Конда́к 1.

Взбра́нной Воево́де Влады́чице на́шей Богоро́дице благода́рственное прино́сим пе́ние о явле́нии ди́вныя ико́ны Ея́ Ко́лочския, зе́млю Можа́йскую просвети́вшия и вся́ ве́рная ча́да Це́ркве возвесели́вшия. Ты́ же, я́ко Всеми́лостивая Засту́пница и Всеблага́я Помо́щница, все́х ве́рою притека́ющих к Тебе́ от вся́ких бе́д и напа́стей защити́, да зове́м Ти́:

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

И́кос 1.

А́нгел мно́жество и челове́к собо́ри сла́вят Тебе́, Небесе́ и земли́ Цари́цу, о явле́нии ико́ны Твоея́ Ко́лочския, в земли́ Моско́вской дре́вле просия́вшия, я́ко сокро́вище неисчерпа́емое, явле́нное для ве́чнаго спасе́ния на́шего. Те́мже мы́, все́ упова́ние на Тя́ возложи́вше и на святы́й о́браз Тво́й взира́юще, во умиле́нии серде́ц взыва́ем та́ко:

Ра́дуйся, страну́ Росси́йскую в жре́бий и достоя́ние Себе́ избра́вшая; ра́дуйся, ико́ны Твоя́ чудотво́рныя, я́ко зве́зды, в не́й умно́жившая.

Ра́дуйся, Де́во Пресвята́я, о́браз Тво́й чуде́сно на́м яви́вшая; ра́дуйся, зе́млю Моско́вскую све́том его́ озари́вшая.

Ра́дуйся, земли́ Можа́йской ико́ну Твою́ в зало́г благоволе́ния дарова́вшая; ра́дуйся, чудесы́ Твои́ми ве́ру в не́й утверди́вшая.

Ра́дуйся, оби́тели Ко́лочския ди́вная строи́тельнице; ра́дуйся, ве́рная ея́ Защи́тнице.

Ра́дуйся, боле́зни душе́вныя и теле́сныя ико́ною Твое́ю ско́ро врачу́ющая; ра́дуйся, во вся́ких беда́х и ну́ждах ско́рая на́ша Помо́щнице.

Ра́дуйся, Ле́ствице, от земли́ к Небеси́ возводя́щая; ра́дуйся, ра́дости ве́чныя на́с сподобля́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 2.

Ви́дя му́ж благочести́вый Лука́, егда́ изы́де на де́лание свое́, пречу́дную ико́ну Твою́, Влады́чице, на дре́ве явле́нную, в до́м сво́й принесе́ ю́. Уразуме́в же, я́ко свята́я ико́на Твоя́ да́р е́сть милосе́рдия лю́дем, Тобо́ю низпосыла́емый, возопи́ Бо́гу благода́рственную пе́снь: Аллилу́иа.

И́кос 2.

Ра́зум богопросвеще́н и ве́ру в благода́тную си́лу Богома́тере име́я, челове́к не́кий, мно́га ле́та разсла́блен лежа́й в дому́ Луки́, умоли́ его́, да принесе́т к нему́ ико́ну обре́тенную, ю́же облобыза́в, в то́й же ча́с воста́ здра́в, я́ко николи́же боле́в. Мы́ же, сие́ пе́рвое чу́до от ико́ны Твоея́, Всеми́лостивая Ма́ти, прославля́юще, похва́льными пе́сньми Тебе́ взыва́ем:

Ра́дуйся, святу́ю ико́ну дарова́ти на́м изво́лившая; ра́дуйся, покро́в Сво́й над земле́ю на́шею просте́ршая.

Ра́дуйся, селя́нину благочести́вому ико́ну Твою́ яви́вшая; ра́дуйся, чудотво́рную си́лу е́й пода́вшая.

Ра́дуйся, ико́ною Твое́ю разсла́бленнаго от одра́ воздви́гшая; ра́дуйся, во благи́х проше́ния на́ша исполня́ющая.

Ра́дуйся, Ма́ти Го́спода Си́л, разсла́бленных возставля́ющая; ра́дуйся, боле́зней многоле́тных исцеле́ние ско́рое и соверше́нное.

Ра́дуйся, проше́ния моля́щихся Тебе́ к Бо́гу вознося́щая; ра́дуйся, кре́ст жи́зни на́шея нести́ помога́ющая.

Ра́дуйся, всего́ ми́ра Боже́ственное утеше́ние; ра́дуйся, наде́ждо на́шего спасе́ния.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 3.

Си́лою Бо́жиею, чрез святы́я ико́ны Твоя́ явля́емою, спаса́ти зе́млю на́шу не престае́ши, Всеблага́я Влады́чице, та́ко и в ве́си Ко́лочской, вели́кая и мно́гая чудеса́ показа́ла еси́ от многоцеле́бнаго о́браза Твоего́, те́мже вси́ с ве́рою моля́щиися пред ни́м в ра́дости взыва́ют: Аллилу́иа.

