Конда́к 1.

Избра́нней Предве́чным Царе́м Пресла́вней Влады́чице на́шей Богоро́дице, явле́нием ико́ны Своея́ Черво́нную Ру́сь просвети́вшей, похва́льная возсыла́ем пе́ния. Ты́ же, я́ко иму́щая держа́ву непобеди́мую и ми́лость неизрече́нную, от вся́ких на́с бе́д изба́ви и спаси́, да зове́м Ти́:

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

И́кос 1.

Арха́нгел и а́нгел мно́жество со стра́хом предстоя́т Тебе́, Де́ве чи́стей, и непостижи́мому воплоще́нию от Тебе́ Бо́га Сло́ва удивля́ющеся, немо́лчными гла́сы вопию́т: «Ра́дуйся, Благода́тная, Госпо́дь с Тобо́ю!» Мы́ же, гре́шнии, прославля́ем Твое́ безме́рное милосе́рдие к рабо́м Твои́м, во тьме́ лжему́дрия униа́тскаго седя́щим, явле́нием ико́ны Твоея́ дарова́нное, и на Пречи́стый Ли́к Тво́й взира́ти не дерза́ем, оба́че смире́нно из глубины́ души́ глаго́лем си́це:

Ра́дуйся, Ма́ти Царя́ Небе́снаго, и еди́наго от земноро́дных не забыва́ющая; ра́дуйся, поги́бели созда́ний Сы́на Твоего́ зре́ти не терпя́щая.

Ра́дуйся, заблу́ждшия о́вцы ста́да Христо́ва взыску́ющая; ра́дуйся, Па́стыря До́браго, Сы́на Твоего́, подража́ющая и на ра́ме ты́я восприе́млющая.

Ра́дуйся, ко Отцу́ Небе́сному те́х приводя́щая; ра́дуйся, и вся́ ны́ на пу́ть спасе́ния наставля́ющая.

Ра́дуйся, в ско́рби моли́твы и воззва́ния к Бо́гу в сердца́ на́ша влага́ющая; ра́дуйся, я́же во благи́х проше́ния на́ша ко Го́споду вознося́щая.

Ра́дуйся, по исполне́нии те́х хвало́ю и благодаре́нием уста́ на́ша исполня́ющая; ра́дуйся, не то́чию усты́, но и де́лы хвали́ти Го́спода науча́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 2.

Ви́дяще па́стырие пречу́дную ико́ну Твою́, а́ки со́лнце на дре́ве сия́ющую, потща́шася о явле́нии ея́ все́м правосла́вным лю́дем возвести́ти. Ти́и же во мно́жестве притека́ху на ме́сто явле́ния пречу́днаго о́браза Твоего́, Влады́чице, и ви́дяще то́ки чуде́с, от ико́ны Твоея́ источа́емыя, со слеза́ми благодаре́ния взыва́ху о Тебе́ Бо́гу: Аллилу́иа.

И́кос 2.

Разуме́ти и́щуще преди́вное чу́до о явле́нии ико́ны Твоея́, Пресвята́я Де́во, суему́дреннии лю́дие испытова́ху чудеса́, быва́емыя от нея́, мы́ же, не де́рзостию, но стра́хом то́чию и ве́рою взыва́ем Тебе́ си́це:

Ра́дуйся, исцеле́ний чуде́сный и живоно́сный Исто́чниче; ра́дуйся, благода́ти Бо́жия неоскудева́ющая Сокро́вищнице, немощны́я врачу́ющая.

Ра́дуйся, Ма́ти Сло́ва Бо́жия, немы́м и косноязы́чным уста́ разверза́ющая; ра́дуйся, Ма́ти Све́та И́стиннаго, о́чи слепы́х просвеща́ющая.

Ра́дуйся, Ма́ти Го́спода Си́л, си́лы разсла́бленных возставля́ющая; ра́дуйся, Ма́ти Творца́ слу́х дарова́вшаго, глухи́м ушеса́ отверза́ющая.

Ра́дуйся, Ма́ти Его́же трепе́щут де́мони, злы́я ду́хи изгоня́ющая; ра́дуйся, Ма́ти Ра́зум соверше́н Иму́щаго, ра́зум лише́нным ума́ возвраща́ющая.

