Конда́к 1.

Избра́нной от все́х родо́в Влады́чице ми́ра, превы́ше си́л Небе́сных превознесе́нней, хвале́бныя пе́сни прино́сим раби́ Твои́, Богоро́дице; Ты́ же, я́ко иму́щая милосе́рдие неизрече́нное, во святе́й ико́не Твое́й явля́емое, от вся́ких на́с бе́д свободи́, да с ра́достию зове́м Ти́:

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

И́кос 1.

А́нгелов чинонача́лия на небеси́ велича́ют Тя́, Пресвяту́ю Де́ву, Ра́дость Пресве́тлую всему́ ми́ру роди́вшую, мы́ же, пе́сни а́нгельстей подража́я, зде́, на земли́, воспое́м Ти́ сицева́я:

Ра́дуйся, богоизбра́нная Отрокови́це; ра́дуйся, от дне́й ве́тхих Бо́гу предобруче́нная.

Ра́дуйся, от проро́к ми́ру предука́занная; ра́дуйся, Арха́нгелом Гаврии́лом о зача́тии Сы́на от Ду́ха Свя́та предвозвеще́нная.

Ра́дуйся, во смире́нии благове́стие Арха́нгелово восприя́вшая; ра́дуйся, Наста́внице, смиренному́дрию на́с науча́ющая.

Ра́дуйся, богодухнове́нно от пра́ведныя Елисаве́ты Ма́терию Бо́жиею нарече́нная; ра́дуйся, о рожде́нии от Тебе́ Спаси́теля ми́ра в весе́лии духо́внем Го́спода возвели́чившая.

Ра́дуйся, ли́ки А́нгельскими песносло́вимая; ра́дуйся, от все́х родо́в при́сно ублажа́емая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 2.

Ви́дя заступле́ние Твое́, Всеблага́я Влады́чице, ро́ду христиа́нскому явля́емое, зане́ в беда́х кре́пкая еси́ на́м Помо́щница, оби́димым Засту́пнице, ско́рбным утеше́ние, больны́м исцеле́ние и все́м тружда́ющимся ско́рая по́моще, вси́ благода́рственно о Тебе́ Бо́гу вопие́м: Аллилу́иа.

И́кос 2.

Ра́зум пода́ждь на́м, Всеблага́я Влады́чице, ка́ко досто́йно воспе́ти промышле́ние Твое́, стране́ Хо́лмстей явле́нное, внегда́ просвети́тель Руси́ кня́зь Влади́мир, изволе́нием Твои́м, в покро́в и охране́ние страны́ сея́, све́том уче́ния Ева́нгельскаго просвеща́емыя, гра́ду Хо́лму в да́р принесе́ ико́ну Твою́, Пречи́стая. Мы́ же, дивя́щеся Твоему́ о на́с предста́тельству, со умиле́ние зове́м Ти́ си́це:

Ра́дуйся, усе́рдная Засту́пнице ро́да христиа́нскаго; ра́дуйся, насади́телю ве́ры Христо́вы кня́зю Влади́миру во апо́стольстве вспомоществова́вшая.

Ра́дуйся, ико́ною Твое́ю чудотво́рною страну́ Хо́лмскую, а́ки драгоце́нным да́ром, обогати́вшая; ра́дуйся, ве́ру Правосла́вную в земли́ се́й укрепи́вшая.

Ра́дуйся, Твое́ю неисче́тною бла́гостию христиа́н ущедря́ющая; ра́дуйся, милосе́рдие неизрече́нное душа́м на́шим источа́ющая.

Ра́дуйся, моли́твами Твои́ми о на́с неоскудева́ющая; ра́дуйся, ма́терним заступле́нием чту́щих Тя́ от вся́ких бе́д избавля́ющая.

Ра́дуйся, пречестно́ю ико́ною Твое́ю врачевство́ теле́сное и духо́вное христиа́ном явля́ющая; ра́дуйся, высото́ непостижи́мая, ко приста́нищу вы́сшему на́с возводя́щая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 3.

Си́лу благода́тную яви́ла еси́ во святе́й ико́не Твое́й, Пресвята́я Влады́чице, сокро́вище бо многоце́нное в не́й на́м открыва́еши и безчи́сленныя щедро́ты притека́ющим к не́й подае́ши, да вси́, щедро́тами Твои́ми обогати́вшеся, со умиле́нием Бо́гу воззове́м: Аллилу́иа.