И́кос 3.

Имы́й ве́лию ре́вность по Бо́зе и позна́в в явле́нии о́браза Твоего́, Богома́ти, милосе́рдие Твое́ ко все́м спасе́ния хотя́щим, кня́зь Можа́йский Андре́й возжеле́ ви́дети святу́ю ико́ну во гра́де княже́ния своего́. Тогда́ по́йде Лука́ с ико́ною из Ко́лочи к Можа́йску, и ве́сь гра́д изы́де в сре́тение святы́ни. И бы́ша зна́мения и чудеса́ от ико́ны Твоея́, Пречи́стая, и вси́ лю́дие поклоня́хуся е́й и со слеза́ми взыва́ху Тебе́:

Ра́дуйся, почита́ния святы́х ико́н освяще́ние; ра́дуйся, ве́ры христиа́нския утвержде́ние.

Ра́дуйся, ве́сь Ко́лочскую чудесы́ вели́кими просла́вившая; ра́дуйся, страны́ на́шея сокро́вище духо́вное.

Ра́дуйся, о́браз Тво́й святы́й в земли́ Моско́вской чуде́сно яви́вшая; ра́дуйся, я́ко ико́на Твоя́ в насле́дие спаси́тельное земли́ Можа́йской дарова́ся.

Ра́дуйся, явле́нием ико́ны Твоея́ гра́д Можа́йск возвесели́вшая; ра́дуйся, ми́лостивым ли́ком Твои́м сердца́ жи́телей его́ возра́довавшая.

Ра́дуйся, чудесы́ ше́ствие ико́ны Твоея́ по земли́ на́шей зна́меновавшая; ра́дуйся, весну́ спасе́ния мно́гим лю́дем возвести́вшая.

Ра́дуйся, пред Сы́ном Твои́м дерзнове́нная на́ша предста́тельнице; ра́дуйся, неисчерпа́емый исто́чниче ми́лостей и щедро́т.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 4.

Бу́рею скорбе́й и искуше́ний одержи́ми, жи́телие гра́да Москвы́ душе́вную ра́дость и поко́й обрета́ют, моля́щеся пред чудотво́рною ико́ною Твое́ю, Богома́ти. И́бо принесе́ Лука́ святу́ю ико́ну в первопресто́льный гра́д, иде́же святи́тель Фо́тий со епи́скопы и все́м собо́ром срето́ша ю́ с ра́достию ве́лиею. Мно́жество же наро́да к ди́вней ико́не с ве́рою прихожда́ху и исцеле́ние неду́гов приима́ху, благода́рственно воспева́юще ко Го́споду, и́стинному Врачу́ ду́ш и теле́с: Аллилу́иа.

И́кос 4.

Слы́шавше о вели́ких чудесе́х и зна́мениих от ико́ны Твоея́, Влады́чице, ве́рнии ча́да Це́ркве притека́ху к целе́бному о́бразу Твоему́, прие́млюще от него́ да́ры ми́лостей Твои́х. И хожда́ше Лука́ от гра́да во гра́д с ико́ною Твое́ю, и везде́ безчи́сленная исцеле́ния быва́ху, и вси́ лю́дие дая́ху ми́лостыню, зря́ще благода́ть, от ико́ны Твоея́ источа́емую, и прославля́ху Тя́ си́це:

Ра́дуйся, торжество́ ве́ры правосла́вныя в ше́ствии Твоея́ ико́ны яви́вшая; ра́дуйся, градо́в и ве́сей земли́ на́шея покро́ве и огражде́ние.

Ра́дуйся, первопресто́льный гра́д ико́ною Твое́ю посети́вшая; ра́дуйся, благослове́нием Твои́м его́ осени́вшая.

Ра́дуйся, явле́нием чуде́с от ико́ны Твоея́ жи́телей его́ обра́довавшая; ра́дуйся, прише́ствием ико́ны Твоея́ мно́гия беды́ и ско́рби от ве́рных отгна́вшая.

Ра́дуйся, я́ко пред ико́ною Твое́ю лю́дие правосла́внии благогове́йно покланя́ются; ра́дуйся, я́ко ди́вная зна́мения то́ю соверша́ются.

Ра́дуйся, в ско́рбех и печа́лех отра́ду в сердца́ на́ша излива́ющая; ра́дуйся, Засту́пнице усе́рдная, от Бо́га на́м дарова́нная.

Ра́дуйся, я́ко в ви́димем о́бразе Твое́м неви́димо си́лу благода́ти обрета́ем; ра́дуйся, все́й земли́ на́шей си́лу всемогу́щества Христо́ва возвеща́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 5.