Ра́дуйся, Ма́ти Врача́ ду́ш и теле́с на́ших, врача́ми земны́ми оста́вленных от одра́ боле́зни воздвиза́ющая; ра́дуйся, Ма́ти Живота́ ве́чнаго, ме́ртвыя воскреша́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 3.

Си́лу чуде́с от святы́я Твоея́ ико́ны излива́емую ви́дяще, лука́вии лати́няне похи́тиша чу́дный о́браз Тво́й, Влады́чице, правосла́вным лю́дем ко утеше́нию Тобо́ю низпо́сланный, и в Ле́снинском косте́ле поста́виша и. Ты́ же не благоволи́ла еси́, да сокро́вище сие́ у иносла́вных пребу́дет, но па́ки возврати́ла еси́ святу́ю ико́ну Твою́ ве́рным рабо́м Твои́м, и́же с ра́достию и любо́вию прия́ша ю́ и благода́рными усты́ воспе́ша Бо́гу: Аллилу́иа.

И́кос 3.

Име́я ве́лию ре́вность о па́стве свое́й, е́же укрепи́тися е́й в ве́ре правосла́вней, святи́тель Варша́вский Лео́нтий умоли́ Тя́, Пречи́стая, да на ме́сте явле́ния ико́ны Твоея́ оби́тель и́ноческая бу́дет. Ты́ же, Всеблага́я, моли́тве сего́ до́браго па́стыря вняла́ еси́ и под кро́в Тво́й святы́й многочи́сленный ли́к и́нокинь собрала́ еси́, да, во сла́ву Бо́жию тружда́ющеся, Тебе́ вопию́т:

Ра́дуйся, Хо́лмския Руси́ Со́лнце пресве́тлое; ра́дуйся, Це́ркве Правосла́вныя Храни́тельнице, лука́вством и наси́лием отто́рженных ча́д ея́ любо́вию возсоединя́ющая.

Ра́дуйся, оби́тели Ле́снинстей Ра́досте и Покро́ве; ра́дуйся, де́в собо́ры ко служе́нию младе́нствующим в Правосла́вии собра́вшая.

Ра́дуйся, и́нокиням в служе́нии се́м пу́ть спасе́ния указа́вшая; ра́дуйся, безма́терных сиро́т незри́мая Воспита́тельнице.

Ра́дуйся, боля́щим ско́рое исцеле́ние низпосыла́ющая; ра́дуйся, кро́ва лише́нным Страннопри́имнице и по́мощи Пода́тельнице.

Ра́дуйся, все́м с ве́рою в оби́тель Твою́ притека́ющим Покро́в и Снабде́ние; ра́дуйся, Святу́ю оби́тель Твою́ многоразли́чными чудесы́ испо́лнившая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 4.

Бу́рями многомяте́жнаго ми́ра сего́ вла́еми и волна́ми бе́д и скорбе́й потопля́еми, вси́ со слеза́ми и моли́твою притека́ющии к Тебе́, Засту́пнице, ти́хое приста́нище в Тебе́ обрета́ют и с ра́достию и благодаре́нием вопию́т о Тебе́ Спа́су Христу́: Аллилу́иа.

И́кос 4.

Слы́шаша бли́жняя и да́льняя, я́ко Госпо́дь и Влады́ка вся́ческих дарова́ Тя́ на́м в ико́не Твое́й, Богоро́дице, я́ко благу́ю Уте́шительницу все́м на́шим ско́рбем и не́мощем спострада́ти могу́щую: Ты́ бо Сама́, Пречи́стая, во дни́ земна́го жития́ Твоего́ ну́жды и ско́рби терпе́ла еси́. Сего́ ра́ди вся́к во́зраст, чи́н и сосло́вие к чудотво́рней ико́не Твое́й непреста́нно припа́дают и, те́пле Тобо́ю прие́млеми, уми́льно зову́т Ти́:

Ра́дуйся, па́стырем ста́да Христо́ва Прему́драя Наста́внице; ра́дуйся, ча́да и́х духо́вная смире́нию и послуша́нию науча́ющая.

Ра́дуйся, младе́нцем Пита́тельнице, ма́тернее попече́ние о ни́х явля́ющая; ра́дуйся, отроко́м к восприя́тию поле́знаго уче́ния ра́зум и се́рдце отверза́ющая.

