Конда́к 1.

Избра́нной от все́х родо́в и ди́вной Засту́пнице всего́ ро́да христиа́нскаго Пресвяте́й Богоро́дице Де́ве Мари́и, похвалы́ прино́сим мы́ недосто́йнии, чу́дному и свято́му Ея́ о́бразу Ка́сперовскому, принесе́нному в зе́млю на́шу из Се́рбии правосла́вной на укрепле́ние ве́ры Христо́вой и на́шего спасе́ния с любо́вию прибега́ющих к Не́й и пою́щих:

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

И́кос 1.

А́нгелов превы́сшая яви́лася еси́. Цари́це Пресвята́я, явле́нием ико́ны Твоея́ святы́я испо́лнила еси́ ра́достию христиа́не правосла́вныя, к Тебе́ с ве́рою и любо́вию прибега́ющия. Ты́ бо, Де́ва Пречи́стая, яви́ла еси́ гра́ду Оде́ссы и всего́ Черномо́рия живу́щии, ди́вныя заступле́ния, озаря́юще струя́ми чуде́с твои́х вся́ ве́рныя, в ра́дости вопию́щая Ти́:

Ра́дуйся, ве́рная Засту́пница на́ша пред о́бразом Твои́м моля́щихся; ра́дуйся, безчи́сленныя щедро́ты Твоя́, от Го́спода на́м испра́шивающая.

Ра́дуйся, я́ко глаго́л Бо́жий в Тебе́ николи́же изнемо́жет; ра́дуйся, я́ко от Тебе́ никто́же то́щь или́ неуслы́шан отхо́дит.

Ра́дуйся, я́ко пред о́бразом Твои́м мно́гия получа́ше благослове́ния; ра́дуйся, я́ко пред Ни́м же о́ными исполня́шеся проси́мая жела́ния.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 2.

Ви́дя Тя́, Засту́пницу усе́рдную ро́да христиа́нскаго на ико́не Твое́й Ка́сперовской изображе́нную и мно́ги чудесы́ от Нея́ соверша́емии, вся́к де́нь ве́рнии в моли́твах свои́х к Тебе́ прибега́ют, прося́ по́мощи и заступле́ния. Ты́ же, Ма́ти Милосе́рдая бу́ди все́м скорбя́щим ра́достию и оби́димых Засту́пницею, во хвалу́ Твою́ Бо́гови пою́щим: Аллилу́иа.

И́кос 2.

Ра́зум челове́ческий не возмо́жет вмести́ти ди́вныя чудеса́ Твоя́, Де́ва Пресвята́я. Ка́ко не мо́жет гра́д укры́тися верху́ горы́ стоя́, ниже́ вжига́ют свети́льника и подставля́ют его́ под спу́дом, но на све́щнице, и све́тит все́м, и́же в хра́мине су́ть, та́ко и о́браз Тво́й Ка́сперовский святы́й. Я́ко свети́ло Боже́ственное се́й бо о́браз излива́ет благода́ть прибега́ющих к Нему́ и пою́щим Ти́, Богоро́дице си́це:

Ра́дуйся, предста́тельнице Ты́ на́ша кре́пкая и непостижи́мая; ра́дуйся, испо́лненное жела́ние Ты́ на́ше всеблаго́е.

Ра́дуйся, Ты́ ве́ры благочести́выя недви́жимое сохране́ние; ра́дуйся, свети́льниче превы́сший на све́щнице поста́вленный.

Ра́дуйся, благочести́выя от бе́д и скорбе́й Ты́ чу́дно сохраня́ющая; ра́дуйся, озло́бленные ду́ши Ты́ от поги́бели отвраща́ющая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 3.

Си́ла Всевы́шняго призва́ мно́ги лю́ди правосла́вныя в ве́сь Ка́сперовку на обре́тение ико́ны Твоея́ пречу́дныя. Ты́ бо, Цари́це Небе́сная, благоволи́ла еси́ просла́вити о́браз се́й Свято́й, зна́мения и чудесы́ велича́я. Лю́дие же че́сть и сла́ву о́бразу Твоему́ возсыла́ху, в пе́нии духо́вных Го́споду взыва́ху: Аллилу́иа.

