Конда́к 1.

Избра́нной от все́х родо́в Цари́це и Влады́чице ми́ра, ми́лостию Свое́ю страну́ сию́ озаря́ющей, похва́льное пе́ние прино́сим Ти́, Богоро́дице. Ты́ же, я́ко иму́щая дерзнове́ние к Сы́ну Твоему́ и Бо́гу, от вся́ких на́с бе́д свободи́, да зове́м Ти́:

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

И́кос 1.

Арха́нгела гла́с усты́ недосто́йными прино́сим Ти́, Чи́стая, я́ко благоизво́лила еси́ дарова́ти сию́ чудотво́рную ико́ну Твою́ кня́зю Святосла́ву, да препода́ст ю́ в благослове́ние Твое́, ми́лость же Твоя́ на стране́ на́шей бы́сть и ико́на Твоя́ бы́сть на́м вы́ну в зна́мение Твоего́ покро́ва неотсту́пнаго и в при́сное на́м утеше́ние и ра́дование. Благодаря́ще у́бо Тя́, с весе́лием зове́м Ти́:

Ра́дуйся, от а́нгелов воспева́емая и от всея́ тва́ри сла́вимая; ра́дуйся, херуви́м честне́йшая и серафи́м без сравне́ния сла́внейшая.

Ра́дуйся, небе́сных си́л превы́сшая и а́нгельския чи́ны превосходя́щая; ра́дуйся, в честне́й ико́не Твое́й от все́х родо́в покланя́емая.

Ра́дуйся, преблагослове́нная гра́ду Му́рому похвало́; ра́дуйся, присноблаже́нное Ряза́ни украше́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 2.

Ви́дя о себе́ Бо́жие смотре́ние, да просвети́т жи́тели гра́да Му́рома, благове́рный кня́зь Константи́н со свяще́нники и во́и в страну́ Му́ромскую оты́де, взе́м честны́й о́браз Тво́й, Влады́чице, и всю́ наде́жду на Тя́ и Бо́га возложи́, Ему́же и поя́ше: Аллилу́иа.

И́кос 2.

Разуме́ти неотсту́пный покро́в Тво́й и всеси́льную по́мощь Твою́ дарова́ла еси́, Пречи́стая, благове́рному кня́зю. Того́ ра́ди, а́ще и я́ростию срето́ша его́ непокори́вии иноплеме́нницы и сы́на его́ уби́ша, оба́че ника́коже смути́ся, ниже́ от наме́рения своего́ отступи́, но и в гра́д Му́ром вни́де, и на княже́нии свое́м утверди́ся, благода́рне воспева́я Ти́:

Ра́дуйся, прише́ствием святы́я ико́ны Твоея́ гра́д Му́ром озари́вшая; ра́дуйся, ми́лостивым ли́ком Твои́м сердца́ неве́рных умягчи́вшая.

Ра́дуйся, ве́рным лю́дем Твои́м всеси́льную по́мощь Твою́ в бра́ни яви́вшая; ра́дуйся, иноплеме́нники, в ожесточе́нии су́щия, вразуми́ти изво́лившая.

Ра́дуйся, проти́вныя сове́ты и́х сокруши́вшая; ра́дуйся, к све́ту ве́ры Христо́вы ты́я наставля́ющая.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 3.

Си́лою Вы́шняго утверди́ся благове́рный кня́зь Константи́н во гра́де Му́роме и, неизрече́нное милосе́рдие и заступле́ние Твое́, Всеми́лостивая, помина́я, а́бие воздви́же це́рковь Тебе́ в че́сть Благове́щения Твоего́, иде́же и ико́ну Твою́ святу́ю благоле́пне поста́ви, со умиле́нием вопия́ Бо́гу: Аллилу́иа.

И́кос 3.

