Конда́к 1.

Избра́нней от все́х родо́в Бо́жией Ма́тери и Цари́це, припа́дая пред святы́м о́бразом Ея́, моли́твенное поклоне́ние прино́сим. Ты́ же, Всеблага́я, я́ко иму́щая си́лу непостижи́мую и любо́вь неизрече́нную, приими́ моли́тву недосто́йных ра́б Твои́х, почита́ющих кре́стныя страда́ния Сы́на Твоего́ и Бо́га на́шего, и сотвори́ с на́ми по милосе́рдию Твоему́, да зове́м Ти́:

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

И́кос 1.

А́нгели предста́ша к держи́мому во объя́тиих Твои́х Сы́ну Твоему́ и Бо́гу на́шему, Его́же Пречи́стое Те́ло благообра́зный Ио́сиф с дре́ва сне́м, плащани́цею чи́стою обви́в, и воня́ми во гро́бе но́ве покры́в, положи́. Мы́ же, со стра́хом покланя́ющеся страсте́м Сы́на Твоего́, зове́м Ти́:

Ра́дуйся, А́нгелов удивле́ние; ра́дуйся, спасе́ния на́шего глави́зно.

Ра́дуйся, я́ко Ду́х Святы́й на́йде на Тя́ и си́ла Вы́шняго осени́ Тя́; ра́дуйся, я́ко рожде́нный от Тебе́ е́сть Сы́н Бо́жий.

Ра́дуйся, я́ко Госпо́дь с Тобо́ю и Тобо́ю с на́ми; ра́дуйся, в Рождестве́ и по Рождестве́ Де́вою пребы́вшая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 2.

Ви́дяще милосе́рдие Твое́ неизрече́нное, Влады́чице, и мно́гая чудеса́ Тобо́ю присноявля́емыя чрез святы́я ико́ны Твоя́, велича́ем Тя́, возвели́чившую ро́д на́ш Твои́м благоволе́нием, и с любо́вию покланя́емся пречи́стаго ли́ка Твоего́ изображе́нию, зову́ще Сы́ну Твоему́ Христу́ Бо́гу: Аллилу́иа.

И́кос 2.

Ра́зум немощны́й не мо́жет пости́гнути глубину́ смире́ннаго служе́ния Твоего́, Пречи́стая, на земли́ Искупи́телю на́шему, не име́вшему где́ главу́ подклони́ти: во дни́ бо уничиже́ния и страда́ния Его́ ору́жие сме́ртное прохожда́ше се́рдце Твое́. Сего́ ра́ди душе́ю сболе́знующе, глаго́лем Ти́ такова́я:

Ра́дуйся, Носи́теля вселе́нныя во объя́тиих Свои́х носи́вшая; ра́дуйся, Зако́н Госпо́день на скрижа́лех серде́ц на́ших напису́ющая.

Ра́дуйся, я́ко Тобо́ю превознесе́ся челове́ческое естество́; ра́дуйся, я́ко Тобо́ю сокруши́ся зми́ева глава́.

Ра́дуйся, Небе́снаго Иерусали́ма врата́ на́м отверза́ющая; ра́дуйся, ча́дами Бо́жиими бы́ти на́с сподобля́ющая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 3.

Си́лою благода́тною свы́ше укрепля́ема, Ма́ти Бо́жия, претерпе́ла еси́ ско́рбь ве́лию у Креста́ Сы́на Твоего́, се́рдцем ма́терним го́рестно стеня́: «Боле́зни, и ско́рби, и воздыха́ния обрето́ша Мя́, увы́ Мне́», Творцу́ же вопию́ще: Аллилу́иа.

И́кос 3.

Иму́щи в Себе́ оби́льно благода́ть Бо́жию, Пренепоро́чная, все́ житие́ Твое́ отдала́ еси́ благи́м попече́нием о Сы́не Твое́м и Го́споде, вся́ глаго́лы Его́ соблюда́ющи в се́рдце Свое́м. Мы́ же, гре́шнии, ско́рбное житие́ Твое́ на земли́ воспомина́юще, прино́сим Ти́ смире́нно поклоне́ние, зову́ще:

Ра́дуйся, Влады́ку вселе́нныя во убо́зем верте́пе роди́вшая; ра́дуйся, ста́рца Симео́на прорече́ние слы́шавшая и в се́рдце Свое́м глаго́лы его́ слага́вшая.