И́кос 3.

Име́я от ю́ности кре́пкую ве́ру правосла́вную не́кто се́рб благоро́дный принесе́ из Трансильва́нии родово́й о́браз се́й Пресвяты́я Богоро́дицы в зе́млю на́шу. И я́ко святы́ня Ве́лия, сия́ ико́на бы́сть благослове́нием из ро́да в ро́д в ве́си Ка́сперовке. Пред Не́ю же моля́щиеся излива́ше ско́рби своя́ и воздыха́ния моли́твенныя, получа́ше проси́мая, с ве́рою поя́ Богоро́дице:

Ра́дуйся, премилосе́рдая на́ша Уте́шительница; ра́дуйся, верне́йшее на́ше спасе́ние.

Ра́дуйся, семе́йств христиа́нских в благоче́стии сохране́ние; ра́дуйся, в ве́ре Христо́вой живу́щия укрепля́ющая.

Ра́дуйся, благослове́ние домо́в и супру́жеств благочести́вых; ра́дуйся, благочести́вых христиа́н защи́та и похвало́.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 4.

Бу́ря по́мыслов смуща́ше супру́ги Ка́сперовы, ка́ко чу́дное обновле́ние святы́я ико́ны Твоея́, Влады́чице, яви́ся в нощи́ глубо́кия и без свиде́телей Ея́. Хотя́ше скры́ти чу́до сие́, и по взаи́мному согла́сию сказа́ти непра́вду, супру́ги не можа́ше. Во́ля бо Боже́ственная суди́ ина́че, да не сокры́то бы́сть преве́лие чу́до сие́, но явле́но все́м ве́рным, в ра́дости пою́щим Бо́гу: Аллилу́иа.

И́кос 4.

Слы́шаше о ди́вном чудесе́ обновле́ния ико́ны Твоея́, Влады́чице, мно́гия ве́рныя со всея́ земли́ Черномо́рия стека́хуся на поклоне́ние сия́ Святы́ни вели́кия, Хвалы́ и почита́ния Тебе́, Пречи́стая Богома́ти, воздава́я с ве́рою и любо́вию пою́щия:

Ра́дуйся, явле́нием святы́я Ико́ны Твоея́, мно́гия лю́ди правосла́вныя обра́довавшая; ра́дуйся, возноси́мыя к Тебе́ моли́твы от серде́ц ве́рных прие́млющая.

Ра́дуйся, и́стинныя ве́ры Правосла́вныя утвержде́ние; ра́дуйся, мно́гия неве́рныя о́бразом Си́м, к ве́ре приведе́ние.

Ра́дуйся, сокро́вище Боже́ственное ико́ною Твое́ю на́м препода́вшая; ра́дуйся, ду́ши на́ша на пу́ть и́стинный наставля́ющая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 5.

Богосве́тлая звезда́ яви́ся Твоя́ Ка́сперовская, Пресвята́я Де́во, егда́ принесе́на была́ еси́ в це́рковь Бо́жию. Отсе́ле Тво́й благода́тный Покро́в си́м о́бразом распространи́ся на вся́ ве́си и гра́ды Черномо́рия вси́ бо ве́рнии приходя́щии к ико́не Твое́й, и с ве́рою моля́щиися получа́ше исцеле́ния и благода́тныя по́мощи, воспева́я Бо́гу: Аллилу́иа.

И́кос 5.

Ви́деша ве́лия чудеса́ во хра́ме святе́м от ико́ны святы́е быва́емыя, Де́ва Пречи́стая, безчи́сленныя наро́ды стека́хуся на торжества́ и прославле́ния Ея́. Кре́стныя хо́ды соверша́шеся в че́сть новоявле́нныя ико́ны Твоея́, обнося́ Его́ и о спасе́нии и заступле́нии взыва́я Тебе́ со умиле́нием:

Ра́дуйся, Засту́пнице, Цари́це Небе́сная, стране́ на́шей отра́до и утеше́ние; ра́дуйся, Преблагослове́нная Де́ва, Покро́в Сво́й над на́ми простира́ющая.