Име́я Тя́ богоизбра́нную помо́щницу во апо́стольском по́двизе, благове́рный кня́зь Константи́н ника́коже устраши́ся, егда́ неве́рнии идолослужи́телие со ору́жием и во́плем вели́ким приидо́ша к нему́, умертви́ти его́ помышля́юще, но чу́дную ико́ну Твою́ на ру́ки взе́м, еди́н к ни́м изы́де. Те́мже, присноде́вственный ли́к Тво́й зря́ще, вострепета́ша нечести́вии и падо́ша ни́ц, а́ки ме́ртвии. Ве́рнии же лю́дие Твои́, сему́ пресла́вному зна́мению дивя́щеся, воспева́ют Ти́ си́це:

Ра́дуйся, ве́рнаго раба́ Твоего́ от нечести́вых огради́вшая; ра́дуйся, бесо́вскую ле́сть те́м обличи́вшая.

Ра́дуйся, ра́дость небеси́ и земли́ тогда́ яви́вшая; ра́дуйся, люде́й безбо́жных и заблу́ждших ди́вное вразумле́ние.

Ра́дуйся, ста́ду Твоему́ покро́ве и при́сное утеше́ние; ра́дуйся, приста́нище на́ше ти́хое и всегда́ гото́вое заступле́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 4.

Бу́рю зло́бы и я́рости безду́шныя ути́шила еси́, Всеблага́я, и в ра́зум и́стины привела́ еси́ тогда́ нечести́выя, ви́девшим и́м святу́ю ико́ну Твою́, а́ки со́лнце, сия́ющую, лице́ же кня́зя, а́ки а́нгельское, смири́шася зело́, и со стра́хом приступа́юще к нему́, креще́ния прося́ху, да Бо́гу еди́ному науча́тся пе́ти: Аллилу́иа.

И́кос 4.

Слы́шав сицевы́я глаго́лы и моле́ния пре́жде те́мных, ны́не же све́та Христо́ва взыску́ющих люде́й, благове́рный кня́зь со все́м освяще́нным собо́ром умили́ся о́бразу Твоему́, возде́ ру́це свои́ на не́бо и рече́: О всепе́тая Госпоже́ Богоро́дице, благодари́м Тя́, я́ко изба́вила еси́ на́с от нахожде́ния ра́ти си́х иноплеме́нных и пре́жде злы́я враги́, внеза́пу возде́ланныя на́м бра́тия и дру́ги сотвори́ла еси́. Те́мже и по си́х во вре́мя вся́кия ско́рби на́шея и обстоя́ний не забу́ди на́с, те́плая Засту́пнице, да со умиле́нием при́сно вопие́м Ти́:

Ра́дуйся, Све́т невече́рний возсия́вшая и неве́рныя ко Христу́ приве́дшая; ра́дуйся, сердца́ и́х во умиле́ние к восприя́тию и́стины предугото́вившая.

Ра́дуйся, воста́ние иноплеме́нных и и́х противле́ние ди́вно смири́вшая; ра́дуйся, зло́е наме́рение во благо́е преложи́вшая.

Ра́дуйся, погиба́ющих ско́рое взыска́ние; ра́дуйся, все́м хотя́щим спасе́ния ди́вная помо́щнице.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 5.

Бо́га и́стиннаго позна́вши и за́поведем Его́ научи́вшеся, лю́дие му́ромстии единомы́сленнии ко святе́й купе́ли устреми́шася и с весе́лием креща́хуся, ба́ню возрожде́ния прие́млюще, Отцу́ же и Сы́ну и Свято́му Ду́ху вопию́ще: Аллилу́иа.

И́кос 5.

Ви́девше лучу́ пресве́тлу новопросвеще́ннии лю́дие, а́бие по креще́нии с высоты́ осени́вшу, и гро́м, с небесе́ внеза́пу возшуме́вый, слы́шаще, устраши́шася, и вку́пе возра́довася благове́рный кня́зь Константи́н и вси́ при́снии с ни́м. Разуме́ша бо, я́ко бли́з еси́ и́х, и новопросвеще́нныя лю́ди Твоя́ покрыва́еши. Те́мже со стра́хом и ра́достию вопия́ху Ти́:

Ра́дуйся, до́ме, его́же созда́ Себе́ Прему́дрость Бо́жия; ра́дуйся, Же́зле Иесе́ов, от него́же прозябе́ цве́т Христо́в.