И́кос 3.

Име́ющи о новопросвеще́нных лю́дех земли́ Хо́лмския попече́ние неоску́дное, от пречестны́я ико́ны Твоея́ то́ки чуде́с источи́ла еси́, Влады́чице, да вси́ позна́ют, я́ко любо́вь Твоя́ и попече́ние при́сно на лю́дех правосла́вных пребыва́ют. Сего́ ра́ди благода́рственно Тебе́ воспое́м:

Ра́дуйся, благода́ти исто́чник неистощи́мый да́рующая; ра́дуйся, луча́ми чуде́с все́х притека́ющих к ико́не Твое́й озаря́ющая.

Ра́дуйся, по́моще все́м ве́рно чту́щим Сы́на Твоего́ пресла́вная; ра́дуйся, ве́ры Правосла́вныя в земли́ на́шей кре́посте тве́рдая.

Ра́дуйся, попече́нием Твои́м при́сным о лю́дех правосла́вных и́стину Правосла́вия утвержда́ющая; ра́дуйся, ико́ною Твое́ю ра́дость духо́вную на́м соде́лывающая.

Ра́дуйся, ми́лости сокро́вище многоце́нное на́м открыва́ющая; ра́дуйся, мо́ре щедро́т прося́щим у Тебе́ излива́ющая.

Ра́дуйся, заблу́ждшим пу́ть и́стины указу́ющая; ра́дуйся, призыва́ющим Тя́ на по́мощь ско́ро поспешеству́ющая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 4.

Бу́ря напа́стей и бе́д, не еди́ножды воздвиза́емая проти́ву ве́ры Правосла́вныя в земли́ на́шей, не возмо́же поколеба́ти тве́рдости в ве́ре все́х притека́ющих к Тебе́, Влады́чице, и цельбоно́сней ико́не Твое́й покланя́ющихся, зане́ ико́на сия́ в щи́т и побе́дное зна́мение правосла́вным христиа́ном Тобо́ю даде́ся, и мы́, гре́шнии, тве́рдо упова́ем, я́ко и во дни́ на́ших напа́стей скоропослу́шаеши все́х на́с, с ве́рою ко Твоему́ пречи́стому о́бразу притека́ющих и Сы́ну Твоему́ пою́щих: Аллилу́иа.

И́кос 4.

Слы́шавше лю́дие правосла́внии, я́ко ико́на Твоя́ пречи́стая во дни́ ты́я, егда́ гра́д Хо́лм от ага́рян нечести́вых огню́ и мечу́ предаде́ся, под пе́плом хра́ма бы́сть сокрове́нна и по ста́х ле́тех па́ки невреди́ма обре́теся, ра́достию ве́лиею возра́довавшеся, хвалу́ Ти́, Пресвята́я Де́во и Ма́ти, воспе́ша такову́ю:

Ра́дуйся, земли́ Хо́лмския покро́ве; ра́дуйся, Правосла́вия в не́й насажде́ние и утвержде́ние.

Ра́дуйся, во огни́ ико́ну Твою́ пречестну́ю чуде́сно неврежде́нною сохрани́вшая; ра́дуйся, росо́ю чудото́чною о́гнь угаси́вшая.

Ра́дуйся, ра́дость на́м ве́лию, я́ко отроко́м халде́йским в пещи́ о́гненней, пода́вшая; ра́дуйся, си́льну в чудотворе́нии позна́ти Тя́ научи́вшая.

Ра́дуйся, я́ко ико́ну Твою́ неврежде́нну зря́ще, святы́не се́й покланя́тися науча́емся; ра́дуйся, я́ко от ико́ны Твоея́ даро́в чуде́сных сподобля́емся.

Ра́дуйся, броне́ на́ша неуязви́мая; ра́дуйся, стено́ на́ша несокруши́мая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 5.

Боготе́чная звезда́ яви́ся на́м, Богома́ти, пречестна́я ико́на Твоя́, луча́ми бо чуде́с, от ико́ны исходя́щими, все́х ве́рных Ти́ осиява́еши, мра́к грехо́вный и мглу́ скорбе́й на́ших прогоня́еши и все́х и́щущих спасе́ния наставля́еши с ве́рою воспева́ти Бо́гу: Аллилу́иа.

И́кос 5.