Ра́дуйся, я́ко от на́с, недосто́йных благоизво́лила принима́ти моле́ния; ра́дуйся, я́ко и Сама́ возжела́ла приноси́ти моле́ние на́ша ко Престо́лу Бо́га Вы́шняго.

Ра́дуйся, я́ко обре́тением ико́ны Твоея́, яви́ся чу́дом ве́лия ми́лости Бо́жия стране́ на́шей; ра́дуйся, я́ко о́бразом си́м низложи́ся горды́ня и шата́ние язы́ческое.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 6.

Возсия́ пречу́дною сла́вою ико́на свята́я Ка́сперовская, егда́ Святе́йший Сино́д Це́ркви вои́стину призна́ и засвиде́тельствова, я́ко ико́на сия́ бы́сть вели́кая святы́ня всея́ земли́ Черномо́рския. И отны́не всеси́льное засту́пничество святы́я ико́ны Ка́сперовския яви́ся бла́гостным Покро́вом Ма́тери Бо́жией распросте́ртыми над на́шею земле́ю. Слы́ша сия́ бла́гостныя веща́ния ве́рныя воспева́ху Бо́гу: Аллилу́иа.

И́кос 6.

Пропове́дают гра́ды и ве́си земли́ Черномо́рския И́стину святы́е ико́ны Твоея́ Ка́сперовския, Богома́ти Пречи́ста, я́ко благоизво́лила еси́ просла́вити о́браз Тво́й святы́й многочи́сленными зна́мениями и чудесы́. Мно́гия бо гра́ды и ве́си восхоте́ша ви́дети о́браз Тво́й святы́й, прося́ще доста́вити для моли́тв и поклоне́ния ему́, и в Ра́достех встреча́я сию́ ве́лию Святы́ню, воспева́ша Тебе́ Преблагослове́нней та́ко:

Ра́дуйся, Ра́досте на́ша, печа́ли на́ша в ра́дость претворя́ющая; ра́дуйся, Всеблага́я засту́пница от вся́ких бе́д и искуше́ний избавля́ющая.

Ра́дуйся, Всеми́лостивая Влады́чице, ми́лостию Твое́ю на́с не оставля́ющая; ра́дуйся, Взбра́нная Воево́до, враго́в ви́димых и неви́димых побежда́ющая.

Ра́дуйся, Врата́рнице блага́я, во врата́ Рая́ пу́ть ве́рным указу́ющая; ра́дуйся, Скоропослу́шнице Боже́ственная, моли́твы на́ша прие́млющая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 7.

Хотя́ще воззре́ти на святу́ю ико́ну Твою́, Пресвята́я Де́во, и с ве́рою усе́рдно помоли́теся, многоты́сящныя стече́ния моля́щихся встреча́ху сию́ ико́ну Ка́сперовскую, коленопреклоне́ния соверша́юще по пути́ ше́ствия кре́стных хо́дов Вели́кия Святы́ни, немо́лчно воспева́я: Аллилу́иа.

И́кос 7.

Ди́вныя зна́мения милосе́рдия соверша́шеся си́лою Благода́ти Боже́ственныя чудотво́рныя ико́ны Твоея́, Де́ва Пречи́стыя: боля́щия исцеля́хуся, разсла́бленныя укрепля́шеся, бесны́я от духо́в нечи́стых свобожда́шеся, слепы́я ви́дяху Пречи́стый о́браз. Вси́ у́бо еди́ными усты́ и се́рдцем взыва́ху: Пресвята́я Богоро́дице, помога́й на́м, и спаса́й вся́, и́мя Твое́ в ра́дости велича́юще:

Ра́дуйся, Предста́тельнице Ты́ на́ша к Бо́гу непосты́дная; ра́дуйся, Ты́ с Сы́ном Твои́м и Бо́гом на́шим ве́чно Ца́рствующая.