Ра́дуйся, Неве́сто Неневе́стная, от Ду́ха Свя́та заче́ншая Сы́на Емману́ила; ра́дуйся, клеще́ та́инственная, О́гнь Божества́ во чре́ве прие́мшая.

Ра́дуйся, престо́ле превознесе́нный, на не́мже пло́тию возсе́де Сы́н Бо́жий; ра́дуйся, врата́ затворе́нная, и́миже про́йде еди́н Христо́с.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 6.

Пропове́дует вся́ страна́ Росси́йская чудеса́, от святы́я ико́ны Твоея́ быва́емая, прославля́ет Тя́, я́ко благу́ю Одиги́трию, и́стинный пу́ть к Ца́рствию Небе́сному все́м ве́рным указу́ющую. Сего́ ра́ди и мы́ со умиле́нием припа́даем к Тебе́, Влады́чице, и бога́тыя Твоя́ ми́лости испове́дующе, Сы́ну Твоему́ и Бо́гу из глубины́ души́ воспева́ем: Аллилу́иа.

И́кос 6.

Возсия́ во гра́де Му́роме све́т ве́ры правосла́вныя Твои́м благоволе́нием, Пречи́стая, и ми́лостию Сы́на Твоего́ и Бо́га и́стинное благоче́стие отто́ле зде́ утверди́ся. Сего́ ра́ди и в благода́рную па́мять чудесе́ Твоего́ но́вый хра́м благоле́пнейший се́й из ка́мене тогда́ воздвиго́ша Ти́, в не́мже да́же и до ны́не сходя́щияся ве́рнии лю́дие Твои́ не престаю́т зва́ти Ти́:

Ра́дуйся, во хра́ме Бо́жием воспита́нная и Сама́ хра́м святы́й Тому́ бы́вшая; ра́дуйся, благода́тию Его́ предочище́нная и на́м во спасе́ние предъизбра́нная.

Ра́дуйся, все́ми доброде́тельми преукраше́нная; ра́дуйся, пала́то пресве́тлая, Влады́це угото́ванная.

Ра́дуйся, Неве́сто ми́ра Созда́теля, земно́му зда́телю на хране́ние вруче́нная; ра́дуйся, го́рних си́л похвало́ и земноро́дных все́х сла́во.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 7.

Хотя́щи от ве́чныя па́губы изба́вити лю́ди му́ромския, дре́вле све́том ве́ры си́х просвети́ла еси́, всенепоро́чная Влады́чице. Твое́ю небе́сною по́мощию пода́ждь и на́м просвеще́ние ума́ и се́рдца на́шего и сподо́би на́с до конца́ жития́ на́шего бо́дренно на́ше спасе́ние соде́лати, да никогда́ у́снем в сме́рть, но да сподо́бимся в го́рнем ца́рствии ве́чно с Тобо́ю воспева́ти Бо́гу: Аллилу́иа.

И́кос 7.

Но́вое зна́мение Твоего́ о гра́де Му́роме блага́го промышле́ния яви́ла еси́, Влады́чице, егда́ во дни́ свята́го Васи́лия Ряза́нскаго злы́я ко́зни диа́вольския я́ве посрами́ла еси́ и прельще́нных люде́й сердца́ покая́нием умили́ла еси́. Те́мже непови́нных изгна́ние и срамоту́ хуле́ний от па́ствы своея́ Христа́ ра́ди сла́дце претерпева́я, святи́тель Бо́жий, пра́вды своея́ от Тебе́ ожида́я и пречи́стому Твоему́ о́бразу усе́рдно поклоня́яся, вопия́ше:

Ра́дуйся, изгна́нных пра́вды ра́ди милосе́рдная засту́пнице; ра́дуйся, поноси́мых за Христа́ приста́нище благооти́шное.

Ра́дуйся, ри́зою Твое́ю от вся́каго зла́ на́с покрыва́ющая; ра́дуйся, прельсти́вшихся врага́ сове́том ско́рое вразумле́ние.