Ра́дуйся, ю́ныя в чистоте́ соблюда́ющая и от душепа́губных де́йств огражда́ющая; ра́дуйся, роди́телем и наста́вником в детоводи́тельстве и в ско́рбех о ча́дех помога́ющая.

Ра́дуйся, де́вы христолюби́выя плода́ми ду́ха и ве́ры украша́ющая; ра́дуйся, ста́рцев и ста́риц кре́пкий Же́зле.

Ра́дуйся, гони́мым Предста́тельнице и оби́димым Засту́пнице; ра́дуйся, в вели́ких беда́х и напа́стех ди́вная Помо́щнице, и в ма́лых жите́йских ну́ждах на́с не оставля́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 5.

Боготе́чную звезду́ узре́вши чудотво́рную ико́ну Твою́, Ма́ти Бо́жия, вся́ Ру́сь Черво́нная тоя́ зари́ после́дова и, я́ко свети́льник держа́щи ю́, и́стину Правосла́вия то́ю пости́же и в не́й утверди́вшися, возра́довася ду́хом, вопию́щи о Тебе́ Го́споду Си́л: Аллилу́иа.

И́кос 5.

Ви́девши Тя́ дре́вле, Пресвята́я Де́во, а́ки звезду́ путево́дную, возсия́вшую во ико́не Твое́й ча́дом земли́ Хо́лмския, под и́гом инове́рных во мра́це неве́дения погиба́ющим, и ны́не вся́ страна́ на́ша правосла́вная мно́гою ско́рбию возгара́ема о ко́знех вра́жиих, на ве́ру ея́ святу́ю возстаю́щих, со слеза́ми припа́дает к святы́м стопа́м Твои́м, Влады́чице, я́ко благо́й Одиги́трии, моля́щи извести́ ю́ из мра́ка неве́рия, ересе́й и раско́лов, мно́гая возста́ния врага́ на ню́ утоли́ти и о́чи все́х заблу́ждшихся све́том и́стины просвети́ти, да и ти́и с на́ми сла́вят Всечестно́е и Великоле́пое И́мя Святы́я Тро́ицы и Тебе́ ра́достно взыва́ют си́це:

Ра́дуйся, Це́ркве Христо́вы непозы́блемый Покро́ве; ра́дуйся, Оте́чества на́шего Све́те Невече́рний.

Ра́дуйся, апо́стольская пресла́вная Похвало́; ра́дуйся, святи́телей изря́дное Украше́ние.

Ра́дуйся, му́чеников кре́пкое утвержде́ние; ра́дуйся, и́ноков и и́нокинь спаси́тельное наставле́ние.

Ра́дуйся, су́щих в темни́цах, заточе́ниих и гоне́ниих ве́ры ра́ди и пра́вды святы́я, посеще́ние и избавле́ние; ра́дуйся, враго́в ве́ры и́стинныя посрамле́ние.

Ра́дуйся, ересе́й и тлетво́рных уче́ний истребле́ние; ра́дуйся, все́х ко́зней вра́жиих проти́ву и́стинных рабо́в Бо́жиих разруше́ние.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 6.

Пропове́дует свята́я ико́на Твоя́, Пречи́стая Де́во, неизглаго́ланную бе́здну милосе́рдия Бо́жия к ро́ду на́шему чудесы́, от нея́ быва́емыми, се́рдца ве́рных озаря́ющи ра́достию и весе́лием и к пе́нию наставля́ющи, неве́рныя же посрамля́ющи, неве́дущия пе́ти: Аллилу́иа.

И́кос 6.

Возсия́ла еси́ я́ко со́лнце и́стинное во ико́не Твое́й, Богоизбра́нная Отрокови́це Мари́е, луча́ми ма́терния любве́ Своея́ на́с согрева́ющи; сего́ ра́ди со смире́нием мо́лим Тя́: умилосе́рдися, Госпоже́ Пресвята́я, на бе́дствующия рабы́ Твоя́, изба́ви на́с от все́х напа́стей, бе́д и скорбе́й, находя́щих на ны́ за грехи́ на́ша, да Тобо́ю ра́дости прича́стницы бы́вше, зове́м Ти́:

Ра́дуйся, ми́р на зе́млю прине́сшая; ра́дуйся, ко спасе́нию на́с наставля́ющая.

Ра́дуйся, ве́чныя ра́дости на́с сподобля́ющая; ра́дуйся, и вре́менную жи́знь на́шу до́бре устроя́ющая.