Ра́дуйся, во Еги́пет от беззако́ннаго И́рода с Сы́ном Твои́м бежа́вшая; ра́дуйся, О́трока Сы́на Своего́ с вели́кою ско́рбию во Иерусали́ме иска́вшая.

Ра́дуйся, сраспина́вшаяся Ему́, егда́ кре́стная страда́ния и сме́рть Его́ на Кресте́ зре́ла еси́; ра́дуйся, я́ко во Иоа́нне Апо́столе сы́на Себе́, по глаго́лу Иису́са, обрела́ еси́.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 4.

Бу́рею грехо́вною смуща́еми и сно́м нераде́ния отягча́еми, припа́даем святе́й ико́не Твое́й, е́йже первопи́санней иногда́ рекла́ еси́: «С си́м о́бразом благода́ть Моя́ и си́ла» и про́сим предста́тельства и заступле́ния Твоего́ пред Го́сподем о на́с, гре́шных, Ему́же, и́мя Твое́ во вселе́нней просла́вльшему, пое́м: Аллилу́иа.

И́кос 4.

Слы́ша Госпо́дь Твоя́ о на́с хода́тайства, Цари́це Небе́сная, исполня́ет вся́, порече́нному: «Проси́, Ма́ти Моя́, зане́ не отвращу́ся Тебе́, но вся́ проше́ния Твоя́ испо́лню». Сего́ ра́ди, ра́достию о се́м исполня́еми, Тебе́, я́ко Бо́жией Ма́тери, глаго́лати дерза́ем:

Ра́дуйся, ско́рби и сле́зы на́ша в ра́дость претворя́ющая; ра́дуйся, изнемога́ющим во искуше́ниих Милосе́рдая Помо́щнице.

Ра́дуйся, до́мы на́ша от огня́ и ины́х разруше́ний спаса́ющая; ра́дуйся, от та́тей и злы́х люде́й ве́рныя огражда́ющая.

Ра́дуйся, клеветы́ и ко́зни враго́в на́ших разруша́ющая; ра́дуйся, стра́х сме́рти в душа́х на́ших побежда́ющая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 5.

Боготе́чная звезда́ во тьме́ грехо́вней блужда́ющим яви́лася еси́, Пресвята́я Де́во: Твои́м бо вразумле́нием гре́шников от беззако́нных де́л отвраща́еши и к Бо́гу с покая́нием прибега́ти подвиза́еши, да вопию́т Ему́ во умиле́нии: Аллилу́иа.

И́кос 5.

Ви́дящи, Премилосе́рдая Влады́чице, ве́лие сокруше́ние на́ше о гресе́х, и́миже распина́ем Сы́на Твоего́ и Бо́га на́шего, не отврати́ся от на́с, к Тебе́ бо еди́ней прибега́ем, грехо́внаго жития́ исправле́ния прося́ще: не и́мамы бо ины́я по́мощи, ни ина́го предста́тельства ра́зве Тебе́, Пречи́стая Де́во. Сего́ ра́ди Тебе́, с любо́вию ру́це Свои́ к на́м простира́ющей, уми́льно зове́м:

Ра́дуйся, моля́щаяся за ве́сь ми́р пред Престо́лом Вседержи́теля; ра́дуйся, моли́твами Твои́ми свобожда́ющая на́с пла́мене гее́нскаго.

Ра́дуйся, враго́в на́ших ви́димых и неви́димых побежда́ющая; ра́дуйся, вхо́д в Ца́рствие Небе́сное на́м отверза́ющая.

Ра́дуйся, пла́мень страсте́й от челове́к отгоня́ющая; ра́дуйся, све́том пречи́стыя души́ Твоея́ все́х просвеща́ющая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 6.