Ра́дуйся, Спасе́ние Ты́ челове́ческое во бла́го устроя́ющая; ра́дуйся, Боля́щих и стра́ждущих Ты́ пе́рвая Цели́тельнице.

Ра́дуйся, я́ко Тобо́ю гре́шнии от поги́бели спаса́ются; ра́дуйся, я́ко Тобо́ю от страсте́й нече́стия мы́ избавля́емся.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 8.

Все́м живу́щим гра́да Оде́ссы бы́сть ве́лия ра́дость, егда́ честна́я ико́на Ка́сперовская принесе́на была́ правосла́вными для моли́твеннаго заступле́ния от вра́жиих нападе́ний, и я́ко ви́димый зна́к Небе́снаго покрови́тельства гра́да сего́. Се́й бо о́браз Тво́й Святы́й, Де́ва Пречи́стая, яви́ся ве́рным непреобори́мым опло́том проти́ву инозе́мных си́л вра́жиих и наде́жнейшим зало́гом спасе́ния на́шего, прославля́ющих Бо́га Вы́шняго и пою́щих: Аллилу́иа.

И́кос 8.

Вся́ немощна́я ми́ра избра́ Бо́г, да посрами́т кре́пкая худоро́дная ми́ра и уничто́женная, избра́ и не су́щая, да су́щая упраздни́т. Та́ко о́бразом Твои́м Святы́м, Пресвята́я Богоро́дице, благослове́ние и защище́ние снизошло́ на люде́й кро́тких и смире́нных, молчали́вых, трепе́щущих пред сло́вом Бо́жиим. Вся́ прибега́ющая к Тебе́ спасти́, да́руя ча́дам послуша́ние, оби́димым терпе́ние, скорбя́щим благоду́шие, и вси́ чту́щия Тя́, пред о́бразом моля́щихся, прие́млют исцеле́ния воспева́я Ти́:

Ра́дуйся, гра́ду Оде́ссы в моли́твах пред о́бразом святы́м ободре́ние и утеше́ние яви́вшая; ра́дуйся, я́ко гра́д се́й и от вра́жеских плене́ний избавля́ющая.

Ра́дуйся, вся́ живу́щия в не́м к наро́дному покая́нию и моли́тве призва́вшая; ра́дуйся, свою́ ми́лость и поща́ду гра́ду ико́ною Ка́сперовскою яви́вшая.

Ра́дуйся, вра́жеский фло́т от разоре́ния гра́да Оде́ссы отгна́вшая; ра́дуйся, вся́ живу́щая гра́да Оде́ссы ве́рою во спасе́ние укрепи́вшая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 9.

Вся́кое естество́ небе́сных и земны́х похва́льное пе́ние прино́сит Ти́, Цари́це Небе́сная, я́ко Тво́й о́браз Святы́й яви́ся покро́вом небе́снаго заступле́ния и защи́ты гра́да Оде́ссы в тру́дныя годи́ны бе́дствий и нападе́ний вра́жиих, сохраня́я живу́щия в не́м и вопию́щих Бо́гу: Аллилу́иа.

И́кос 9.

Вети́и челове́честии не возмо́гут исчести́ щедро́ты Твоя́, Де́во Пречи́стая, ниже́ изъясни́ти боже́ственную си́лу исходя́щую от святы́я ико́ны Ка́сперовския. Вси́ бо прибега́ющии к Не́й и с ве́рою моля́щиеся Тебе́, Богоро́дице, получа́ше жела́емая и ра́дости воспева́ющи Ти́:

Ра́дуйся, Храни́тельнице Ты́ на́ше и Утвержде́ние; ра́дуйся, луча́ми чуде́с Твои́х все́х ве́рных просвеща́ющая.