Боготе́чною звездо́ю возсия́ ико́на Твоя́, Влады́чице, озаря́я сердца́ ру́сских люде́й, мра́к печа́лей и мглу́ вся́ческих неду́г и скорбе́й прогоня́ющая и на пу́ть спасе́ния наставля́ющая все́х лю́бящих Тя́. Лука́ же, име́я всеусе́рдное жела́ние о́браз Тво́й чудотво́рный досто́йно почти́ти, воздви́же це́рковь ка́менную во и́мя Успе́ния Твоего́ на ме́сте явле́ния святы́я ико́ны, да вси́, ви́девшии чудеса́ от нея́, моли́твы в це́ркви то́й возно́сят, непреста́нно воспева́юще Бо́гу: Аллилу́иа.

И́кос 5.

Ви́девше лю́дие храни́теля ико́ны Твоея́ Луку́ хва́лима и дая́ньми ублажа́ема, оба́че страстьми́ сребролю́бия и пия́нства снеда́ема, моли́шася Тебе́, Пречи́стая, да вразуми́ши избра́нника Своего́. Ты́ же, Всеми́лостивая Влады́чице, спасти́ хотя́ его́ от заблужде́ния, нападе́нием лю́таго зве́ря наказа́ла еси́; Лука́ же, возлежа́ на одре́ сме́ртнем, и́скреннее покая́ние принесе́, и, воста́в со одра́ боле́зни, пред ико́ною Твое́ю с ве́рою несумне́нною и благода́рным се́рдцем вознесе́ Тебе́ похвалы́ сия́:

Ра́дуйся, ру́ку милосе́рдия погиба́ющим простира́ющая; ра́дуйся, на пу́ть пра́вды заблу́ждших обраща́ющая.

Ра́дуйся, борю́щихся со страстьми́ всегда́шняя Помо́щнице; ра́дуйся, ка́ющихся гре́шников пред Бо́гом кре́пкая Засту́пнице.

Ра́дуйся, сле́зному покая́нию па́дших науча́ющая; ра́дуйся, житие́ на́ше до́бре устроя́ющая.

Ра́дуйся, о все́х чту́щих о́браз Тво́й промышля́ющая; ра́дуйся, моля́щимся пред ни́м спасе́ние подаю́щая.

Ра́дуйся, благоле́пный хра́м Успе́ния Твоего́ чудотво́рною ико́ною Твое́ю укра́сившая; ра́дуйся, моли́твы ве́рных ми́лостиво в не́м прие́млющая.

Ра́дуйся, чудесы́ мно́гими его́ освяти́вшая; ра́дуйся, во хра́ме се́м красоту́ хра́ма небе́снаго показа́вшая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 6.

Пропове́дник неизрече́ннаго милосе́рдия Твоего́ яви́ся раска́явшийся Лука́, и́же споспе́шествова име́нием свои́м на ме́сте обре́тения ико́ны монасты́рь во и́мя Успе́ния Твоего́ устро́ити, в не́мже постри́жеся са́м и поживе́ во умиле́нии и слеза́х, до́ндеже преста́вися и погребе́н в не́м бы́сть. Ты́ же, Всеблага́я, под кро́в Сво́й святы́й мно́гих и́ноков собрала́ еси́, да во сла́ву Бо́жию и ра́ди спасе́ния ду́ш свои́х тружда́ются, неуста́нно воспева́юще Бо́гу: Аллилу́иа.

И́кос 6.

Возсия́ ра́дость ве́лия в лю́дех, я́ко не то́кмо от о́браза Твоего́, Пресвята́я Влады́чице, благода́тныя да́ры исцеле́ний подаю́тся, но и в водны́х струя́х исто́чника бли́з ме́ста явле́ния ико́ны происте́кшаго, изоби́льно почерпа́ют благода́тное врачева́ние вси́ боля́щии, стра́ждущии и по́мощи тре́бующии, те́мже серде́чною ве́рою прославля́ют Тя́, небе́сную Цели́тельницу на́шу, воспева́юще Тебе́ похвалы́ сия́:

Ра́дуйся, о́бразом Твои́м чудотво́рным струи́ водны́я освяти́вшая; ра́дуйся, водо́ю исто́чника Твоего́ боля́щих возставля́ющая.

Ра́дуйся, от Исто́чника нетле́ния и ра́дости ду́ши жа́ждущих напая́ющая; ра́дуйся, духо́вную жа́жду на́шу утоля́ющая.

Ра́дуйся, ка́меню, во́ду жи́зни источи́вый жа́ждущим; ра́дуйся, я́ко живоно́сную си́лу водны́й исто́чник Тво́й доны́не сохраня́ет.