Пропове́дует ми́р ве́сь ве́лия страда́ния Твоя́, Ма́ти Бо́жия: предстоя́ще бо у Креста́ Сы́на Твоего́ и Бо́га на́шего, и зря́щи Его́ на дре́ве ви́сяща, рыда́ющи вопия́ла еси́: «Увы́ Мне́, Ча́до Мое́! Увы́ мне́, Све́те Мо́й, и утро́ба Моя́ возлю́бленная!» Мы́ же Творцу́ и Спаси́телю на́шему, во́льная страда́ния за ро́д челове́ческий претерпе́вшему, вопие́м: Аллилу́иа.

И́кос 6.

Возсия́ на́м Со́лнце пра́вды, Христо́с Бо́г от Твои́х пречи́стых ложе́сн, во́лею на́с ра́ди пострада́вый и сме́ртию Свое́ю все́м живо́т ве́чный дарова́вый. Ты́ же, Многоско́рбная Ма́ти Бо́жия, у Креста́ Сы́на Твоего́ предстоя́щи и ма́тернею любо́вию к Нему́ горя́ще, рекла́ еси́: «А́ще и стра́ждеши на Кресте́, но ве́м Тя́, пре́жде денни́цы рожде́нна». Те́мже вопие́м Ти́:

Ра́дуйся, у Креста́ Зижди́теля Твоего́ предстоя́вшая; ра́дуйся, до после́дняго часа́ с Го́сподем Твои́м не разлуча́вшаяся.

Ра́дуйся, ко Второ́му прише́ствию Сы́на Твоего́ на́с приуготовля́ющая; ра́дуйся, на Стра́шнем Суде́ Его́ на́ша ми́лостивая Засту́пнице.

Ра́дуйся, о проще́нии грехо́в на́ших усе́рдная Хода́таице; ра́дуйся, ве́чнаго ра́дования на́м ще́драя Пода́тельнице.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 7.

Хотя́щим на́м воспева́ти стра́сти Сы́на Твоего́, помози́, Влады́чице, и не отри́ни моля́щихся пред чудотво́рною ико́ною Твое́ю, на не́йже Тя́ зри́м, сла́дкое Свое́ Ча́до и люби́мое во объя́тиих ма́терних держа́щую и вопию́щую го́рце пе́снь: Аллилу́иа.

И́кос 7.

Ди́вная чудеса́ Твоя́ показа́л еси́ на́м, Го́споди, в Пречи́стей Твое́й Ма́тери и ди́вную дарова́л еси́ на́м Ея́ ико́ну, па́че луче́й со́лнечных просвеща́ющую лю́ди, я́ко Са́мую зря́щих Богоро́дицу и ве́рою серде́чною от души́ любо́вию Е́й вопию́щих:

Ра́дуйся, Ду́ха Свята́го обита́лище; ра́дуйся, простра́нное селе́ние Бо́га Сло́ва.

Ра́дуйся, черто́же всесве́тлый; ра́дуйся, би́сер Боже́ственный произве́дшая.

Ра́дуйся, Рождество́м Твои́м ра́йския две́ри на́м отверза́ющая; ра́дуйся, зна́мение ми́лости Бо́жией Собо́ю на́м яви́вшая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 8.

Стра́нствующе во юдо́ли се́й, скорбе́й и боле́зней преиспо́лненней, пре́лестьми ми́ра сего́ и наве́ты духо́в зло́бы искуша́еми быва́ем; в Тебе́ же, Влады́чице, неисчерпа́емый исто́чник благода́тных дарова́ний обрета́юще, Небе́снаго гра́да Иерусали́ма дости́гнути упова́ем, взыва́юще Сы́ну Твоему́ и Спаси́телю на́шему Христу́ Бо́гу: Аллилу́иа.

И́кос 8.