Ра́дуйся, в годи́ну бра́ней Держа́вная Предводи́тельнице; ра́дуйся, во дни́ ми́ра от сна́ грехо́внаго возбужде́ние.

Ра́дуйся, пле́нных чуде́сное избавле́ние; ра́дуйся, вну́тренних нестрое́ний миротвори́тельнице.

Ра́дуйся, от гла́да, огня́, и во́днаго потопле́ния защища́ющая; ра́дуйся, жа́ждующую зе́млю дождя́ми благода́тными напоя́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 7.

Хотя́й Человеколю́бец Госпо́дь вве́рити и на́с, я́коже возлю́бленнаго ученика́ Своего́, Твоему́ Ма́тернему заступле́нию, Влады́чице, благоволи́ яви́ти на́м пречу́дную ико́ну Твою́ в вели́кий пра́здник Воздви́жения Честна́го и Животворя́щаго Креста́ Своего́, да научи́мся ку́пно с Тобо́ю сраспина́тися Ему́ душе́ю и се́рдцем и в са́мых страда́ниих свои́х, взира́юще на пречи́стый Ли́к Тво́й, взыва́ти Ему́: Аллилу́иа.

И́кос 7.

Но́вое чу́до и боголе́пное соде́ла Госпо́дь явле́нием ико́ны Твоея́, Пречи́стая, в де́нь поклоне́ния Честно́му Кресту́ и Боже́ственным Страсте́м Его́, я́ко да и мы́, воспомина́юще ско́рби Твоя́, егда́ предстоя́ше Кресту́ Сы́на Твоего́ и ору́жие про́йде святу́ю ду́шу Твою́, во́змем Кре́ст Его́ и Тебе́ возопии́м си́це:

Ра́дуйся, смотре́вшая Сы́на Своего́ распя́тие и утро́бою терза́вшаяся, но а́бие си́лу Креста́ Его́ просла́вившая; ра́дуйся, ски́петром Рождества́ Твоего́ ху́лящия Си́лу Кре́стную поража́ющая.

Ра́дуйся, Це́рковь Христо́ву во дни́ гоне́ний и кре́стных страда́ний ея́ омофо́ром Свои́м покрыва́ющая; ра́дуйся, И́стину, непреста́нно распина́емую, защища́ющая.

Ра́дуйся, ру́це Свои́ к Распросте́ршему дла́ни на Животворя́щем Дре́ве за все́х на́с простира́ющая; ра́дуйся, изнемога́ющия под тя́жестию креста́ укрепля́ющая.

Ра́дуйся, в са́мых лю́тых ско́рбех милосе́рдое промышле́ние Сы́на Твоего́ во спасе́ние ду́ш на́ших разуме́ти науча́ющая; ра́дуйся, Воскресе́нием Сы́на Твоего́ возвели́ченная, и на́с, ве́рою и любо́вию Тя́ велича́ющих, на высоту́ сла́вы небе́сныя вознося́щая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 8

Странноле́пная чудеса́, от ико́ны Ле́снинския быва́емыя, ви́девше, устрани́мся суеты́ ми́ра сего́ и, вся́ на́ша помышле́ния на боже́ственная прело́жше, воззове́м к не́й во умиле́нии: помяни́ на́с, Влады́чице, стра́нствующих во юдо́ли се́й плаче́вней и многомяте́жней, упра́ви пу́ть на́ш в го́рняя и введи́ в черто́г Небе́сный с му́дрыми де́вами, да ку́пно с ни́ми воспое́м богокра́сную пе́снь Жениху́ Христу́: Аллилу́иа.

И́кос 8.

Вся́ еси́ любо́вь и милосе́рдие, вся́ еси́ наде́жда на́ша и ра́дость неизглаго́ланная, Ма́ти Го́спода Вы́шняго: ви́дим бо Тя́ у́мными очесы́ на́шими стоя́щую пред престо́лом Влады́ки живота́ и сме́рти, те́пле Его́ умоля́ющую, да отве́рзет две́ри благоутро́бия Своего́ все́м рабо́м Свои́м, в ми́ре су́щим и от жития́ сего́ преста́вльшимся. Сия́ благосе́рдная моли́тва Твоя́ подвиза́ет на́с ра́достно взыва́ти Тебе́:

Ра́дуйся, ми́ру Покро́ве и Заступле́ние; ра́дуйся, Стено́ неруши́мая, от вся́ких на́с бе́д огражда́ющая.