Ра́дуйся, Це́ркве Правосла́вныя храни́тельнице; ра́дуйся, прему́драя Игу́мение все́х оби́телей правосла́вных.

Ра́дуйся, оби́тели Ко́лочския ра́досте и покро́ве; ра́дуйся, сия́нием ико́ны Твоея́ подвиза́ющихся в не́й просвети́вшая.

Ра́дуйся, оби́телей святы́х и хра́мов благослове́ние и утвержде́ние; ра́дуйся, и́ноков и и́нокинь ко благогове́нию наста́внице.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 7.

Хотя́щи Руси́ от враго́в разоряеме́й милосе́рдие яви́ти, благоизво́лила еси́, Влады́чице, дарова́ти во́инству ру́сскому ико́ну Твою́ Ко́лочскую: тогда́, я́коже летопи́сец глаго́лет, изво́ли ца́рь Иоа́нн взя́ти чудотво́рную Твою́ ико́ну в похо́д на По́лоцк, и поведе́ во́ины своя́ на враги́, и побе́ду одержа́. Сего́ ра́ди прославля́юще Тя́, воспева́ем Сы́ну Твоему́ и Бо́гу на́шему побе́дную пе́снь: Аллилу́иа.

И́кос 7.

Но́вое зна́мение ми́лости Твоея́ яви́ла еси́, Пресвята́я Богоро́дице, во дни́ наше́ствия га́ллов и с ни́ми два́десяте язы́к на зе́млю на́шу, егда́ наде́жда спасе́ния угасе́, я́ко и се́рдце Росси́и – гра́д Москва́ плене́н и сожже́н бы́сть. Ты́ же, Влады́чице, святы́ми ико́нами Твои́ми, Смоле́нскою, Ко́лочскою и ины́ми мно́гими укрепи́ла еси́ христолюби́вое во́инство на́ше, та́же и побе́ду ди́вную на враги́ си́льныя и во бране́х иску́сныя дарова́ла еси́, и с безче́стием и́х от Оте́чества на́шего отгна́ла еси́. Те́мже хвалу́ и благодаре́ние Тебе́ принося́ще, взыва́ем:

Ра́дуйся, держа́вы Росси́йския благода́тное утвержде́ние; ра́дуйся, враго́в ея́ гро́зное посрамле́ние.

Ра́дуйся, от наше́ствия иноплеме́нных Оте́чество на́ше спаса́ющая; ра́дуйся, во бране́х си́лу ду́ха во́инов ру́сских возвыша́ющая.

Ра́дуйся, боголюби́вых во́инов ве́рная Храни́тельнице; ра́дуйся, блага́я и́х Покрови́тельнице.

Ра́дуйся, во́инов ру́сских на по́двиг ра́тный укрепля́ющая; ра́дуйся, вене́ц побе́ды и́м сплета́ющая.

Ра́дуйся, все́х за дру́ги своя́ ду́шу положи́вших упокое́ние; ра́дуйся, за ве́ру и Оте́чество на по́ли бра́ни убие́нных прославле́ние.

Ра́дуйся, ико́ны Твоя́ чудотво́рныя, я́ко зна́мя побе́ды, наро́ду на́шему дарова́вшая; ра́дуйся, непобеди́мая Воево́до вожде́й и во́инов правосла́вных.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 8.

Стра́нное и пресла́вное чу́до зри́м о Тебе́, Богома́ти, егда́ губи́тельная я́зва на страну́ на́шу на́йде и мно́жество челове́к умертви́, лю́дие же, гне́в Бо́жий ви́дяще, со слеза́ми ко святе́й ико́не Твое́й припа́даху, я́ко к исто́чнику Твоего́ милосе́рдия, и исцеля́хуся. Сего́ ра́ди ве́рнии в земли́ Можа́йской на вся́ко ле́то возно́сят моле́ние те́плое в па́мять сего́ ра́достнаго торжества́ спасе́ния мно́гих от поги́бели, воспева́юще Бо́гу благода́рственно: Аллилу́иа.

И́кос 8.

Ве́сь ми́р христиа́нский сла́вит и́мя Твое́, Преблагослове́нная Ма́ти Го́спода, и все́м ве́рным уте́шительно е́сть взира́ти на святу́ю ико́ну Твою́, на не́йже ви́дим Тя́, на руку́ держа́щую Преве́чнаго Младе́нца, с предстоя́щими святи́телем Никола́ем и проро́ком Илие́ю. Вся́к бо с ве́рою к не́й приходя́й в боле́знех исцеле́ние, в ско́рбех утеше́ние, в беда́х вспоможе́ние ско́ро прие́млет, се́рдце же свое́ в любви́ Бо́жией утвержда́ет, вопия́ к Тебе́, Уте́шительнице и Помо́щнице на́шей, такова́я:

Ра́дуйся, ку́пно со святи́телем Никола́ем и проро́ком Илие́ю зе́млю на́шу огражда́ющая; ра́дуйся, в годи́ну бе́дствий на по́мощь на́м ускоря́ющая.