Вси́ ро́ди блажа́т Тя́, Всенепоро́чная Де́во, ви́дяще Тя́, держа́щую во объя́тиих Свои́х Боже́ственнаго А́гнца, за грехи́ ми́ра закла́ннаго, Его́же с пла́чем во гро́бе полага́ющи, вопия́ла еси́: «Хоте́ла бы́х с Тобо́ю умре́ти, не терплю́ бо без дыха́ния ме́ртва Тя́ ви́дети». Сего́ ра́ди со умиле́нием зове́м Ти́:

Ра́дуйся, безсме́ртныя жи́зни ве́рных сподобля́ющая; ра́дуйся, оби́тели ра́йския благоче́стно живу́щим уготовля́ющая.

Ра́дуйся, Хода́таице ве́чнаго ра́дования почита́ющим стра́сти Сы́на Твоего́; ра́дуйся, покрыва́ющая Свое́ю благода́тию всю́ вселе́нную.

Ра́дуйся, вся́ претерпе́вшая без ро́пота, я́ко раба́ Госпо́дня; ра́дуйся, Цари́це небесе́ и земли́, прие́млющая моли́твы ра́б Свои́х.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 9.

Все́ естество́ челове́ческое похва́льныя пе́сни прино́сит Тебе́, Всеблага́я Влады́чице, Рождество́м Свои́м ра́дость всему́ ми́ру прине́сшей, по́слежде ско́рбь ве́лию име́вшей, ви́дящи Сы́на Своего́ возлю́бленнаго на Кресте́ стра́ждуща и во гро́бе полага́ема. Мы́ же, с любо́вию умиле́нное пе́ние прино́сим Ти́, Пречи́стая, пою́ще Всемогу́щему Бо́гу: Аллилу́иа.

И́кос 9.

Вети́и суему́дреннии не мо́гут пости́гнути ма́терния страда́ния Твоя́, и́хже претерпе́ла еси́ у Креста́ Сы́на Твоего́: Ты́ бо, Пречи́стая, зря́щи Того́ на дре́ве ви́сяща, пла́чущи взыва́ла еси́: «Где́ заше́л еси́, вселюбе́знейший Иису́се Мо́й, Сы́не Мо́й, и Го́споди? Не оста́ви Мя́ Еди́ну, Христе́, Ро́ждшую Тя́». Мы́ же, недосто́йнии, умиле́нными гла́сы зове́м Ти́:

Ра́дуйся, во́льная страда́ния Сы́на Своего́ на Кресте́ ви́девшая; ра́дуйся, Ча́до Свое́ любе́зное уя́звленным зре́вшая.

Ра́дуйся, страда́нием Его́ спострада́вшая; ра́дуйся, бездыха́нное Те́ло Сы́на Своего́ возлю́бленнаго лобза́вшая.

Ра́дуйся, Све́та Своего́ гро́бу преда́вшая; ра́дуйся, се́рдце го́рем истерза́нное име́вшая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 10.

Спасти́ся все́м ве́рным хотя́щи, оби́льно на вся́ притека́ющия к Тебе́, Богоро́дице Де́во, да́ры Твоея́ благода́тныя по́мощи излива́еши и Твои́м ма́терним покро́вом от ко́зней вра́жиих все́х огражда́еши, ве́рно вопию́щих Бо́гу: Аллилу́иа.

И́кос 10.

Стено́ю необори́мою и огражде́нием бу́ди на́м, Влады́чице, изнемога́ющим от скорбе́й и боле́зней, вы́ну на ны́ находя́щих, Ты́ бо и Сама́ страда́ла еси́, Сы́на Своего́ на Кресте́ распина́ема зря́щи. Ны́не же услы́ши на́с, с мольбо́ю вопию́щих Ти́:

Ра́дуйся, отъе́млющая вся́ку сле́зу от лю́те стра́ждущих; ра́дуйся, погиба́ющих гре́шников спаса́ющая.

Ра́дуйся, от страсте́й на́с избавля́ющая; ра́дуйся, се́рдцу сокруше́нному отра́ду подаю́щая.

Ра́дуйся, все́м хотя́щим улучи́ти христиа́нскую кончи́ну Помо́щнице; ра́дуйся, на Стра́шнем Суде́ Бо́жием на́ша Засту́пнице.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 11.