Ра́дуйся, от напра́сныя сме́рти и непра́веднаго убие́ния спаса́ющая; ра́дуйся, христиа́нския кончи́ны на́с сподобля́ющая.

Ра́дуйся, в стра́шный ча́с сме́рти на́м помога́ющая; ра́дуйся, и по исхо́де из те́ла ду́ши ве́рных ра́б Свои́х от го́рьких мыта́рств и те́мных духо́в защища́ющая.

Ра́дуйся, ка́ющимся гре́шником на суде́ Бо́жии кре́пкое Заступле́ние; ра́дуйся, ве́чных муче́ний избавле́ние.

Ра́дуйся, ра́йския две́ри на́м отверза́ющая; ра́дуйся, в Ца́рство сла́вы Христо́вы на безконе́чныя ве́ки на́с водворя́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 9.

Вся́кая похвала́ не довле́ет, Пречи́стая Де́во, ко прославле́нию ми́лостей и щедро́т Твои́х от ико́ны Ле́снинския излива́емыя на приходя́щия, покланя́ющияся и с любо́вию лобыза́ющия ю́. Оба́че, Блага́я су́щи, ве́ру приими́ и усе́рдие на́ше, и Сама́ испо́лни Твоего́ хвале́ния недосто́йная уста́ на́ша, я́ко да пое́м о Тебе́ Бо́гу: Аллилу́иа.

И́кос 9.

Вити́йствующий не мо́жет язы́к пове́дати, Богоро́дице, ка́ко яви́лася еси́ и́стинная Ма́ти Предве́чнаго Бо́га, о на́с милосе́рдовавшаго и, де́вства Твоего́ печа́ти не разруши́в, пло́ть от Тебе́ восприи́мшаго. Мы́ же, о неизглаго́ланнем та́инстве Боговочелове́чения и о мно́жестве благодея́ний Твои́х с ве́рою и тре́петом помышля́юще и коле́на серде́ц на́ших преклоня́юще, ублажа́ем Тя́ си́це:

Ра́дуйся, Сло́ву Бо́жию пло́ть взаимода́вшая; ра́дуйся, Дре́во Живота́, от Него́же челове́ком Пло́д спасе́ния прозябе́.

Ра́дуйся, всеми́рная Ра́досте, Е́юже на́м живо́т ве́чный возсия́; ра́дуйся, страну́ Хо́лмскую све́том Свои́м озари́вшая и лучи́ све́та на все́х на́с распростре́вшая.

Ра́дуйся, Засту́пнице правосла́вным лю́дем; ра́дуйся, мно́гажды в напа́стех, беда́х и боле́знех ско́рую по́мощь те́м явля́ющая.

Ра́дуйся, от смертоно́сных ра́н и я́зв всегуби́тельных чуде́сное избавле́ние; ра́дуйся, во у́зах и плене́нии су́щим ми́лостивая Печа́льнице.

Ра́дуйся, все́м страда́льцем благода́тное утеше́ние низпосыла́ющая; ра́дуйся, все́м по коего́ждо потре́бе ско́рую по́мощь подаю́щая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 10.

Спасти́ хотя́й хо́лмския лю́ди, в се́ти лука́вства лати́нскаго уловле́нныя, Человеколю́бец Госпо́дь дарова́ те́м, Влады́чице, чудотво́рную ико́ну Твою́, я́же, а́ки лампа́да неугаса́ющая, Боже́ственным све́том сия́ет все́м, огне́м же любве́ Твоея́ ко святе́й Це́ркви Правосла́вней вся́ привлека́ет, да согла́сно пою́т Творцу́: Аллилу́иа.

И́кос 10.

Стена́ и прибе́жище правосла́вным лю́дем яви́ся ико́на Твоя́, Небесе́ и земли́ Цари́це: и́бо не то́кмо просвеще́ния ра́ди рабо́в Свои́х, пре́лестию ло́жнаго едине́ния с еретики́ ослепле́нных, но и во утеше́ние стра́ждущих за и́стинную ве́ру, благоизво́лила еси́ созда́ти оби́тель Свою́ посреде́ бла́т и де́брей, да све́т Тво́й во тме́ све́тится. Сего́ бо ра́ди мно́зи, гла́дом духо́вным истаева́ющии и и́стины жа́ждущии, к Тебе́, я́ко к ще́дрей Пита́тельнице, Хле́бом жи́зни снабдева́ющей, прибега́ют и, к Живоно́сному вои́стину Исто́чнику, чудотво́рней ико́не Твое́й припа́дающе, насыще́ни и напое́ни, с весе́лием взыва́ют Ти́ си́це:

Ра́дуйся, Ве́ры Правосла́вныя непоколеби́мый Сто́лпе; ра́дуйся, лжеучи́телей ерети́ческих Прогони́тельнице.