Ра́дуйся, ти́хое и до́брое ты́ на́ше приста́нище; ра́дуйся, Ты́ ра́досте градо́в и всея́ земли́ Черномо́рия.

Ра́дуйся, Ты́ Це́ркви Правосла́вныя Похвало́ и Сла́ва; ра́дуйся, Ты́ злы́я начина́ния разруша́ющая и ко́зни вра́жии расторга́ющая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 10.

Спасти́ хотя́ше на́с гре́шных, благоволи́ла еси́ Богоро́дице, яви́те ико́ну Твою́ Ка́сперовскую на Покро́в и спасе́ние не то́кмо гра́да Оде́ссы, но всея́ земли́ Черномо́рския. Мно́ги ми́лости и щедро́ты Твоя́, о́бразом си́м Ты́ дарова́ла еси́ ве́рным. Со благогове́нием и ве́рою притека́ющий к Тебе́ вопию́т: «Бу́ди Засту́пницею на́шей усе́рдней у Престо́ла Бо́га Вседержи́теля, и да сподо́бит на́с Госпо́дь десна́го стоя́ния и пе́ти Ему́ со все́ми святы́ми»: Аллилу́иа.

И́кос 10.

Стена́ еси́ необори́мая, стра́жа неусы́пна от вся́ких напа́стей и бе́д все́м к Тебе́ прибега́ющим. Тво́й бо о́браз святы́й яви́ся неизсяка́емым исто́чником благода́ти, источа́ющий исцеле́ния все́м, с ве́рою к Нему́ моли́твенно обраща́ющимся. Те́мже и мы́, к Тебе́ припа́дающи в ско́рбех и боле́знех уми́льно глаго́лем Ти́:

Ра́дуйся, еди́на на́ша Ма́ти милосе́рдия, умилосе́рдися над на́ми гре́шными; ра́дуйся, я́ко Ты́ Покро́ве на́ш благода́тный, покры́й на́с от вся́каго зла́.

Ра́дуйся, я́ко Тобо́ю вся́ боле́зни на́ша душе́вныя и теле́сныя исцеля́ются; ра́дуйся, я́ко Твое́ю по́мощию вся́ на́ша стра́сти и неду́ги истребля́ются.

Ра́дуйся, я́ко ве́ру, наде́жду и любо́вь к Бо́гу укрепля́ти Ты́ на́м помога́еши; ра́дуйся, я́ко и во вся́ких обстоя́ниих на стезю́ спасе́ния Ты́ направля́ющая.

Ра́дуйся, Неве́сто Неневе́стная.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 11.

Пе́ние на́ше недосто́йное со умиле́нием Тебе́ принося́щее приими́. Де́ва Пречи́стая, и те́плой моли́тве на́шей вне́млюще, услы́ши все́х к Тебе́ прибега́ющих. Ты́ бо еси́ вои́стину на́ша Засту́пнице, гро́зныя беды́ от на́с отвраща́ющая, стра́сти и ра́спри вся́ утеша́ющая, и под Твою́ ми́лость вси́ мы прибега́ем пою́щия Бо́гу: Аллилу́иа.

И́кос 11.

Светоприе́мную свещу́ све́та невече́рняго зри́м ико́ну Твою́ Святу́ю. О́браз Ея́ Ка́сперовский немерца́емо сия́ет во хра́ме святе́м гра́да Оде́ссы, озаря́я благода́тию Боже́ственною все́х прибега́ющих под покрови́тельство еди́ной Засту́пнице всего́ ро́да христиа́нскаго. Се́й бо о́браз Святы́й си́лою Бо́жию вра́жия де́йствия отгоня́ет, вся́ неду́ги на́ша исцеля́ет и благослове́ние да́рует вопию́щих Богоро́дице:

Ра́дуйся, я́ко Ты́ еси́ Засту́пница оби́димых и по́моще стра́ждущих; ра́дуйся, я́ко Ты́ еси́ по милосе́рдию Своему́ уде́рживала десни́цу Го́спода, просте́ртую для наказа́ния гре́шных.