Пою́т Тя́ чи́ни А́нгельстии, Благослове́нная Богоро́дице, с ни́миже и ро́д челове́ческий Тя́ славосло́вит, я́ко Безневе́стную Ма́терь Творца́ и Спаси́теля на́шего, кре́стными страда́ниями от сме́рти ве́чныя на́с свободи́вшаго, вопия́ Ему́: Аллилу́иа.

И́кос 11.

Я́ко светоза́рное со́лнце, возсия́ в Це́ркви Правосла́вней о́браз Тво́й, Пресвята́я Де́во, «Не рыда́й Мене́, Ма́ти» имену́емый, на не́мже обетова́ние Спаси́теля чту́ще: «Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно, я́ко Бо́г, ве́рою и любо́вию Тя́ велича́ющия», ве́рнии освяща́ются, сохраня́ются и спаса́ются от бе́д, вопию́ще Ти́ с любо́вию такова́я:

Ра́дуйся, борю́щимся со страстьми́ кре́пкая Помо́щнице; ра́дуйся, оби́димых и угнета́емых Засту́пнице.

Ра́дуйся, ни́щих и убо́гих ра́дование; ра́дуйся, боля́щих со одра́ боле́зненнаго возста́ние.

Ра́дуйся, ю́ных Вразуми́тельнице и Наста́внице; ра́дуйся, ста́рцев вспомоществова́ние и укрепле́ние.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 12.

Благода́ть Твою́ ниспосли́ на́м, Преблагослове́нная Богоро́дице, почита́ющим святу́ю ико́ну Твою́, и покланя́ющимся пречестны́м страсте́м Сы́на Твоего́, и с ве́рою пою́щим Ему́: Аллилу́иа.

И́кос 12.

Пою́ще Твое́ всемо́щное предста́тельство за ве́сь ми́р и воспомина́юще чудеса́, явле́нная Тобо́ю чрез святу́ю ико́ну Твою́, мо́лим Тя́, Всеблага́я Засту́пнице на́ша: покры́й на́с держа́вным Твои́м покро́вом, бу́ди на́м непреста́нная Помо́щница и Изба́вительница от вся́ких бе́д и искуше́ний вра́жиих, да вси́ благода́рно восхваля́ем Тя́:

Ра́дуйся, Спаси́теля ми́ру ро́ждшая; ра́дуйся, во Успе́нии Твое́м на́с не оставля́ющая.

Ра́дуйся, ми́лостию Свое́ю на́с покрыва́ющая; ра́дуйся, Цве́те Неувяда́емый, на́с облагоуха́ющий.

Ра́дуйся, ве́рных благода́тию Свое́ю охраня́ющая; ра́дуйся, оте́честву на́шему покро́ве и защи́то.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 13.

О Всепе́тая Ма́ти Сладча́йшаго Спаси́теля на́шего, Го́спода Иису́са Христа́! Приими́ воздыха́ния и сле́зы на́ша, почита́ющих кре́стныя страда́ния Сы́на Твоего́ и Бо́га на́шего, и изба́ви от скорбе́й, боле́зней и ве́чныя сме́рти все́х, упова́ющих на неизрече́нное Твое́ милосе́рдие и вопию́щих Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели предста́ша к держи́мому во объя́тиих Твои́х Сы́ну Твоему́ и Бо́гу на́шему, Его́же Пречи́стое Те́ло благообра́зный Ио́сиф с дре́ва сне́м, плащани́цею чи́стою обви́в, и воня́ми во гро́бе но́ве покры́в, положи́. Мы́ же, со стра́хом покланя́ющеся страсте́м Сы́на Твоего́, зове́м Ти́:

Ра́дуйся, А́нгелов удивле́ние; ра́дуйся, спасе́ния на́шего глави́зно.

Ра́дуйся, я́ко Ду́х Святы́й на́йде на Тя́ и си́ла Вы́шняго осени́ Тя́; ра́дуйся, я́ко рожде́нный от Тебе́ е́сть Сы́н Бо́жий.

Ра́дуйся, я́ко Госпо́дь с Тобо́ю и Тобо́ю с на́ми; ра́дуйся, в Рождестве́ и по Рождестве́ Де́вою пребы́вшая.