Ви́дев кня́зь Влади́мир, я́ко насе́льницы земли́ Хо́лмския во тьме́ язы́чества и се́ни сме́ртней пребыва́ют, разори́ на горе́ гра́да Хо́лма ка́пище и́дольское и созда́ на не́й хра́м Бо́гу Жи́ву, в не́мже и утверди́ пречестны́й о́браз Тво́й, Богома́ти, да вси́ взира́ющии на́нь и чту́щии Тя́, да́ры от Тебе́ восприе́млют, я́же к животу́ и благоче́стию. Мы́ же, чту́ще святы́ню Твою́, со умиле́нием глаго́лем:

Ра́дуйся, пала́то Сы́на Бо́жия, в хра́ме земне́м обита́ти благоизво́лившая; ра́дуйся, вмести́лище сла́вы Госпо́дней, притека́ющих к Тебе́ сла́вою и че́стию венча́вшая.

Ра́дуйся, горо́ несеко́мая, исто́чник воды́ жи́вы жа́ждущим источи́вшая; ра́дуйся, заре́, блиста́ющая во тьме́, мра́к язы́ческий в земли́ на́шей разори́вшая.

Ра́дуйся, ста́мно злата́я, ми́р ве́сь гла́да духо́внаго избавля́ющая; ра́дуйся, сто́лпе о́гненный, к Со́лнцу Пра́вды все́х и́щущих спасе́ния приводя́й.

Ра́дуйся, ико́ною Твое́ю исто́чники чуде́с на́м источа́ющая; ра́дуйся, две́ри ра́йския все́м ве́рно чту́щим Тя́ отверза́ющая.

Ра́дуйся, христиа́ном ра́досте и утеше́ние; ра́дуйся, у́з грехо́вных па́дшим разреше́ние.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 6.

Пропове́дницы чуде́с ве́лиих, ико́ною Твое́ю источа́емых, яви́шася не то́кмо правосла́внии, но и инове́рнии лю́дие: не отри́нула бо еси́ милосе́рдием Твои́м и си́х, к Тебе́ притека́ющих и цельбоно́сней ико́не Твое́й покланя́ющихся, да вси́, си́льну помо́щницу Тя́ уразуме́вше и покланя́тися правосла́вней святы́не научи́вшеся, со умиле́нием воззову́т Бо́гу: Аллилу́иа.

И́кос 6.

Возсия́вши от пречестны́я ико́ны Твоея́ благода́ть светоза́рную, све́тиши све́том чуде́с и ми́лостей стране́ на́шей, Пречи́стая, да вси́, с ве́рою к Твое́й ико́не цельбоно́сней притека́ющии и ча́ющии от Тебе́ вели́кия и бога́тыя ми́лости, еди́ными уста́ми и еди́ным се́рдцем велегла́сно Тебе́ вопию́т:

Ра́дуйся, дерзнове́нная к Бо́гу Хода́таице; ра́дуйся, за ми́р христиа́нский те́плая Моли́твеннице.

Ра́дуйся, неистощи́мый исто́чниче святы́ни; ра́дуйся, многотеку́щая реко́ бла́г ве́чных.

Ра́дуйся, сия́нием сла́вы Твоея́ на́с облиста́ющая; ра́дуйся, мра́к грехо́вный ду́ш на́ших упраздня́ющая.

Ра́дуйся, я́ко Твое́ю ико́ною исто́чники чуде́с явля́еши; ра́дуйся, я́ко прибега́ющим к не́й вся́ поле́зная да́руеши.

Ра́дуйся, серде́ц на́ших умиле́ние; ра́дуйся, от бе́д и напа́стей на́ше спасе́ние.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 7.

Хотя́щи гра́ду Хо́лму, от ага́рян нечести́вых разоря́ему, милосе́рдие яви́ти, не отри́нула еси́, Скоропослу́шнице, дву́х княже́н хо́лмских, пред ико́ною Твое́ю о спасе́нии гра́да сего́ моля́щихся и чи́н и́ноческий прия́ти обеща́вших, но притекла́ еси́ на по́мощь гра́ду сему́ и обрати́ла в бе́гство полки́ вра́жия, да вси́, спасе́ннии Тобо́ю от бе́д, воспою́т: Аллилу́иа.

И́кос 7.