Ра́дуйся, во дни́ мо́ра непрело́жная на́ша наде́ждо и спаси́тельнице; ра́дуйся, от смертоно́сныя я́звы ми́лостивая изба́вительнице.

Ра́дуйся, прекраще́нием я́звы благода́тную си́лу ико́ны Твоея́ возвести́вшая; ра́дуйся, заступле́нием Твои́м пра́ведный гне́в Бо́жий утоли́вшая.

Ра́дуйся, я́зв душе́вных и теле́сных цели́тельнице; ра́дуйся, все́х духо́вных даро́в ще́драя пода́тельнице.

Ра́дуйся, ду́ши и сердца́ на́ша любо́вию Боже́ственною воспламеня́ющая; ра́дуйся, самоотверже́нию и послуша́нию на́с науча́ющая.

Ра́дуйся, Хле́бом жи́зни на́с пита́ющая; ра́дуйся, я́ко Тобо́ю сла́достей духо́вных исполня́емся.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 9.

Всю́ страну́ Росси́йскую попуще́нием Бо́жиим потрясе́ бу́ря гоне́ний на Це́рковь Христо́ву, за грехи́ людски́я и беззако́ния: безу́мнии богобо́рцы святы́ни на́ша разори́ша, хра́мы Бо́жии оскверни́ша и кро́вь христиа́нскую проли́ша. Тогда́ оби́тель Ко́лочская разруше́на бы́сть от неи́стовых гони́телей, ико́на же Твоя́, Богома́ти, отъя́та и сокры́та бе́ от ве́рных. Но не возмо́же вра́г ро́да челове́ческаго угаси́ти ве́ру в покро́в Тво́й люде́й правосла́вных, в сокруше́нии серде́ц взыва́ющих Бо́гу: Аллилу́иа.

И́кос 9.

Вети́и многовеща́ннии не возмо́гут просла́вити по достоя́нию ди́вное вои́стину промышле́ние Твое́, Влады́чице: Це́рковь Ру́сская от плене́ния вла́стию безбо́жною свобожда́ется, разоре́нныя оби́тели и хра́мы возсозида́ются и красота́ церко́вная обновля́ется. Та́ко и Ко́лочская оби́тель, наси́лием безбо́жных отто́рженная, заступле́нием Твои́м, Богома́ти, па́ки возвраще́на бы́сть лю́дем правосла́вным, в не́йже ны́не со́бранных Тобо́ю се́стр во Христе́ просвеща́еши и на пу́ть спасе́ния наставля́еши, подвиза́ющи и́х воспева́ти Тебе́ с любо́вию такова́я:

Ра́дуйся, Це́рковь Христо́ву во дни́ гоне́ний омофо́ром Твои́м покры́вшая; ра́дуйся, страда́льцем за ве́ру благода́тное утеше́ние посыла́вшая.

Ра́дуйся, изнемога́ющих под тя́жестию креста́ укрепле́ние; ра́дуйся, и́стины распина́емыя в земли́ на́шей сохране́ние.

Ра́дуйся, в заточе́нии пра́вды ра́ди су́щих посеща́ющая; ра́дуйся, враго́в ве́ры правосла́вныя посрамля́ющая.

Ра́дуйся, гони́мым за пра́вду Ца́рствие Небе́сное уготовля́ющая; ра́дуйся, собо́ром новому́чеников и испове́дников сугу́бо воспева́емая.

Ра́дуйся, оби́тель Твою́, от безбо́жных разоре́нную, возста́вившая; ра́дуйся, благода́ть Твою́ возста́вленней оби́тели ниспосла́вшая.

Ра́дуйся, мно́гих де́в и же́н ко служе́нию Бо́гу в не́й собира́ющая; ра́дуйся, ко спасе́нию и́х до́бре наставля́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 10.

Спасти́ хотя́щи мно́гия лю́ди от находя́щих скорбе́й и боле́зней и ве́ру и́х утверди́ти во всеси́льное заступле́ние Твое́, Пресвята́я Де́во, яви́ла еси́ ди́вное зна́мение, егда́ спи́сок о́браза Твоего́ Ко́лочскаго торже́ственно принесе́н бы́сть в оби́тель Твою́. Ны́не же, Всеми́лостивая Ма́ти, о́браз Тво́й то́чит исцеле́ния мно́гим немощству́ющим, прибега́ющим к Тебе́, да вси́ облагода́тствованнии Тобо́ю согла́сно воспева́ют Бо́гу пе́снь: Аллилу́иа.