Ра́дуйся, пра́вды Бо́жией ди́вное явле́ние; ра́дуйся, ко́зней диа́вольских коне́чное посрамле́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 8.

Стра́нное мы́слем челове́ческим соверши́ся промышле́нием Твои́м, Пречи́стая, егда́ святи́тель Васи́лий от гра́да Му́ромскаго исхожда́ше: чудотво́рную ико́ну Твою́ на руку́ держа́, на ма́нтию свою́, а́ки на кора́бль, вступи́ и по волна́м ре́чным устреми́ся, во умиле́нии се́рдца поя́ Бо́гу: Аллилу́иа.

И́кос 8.

Ве́сь гра́д Му́ром во у́жасе потрясе́ся, необы́чное пла́вание своего́ изгоня́емаго па́стыря ви́дя. Та́ко у́бо обличи́ся ло́жь оклевета́ющих его́ пра́ведное житие́. Ти́и же лю́ди му́ромстии, вре́менное прельще́ние свое́ окаява́ше, Твое́ же ди́вное промышле́ние сла́вяще, воспева́ху Ти́:

Ра́дуйся, преблагослове́нная Ма́ти Творца́ на́шего и Го́спода; ра́дуйся, смире́нием возвы́шенная и на смире́нныя призира́ющая.

Ра́дуйся, ве́рныя рабы́ Твоя́ николи́же оставля́ющая; ра́дуйся, во изгна́нии с те́ми су́щая.

Ра́дуйся, по ско́рби те́м утеше́ние подаю́щая; ра́дуйся, Ра́дость ми́ру ве́чную роди́вшая.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 9.

Вся́ ко́зни вра́жия посра́мленныя Тобо́ю, Пречи́стая, ви́дя и о вразумле́нии прельще́нных люде́й свои́х те́пле моля́ся, святи́тель Васи́лий от о́чию и́х скры́ся и к но́вому ме́сту селе́ния своего́ и по́двигов напра́вися, поя́ Бо́гу: Аллилу́иа.

И́кос 9.

Вити́й многовеща́нных язы́цы не возмо́гут изъясни́ти но́ваго чудесе́ Твоего́, и́мже уго́дники Твоя́ удиви́ла еси́, Влады́чице, необы́чным от гра́да Му́рома в Ряза́нь преселе́нием. Мы́ же, святу́ю ико́ну Твою́ обстоя́щии и ди́вное промышле́ние Твое́ воспева́ющии, не преста́нем такова́го чудесе́ па́мять твори́ти, и со умиле́нием при́сно взыва́ем Ти́:

Ра́дуйся, гра́д Ряза́нь прише́ствием ико́ны Твоея́ возвесели́вшая; ра́дуйся, ми́лостивным предста́тельством Твои́м Му́ром не оста́вившая.

Ра́дуйся, о́бразом Твои́м струи́ водны́я освяти́вшая; ра́дуйся, ди́вным отше́ствием святи́теля лю́ди му́ромския вразуми́вшая.

Ра́дуйся, к сокруше́нию о гресе́х и к покая́нию те́х обрати́вшая; ра́дуйся, из глубины́ грехо́вныя и на́с воздвиза́ющая.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 10.

Спасе́ние на́ше устроя́я, не преста́л еси́, Бла́же, ди́вными зна́меньми и чудесы́ прославля́ти Всесвяту́ю Ма́терь Твою́ пренепоро́чную, Ю́же приими́ и ны́не, за ны́ моля́щуюся, и бога́тыя ми́лости Твоя́ на́м низпосли́, с любо́вию вопию́щим Тебе́: Аллилу́иа.

И́кос 10.

Стена́ необори́мая и приста́нище небу́рное Ты́ еси́, Богоро́дице Пречи́стая, все́м притека́ющим к Тебе́. Те́мже огради́ и на́с и покры́й от все́х вра́г ви́димых и неви́димых, да с ве́рою покланя́ющеся пречи́стей и цельбоно́сней ико́не Твое́й, ра́достно вопие́м Ти́:

Ра́дуйся, сохраня́ти и спаса́ти все́х призыва́ющих Тя́ обеща́вшая; ра́дуйся, к Сы́ну Твоему́ и Бо́гу моли́твы ве́рных принося́щая.