Ди́вное попече́ние о до́ме Госпо́днем, в не́мже пребыва́ше Твоя́ цельбоно́сная ико́на, показа́ла еси́, Пресвята́я Влады́чице; ка́ко бо не диви́мся Твое́й чуде́сной по́мощи, собира́телю ле́пты на расшире́ние хра́ма сего́ и́ноку Иоаса́фу явле́нней, егда́ и́нок се́й от Тебе́, во о́бразе лепообра́зныя Жены́ я́вльшейся, прия́т в да́р сви́ток с ле́птою, на сие́ де́ло довле́ющею, и, дивя́ся свы́ше ниспо́сланной по́мощи, воспе́ Ти́ си́це:

Ра́дуйся, пресла́вная в беда́х Засту́пнице; ра́дуйся, ми́лости превели́кия Пода́тельнице.

Ра́дуйся, мно́гажды проше́ния на́ша предваря́ющая; ра́дуйся, светоза́рное сия́ние, ско́рбный мра́к души́ на́шея разгоня́ющее.

Ра́дуйся, ненаде́жных непосты́дное наде́яние; ра́дуйся, все́м ве́рно чту́щим Тя́ ра́досте и утеше́ние.

Ра́дуйся, любве́ неистощи́мый исто́чниче; ра́дуйся, тве́рдое на́ше упова́ние.

Ра́дуйся, все́х притека́ющих к Тебе́ Твое́ю ми́лостию покрыва́ющая; ра́дуйся, ве́чныя ра́дости на́с сподобля́ющая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 8.

Стра́нники и прише́льцы на земли́ су́ще, но́ваго гра́да, Иерусали́ма небе́снаго, взыску́ем. Ты́ же, Пречи́стая Влады́чице, я́ко предста́тельница о лю́дех к Сы́ну Твоему́, моли́ проще́ние прегреше́ний на́м пре́жде конца́ дарова́ти, да ти́хаго приста́нища на небеси́ дости́гнем и Бо́гови возопие́м: Аллилу́иа.

И́кос 8.

Вся́ небе́сныя си́лы Тебе́, я́ко Богома́терь, велича́ют, Ты́ же, Де́во Богоро́дице, Честне́йшая Херуви́м и Сла́внейшая без сравне́ния Серафи́м, не возгнуша́лася еси́ за ро́д челове́ческий, грехми́ оскверне́нный, предстоя́ти; того́ ра́ди и вси́ земноро́днии благода́рственная Тебе́ прино́сят, воспева́я си́це:

Ра́дуйся, Невмести́маго вмести́лище; ра́дуйся, чистоты́ боже́ственныя храни́лище.

Ра́дуйся, рожде́нием Твои́м Бо́га и челове́ка соедини́вшая; ра́дуйся, спасе́ние челове́ком устро́ившая.

Ра́дуйся, Путеводи́тельнице, к небеси́ на́с возводя́щая; ра́дуйся, Цари́це небесе́ и земли́, врата́ ра́йския на́м отверза́ющая.

Ра́дуйся, с Сы́ном Твои́м и Бо́гом соца́рствующая; ра́дуйся, и посреде́ на́с, гре́шных, пребыва́ти не возгнуша́вшаяся.

Ра́дуйся, ко благосе́рдию Влады́ки моли́твы в ве́ре благочести́вых принося́щая; ра́дуйся, моле́ний и на́с гре́шных не отверга́ющая.

Ра́дуйся, земли́ Хо́лмския отра́до и всему́ ми́ру прибе́жище и утеше́ние.

Конда́к 9.

Все́ естество́ а́нгельское и челове́ческое, дивя́ся Твоему́ неизрече́нному милосе́рдию к ро́ду христиа́нскому, похва́льныя пе́сни Тебе́ прино́сят, зане́ си́льным предста́тельством Твои́м ми́р ве́сь от бе́д избавля́еши, больны́х врачу́еши, гре́шных заступа́еши и мо́лишися о все́х с ве́рою к Бо́гу притека́ющих и вопию́щих Ему́: Аллилу́иа.

И́кос 9.

Вети́я многовеща́нныя недоуме́ют, ки́ими словесы́ восхвали́ти сла́вный, Влады́чице, пра́здник Хо́лмския ико́ны Твоея́, к не́йже в де́нь се́й святы́й во мно́жестве превели́ком не то́кмо правосла́внии, но и инове́рнии притека́ют, ча́юще от Тебе́ скорбе́й избавле́ния, неду́гов исцеле́ния, ра́достей исполне́ния и бла́г ве́чных сподобле́ния. Ты́ же, Щедрода́тельнице, неисче́тная благодея́ния ико́ною Твое́ю в де́нь се́й явля́еши, да вси́, ра́дующеся о Тебе́, возглаго́лют си́це:

Ра́дуйся, ми́р от скорбе́й избавля́ющая; ра́дуйся, в напа́стех на́с защища́ющая.