Ра́дуйся, за святу́ю ве́ру подвиза́ющихся Утвержде́ние; ра́дуйся, ревну́ющих о благоче́стии благослове́ние.

Ра́дуйся, де́вствующих чистото́ и сла́во; ра́дуйся, оби́телей и́ноческих ди́вная Печа́льнице и Наста́внице.

Ра́дуйся, моля́щихся Тебе́ Ра́досте; ра́дуйся, по́стников Наслажде́ние.

Ра́дуйся, все́х благи́х проше́ний ско́рое исполне́ние; ра́дуйся, Всеблага́я Уте́шительнице, сле́зы пла́чущих отира́ющая и печа́ль и́х на ра́дость прелага́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 11.

Пе́ние хвале́бное, Пресвята́я Влады́чице, пода́ждь си́лу приноси́ти Тебе́, ели́ко е́сть произволе́ние ду́ш на́ших: и́бо, а́ще и удо́бее молча́ние храни́ти пред мно́жеством щедро́т и чуде́с Твои́х, но любо́вию и ра́достию дви́жими, немо́лчно Бо́гу вопию́т о Тебе́ уста́ на́ша: Аллилу́иа.

И́кос 11.

Светоприе́мную свещу́, су́щим во тме́ я́вльшуюся, зри́м святу́ю ико́ну Твою́, о Богома́ти: сия́ бо в на́ших студе́них сердца́х пла́мень моли́твы и любве́ к бли́жнему возжига́ет и к ра́зуму Боже́ственному наставля́ет воспева́ющия Тебе́ си́це:

Ра́дуйся, све́том благода́ти Бо́жия ду́ши ве́рных озаря́ющая; ра́дуйся, и омраче́нная сердца́ неве́рующих просвеща́ющая.

Ра́дуйся, сомне́ния на́ша о и́стине Бо́жией я́ко пра́х возмета́ющая; ра́дуйся, стру́пы на́ша грехо́вныя врачу́ющая.

Ра́дуйся, свети́льники ду́ш на́ших еле́ем ми́лости исполня́ющая; ра́дуйся, кро́ткия и смире́нныя вознося́щая.

Ра́дуйся, го́рдыя и си́льныя низлага́ющая; ра́дуйся, вражду́ющих примире́ние.

Ра́дуйся, оби́димым Засту́пнице и оби́дящим Вразумле́ние; ра́дуйся смяте́нным душа́м ми́р да́рующая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 12.

Благода́ти неистощи́мыя зна́мения дарова́ на́м, Влады́чице, в чудотво́рней ико́не Твое́й все́х долго́в Реши́тель, прише́дый Тобо́ю ко отше́дшим Того́ благода́ти; те́мже мо́лим Тя́, Пренепоро́чная Де́во: моли́ся Сы́ну Твоему́ Христу́ Бо́гу на́шему, я́ко да, раздра́в рукописа́ние грехо́в на́ших, поми́лует на́с в жи́зни се́й вре́менней и в ве́чней да прии́мет от все́х на́с хвале́бную пе́снь: Аллилу́иа.

И́кос 12.

Со стра́хом пою́ще, вопию́ще, взыва́юще и глаго́люще: «Свя́т, Свя́т, Свя́т Госпо́дь Бо́г Савао́ф», пое́м, благослови́м, благодари́м и Тебе́, Влады́чице, о пресла́внем явле́нии ико́ны Твоея́ и о все́х благодея́ниих, я́же оби́льно на ны́ излива́еши; Ты́ же покры́й на́с, Влады́чице, пречу́дным омофо́ром Твои́м, освяти́ на́с, удобри́, вразуми́ и моли́ся о на́с ко Го́споду, да ми́лостив бу́дет к на́м, вся́кия непра́вды испо́лненным, и да проба́вит благода́ть Свою́ чту́щим Тя́ во святе́й ико́не Твое́й и принося́щим Ти́ похвалы́ таковы́я:

Ра́дуйся, всеми́рная Ра́досте; ра́дуйся, Исто́чниче присноживы́я воды́.