Ра́дуйся, и Сама́ непреста́нно у престо́ла Его́ моля́щаяся о на́с; ра́дуйся, благода́ть Твою́ ико́нам Твои́м дарова́вшая.

Ра́дуйся, всю́ вселе́нную луча́ми тоя́ озари́вшая; ра́дуйся, ро́да христиа́нскаго похвало́ и непосты́дное упова́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 11.

Пе́ние вся́кое побежда́ется и недоуме́ет язы́к благохвали́ти Тя́ по достоя́нию, пренепоро́чная Влады́чице, мно́жества ра́ди чуде́с, я́же от святы́х ико́н Твои́х при́сно источа́еши, оба́че дерза́ем и мы́ гре́шнии и смире́ннии сво́й гла́с приноси́ти Тебе́. Приими́ у́бо, всеми́лостивая Ма́ти, на́ше усе́рдие, Сы́ну бо Твоему́ пое́м: Аллилу́иа.

И́кос 11.

Светоза́рная свеща́, во гра́де Му́роме возсия́вшая и гра́д Ряза́нь просвеща́ющая, яви́ся преди́вная ико́на Твоя́, Влады́чице, все́м бо притека́ющим к не́й струи́ исцеле́ний излива́ет и чуде́с заря́ми лю́ди Твоя́ весели́т, вся́ подвиза́ющи зва́ти Ти́:

Ра́дуйся, Боже́ственный Све́т неизрече́нно роди́вшая; ра́дуйся, тьму́ сме́ртную рождество́м Твои́м просвети́вшая.

Ра́дуйся, страны́ на́шея неусы́пная покрови́тельнице; ра́дуйся, люде́й правосла́вных ве́рная храни́тельнице.

Ра́дуйся, ра́дости небе́сныя все́м на́м хода́таице; ра́дуйся, при исхо́де на́шем от телесе́ блага́я спору́чнице.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 12.

Благода́ть спаси́тельную Тобо́ю получи́вше, не преста́нем ми́лости Твоея́ пропове́дати, Богоблаже́нная, скорбя́щим бо утеше́ние, неду́жным исцеле́ние, от духо́в нечи́стых стужа́емым свобожде́ние при́сно подае́ши и все́м вся́ку я́зю цели́ши, да благода́рным се́рдцем Бо́гу вопие́м: Аллилу́иа.

И́кос 12.

Пою́ще Твоя́ мно́гая и пресла́вная ро́ду челове́ческому благодея́ния, немо́лчными пе́сньми воспева́ем Тя́, преди́вная Цари́це небесе́ и земли́, в Тебе́ еди́ну на́шу наде́жду и по́мощь полага́ем и Тобо́ю недосто́йнии к Сы́ну Твоему́ и Бо́гу дерзнове́ние и́мамы. Те́мже услы́ши на́с, Влады́чице, и обы́чную благода́ть Твою́ на́м низпосли́, с любо́вию вопию́щим Ти́:

Ра́дуйся, ми́лостей Сы́на Твоего́ и Бо́га на́с сподобля́ющая; ра́дуйся, десну́ю ча́сть моли́твами Твои́ми на́м гре́шным уготовля́ющая.

Ра́дуйся, ста́до Твое́ в жи́знь ве́чную приводя́щая; ра́дуйся, гре́шником ка́ющимся спасе́ние подаю́щая.

Ра́дуйся, Це́ркве Правосла́вныя неруши́мая стено́; ра́дуйся, ро́да христиа́нскаго удобре́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 13.