Ра́дуйся, слепы́х прозре́ние, глухи́х слы́шание; ра́дуйся, хромы́м хожде́ние, немы́х глаго́лание.

Ра́дуйся, боле́зней на́ших врачева́ние; ра́дуйся, ча́яний на́ших исполне́ние.

Ра́дуйся, умерщвле́нных грехми́ благода́тию Твое́ю оживля́ющая; ра́дуйся, подая́ние бла́г ве́чных на́м явля́ющая.

Ра́дуйся, ти́хое приста́нище и́щущим спасе́ния; ра́дуйся, почита́ющим ико́ну Твою́ несумне́нное защище́ние.

Ра́дуйся, земли́ Хо́лмския отра́до и всему́ ми́ру прибе́жище и утеше́ние.

Конда́к 10.

Спасти́ хотя́щи не́коего му́жа хо́лмска Иа́кова, в реце́ утопа́юща и ко Твое́й по́мощи взыва́юща, Ты́, Богома́ти, отча́явшихся спасе́ние, подо́бне Христу́, извле́кшему Петра́ из пучи́ны морски́я, просте́рла еси́ ру́ку по́мощи сему́ погиба́ющему, да вси́ су́щии в беда́х, ве́дяще чу́до сие́, воспою́т о Тебе́ хвале́бную пе́снь Бо́гови: Аллилу́иа.

И́кос 10.

Стена́ еси́ неруши́мая гра́ду Хо́лму, Пресвята́я Богоро́дице Де́во: егда́ бо во дни́ дре́вния ага́ряне нечести́вии, огню́ и мечу́ зе́млю Хо́лмскую предаю́ще, ко гра́ду Хо́лму приближа́хуся, насе́льницы же гра́да, подъя́вше ико́ну Твою́ пречестну́ю, вкру́г хра́ма ю́ обноша́ху и о спасе́нии гра́да сле́зно моля́хуся, Ты́ же, внима́я мольба́м люде́й, во спасе́нии отча́явшихся, устраши́ла еси́ враги́ виде́нием чу́дным и отгна́ла и́х от гра́да, и́ми осажде́ннаго, да вси́ спасе́ннии Тобо́ю от находя́щих на ня́ бе́д воспою́т Ти́ такова́я:

Ра́дуйся, страну́ на́шу от наше́ствия ага́рянскаго свободи́вшая; ра́дуйся, чуде́сным виде́нием стены́ непристу́пныя враги́ устраши́вшая.

Ра́дуйся, си́льным заступле́нием Твои́м от вся́ких на́с бе́д свобожда́ющая; ра́дуйся, от огня́, меча́ и наше́ствия иноплеме́нников на́с избавля́ющая.

Ра́дуйся, во бране́х кре́пкая Помо́щнице; ра́дуйся, отча́явшихся Неча́янная Ра́досте.

Ра́дуйся, от сме́ртнаго губи́тельства на́ше спасе́ние; ра́дуйся, враго́в на́ших я́вное посрамле́ние.

Ра́дуйся, в беда́х изнемога́ющим незы́блемое укрепле́ние; ра́дуйся, во страда́ниих на́ших благомо́щное утеше́ние.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 11.

Пе́ние всеумиле́нное прино́сят Ти́ вси́ тружда́ющиися и обремене́ннии, зане́ Сы́ну Твоему́ непреста́нно предстоя́, мо́лишися, да сло́во, И́м рече́нное: «А́з упоко́ю вы́», соблюде́т и вся́ в лише́нии су́щия к небе́сному весе́лию приведе́т, вси́ же да́р се́й небе́сный восприя́вшии воспою́т Ему́ хвале́бную пе́снь: Аллилу́иа.

И́кос 11.

