода́ть и ми́лость, потща́ся в посте́ и моле́нии приуготова́тися к сре́тению Цари́цы, реку́ще Преблагослове́нней:

Ра́дуйся, во успе́нии Твое́м на́с не оставля́ющая; ра́дуйся, на вся́ко вре́мя с ве́рными благода́тию Сы́на Твоего́ пребыва́ющая.

Ра́дуйся, посеще́ний благода́тных гра́ды и ве́си христиа́нския сподобля́ющая; ра́дуйся, благода́ть и ми́лость лю́дем Твои́м излива́ющая.

Ра́дуйся, по́мощи ско́рая пода́тельнице; ра́дуйся, утеше́ния Исто́чниче преизоби́льный.

Ра́дуйся, к Бо́гу ше́ствующим наста́внице; ра́дуйся, в мо́ри жите́йском плыву́щим управи́тельнице.

Ра́дуйся, упова́ние на́ше и в ско́рбех всемо́щная Засту́пнице.

Конда́к 5.

Боготе́чную звезду́ ра́зуме иере́й Иоа́нн ико́ну Твою́ Каплуно́вскую, о Де́во, егда́ узре́ сбытие́ предрече́ния ста́рча; те́мже прия́т на ру́це о́браз святы́й, и облобыза́ и со слеза́ми, Бо́гу поя́: Аллилу́иа.

И́кос 5.

Ви́дящи Пресвята́я Де́ва ико́ну Свою́ в до́ме поста́влену, яви́ся во сне́ пресви́теру, и рече́, да не принужда́ет Цари́цу жи́ти во хра́мине, но да принесе́т во Дворе́ц, и́же е́сть Це́рковь Бо́жия; восста́в же от сна́, благогове́йный иере́й призва́ лю́ди ве́си тоя́, и ку́пно с ни́ми возопи́:

Ра́дуйся, Небесе́ Цари́це; ра́дуйся, всего́ ми́ра Влады́чице.

Ра́дуйся, Всеси́льная Хода́таице за ро́д на́ш; ра́дуйся, Всесвята́я Засту́пнице вся́каго челове́ка.

Ра́дуйся, Ми́лостивая вразуми́тельнице заблу́ждших; ра́дуйся, многолюбе́зная испра́вительнице неразу́мных.

Ра́дуйся, утвержде́ние пра́во ше́ствующих; ра́дуйся, укрепле́ние во бране́х духо́вных.

Ра́дуйся, упова́ние на́ше и в ско́рбех всемо́щная Засту́пнице.

Конда́к 6.

Пропове́дание чуде́с, от ико́ны Каплуно́вския бы́вших, во вся́ концы́ вселе́нныя изы́де, да вси́ ве́рнии воспою́т Пода́телю чуде́с Го́сподеви: Аллилу́иа.

И́кос 6.

Возсия́ во все́м ми́ре све́т от ико́ны Твоея́, о Де́во, созыва́я с высо́ким пропове́данием на трапе́зу милосе́рдия. Те́мже вси́, тре́бующии благода́тнаго утеше́ния, приидо́ша послу́шати о чудесе́х, и свои́х неду́г исцеле́ние прия́ти, е́же улучи́вше, поя́ху Богоро́дице:

Ра́дуйся, хромы́м благоше́ствие устроя́ющая; ра́дуйся, на стези́ и́стины наставля́ющая.

Ра́дуйся, слепы́м прозре́ние да́рующая; ра́дуйся, душе́вныя очеса́ к богове́дению отверза́ющая.

Ра́дуйся, рассла́бленных укрепля́ющая; ра́дуйся, греха́ми отягоще́нных воздвиза́ющая.

Ра́дуйся, прокаже́нных очища́ющая; ра́дуйся, грехо́вныя стру́пы врачу́ющая.

Ра́дуйся, упова́ние на́ше и в ско́рбех всемо́щная Засту́пнице.

Конда́к 7.