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Конда́к 1.

Избра́нней от все́х родо́в Бо́жией Ма́тери и Цари́це, припа́дая пред святы́м о́бразом Ея́, моли́твенное поклоне́ние прино́сим. Ты́ же, Всеблага́я, я́ко иму́щая си́лу непостижи́мую и любо́вь неизрече́нную, приими́ моли́тву недосто́йных ра́б Твои́х, почита́ющих кре́стныя страда́ния Сы́на Твоего́ и Бо́га на́шего, и сотвори́ с на́ми по милосе́рдию Твоему́, да зове́м Ти́:

Ра́дуйся, Пренепоро́чная Де́во Богоро́дице, у Креста́ Сы́на Своего́ все́х на́с усынови́вшая.

Моли́тва.

О Преблагослове́нная и Многоми́лостивая Влады́чице ми́ра! Се́ мы, гре́шнии, на святы́й о́браз Тво́й взира́юще и на не́м Тя́ в ско́рби и сострада́нии Распя́тому за на́с Христу́ Спаси́телю предстоя́щу ви́дяще, усе́рдно мо́лим Тя́, изве́стную о на́с к Сы́ну Твоему́ Моли́твенницу: не оста́ви на́с в де́нь испыта́ния и ско́рби, но во искуше́ниих и напа́стех, на́м быва́емых, огради́ на́с всечестны́м покро́вом Твои́м от вра́г ви́димых и неви́димых и да́ждь на́м си́лу, во е́же всесоверше́нную и благу́ю во́лю Творца́ и ми́ра Влады́ки твори́ти. Зри́ши бо, ми́лостивая Засту́пнице на́ша, коли́ко грехо́м вся́ческим подве́ржени есмы́: не то́кмо бо во́лею согреша́ем, но и нево́лею в многоразли́чныя прегреше́ния впа́даем. Сего́ ра́ди к Тебе́, держа́вней Устрои́тельнице спасе́ния христиа́нскаго, прибега́ем и умиле́нно вопие́м: у́м на́ш позна́нием Боже́ственныя и́стины просвети́, се́рдце на́ше теплото́ю христиа́нския любве́ и спаси́тельных жела́ний согрева́й, во́лю же на́шу в нелицеме́рнем за́поведей Госпо́дних исполне́нии утверди́. Е́й, Госпоже́ Преми́лостивая, прини́кни с высоты́ небе́сныя к воздыха́нием и моли́тве на́с, гре́шных: исцели́ боле́зни неду́жных, умири́ сердца́ озло́бленных, да́ждь терпе́ние стра́ждущим, внуши́ стра́х Бо́жий оби́дящим, укрепи́ гони́мыя за пра́вду, сироты́ и вдовы́ защити́, пода́ждь утеше́ние пла́чущим, испроси́ проще́ние ка́ющимся, де́монскую же бу́рю страсте́й во гре́шных душа́х ути́ши и в сердца́х, чту́щих Тя́, Христо́ву кро́тость и любо́вь вкорени́ и ду́хом милосе́рдия и сострада́ния сия́ утверди́; отпа́дшыя же от ве́ры еретики́ и отсту́пники к позна́нию и́стины напра́ви и уста́ нечести́вых, ху́лящих Святу́ю Це́рковь и ве́ру Правосла́вную понося́щих, загради́. Отше́дшим от жития́ сего́ отце́м, и бра́тиям, и сестра́м на́шим, о Ма́ти Бо́жия, проще́ние грехо́в и преднача́тие блаже́нства ве́чнаго испроси́. Егда́ же и на́шея кончи́ны ча́с прибли́жится, тогда́ у́бо, о Влады́чице, приими́ ду́ши на́ша и в со́нме пра́ведных сию́ упоко́й, иде́же ли́цы А́нгел и святы́х уго́дник немо́лчно славосло́вят держа́ву и ми́лость Отца́ и Сы́на и Свята́го Ду́ха и Твое́ ма́тернее о на́с предста́тельство и заступле́ние, ны́не, и при́сно, и во ве́ки веко́в. Ами́нь.