Ра́дуйся, сия́нием из Тебе́ возсия́вшаго Све́та озаре́нная; ра́дуйся, вся́ Небе́сныя Си́лы чистото́ю превозше́дшая.

Ра́дуйся, Честне́йшая Херуви́м и Сла́внейшая Серафи́м; ра́дуйся, одушевле́нный хра́ме Ду́ха Всесвята́го.

Ра́дуйся, примире́ние Бо́га и челове́ков; ра́дуйся, необурева́емое Приста́нище все́х к Тебе́ притека́ющих.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 13.

О, Всепе́тая Ма́ти, невмести́маго Бо́га вмести́вшая и ра́дость ми́ру роди́вшая! Приими́ сие́ ма́лое хвале́бное приноше́ние на́ше, и умоли́ Сы́на Твоего́ и Бо́га на́шего, да изба́вит Це́рковь Свою́ и оте́чество на́ше от вра́г ви́димых и неви́димых и все́х ве́рных рабо́в Свои́х да сподо́бит в селе́ниих ра́йских водвори́тися, во е́же зва́ти Ему́ о Тебе́ во вся́ ве́ки: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгел и а́нгел мно́жество со стра́хом предстоя́т Тебе́, Де́ве чи́стей, и непостижи́мому воплоще́нию от Тебе́ Бо́га Сло́ва удивля́ющеся, немо́лчными гла́сы вопию́т: «Ра́дуйся, Благода́тная, Госпо́дь с Тобо́ю!» Мы́ же, гре́шнии, прославля́ем Твое́ безме́рное милосе́рдие к рабо́м Твои́м, во тьме́ лжему́дрия униа́тскаго седя́щим, явле́нием ико́ны Твоея́ дарова́нное, и на Пречи́стый Ли́к Тво́й взира́ти не дерза́ем, оба́че смире́нно из глубины́ души́ глаго́лем си́це:

Ра́дуйся, Ма́ти Царя́ Небе́снаго, и еди́наго от земноро́дных не забыва́ющая; ра́дуйся, поги́бели созда́ний Сы́на Твоего́ зре́ти не терпя́щая.

Ра́дуйся, заблу́ждшия о́вцы ста́да Христо́ва взыску́ющая; ра́дуйся, Па́стыря До́браго, Сы́на Твоего́, подража́ющая и на ра́ме ты́я восприе́млющая.

Ра́дуйся, ко Отцу́ Небе́сному те́х приводя́щая; ра́дуйся, и вся́ ны́ на пу́ть спасе́ния наставля́ющая.

Ра́дуйся, в ско́рби моли́твы и воззва́ния к Бо́гу в сердца́ на́ша влага́ющая; ра́дуйся, я́же во благи́х проше́ния на́ша ко Го́споду вознося́щая.

Ра́дуйся, по исполне́нии те́х хвало́ю и благодаре́нием уста́ на́ша исполня́ющая; ра́дуйся, не то́чию усты́, но и де́лы хвали́ти Го́спода науча́ющая.

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Конда́к 1.

Избра́нней Предве́чным Царе́м Пресла́вней Влады́чице на́шей Богоро́дице, явле́нием ико́ны Своея́ Черво́нную Ру́сь просвети́вшей, похва́льная возсыла́ем пе́ния. Ты́ же, я́ко иму́щая держа́ву непобеди́мую и ми́лость неизрече́нную, от вся́ких на́с бе́д изба́ви и спаси́, да зове́м Ти́:

Ра́дуйся, премилосе́рдая Ма́ти, все́х на́с любо́вию Свое́ю покрыва́ющая.

Моли́тва.

Цари́це моя́ преблага́я, Наде́ждо моя́ Богоро́дице, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ ско́рбь, помози́ ми́ я́ко не́мощну, окорми́ мя́ я́ко стра́нна. Оби́ду мою́ ве́си, разреши́ ту́, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни благи́я Уте́шительницы, то́кмо Тебе́, о Богома́ти; я́ко да сохрани́ши мя́ и покры́еши во ве́ки веко́в. Ами́нь.