Ра́дуйся, я́ко Ты́ милосе́рдием Свои́м отвраща́ла бе́дствия от на́шего Оте́чества и утеша́ла ра́спри и во́йны; ра́дуйся, я́ко Тобо́ю остана́вливалися опустоши́тельныя прока́зы и утоля́лся гла́д.

Ра́дуйся, я́ко пома́занием еле́йным от лампа́ды ико́ны Твоея́ возврати́ся разсу́док мно́гим, одержи́мым си́лою бесо́вскою; ра́дуйся, я́ко мно́ги получа́ша здра́вие на моле́бнах у святы́я ико́ны Твоея́.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 12.

Благода́ть Боже́ственная оби́льно яви́ся чрез ико́ну Святу́ю Твою́, Богоблаже́нная Де́ва. Тво́й бо о́браз Ка́сперовский ве́рным дарова́лся во свяще́ние и спасе́ние ду́ш на́ших, во огражде́ние от напа́дков от вра́г ви́димых и неви́димых, и в зна́мение велича́йшаго заступле́ния всея́ на́шей отчи́зны. Те́мже с ве́рою прино́сим Ему́ поклоне́ние и моли́твенно Бо́гу пое́м: Аллилу́иа.

И́кос 12.

Пою́ще и прославля́я чудеса́ Твоя́, Де́ва Пресвята́я от святы́я ико́ны Твоя́ соверша́емыя, вси́ со стра́хом и тре́петом Тебе́ припа́даем, и мо́лим Тя́, Влады́чицу Ми́ру. Бу́ди все́м на́м щито́м непобеди́мым и стено́ю необори́мою, покро́вом неруши́мым и Хода́тайницей к Сы́ну Твоему́ и Бо́гу на́шему Тебе́ непреста́нными гла́сы пою́щими:

Ра́дуйся, Ты́ враго́в на́ших ви́димых и неви́димых всегда́ побежда́ющая; ра́дуйся, Ты́ благи́я жела́ния все́м ве́рным исполня́ющая.

Ра́дуйся, Ты́ явле́нием ико́ны святы́я Твоея́ вся́ ве́рныя лю́ди просвеща́ющая; ра́дуйся, я́ко взира́я на ико́ну святу́ю Твою́, Тебе́ и́стинней Богоро́дице покланя́емся.

Ра́дуйся, я́ко Ты́ еси́ все́х сла́вящих и́мя Твое́ прославля́ющая; ра́дуйся, я́ко и во вся́кой ну́жде на́шей, ты́ поле́зная и блага́я все́м помога́ющая.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 13.

О, Пречи́стая и Милосе́рдая Влады́чице на́ша, Де́во Богоро́дице! Пред свято́ю Твое́ю ико́ною услы́ши на́с, предстоя́щих Ти́ с ве́рою и любо́вию моля́щихся. Вонми́ гла́су моле́бному на́шему, и изба́ви на́с от вся́ких бе́д и напа́стей, скорбе́й и боле́зней и гряду́щаго изми́ муче́ния все́х и́мя Твое́ призыва́ющих и Сы́ну Твоему́ вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов превы́сшая яви́лася еси́. Цари́це Пресвята́я, явле́нием ико́ны Твоея́ святы́я испо́лнила еси́ ра́достию христиа́не правосла́вныя, к Тебе́ с ве́рою и любо́вию прибега́ющия. Ты́ бо, Де́ва Пречи́стая, яви́ла еси́ гра́ду Оде́ссы и всего́ Черномо́рия живу́щии, ди́вныя заступле́ния, озаря́юще струя́ми чуде́с твои́х вся́ ве́рныя, в ра́дости вопию́щая Ти́:

Ра́дуйся, ве́рная Засту́пница на́ша пред о́бразом Твои́м моля́щихся; ра́дуйся, безчи́сленныя щедро́ты Твоя́, от Го́спода на́м испра́шивающая.