Хотя́щим еретико́м супоста́том хра́м во сла́ву Рождества́ Твоего́ сожещи́, ди́вно те́м воспрети́ла еси́, Богома́ти Всемо́щная, о́гнь веще́ственный угаси́ла еси́, оба́че воспали́ла во вся́цем се́рдце позна́ние, я́ко вели́к и сла́вен Бо́г Христиа́нский, Ему́же пое́м: Аллилу́иа.

И́кос 7.

Но́вое зна́мение си́лы Бо́жией показа́ ди́вная ико́на Каплуно́вская, егда́ во бра́ни яви́ся укрепле́нием во́инству правосла́вному. Взира́юще на вра́жия по́лчища пораже́нныя, и ви́дящи де́монския полки́ сокруша́емы предста́тельством Бо́жия Ма́тере, пое́м то́й сла́дце:

Ра́дуйся, во бране́х Побо́рнице; ра́дуйся, во дни́ ми́ра утише́ние.

Ра́дуйся, во́инов правосла́вных благослове́ние; ра́дуйся, на супоста́ты одоле́ние.

Ра́дуйся, уме́рших в Бо́зе упокое́ние; ра́дуйся, живы́х к пакибы́тию приготовле́ние.

Ра́дуйся, сиро́т воспита́ние; ра́дуйся, вдо́в защище́ние.

Ра́дуйся, упова́ние на́ше и в ско́рбех всемо́щная Засту́пнице.

Конда́к 8.

Стра́нное А́нгелом и челове́ком и́мать украше́ние хра́м на́ш, ико́ну Твою́ Каплуно́вскую, пред не́йже вся́к, моле́ния принося́й, проси́мая получа́ет, то́кмо е́же вопи́ти Бо́гу: Аллилу́иа.

И́кос 8.

Вся́ тва́рь, вся́к ро́д и во́зраст, вся́ко зва́ние и досто́инство не возмо́гут изрещи́ все́х щедро́т, я́же излия́ла еси́, о Пресвята́я Де́во, чрез чудотво́рныя ико́ны Твоя́ на вся́ лю́ди. Те́мже вся́к чи́н святы́х на небеси́, и вся́к гре́шник на земли́, еди́неми усты́ и еди́нем се́рдцем воспева́ют Тя́, Богома́ти, пе́сненно:

Ра́дуйся, проро́ков уста́ и пра́отец ча́яние; ра́дуйся, святи́телей ра́дование и апо́столов му́дросте.

Ра́дуйся, Евангели́стов благове́стие и пропове́дников учи́тельнице; ра́дуйся, му́чеников кре́посте и испове́дников терпе́ние.

Ра́дуйся, по́стников Пита́тельнице и преподо́бных Сла́досте; ра́дуйся, сто́лпников поддержа́ние и де́вственников огра́до.

Ра́дуйся, молча́льников собесе́днице и богосло́вов умудре́ние; ра́дуйся, пресви́теров наста́внице и учи́телей церко́вных поуче́ние.

Ра́дуйся, упова́ние на́ше и в ско́рбех всемо́щная Засту́пнице.

Конда́к 9.

Вся́ в ми́ре се́м скороте́чно: ки́йждо челове́к из пра́ха произы́де и а́бие ко гро́бу тщи́тся; не́сть наде́яния на дру́зи или́ вла́сти; нима́ло по́льзует сла́ва или́ бога́тство. Где́ и взы́щем наде́жду, или́ кто́ в ско́рбех защити́т? Вои́стинну, Влады́чица Богоро́дица в ско́рбех Засту́пница! Вои́стинну, Госпо́дь Иису́с Христо́с, Его́же Де́ва роди́ Неискусобра́чная, упова́ние подае́т нераска́янно все́м, И́стинному Бо́гу покланя́ющимся, и вопию́щих Тому́: Аллилу́иа.

И́кос 9.

Вети́ями сладкогла́сными, о дру́зи, воспое́м хотя́ и ма́лую ча́сть от ди́вных благодея́ний Богоро́дичных, и́миже ве́ра утверди́ся и вся́ концы́ научи́шася пе́ти Преблагослове́нней:

Ра́дуйся, я́ко Тобо́ю пре́лесть низложи́ся; ра́дуйся, я́ко Тобо́ю сатана́ посрами́ся.