И́кос 10.

Стена́ еси́, Влады́чице, и прибе́жище се́страм оби́тели Ко́лочския, благослови́ла бо еси́ оби́тель святы́нею Свое́ю, огражда́ющи и́нокинь от вра́жиих ко́зней, от бе́д, скорбе́й и напа́стей, те́мже те́плится лампа́да неугаси́мая пред чудотво́рным о́бразом Твои́м, и да́же в нощи́ не умолка́ют воздыха́ния моли́твенная и похвалы́ сия́:

Ра́дуйся, оби́тели Ко́лочския неусы́пная блюсти́тельнице; ра́дуйся, ико́н Свои́х чудотво́рных пода́тельнице.

Ра́дуйся, святу́ю ико́ну Твою́ дарова́ти се́страм оби́тели изво́лившая; ра́дуйся, вни́ти с му́дрыми де́вами в Ца́рствие Небе́сное и́м помога́ющая.

Ра́дуйся, оби́тель Твою́ ико́ною, а́ки да́ром драгоце́нным, обогати́вшая; ра́дуйся, сердца́ и́нокинь оби́тели прише́ствием ико́ны возвесели́вшая.

Ра́дуйся, чудесы́ от ико́ны сея́ оби́тель Ко́лочскую просла́вльшая; ра́дуйся, ми́рное житие́ се́стр в не́й устроя́ющая.

Ра́дуйся, но́вую ми́лость и благода́ть ико́ною Твое́ю показа́вшая; ра́дуйся, поклоня́ющимся ико́не Твое́й ра́дость духо́вную подаю́щая.

Ра́дуйся, приходя́щих к не́й с ве́рою христиа́н покрови́тельнице; ра́дуйся, я́ко моли́твою пред не́ю прие́млем благода́тное утеше́ние.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 11.

Пе́ние хвале́бное прино́сим Ти́ с любо́вию, Богоро́дице, вели́кое бо мно́жество чуде́с явля́еши: се́, непра́здная раба́ Бо́жия, спасти́ хотя́щи обме́ршаго во чре́ве младе́нца своего́, вознесе́ сле́зную моли́тву Тебе́, Благода́тная, во оби́тели Ко́лочской, и пома́за себе́ еле́ем от чудотво́рныя ико́ны; и обре́теся ча́до жи́во. Егда́ же роди́ся, нареко́ша ю́ Анастаси́я, си́речь воскресе́ние, благода́рными усты́ воспева́юще пе́снь: Аллилу́иа.

И́кос 11.

Светоприе́мную свещу́ во тьме́ су́щим я́вльшуюся зри́м святу́ю ико́ну Твою́, Влады́чице Всеми́лостивая, сия́ бо сердца́ на́ша любо́вию согрева́ет, богохрани́мую страну́ на́шу благода́тию озаря́ет и оби́тель Ко́лочскую освеща́ет. Те́мже мо́лим Тя́: до после́дних дне́й ми́ра оби́тель сию́ сохрани́, подвиза́ющимся в не́й се́страм во Христе́ пу́ть ве́рный к Небеси́ укажи́, му́дрость и терпе́ние и́м да́руй, да сподо́бятся до сконча́ния дне́й свои́х в ра́дости воспева́ти Тебе́ си́це:

Ра́дуйся, оби́тели Ко́лочския благода́тное сокро́вище; ра́дуйся, и́нокинь ея́ незри́мая воспита́тельнице.

Ра́дуйся, нощны́х моле́ний се́стр ея́ ско́рое услы́шание; ра́дуйся, и́нокиням оби́тели наде́ждо ве́чнаго спасе́ния.

Ра́дуйся, все́м подвиза́ющимся всемо́щная покрови́тельнице; ра́дуйся, благоче́стно живу́щих де́в и же́н усе́рдная засту́пнице.

Ра́дуйся, обме́ршаго во чре́ве младе́нца оживотвори́вшая; ра́дуйся, пред ико́ною Твое́ю жену́ разсла́бленную исцели́вшая.

Ра́дуйся, непло́дных супру́гов чадоро́дием утеша́ющая; ра́дуйся, моля́щихся Тебе́ све́том благода́ти озаря́ющая.

Ра́дуйся, притека́ющих к ико́не Твое́й благословля́ющая; ра́дуйся, прося́щим щедро́ты Твоя́ излива́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 12.