Ра́дуйся, я́ко глаго́л Бо́жий в Тебе́ николи́же изнемо́жет; ра́дуйся, я́ко от Тебе́ никто́же то́щь или́ неуслы́шан отхо́дит.

Ра́дуйся, я́ко пред о́бразом Твои́м мно́гия получа́ше благослове́ния; ра́дуйся, я́ко пред Ни́м же о́ными исполня́шеся проси́мая жела́ния.

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Конда́к 1.

Избра́нной от все́х родо́в и ди́вной Засту́пнице всего́ ро́да христиа́нскаго Пресвяте́й Богоро́дице Де́ве Мари́и, похвалы́ прино́сим мы́ недосто́йнии, чу́дному и свято́му Ея́ о́бразу Ка́сперовскому, принесе́нному в зе́млю на́шу из Се́рбии правосла́вной на укрепле́ние ве́ры Христо́вой и на́шего спасе́ния с любо́вию прибега́ющих к Не́й и пою́щих:

Ра́дуйся, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние.

Моли́тва.

О, Пресвята́я Де́во, Богома́ти Пречи́стая, гра́да Оде́ссы и всея́ земли́ Черномо́рския покро́ве и заступле́ние! Тебе́ припа́даем и покланя́емся пред Свято́ю и Пречестно́ю ико́ною Твое́ю Ка́сперовскою, Е́юже ди́вныя и пресла́вныя чудеса́ соверша́шася. Ты́ еди́на еси́ ра́дости на́ше Хода́таице и я́ко Ма́ти Бо́жия мо́жеши все́м на́м по́мощи. Тебе́ у́бо еди́ней даде́ся Ма́тернее дерзнове́ние уми́лостивити Сы́на Твоего́ Христа́ Бо́га на́шего о спасе́нии на́с гре́шных. Те́мже смире́нно мо́лим Тя́, Всеми́лостивую Влады́чицу на́шу, не пре́зри и не возгнуша́йся воздыха́ний на́ших, но помози́ на́м немощны́м скве́рным и неиспра́вленным, скорбя́щим и озло́бленным, больны́м и заблу́ждшим, в сокруше́нии серде́ц на́ших прибега́ющих. Изба́ви на́с Преблагослове́нная Госпоже́, Ма́ти Го́спода Вы́шняго, от вся́ких бе́д и скорбе́й, от вся́ких неду́гов и боле́зней, от внеза́пныя сме́рти, от напа́стей де́монских и наве́тов злы́х челове́к, я́ко Тобо́ю и де́моны попира́ются и вси́ враги́ на́ши посрамля́ются. Умоли́, Госпоже́ Пречи́стая, Го́спода и о е́же сохрани́теся Оте́честву на́шему и Правосла́вной Це́ркви на́шей в ми́ре и тишине́. Вы́шним Свои́м Благослове́нием, да укрепи́т Госпо́дь Архиере́и на́ша Правосла́вныя, и па́стыри, христолюби́вое во́инство со все́ми правосла́вными христиа́нами. Все́х же на́с огради́ от вся́каго зла́ бла́гостию Твое́ю, и уте́ши ми́лостивым Твои́м посеще́нием и вся́ благоде́ющия на́м. Еще́ же, о, Влады́чице, мо́лим Тя́, ерети́ческое воста́ние низложи́, разсе́янныя собери́, заблу́ждшия во еди́но Христо́во ста́до возврати́, ста́рость поддержи́, ю́ныя вразуми́, вдови́цы си́рыя защити́, боля́щия исцели́ и скорбя́щия уте́ши. Пре́жде отше́дшия отцы́ и ча́да и бра́тию на́шу во све́тлостех ра́йских и селе́ниях пра́ведных упоко́й, с ни́ми же и на́с все́х в покая́нии и испове́дании приими́, да и мы́ со все́ми Святы́ми просла́вим Пречестно́е и Пресвято́е и́мя Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.