Ра́дуйся, неве́рия то́ки уста́вившая; ра́дуйся, собла́знов о́гнь угаси́вшая.

Ра́дуйся, остре́йшая стрело́, язвя́щая враги́; ра́дуйся, мо́лние, попаля́ющая злове́рие.

Ра́дуйся, я́ко Тобо́ю собо́рища нечести́вых исчезо́ша; ра́дуйся, я́ко Тобо́ю вся́ му́дрость лжеиме́нная посрами́ся.

Ра́дуйся, упова́ние на́ше и в ско́рбех всемо́щная Засту́пнице.

Конда́к 10.

Спасе́ние Тя́ и́мамы ве́рное, Де́во, и́бо ко Христу́ Бо́гу мо́лишися о спасе́нии ми́ра, и чрез ико́ны чудотво́рнии мно́зем подае́ши утеше́ние, Сы́ну Твоему́ пою́щим: Аллилу́иа.

И́кос 10.

Стена́ и заступле́ние на́м гре́шным Ты́ еси́, Богоро́дице, я́ко безпреста́ни подае́ши на́м ми́лости Твоя́ бога́тныя, и препобежда́еши вся́кое зло́, коего́ждо науча́я пе́ти Тебе́:

Ра́дуйся, цве́те неувяда́емый рая́ Христо́ва; ра́дуйся, дре́во, пло́д живо́тный израсти́вшее.

Ра́дуйся, взыска́ние поги́бшим; ра́дуйся, спаси́тельнице утопа́ющым.

Ра́дуйся, помо́щнице жена́м ча́да ражда́ти; ра́дуйся, млекопита́тельнице ча́дом.

Ра́дуйся, Живоно́сный Исто́чниче; ра́дуйся, Спори́тельнице хле́бов.

Ра́дуйся, упова́ние на́ше и в ско́рбех всемо́щная Засту́пнице.

Конда́к 11.

Песнопе́ний на́ших, а́ще и тма́ те́м, оба́че не досто́ит все́х вку́пе к досто́йному воспева́нию Твоея́ любви́ к на́м, гре́шным, и благодея́ний, и чуде́с, и́хже сотвори́ Твои́ми моли́твами Госпо́дь на́ш Иису́с Христо́с, Ему́же пое́м: Аллилу́иа.

И́кос 11.

Светоза́рную свещу́, су́щим во мра́це грехо́внем, зри́м честны́й о́браз Тво́й, Мари́е Де́во, чрез него́же вся́к науча́ется покланя́тися Трисия́нному Божеству́, Единоца́рственней и Соприсносу́щней Тро́ице, от Нея́же Ты́ неизрече́нно Бо́га Сло́ва породила́ еси́. Таково́му чу́ду дивя́щеся, ве́рно вопие́м Преблагослове́нней:

Ра́дуйся, я́ко су́щую Богоро́дицу Тя́ чти́м; ра́дуйся, я́ко Присноде́ву Тя́ почита́ем.

Ра́дуйся, я́ко Честне́йшую Херуви́м Тя́ хва́лим; ра́дуйся, я́ко Сла́внейшую без сравне́ния Серафи́м Тя́ велича́ем.

Ра́дуйся, я́ко Присноблаже́нную и Пренепоро́чную Тя́ нарица́ем; ра́дуйся, я́ко благослове́нную в жена́х Тя́ воспева́ем.

Ра́дуйся, Сла́во Небе́сных Си́л; ра́дуйся, Похвало́ земноро́дных.

Ра́дуйся, упова́ние на́ше и в ско́рбех всемо́щная Засту́пнице.

Конда́к 12.

Благода́тию Твое́ю николи́же оста́вила еси́ на́с, о Ма́ти, Наде́ждо ненаде́жных, и по мно́зех ле́тех ико́ну Твою́ па́ки ми́рови в хра́ме на́шем ди́вно яви́ла еси́. Те́мже и мы́, зря́ще сие́ но́вое чу́до, я́ко зна́мение прису́тствия в се́м ме́сте Си́льнаго Бо́га, превозно́сим Его́, вопию́ще Го́сподеви: Аллилу́иа.