Благода́ти неистощи́мыя зна́мение яви́ла еси́ прите́кшим во оби́тель Ко́лочскую безча́дным супру́гом, моли́тву Тебе́ вознося́щим и Богоро́дицу и Ма́терь Све́та Тя́ в пе́снех велича́ющим: не оста́вила еси́ и́х тще́тны, но дарова́ла еси́ и́м младе́нца, его́же нареко́ша и́менем Фео́дор, си́речь Бо́жий да́р. Мы́ же, ви́дяще такова́я чудеса́, Тобо́ю излива́емая, из глубины́ се́рдца воспева́ем благода́рственную пе́снь: Аллилу́иа.

И́кос 12.

Пою́ще Твоя́ дре́вния и но́выя ми́лости, восхваля́ем ико́ну Твою́ Ко́лочскую, Богома́ти, к не́йже в па́мять явле́ния ея́ лю́дие от все́х конце́в земли́ притека́ют, ча́юще от Тебе́ скорбе́й избавле́ния, неду́гов исцеле́ния, ра́дости исполне́ния и бла́г ве́чных сподобле́ния. Ты́ же, Всеми́лостивая, благодея́ния неисче́тная ико́ною Твое́ю да́руеши, да вси́ со́браннии во оби́тели на Ко́лочи в ра́дости воспева́ют Тебе́:

Ра́дуйся, благода́ть ве́лию ико́нам Твои́м дарова́вшая; ра́дуйся, всю́ вселе́нную све́том Ли́ка Твоего́ озари́вшая.

Ра́дуйся, Оте́чества на́шего Све́т невече́рний; ра́дуйся, Стено́ неруши́мая, от вся́ких бе́д на́с огражда́ющая.

Ра́дуйся, ико́ною Твое́ю мра́к грехо́вный отгоня́ющая; ра́дуйся, на по́двиг духо́вный неви́димо на́с укрепля́ющая.

Ра́дуйся, с Сы́ном Твои́м благода́рно поклоня́емая; ра́дуйся, Небе́сным во́инством неви́димо славосло́вимая.

Ра́дуйся, оби́телей и́ноческих ди́вная попечи́тельнице; ра́дуйся, ми́ро благоуха́нное, всему́ ми́ру излия́нное.

Ра́дуйся, Обра́дованная, во Успе́нии Твое́м на́с не оставля́ющая; ра́дуйся, Блага́я Врата́рнице, две́ри ра́йския ве́рным отверза́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 13.

О Всепе́тая Ма́ти, ро́ждшая все́х святы́х святе́йшее Сло́во! Приими́ моле́бное пе́ние на́ше, пред чудотво́рною ико́ною Твое́ю с ве́рою и благогове́нием возноси́мое, изба́ви на́с от вся́ких бе́д, скорбе́й и напа́стей, неду́ги на́ша исцели́, вся́ку зло́бу и вражду́ отжени́ от на́с и бу́дущия изми́ му́ки о Тебе́ вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел мно́жество и челове́к собо́ри сла́вят Тебе́, Небесе́ и земли́ Цари́цу, о явле́нии ико́ны Твоея́ Ко́лочския, в земли́ Моско́вской дре́вле просия́вшия, я́ко сокро́вище неисчерпа́емое, явле́нное для ве́чнаго спасе́ния на́шего. Те́мже мы́, все́ упова́ние на Тя́ возложи́вше и на святы́й о́браз Тво́й взира́юще, во умиле́нии серде́ц взыва́ем та́ко:

Ра́дуйся, страну́ Росси́йскую в жре́бий и достоя́ние Себе́ избра́вшая; ра́дуйся, ико́ны Твоя́ чудотво́рныя, я́ко зве́зды, в не́й умно́жившая.

Ра́дуйся, Де́во Пресвята́я, о́браз Тво́й чуде́сно на́м яви́вшая; ра́дуйся, зе́млю Моско́вскую све́том его́ озари́вшая.

Ра́дуйся, земли́ Можа́йской ико́ну Твою́ в зало́г благоволе́ния дарова́вшая; ра́дуйся, чудесы́ Твои́ми ве́ру в не́й утверди́вшая.

Ра́дуйся, оби́тели Ко́лочския ди́вная строи́тельнице; ра́дуйся, ве́рная ея́ Защи́тнице.

Ра́дуйся, боле́зни душе́вныя и теле́сныя ико́ною Твое́ю ско́ро врачу́ющая; ра́дуйся, во вся́ких беда́х и ну́ждах ско́рая на́ша Помо́щнице.

Ра́дуйся, Ле́ствице, от земли́ к Небеси́ возводя́щая; ра́дуйся, ра́дости ве́чныя на́с сподобля́ющая.

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Конда́к 1.