О всепе́тая Ма́ти, всеми́лостивая Госпоже́, присноблаже́нная Цари́це, приими́ от на́с, недосто́йных, ма́лое сие́ моле́ние, пред пречи́стым Твои́м о́бразом со слеза́ми приноси́мое и, я́коже дре́вле прельще́нныя вразуми́ла еси́ и ка́ющияся поми́ловала еси́, та́ко и ны́не тьму́ грехо́вную в сердца́х на́ших просвети́, бу́рю страсте́й умири́, вся́ раздо́ры и нестрое́ния утоли́ и от бе́д изба́ви все́х, вопию́щих к Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгела гла́с усты́ недосто́йными прино́сим Ти́, Чи́стая, я́ко благоизво́лила еси́ дарова́ти сию́ чудотво́рную ико́ну Твою́ кня́зю Святосла́ву, да препода́ст ю́ в благослове́ние Твое́, ми́лость же Твоя́ на стране́ на́шей бы́сть и ико́на Твоя́ бы́сть на́м вы́ну в зна́мение Твоего́ покро́ва неотсту́пнаго и в при́сное на́м утеше́ние и ра́дование. Благодаря́ще у́бо Тя́, с весе́лием зове́м Ти́:

Ра́дуйся, от а́нгелов воспева́емая и от всея́ тва́ри сла́вимая; ра́дуйся, херуви́м честне́йшая и серафи́м без сравне́ния сла́внейшая.

Ра́дуйся, небе́сных си́л превы́сшая и а́нгельския чи́ны превосходя́щая; ра́дуйся, в честне́й ико́не Твое́й от все́х родо́в покланя́емая.

Ра́дуйся, преблагослове́нная гра́ду Му́рому похвало́; ра́дуйся, присноблаже́нное Ряза́ни украше́ние.

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Конда́к 1.

Избра́нной от все́х родо́в Цари́це и Влады́чице ми́ра, ми́лостию Свое́ю страну́ сию́ озаря́ющей, похва́льное пе́ние прино́сим Ти́, Богоро́дице. Ты́ же, я́ко иму́щая дерзнове́ние к Сы́ну Твоему́ и Бо́гу, от вся́ких на́с бе́д свободи́, да зове́м Ти́:

Ра́дуйся, пречу́дная Влады́чице, земли́ Му́ромския и Ряза́нския ми́лостивая засту́пнице.

Моли́тва.

О Пресвята́я Де́во, Ма́ти Го́спода Вы́шних си́л, Небесе́ и земли́ Цари́це, гра́да и страны́ на́шея Всемогу́щая Засту́пнице! Услы́ши на́с, моля́щихся Тебе́, и испроси́ у Бо́га и Сы́на Твоего́ па́стырем на́шим ре́вность и бде́ние о душа́х на́ших, градоправи́телем – му́дрость и си́лу, судия́м – пра́вду и нелицеприя́тие, наста́вником – ра́зум и смиренному́дрие, супру́гом – любо́вь и согла́сие, ча́дом – послуша́ние, оби́димым – терпе́ние, оби́дящим – стра́х Бо́жий, скорбя́щим – благоду́шие, ра́дующимся – воздержа́ние. На́м же все́м ниспосли́ ду́х ра́зума и благоче́стия, ду́х милосе́рдия и кро́тости, ду́х чистоты́ и пра́вды. Е́й, Госпоже́ Пречи́стая! Умилосе́рдися на немощны́я лю́ди Твоя́: разсе́янныя собери́, заблу́ждшия на пу́ть пра́вый наста́ви, неду́гующия уврачу́й, ста́рость поддержи́, ю́ныя уцелому́дри, младе́нцы воспита́й и при́зри на все́х на́с призре́нием ми́лостиваго Твоего́ заступле́ния. Ми́лостива на́м бу́ди зде́ и на Стра́шном Суде́ Сы́на Твоего́. Ты́ бо еси́, Госпоже́, сла́ва Небе́сных и упова́ние земны́х, Ты́ по Бо́зе на́ша наде́жда и Засту́пница все́х, притека́ющих к Тебе́ с ве́рою. Тебе́ у́бо мо́лимся и Тебе́, я́ко Всемогу́щей Помо́щнице, са́ми себе́ и дру́г дру́га и всю́ жи́знь на́шу предае́м, ны́не, и при́сно, и во ве́ки веко́в. Ами́нь.