Светоза́рным луче́м благода́тнаго упова́ния яви́ся правосла́вным христиа́ном пречестна́я ико́на Твоя́, Влады́чице, во дни́ ско́рби и́х: егда́ бо страна́ Хо́лмская от Правосла́вия ле́стию отто́ржена бы́сть, лю́дие правосла́внии, в напа́сти се́й су́щии, моля́щеся пред ико́ною Твое́ю, ве́лие утеше́ние и све́тлую ра́дость обрета́ху, в наде́жде утвержда́яся, я́ко привре́меннии су́ть дни́е сии́ лука́вии. Егда́ же ча́яние сие́ испо́лнися, лю́дие с весе́лием воспе́ша Ти́ хвалу́ такову́ю:

Ра́дуйся, душевре́дных уче́ний обличе́ние; ра́дуйся, душеполе́зных зна́ний дарова́ние.

Ра́дуйся, свяще́нное прибе́жище на́ше и ве́рных огражде́ние; ра́дуйся, поги́бших взыска́ние и заблу́ждших исправле́ние.

Ра́дуйся, домострои́тельнице на́шего спасе́ния, житие́ на́ше до́бре устроя́ющая; ра́дуйся, во страда́ниих утеше́ние и в житии́ благода́тнем укрепле́ние на́м подава́ющая.

Ра́дуйся, я́ко Тебе́ ра́ди правосла́внии лю́дие прельще́ния ерети́ческая отмета́ют; ра́дуйся, я́ко Тобо́ю и от ерети́к совраще́ннии па́ки Правосла́вную ве́ру обрета́ют.

Ра́дуйся, Це́ркве Христо́вы пресве́тлое украше́ние; ра́дуйся, Правосла́вия в стране́ на́шей незы́блемое утвержде́ние.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 12.

Благода́ти Твоея́ не лиши́ на́с, Пренепоро́чная, лю́те бо стра́ждем от беззако́ний на́ших и не и́мамы ины́я по́мощи, не и́мамы ины́я наде́жды оправди́тися, ра́зве Тебе́, Влады́чице: Ты́ на́м помози́, да не поги́бнем лю́те, и приими́ на́с в небе́сныя кро́вы, да, ра́дующеся, о Тебе́ возопие́м Бо́гу: Аллилу́иа.

И́кос 12.

Пою́ще Тя́, я́ко неоскудева́ющую милосе́рдием Предста́тельницу на́шу пред Го́сподем, ве́руем и испове́дуем, я́ко испро́сиши на́м блага́я не то́кмо в житии́ се́м привре́меннем, но и по сме́рти на́шей, да, небе́сных бла́г не лиши́вшеся, воспое́м Ти́ сицева́я:

Ра́дуйся, в бе́здне грехо́вней пребыва́ющим очище́ние; ра́дуйся, гре́шников с Бо́гом примире́ние.

Ра́дуйся, моли́твами Твои́ми ма́терними ми́лость и всепроще́ние гре́шником у Сы́на Твоего́ испроша́ющая; ра́дуйся, моли́твами Твои́ми пра́ведно дви́жимый на на́с гне́в Бо́жий отвраща́ющая.

Ра́дуйся, отра́до на́ша и утеше́ние в де́нь сме́рти; ра́дуйся, наде́ждо на́ша и по сме́рти.

Ра́дуйся, упова́ющим на Тя́ непосты́дную кончи́ну живота́ да́рующая; ра́дуйся, в де́нь су́дный десно́е стоя́ние на́м устроя́ющая.

Ра́дуйся, ключу́ Ца́рствия Христо́ва, врата́ небе́сная на́м отверза́ющая; ра́дуйся, две́ре ра́йская, в черто́г небе́сный на́с возводя́щая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 13.

О Всепе́тая Ма́ти, Цари́це не́ба и земли́, ко Твоему́ пречи́стому о́бразу прибега́ем и, покланя́ющеся ему́, уми́льно глаго́лем: покры́й на́с кро́вом милосе́рдия Твоего́, изба́ви на́с от вся́ких бе́д, скорбе́й и напа́стей, и умоли́ Сы́на Твоего́ в де́нь пра́веднаго Суда́ Бо́жия сподо́бити на́с десна́го стоя́ния со все́ми святы́ми, да непреста́нно пое́м Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов чинонача́лия на небеси́ велича́ют Тя́, Пресвяту́ю Де́ву, Ра́дость Пресве́тлую всему́ ми́ру роди́вшую, мы́ же, пе́сни а́нгельстей подража́я, зде́, на земли́, воспое́м Ти́ сицева́я:

Ра́дуйся, богоизбра́нная Отрокови́це; ра́дуйся, от дне́й ве́тхих Бо́гу предобруче́нная.