И́кос 12.

Пою́ще и воспева́юще чудеса́, бы́вшия от ико́ны Твоея́ Каплуно́вския, чти́м Тебе́, Де́во, я́ко Пречи́стую и Всеблаже́нную, и на Тя́ по Бо́зе упова́ние возлага́ем, ча́юще, я́ко и в пре́дняя не пре́зриши моле́ний на́ших сицевы́х:

Ра́дуйся, обра́дованная иногда́; ра́дуйся, при́сно в ра́дости пребыва́ющая.

Ра́дуйся, я́ко Тобо́ю Ра́дость Небе́сная на зе́млю сни́де; ра́дуйся, я́ко Рожде́нным Тобо́ю вся́ка печа́ль в ра́дость преложи́ся.

Ра́дуйся, вертогра́де Боже́ственныя ра́дости; ра́дуйся, са́де Го́рняго весе́лия.

Ра́дуйся, Исто́чниче ра́дования; ра́дуйся, ча́ше, че́рплющая ра́дость.

Ра́дуйся, упова́ние на́ше и в ско́рбех всемо́щная Засту́пнице.

Конда́к 13.

О, Всепе́тая Ма́ти, Де́во Богоро́дице, Ми́лостивая и Премилосе́рдая на́ша Хода́таице и пе́рвое на́ше по Бо́зе упова́ние! Приими́ моле́ние сие́ на́ше и пода́ждь на́м исполне́ние все́х, я́же ко спасе́нию, проше́ний, низпосли́ наде́жду ве́рную и любы́ кре́пкую, и ве́ру непосты́дну, и сподо́би с Тобо́ю в Го́рнем Ца́рствии воспева́ти Сы́ну Твоему́ и Бо́гу на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельстии ли́цы дивя́тся, зря́ в Тебе́ та́йну от ве́ка сокрове́нную и в после́дняя ле́та все́м явле́нную; мы́ же, а́ще и до́лжни в молча́нии пребыва́ти, дерза́ем зва́ти си́це:

Ра́дуйся, во чре́ве прие́мшая пре́жде ве́к от Отца́ Рожде́ннаго; ра́дуйся, роди́вшая Сы́на Емману́ила, е́же е́сть сказа́емо: с на́ми Бо́г.

Ра́дуйся, Цари́це, одесну́ю Царя́ сла́вы предстоя́щая; ра́дуйся, ря́сны златы́ми оде́яна и преукра́шена.

Ра́дуйся, оби́телище Бо́га Жива́го; ра́дуйся, До́ме, его́же Прему́дрость Себе́ созда́.

Ра́дуйся, Кла́дезю во́ды Жи́вы; ра́дуйся, Врата́, и́миже Госпо́дь про́йде и не отверзо́шася.

Ра́дуйся, упова́ние на́ше и в ско́рбех всемо́щная Засту́пнице.

Конда́к 1.

Взбра́нной Воево́де, Госпоже́ Цари́це Богоро́дице, похва́льная дерза́ем приноси́ти пе́ния. Ты́ же, я́ко иму́щая бе́здну милосе́рдия и пучи́ну щедро́т, от вся́ких на́с бе́д свободи́ те́плым Твои́м к Бо́гу предста́тельством, да зове́м Ти́:

Ра́дуйся, упова́ние на́ше и в ско́рбех всемо́щная Засту́пнице.

Моли́тва.

Цари́це моя́ преблага́я, Наде́ждо моя́ Богоро́дице, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ ско́рбь, помози́ ми́ я́ко не́мощну, окорми́ мя́ я́ко стра́нна. Оби́ду мою́ ве́си, разреши́ ту́, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни благи́я Уте́шительницы, то́кмо Тебе́, о Богома́ти; я́ко да сохрани́ши мя́ и покры́еши во ве́ки веко́в. Ами́нь.