Взбра́нной Воево́де Влады́чице на́шей Богоро́дице благода́рственное прино́сим пе́ние о явле́нии ди́вныя ико́ны Ея́ Ко́лочския, зе́млю Можа́йскую просвети́вшия и вся́ ве́рная ча́да Це́ркве возвесели́вшия. Ты́ же, я́ко Всеми́лостивая Засту́пница и Всеблага́я Помо́щница, все́х ве́рою притека́ющих к Тебе́ от вся́ких бе́д и напа́стей защити́, да зове́м Ти́:

Ра́дуйся, Влады́чице, ико́ною Твое́ю любо́вь и ми́лость на́м явля́ющая.

Моли́тва.

О Пресвята́я Влады́чице Богоро́дице, Цари́це Небесе́ и земли́, Вы́шшая А́нгел и Арха́нгел и всея́ тва́ри Честне́йшая, Чи́стая Де́во Мари́е, ми́ру блага́я Помо́щнице, все́х христиа́н поможе́ние и утвержде́ние, и все́м во вся́ких ну́ждах избавле́ние! При́зри ны́не, о Всеми́лостивая Госпоже́, на рабы́ Твоя́, умиле́нною душе́ю и сокруше́нным се́рдцем Тебе́ моля́щихся, со слеза́ми к Тебе́ припа́дающих и пречи́стому и цельбоно́сному о́бразу Твоему́ поклоня́ющихся, Твоея́ же по́мощи и заступле́ния в ско́рбех и напа́стех свои́х прося́щих. Бу́ди за на́с хода́таица к Сы́ну Твоему́, Христу́ Бо́гу на́шему: мы́ бо гре́шнии не и́мамы ины́я Помо́щницы ра́зве Тебе́, Влады́чице. Ты́ еси́ на́ша наде́жда и упова́ние, Ты́ еси́ засту́пница и предста́тельница на́ша, Ты́ еси́ оби́димых защище́ние, печа́льных утеше́ние, скорбя́щих ра́дование, си́рых прибе́жище, вдо́в храни́тельница, де́в сла́ва, пла́чущих весе́лие, больны́х посеще́ние, немощны́х исцеле́ние, гре́шных спасе́ние. Сего́ ра́ди, о Богома́ти, к Тебе́ прибега́ем, и на Тво́й святы́й о́браз взира́юще, с любо́вию покланя́емся Тебе́ с Предве́чным на руку́ Твое́ю держи́мым Младе́нцем, Го́сподем на́шим Иису́сом Христо́м, и моле́бное пе́ние прино́сим, вопию́ще: поми́луй ны́, Ма́ти Бо́жия, и проше́ния на́ша испо́лни во бла́го, вся́ бо возмо́жна су́ть хода́тайству Твоему́ к Сы́ну Твоему́ и Бо́гу на́шему, Ему́же подоба́ет вся́кая сла́ва и че́сть, поклоне́ние и благодаре́ние, со Безнача́льным Его́ Отце́м и со Присносу́щным Ду́хом, ны́не и при́сно и во ве́ки веко́в. Ами́нь.

Моли́тва ина́я.

О Преблагослове́нная Госпоже́ Влады́чице Богоро́дице, прему́драя Небе́сная Игу́мение и Путеводи́тельнице ко спасе́нию и́нокинь оби́тели, и́менем Успе́ния Твоего́ нарече́нныя, ю́же избра́ла еси́ в достоя́ние Свое́ на ме́сте се́м, Твои́м благослове́нием осене́нном! Умоли́ Сы́на Твоего́ и Бо́га на́шего спасти́ от поги́бели все́х подвиза́ющихся во оби́тели на́шей, и я́коже дре́вле на ме́сте се́м мно́гия ми́лости Своя́ яви́ла еси́, та́ко и ны́не простри́ Покро́в Тво́й над на́ми, недосто́йными ча́ды Твои́ми, гре́шнии бо есмы́, но раби́ Твои́ до ве́ка. Те́мже мо́лим Тя́: озари́ ду́ши на́ша све́том Боже́ственныя благода́ти, покры́й на́с от вся́каго зла́, сохрани́ от вся́кия напа́сти, и клеветы́ челове́ческия и от наве́та вра́жия; боля́щим здра́вие да́руй, ду́ши на́ша от пле́на страсте́й свободи́, утверди́ в ми́ре и согла́сии житие́ на́ше, да́руй на́м кончи́ну христиа́нскую, безболе́зненну, непосты́дну, ми́рну, Боже́ственных Та́ин прича́стну, и Сама́ на́с в то́й ча́с спаси́ от го́рьких мыта́рств, и сподо́би в де́нь Суда́ ста́ти одесну́ю Сы́на Твоего́, Христа́ Бо́га на́шего. При́зри на оби́тель сию́ и сохрани́ ю́ це́лу и неврежде́ну, да возвыша́ется и сла́вится в не́й и́мя Пресвяты́я Тро́ицы и Твое́, Богома́ти, преблагослове́нное и́мя во ве́ки веко́в. Ами́нь.