Ра́дуйся, от проро́к ми́ру предука́занная; ра́дуйся, Арха́нгелом Гаврии́лом о зача́тии Сы́на от Ду́ха Свя́та предвозвеще́нная.

Ра́дуйся, во смире́нии благове́стие Арха́нгелово восприя́вшая; ра́дуйся, Наста́внице, смиренному́дрию на́с науча́ющая.

Ра́дуйся, богодухнове́нно от пра́ведныя Елисаве́ты Ма́терию Бо́жиею нарече́нная; ра́дуйся, о рожде́нии от Тебе́ Спаси́теля ми́ра в весе́лии духо́внем Го́спода возвели́чившая.

Ра́дуйся, ли́ки А́нгельскими песносло́вимая; ра́дуйся, от все́х родо́в при́сно ублажа́емая.

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Конда́к 1.

Избра́нной от все́х родо́в Влады́чице ми́ра, превы́ше си́л Небе́сных превознесе́нней, хвале́бныя пе́сни прино́сим раби́ Твои́, Богоро́дице; Ты́ же, я́ко иму́щая милосе́рдие неизрече́нное, во святе́й ико́не Твое́й явля́емое, от вся́ких на́с бе́д свободи́, да с ра́достию зове́м Ти́:

Ра́дуйся, земли́ Хо́лмския отра́до и всему́ ми́ру прибе́жище и заступле́ние.

Моли́тва.

О Пресвята́я Де́во, Ма́ти Христа́ Бо́га на́шего, всемо́щная Засту́пнице страны́ на́шея! Со стра́хом, ве́рою и любо́вию припа́дающе к чудотво́рному о́бразу Твоему́, моли́твенно взыва́ем: бу́ди милосе́рдна к на́м, смире́нным и недосто́йным рабо́м Твои́м, и грехо́в и беззако́ний на́ших, Блага́я, не помяни́, но простри́ ру́це Твои́ ко благосе́рдию Влады́ки, да не отврати́т лица́ Своего́ от рабо́в Свои́х и не осу́дит на́с, гре́шных, по беззако́ниям на́шим, но сотвори́т с на́ми по вели́цей Свое́й ми́лости. Е́й, Госпоже́ Влады́чице! Бу́ди путеводи́тельница в житии́ на́шем: све́том и́стины умы́ на́ша просвети́, сердца́ умягчи́, ве́ру укрепи́, наде́жду утверди́, да́ра любве́ сподо́би. Умилосе́рдися, Всеми́лостивая Госпоже́ на́ша, на немощны́я лю́ди Твоя́: заблу́ждшия на пу́ть пра́вый наста́ви, коле́блемыя в ве́ре вразуми́, отпа́дшия от благочести́выя ве́ры оте́ческия возврати́ и вся́ и́стинному пути́ научи́. Спаси́ ми́лостию Твое́ю и поми́луй благове́рныя лю́ди Твоя́, епи́скопство правосла́вное и ве́сь чи́н церко́вный. Не отри́ни та́кожде милосе́рдием Твои́м и приими́ под кро́в Тво́й и вся́ прави́тели страны́ на́шея: вразуми́ и наста́ви и́х пра́во пра́вити, зако́ны Боже́ственныя соблюда́я. На́с же в ми́ре и любви́ дру́г ко дру́гу утверди́, да вси́, в едине́нии дру́г со дру́гом пребыва́юще, ти́хое и безмяте́жное житие́ поживе́м и, дарми́ бла́г земны́х наслади́вшеся, бла́г небе́сных милосе́рдия ра́ди Боже́ственнаго не лиши́мся. Еще́ мо́лимся Тебе́, Влады́чице Богоро́дице, изба́ви на́с от гла́да, губи́тельства, тру́са, пото́па, огня́, меча́, нападе́ния вра́жия, междоусо́бныя бра́ни, на́глыя сме́рти, тлетво́рных боле́зней и вся́ких ны́ зо́л окружа́ющих. Вонми́ и услы́ши, Всеми́лостивая Госпоже́, все́х на́с, ны́не к ико́не Твое́й святе́й припа́дающих и со слеза́ми к милосе́рдию Твоему́ взыва́ющих: утоли́ на́ша печа́ли и бу́ди на́м ско́рая Помо́щница во все́х дела́х на́ших во ве́ки веко́в. Ами́нь.